੨੦. ਕਲਾਪਕਥਾ
੭੫੪. ਇਤਿ ਵੁਤ੍ਤਪ੍ਪਕਾਰੇਨ, ਸਬ੍ਬਂ ਰੂਪਮ੍ਪਿ ਪਿਣ੍ਡਿਤਂ;
ਸਹਵੁਤ੍ਤਿਨਿਯਾਮੇਨ, ਏਕਵੀਸਵਿਧਂ ਕਥਂ.
੭੫੫. ਕਮ੍ਮਂ ਚਿਤ੍ਤੋਤੁਕਾਹਾਰਸਮੁਟ੍ਠਾਨਾ ਯਥਾਕ੍ਕਮਂ;
ਨਵ ਛ ਚਤੁਰੋ ਦ੍ਵੇ ਚ, ਕਲਾਪਾ ਏਕਵੀਸਤਿ.
੭੫੬. ਜੀਵਿਤਞ੍ਚਾਵਿਨਿਬ੍ਭੋਗ-ਰੂਪਾਨਿ ਚ ਯਥਾਕ੍ਕਮਂ;
ਚਕ੍ਖਾਦਿਕੇਹਿ ਯੋਜੇਤ੍ਵਾ, ਦਸਕਾ ਅਟ੍ਠ ਦੀਪਿਤਾ.
੭੫੭. ਚਕ੍ਖੁਸੋਤਘਾਨਜਿਵ੍ਹਾਦਸਕਾ ਚ ਚਤੁਬ੍ਬਿਧਾ;
ਕਾਯਿਤ੍ਥਿਪੁਮ੍ਭਾਵਵਤ੍ਥੁਦਸਕਾ ਚ ਤਥਾਪਰੇ.
੭੫੮. ਜੀਵਿਤੇਨਾਵਿਨਿਬ੍ਭੋਗਰੂਪਾਨਿ ਨਵਕਨ੍ਤਿ ਚ;
ਨਵੇਤੇ ਕਮ੍ਮਜਾ ਨਾਮ, ਕਲਾਪਾ ਸਮੁਦੀਰਿਤਾ.
੭੫੯. ਅਵਿਨਿਬ੍ਭੋਗਰੂਪਾਨਿ, ਸੁਦ੍ਧਟ੍ਠਕਮਥਾਪਰਂ;
ਕਾਯਵਿਞ੍ਞਤ੍ਤਿਨਵਕਂ, ਕਾਯਵਿਞ੍ਞਤ੍ਤਿਯਾ ਸਹ.
੭੬੦. ਵਚੀਵਿਞ੍ਞਤ੍ਤਿਦਸਕਂ, ਸਦ੍ਦੇਨ ਸਹਵੁਤ੍ਤਿਤੋ;
ਲਹੁਤਾਦੇਕਾਦਸਕਂ, ਤਿਣ੍ਣਨ੍ਨਂ ਸਹ ਸਮ੍ਭਵਾ.
੭੬੧. ਕਾਯਵਿਞ੍ਞਤ੍ਤਿਲਹੁਤਾਦੀਹਿ ਦ੍ਵਾਦਸਕਂ ਭਵੇ;
ਵਚੀਵਿਞ੍ਞਤ੍ਤਿਲਹੁਤਾਦੀਹਿ ਤੇਰਸਕਂ ਤਥਾ.
੭੬੨. ਇਤਿ ਚਿਤ੍ਤਸਮੁਟ੍ਠਾਨਾ, ਕਲਾਪਾ ਛ ਪਕਾਸਿਤਾ;
ਰੂਪਾਕਾਰਵਿਕਾਰਮ੍ਪਿ, ਸਙ੍ਗਹੇਤ੍ਵਾ ਯਥਾਰਹਂ.
੭੬੩. ਸੁਦ੍ਧਟ੍ਠਕਂ ਤੁ ਪਠਮਂ, ਸਦ੍ਦੇਨ ਨਵਕਂ ਭਵੇ;
ਲਹੁਤਾਦੇਕਾਦਸਕਂ, ਲਹੁਤਾਦੀਹਿ ਤੀਹਿਪਿ.
੭੬੪. ਸਦ੍ਦੇਨ ਲਹੁਤਾਦੀਹਿ, ਤਥਾ ਦ੍ਵਾਦਸਕਨ੍ਤਿ ਚ;
ਕਲਾਪਾ ਉਤੁਸਮ੍ਭੂਤਾ, ਚਤੁਧਾਵ ਪਕਿਤ੍ਤਿਤਾ.
੭੬੫. ਸੁਦ੍ਧਟ੍ਠਕਞ੍ਚ ਪਠਮਂ, ਆਹਾਰਜਮਥਾਪਰਂ;
ਲਹੁਤਾਦੇਕਾਦਸਕਂ, ਇਤਿ ਦ੍ਵੇ ਓਜਜਾ ਮਤਾ.
੭੬੬. ਕਲਾਪਾਨਂ ਪਰਿਚ੍ਛੇਦਲਕ੍ਖਣਤ੍ਤਾ ਵਿਚਕ੍ਖਣਾ;
ਨ ਕਲਾਪਙ੍ਗਮਿਚ੍ਚਾਹੁ, ਆਕਾਸਂ ਲਕ੍ਖਣਾਨਿ ਚ.
੭੬੭. ਤਤ੍ਥ ਚੇਕੂਨਨਵੁਤਿ, ਤੇਸਟ੍ਠਿ ਚ ਯਥਾਕ੍ਕਮਂ;
ਤਾਲੀਸੇਕੂਨਵੀਸਾ ਚ, ਕਲਾਪਙ੍ਗਾਨਿ ਤਾਨਿ ਚ.
੭੬੮. ਲਕ੍ਖਣਾਕਾਸਰੂਪਾਨਿ, ਕਲਾਪੇਸੁ ਤਹਿਂ ਤਹਿਂ;
ਪਞ੍ਚ ਪਞ੍ਚੇਤਿ ਰੂਪਾਨਿ, ਤਿਸਤਂ ਸੋਲ਼ਸਾਧਿਕਂ.
੭੬੯. ਅਗਹੀਤਗ੍ਗਹਣੇਨ, ਅਟ੍ਠਵੀਸਵਿਧਾਨਿਪਿ;
ਰੂਪਕੋਟ੍ਠਾਸਨਾਮੇਨ, ਪਞ੍ਚਵੀਸਤਿ ਭਾਵਯੇ.
੭੭੦. ਭੂਤਤ੍ਤਯਂ ਤੁ ਫੋਟ੍ਠਬ੍ਬਂ, ਕਤ੍ਵਾਪਚਯਸਨ੍ਤਤਿਂ;
ਜਾਤਿਮੇਕਞ੍ਚ ਕਤ੍ਵਾ ਵਾ, ਵਿਨਾਥ ਹਦਯਂ ਤਹਿਂ.
੭੭੧. ਧਮ੍ਮਸਙ੍ਗਣਿਯਂ ਹੇਤਂ, ਰੂਪਕਣ੍ਡੇ ਸਰੂਪਤੋ;
ਵਤ੍ਥੁਰੂਪਂ ਨ ਨਿਦ੍ਦਿਟ੍ਠਂ, ਪਟ੍ਠਾਨੇ ਦੇਸਿਤਂ ਤੁ ਤਂ.
੭੭੨. ਦ੍ਵੇ ਸਦ੍ਦਨਵਕਾ ਚੇਵ,
ਤਯੋ ਸੁਦ੍ਧਟ੍ਠਕਾਪਿ ਚ;
ਦ੍ਵੇ ਦ੍ਵੇ ਚਿਤ੍ਤੋਤੁਸਮ੍ਭੂਤਾ,
ਏਕੋ ਆਹਾਰਜੋਤਿ ਚ.
੭੭੩. ਤੇਸਮੁਟ੍ਠਾਨਿਕਾ ਪਞ੍ਚ, ਕਮ੍ਮਜਾਨਿ ਨਵੇਤਿ ਚ;
ਰੂਪਰੂਪਵਸੇਨੇਤੇ, ਕਲਾਪਾ ਚੁਦ੍ਦਸੇਰਿਤਾ.
੭੭੪. ਦਸਕੇਸ੍ਵੇਵ ਸਙ੍ਗਯ੍ਹ, ਜੀਵਿਤਨਵਕਂ ਤਹਿਂ;
ਭਾਵਦ੍ਦਸਕਮੇਕਂ ਵਾ, ਕਤ੍ਵਾ ਵਤ੍ਥੁਂ ਵਿਨਾ ਤਥਾ.
੭੭੫. ਸਦ੍ਦਾ ਚਿਤ੍ਤੋਤੁਜਾ ਦ੍ਵੇਵ, ਤੇਸਮੁਟ੍ਠਾਨਿਕਾ ਤਯੋ;
ਸੁਦ੍ਧਟ੍ਠਕਾ ਚ ਸਤ੍ਤੇਵ, ਕਮ੍ਮਜਾ ਦਸਕਾਨਿ ਚ.
੭੭੬. ਛਨ੍ਨਵੂਤਿਵਿਧਂ ਤਤ੍ਥ, ਰੂਪਂ ਭਾਸਨ੍ਤਿ ਪਣ੍ਡਿਤਾ;
ਅਗਹੀਤਗ੍ਗਹਣੇਨ, ਅਟ੍ਠਾਰਸਵਿਧਂ ਭਵੇ.
੭੭੭. ਤੇਸਮੇਵ ਕਲਾਪਾਨਂ, ਸਤ੍ਤਕਚ੍ਛਕ੍ਕਪਞ੍ਚਕਾ;
ਚਤੁਕ੍ਕਾ ਚ ਤਿਕਦ੍ਵਿਕਾ, ਏਕਕਾ ਚ ਯਥਾਰਹਂ.
੭੭੮. ਦ੍ਵੇ ਸਤ੍ਤ ਨਵ ਛ ਤਯੋ, ਤਯੋਪਿ ਚ ਯਥਾਕ੍ਕਮਂ;
ਚਤ੍ਤਾਰੋਤਿ ਚਤੁਤ੍ਤਿਂਸ, ਸਹਵੁਤ੍ਤਿਕਰਾਸਯੋ.
੭੭੯. ਚਕ੍ਖੁਸੋਤਘਾਨਜਿਵ੍ਹਾ-ਕਾਯਵਤ੍ਥੁਵਸਾ ਸਿਯੁਂ;
ਇਤ੍ਥਿਪੁਮ੍ਭਾਵਦਸਕਸਹਿਤਾ ਸਤ੍ਤਕਾ ਦ੍ਵਿਧਾ.
੭੮੦. ਚਕ੍ਖੁਸੋਤਘਾਨਹੀਨਾ, ਪਚ੍ਚੇਕਂ ਦ੍ਵੇ ਸਭਾਵਕਾ;
ਅਭਾਵਤੋ ਭਾਵਹੀਨੋ, ਇਤ੍ਥਂ ਛਕ੍ਕਾਪਿ ਸਤ੍ਤਧਾ.
੭੮੧. ਚਕ੍ਖੁਸੋਤਵਿਹੀਨਾ ਚ,
ਚਕ੍ਖੁਘਾਨਵਿਹੀਨਕਾ;
ਸੋਤਘਾਨਵਿਹੀਨਾ ਚ,
ਸਭਾਵਾ ਦ੍ਵੇ ਤਯੋ ਤਯੋ.
੭੮੨. ਚਕ੍ਖਾਦੇਕੇਕਤੋ ਹੀਨਾ,
ਤਿਵਿਧਾਪਿ ਅਭਾਵਤੋ;
ਇਚ੍ਚੇਵਂ ਪਞ੍ਚਕਾ ਨਾਮ,
ਨਵਕਾ ਰਾਸਯੋ ਸਿਯੁਂ.
੭੮੩. ਚਕ੍ਖਾਦਿਤ੍ਤਯਹੀਨਾਵ, ਏਕਤੋ ਦ੍ਵੇ ਸਭਾਵਕਾ;
ਚਕ੍ਖਾਦਿਤ੍ਤਯਤੋ ਦ੍ਵੀਹਿ, ਤਯੋ ਹੀਨਾ ਅਭਾਵਕਾ.
੭੮੪. ਰੂਪਲੋਕੇ ਚਕ੍ਖੁਸੋਤ-ਵਤ੍ਥੁਜੀਵਿਤਨਵਕਾ;
ਚਤ੍ਤਾਰੋਵ ਕਲਾਪਾਤਿ, ਚਤੁਕ੍ਕਾ ਛ ਯਥਾਰਹਂ.
੭੮੫. ਜਿਵ੍ਹਾਕਾਯਵਤ੍ਥੁਵਸਾ,
ਅਭਾਵੋ ਦ੍ਵੇ ਸਭਾਵਕਾ;
ਕਾਯਭਾਵਵਤ੍ਥੁਵਸਾ,
ਇਤਿ ਹੋਨ੍ਤਿ ਤਯੋ ਤਿਕਾ.
੭੮੬. ਕਾਯਵਤ੍ਥੁਵਸੇਨੇਕੋ, ਦ੍ਵੇ ਚ ਚਿਤ੍ਤੋਤੁਸਮ੍ਭਵਾ;
ਸਦ੍ਦਨਵਕਟ੍ਠਕਾਤਿ, ਦੁਕਾ ਚ ਤਿਵਿਧਾ ਸਿਯੁਂ.
੭੮੭. ਜੀਵਿਤਨਵਕਞ੍ਚੇਕਂ, ਤੇਸਮੁਟ੍ਠਾਨਿਕਾਨਿ ਚ;
ਸੁਦ੍ਧਟ੍ਠਕਾਨਿ ਤੀਣੀਤਿ, ਚਤ੍ਤਾਰੋ ਏਕਕਾ ਸਿਯੁਂ.
੭੮੮. ਚਤੁਤ੍ਤਿਂਸ ਪਨਿਚ੍ਚੇਤੇ, ਸਨ੍ਧਿਯਞ੍ਚ ਪਵਤ੍ਤਿਯਂ;
ਰੂਪਰੂਪਕਲਾਪਾਨਂ, ਰਾਸਯੋ ਹੋਨ੍ਤਿ ਸਮ੍ਭਵਾ.
੭੮੯. ਸਤ੍ਤਤਿ ਸਟ੍ਠਿਮਿਚ੍ਚੇਵਮਾਦਿਨਾ ਚ ਯਥਾਰਹਂ;
ਕਲਾਪਰਾਸਿਰੂਪਾਨਿ, ਤਤ੍ਥ ਤਤ੍ਥ ਵਿਭਾਵਯੇ.
੭੯੦. ਸੋਲ਼ਸ ਪਞ੍ਚਦਸੇਤਿਆਦਿਭੇਦਵਸਾਪਿ ਚ;
ਅਗਹੀਤਗ੍ਗਹਣੇਨ, ਤਤ੍ਥ ਤਤ੍ਥ ਵਿਨਿਦ੍ਦਿਸੇ.
੭੯੧. ਚਤੁਚਤ੍ਤਾਲੀਸਸਤਂ, ਕਲਾਪਾ ਹੋਨ੍ਤਿ ਪਿਣ੍ਡਿਤਾ;
ਛਬ੍ਬੀਸ ਤਤ੍ਥ ਰੂਪਾਨਿ, ਸਹਸ੍ਸਞ੍ਚ ਚਤੁਸ੍ਸਤਂ.
੭੯੨. ਇਚ੍ਚਾਪਾਯਚਤੁਕ੍ਕੇ ਚ, ਕਾਮੇ ਸੁਗਤਿਸਤ੍ਤਕੇ;
ਰੂਪੇ ਚ ਪਞ੍ਚਦਸਕੇ, ਅਸਞ੍ਞਾਪਾਯਭੂਮਿਯਂ.
੭੯੩. ਚਤੁਕੋਟ੍ਠਾਸਿਕੇਸ੍ਵੇਵ, ਸਤ੍ਤਵੀਸਵਿਧੇਸੁਪਿ;
ਜਾਤਿਟ੍ਠਾਨੇਸੁ ਸਤ੍ਤਾਨਂ, ਸਨ੍ਧਿਯਞ੍ਚ ਪਵਤ੍ਤਿਯਂ.
੭੯੪. ਇਨ੍ਦ੍ਰਿਯਬਦ੍ਧਸਨ੍ਤਾਨੇ, ਤਥਾਨਿਨ੍ਦ੍ਰਿਯਕਮ੍ਹਿ ਚ;
ਬਹਿਸਙ੍ਖਾਰਸਨ੍ਤਾਨੇ, ਮਤਕਾਯੇ ਚ ਸਮ੍ਭਵਾ.
੭੯੫. ਲਬ੍ਭਮਾਨਕਲਾਪਾ ਚ, ਕਲਾਪਾਨਞ੍ਚ ਰਾਸਯੋ;
ਤਤ੍ਥ ਵਿਤ੍ਥਾਰਸਙ੍ਖੇਪਾ, ਰੂਪਾਨਂ ਗਣਨਾਪਿ ਚ.
੭੯੬. ਏਤ੍ਥ ਰੂਪਾ ਅਵੁਤ੍ਤਾ ਹਿ, ਯਥਾਵੁਤ੍ਤਾਨੁਸਾਰਤੋ;
ਵਿਤ੍ਥਾਰੇਤ੍ਵਾਨ ਵਿਞ੍ਞੇਯ੍ਯਾ, ਸਬ੍ਬਥਾਪਿ ਚ ਵਿਞ੍ਞੁਨਾਤਿ.
ਇਤਿ ਰੂਪਵਿਭਾਗੇ ਕਲਾਪਕਥਾ ਨਿਟ੍ਠਿਤਾ.
ਵੀਸਤਿਮੋ ਪਰਿਚ੍ਛੇਦੋ.