੨੫. ਵਿਪਸ੍ਸਨਾਵੁਦ੍ਧਿਕਥਾ
੯੮੧. ਸੀਲਚਿਤ੍ਤਦਿਟ੍ਠਿਕਙ੍ਖਾਵਿਤਰਣਵਿਸੁਦ੍ਧਿਯੋ;
ਪਤ੍ਵਾ ਕਲਾਪਤੋ ਤਾਵ, ਸਮ੍ਮਸੇਯ੍ਯ ਤਤੋ ਪਰਂ.
੯੮੨. ਕਲਾਪਤੋ ਸਮ੍ਮਸਨਂ, ਉਦਯਬ੍ਬਯਦਸ੍ਸਨਂ;
ਭਙ੍ਗਞਾਣਂ ਭਯਞਾਣਂ, ਤਥਾਦੀਨਵਨਿਬ੍ਬਿਦਾ.
੯੮੩. ਮੁਚ੍ਚਿਤੁਕਮ੍ਯਤਾਞਾਣਂ, ਪਟਿਸਙ੍ਖਾਨੁਪਸ੍ਸਨਾ;
ਸਙ੍ਖਾਰੁਪੇਕ੍ਖਾਨੁਲੋਮਮਿਚ੍ਚਾਨੁਕ੍ਕਮਤੋ ਠਿਤਾ.
੯੮੪. ਵਿਪਸ੍ਸਨਾਤਿ ਚਕ੍ਖਾਤਾ, ਦਸਞਾਣਪਰਮ੍ਪਰਾ;
ਲਕ੍ਖਣਤ੍ਤਯਮਾਹਚ੍ਚ, ਸਙ੍ਖਾਰੇਸੁ ਪਵਤ੍ਤਤਿ.
੯੮੫. ਤਸ੍ਮਾ ਕਲਾਪਤੋ ਤਾਵ, ਸਮ੍ਮਸੇਯ੍ਯ ਤਿਲਕ੍ਖਣਂ;
ਸਮ੍ਮਸਿਤ੍ਵਾ ਅਤੀਤਾਦਿਖਨ੍ਧਾਯਤਨਧਾਤੁਯੋ.
੯੮੬. ਅਨਿਚ੍ਚਾ ਤੇ ਖਯਟ੍ਠੇਨ, ਖਨ੍ਧਾ ਦੁਕ੍ਖਾ ਭਯਟ੍ਠਤੋ;
ਅਨਤ੍ਤਾ ਅਸਾਰਕਟ੍ਠੇਨ, ਇਚ੍ਚਾਭਿਣ੍ਹਂ ਵਿਚਿਨ੍ਤਯਂ.
੯੮੭. ਤਸ੍ਸੇਵਂ ਸਮ੍ਮਸਨ੍ਤਸ੍ਸ, ਉਪਟ੍ਠਾਤਿ ਤਿਲਕ੍ਖਣਂ;
ਸਙ੍ਖਾਰੇਸੁ ਤਤੋ ਯੋਗੀ, ਖਣਸਨ੍ਤਤਿਅਦ੍ਧਤੋ.
੯੮੮. ਪਚ੍ਚੁਪ੍ਪਨ੍ਨਾਨ ਧਮ੍ਮਾਨਂ, ਉਦਯਞ੍ਚ ਵਯਂ ਤਥਾ;
ਪਞ੍ਞਾਸਾਕਾਰਭੇਦੇਹਿ, ਅਨੁਪਸ੍ਸਤਿ ਤਤ੍ਥ ਹਿ.
੯੮੯. ਅਵਿਜ੍ਜਾਤਣ੍ਹਾਕਮ੍ਮਾਨਂ, ਉਦਯਾ ਚ ਨਿਰੋਧਤੋ;
ਸਮੁਦਯਾ ਨਿਰੋਧਾ ਚ, ਪਞ੍ਚਨ੍ਨਂ ਦਸ੍ਸਿਤਾ ਤਥਾ.
੯੯੦. ਰੂਪਸ੍ਸਾਹਾਰਤੋ ਤਿਣ੍ਣਂ, ਫਸ੍ਸਤੋ ਨਾਮਰੂਪਤੋ;
ਵਿਞ੍ਞਾਣਸ੍ਸੇਤਿ ਸਬ੍ਬੇਪਿ, ਚਤ੍ਤਾਲੀਸ ਸਮਿਸ੍ਸਿਤਾ.
੯੯੧. ਨਿਬ੍ਬਤ੍ਤਿਲਕ੍ਖਣਂ ਭਙ੍ਗ-
ਲਕ੍ਖਣਞ੍ਚੇਤ੍ਥ ਪਸ੍ਸਤੋ;
ਖਣਤੋਦਯਤੋ ਚੇਤਿ,
ਸਮਪਞ੍ਞਾਸ ਹੋਨ੍ਤਿ ਤੇ.
੯੯੨. ਇਤਿ ਖਨ੍ਧਮੁਖੇਨੇਤੇ, ਵਿਭਤ੍ਤਾ ਉਦਯਬ੍ਬਯਾ;
ਆਯਤਨ੍ਨਾਦਿਭੇਦੇਹਿ, ਯੋਜੇਤਬ੍ਬਾ ਯਥਾਰਹਂ.
੯੯੩. ਉਦਯਞ੍ਚ ਵਯਞ੍ਚੇਵਂ, ਪਸ੍ਸਤੋ ਤਸ੍ਸ ਯੋਗਿਨੋ;
ਵਿਭੂਤਾ ਹੋਨ੍ਤਿ ਸਙ੍ਖਾਰਾ, ਸਮੁਟ੍ਠਾਤਿ ਤਿਲਕ੍ਖਣਂ.
੯੯੪. ਬੋਧਿਪਕ੍ਖਿਯਧਮ੍ਮਾ ਚ,
ਤੇ ਪਸ੍ਸਨ੍ਤਿ ਵਿਸੇਸਤੋ;
ਤਤੋ ਜਾਯਨ੍ਤੁਪਕ੍ਲੇਸਾ,
ਦਸੋਪਕ੍ਲੇਸਵਤ੍ਥੁਕਾ.
੯੯੫. ਓਭਾਸੋ ਪੀਤਿ ਪਸ੍ਸਦ੍ਧਿ, ਅਧਿਮੋਕ੍ਖੋ ਚ ਪਗ੍ਗਹੋ;
ਸੁਖਂ ਞਾਣਮੁਪਟ੍ਠਾਨਂ, ਉਪੇਕ੍ਖਾ ਚ ਨਿਕਨ੍ਤਿ ਚ.
੯੯੬. ਤਣ੍ਹਾਮਾਨਦਿਟ੍ਠਿਗ੍ਗਾਹਵਸੇਨ ਤਿਵਿਧੇਪਿ ਤੇ;
ਅਸ੍ਸਾਦੇਨ੍ਤੋ ਉਨ੍ਨਮਨ੍ਤੋ, ਮਮਾਯਨ੍ਤੋ ਕਿਲਿਸ੍ਸਤਿ.
੯੯੭. ਮਗ੍ਗਂ ਫਲਞ੍ਚ ਨਿਬ੍ਬਾਨਂ, ਪਤ੍ਤੋਸ੍ਮੀਤਿ ਅਕੋਵਿਦੋ;
ਵੇਕ੍ਖਬੁਜ੍ਝਾਤਿ ਮਞ੍ਞਨ੍ਤੋ, ਪਪ੍ਪੋਤਿ ਅਧਿਮਾਨਿਕੋ.
੯੯੮. ਮਗ੍ਗਾਦਯੋ ਨ ਹੋਨ੍ਤੇਤੇ,
ਤਣ੍ਹਾਗਾਹਾਦਿਵਤ੍ਥੁਤੋ;
ਤਣ੍ਹਾਮਾਨਦਿਟ੍ਠਿਯੋ ਚੁਪਕ੍ਲੇਸਾ ਪਰਿਪਨ੍ਥਕਾ.
੯੯੯. ਪੋਰਾਣਮੇਵ ਖਨ੍ਧਾਨਂ, ਉਦਯਬ੍ਬਯਦਸ੍ਸਨਂ;
ਤਿਲਕ੍ਖਣਾਰਮ੍ਮਣਤੋ, ਮਗ੍ਗੋ ਨਿਬ੍ਬਾਨਪਚ੍ਚਯੋ.
੧੦੦੦. ਇਤਿ ਮਗ੍ਗਂ ਅਮਗ੍ਗਞ੍ਚ, ਵਿਸੋਧੇਨ੍ਤਸ੍ਸ ਸਿਜ੍ਝਤਿ;
ਵਿਸੁਦ੍ਧਿ ਚ ਮਗ੍ਗਾਮਗ੍ਗਞਾਣਦਸ੍ਸਨਨਾਮਿਕਾ.
੧੦੦੧. ਤਥਾਪਰਾ ਵਿਸੁਦ੍ਧੀਨਂ, ਉਦਯਬ੍ਬਯਦਸ੍ਸਨਂ;
ਆਦਿਂ ਕਤ੍ਵਾ ਪਟਿਪਦਾਞਾਣਦਸ੍ਸਨਨਾਮਿਕਾ.
੧੦੦੨. ਪਚ੍ਛਾ ਸਂਕ੍ਲੇਸਵਿਕ੍ਖੇਪਵਿਸੁਦ੍ਧਨ੍ਤਂ ਯਥਾ ਪੁਰੇ;
ਪਟਿਪਜ੍ਜਤਿ ਮੇਧਾਵੀ, ਉਦਯਬ੍ਬਯਦਸ੍ਸਨਂ.
੧੦੦੩. ਇਤਿ ਖੋਦਯਬ੍ਬਯਾਨੁਪਸ੍ਸਨਾਞਾਣਵੀਥਿਯਂ;
ਸਿਕ੍ਖਨ੍ਤਸ੍ਸਾਚਿਰੇਨੇਵ, ਪਰਿਪਕ੍ਕਾ ਵਿਪਸ੍ਸਨਾ.
੧੦੦੪. ਪਹਾਯੋਦਯਵੋਹਾਰਂ, ਵਯਮੇਵਾਧਿਮੁਚ੍ਚਤੋ;
ਉਪ੍ਪਾਦਾਭੋਗਮੋਹਾਯ, ਭਙ੍ਗਮੇਵਾਨੁਤਿਟ੍ਠਤਿ.
੧੦੦੫. ਤਤੋ ਨਿਜ੍ਝਰਧਾਰਾਵ, ਗਙ੍ਗਾਵਾਰੋਦਕਂ ਵਿਯ;
ਭਿਜ੍ਜਮਾਨਤਿਣਾਨਿਵ, ਪਟਿਪਜ੍ਜਾ ਸਿਖਾ ਵਿਯ.
੧੦੦੬. ਪਤਨ੍ਤੇ ਚ ਵਯਨ੍ਤੇ ਚ, ਭਿਜ੍ਜਨ੍ਤਿਚ੍ਚੇਵ ਸਙ੍ਖਤੇ;
ਪਸ੍ਸਤੋ ਤਸ੍ਸ ਭਙ੍ਗਾਨੁਪਸ੍ਸਨਾਞਾਣਮੀਰਿਤਂ.
੧੦੦੭. ਤਤੋ ਭਯਾਨੁਪਸ੍ਸਨਾ, ਸਭਯਾਤਿ ਵਿਪਸ੍ਸਤੋ;
ਆਦੀਨਵਾਨੁਪਸ੍ਸਨਾ-ਞਾਣਂ ਆਦੀਨਵਾਤਿ ਚ.
੧੦੦੮. ਨਿਬ੍ਬਿਦਾਨੁਪਸ੍ਸਨਾ ਚ, ਨਿਬ੍ਬਿਨ੍ਦਨ੍ਤਸ੍ਸ ਯੋਗਿਨੋ;
ਮੁਚ੍ਚਿਤੁਕਮ੍ਯਤਾਞਾਣਂ, ਤਤੋ ਮੁਚ੍ਚਿਤੁਮਿਚ੍ਛਤੋ.
੧੦੦੯. ਨਿਚ੍ਚਾ ਚੇ ਨ ਨਿਰੁਜ੍ਝੇਯ੍ਯ, ਨ ਬਾਧੇਯ੍ਯ ਸੁਖਾ ਯਦਿ;
ਵਸੇ ਵਤ੍ਤੇਯ੍ਯ ਅਤ੍ਤਾ ਚੇ, ਤਦਭਾਵਾ ਨ ਤੇ ਤਥਾ.
੧੦੧੦. ਸੁਟ੍ਠੁ ਮੁਚ੍ਚਿਤੁਮਿਚ੍ਚੇਵਂ, ਪਟਿਪਚ੍ਚਕ੍ਖਤੋ ਤਤੋ;
ਪਟਿਸਙ੍ਖਾਨੁਪਸ੍ਸਨਾ-ਞਾਣਂ ਜਾਤਨ੍ਤਿ ਵੁਚ੍ਚਤਿ.
੧੦੧੧. ਸਾਧੁਕਂ ਪਟਿਸਙ੍ਖਾਯ, ਸਙ੍ਖਾਰੇਸੁ ਤਿਲਕ੍ਖਣਂ;
ਸੁਪਰਿਞ੍ਞਾਤਸਙ੍ਖਾਰੇ, ਤਥੇਵ ਪਟਿਪਸ੍ਸਤਿ.
੧੦੧੨. ਅਨਿਚ੍ਚਾ ਦੁਕ੍ਖਾਨਤ੍ਤਾ ਚ, ਸਙ੍ਖਾਰਾਵ ਨ ਚਾਪਰੋ;
ਅਤ੍ਤਾ ਵਾ ਅਤ੍ਤਨੀਯਂ ਵਾ, ਨਾਹਂ ਨ ਤੁ ਮਮਾਤਿ ਚ.
੧੦੧੩. ਤਤੋਵ ਤਤ੍ਥ ਮਜ੍ਝਤ੍ਤੋ, ਨਨ੍ਦਿਰਾਗਵਿਨਿਸ੍ਸਟੋ;
ਅਤ੍ਤਤ੍ਤਨਿਯਭਾਵੇਨ, ਸਙ੍ਖਾਰੇਸ੍ਵਜ੍ਝੁਪੇਕ੍ਖਤਿ.
੧੦੧੪. ਸਙ੍ਖਾਰੁਪੇਕ੍ਖਾਸਙ੍ਖਾਤਂ, ਞਾਣਂ ਤਸ੍ਸ ਇਤੀਰਿਤਂ;
ਤਤੋ ਵੁਟ੍ਠਾਨਘਟਿਤਂ, ਅਨੁਲੋਮਨ੍ਤਿ ਵੁਚ੍ਚਤਿ.
੧੦੧੫. ਸੁਪਰਿਞ੍ਞਾਤਸਙ੍ਖਾਰੇ, ਸੁਸਮ੍ਮਟ੍ਠਤਿਲਕ੍ਖਣੇ;
ਉਪੇਕ੍ਖਨ੍ਤਸ੍ਸ ਤਸ੍ਸੇਵ, ਸਿਖਾਪਤ੍ਤਾ ਵਿਪਸ੍ਸਨਾ.
੧੦੧੬. ਸਙ੍ਖਾਰਧਮ੍ਮੇ ਆਰਬ੍ਭ, ਤਾਵ ਕਾਲਂ ਪਵਤ੍ਤਤਿ;
ਤੀਰਦਸ੍ਸੀਵ ਸਕੁਣੋ, ਯਾਵ ਪਾਰਂ ਨ ਪਸ੍ਸਤਿ.
੧੦੧੭. ਯਦਾ ਪਸ੍ਸਤਿ ਨਿਬ੍ਬਾਨਂ, ਵੁਟ੍ਠਾਨਗਹਿਤਾ ਤਦਾ;
ਵੁਟ੍ਠਾਨਗਾਮਿਨੀ ਨਾਮ, ਸਾਨੁਲੋਮਾ ਪਵੁਚ੍ਚਤਿ.
੧੦੧੮. ਇਤਿ ਦ੍ਵੀਹਿ ਵਿਸੁਦ੍ਧੀਹਿ, ਵਿਸੁਦ੍ਧਾਯ ਵਿਪਸ੍ਸਤੋ;
ਵਿਪਸ੍ਸਨਾਪਟਿਪਦਂ, ਪੂਰੇਤੀਤਿ ਪਵੁਚ੍ਚਤੀਤਿ.
ਇਤਿ ਨਿਬ੍ਬਾਨਵਿਭਾਗੇ ਵਿਪਸ੍ਸਨਾਵੁਦ੍ਧਿਕਥਾ ਨਿਟ੍ਠਿਤਾ.
ਪਞ੍ਚਵੀਸਤਿਮੋ ਪਰਿਚ੍ਛੇਦੋ.