੯. ਚੇਤਸਿਕਸਙ੍ਗਹਕਥਾ
੩੧੫. ਸਤ੍ਤ ਸਾਧਾਰਣਾ ਚੇਵ, ਛ ਧਮ੍ਮਾ ਚ ਪਕਿਣ੍ਣਕਾ;
ਸਦ੍ਧਾਦਿ ਪਞ੍ਚਵੀਸੇਤਿ, ਅਟ੍ਠਤਿਂਸ ਸਮਿਸ੍ਸਿਤਾ.
੩੧੬. ਕਾਮਾਵਚਰਪੁਞ੍ਞੇਸੁ, ਲਬ੍ਭਨ੍ਤਿ ਪਠਮਦ੍ਵਯੇ;
ਸਤ੍ਤਤਿਂਸੇਵ ਦੁਤਿਯੇ, ਪਞ੍ਞਾਮਤ੍ਤਵਿਵਜ੍ਜਿਤਾ.
੩੧੭. ਤਤਿਯੇ ਚ ਯਥਾਵੁਤ੍ਤਾ, ਪੀਤਿਮਤ੍ਤਵਿਵਜ੍ਜਿਤਾ;
ਛਤ੍ਤਿਂਸੇਵ ਚਤੁਤ੍ਥਮ੍ਹਿ, ਪਞ੍ਞਾਪੀਤਿਦ੍ਵਯਂ ਵਿਨਾ.
੩੧੮. ਮਹਾਕ੍ਰਿਯਾਸੁ ਯੁਜ੍ਜਨ੍ਤਿ, ਹਿਤ੍ਵਾ ਵਿਰਤਿਯੋ ਤਥਾ;
ਪਞ੍ਚਤਿਂਸ ਚਤੁਤ੍ਤਿਂਸਦ੍ਵਯਂ ਤੇਤ੍ਤਿਂਸਕਂ ਕਮਾ.
੩੧੯. ਠਪੇਤ੍ਵਾ ਅਪ੍ਪਮਞ੍ਞਾ ਚ, ਮਹਾਪਾਕੇਸੁ ਯੋਜਿਤਾ;
ਤੇਤ੍ਤਿਂਸਾ ਚੇਵ ਦ੍ਵਤ੍ਤਿਂਸਦ੍ਵਯੇਕਤ੍ਤਿਂਸਕਂ ਕਮਾ.
੩੨੦. ਅਪ੍ਪਮਞ੍ਞਾ ਗਹੇਤ੍ਵਾਨ, ਹਿਤ੍ਵਾ ਵਿਰਤਿਯੋ ਤਥਾ;
ਪਞ੍ਚਤਿਂਸੇਵ ਪਠਮੇ, ਰੂਪਾਵਚਰਮਾਨਸੇ.
੩੨੧. ਵਿਤਕ੍ਕਂ ਦੁਤਿਯੇ ਹਿਤ੍ਵਾ, ਵਿਚਾਰਞ੍ਚ ਤਤੋ ਪਰਂ;
ਚਤੁਤ੍ਥੇ ਪਨ ਪੀਤਿਞ੍ਚ, ਅਪ੍ਪਮਞ੍ਞਞ੍ਚ ਪਞ੍ਚਮੇ.
੩੨੨. ਯਥਾਵੁਤ੍ਤਪਕਾਰਾਵ, ਚਤੁਤ੍ਤਿਂਸ ਯਥਾਕ੍ਕਮਂ;
ਤੇਤ੍ਤਿਂਸ ਚੇਵ ਦ੍ਵਤ੍ਤਿਂਸ, ਸਮਤਿਂਸਞ੍ਚ ਲਬ੍ਭਰੇ.
੩੨੩. ਪਞ੍ਚਮੇਨ ਸਮਾਨਾ ਚ, ਠਪੇਤ੍ਵਾਰੁਪ੍ਪਮਾਨਸਾ;
ਭੂਮਾਰਮ੍ਮਣਭੇਦਞ੍ਚ, ਅਙ੍ਗਾਨਞ੍ਚ ਪਣੀਤਤਂ.
੩੨੪. ਅਪ੍ਪਮਞ੍ਞਾ ਠਪੇਤ੍ਵਾਨ, ਗਹੇਤ੍ਵਾ ਵਿਰਤਿਤ੍ਤਯਂ;
ਛਤ੍ਤਿਂਸਾਨੁਤ੍ਤਰੇ ਹੋਨ੍ਤਿ, ਪਠਮਜ੍ਝਾਨਮਾਨਸੇ.
੩੨੫. ਵਿਤਕ੍ਕਂ ਦੁਤਿਯੇ ਹਿਤ੍ਵਾ, ਵਿਚਾਰਞ੍ਚ ਤਤੋ ਪਰਂ;
ਪੀਤਿਂ ਹਿਤ੍ਵਾ ਚਤੁਤ੍ਥੇ ਚ, ਪਞ੍ਚਮੇਪਿ ਚ ਸਬ੍ਬਥਾ.
੩੨੬. ਯਥਾਵੁਤ੍ਤਪ੍ਪਕਾਰਾਵ, ਪਞ੍ਚਤਿਂਸ ਯਥਾਕ੍ਕਮਂ;
ਚਤੁਤ੍ਤਿਂਸਞ੍ਚ ਤੇਤ੍ਤਿਂਸ, ਤਥਾ ਤੇਤ੍ਤਿਂਸ ਚਾਪਰੇ.
੩੨੭. ਏਵਂ ਬਾਵੀਸਧਾ ਭੇਦੋ, ਅਨਵਜ੍ਜੇਸੁ ਸਙ੍ਗਹੋ;
ਏਕੂਨਸਟ੍ਠਿਚਿਤ੍ਤੇਸੁ, ਅਟ੍ਠਤਿਂਸਾਨਮੀਰਿਤੋ.
੩੨੮. ਵਿਰਤੀ ਅਪ੍ਪਮਞ੍ਞਾ ਚ, ਗਹੇਤ੍ਵਾ ਪਨ ਸਬ੍ਬਸੋ;
ਏਕਮੇਕਂ ਗਹੇਤ੍ਵਾ ਚ, ਪਚ੍ਚਕ੍ਖਾਯ ਚ ਸਬ੍ਬਥਾ.
੩੨੯. ਕਾਮੇਸੁ ਸਤ੍ਤਧਾ ਪੁਞ੍ਞੇ, ਚਤੁਧਾ ਚ ਕ੍ਰਿਯੇ ਤਥਾ;
ਰੂਪਜ੍ਝਾਨਚਤੁਕ੍ਕੇ ਚ, ਕਤ੍ਤਬ੍ਬੋਯਮ੍ਪਿ ਸਙ੍ਗਹੋ.
੩੩੦. ਇਮਿਨਾ ਪਨੁਪਾਯੇਨ, ਸਮਸਤ੍ਤਤਿ ਭੇਦਤੋ;
ਅਨਵਜ੍ਜੇਸੁ ਵਿਞ੍ਞੇਯ੍ਯੋ, ਚਿਤ੍ਤੁਪ੍ਪਾਦੇਸੁ ਸਙ੍ਗਹੋ.
੩੩੧. ਇਤਿ ਸਬ੍ਬਪ੍ਪਕਾਰੇਨ, ਅਨਵਜ੍ਜਵਿਨਿਚ੍ਛਯਂ;
ਞਤ੍ਵਾ ਯੋਜੇਯ੍ਯ ਮੇਧਾਵੀ, ਸਾਵਜ੍ਜੇਸੁ ਚ ਸਙ੍ਗਹਂ.
੩੩੨. ਸਤ੍ਤ ਸਾਧਾਰਣਾ ਚੇਵ, ਛ ਧਮ੍ਮਾ ਚ ਪਕਿਣ੍ਣਕਾ;
ਚਤ੍ਤਾਰੋ ਪਾਪਸਾਮਞ੍ਞਾ, ਧਮ੍ਮਾ ਸਤ੍ਤਰਸੇਵਿਮੇ.
੩੩੩. ਏਕੂਨਵੀਸਾਸਙ੍ਖਾਰੇ, ਪਠਮੇ ਲੋਭਦਿਟ੍ਠਿਯਾ;
ਦੁਤਿਯੇ ਲੋਭਮਾਨੇਨ, ਯਥਾਵੁਤ੍ਤਾ ਚ ਤਤ੍ਤਕਾ.
੩੩੪. ਅਟ੍ਠਾਰਸ ਵਿਨਾ ਪੀਤਿਂ, ਤਤਿਯੇ ਲੋਭਦਿਟ੍ਠਿਯਾ;
ਚਤੁਤ੍ਥੇਪਿ ਵਿਨਾ ਪੀਤਿਂ, ਲੋਭਮਾਨੇਨ ਤਤ੍ਤਕਾ.
੩੩੫. ਪਟਿਘੇ ਚ ਵਿਨਾ ਪੀਤਿਂ, ਅਸਙ੍ਖਾਰੇ ਤਥੇਵ ਤੇ;
ਲਬ੍ਭਨ੍ਤਿ ਦੋਸਕੁਕ੍ਕੁਚ੍ਚ-ਮਚ੍ਛਰਿਯਾਹਿ ਵੀਸਤਿ.
੩੩੬. ਅਸਙ੍ਖਾਰੇਸੁ ਵੁਤ੍ਤਾ ਚ, ਸਸਙ੍ਖਾਰੇਸੁ ਪਞ੍ਚਧਾ;
ਥਿਨਮਿਦ੍ਧੇਨੇਕਵੀਸ, ਵੀਸ ਦ੍ਵੇਵੀਸਤਿਕ੍ਕਮਾ.
੩੩੭. ਛਨ੍ਦਂ ਪੀਤਿਞ੍ਚ ਉਦ੍ਧਚ੍ਚੇ, ਹਿਤ੍ਵਾ ਪਞ੍ਚਦਸੇਵ ਤੇ;
ਹਿਤ੍ਵਾ ਵਿਮੋਕ੍ਖਂ ਕਙ੍ਖਞ੍ਚ, ਗਹੇਤ੍ਵਾ ਕਙ੍ਖਿਤੇ ਤਥਾ.
੩੩੮. ਸਤ੍ਤਵੀਸਤਿਧਮ੍ਮਾਨਂ, ਇਤਿ ਦ੍ਵਾਦਸ ਸਙ੍ਗਹਾ;
ਦ੍ਵਾਦਸਾਪੁਞ੍ਞਚਿਤ੍ਤੇਸੁ, ਵਿਞ੍ਞਾਤਬ੍ਬਾ ਵਿਭਾਵਿਨਾ.
੩੩੯. ਹਿਤ੍ਵਾ ਛਾਨਿਯਤੇ ਧਮ੍ਮੇ, ਗਹੇਤ੍ਵਾ ਚ ਯਥਾਰਹਂ;
ਚਤੁਤ੍ਤਿਂਸਾਪਿ ਵਿਞ੍ਞੇਯ੍ਯਾ, ਸਙ੍ਗਹਾ ਤਤ੍ਥ ਵਿਞ੍ਞੁਨਾ.
੩੪੦. ਦ੍ਵਾਦਸਾਕੁਸਲੇਸ੍ਵੇਵ, ਞਤ੍ਵਾ ਸਙ੍ਗਹਮੁਤ੍ਤਰਂ;
ਞੇਯ੍ਯਾਹੇਤੁਕਚਿਤ੍ਤੇਸੁ, ਸਙ੍ਗਹਂ ਕਮਤੋ ਕਥਂ?
੩੪੧. ਸਤ੍ਤ ਸਾਧਾਰਣਾ ਛਨ੍ਦਵਜ੍ਜਿਤਾ ਚ ਪਕਿਣ੍ਣਕਾ;
ਹਸਿਤੁਪ੍ਪਾਦਚਿਤ੍ਤਮ੍ਹਿ, ਦ੍ਵਾਦਸੇਵ ਪਕਾਸਿਤਾ.
੩੪੨. ਵੋਟ੍ਠਬ੍ਬੇ ਚ ਵਿਨਾ ਪੀਤਿਂ, ਵੀਰਿਯਂ ਸੁਖਤੀਰਣੇ;
ਏਕਾਦਸ ਯਥਾਵੁਤ੍ਤਾ, ਧਮ੍ਮਾ ਦ੍ਵੀਸੁਪਿ ਦੇਸਿਤਾ.
੩੪੩. ਮਨੋਧਾਤੁਤ੍ਤਿਕੇ ਚੇਵ, ਉਪੇਕ੍ਖਾਤੀਰਣਦ੍ਵਯੇ;
ਦਸ ਹੋਨ੍ਤਿ ਯਥਾਵੁਤ੍ਤਾ, ਹਿਤ੍ਵਾ ਵੀਰਿਯਪੀਤਿਯੋ.
੩੪੪. ਸਤ੍ਤ ਸਾਧਾਰਣਾ ਏਵ, ਪਞ੍ਚਵਿਞ੍ਞਾਣਸਮ੍ਭਵਾ;
ਇਚ੍ਚਾਹੇਤੁਕਚਿਤ੍ਤੇਸੁ, ਪਞ੍ਚਧਾ ਸਙ੍ਗਹੋ ਠਿਤੋ.
੩੪੫. ਇਤਿ ਚੇਤਸਿਕੇ ਧਮ੍ਮੇ, ਚਿਤ੍ਤੇਸੁ ਗਣਿਤੇ ਪੁਨ;
ਚਿਤ੍ਤੇਨ ਸਹ ਸਙ੍ਗਯ੍ਹ, ਗਣੇਯ੍ਯਾਪਿ ਚ ਪਣ੍ਡਿਤੋ.
੩੪੬. ਅਟ੍ਠਤਿਂਸਾਤਿ ਯੇ ਵੁਤ੍ਤਾ, ਚਿਤ੍ਤੇਨ ਸਹ ਤੇ ਪੁਨ;
ਏਕੂਨਚਤ੍ਤਾਲੀਸੇਤਿ, ਸਬ੍ਬਤ੍ਥੇਕਾਧਿਕਂ ਨਯੇ.
੩੪੭. ਬਾਵੀਸੇਵਂ ਦਸ ਦ੍ਵੇ ਚ, ਪਞ੍ਚ ਚੇਤਿ ਯਥਾਰਹਂ;
ਸਙ੍ਗਹਾ ਸਮ੍ਪਯੁਤ੍ਤਾਨਂ, ਤਾਲੀਸੇਕੂਨਕਾ ਕਥਾ.
੩੪੮. ਵਿਤਕ੍ਕੋ ਚ ਵਿਚਾਰੋ ਚ, ਪੀਤਿ ਪਞ੍ਞਾ ਤਥਾ ਪਨ;
ਅਪ੍ਪਮਞ੍ਞਾ ਵਿਰਤੀਤਿ, ਨਵ ਧਮ੍ਮਾ ਯਥਾਰਹਂ.
੩੪੯. ਗਹੇਤਬ੍ਬਾਪਨੇਤਬ੍ਬਾ, ਭਵਨ੍ਤਿ ਅਨਵਜ੍ਜਕੇ;
ਪਰਿਵਤ੍ਤੇਤਿ ਸਬ੍ਬਤ੍ਥ, ਵੇਦਨਾ ਤੁ ਯਥਾਰਹਂ.
੩੫੦. ਛਨ੍ਦਾਧਿਮੋਕ੍ਖਵੀਰਿਯਾ, ਸਦ੍ਧਾਦੇਕੂਨਵੀਸਤਿ;
ਫਸ੍ਸਾਦਯੋ ਛਲ਼ੇਵਾਤਿ, ਨ ਚਲਨ੍ਤਟ੍ਠਵੀਸਤਿ.
੩੫੧. ਤੇਰਸੇਵ ਤੁ ਸਾਵਜ੍ਜੇ, ਛਲ਼ੇਵਾਹੇਤੁਮਾਨਸੇ;
ਨ ਚਲਨ੍ਤਿ ਦਸ ਅਞ੍ਞੇ, ਚੁਦ੍ਦਸਾ ਛ ਚ ਸਮ੍ਭਵਾਤਿ.
ਇਤਿ ਚੇਤਸਿਕਵਿਭਾਗੇ ਚੇਤਸਿਕਸਙ੍ਗਹਕਥਾ ਨਿਟ੍ਠਿਤਾ.
ਨਵਮੋ ਪਰਿਚ੍ਛੇਦੋ.