੧. ਚਿਤ੍ਤਵਿਭਾਗੋ
੧. ਸਰੂਪਸਙ੍ਗਹਕਥਾ
੨. ਚਿਤ੍ਤਂ ਚੇਤਸਿਕਂ ਰੂਪਂ, ਨਿਬ੍ਬਾਨਨ੍ਤਿ ਨਿਰੁਤ੍ਤਰੋ;
ਚਤੁਧਾ ਦੇਸਯੀ ਧਮ੍ਮੇ, ਚਤੁਸਚ੍ਚਪ੍ਪਕਾਸਨੋ.
੩. ਚਿਤ੍ਤਮੇਕੂਨਨਵੁਤਿਵਿਧਂ ਤਤ੍ਥ ਵਿਭਾਵਯੇ;
ਏਕਨਵੁਤਿਵਿਧਂ ਵਾ, ਏਕਵੀਸਸਤਮ੍ਪਿ ਵਾ.
੪. ਦ੍ਵੇਪਞ੍ਞਾਸ ਸਰੂਪੇਨ, ਧਮ੍ਮਾ ਚੇਤਸਿਕਾ ਮਤਾ;
ਚਿਤ੍ਤੁਪ੍ਪਾਦਵਸਾ ਭਿਨ੍ਨਾ, ਸਮ੍ਪਯੋਗਾਨੁਸਾਰਤੋ.
੫. ਅਟ੍ਠਵੀਸਵਿਧਂ ਰੂਪਂ, ਭੂਤੋਪਾਦਾਯਭੇਦਤੋ;
ਦੁਵਿਧਂ ਰੂਪਰੂਪਂ ਤੁ, ਅਟ੍ਠਾਰਸਵਿਧਂ ਭਵੇ.
੬. ਨਿਬ੍ਬਾਨਂ ਪਨ ਦੀਪੇਨ੍ਤਿ, ਅਸਙ੍ਖਤਮਨੁਤ੍ਤਰਂ;
ਅਤ੍ਥਨਾਮਵਸਾ ਦ੍ਵੇਧਾ, ਪਞ੍ਞਤ੍ਤੀਤਿ ਪਵੁਚ੍ਚਤਿ.
੭. ਤੇਸਂ ਦਾਨਿ ਪਵਕ੍ਖਾਮਿ, ਵਿਭਾਗਂ ਤੁ ਯਥਾਕ੍ਕਮਂ;
ਚਤੁਧਾ ਪਰਮਤ੍ਥਾਨਂ, ਦ੍ਵਿਧਾ ਪਞ੍ਞਤ੍ਤਿਯਾ ਕਥਂ.
੮. ਕੁਸਲਾਦਿਵਿਭਾਗੇਨ, ਤਤ੍ਥ ਚਿਤ੍ਤਂ ਚਤੁਬ੍ਬਿਧਂ;
ਤਥਾ ਭੂਮਿਵਿਭਾਗੇਨ, ਕਾਮਭੂਮਾਦਿਤੋ ਕਥਂ.
੯. ਸੋਮਨਸ੍ਸਸਹਗਤਂ, ਉਪੇਕ੍ਖਾਸਹਿਤਂ ਤਥਾ;
ਞਾਣੇਨ ਸਮ੍ਪਯੁਤ੍ਤਞ੍ਚ, ਵਿਪ੍ਪਯੁਤ੍ਤਨ੍ਤਿ ਭੇਦਿਤਂ.
੧੦. ਅਸਙ੍ਖਾਰਂ ਸਸਙ੍ਖਾਰਮਿਤਿ ਭਿਨ੍ਨਂ ਪੁਨਟ੍ਠਧਾ;
ਕਾਮਾਵਚਰਕੁਸਲਂ, ਕਾਮੇ ਸੁਗਤਿਸਾਧਕਂ.
੧੧. ਤਕ੍ਕਚਾਰਪੀਤਿਸੁਖ-ਚਿਤ੍ਤਸ੍ਸੇਕਗ੍ਗਤਾਯੁਤਂ;
ਪਠਮਜ੍ਝਾਨਕੁਸਲਂ, ਪਞ੍ਚਙ੍ਗਿਕਮੁਦਾਹਟਂ.
੧੨. ਵਿਤਕ੍ਕਹੀਨਂ ਦੁਤਿਯਂ, ਝਾਨਂ ਤੁ ਚਤੁਰਙ੍ਗਿਕਂ;
ਵਿਚਾਰਹੀਨਂ ਤਤਿਯਂ, ਝਾਨਂ ਪਨ ਤਿਵਙ੍ਗਿਕਂ.
੧੩. ਪੀਤਿਹੀਨਂ ਚਤੁਤ੍ਥਞ੍ਚ, ਉਪੇਕ੍ਖੇਕਗ੍ਗਤਾਯੁਤਂ;
ਪਞ੍ਚਮਞ੍ਚ ਪਕਾਸੇਨ੍ਤਿ, ਉਭਯਮ੍ਪਿ ਦੁਵਙ੍ਗਿਕਂ.
੧੪. ਏਵਂ ਝਾਨਙ੍ਗਭੇਦੇਨ, ਚਿਤ੍ਤਂ ਪਞ੍ਚਵਿਧਂ ਭਵੇ;
ਰੂਪਾਵਚਰਕੁਸਲਂ, ਰੂਪਭੂਮਿਪਵਤ੍ਤਕਂ.
੧੫. ਆਕਾਸਾਨਞ੍ਚਾਯਤਨਂ, ਕੁਸਲਂ ਪਠਮਂ ਭਵੇ;
ਵਿਞ੍ਞਾਣਞ੍ਚਾਯਤਨਨ੍ਤਿ, ਦੁਤਿਯਂ ਤਤਿਯਂ ਤਥਾ.
੧੬. ਆਕਿਞ੍ਚਞ੍ਞਾਯਤਨਂ ਤੁ, ਚਤੁਤ੍ਥਂ ਪਨ ਮਾਨਸਂ;
ਨੇਵਸਞ੍ਞਾਨਾਸਞ੍ਞਾਯ-ਤਨਞ੍ਚੇਤਿ ਚਤੁਬ੍ਬਿਧਂ.
੧੭. ਆਰੁਪ੍ਪਕੁਸਲਂ ਨਾਮ, ਉਪੇਕ੍ਖੇਕਗ੍ਗਤਾਯੁਤਂ;
ਦੁਵਙ੍ਗਿਕਮਿਦਂ ਸਬ੍ਬਂ, ਆਰੁਪ੍ਪਭਵਸਾਧਕਂ.
੧੮. ਸੋਤਾਪਤ੍ਤਿਮਗ੍ਗਚਿਤ੍ਤਂ, ਪਠਮਾਨੁਤ੍ਤਰਂ ਤਥਾ;
ਸਕਦਾਗਾਮਿ ਅਨਾਗਾਮਿ, ਅਰਹਤ੍ਤਨ੍ਤਿ ਸਬ੍ਬਥਾ.
੧੯. ਚਤੁਧਾ ਮਗ੍ਗਭੇਦੇਨ, ਝਾਨਭੇਦੇਨ ਪਞ੍ਚਧਾ;
ਵੀਸਤਾਪਰਿਯਾਪਨ੍ਨਕੁਸਲਂ ਦ੍ਵਯਮਿਸ੍ਸਿਤਂ.
੨੦. ਇਤ੍ਥਂ ਭੂਮਿਵਿਭਾਗੇਨ, ਕੁਸਲਂ ਤੁ ਚਤੁਬ੍ਬਿਧਂ;
ਏਕਵੀਸਾਪਿ ਬਾਵੀਸਂ, ਸਤ੍ਤਤਿਂਸਵਿਧਮ੍ਪਿ ਵਾ.
੨੧. ਸੋਮਨਸ੍ਸਸਹਗਤਂ, ਉਪੇਕ੍ਖਾਸਹਿਤਂ ਤਥਾ;
ਦਿਟ੍ਠਿਗਤਸਮ੍ਪਯੁਤ੍ਤਂ, ਵਿਪ੍ਪਯੁਤ੍ਤਨ੍ਤਿ ਭੇਦਿਤਂ.
੨੨. ਅਸਙ੍ਖਾਰਂ ਸਸਙ੍ਖਾਰਮਿਤਿ ਭਿਨ੍ਨਂ ਪੁਨਟ੍ਠਧਾ;
ਲੋਭਮੂਲਂ ਪਕਾਸੇਨ੍ਤਿ, ਲੋਭਮੋਹਦ੍ਵਿਹੇਤੁਕਂ.
੨੩. ਦੋਮਨਸ੍ਸਸਹਗਤਂ, ਪਟਿਘੇਨ ਸਮਾਯੁਤਂ;
ਅਸਙ੍ਖਾਰਂ ਸਸਙ੍ਖਾਰਮਿਤਿ ਭਿਨ੍ਨਂ ਦ੍ਵਿਧਾ ਪਨ.
੨੪. ਦੋਸਮੂਲਂ ਪਕਾਸੇਨ੍ਤਿ, ਦੋਸਮੋਹਦ੍ਵਿਹੇਤੁਕਂ;
ਵਿਚਿਕਿਚ੍ਛਾਸਹਗਤਂ, ਉਦ੍ਧਚ੍ਚਸਹਿਤਨ੍ਤਿ ਚ.
੨੫. ਉਪੇਕ੍ਖਾਵੇਦਨਾਯੁਤ੍ਤਂ, ਮੋਮੂਹਂ ਦੁਵਿਧਂ ਪਨ;
ਮੋਹਮੂਲਂ ਪਕਾਸੇਨ੍ਤਿ, ਮੋਹੇਨੇਵੇਕਹੇਤੁਕਂ.
੨੬. ਦ੍ਵਾਦਸਾਕੁਸਲਾ ਨਾਮ, ਚਤੁਰਾਪਾਯਸਾਧਕਾ;
ਏਤੇ ਸੁਗਤਿਯਞ੍ਚਾਪਿ, ਵਿਪਤ੍ਤਿਫਲਦਾਯਕਾ.
੨੭. ਚਕ੍ਖੁਸੋਤਘਾਨਜਿਵ੍ਹਾ-ਕਾਯਵਿਞ੍ਞਾਣਨਾਮਕਾ;
ਪਞ੍ਚਵਿਞ੍ਞਾਣਯੁਗਲ਼ਾ, ਯੁਗਲ਼ਂ ਸਮ੍ਪਟਿਚ੍ਛਨਂ.
੨੮. ਸਨ੍ਤੀਰਣਦ੍ਵਯਞ੍ਚੇਵ, ਉਪੇਕ੍ਖਾਸਹਿਤਂ ਤਥਾ;
ਪੁਞ੍ਞਾਪੁਞ੍ਞਵਸੇਨੇਵ, ਵਿਪਾਕਾ ਦੁਵਿਧਾ ਠਿਤਾ.
੨੯. ਉਪੇਕ੍ਖਾਸਹਿਤਾ ਤਤ੍ਥ, ਮਾਨਸਾ ਦ੍ਵਾਦਸੇਰਿਤਾ;
ਕਾਯਵਿਞ੍ਞਾਣਯੁਗਲ਼ਂ, ਸੁਖਦੁਕ੍ਖਯੁਤਂ ਕਮਾ.
੩੦. ਸੋਮਨਸ੍ਸਸਹਗਤਂ, ਯਂ ਸਨ੍ਤੀਰਣਮਾਨਸਂ;
ਤਂ ਪੁਞ੍ਞਪਾਕਮੇਵਾਹੁ, ਪਾਪਪਾਕਂ ਨ ਵਿਜ੍ਜਤਿ.
੩੧. ਪਞ੍ਚਦ੍ਵਾਰਮਨੋਦ੍ਵਾਰ-ਵਸੇਨ ਦੁਵਿਧਂ ਪਨ;
ਉਪੇਕ੍ਖਾਵੇਦਨਾਯੁਤ੍ਤਂ, ਕ੍ਰਿਯਾਵਜ੍ਜਨਨਾਮਕਂ.
੩੨. ਸੋਮਨਸ੍ਸਸਹਗਤਂ, ਹਸਿਤੁਪ੍ਪਾਦਮਾਨਸਂ;
ਕ੍ਰਿਯਾਜਵਨਮਿਚ੍ਚੇਵਂ, ਤਿਵਿਧਾਹੇਤੁਕਕ੍ਰਿਯਾ.
੩੩. ਅਟ੍ਠੇਵ ਪੁਞ੍ਞਪਾਕਾਨਿ, ਪਾਪਪਾਕਾਨਿ ਸਤ੍ਤਧਾ;
ਕ੍ਰਿਯਚਿਤ੍ਤਾਨਿ ਤੀਣੀਤਿ, ਅਟ੍ਠਾਰਸ ਅਹੇਤੁਕਾ.
੩੪. ਸਪੁਞ੍ਞੇਹਿ ਸਮਾਨਾ ਚ, ਮਹਾਪਾਕਮਹਾਕ੍ਰਿਯਾ;
ਮਹਗ੍ਗਤਕ੍ਰਿਯਾ ਪਾਕਾ, ਫਲਚਿਤ੍ਤਾਨਿ ਚ ਕਮਾ.
੩੫. ਇਤ੍ਥਮੇਕੂਨਨਵੁਤਿ-ਵਿਧਂ ਚਿਤ੍ਤਂ ਭਵੇ ਤਥਾ;
ਏਕਨਵੁਤਿਵਿਧਂ ਵਾ, ਏਕਵੀਸਸਤਮ੍ਪਿ ਵਾ.
੩੬. ਤਕ੍ਕਚਾਰਪੀਤਿਸੁਖਚਿਤ੍ਤਸ੍ਸੇਕਗ੍ਗਤਾਯੁਤਂ;
ਸੋਤਾਪਤ੍ਤਿਮਗ੍ਗਚਿਤ੍ਤਂ, ਪਠਮਜ੍ਝਾਨਿਕਂ ਮਤਂ.
੩੭. ਦੁਤਿਯਂ ਤਕ੍ਕਤੋ ਹੀਨਂ, ਤਤਿਯਂ ਤੁ ਵਿਚਾਰਤੋ;
ਚਤੁਤ੍ਥਂ ਪੀਤਿਤੋ ਹੀਨਂ, ਉਪੇਕ੍ਖੇਕਗ੍ਗਤਾਯੁਤਂ.
੩੮. ਪਞ੍ਚਮਨ੍ਤਿ ਚ ਪਞ੍ਚੇਤੇ, ਪਠਮਾਨੁਤ੍ਤਰਾ ਮਤਾ;
ਦਿਟ੍ਠਿਕਙ੍ਖਾਸੀਲਬ੍ਬਤਪਰਾਮਾਸਪ੍ਪਹਾਯਿਨੋ.
੩੯. ਤਥੇਵ ਸਕਦਾਗਾਮਿਮਗ੍ਗਚਿਤ੍ਤਞ੍ਚ ਪਞ੍ਚਧਾ;
ਰਾਗਦੋਸਮੋਹਤ੍ਤਯਤਨੁਤ੍ਤਕਰਮੀਰਿਤਂ.
੪੦. ਕਾਮਦੋਸਸਮੁਗ੍ਘਾਤਕਰਂ ਨਿਰਵਸੇਸਤੋ;
ਤਤਿਯਾਨੁਤ੍ਤਰਞ੍ਚਾਪਿ, ਕੁਸਲਂ ਪਞ੍ਚਧਾ ਤਥਾ.
੪੧. ਰੂਪਰਾਗਾਰੂਪਰਾਗਮਾਨੁਦ੍ਧਚ੍ਚਾਪਿ ਚਾਪਰਾ;
ਅਵਿਜ੍ਜਾ ਚੇਤਿ ਪਞ੍ਚੁਦ੍ਧਂਭਾਗਿਯਾਨਮਸੇਸਤੋ.
੪੨. ਸਂਯੋਜਨਾਨਂ ਸੇਸਾਨਂ, ਸਮੁਗ੍ਘਾਤਕਰਂ ਪਰਂ;
ਚਤੁਤ੍ਥਾਨੁਤ੍ਤਰਂ ਮਗ੍ਗਚਿਤ੍ਤਂ ਪਞ੍ਚਵਿਧਨ੍ਤਿ ਚ.
੪੩. ਚਤ੍ਤਾਰਿ ਪਞ੍ਚਕਾਨੇਵ, ਮਗ੍ਗੇਸੁ ਚ ਫਲੇਸੁ ਚ;
ਸੇਸਾਨਿ ਚੇਕਾਸੀਤੀਤਿ, ਏਕਵੀਸਸਤਂ ਭਵੇ.
੪੪. ਲੋਕੁਤ੍ਤਰਾਨਂ ਅਟ੍ਠਨ੍ਨਂ, ਇਚ੍ਚੇਵਂ ਪਞ੍ਚਧਾ ਪੁਨ;
ਝਾਨਙ੍ਗਮਗ੍ਗਬੋਜ੍ਝਙ੍ਗ-ਵਿਭਾਗਾਯ ਯਥਾਰਹਂ.
੪੫. ਪਾਦਕਜ੍ਝਾਨਮਾਮਟ੍ਠਝਾਨਂ ਅਜ੍ਝਾਸਯੋ ਤਥਾ;
ਵੁਟ੍ਠਾਨਗਾਮਿਨੀ ਚੇਵ, ਨਿਯਾਮੇਤਿ ਵਿਪਸ੍ਸਨਾਤਿ.
ਇਤਿ ਚਿਤ੍ਤਵਿਭਾਗੇ ਸਰੂਪਸਙ੍ਗਹਕਥਾ ਨਿਟ੍ਠਿਤਾ.
ਪਠਮੋ ਪਰਿਚ੍ਛੇਦੋ.