੪. ਚਤੁਤ੍ਥੋ ਪਰਿਚ੍ਛੇਦੋ
ਏਕਵਿਧਾਦਿਨਿਦ੍ਦੇਸੋ
੧੨੭. ਇਤੋ ਪਰਂ ਪਵਕ੍ਖਾਮਿ, ਨਯਮੇਕਵਿਧਾਦਿਕਂ;
ਆਭਿਧਮ੍ਮਿਕਭਿਕ੍ਖੂਨਂ, ਬੁਦ੍ਧਿਯਾ ਪਨ ਵੁਦ੍ਧਿਯਾ.
੧੨੮. ਸਬ੍ਬਮੇਕਵਿਧਂ ਚਿਤ੍ਤਂ, ਵਿਜਾਨਨਸਭਾਵਤੋ;
ਦੁਵਿਧਞ੍ਚ ਭਵੇ ਚਿਤ੍ਤਂ, ਅਹੇਤੁਕਸਹੇਤੁਤੋ.
੧੨੯. ਪੁਞ੍ਞਾਪੁਞ੍ਞਵਿਪਾਕਾ ਹਿ, ਕਾਮੇ ਦਸ ਚ ਪਞ੍ਚ ਚ;
ਕ੍ਰਿਯਾ ਤਿਸ੍ਸੋਤਿ ਸਬ੍ਬੇਪਿ, ਅਟ੍ਠਾਰਸ ਅਹੇਤੁਕਾ.
੧੩੦. ਏਕਸਤ੍ਤਤਿ ਸੇਸਾਨਿ, ਚਿਤ੍ਤੁਪ੍ਪਾਦਾ ਮਹੇਸਿਨਾ;
ਸਹੇਤੁਕਾਤਿ ਨਿਦ੍ਦਿਟ੍ਠਾ, ਤਾਦਿਨਾ ਹੇਤੁਵਾਦਿਨਾ.
੧੩੧. ਸਵਤ੍ਥੁਕਾਵਤ੍ਥੁਕਤੋ, ਤਥੋਭਯਵਸੇਨ ਚ;
ਸਬ੍ਬਂ ਵੁਤ੍ਤਪਕਾਰਂ ਤੁ, ਤਿਵਿਧਂ ਹੋਤਿ ਮਾਨਸਂ.
੧੩੨. ਸਬ੍ਬੋ ਕਾਮਵਿਪਾਕੋ ਚ, ਰੂਪੇ ਪਞ੍ਚਦਸਾਪਿ ਚ;
ਆਦਿਮਗ੍ਗੋ ਸਿਤੁਪ੍ਪਾਦੋ, ਮਨੋਧਾਤੁ ਕ੍ਰਿਯਾਪਿ ਚ.
੧੩੩. ਦੋਮਨਸ੍ਸਦ੍ਵਯਞ੍ਚਾਪਿ, ਤੇਚਤ੍ਤਾਲੀਸ ਮਾਨਸਾ;
ਨੁਪ੍ਪਜ੍ਜਨ੍ਤਿ ਵਿਨਾ ਵਤ੍ਥੁਂ, ਏਕਨ੍ਤੇਨ ਸਵਤ੍ਥੁਕਾ.
੧੩੪. ਅਰੂਪਾਵਚਰਪਾਕਾ ਚ, ਏਕਨ੍ਤੇਨ ਅਵਤ੍ਥੁਕਾ;
ਦ੍ਵਾਚਤ੍ਤਾਲੀਸ ਸੇਸਾਨਿ, ਚਿਤ੍ਤਾਨੁਭਯਥਾ ਸਿਯੁਂ.
੧੩੫. ਏਕੇਕਾਰਮ੍ਮਣਂ ਚਿਤ੍ਤਂ, ਪਞ੍ਚਾਰਮ੍ਮਣਮੇਵ ਚ;
ਛਲ਼ਾਰਮ੍ਮਣਕਞ੍ਚੇਤਿ, ਏਵਮ੍ਪਿ ਤਿਵਿਧਂ ਸਿਯਾ.
੧੩੬. ਵਿਞ੍ਞਾਣਾਨਿ ਚ ਦ੍ਵੇਪਞ੍ਚ, ਅਟ੍ਠ ਲੋਕੁਤ੍ਤਰਾਨਿ ਚ;
ਸਬ੍ਬਂ ਮਹਗ੍ਗਤਞ੍ਚੇਵ, ਠਪੇਤ੍ਵਾਭਿਞ੍ਞਮਾਨਸਂ.
੧੩੭. ਤੇਚਤ੍ਤਾਲੀਸ ਵਿਞ੍ਞੇਯ੍ਯਾ, ਏਕੇਕਾਰਮ੍ਮਣਾ ਪਨ;
ਮਨੋਧਾਤੁਤ੍ਤਯਂ ਤਤ੍ਥ, ਪਞ੍ਚਾਰਮ੍ਮਣਮੀਰਿਤਂ.
੧੩੮. ਤੇਚਤ੍ਤਾਲੀਸ ਸੇਸਾਨਿ, ਛਲ਼ਾਰਮ੍ਮਣਿਕਾ ਮਤਾ;
ਤਥਾ ਚ ਤਿਵਿਧਂ ਚਿਤ੍ਤਂ, ਕੁਸਲਾਕੁਸਲਾਦਿਤੋ.
੧੩੯. ਅਹੇਤੁਂ ਏਕਹੇਤੁਞ੍ਚ, ਦ੍ਵਿਹੇਤੁਞ੍ਚ ਤਿਹੇਤੁਕਂ;
ਏਵਂ ਚਤੁਬ੍ਬਿਧਂ ਚਿਤ੍ਤਂ, ਵਿਞ੍ਞਾਤਬ੍ਬਂ ਵਿਭਾਵਿਨਾ.
੧੪੦. ਹੇਟ੍ਠਾ ਮਯਾਪਿ ਨਿਦ੍ਦਿਟ੍ਠਾ, ਅਟ੍ਠਾਰਸ ਅਹੇਤੁਕਾ;
ਵਿਚਿਕਿਚ੍ਛੁਦ੍ਧਚ੍ਚਸਂਯੁਤ੍ਤਂ, ਏਕਹੇਤੁਮੁਦੀਰਿਤਂ.
੧੪੧. ਕਾਮੇ ਦ੍ਵਾਦਸਧਾ ਪੁਞ੍ਞ-ਵਿਪਾਕਕ੍ਰਿਯਤੋ ਪਨ;
ਦਸਧਾਕੁਸਲਾ ਚਾਤਿ, ਬਾਵੀਸਤਿ ਦੁਹੇਤੁਕਾ.
੧੪੨. ਕਾਮੇ ਦ੍ਵਾਦਸਧਾ ਪੁਞ੍ਞ-ਵਿਪਾਕਕ੍ਰਿਯਤੋ ਪਨ;
ਸਬ੍ਬਂ ਮਹਗ੍ਗਤਞ੍ਚੇਵ, ਅਪ੍ਪਮਾਣਂ ਤਿਹੇਤੁਕਂ.
੧੪੩. ਰੂਪੀਰਿਯਾਪਥਵਿਞ੍ਞਤ੍ਤਿ-ਜਨਕਾਜਨਕਾਦਿਤੋ;
ਏਵਞ੍ਚਾਪਿ ਹਿ ਤਂ ਚਿਤ੍ਤਂ, ਹੋਤਿ ਸਬ੍ਬਂ ਚਤੁਬ੍ਬਿਧਂ.
੧੪੪. ਦ੍ਵਾਦਸਾਕੁਸਲਾ ਤਤ੍ਥ, ਕੁਸਲਾ ਕਾਮਧਾਤੁਯਾ;
ਤਥਾ ਦਸ ਕ੍ਰਿਯਾ ਕਾਮੇ, ਅਭਿਞ੍ਞਾਮਾਨਸਂ ਦ੍ਵਯਂ.
੧੪੫. ਸਮੁਟ੍ਠਾਪੇਨ੍ਤਿ ਰੂਪਾਨਿ, ਕਪ੍ਪੇਨ੍ਤਿ ਇਰਿਯਾਪਥਂ;
ਜਨਯਨ੍ਤਿ ਚ ਵਿਞ੍ਞਤ੍ਤਿਂ, ਇਮੇ ਦ੍ਵਤ੍ਤਿਂਸ ਮਾਨਸਾ.
੧੪੬. ਕੁਸਲਾ ਚ ਕ੍ਰਿਯਾ ਚੇਵ, ਤੇ ਮਹਗ੍ਗਤਮਾਨਸਾ;
ਅਟ੍ਠਾਨਾਸਵਚਿਤ੍ਤਾਨਿ, ਛਬ੍ਬੀਸਤਿ ਚ ਮਾਨਸਾ.
੧੪੭. ਸਮੁਟ੍ਠਾਪੇਨ੍ਤਿ ਰੂਪਾਨਿ, ਕਪ੍ਪੇਨ੍ਤਿ ਇਰਿਯਾਪਥਂ;
ਚੋਪਨਂ ਨ ਚ ਪਾਪੇਨ੍ਤਿ, ਦ੍ਵਿਕਿਚ੍ਚਾ ਨਿਯਤਾ ਇਮੇ.
੧੪੮. ਠਪੇਤ੍ਵਾ ਦਸ ਵਿਞ੍ਞਾਣੇ, ਵਿਪਾਕਾ ਦ੍ਵੀਸੁ ਭੂਮਿਸੁ;
ਕ੍ਰਿਯਾ ਚੇਵ ਮਨੋਧਾਤੁ, ਇਮਾਨੇਕੂਨਵੀਸਤਿ.
੧੪੯. ਸਮੁਟ੍ਠਾਪੇਨ੍ਤਿ ਰੂਪਾਨਿ, ਨ ਕਰੋਨ੍ਤਿਤਰਦ੍ਵਯਂ;
ਪੁਨ ਦ੍ਵੇਪਞ੍ਚਵਿਞ੍ਞਾਣਾ, ਵਿਪਾਕਾ ਚ ਅਰੂਪਿਸੁ.
੧੫੦. ਸਬ੍ਬੇਸਂ ਸਨ੍ਧਿਚਿਤ੍ਤਞ੍ਚ, ਚੁਤਿਚਿਤ੍ਤਞ੍ਚਾਰਹਤੋ;
ਨ ਕਰੋਨ੍ਤਿ ਤਿਕਿਚ੍ਚਾਨਿ, ਇਮੇ ਸੋਲ਼ਸ ਮਾਨਸਾ.
੧੫੧. ਏਕਦ੍ਵਿਤਿਚਤੁਟ੍ਠਾਨ-ਪਞ੍ਚਟ੍ਠਾਨਪਭੇਦਤੋ;
ਪਞ੍ਚਧਾ ਚਿਤ੍ਤਮਕ੍ਖਾਸਿ, ਪਞ੍ਚਨਿਮ੍ਮਲਲੋਚਨੋ.
੧੫੨. ਕੁਸਲਾਕੁਸਲਾ ਸਬ੍ਬੇ, ਚਿਤ੍ਤੁਪ੍ਪਾਦਾ ਮਹਾਕ੍ਰਿਯਾ;
ਮਹਗ੍ਗਤਾ ਕ੍ਰਿਯਾ ਚੇਵ, ਚਤ੍ਤਾਰੋ ਫਲਮਾਨਸਾ.
੧੫੩. ਸਬ੍ਬੇਵ ਪਞ੍ਚਪਞ੍ਞਾਸ, ਨਿਪ੍ਪਪਞ੍ਚੇਨ ਸਤ੍ਥੁਨਾ;
ਜਵਨਟ੍ਠਾਨਤੋਯੇਵ, ਏਕਟ੍ਠਾਨੇ ਨਿਯਾਮਿਤਾ.
੧੫੪. ਪੁਨ ਦ੍ਵੇਪਞ੍ਚਵਿਞ੍ਞਾਣਾ, ਦਸ੍ਸਨੇ ਸਵਨੇ ਤਥਾ;
ਘਾਯਨੇ ਸਾਯਨੇ ਠਾਨੇ, ਫੁਸਨੇ ਪਟਿਪਾਟਿਯਾ.
੧੫੫. ਮਨੋਧਾਤੁਤ੍ਤਿਕਂ ਠਾਨੇ, ਆਵਜ੍ਜਨੇ ਪਟਿਚ੍ਛਨੇ;
ਅਟ੍ਠਸਟ੍ਠਿ ਭਵਨ੍ਤੇਤੇ, ਏਕਟ੍ਠਾਨਿਕਤਂ ਗਤਾ.
੧੫੬. ਪੁਨ ਦ੍ਵਿਟ੍ਠਾਨਿਕਂ ਨਾਮ, ਚਿਤ੍ਤਦ੍ਵਯਮੁਦੀਰਿਤਂ;
ਸੋਮਨਸ੍ਸਯੁਤਂ ਪਞ੍ਚ-ਦ੍ਵਾਰੇ ਸਨ੍ਤੀਰਣਂ ਸਿਯਾ.
੧੫੭. ਤਦਾਰਮ੍ਮਣਂ ਛਦ੍ਵਾਰੇ, ਬਲਵਾਰਮ੍ਮਣੇ ਸਤਿ;
ਤਥਾ ਵੋਟ੍ਠਬ੍ਬਨਂ ਹੋਤਿ, ਪਞ੍ਚਦ੍ਵਾਰੇਸੁ ਵੋਟ੍ਠਬੋ.
੧੫੮. ਮਨੋਦ੍ਵਾਰੇਸੁ ਸਬ੍ਬੇਸਂ, ਹੋਤਿ ਆਵਜ੍ਜਨਂ ਪਨ;
ਇਦਂ ਦ੍ਵਿਟ੍ਠਾਨਿਕਂ ਨਾਮ, ਹੋਤਿ ਚਿਤ੍ਤਦ੍ਵਯਂ ਪਨ.
੧੫੯. ਪਟਿਸਨ੍ਧਿਭਵਙ੍ਗਸ੍ਸ, ਚੁਤਿਯਾ ਠਾਨਤੋ ਪਨ;
ਮਹਗ੍ਗਤਵਿਪਾਕਾ ਤੇ, ਨਵ ਤਿਟ੍ਠਾਨਿਕਾ ਮਤਾ.
੧੬੦. ਅਟ੍ਠ ਕਾਮਾ ਮਹਾਪਾਕਾ, ਪਟਿਸਨ੍ਧਿਭਵਙ੍ਗਤੋ;
ਤਦਾਰਮ੍ਮਣਤੋ ਚੇਵ, ਚੁਤਿਟ੍ਠਾਨਵਸੇਨ ਚ.
੧੬੧. ਚਤੁਟ੍ਠਾਨਿਕਚਿਤ੍ਤਾਨਿ, ਅਟ੍ਠ ਹੋਨ੍ਤੀਤਿ ਨਿਦ੍ਦਿਸੇ;
ਕੁਸਲਾਕੁਸਲਪਾਕਂ ਤੁ-ਪੇਕ੍ਖਾਸਹਗਤਦ੍ਵਯਂ.
੧੬੨. ਸਨ੍ਤੀਰਣਂ ਭਵੇ ਪਞ੍ਚ-ਦ੍ਵਾਰੇ ਛਦ੍ਵਾਰਿਕੇਸੁ ਚ;
ਤਦਾਰਮ੍ਮਣਤਂ ਯਾਤਿ, ਬਲਵਾਰਮ੍ਮਣੇ ਸਤਿ.
੧੬੩. ਪਟਿਸਨ੍ਧਿਭਵਙ੍ਗਾਨਂ, ਚੁਤਿਟ੍ਠਾਨਵਸੇਨ ਚ;
ਪਞ੍ਚਟ੍ਠਾਨਿਕਚਿਤ੍ਤਨ੍ਤਿ, ਇਦਂ ਦ੍ਵਯਮੁਦੀਰਿਤਂ.
੧੬੪. ਪਞ੍ਚਕਿਚ੍ਚਂ ਦ੍ਵਯਂ ਚਿਤ੍ਤਂ, ਚਤੁਕਿਚ੍ਚਂ ਪਨਟ੍ਠਕਂ;
ਤਿਕਿਚ੍ਚਂ ਨਵਕਂ ਦ੍ਵੇ ਤੁ, ਦ੍ਵਿਕਿਚ੍ਚਾ ਸੇਸਮੇਕਕਂ.
੧੬੫. ਭਵਙ੍ਗਾਵਜ੍ਜਨਞ੍ਚੇਵ, ਦਸ੍ਸਨਂ ਸਮ੍ਪਟਿਚ੍ਛਨਂ;
ਸਨ੍ਤੀਰਣਂ ਵੋਟ੍ਠਬ੍ਬਨਂ, ਜਵਨਂ ਭਵਤਿ ਸਤ੍ਤਮਂ.
੧੬੬. ਛਬ੍ਬਿਧਂ ਹੋਤਿ ਤਂ ਛਨ੍ਨਂ, ਵਿਞ੍ਞਾਣਾਨਂ ਪਭੇਦਤੋ;
ਸਤ੍ਤਧਾ ਸਤ੍ਤਵਿਞ੍ਞਾਣ-ਧਾਤੂਨਂ ਤੁ ਪਭੇਦਤੋ.
੧੬੭. ਏਕੇਕਾਰਮ੍ਮਣਂ ਛਕ੍ਕਂ, ਪਞ੍ਚਾਰਮ੍ਮਣਭੇਦਤੋ;
ਛਲ਼ਾਰਮ੍ਮਣਤੋ ਚੇਵ, ਹੋਤਿ ਅਟ੍ਠਵਿਧਂ ਮਨੋ.
੧੬੮. ਤਤ੍ਥ ਦ੍ਵੇਪਞ੍ਚਵਿਞ੍ਞਾਣਾ, ਹੋਨ੍ਤਿ ਏਕੇਕਗੋਚਰਾ;
ਰੂਪਾਰਮ੍ਮਣਿਕਾ ਦ੍ਵੇ ਤੁ, ਦ੍ਵੇ ਦ੍ਵੇ ਸਦ੍ਦਾਦਿਗੋਚਰਾ.
੧੬੯. ਸਬ੍ਬਂ ਮਹਗ੍ਗਤਂ ਚਿਤ੍ਤਂ, ਪਞ੍ਚਾਭਿਞ੍ਞਾਵਿਵਜ੍ਜਿਤਂ;
ਸਬ੍ਬਂ ਲੋਕੁਤ੍ਤਰਞ੍ਚੇਤਿ, ਏਕੇਕਾਰਮ੍ਮਣਂ ਭਵੇ.
੧੭੦. ਏਕੇਕਾਰਮ੍ਮਣਂ ਛਕ੍ਕ-ਮਿਦਂ ਞੇਯ੍ਯਂ ਵਿਭਾਵਿਨਾ;
ਪਞ੍ਚਾਰਮ੍ਮਣਿਕਂ ਨਾਮ, ਮਨੋਧਾਤੁਤ੍ਤਯਂ ਭਵੇ.
੧੭੧. ਕਾਮਾਵਚਰਚਿਤ੍ਤਾਨਿ, ਚਤ੍ਤਾਲੀਸਂ ਤਥੇਕਕਂ;
ਅਭਿਞ੍ਞਾਨਿ ਚ ਸਬ੍ਬਾਨਿ, ਛਲ਼ਾਰਮ੍ਮਣਿਕਾਨਿਤਿ.
੧੭੨. ਚਿਤ੍ਤਂ ਨਵਵਿਧਂ ਹੋਤਿ, ਸਤ੍ਤਵਿਞ੍ਞਾਣਧਾਤੁਸੁ;
ਪਚ੍ਛਿਮਞ੍ਚ ਤਿਧਾ ਕਤ੍ਵਾ, ਕੁਸਲਾਕੁਸਲਾਦਿਤੋ.
੧੭੩. ਪੁਞ੍ਞਾਪੁਞ੍ਞਵਸੇਨੇਵ, ਵਿਪਾਕਕ੍ਰਿਯਭੇਦਤੋ;
ਛਸਤ੍ਤਤਿਵਿਧੋ ਭੇਦੋ, ਮਨੋਵਿਞ੍ਞਾਣਧਾਤੁਯਾ.
੧੭੪. ਮਨੋਧਾਤੁਂ ਦ੍ਵਿਧਾ ਕਤ੍ਵਾ, ਵਿਪਾਕਕ੍ਰਿਯਭੇਦਤੋ;
ਨਵਧਾ ਪੁਬ੍ਬਵੁਤ੍ਤੇਹਿ, ਦਸਧਾ ਹੋਤਿ ਮਾਨਸਂ.
੧੭੫. ਧਾਤੁਦ੍ਵਯਂ ਤਿਧਾ ਕਤ੍ਵਾ, ਪਚ੍ਛਿਮਂ ਪੁਨ ਪਣ੍ਡਿਤੋ;
ਏਕਾਦਸਵਿਧਂ ਚਿਤ੍ਤਂ, ਹੋਤੀਤਿ ਪਰਿਦੀਪਯੇ.
੧੭੬. ਮਨੋਵਿਞ੍ਞਾਣਧਾਤੁਮ੍ਪਿ, ਕੁਸਲਾਕੁਸਲਾਦਿਤੋ;
ਚਤੁਧਾ ਵਿਭਜਿਤ੍ਵਾਨ, ਵਦੇ ਦ੍ਵਾਦਸਧਾ ਠਿਤਂ.
੧੭੭. ਭਵੇ ਚੁਦ੍ਦਸਧਾ ਚਿਤ੍ਤਂ, ਚੁਦ੍ਦਸਟ੍ਠਾਨਭੇਦਤੋ;
ਪਟਿਸਨ੍ਧਿਭਵਙ੍ਗਸ੍ਸ, ਚੁਤਿਯਾਵਜ੍ਜਨਸ੍ਸ ਚ.
੧੭੮. ਪਞ੍ਚਨ੍ਨਂ ਦਸ੍ਸਨਾਦੀਨਂ, ਸਮ੍ਪਟਿਚ੍ਛਨਚੇਤਸੋ;
ਸਨ੍ਤੀਰਣਸ੍ਸ ਵੋਟ੍ਠਬ੍ਬ-ਜਵਨਾਨਂ ਵਸੇਨ ਚ.
੧੭੯. ਤਦਾਰਮ੍ਮਣਚਿਤ੍ਤਸ੍ਸ, ਤਥੇਵ ਠਾਨਭੇਦਤੋ;
ਏਵਂ ਚੁਦ੍ਦਸਧਾ ਚਿਤ੍ਤਂ, ਹੋਤੀਤਿ ਪਰਿਦੀਪਯੇ.
੧੮੦. ਭੂਮਿਪੁਗ੍ਗਲਨਾਨਾਤ੍ਤ-ਵਸੇਨ ਚ ਪਵਤ੍ਤਿਤੋ;
ਬਹੁਧਾ ਪਨਿਦਂ ਚਿਤ੍ਤਂ, ਹੋਤੀਤਿ ਚ ਵਿਭਾਵਯੇ.
੧੮੧. ਏਕਵਿਧਾਦਿਨਯੇ ਪਨਿਮਸ੍ਮਿਂ,
ਯੋ ਕੁਸਲੋ ਮਤਿਮਾ ਇਧ ਭਿਕ੍ਖੁ;
ਤਸ੍ਸਭਿਧਮ੍ਮਗਤਾ ਪਨ ਅਤ੍ਥਾ,
ਹਤ੍ਥਗਤਾਮਲਕਾ ਵਿਯ ਹੋਨ੍ਤਿ.
ਇਤਿ ਅਭਿਧਮ੍ਮਾਵਤਾਰੇ ਏਕਵਿਧਾਦਿਨਿਦ੍ਦੇਸੋ ਨਾਮ
ਚਤੁਤ੍ਥੋ ਪਰਿਚ੍ਛੇਦੋ.