੨. ਚੇਤਸਿਕਵਿਭਾਗੋ
੮. ਚੇਤਸਿਕਸਮ੍ਪਯੋਗਕਥਾ
੨੮੬. ਇਤਿ ਚਿਤ੍ਤਵਿਧਿਂ ਞਤ੍ਵਾ, ਦ੍ਵੇਪਞ੍ਞਾਸ ਵਿਭਾਵਿਨਾ;
ਞੇਯ੍ਯਾ ਚੇਤਸਿ ਸਮ੍ਭੂਤਾ, ਧਮ੍ਮਾ ਚੇਤਸਿਕਾ ਕਥਂ.
੨੮੭. ਫਸ੍ਸੋ ਚ ਵੇਦਨਾ ਸਞ੍ਞਾ, ਚੇਤਨੇਕਗ੍ਗਤਾ ਤਥਾ;
ਜੀਵਿਤਂ ਮਨਸਿਕਾਰੋ, ਸਤ੍ਤ ਸਾਧਾਰਣਾ ਇਮੇ.
੨੮੮. ਵਿਤਕ੍ਕੋ ਚ ਵਿਚਾਰੋ ਚ, ਪੀਤਿ ਚ ਵੀਰਿਯਂ ਤਥਾ;
ਛਨ੍ਦੋ ਚ ਅਧਿਮੋਕ੍ਖੋ ਚ, ਛ ਪਕਿਣ੍ਣਕਨਾਮਕਾ.
੨੮੯. ਪੁਞ੍ਞਾਪੁਞ੍ਞੇਸੁ ਪਾਕੇਸੁ, ਕ੍ਰਿਯਾਸੁ ਚ ਯਥਾਰਹਂ;
ਮਾਨਸੇਸੁ ਪਵਤ੍ਤਨ੍ਤਿ, ਵਿਪ੍ਪਕਿਣ੍ਣਾ ਪਕਿਣ੍ਣਕਾ.
੨੯੦. ਸਦ੍ਧਾ ਸਤਿਨ੍ਦ੍ਰਿਯਞ੍ਚੇਵ, ਹਿਰੋਤ੍ਤਪ੍ਪਬਲਦ੍ਵਯਂ;
ਅਲੋਭੋ ਚ ਅਦੋਸੋ ਚ, ਪਞ੍ਞਾ ਮਜ੍ਝਤ੍ਤਤਾਪਿ ਚ.
੨੯੧. ਅਟ੍ਠੇਤੇ ਉਤ੍ਤਮਾ ਨਾਮ, ਧਮ੍ਮਾ ਉਤ੍ਤਮਸਾਧਨਾ;
ਨਿਵਜ੍ਜਾਤਿ ਪਵੁਚ੍ਚਨ੍ਤਿ, ਯੁਗਲ਼ਾ ਛ ਤਤੋਪਰੇ.
੨੯੨. ਪਸ੍ਸਦ੍ਧਿ ਕਾਯਚਿਤ੍ਤਾਨਂ, ਲਹੁਤਾ ਮੁਦੁਤਾ ਤਥਾ;
ਕਮ੍ਮਞ੍ਞਤਾ ਚ ਪਾਗੁਞ੍ਞ-ਤਾ ਚ ਉਜੁਕਤਾਤਿ ਚ.
੨੯੩. ਅਪ੍ਪਮਞ੍ਞਾਦ੍ਵਯਂ ਨਾਮ, ਕਰੁਣਾਮੁਦਿਤਾ ਸਿਯੁਂ;
ਸਮ੍ਮਾਵਾਚਾ ਚ ਕਮ੍ਮਨ੍ਤਾ-ਜੀਵਾ ਚ ਵਿਰਤਿਤ੍ਤਯਂ.
੨੯੪. ਪਞ੍ਚਵੀਸ ਪਨਿਚ੍ਚੇਤੇ, ਅਨਵਜ੍ਜਾ ਯਥਾਰਹਂ;
ਪਾਪਾਹੇਤੁਕਮੁਤ੍ਤੇਸੁ, ਅਨਵਜ੍ਜੇਸੁ ਜਾਯਰੇ.
੨੯੫. ਲੋਭੋ ਦੋਸੋ ਚ ਮੋਹੋ ਚ,
ਮਾਨੋ ਦਿਟ੍ਠਿ ਚ ਸਂਸਯੋ;
ਥਿਨਮਿਦ੍ਧਞ੍ਚ ਉਦ੍ਧਚ੍ਚਂ,
ਕੁਕ੍ਕੁਚ੍ਚਞ੍ਚ ਤਥਾ ਦਸ.
੨੯੬. ਅਹਿਰੀਕਮਨੋਤ੍ਤਪ੍ਪਂ, ਇਸ੍ਸਾ ਮਚ੍ਛਰਿਯਨ੍ਤਿ ਚ;
ਹੋਨ੍ਤਿ ਚੁਦ੍ਦਸ ਸਾਵਜ੍ਜਾ, ਸਾਵਜ੍ਜੇਸ੍ਵੇਵ ਸਮ੍ਭਵਾ.
੨੯੭. ਦ੍ਵੇਪਞ੍ਞਾਸ ਚਤੁਦ੍ਧੇਵਂ, ਧਮ੍ਮਾ ਚੇਤਸਿਕਾ ਠਿਤਾ;
ਤੇਸਂ ਦਾਨਿ ਪਵਕ੍ਖਾਮਿ, ਸਮ੍ਪਯੋਗਞ੍ਚ ਸਙ੍ਗਹਂ.
੨੯੮. ਸਤ੍ਤ ਸਾਧਾਰਣਾ ਸਬ੍ਬ-ਚਿਤ੍ਤਸਾਧਾਰਣਾ ਤਤੋ;
ਚਿਤ੍ਤੇਨ ਸਦ੍ਧਿ ਅਟ੍ਠਨ੍ਨਂ, ਵਿਪ੍ਪਯੋਗੋ ਨ ਕਤ੍ਥਚਿ.
੨੯੯. ਵਿਤਕ੍ਕੋ ਪਞ੍ਚਵਿਞ੍ਞਾਣਂ, ਦੁਤਿਯਾਦਿਵਿਵਜ੍ਜਿਤੇ;
ਵਿਚਾਰੋਪਿ ਚ ਤਤ੍ਥੇਵ, ਤਤਿਯਾਦਿਵਿਵਜ੍ਜਿਤੇ.
੩੦੦. ਸੋਮਨਸ੍ਸਯੁਤੇ ਪੀਤਿ-ਚਤੁਤ੍ਥਜ੍ਝਾਨਵਜ੍ਜਿਤੇ;
ਵੀਰਿਯਂ ਪਠਮਾਵਜ੍ਜ-ਵਿਪਾਕਾਹੇਤੁਵਜ੍ਜਿਤੇ.
੩੦੧. ਛਨ੍ਦੋ ਸਮ੍ਭੋਤਿ ਸਬ੍ਬਤ੍ਥ, ਮੋਮੂਹਾਹੇਤੁਵਜ੍ਜਿਤੇ;
ਅਧਿਮੋਕ੍ਖੋ ਵਿਚਿਕਿਚ੍ਛਾ-ਪਞ੍ਚਵਿਞ੍ਞਾਣਵਜ੍ਜਿਤੇ.
੩੦੨. ਛਸਟ੍ਠਿ ਪਞ੍ਚਪਞ੍ਞਾਸ, ਸਤ੍ਤਤਿ ਚੇਵ ਸੋਲ਼ਸ;
ਵੀਸਤੇਕਾਦਸੇਵਾਥ, ਪਕਿਣ੍ਣਕਵਿਵਜ੍ਜਿਤਾ.
੩੦੩. ਮਾਨਸਾ ਪਞ੍ਚਪਞ੍ਞਾਸ, ਸਵਿਤਕ੍ਕਾ ਛਸਟ੍ਠਿ ਚ;
ਸਵਿਚਾਰੇਕਪਞ੍ਞਾਸ, ਸਪ੍ਪੀਤਿਕਮਨਾ ਤਥਾ.
੩੦੪. ਤੇਸਤ੍ਤਤਿ ਸਵੀਰਿਯਾ, ਸਛਨ੍ਦੇਕੂਨਸਤ੍ਤਤਿ;
ਸਾਧਿਮੋਕ੍ਖਾ ਪਵੁਚ੍ਚਨ੍ਤਿ, ਅਟ੍ਠਸਤ੍ਤਤਿ ਮਾਨਸਾ.
੩੦੫. ਪਞ੍ਞਾਪ੍ਪਮਞ੍ਞਾਵਿਰਤੀ, ਹਿਤ੍ਵਾ ਏਕੂਨਸਟ੍ਠਿਸੁ;
ਪਾਪਾਹੇਤੁਕਮੁਤ੍ਤੇਸੁ, ਸਦ੍ਧਾਦੇਕੂਨਵੀਸਤਿ.
੩੦੬. ਦ੍ਵਿਹੇਤੁਕਾਹੇਤੁਪਾਪਵਜ੍ਜਿਤੇਸੁ ਸਮਾਸਤੋ;
ਪਞ੍ਞਾ ਤੁ ਜਾਯਤੇ ਸਤ੍ਤਚਤ੍ਤਾਲੀਸੇਸੁ ਸਬ੍ਬਥਾ.
੩੦੭. ਮਹਾਕ੍ਰਿਯਾਕਾਮਪੁਞ੍ਞ-ਰੂਪਜ੍ਝਾਨੇਸੁ ਜਾਯਰੇ;
ਅਪ੍ਪਮਞ੍ਞਾਟ੍ਠਵੀਸੇਸੁ, ਹਿਤ੍ਵਾ ਝਾਨਂ ਤੁ ਪਞ੍ਚਮਂ.
੩੦੮. ਲੋਕੁਤ੍ਤਰੇਸੁ ਸਬ੍ਬਤ੍ਥ, ਸਹੇਵ ਵਿਰਤਿਤ੍ਤਯਂ;
ਕਾਮਪੁਞ੍ਞੇਸੁ ਸਮ੍ਭੋਤਿ, ਯਥਾਸਮ੍ਭਵਤੋ ਵਿਸੁਂ.
੩੦੯. ਵਿਰਤੀਅਪ੍ਪਮਞ੍ਞਾਸੁ, ਪਞ੍ਚਸ੍ਵਪਿ ਯਥਾਰਹਂ;
ਕਦਾਚਿਦੇਵ ਸਮ੍ਭੋਤਿ, ਏਕੇਕੋਵ ਨ ਚੇਕਤੋ.
੩੧੦. ਅਹਿਰੀਕਮਨੋਤ੍ਤਪ੍ਪਂ, ਮੋਹਉਦ੍ਧਚ੍ਚਮੇਵ ਚ;
ਪਾਪਸਾਧਾਰਣਾ ਨਾਮ, ਚਤ੍ਤਾਰੋ ਪਾਪਸਮ੍ਭਵਾ.
੩੧੧. ਲੋਭੋ ਚ ਲੋਭਮੂਲੇਸੁ, ਦਿਟ੍ਠਿਯੁਤ੍ਤੇਸੁ ਦਿਟ੍ਠਿ ਚ;
ਮਾਨੋ ਦਿਟ੍ਠਿਵਿਯੁਤ੍ਤੇਸੁ, ਦਿਟ੍ਠਿਮਾਨਾ ਨ ਚੇਕਤੋ.
੩੧੨. ਦੋਸਮੂਲੇਸੁ ਦੋਸੋ ਚ, ਇਸ੍ਸਾ ਮਚ੍ਛਰਿਯਂ ਤਥਾ;
ਕੁਕ੍ਕੁਚ੍ਚਮਿਤਿ ਚਤ੍ਤਾਰੋ, ਵਿਚਿਕਿਚ੍ਛਾ ਤੁ ਕਙ੍ਖਿਤੇ.
੩੧੩. ਸਹੇਵ ਥਿਨਮਿਦ੍ਧਂ ਤੁ, ਸਸਙ੍ਖਾਰੇਸੁ ਪਞ੍ਚਸੁ;
ਇਤਿ ਚੁਦ੍ਦਸ ਸਾਵਜ੍ਜਾ, ਸਾਵਜ੍ਜੇਸ੍ਵੇਵ ਨਿਚ੍ਛਿਤਾ.
੩੧੪. ਮਾਨੋ ਚ ਥਿਨਮਿਦ੍ਧਞ੍ਚ, ਸਹ ਵਾਥ ਵਿਸੁਂ ਨ ਵਾ;
ਇਸ੍ਸਾਮਚ੍ਛੇਰਕੁਕ੍ਕੁਚ੍ਚਾ, ਅਞ੍ਞਮਞ੍ਞਂ ਵਿਸੁਂ ਨ ਵਾਤਿ.
ਇਤਿ ਚੇਤਸਿਕਵਿਭਾਗੇ ਚੇਤਸਿਕਸਮ੍ਪਯੋਗਕਥਾ ਨਿਟ੍ਠਿਤਾ.
ਅਟ੍ਠਮੋ ਪਰਿਚ੍ਛੇਦੋ.