੧੨. ਰਾਸਿਵਿਨਿਚ੍ਛਯਕਥਾ

੪੧੬. ਤਤ੍ਥ ਵਿਞ੍ਞਾਣਕਾਯਾ ਛ, ਸਤ੍ਤ ਵਿਞ੍ਞਾਣਧਾਤੁਯੋ;

ਫਸ੍ਸਾ ਚਕ੍ਖਾਦਿਸਮ੍ਫਸ੍ਸਾ, ਛਬ੍ਬਿਧਾ ਸਤ੍ਤਧਾਪਿ ਚ.

੪੧੭. ਚਕ੍ਖੁਸਮ੍ਫਸ੍ਸਜਾਦੀਹਿ, ਭੇਦੇਹਿ ਪਨ ਵੇਦਨਾ;

ਸਞ੍ਞਾ ਚ ਚੇਤਨਾ ਚੇਵ, ਭਿਨ੍ਨਾ ਛਧਾ ਚ ਸਤ੍ਤਧਾ.

੪੧੮. ਚਿਤ੍ਤੁਪ੍ਪਾਦੇਸੁ ਧਮ੍ਮਾ ਚ, ਖਨ੍ਧਾਯਤਨਧਾਤੁਯੋ;

ਆਹਾਰਾ ਚ ਯਥਾਯੋਗਂ, ਫਸ੍ਸਪਞ੍ਚਕਰਾਸਿਯਂ.

੪੧੯. ਸਬ੍ਬੇ ਸਙ੍ਗਹਿਤਾ ਹੋਨ੍ਤਿ, ਤਸ੍ਮਾ ਨਾਮਪਰਿਗ੍ਗਹੋ;

ਮੂਲਰਾਸਿ ਚ ਸੋ ਸਬ੍ਬ-ਸਙ੍ਗਹੋਤਿ ਪਵੁਚ੍ਚਤਿ.

੪੨੦. ਝਾਨਰਾਸਿਮ੍ਹਿ ਪਞ੍ਚੇਵ, ਧਮ੍ਮਾ ਸਤ੍ਤਪ੍ਪਭੇਦਤੋ;

ਇਨ੍ਦ੍ਰਿਯਾਨਿ ਚ ਬਾਵੀਸ, ਧਮ੍ਮਤੋ ਪਨ ਸੋਲ਼ਸ.

੪੨੧. ਨਵ ਮਗ੍ਗਙ੍ਗਧਮ੍ਮਾ ਚ, ਭਿਨ੍ਨਾ ਦ੍ਵਾਦਸਧਾਪਿ ਤੇ;

ਛਲ਼ੇਵ ਹੇਤੁਯੋ ਤਤ੍ਥ, ਦੇਸਿਤਾ ਕਙ੍ਖਿਤੁਦ੍ਧਵਾ.

੪੨੨. ਦਸ ਕਮ੍ਮਪਥਾ ਧਮ੍ਮਾ, ਛਲ਼ੇਵ ਪਨ ਦੇਸਿਤਾ;

ਸੇਸਾਵ ਦਸਧਮ੍ਮੇਹਿ, ਸਮਾਨਾ ਚਤੁਰਾਸਯੋ.

੪੨੩. ਪਞ੍ਞਾ ਦਸਵਿਧਾ ਤਤ੍ਥ, ਵੇਦਨਾ ਨਵਧਾ ਠਿਤਾ;

ਸਮਾਧਿ ਸਤ੍ਤਧਾ ਹੋਤਿ, ਵੀਰਿਯਂ ਪਨ ਪਞ੍ਚਧਾ.

੪੨੪. ਸਤਿ ਭਿਨ੍ਨਾ ਚਤੁਧਾਵ, ਵਿਤਕ੍ਕੋ ਤਿਵਿਧੋ ਮਤੋ;

ਦ੍ਵਿਧਾ ਚਿਤ੍ਤਾਦਯੋ ਹੋਨ੍ਤਿ, ਦਸਪਞ੍ਚੇਵ ਸਮ੍ਭਵਾ.

੪੨੫. ਸੇਸਾ ਦ੍ਵਤ੍ਤਿਂਸ ਸਬ੍ਬੇਪਿ, ਧਮ੍ਮਾ ਏਕੇਕਧਾਪਿ ਚ;

ਹਿਤ੍ਵਾ ਰੂਪਿਨ੍ਦ੍ਰਿਯਾਨੇਤੇ, ਵਿਭਾਗਾ ਅਟ੍ਠਧਾ ਕਥਂ.

੪੨੬. ਫਸ੍ਸੋ ਚ ਚੇਤਨਾ ਸਞ੍ਞਾ, ਵਿਚਾਰੋ ਪੀਤਿ ਜੀਵਿਤਂ;

ਨਿਰਵਜ੍ਜਾ ਛ ਯੁਗਲ਼ਾ, ਸਾਵਜ੍ਜਮੋਹਕਙ੍ਖਿਤਾ.

੪੨੭. ਯੇਵਾਪਨਕਧਮ੍ਮਾ ਚ, ਵਿਰਤੁਦ੍ਧਚ੍ਚਵਜ੍ਜਿਤਾ;

ਦ੍ਵਾਦਸਾ ਚੇਤਿ ਸਬ੍ਬੇਪਿ, ਦ੍ਵਤ੍ਤਿਂਸਕੇਕਧਾ ਤਥਾ.

੪੨੮. ਚਿਤ੍ਤਂ ਮਨਿਨ੍ਦ੍ਰਿਯਂ ਚਿਤ੍ਤਂ, ਸਦ੍ਧਾ ਸਦ੍ਧਿਨ੍ਦ੍ਰਿਯਂ ਬਲਂ;

ਬਲੇਸੁ ਲੋਕਿਯਾ ਵੁਤ੍ਤਾ, ਲੋਕਿਯੇ ਚ ਦੁਕਦ੍ਵਯੇ.

੪੨੯. ਲੋਭਾਲੋਭਾਦਿਕਾ ਦ੍ਵੇ ਦ੍ਵੇ,

ਚਤ੍ਤਾਰੋ ਹੇਤੁਰਾਸਿਯਂ;

ਮਿਚ੍ਛਾਦਿਟ੍ਠਿ ਚ ਮਗ੍ਗਙ੍ਗੇ,

ਪਞ੍ਚਕਮ੍ਮਪਥੇਪਿ ਤੇ.

੪੩੦. ਯੇਵਾਪਨਕਰਾਸਿਮ੍ਹਿ, ਦੇਸਿਤਾ ਵਿਰਤੁਦ੍ਧਵਾ;

ਮਗ੍ਗਹੇਤੂਸੁ ਚੇਵੇਤਿ, ਦ੍ਵਿਧਾ ਪਞ੍ਚਦਸ ਠਿਤਾ.

੪੩੧. ਵਿਤਕ੍ਕੋ ਝਾਨਮਗ੍ਗੇਸੁ, ਤਿਵਿਧਾ ਨਵਧਾ ਪਨ;

ਵੇਦਨਾ ਮੂਲਰਾਸਿਮ੍ਹਿ, ਤਥਾ ਝਾਨਿਨ੍ਦ੍ਰਿਯੇਸੁ ਚ.

੪੩੨. ਇਨ੍ਦ੍ਰਿਯਮਗ੍ਗਰਾਸਿਮ੍ਹਿ, ਬਲਪਿਟ੍ਠਿਦੁਕਤ੍ਤਿਕੇ;

ਚਤੁਧਾ ਸਤਿ ਤਤ੍ਥੇਵ, ਵੀਰਿਯਮ੍ਪਿ ਚ ਪਞ੍ਚਧਾ.

੪੩੩. ਸਮਾਧਿ ਸਤ੍ਤਧਾ ਵੁਤ੍ਤੋ, ਝਾਨਙ੍ਗੇਸੁ ਚ ਤਤ੍ਥ ਚ;

ਤਤ੍ਥੇਵ ਦਸਧਾ ਪਞ੍ਞਾ, ਹੇਤੁਕਮ੍ਮਪਥੇਸੁ ਚ.

੪੩੪. ਦਸਨਵਸਤ੍ਤਪਞ੍ਚਚਤੁਤਿਦ੍ਵੇਕਧਾ ਠਿਤਾ;

ਛਲ਼ੇਕਕਾ ਪਞ੍ਚਦਸ, ਦ੍ਵਤ੍ਤਿਂਸ ਚ ਯਥਾਕ੍ਕਮਂ.

੪੩੫. ਅਟ੍ਠ ਵਿਭਾਗਸਙ੍ਖੇਪਾ, ਪਦਾਨਿ ਦਸਧਾ ਸਿਯੁਂ;

ਤੇਪਞ੍ਞਾਸੇਵ ਧਮ੍ਮਾ ਚ, ਅਟ੍ਠਾਰਸ ਚ ਰਾਸਯੋ.

੪੩੬. ਇਤਿ ਧਮ੍ਮਵਵਤ੍ਥਾਨੇ, ਧਮ੍ਮਸਙ੍ਗਣਿਯਂ ਪਨ;

ਚਿਤ੍ਤੁਪ੍ਪਾਦਪਰਿਚ੍ਛੇਦੇ, ਉਦ੍ਦੇਸਨਯਸਙ੍ਗਹੋ.

੪੩੭. ਪਦਾਨਿ ਚਤੁਰਾਸੀਤਿ, ਦੇਸਿਤਾਨਿ ਸਰੂਪਤੋ;

ਯੇਵਾਪਨਕਨਾਮੇਨ, ਸੋਲ਼ਸੇਵ ਯਥਾਰਹਂ.

੪੩੮. ਤਤ੍ਥਾਨਿਯਤਨਾਮਾਨਿ, ਪਦਾਨੇਕਾਦਸੇਵ ਤੁ;

ਵੁਤ੍ਤਾਨੇਕੂਨਨਵੁਤਿ, ਨਿਯਤਾਨੇਵ ਸਮ੍ਭਵਾ.

੪੩੯. ਅਸਮ੍ਭਿਨ੍ਨਪਦਾਨੇਤ੍ਥ, ਤੇਪਞ੍ਞਾਸੇਵ ਸਬ੍ਬਥਾ;

ਚਿਤ੍ਤਚੇਤਸਿਕਾਨਂ ਤੁ, ਵਸੇਨ ਪਰਿਦੀਪਯੇ.

੪੪੦. ਵਿਭਾਗਪਦਧਮ੍ਮਾਨਂ, ਵਸੇਨੇਵਂ ਪਕਾਸਿਤੋ;

ਚਿਤ੍ਤਚੇਤਸਿਕਾਨਂ ਤੁ, ਕਮਤੋ ਰਾਸਿਨਿਚ੍ਛਯੋਤਿ.

ਇਤਿ ਚੇਤਸਿਕਵਿਭਾਗੇ ਰਾਸਿਵਿਨਿਚ੍ਛਯਕਥਾ ਨਿਟ੍ਠਿਤਾ.

ਦ੍ਵਾਦਸਮੋ ਪਰਿਚ੍ਛੇਦੋ.