੧੪. ਰਾਸਿਸਮ੍ਭਵਕਥਾ

੪੯੦. ਨਵੇਵ ਯੇਵਾਪਨਕਾ, ਅਟ੍ਠਾਰਸ ਚ ਰਾਸਯੋ;

ਨਵਭਿਂਸਤਿਸਮ੍ਭਿਨ੍ਨਾ, ਦਸ ਦ੍ਵੇ ਸਵਿਭਤ੍ਤਿਕਾ.

੪੯੧. ਏਕਦ੍ਵਯਤਿਚਤੁਛਸਤ੍ਤਟ੍ਠਾਨਾਨਵਜ੍ਜਕੇ;

ਸਤ੍ਤਵੀਸਤਿ ਸਤ੍ਤੇਕੋ, ਦ੍ਵਯਮੇਕੋ ਪੁਨੇਕਕੋ.

੪੯੨. ਦਸੇਵ ਯੇਵਾਪਨਕਾ, ਏਕਾਦਸ ਚ ਰਾਸਯੋ;

ਅਟ੍ਠਵੀਸਤਿਸਮ੍ਭਿਨ੍ਨਾ, ਦਸੇਵ ਸਵਿਭਤ੍ਤਿਕਾ.

੪੯੩. ਏਕਦ੍ਵਯਤਿਚਤੁਕ੍ਕਛਟ੍ਠਾਨਨਿਯਤਾ ਪਨ;

ਅਟ੍ਠਾਰਸ ਚ ਸਤ੍ਤੇਕੋ, ਏਕੋ ਚੇਕੋਵ ਪਾਪਕੇ.

੪੯੪. ਦ੍ਵੇ ਯੇਵਾਪਨਕਾ ਹੋਨ੍ਤਿ, ਰਾਸਯੋ ਚ ਚਤੁਬ੍ਬਿਧਾ;

ਤੇਰਸੇਤ੍ਥ ਅਸਮ੍ਭਿਨ੍ਨਾ, ਤਯੋਵ ਸਵਿਭਤ੍ਤਿਕਾ.

੪੯੫. ਏਕਦ੍ਵਯਤਿਕਟ੍ਠਾਨਾ, ਦਸ ਦ੍ਵੇਕੋ ਅਹੇਤੁਕੇ;

ਇਚ੍ਚਾਨਵਜ੍ਜਾ ਸਾਵਜ੍ਜਾ-ਹੇਤੁਕੇ ਯੋਗਨਿਚ੍ਛਯੋ.

੪੯੬. ਸਤ੍ਤਾਪਿ ਨਤ੍ਥਿ ਸਾਵਜ੍ਜੇ, ਨਿਰਵਜ੍ਜੇ ਪਕਾਸਕੋ;

ਅਹੇਤੁਕੇ ਚ ਮਗ੍ਗਾਦਿਰਾਸਯੋ ਨਤ੍ਥਿ ਚੁਦ੍ਦਸ.

੪੯੭. ਅਨਵਜ੍ਜਾ ਤੁ ਸਾਵਜ੍ਜੇ, ਸਾਵਜ੍ਜਕਾਨਵਜ੍ਜਕੇ;

ਚਿਤ੍ਤੁਪ੍ਪਾਦਮ੍ਹਿ ਨਤ੍ਥੇਵ, ਨਤ੍ਥੋਭਯਮਹੇਤੁਕੇ.

੪੯੮. ਸਾਵਜ੍ਜਾ ਪਨ ਸਾਵਜ੍ਜੇ, ਅਨਵਜ੍ਜਾਨਵਜ੍ਜਕੇ;

ਗਹੇਤਬ੍ਬਾ ਤੁ ਸਬ੍ਬਤ੍ਥ, ਸਾਧਾਰਣਾ ਪਕਿਣ੍ਣਕਾ.

੪੯੯. ਝਾਨਪਞ੍ਚਕਚਿਤ੍ਤੇਸੁ, ਸਤ੍ਤਸਟ੍ਠਿਸੁ ਨਿਦ੍ਦਿਸੇ;

ਝਾਨਙ੍ਗਯੋਗਭੇਦੇਨ, ਰਾਸਿਭੇਦਂ ਤਹਿਂ ਤਹਿਂ.

੫੦੦. ਚਤੁਛਕ੍ਕਾਨਵਜ੍ਜੇਸੁ, ਞਾਣਪੀਤਿਕਤਂ ਤਥਾ;

ਚਤੁਵੀਸ ਪਰਿਤ੍ਤੇਸੁ, ਚਤੁਧਾ ਭੇਦਮੁਦ੍ਦਿਸੇ.

੫੦੧. ਸਰਾਗਵੀਤਰਾਗਾਨਂ, ਅਪ੍ਪਮਞ੍ਞਾਪਵਤ੍ਤਿਯਂ;

ਕਰੁਣਾਮੁਦਿਤਾ ਹੋਨ੍ਤਿ, ਕਾਮਪੁਞ੍ਞਮਹਾਕ੍ਰਿਯੇ.

੫੦੨. ਉਪਚਾਰਪ੍ਪਨਾਪਤ੍ਤਾ, ਸੁਖਿਤਾ ਸਤ੍ਤਗੋਚਰਾ;

ਤਸ੍ਮਾ ਨ ਪਞ੍ਚਮਾਰੁਪ੍ਪੇ, ਮਹਾਪਾਕੇ ਅਨੁਤ੍ਤਰੇ.

੫੦੩. ਸੋਤਾਪਤਿਤੁਪੇਕ੍ਖਾਸੁ, ਪਰਿਕਮ੍ਮਾਦਿਸਮ੍ਭਵੇ;

ਝਾਨਾਨਂ ਤੁਲ੍ਯਪਾਕਤ੍ਤਾ, ਤਪ੍ਪਾਕੇਸੁ ਚ ਲਬ੍ਭਰੇ.

੫੦੪. ਵਿਰਤੀ ਚ ਸਰਾਗਾਨਂ, ਵੀਤਿਕ੍ਕਮਨਸਮ੍ਭਵਾ;

ਸਮ੍ਪਤ੍ਤੇ ਚ ਸਮਾਦਾਨੇ, ਕਾਮਪੁਞ੍ਞੇਸੁ ਲਬ੍ਭਰੇ.

੫੦੫. ਤਂਤਂਦ੍ਵਾਰਿਕਦੁਸ੍ਸਿਲ੍ਯ-ਚੇਤਨੁਚ੍ਛੇਦਕਿਚ੍ਚਤੋ;

ਮਗ੍ਗੇ ਚ ਤੁਲ੍ਯਪਾਕਤ੍ਤਾ, ਫਲੇ ਚ ਨਿਯਤਾ ਸਿਯੁਂ.

੫੦੬. ਪਵਤ੍ਤਾਕਾਰਵਿਸਯਭਿਨ੍ਨਾ ਪਞ੍ਚਾਪਿ ਸਮ੍ਭਵਾ;

ਲੋਕਿਯੇ ਲਬ੍ਭਮਾਨਾਪਿ, ਵਿਸੁਂ ਚੇਵ ਸਿਯੁਂ ਨ ਵਾ.

੫੦੭. ਪਾਪਾ ਲਬ੍ਭਨ੍ਤਿ ਪਾਪੇਸੁ, ਸਤ੍ਤ ਛਕ੍ਕੇਕਕਾ ਕਮਾ;

ਸਰੂਪਯੇਵੋਭਯਕਾ, ਨਿਯਤਟ੍ਠ ਛਲ਼ੇਤਰੇ.

੫੦੮. ਸਾਧਾਰਣਾ ਚ ਸਬ੍ਬਤ੍ਥ, ਯਥਾਵੁਤ੍ਤਾ ਪਕਿਣ੍ਣਕਾ;

ਤਤ੍ਥ ਚੇਕਗ੍ਗਤਾ ਨਤ੍ਥਿ, ਇਨ੍ਦ੍ਰਿਯਾਦੀਸੁ ਕਙ੍ਖਿਤੇ.

੫੦੯. ਛਨ੍ਦਾਧਿਮੋਕ੍ਖਾ ਯੇਵਾਪਿ, ਵੀਸੇਕਾਦਸਵਜ੍ਜਿਤੇ;

ਉਦ੍ਧਚ੍ਚਮੇਕਾਦਸਸੁ, ਮਜ੍ਝਤ੍ਤਮਨਵਜ੍ਜਕੇ.

੫੧੦. ਸਬ੍ਬਤ੍ਥ ਮਨਸਿਕਾਰੋ, ਤਿਦ੍ਵੇਕਦ੍ਵਿਤਿਕਾਪਰੇ;

ਅਟ੍ਠਟ੍ਠਵੀਸਚਤੂਸੁ, ਪਞ੍ਚਦ੍ਵੀਸੁ ਯਥਾਕ੍ਕਮਂ.

੫੧੧. ਸਮੁਦਾਯਵਸੇਨੇਤ੍ਥ, ਉਦ੍ਧਚ੍ਚਵਿਰਤਿਤ੍ਤਯਂ;

ਸਵਿਭਤ੍ਤਿਕਮਞ੍ਞਤ੍ਥ, ਅਵਿਭਤ੍ਤਿਕਮੇਵ ਤਂ.

੫੧੨. ਚਿਤ੍ਤੁਪ੍ਪਾਦੇਸੁ ਤੇਨੇਤਂ, ਵਿਭਤ੍ਤਿਅਵਿਭਤ੍ਤਿਕਂ;

ਇਤਿ ਸਾਧੁ ਸਲ੍ਲਕ੍ਖੇਯ੍ਯ, ਸਮ੍ਭਵਾਸਮ੍ਭਵਂ ਬੁਧੋਤਿ.

ਇਤਿ ਚੇਤਸਿਕਵਿਭਾਗੇ ਰਾਸਿਸਮ੍ਭਵਕਥਾ ਨਿਟ੍ਠਿਤਾ.

ਚੁਦ੍ਦਸਮੋ ਪਰਿਚ੍ਛੇਦੋ.