ਦ੍ਵਾਵੀਸਤਿਮੋ ਪਰਿਚ੍ਛੇਦੋ
੨੨. ਪਕਿਣ੍ਣਕਕਥਾ
੮੪੪. ਇਤ੍ਥਂ ਰੂਪਾਨਮੁਪ੍ਪਤ੍ਤਿਂ, ਦੀਪੇਤ੍ਵਾ ਦਾਨਿ ਵੁਚ੍ਚਤਿ;
ਪਵਤ੍ਤਿਕੋਸਲ੍ਲਤ੍ਥਾਯ, ਤਤ੍ਥੇਵੇਤਂ ਪਕਿਣ੍ਣਕਂ.
੮੪੫. ਦੁਵਿਧਾ ਸਨ੍ਧਿਯੋ ਤਤ੍ਥ, ਮਿਸ੍ਸਾਮਿਸ੍ਸਵਿਭਾਗਤੋ;
ਤਿਵਿਧਾਪਿ ਚੇਕਚਤੁ-ਪਞ੍ਚਵੋਕਾਰਭੇਦਤੋ.
੮੪੬. ਰੂਪਮਤ੍ਤਾ ਅਸਞ੍ਞੀਨਂ, ਨਾਮਾਭਾਵਾ ਅਮਿਸ੍ਸਿਤਾ;
ਨਾਮਮਤ੍ਤਾ ਅਰੂਪੀਨਂ, ਰੂਪਾਭਾਵਾਤਿ ਚ ਦ੍ਵਿਧਾ.
੮੪੭. ਕਾਮਾਵਚਰਿਕਾ ਚੇਵ, ਰੂਪਾਵਚਰਿਕਾਤਿ ਚ;
ਦੁਵਿਧਾ ਮਿਸ੍ਸਿਤਾ ਚੇਤਿ, ਭਵਨ੍ਤਿ ਚ ਚਤੁਬ੍ਬਿਧਾ.
੮੪੮. ਏਕਚ੍ਚਤੁਵੋਕਾਰਾ ਚ, ਅਮਿਸ੍ਸਾ ਪਞ੍ਚ ਸਨ੍ਧਿਯੋ;
ਛਬ੍ਬੀਸਤਿਵਿਧਾ ਮਿਸ੍ਸਾ, ਪਞ੍ਚਵੋਕਾਰਸਨ੍ਧਿਯੋ.
੮੪੯. ਇਤ੍ਥਂ ਭੂਮਿਪ੍ਪਭੇਦੇਨ, ਏਕਤਿਂਸਵਿਧਾਪਿ ਚ;
ਸਨ੍ਤਤਿਰਾਸਿਭੇਦੇਨ, ਸਿਯੁਂ ਤਿਂਸਵਿਧਾ ਕਥਂ.
੮੫੦. ਰੂਪਸਨ੍ਤਤਿਸੀਸਾਨਂ,
ਰਾਸਯੋ ਸਤ੍ਤਵੀਸਤਿ;
ਵੁਤ੍ਤਾ ਕਾਮੇ ਵਸਾ ਤੇਸਂ,
ਸਤ੍ਤਕਾ ਕਾਮਸਨ੍ਧਿਯੋ.
੮੫੧. ਵੇਦਨਾਸਞ੍ਞਾਸਙ੍ਖਾਰ-ਵਿਞ੍ਞਾਣਕ੍ਖਨ੍ਧਸਙ੍ਗਹਾ;
ਸਬ੍ਬਤ੍ਥਾਪਿ ਚਤਸ੍ਸੋਵ, ਨਾਮਸਨ੍ਤਤਿਯੋ ਸਿਯੁਂ.
੮੫੨. ਇਚ੍ਚੁਭਿਨ੍ਨਂ ਵਸਾ ਹੋਨ੍ਤਿ, ਤਤ੍ਥੇਕਾਦਸਕਾਦਯੋ;
ਸਨ੍ਤਤਿਰਾਸਯੋ ਪੁਬ੍ਬੇ, ਵਿਭਤ੍ਤਾ ਸਤ੍ਤਕਾਦਯੋ.
੮੫੩. ਏਕਾਦਸਕਦਸਕ-ਨਵਟ੍ਠਸਤ੍ਤਕਾ ਸਿਯੁਂ;
ਛਕ੍ਕੇਨ ਸਦ੍ਧਿਂ ਵਿਞ੍ਞੇਯ੍ਯਾ, ਤਸ੍ਮਾ ਤਤ੍ਥ ਛ ਸਙ੍ਗਹਾ.
੮੫੪. ਅਟ੍ਠ ਸਨ੍ਤਤਿਯੋ ਹੋਨ੍ਤਿ, ਰੂਪਲੋਕੇਨ ਮਿਸ੍ਸਿਤਾ;
ਅਟ੍ਠਕੋ ਰਾਸਿ ਤਤ੍ਥੇਕੋ, ਤਸ੍ਮਾ ਸਨ੍ਤਤਿ ਵੁਚ੍ਚਤਿ.
੮੫੫. ਜੀਵਿਤਨਵਕੋ ਤ੍ਵੇਕੋ, ਅਸਞ੍ਞੀ ਪਟਿਸਨ੍ਧਿਯਂ;
ਅਰੂਪੀਨਂ ਚਤਸ੍ਸੋਪਿ, ਨਾਮਸਨ੍ਤਤਿਯੋ ਸਿਯੁਂ.
੮੫੬. ਇਚ੍ਚੇਕਕਚਤੁਕ੍ਕਾਨਂ, ਵਸੇਨ ਦ੍ਵੇ ਅਮਿਸ੍ਸਿਤਾ;
ਅਟ੍ਠਵੀਸਞ੍ਚ ਮਿਸ੍ਸਾਤਿ, ਤਿਂਸੇਵ ਹੋਨ੍ਤਿ ਸਨ੍ਧਿਯੋ.
੮੫੭. ਏਕੁਪ੍ਪਾਦਨਿਰੋਧਾ ਚ, ਅਮਿਸ੍ਸਾ ਤਤ੍ਥ ਰਾਸਯੋ;
ਮਿਸ੍ਸਿਤਾਨਂ ਵਿਭਾਗੋਯਂ, ਯਥਾਯੋਗਂ ਕਥੀਯਤਿ.
੮੫੮. ਉਪ੍ਪਾਦਟ੍ਠਿਤਿਭਙ੍ਗਾਨਂ, ਵਸਾ ਤੀਣਿ ਖਣਾਨਿਪਿ;
ਸਮਾਨਾਨੇਵ ਨਾਮਾਨਂ, ਏਕਚਿਤ੍ਤਕ੍ਖਣਂ ਮਤਂ.
੮੫੯. ਤੁਲ੍ਯਮੁਪ੍ਪਾਦਭਙ੍ਗਾਨਂ, ਰੂਪਾਨਮ੍ਪਿ ਖਣਦ੍ਵਯਂ;
ਏਕੂਨਪਞ੍ਞਾਸਮਤ੍ਤਂ, ਠਿਤਿਕ੍ਖਣਮੁਦੀਰਿਤਂ.
੮੬੦. ਨਾਮਰੂਪਾਨਮੁਪ੍ਪਾਦੋ, ਭਙ੍ਗੋਪਿ ਹਿ ਸਮੋ ਮਤੋ;
ਦਨ੍ਧਂ ਹਿ ਵਤ੍ਤਿਕਂ ਰੂਪਂ, ਨਾਮਂ ਤੁ ਲਹੁਵਤ੍ਤਿਕਂ.
੮੬੧. ਤਥਾ ਹਿ ਰੂਪੇ ਤਿਟ੍ਠਨ੍ਤੇ, ਚਿਤ੍ਤੁਪ੍ਪਾਦਾ ਤੁ ਸੋਲ਼ਸ;
ਉਪ੍ਪਜ੍ਜਿਤ੍ਵਾ ਪਵਤ੍ਤਿਤ੍ਵਾ, ਭਿਜ੍ਜਨ੍ਤਿ ਚ ਲਹੁਂ ਲਹੁਂ.
੮੬੨. ਤਸ੍ਮਾ ਹਿ ਏਕਪਞ੍ਞਾਸ-ਖਣਰੂਪਕ੍ਖਣਂ ਤਥਾ;
ਸਤ੍ਤਰਸਚਿਤ੍ਤਕ੍ਖਣਂ, ਤਿਖਣਨ੍ਤਿ ਚ ਵੁਚ੍ਚਤਿ.
੮੬੩. ਚਿਤ੍ਤਕ੍ਖਣਂ ਹਿ ਤਿਣ੍ਣਨ੍ਨਂ, ਤਤ੍ਥ ਵਿਞ੍ਞਤ੍ਤਿਕਦ੍ਵਯਂ;
ਲਕ੍ਖਣਤ੍ਤਯਰੂਪਂ ਤੁ, ਸਲਕ੍ਖਣਵਵਤ੍ਥਿਤਂ.
੮੬੪. ਤਸ੍ਮਾ ਹਿਤ੍ਵਾ ਦ੍ਵਯਞ੍ਚੇਤਂ, ਬਾਵੀਸਤਿਵਿਧਮ੍ਪਿ ਚ;
ਰੂਪਂ ਨਾਮ ਚਤੁਕ੍ਕਞ੍ਚ, ਸਲਕ੍ਖਣਨਿਯਾਮਿਤਂ.
੮੬੫. ਏਕੁਪ੍ਪਾਦਨਿਰੋਧਾ ਚ, ਤਤ੍ਥ ਤੁਲ੍ਯਕ੍ਖਣਾ ਮਤਾ;
ਅਤੁਲ੍ਯਕ੍ਖਣਧਮ੍ਮਾਨਂ, ਸਿਯਾ ਭੇਦਂ ਯਥਾਰਹਂ.
੮੬੬. ਪਟਿਸਨ੍ਧਿਕ੍ਖਣੇ ਜਾਤਂ, ਤਸ੍ਮਾ ਰੂਪਂ ਤਤੋ ਪਰਂ;
ਸਤ੍ਤਰਸਮਚਿਤ੍ਤਸ੍ਸ, ਭਙ੍ਗੇਨ ਸਹ ਭਿਜ੍ਜਤਿ.
੮੬੭. ਤਸ੍ਸ ਠਿਤਿਕ੍ਖਣੇ ਜਾਤਂ, ਰੂਪਮ੍ਪਿ ਚ ਤਤੋ ਪਰਂ;
ਅਟ੍ਠਾਰਸਮਚਿਤ੍ਤਸ੍ਸ, ਉਪ੍ਪਾਦੇ ਪਨ ਭਿਜ੍ਜਤਿ.
੮੬੮. ਤਸ੍ਸ ਭਙ੍ਗਕ੍ਖਣੇ ਜਾਤਂ, ਰੂਪਮ੍ਪਿ ਚ ਤਤੋ ਪਰਂ;
ਅਟ੍ਠਾਰਸਮਚਿਤ੍ਤਸ੍ਸ, ਠਿਤਿਕਾਲੇਸੁ ਭਿਜ੍ਜਤਿ.
੮੬੯. ਤਥਾ ਦੁਤਿਯਚਿਤ੍ਤਸ੍ਸ, ਉਪ੍ਪਾਦਮ੍ਹਿ ਸਮੁਟ੍ਠਿਤਂ;
ਅਟ੍ਠਾਰਸਮਚਿਤ੍ਤਸ੍ਸ, ਭਙ੍ਗੇਨ ਸਹ ਭਿਜ੍ਜਤਿ.
੮੭੦. ਇਤਿ ਵੁਤ੍ਤਨਿਯਾਮੇਨ, ਸਜਾਤਿਕ੍ਖਣਤੋ ਪਰਂ;
ਠਤ੍ਵਾ ਏਕੂਨਪਞ੍ਞਾਸ, ਖਣਾਨਿ ਪੁਨ ਭਿਜ੍ਜਤਿ.
੮੭੧. ਤਸ੍ਮਾ ਏਕੂਨਪਞ੍ਞਾਸ, ਕਲਾਪਾ ਸਹ ਵਤ੍ਤਰੇ;
ਏਕੋ ਜਾਯਤਿ ਏਕੋ ਚ, ਭਿਜ੍ਜਤੀਤਿ ਚ ਸਬ੍ਬਥਾ.
੮੭੨. ਏਕਸਨ੍ਤਤਿਸਮ੍ਬਨ੍ਧਾ, ਕਲਾਪਾ ਸਹ ਕਮ੍ਮਜਾ;
ਯਥਾਨੁਪੁਬ੍ਬਘਟਿਤਾ, ਏਕਪਞ੍ਞਾਸ ਲਬ੍ਭਰੇ.
੮੭੩. ਸਤ੍ਤਵੀਸ ਪਨਿਚ੍ਚੇਵਂ, ਕਾਮੇ ਦ੍ਵੇ ਰੂਪਭੂਮਿਯਂ;
ਰੂਪਸਨ੍ਤਤਿਸੀਸਾਨਂ, ਰਾਸਯੋ ਸਤ੍ਤਕਾਦਯੋ.
੮੭੪. ਏਕੂਨਤਿਂਸ ਸਬ੍ਬੇਪਿ, ਕਮ੍ਮਜਾਤਾ ਯਥਾਰਹਂ;
ਏਕਪਞ੍ਞਾਸ ਘਟਿਕਾ, ਪਵਤ੍ਤਨ੍ਤਿ ਖਣੇ ਖਣੇ.
੮੭੫. ਤਤ੍ਥ ਸਨ੍ਧਿਕ੍ਖਣੇ ਜਾਤਂ, ਸਤ੍ਤਰਸਮਚੇਤਸੋ;
ਉਪ੍ਪਾਦੇ ਭਿਜ੍ਜਤਿਚ੍ਚੇਵਂ, ਵੁਤ੍ਤੋ ਅਟ੍ਠਕਥਾਨਯੋ.
੮੭੬. ਤਂ ਨਯਂ ਪਟਿਬਾਹਿਤ੍ਵਾ, ਚਿਤ੍ਤੇਨ ਸਹ ਭਿਜ੍ਜਤਿ;
ਚਿਤ੍ਤੇਨ ਸਹ ਜਾਤਨ੍ਤਿ, ਵੁਤ੍ਤਮਾਚਰਿਯੇਨ ਹਿ.
੮੭੭. ਆਨਾਪਾਨਤਕ੍ਕਚਾਰਾ, ਏਕੁਪ੍ਪਾਦਨਿਰੋਧਕਾ;
ਵੁਤ੍ਤਾ ਹਿ ਯਮਕੇ ਕਾਯਵਚੀਸਙ੍ਖਾਰਨਾਮਕਾ.
੮੭੮. ਚਿਤ੍ਤੁਪ੍ਪਾਦਕ੍ਖਣੇ ਜਾਤਾ, ਉਤੁ ਤਸ੍ਸ ਠਿਤਿਕ੍ਖਣੇ;
ਰੂਪਂ ਜਨੇਤਿ ਤਤ੍ਥਾਪਿ, ਉਤੁ ਭਙ੍ਗਕ੍ਖਣੇਪਿ ਚ.
੮੭੯. ਅਨੁਪੁਬ੍ਬਕ੍ਕਮੇਨੇਵਂ, ਜਾਤਂ ਰੂਪਂ ਤਥਾਪਰਂ;
ਅਟ੍ਠਾਰਸਮਉਪ੍ਪਾਦਟ੍ਠਿਤਿਆਦੀਸੁ ਭਿਜ੍ਜਤਿ.
੮੮੦. ਇਤ੍ਥਂ ਕਲਾਪਾ ਘਟਿਤਾ, ਉਤੁਜਾਹਾਰਜਾਪਿ ਚ;
ਏਕਸਨ੍ਤਤਿਸਮ੍ਬਨ੍ਧਾ, ਏਕਪਞ੍ਞਾਸ ਲਬ੍ਭਰੇ.
੮੮੧. ਕਲਾਪਾ ਚਿਤ੍ਤਜਾ ਯਸ੍ਮਾ, ਉਪ੍ਪਾਦਕ੍ਖਣਸਮ੍ਭੂਤਾ;
ਘਟਿਕਾ ਸਹ ਲਬ੍ਭਨ੍ਤਿ, ਤਸ੍ਮਾ ਸਤ੍ਤਰਸੇਵ ਤੇ.
੮੮੨. ਸਬ੍ਬੇਪਿ ਰੂਪਜਨਕਾ, ਚਿਤ੍ਤੁਪ੍ਪਾਦੇ ਯਥਾਸਕਂ;
ਜਨੇਨ੍ਤਿ ਠਿਤਿਭਙ੍ਗੇਸੁ, ਨ ਜਨੇਨ੍ਤੀਤਿ ਕੇਚਨਾ.
੮੮੩. ਕੁਸਲਾਬ੍ਯਾਕਤਾਦੀਨਂ, ਏਕੁਪ੍ਪਾਦਨਿਰੋਧਤਾ;
ਧਮ੍ਮਾਨਂ ਯਮਕੇ ਵੁਤ੍ਤਾ, ਇਤਿ ਪਾਲ਼ਿ ਵਦਨ੍ਤਿ ਚ.
੮੮੪. ਕੁਸਲਾਦਿਕਸਮ੍ਬਨ੍ਧਾ, ਤਤ੍ਥ ਤਤ੍ਥ ਹਿ ਦੇਸਿਤਾ;
ਇਤਿ ਵਤ੍ਵਾ ਪੁਰੇ ਵੁਤ੍ਤਂ, ਇਚ੍ਛਨ੍ਤਾਚਰਿਯਾ ਨਯਂ.
੮੮੫. ਇਚ੍ਚੇਵਂ ਚਤੁਸਮ੍ਭੂਤਾ, ਰੂਪਸਨ੍ਤਤਿਰਾਸਯੋ;
ਰੂਪਾਨਿ ਚ ਕਲਾਪਾ ਚ, ਏਕਾਬਦ੍ਧਾ ਯਥਾਰਹਂ.
੮੮੬. ਸੁਤ੍ਤਪਵਤ੍ਤਮਤ੍ਤਾਨਂ, ਸਮ੍ਬੁਦ੍ਧਾਨਮ੍ਪਿ ਪਾਣਿਨਂ;
ਯਾਵ ਮਰਣਕਾਲਾਪਿ, ਪਵਤ੍ਤਨ੍ਤਿ ਨਿਰਨ੍ਤਰਂ.
੮੮੭. ਆਯੁਕ੍ਖਯਾ ਚ ਮਰਣਂ, ਤਥਾ ਕਮ੍ਮਕ੍ਖਯਾ ਸਿਯਾ;
ਉਭਿਨ੍ਨਂ ਵਾ ਖਯਾ ਚਾਥ, ਉਪਚ੍ਛੇਦਕਕਮ੍ਮੁਨਾ.
੮੮੮. ਚਤੁਧਾਪਿ ਮਰਨ੍ਤਸ੍ਸ, ਤਸ੍ਸੇਵਂ ਤੁ ਯਥਾਰਹਂ;
ਸਤ੍ਤਰਸਚਿਤ੍ਤਕ੍ਖਣਮਤ੍ਤਸੇਸਮ੍ਹਿ ਜੀਵਿਤੇ.
੮੮੯. ਉਪਰਿਚ੍ਚੁਤਿਚਿਤ੍ਤਸ੍ਸ, ਸਤ੍ਤਰਸਮਚੇਤਸੋ;
ਠਿਤਿਕਾਲਮੁਪਾਦਾਯ, ਨ ਤੁ ਜਾਯਤਿ ਕਮ੍ਮਜਂ.
੮੯੦. ਤਸ੍ਸੁਪ੍ਪਾਦਕ੍ਖਣੇ ਜਾਤਂ,
ਰੂਪਞ੍ਚ ਚੁਤਿਯਾ ਸਹ;
ਭਿਜ੍ਜਤੀਤਿ ਮਤੋ ਨਾਮ,
ਤਤੋ ਹੋਤਿ ਸ ਪੁਗ੍ਗਲੋ.
੮੯੧. ਚਿਤ੍ਤਜਾਹਾਰਜਞ੍ਚਾਪਿ, ਨ ਜਾਯਤਿ ਤਤੋ ਪਰਂ;
ਉਤੁਸਮ੍ਭਵਰੂਪਂ ਤੁ, ਅਵਸਿਸ੍ਸਤਿ ਵਾ ਨ ਵਾ.
੮੯੨. ਤਤੋ ਵੁਤ੍ਤਨਯੇਨੇਵ, ਮਤਸਤ੍ਤੋ ਯਥਾਰਹਂ;
ਮਿਸ੍ਸਾਮਿਸ੍ਸਾਹਿ ਸਨ੍ਧੀਹਿ, ਪੁਨਦੇਵੋਪਪਜ੍ਜਤਿ.
੮੯੩. ਤਤੋ ਵੁਤ੍ਤਨਯੇਨੇਵ, ਏਕੂਨਤਿਂਸ ਕਮ੍ਮਜਾ;
ਤੇਸਮੁਟ੍ਠਾਨਿਕਾ ਪਞ੍ਚ, ਚਤੁਤ੍ਤਿਂਸ ਸਮਿਸ੍ਸਿਤਾ.
੮੯੪. ਕਲਾਪਾ ਰਾਸਯੋ ਹੋਨ੍ਤਿ, ਸਤ੍ਤਵੀਸਤਿਭੂਮਿਸੁ;
ਇਤਿ ਸਬ੍ਬਪਕਾਰੇਨ, ਰੂਪਧਮ੍ਮਾ ਪਕਾਸਿਤਾਤਿ.
ਇਤਿ ਰੂਪਵਿਭਾਗੇ ਪਕਿਣ੍ਣਕਕਥਾ ਨਿਟ੍ਠਿਤਾ.
ਦ੍ਵਾਵੀਸਤਿਮੋ ਪਰਿਚ੍ਛੇਦੋ.
ਨਿਟ੍ਠਿਤੋ ਚ ਸਬ੍ਬਥਾਪਿ ਰੂਪਵਿਭਾਗੋ.