੨੬. ਵੁਟ੍ਠਾਨਵਿਸੁਦ੍ਧਿਕਥਾ

੧੦੧੯. ਤਸ੍ਸੇਵਂ ਪਟਿਪਨ੍ਨਸ੍ਸ, ਸਿਖਾਪਤ੍ਤਾ ਵਿਪਸ੍ਸਨਾ;

ਵੁਟ੍ਠਾਨਗਾਮਿਨੀ ਨਾਮ, ਯਦਾ ਹੋਤਿ ਤਦਾ ਪਨ.

੧੦੨੦. ਪਰਿਕਮ੍ਮੋਪਚਾਰਾਨੁਲੋਮਗੋਤ੍ਰਭੁਤੋ ਪਰਂ;

ਮਗ੍ਗੋ ਤਤੋ ਫਲਂ ਹੋਤਿ, ਭਵਙ੍ਗਾ ਪਚ੍ਚਵੇਕ੍ਖਣਾ.

੧੦੨੧. ਪਰਿਕਮ੍ਮੋਪਚਾਰਾਨੁਲੋਮਸਙ੍ਖਾਤਗੋਚਰਾ;

ਮਗ੍ਗਸ੍ਸਾਵਜ੍ਜਨਂ ਹੁਤ੍ਵਾ, ਨਿਬ੍ਬਾਨੇ ਹੋਤਿ ਗੋਤ੍ਰਭੁ.

੧੦੨੨. ਚਤੁਤ੍ਥਂ ਪਞ੍ਚਮਂ ਵਾਥ, ਛਟ੍ਠਂ ਵਾਪਿ ਯਥਾਰਹਂ;

ਅਪ੍ਪੇਤਿ ਮਗ੍ਗਜਵਨਂ, ਨਿਬ੍ਬਾਨੇ ਸਕਿਮੇਵ ਤਂ.

੧੦੨੩. ਤਤੋ ਫਲਾਨਿ ਤੀਣਿ ਦ੍ਵੇ, ਏਕਂ ਵਾਥ ਯਥਾਕ੍ਕਮਂ;

ਮਗ੍ਗਾਵਸੇਸਨਿਰੋਧਮਗ੍ਗਵੁਟ੍ਠਾਨਵੀਥਿਯਂ.

੧੦੨੪. ਤਤੋ ਭਵਙ੍ਗਪਾਤੋਵ,

ਤਂ ਛੇਤ੍ਵਾ ਪਚ੍ਚਵੇਕ੍ਖਣਾ;

ਤਿਸ੍ਸੋ ਪਞ੍ਚਵਿਧਾ ਹੋਨ੍ਤਿ,

ਯਥਾਯੋਗਂ ਤਥਾ ਹਿ ਚ.

੧੦੨੫. ਮਗ੍ਗਂ ਫਲਞ੍ਚ ਨਿਬ੍ਬਾਨਂ, ਅਵਸ੍ਸਂ ਪਚ੍ਚਵੇਕ੍ਖਤਿ;

ਹੀਨੇ ਕਿਲੇਸੇ ਸੇਸੇ ਚ, ਪਚ੍ਚਵੇਕ੍ਖਤਿ ਵਾ ਨ ਵਾ.

੧੦੨੬. ਤਤੋ ਚ ਪੁਨ ਸਙ੍ਖਾਰੇ, ਵਿਪਸ੍ਸਨ੍ਤੋ ਯਥਾ ਪੁਰੇ;

ਅਪ੍ਪੇਤਿ ਅਨੁਪੁਬ੍ਬੇਨ, ਸੇਸਮਗ੍ਗਫਲਾਨਿ ਚ.

੧੦੨੭. ਤਤ੍ਥ ਵੁਚ੍ਚਨ੍ਤਿ ਨਿਬ੍ਬਾਨ-ਫਲਮਗ੍ਗਵਿਪਸ੍ਸਨਾ;

ਸੁਞ੍ਞਤਾ ਚਾਨਿਮਿਤ੍ਤਾ ਚ, ਤਥਾਪਣਿਹਿਤਾਨਿ ਚ.

੧੦੨੮. ਸੁਞ੍ਞਤਾਵਿਪਸ੍ਸਨਾਦਿਨਾਮੇਨ ਹਿ ਵਿਪਸ੍ਸਤਿ;

ਵਿਮੋਕ੍ਖਮੁਖਭੂਤਾਤਿ, ਤਿਵਿਧਾ ਭਾਜਿਤਾ ਤਥਾ.

੧੦੨੯. ਸੁਞ੍ਞਤਾਦਿਕਨਾਮੇਨ, ਵਿਮੋਕ੍ਖਾ ਤਿਵਿਧਾ ਮਤਾ;

ਨਿਬ੍ਬਾਨਫਲਮਗ੍ਗਾ ਚ, ਸਮਾਪਤ੍ਤਿਸਮਾਧਯੋ.

੧੦੩੦. ਤਤ੍ਥੇਵ ਪਠਮਭੂਮਿਂ, ਪਤ੍ਤੋ ਅਰਿਯਪੁਗ੍ਗਲੋ;

ਸਤ੍ਤਕ੍ਖਤ੍ਤੁਪਰਮੋ ਸੋ, ਸੋਤਾਪਨ੍ਨੋਤਿ ਵੁਚ੍ਚਤਿ.

੧੦੩੧. ਪਤ੍ਤੋ ਦੁਤਿਯਭੂਮਿਞ੍ਚ, ਸਕਦਾਗਾਮਿਨਾਮਕੋ;

ਸਕਿਮੇਵ ਇਮਂ ਲੋਕਂ, ਆਗਨ੍ਤ੍ਵਾ ਹੋਤਿ ਮਾਨੁਸਂ.

੧੦੩੨. ਪਤ੍ਤੋ ਤਤਿਯਭੂਮਿਞ੍ਚ, ਅਨਾਗਾਮੀਤਿ ਵੁਚ੍ਚਤਿ;

ਬ੍ਰਹ੍ਮਲੋਕਾ ਅਨਾਗਨ੍ਤ੍ਵਾ, ਇਧਕਾਮੋਪਪਤ੍ਤਿਯਾ.

੧੦੩੩. ਪਤ੍ਤੋ ਚਤੁਤ੍ਥਭੂਮਿਞ੍ਚ, ਅਰਹਾ ਅਗ੍ਗਪੁਗ੍ਗਲੋ;

ਦਿਟ੍ਠੇਵ ਧਮ੍ਮੇ ਦੁਕ੍ਖਗ੍ਗਿਂ, ਨਿਬ੍ਬਾਪੇਤੀਤਿ ਵੁਚ੍ਚਤਿ.

੧੦੩੪. ਇਤਿ ਮਗ੍ਗਫਲਟ੍ਠਾਨਂ, ਵਸਾ ਅਰਿਯਪੁਗ੍ਗਲਾ;

ਦ੍ਵਿਧਾਪਿ ਚਤੁਧਾ ਯੁਗ੍ਗਾ, ਅਟ੍ਠ ਹੋਨ੍ਤਿ ਵਿਭਾਗਤੋ.

੧੦੩੫. ਉਭਤੋਭਾਗਵਿਮੁਤ੍ਤ-

ਵਿਭਾਗਾਦਿਵਸਾ ਪਨ;

ਵਿਭਤ੍ਤਾ ਹੋਨ੍ਤਿ ਸਤ੍ਤੇਤੇ,

ਯਥਾਯੋਗਂ ਤਥਾ ਹਿ ਚ.

੧੦੩੬. ਸਦ੍ਧਾਧੁਰਸ੍ਸਾਨਿਚ੍ਚਤੋ, ਵੁਟ੍ਠਾਨਂ ਦੁਕ੍ਖਤੋਪਿ ਚ;

ਪਞ੍ਞਾਧੁਰਸ੍ਸਾਨਤ੍ਤਤੋ, ਇਤਿ ਦੀਪੇਨ੍ਤਿ ਪਣ੍ਡਿਤਾ.

੧੦੩੭. ਸਦ੍ਧਾਨੁਸਾਰਿ ਆਦਿਮ੍ਹਿ, ਮਜ੍ਝੇ ਸਦ੍ਧਾਵਿਮੁਤ੍ਤਕੋ;

ਅਨ੍ਤੇ ਪਞ੍ਞਾਵਿਮੁਤ੍ਤੋਵ, ਤਸ੍ਮਾ ਸਦ੍ਧਾਧੁਰੋ ਸਿਯਾ.

੧੦੩੮. ਧਮ੍ਮਾਨੁਸਾਰਿ ਆਦਿਮ੍ਹਿ, ਦਿਟ੍ਠਿਪ੍ਪਤ੍ਤੋ ਤਤੋਪਰਿ;

ਅਨ੍ਤੇ ਪਞ੍ਞਾਵਿਮੁਤ੍ਤੋਵ, ਹੋਤਿ ਪਞ੍ਞਾਧੁਰੋਪਿ ਚ.

੧੦੩੯. ਸਮਥਯਾਨਿਕਾ ਚੇਵ, ਰੂਪਾਨੁਤ੍ਤਰਪਾਦਕਾ;

ਵਿਪਸ੍ਸਨਾਯਾਨਿਕਾ ਚ, ਸਬ੍ਬੇ ਸੁਕ੍ਖਵਿਪਸ੍ਸਕਾ.

੧੦੪੦. ਧੁਰਵੁਟ੍ਠਾਨਭੇਦੇਨ, ਹੋਨ੍ਤਿ ਪਞ੍ਚੇਵ ਸਬ੍ਬਥਾ;

ਆਰੁਪ੍ਪਪਾਦਕਾ ਚਾਪਿ, ਆਦਿਮ੍ਹਿ ਦੁਵਿਧਾ ਤਥਾ.

੧੦੪੧. ਛਸੁ ਠਾਨੇਸੁ ਮਜ੍ਝਕੇ, ਕਾਯਸਕ੍ਖੀਤਿ ਭਾਜਿਤਾ;

ਉਭਤੋਭਾਗਵਿਮੁਤ੍ਤੋ, ਅਰਹਤ੍ਤੇ ਪਤਿਟ੍ਠਿਤੋ.

੧੦੪੨. ਇਤ੍ਥਂ ਵੁਤ੍ਤਯਾਨਧੁਰ-ਵੁਟ੍ਠਾਨਾਨਂ ਵਿਭਾਗਤੋ;

ਮਗ੍ਗਪ੍ਫਲਭੂਮਿਯੋ ਚ, ਸਤ੍ਤਟ੍ਠਾਰਿਯਪੁਗ੍ਗਲਾ.

੧੦੪੩. ਤਤ੍ਥ ਚਾਨੁਤ੍ਤਰਞਾਣਂ, ਸਚ੍ਚਾਨਂ ਪਟਿਵੇਧਕਂ;

ਸਮੁਚ੍ਛੇਦਪ੍ਪਹਾਨੇਨ, ਕ੍ਲੇਸਾਨੁਸਯਸੋਧਨਂ.

੧੦੪੪. ਚਤੁਮਗ੍ਗਵਿਭਾਗੇਨ, ਵੁਟ੍ਠਾਨਨ੍ਤਿ ਪਕਿਤ੍ਤਿਤਂ;

ਞਾਣਦਸ੍ਸਨਵਿਸੁਦ੍ਧਿ, ਨਾਮ ਹੋਤਿ ਤਥਾਪਿ ਚ.

੧੦੪੫. ਮਗ੍ਗੋ ਚ ਪਰਿਜਾਨਾਤਿ, ਦੁਕ੍ਖਂ ਤੇਭੂਮਕਂ ਤਥਾ;

ਯਥਾਯੋਗਂ ਪਜਹਤਿ, ਤਣ੍ਹਾਸਮੁਦਯਮ੍ਪਿ ਚ.

੧੦੪੬. ਨਿਰੋਧਂ ਸਚ੍ਛਿਕਰੋਤਿ, ਮਗ੍ਗਸਚ੍ਚਮਨੁਤ੍ਤਰਂ;

ਭਾਵਨਾਵੀਥਿਮੋਤਿਣ੍ਣੋ, ਭਾਵੇਤੀਤਿ ਪਵੁਚ੍ਚਤਿ.

੧੦੪੭. ਦਿਟ੍ਠਿਗ੍ਗਤਵਿਚਿਕਿਚ੍ਛਾ-ਸੀਲਬ੍ਬਤਮਸੇਸਤੋ;

ਅਪਾਯਗਮਨੀਯਞ੍ਚ, ਰਾਗਦੋਸਾਦਿਕਤ੍ਤਯਂ.

੧੦੪੮. ਤਦੇਕਟ੍ਠੇ ਕਿਲੇਸੇ ਚ, ਸਹਜਾਤਪ੍ਪਹਾਨਤੋ;

ਪਜਹਾਤਿ ਸੋਤਾਪਤ੍ਤਿ-ਮਗ੍ਗੋ ਪਠਮਭੂਮਿਕੋ.

੧੦੪੯. ਤਦੇਕਟ੍ਠੇ ਪਜਹਤਿ, ਰਾਗਦੋਸਾਦਿਕੇਪਿ ਚ;

ਥੂਲੇ ਤੁ ਸਕਦਾਗਾਮਿ-ਮਗ੍ਗੋ ਦੁਤਿਯਭੂਮਿਕੋ.

੧੦੫੦. ਪਜਹਾਤਿ ਅਨਾਗਾਮਿ-ਮਗ੍ਗੋ ਨਿਰਵਸੇਸਤੋ;

ਕਾਮਰਾਗਬ੍ਯਾਪਾਦੇ ਚ, ਤਦੇਕਟ੍ਠੇ ਚ ਸਮ੍ਭਵਾ.

੧੦੫੧. ਰੂਪਾਰੂਪਰਾਗਮਾਨੁ-ਦ੍ਧਚ੍ਚਾਵਿਜ੍ਜਾਤਿ ਪਞ੍ਚਕਂ;

ਅਗ੍ਗਮਗ੍ਗੋ ਪਜਹਤਿ, ਕ੍ਲੇਸੇ ਸੇਸੇ ਚ ਸਬ੍ਬਥਾ.

੧੦੫੨. ਇਤਿ ਸਚ੍ਚਪਟਿਵੇਧਂ, ਕ੍ਲੇਸਕ੍ਖਯਫਲਾਵਹਂ;

ਮਗ੍ਗਞਾਣਂ ਪਕਾਸੇਨ੍ਤਿ, ਵਿਸੁਦ੍ਧਿਂ ਸਤ੍ਤਮਂ ਬੁਧਾ.

੧੦੫੩. ਛਬ੍ਬਿਸੁਦ੍ਧਿਕਮੇਨੇਵਂ, ਸਬ੍ਬਥਾਯ ਵਿਸੁਦ੍ਧਿਯਾ;

ਸਤ੍ਤਮਾਯਾਨੁਪਤ੍ਤਬ੍ਬਂ, ਨਿਬ੍ਬਾਨਨ੍ਤਿ ਪਵੁਚ੍ਚਤਿ.

੧੦੫੪. ਕ੍ਲੇਸਕ੍ਖਯਕਰਂ ਤਾਣਂ, ਸਂਸਾਰਾਤਿਕ੍ਕਮਂ ਪਰਂ;

ਪਾਰਿਮਂ ਤੀਰਮਭਯਂ, ਸਬ੍ਬਸਙ੍ਖਾਰਨਿਸ੍ਸਟਂ.

੧੦੫੫. ਤੇਨਮ੍ਮਦਨਿਮ੍ਮਦਨਂ, ਪਿਪਾਸਵਿਨਯਾਦਿਨਾ;

ਕ੍ਲੇਸਸਂਸਾਰਸਙ੍ਖਾਰ-ਪਟਿਪਕ੍ਖਨਿਦਸ੍ਸਿਤਂ.

੧੦੫੬. ਅਜਰਾਮਰਮਚ੍ਚਨ੍ਤ-ਮਨੁਪ੍ਪਾਦਮਸਙ੍ਖਤਂ;

ਅਨੁਤ੍ਤਰਮਸਙ੍ਖਾਰਂ, ਅਨਨ੍ਤਮਤੁਲਞ੍ਚ ਤਂ.

੧੦੫੭. ਪਰਮਤ੍ਥਮਨੋਪਮ੍ਮਂ, ਸਨ੍ਤਿ ਅਪ੍ਪਟਿਮਂ ਸੁਖਂ;

ਨਿਰੋਧਸਚ੍ਚ ਨਿਬ੍ਬਾਨਂ, ਏਕਨ੍ਤਂ ਅਮਤਂ ਪਦਂ.

੧੦੫੮. ਸੋਪਾਦਿਸੇਸਨਿਬ੍ਬਾਨ-ਧਾਤੁ ਚੇਵ ਤਥਾਪਰਾ;

ਅਨੁਪਾਦਿਸੇਸਾ ਚੇਤਿ, ਦੁਵਿਧਾ ਪਰਿਯਾਯਤੋ.

੧੦੫੯. ਸੁਞ੍ਞਤਂ ਚਾਨਿਮਿਤ੍ਤਞ੍ਚ, ਤਥਾਪਣਿਹਿਤਨ੍ਤਿ ਚ;

ਅਤ੍ਤਾਦਿਗਾਹਾਭਾਵੇਨ, ਤਿਵਿਧਾਪਿ ਚ ਭਾਜਿਤਂ.

੧੦੬੦. ਕ੍ਲੇਸਸਂਸਾਰਸਙ੍ਖਾਰ-ਪਚ੍ਚਨੀਕਵਿਭਾਗਤੋ;

ਭਵਕ੍ਖਯਾਦਿਭੇਦੇਹਿ, ਬਹੁਧਾਪਿ ਪਵੁਚ੍ਚਤਿ.

੧੦੬੧. ਤਦੇਵਮਚ੍ਚੁਤਂ ਧਮ੍ਮਂ, ਲੋਕੁਤ੍ਤਰਮਕਾਲਿਕਂ;

ਵਾਨਾਭਾਵਾ ਵਾਨਾਤੀਤੋ, ‘‘ਨਿਬ੍ਬਾਨ’’ਨ੍ਤਿ ਪਕਿਤ੍ਤਿਤਂ.

ਇਤਿ ਨਿਬ੍ਬਾਨਵਿਭਾਗੇ ਵੁਟ੍ਠਾਨਵਿਸੁਦ੍ਧਿਕਥਾ ਨਿਟ੍ਠਿਤਾ.

ਛਬ੍ਬੀਸਤਿਮੋ ਪਰਿਚ੍ਛੇਦੋ.

ਨਿਟ੍ਠਿਤੋ ਚ ਸਬ੍ਬਥਾਪਿ ਨਿਬ੍ਬਾਨਵਿਭਾਗੋ.