੧੩. ਰਾਸਿਯੋਗਕਥਾ
੪੪੧. ਇਤਿ ਰਾਸਿਵੀਥਿਂ ਞਤ੍ਵਾ, ਲਬ੍ਭਮਾਨਵਸਾ ਬੁਧੋ;
ਤੇਸਮੇਵਾਥ ਯੋਗਮ੍ਪਿ, ਚਿਤ੍ਤੁਪ੍ਪਾਦੇਸੁ ਦੀਪਯੇ.
੪੪੨. ਕਾਮਾਵਚਰਕੁਸਲਸ੍ਸ, ਪਠਮਦ੍ਵਯਮਾਨਸੇ;
ਸਬ੍ਬੇਪਿ ਰਾਸਯੋ ਹੋਨ੍ਤਿ, ਯਥਾਸਮ੍ਭਵਤੋ ਕਥਂ.
੪੪੩. ਫਸ੍ਸਪਞ੍ਚਕਰਾਸੀ ਚ, ਝਾਨਪਞ੍ਚਕਰਾਸਿ ਚ;
ਇਨ੍ਦ੍ਰਿਯਟ੍ਠਕਰਾਸੀ ਚ, ਮਗ੍ਗਪਞ੍ਚਕਰਾਸਿ ਚ.
੪੪੪. ਬਲਸਤ੍ਤਕਰਾਸੀ ਚ, ਹੇਤੁਕਮ੍ਮਪਥਤ੍ਤਿਕਾ;
ਦਸਾਵਸੇਸਾ ਰਾਸੀ ਚ, ਲੋਕਪਾਲਦੁਕਾਦਯੋ.
੪੪੫. ਯੇਵਾਪਨਕਨਵਕਂ, ਨਿਯਤੁਦ੍ਧਚ੍ਚਵਜ੍ਜਿਤਾ;
ਅਪ੍ਪਮਞ੍ਞਾਦ੍ਵਯਞ੍ਚੇਵ, ਤਿਸ੍ਸੋ ਵਿਰਤਿਯੋਤਿ ਚ.
੪੪੬. ਇਤਿ ਸਤ੍ਤਰਸੇਵੇਤੇ, ਦੇਸਿਤਾ ਚ ਸਰੂਪਤੋ;
ਯੇਵਾਪਨਕਰਾਸੀ ਚ, ਲਬ੍ਭਨ੍ਤਿਟ੍ਠਾਰਸਾਪਿ ਚ.
੪੪੭. ਛਪ੍ਪਞ੍ਞਾਸ ਪਦਾਨੇਤ੍ਥ, ਦੇਸਿਤਾਨਿ ਸਰੂਪਤੋ;
ਧਮ੍ਮਾ ਪਨ ਸਮਤਿਂਸ, ਤਤ੍ਥ ਹੋਨ੍ਤਿ ਸਰੂਪਤੋ.
੪੪੮. ਤਾਨਿ ਯੇਵਾਪਨਕੇਹਿ, ਪਞ੍ਚਸਟ੍ਠਿ ਪਦਾਨਿ ਚ;
ਧਮ੍ਮਾ ਚੇਕੂਨਤਾਲੀਸ, ਭਵਨ੍ਤਿ ਪਨ ਸਮ੍ਭਵਾ.
੪੪੯. ਤਤ੍ਥ ਦ੍ਵਾਦਸ ਧਮ੍ਮਾ ਚ, ਦੇਸਿਤਾ ਸਵਿਭਤ੍ਤਿਕਾ;
ਅਵਸੇਸਾ ਤੁ ਸਬ੍ਬੇਪਿ, ਅਵਿਭਤ੍ਤਿਕਨਾਮਕਾ.
੪੫੦. ਏਕਦ੍ਵਿ ਚ ਤਿਚਤੁਕ੍ਕ-ਛਸਤ੍ਤਟ੍ਠਾਨਿਕਾ ਪਨ;
ਸਤ੍ਤਵੀਸ ਚ ਸਤ੍ਤੇਕੋ, ਦ੍ਵੇਕੇਕੋ ਚ ਯਥਾਕ੍ਕਮਂ.
੪੫੧. ਨਿਯਤਾ ਤੁ ਚਤੁਤ੍ਤਿਂਸ, ਧਮ੍ਮਾਵ ਸਹਵੁਤ੍ਤਿਤੋ;
ਯਥਾਸਮ੍ਭਵਵੁਤ੍ਤਿਤੋ, ਪਞ੍ਚਧਾ ਨਿਯਤਾ ਕਥਾ.
੪੫੨. ਤਤ੍ਥ ਚਾਨਿਯਤੇ ਸਬ੍ਬੇ, ਗਹੇਤ੍ਵਾ ਚ ਪਹਾਯ ਚ;
ਪਚ੍ਚੇਕਞ੍ਚ ਗਹੇਤ੍ਵਾਪਿ, ਸਤ੍ਤਧਾ ਯੋਜਨਕ੍ਕਮੋ.
੪੫੩. ਸਕਿਮੇਕੂਨਤਾਲੀਸ, ਚਤੁਤ੍ਤਿਂਸ ਯਥਾਕ੍ਕਮਂ;
ਪਞ੍ਚਕ੍ਖਤ੍ਤੁਞ੍ਚ ਯੋਜੇਯ੍ਯ, ਪਞ੍ਚਤਿਂਸਾਤਿ ਪਣ੍ਡਿਤੋ.
੪੫੪. ਰਾਸਯੋ ਚ ਪਦਾਨੀਧ, ਧਮ੍ਮਨ੍ਤਰਵਿਭਤ੍ਤਿਯੋ;
ਸਰੂਪਯੇਵਾਪਨਕੇ, ਨਿਯਤਾਨਿਯਤੇ ਯਥਾ.
੪੫੫. ਯੋਜਨਾਨਯਭੇਦਞ੍ਚ, ਗਣਨਾਸਙ੍ਗਹਟ੍ਠਿਤਿ;
ਲਬ੍ਭਮਾਨਾਨੁਮਾਨੇਨ, ਸਲ੍ਲਕ੍ਖੇਨ੍ਤੋ ਤਹਿਂ ਤਹਿਂ.
੪੫੬. ਞਾਣਂ ਞਾਣਵਿਯੁਤ੍ਤਮ੍ਹਿ, ਹਿਤ੍ਵਾ ਪੀਤਿਂ ਉਪੇਕ੍ਖਿਤੇ;
ਵੇਦਨਾ ਪਰਿਵਤ੍ਤੇਨ੍ਤੋ, ਕਾਮਪੁਞ੍ਞੇ ਚ ਸੇਸਕੇ.
੪੫੭. ਮਹਾਕ੍ਰਿਯੇ ਚ ਯੋਜੇਯ੍ਯ, ਪਹਾਯ ਵਿਰਤਿਤ੍ਤਯਂ;
ਅਪ੍ਪਮਞ੍ਞਾ ਚ ਹਿਤ੍ਵਾਥ, ਮਹਾਪਾਕੇ ਚ ਯੋਜਯੇ.
੪੫੮. ਤਕ੍ਕਾਦਿਂ ਕਮਤੋ ਹਿਤ੍ਵਾ, ਸਬ੍ਬਤ੍ਥ ਵਿਰਤਿਤ੍ਤਯਂ;
ਪਞ੍ਚਮੇ ਅਪ੍ਪਮਞ੍ਞਾਯ, ਹਿਤ੍ਵਾ ਰੂਪੇ ਚ ਯੋਜਯੇ.
੪੫੯. ਹਿਤ੍ਵਾਪ੍ਪਮਞ੍ਞਾ ਯੋਜਯੇ, ਯਥਾਝਾਨਮਨੁਤ੍ਤਰੇ;
ਲੋਕੁਤ੍ਤਰਿਨ੍ਦ੍ਰਿਯਞ੍ਚੇਵ, ਗਹੇਤ੍ਵਾ ਵਿਰਤਿਤ੍ਤਯਂ.
੪੬੦. ਝਾਨਾਨਿ ਚਤੁਤਾਲੀਸ, ਸੁਖਯੁਤ੍ਤਾਨਿ ਵਤ੍ਤਰੇ;
ਉਪੇਕ੍ਖਿਤਾਨਿ ਤੇਵੀਸ, ਪਞ੍ਚਮਜ੍ਝਾਨੇ ਚ ਸਬ੍ਬਥਾ.
੪੬੧. ਅਪ੍ਪਮਞ੍ਞਾਵਿਰਤਿਯੋ, ਕਾਮਪੁਞ੍ਞੇਸੁ ਲਬ੍ਭਰੇ;
ਅਪ੍ਪਮਞ੍ਞਾ ਰੂਪਜ੍ਝਾਨ-ਚਤੁਕ੍ਕੇ ਚ ਮਹਾਕ੍ਰਿਯੇ.
੪੬੨. ਲੋਕੁਤ੍ਤਰੇਸੁ ਸਬ੍ਬਤ੍ਥ, ਸਮ੍ਭੋਤਿ ਵਿਰਤਿਤ੍ਤਯਂ;
ਨਤ੍ਥਿਦ੍ਵਯਮ੍ਪਿ ਆਰੁਪ੍ਪੇ, ਮਹਾਪਾਕੇ ਚ ਪਞ੍ਚਮੇ.
੪੬੩. ਵਿਤਕ੍ਕਾਦਿਤ੍ਤਯਂ ਪਞ੍ਞਾ, ਪਞ੍ਚ ਚਾਨਿਯਤਾ ਚਲਾ;
ਹਾਨਿਬੁਦ੍ਧਿਵਸਾ ਸੇਸਾ, ਨ ਚਲਨ੍ਤਿ ਕੁਦਾਚਨਂ.
੪੬੪. ਬਾਵੀਸਤਿਵਿਧੋ ਚੇਤ੍ਥ, ਸਙ੍ਗਹੋ ਅਨਵਜ੍ਜਕੇ;
ਦ੍ਵਯਦ੍ਵਯਵਸਾ ਚੇਵ, ਝਾਨਪਞ੍ਚਕਤੋਪਿ ਚ.
੪੬੫. ਇਤਿ ਞਤ੍ਵਾਨਵਜ੍ਜੇਸੁ, ਰਾਸਿਸਙ੍ਗਹ ਸਮ੍ਭਵਂ;
ਸਾਵਜ੍ਜੇਸੁਪਿ ਵਿਞ੍ਞੇਯ੍ਯਾ, ਵਿਞ੍ਞੁਨਾ ਰਾਸਯੋ ਕਥਂ.
੪੬੬. ਲੋਭਮੂਲੇਸੁ ਪਠਮੇ, ਫਸ੍ਸਪਞ੍ਚਕਰਾਸਿ ਚ;
ਝਾਨਪਞ੍ਚਕਰਾਸੀ ਚ, ਤਥੇਵਿਨ੍ਦ੍ਰਿਯਪਞ੍ਚਕਂ.
੪੬੭. ਮਗ੍ਗਬਲਚਤੁਕ੍ਕਞ੍ਚ, ਹੇਤੁਕਮ੍ਮਪਥਦੁਕਾ;
ਲੋਕਨਾਸਕਰਾਸੀ ਚ, ਸਮਥੋ ਸਮਥਦ੍ਦੁਕਾ.
੪੬੮. ਤਤ੍ਰਮਜ੍ਝਤ੍ਤਤਂ ਹਿਤ੍ਵਾ, ਯੇਵਾਪਨਕਨਾਮਕਾ;
ਚਤ੍ਤਾਰੋ ਚੇਤਿ ਲਬ੍ਭਨ੍ਤਿ, ਤਤ੍ਥੇਕਾਦਸ ਰਾਸਯੋ.
੪੬੯. ਦ੍ਵਤ੍ਤਿਂਸੇਵ ਪਦਾਨੇਤ੍ਥ, ਦੇਸਿਤਾਨਿ ਸਰੂਪਤੋ;
ਤਾਨਿ ਯੇਵਾਪਨਕੇਹਿ, ਛਤ੍ਤਿਂਸੇਵ ਭਵਨ੍ਤਿ ਚ.
੪੭੦. ਅਸਮ੍ਭਿਨ੍ਨਪਦਾਨੇਤ੍ਥ, ਸਮਵੀਸਤਿ ਸਮ੍ਭਵਾ;
ਸਵਿਭਤ੍ਤਿਕਨਾਮਾ ਚ, ਨਵ ਧਮ੍ਮਾ ਪਕਾਸਿਤਾ.
੪੭੧. ਏਕਦ੍ਵਯਤਿਚਤੁਕ੍ਕ-ਛਟ੍ਠਾਨਨਿਯਤਾ ਪਨ;
ਏਕਾਦਸ ਛਲ਼ੇਕਾ ਚ, ਕਮੇਨੇਕੋ ਪੁਨੇਕਕੋ.
੪੭੨. ਨਤ੍ਥੇਵਾਨਿਯਤਾ ਹੇਤ੍ਥ, ਯੇਵਾਪਨਕਨਾਮਕਾ;
ਯੋਜਨਾਨਯਭੇਦੋ ਚ, ਤਸ੍ਮਾ ਤਤ੍ਥ ਨ ਵਿਜ੍ਜਤਿ.
੪੭੩. ਮਾਨੋ ਚ ਥਿਨਮਿਦ੍ਧਞ੍ਚ, ਇਸ੍ਸਾ ਮਚ੍ਛਰਿਯਂ ਤਥਾ;
ਕੁਕ੍ਕੁਚ੍ਚਮਿਤਿ ਸਾਵਜ੍ਜੇ, ਛਲ਼ੇਵਾਨਿਯਤਾ ਮਤਾ.
੪੭੪. ਮਾਨੋ ਦਿਟ੍ਠਿਵਿਯੁਤ੍ਤੇਸੁ, ਸਸਙ੍ਖਾਰੇਸੁ ਪਞ੍ਚਸੁ;
ਥਿਨਮਿਦ੍ਧਂ ਤਯੋ ਸੇਸਾ, ਪਟਿਘਦ੍ਵਯਯੋਗਿਨੋ.
੪੭੫. ਇਚ੍ਚੇਵਮਟ੍ਠ ਸਾਵਜ੍ਜਾ, ਅਨਵਜ੍ਜਟ੍ਠਵੀਸਤਿ;
ਛਤ੍ਤਿਂਸ ਮਾਨਸਾ ਸਬ੍ਬੇ, ਹੋਨ੍ਤਾਨਿਯਤਯੋਗਿਨੋ.
੪੭੬. ਤੇਹਿ ਯੁਤ੍ਤਾ ਯਥਾਯੋਗਂ, ਏਕਦ੍ਵਿਤ੍ਤਯਪਞ੍ਚਹਿ;
ਦ੍ਵੇ ਦ੍ਵਾਵੀਸਂ ਤਯੋ ਚੇਵ, ਨਵ ਚਾਥ ਯਥਾਕ੍ਕਮਂ.
੪੭੭. ਇਤਿ ਵੁਤ੍ਤਾਨੁਸਾਰੇਨ, ਲਬ੍ਭਮਾਨਵਸਾ ਪਨ;
ਤਦਞ੍ਞੇਸੁਪਿ ਯੋਜੇਯ੍ਯ, ਸਾਵਜ੍ਜੇਸੁ ਯਥਾਕ੍ਕਮਂ.
੪੭੮. ਲੋਭਮੂਲੇਸੁ ਲੋਭਞ੍ਚ, ਦੋਸਞ੍ਚ ਪਟਿਘਦ੍ਵਯੇ;
ਮੋਹਮੂਲੇ ਕਙ੍ਖੁਦ੍ਧਚ੍ਚਂ, ਗਹੇਤ੍ਵਾ ਹੇਤੁਰਾਸਿਯਂ.
੪੭੯. ਦਿਟ੍ਠਿਂ ਦਿਟ੍ਠਿਵਿਯੁਤ੍ਤਮ੍ਹਿ, ਹਿਤ੍ਵਾ ਪੀਤਿਮੁਪੇਕ੍ਖਿਤੇ;
ਵੇਦਨਂ ਪਰਿਵਤ੍ਤੇਨ੍ਤੋ, ਦੋਸਮੂਲੇ ਚ ਪਣ੍ਡਿਤੋ.
੪੮੦. ਤਥਾ ਕਮ੍ਮਪਥਂ ਦਿਟ੍ਠਿਂ,
ਪੀਤਿਂ ਛਨ੍ਦਞ੍ਚ ਮੋਮੁਹੇ;
ਕਙ੍ਖਿਤੇ ਅਧਿਮੋਕ੍ਖਞ੍ਚ,
ਹਿਤ੍ਵਾ ਯੋਜੇਯ੍ਯ ਰਾਸਯੋ.
੪੮੧. ਚਿਤ੍ਤਸ੍ਸ ਠਿਤਿਂ ਪਤ੍ਤਾਸੁ, ਚਿਤ੍ਤਸ੍ਸੇਕਗ੍ਗਤਾ ਪਨ;
ਕਙ੍ਖਿਤੇ ਪਰਿਹੀਨਾਵ, ਇਨ੍ਦ੍ਰਿਯਾਦੀਸੁ ਪਞ੍ਚਸੁ.
੪੮੨. ਇਤਿ ਦ੍ਵਾਦਸਧਾ ਞਤ੍ਵਾ, ਸਾਵਜ੍ਜੇਸੁਪਿ ਸਙ੍ਗਹਂ;
ਅਹੇਤੁਕੇਪਿ ਵਿਞ੍ਞੇਯ੍ਯਾ, ਯਥਾਸਮ੍ਭਵਤੋ ਕਥਂ.
੪੮੩. ਅਟ੍ਠਾਰਸਾਹੇਤੁਕੇਸੁ, ਪਞ੍ਚਵਿਞ੍ਞਾਣਮਾਨਸੇ;
ਫਸ੍ਸਪਞ੍ਚਕਰਾਸੀ ਚ, ਝਾਨਟ੍ਠਾਨਦੁਕਂ ਤਥਾ.
੪੮੪. ਇਨ੍ਦ੍ਰਿਯਤ੍ਤਿਕਰਾਸੀ ਚ, ਯੇਵਾਪਨਕਨਾਮਕੋ;
ਏਕੋ ਮਨਸਿਕਾਰੋਤਿ, ਚਤ੍ਤਾਰੋ ਰਾਸਯੋ ਸਿਯੁਂ.
੪੮੫. ਅਸਮ੍ਭਿਨ੍ਨਾ ਪਨਟ੍ਠੇਵ, ਦ੍ਵੇ ਤਤ੍ਥ ਸਵਿਭਤ੍ਤਿਕਾ;
ਏਕਦ੍ਵਯਤਿਕਟ੍ਠਾਨਾ, ਛਲ਼ੇਕੋ ਚ ਪੁਨੇਕਕੋ.
੪੮੬. ਮਨੋਧਾਤੁਤ੍ਤਿਕਾਹੇਤੁ-ਪਟਿਸਨ੍ਧਿਯੁਗੇ ਪਨ;
ਵਿਤਕ੍ਕੋ ਚ ਵਿਚਾਰੋ ਚ, ਅਧਿਕਾ ਝਾਨਰਾਸਿਯਂ.
੪੮੭. ਸੁਖਸਨ੍ਤੀਰਣੇ ਪੀਤਿ, ਦੁਤਿਯਾਵਜ੍ਜਨੇ ਪਨ;
ਵੀਰਿਯਞ੍ਚ ਸਮਾਧਿਞ੍ਚ, ਲਬ੍ਭਤਿਨ੍ਦ੍ਰਿਯਰਾਸਿਯਂ.
੪੮੮. ਅਧਿਕਾ ਹਸਿਤੇ ਹੋਨ੍ਤਿ, ਪੀਤਿ ਚ ਵੀਰਿਯਾਦਯੋ;
ਯੇਵਾਪਨਾਧਿਮੋਕ੍ਖੋ ਚ, ਪਞ੍ਚਵਿਞ੍ਞਾਣਵਜ੍ਜਿਤੇ.
੪੮੯. ਇਚ੍ਚਾਨਵਜ੍ਜੇ ਬਾਵੀਸ,
ਸਾਵਜ੍ਜੇ ਦ੍ਵਾਦਸਾਪਰੇ;
ਯੋਗਾ ਹੇਤੁਮ੍ਹਿ ਪਞ੍ਚੇਤੇ,
ਤਾਲੀਸੇਕੂਨਕਾ ਕਥਾਤਿ.
ਇਤਿ ਚੇਤਸਿਕਵਿਭਾਗੇ ਰਾਸਿਯੋਗਕਥਾ ਨਿਟ੍ਠਿਤਾ.
ਤੇਰਸਮੋ ਪਰਿਚ੍ਛੇਦੋ.