੬. ਭੂਮਿਪੁਗ੍ਗਲਚਿਤ੍ਤਪ੍ਪਵਤ੍ਤਿਕਥਾ
੨੩੨. ਕਾਮਸੁਗਤਿਯਂ ਹੋਨ੍ਤਿ, ਮਹਾਪਾਕਾ ਯਥਾਰਹਂ;
ਮਹਗ੍ਗਤਵਿਪਾਕਾ ਚ, ਯਥਾਸਨ੍ਧਿਵਵਤ੍ਥਿਤਾ.
੨੩੩. ਵੋਟ੍ਠਬ੍ਬਕਾਮਪੁਞ੍ਞਾਨਿ, ਵਿਯੁਤ੍ਤਾਨਿ ਚ ਦਿਟ੍ਠਿਯਾ;
ਉਦ੍ਧਚ੍ਚਸਹਿਤਞ੍ਚੇਤਿ, ਹੋਨ੍ਤਿ ਸਬ੍ਬਤ੍ਥ ਚੁਦ੍ਦਸ.
੨੩੪. ਸਨ੍ਤੀਰਣਮਨੋਧਾਤੁ-ਚਕ੍ਖੁਸੋਤਮਨਾ ਪਨ;
ਦਸ ਚਿਤ੍ਤਾਨਿ ਜਾਯਨ੍ਤਿ, ਸਬ੍ਬਤ੍ਥਾਰੂਪਵਜ੍ਜਿਤੇ.
੨੩੫. ਦਿਟ੍ਠਿਗਤਸਮ੍ਪਯੁਤ੍ਤਾ, ਵਿਚਿਕਿਚ੍ਛਾਯੁਤਾ ਤਥਾ;
ਪਞ੍ਚ ਸਬ੍ਬਤ੍ਥ ਜਾਯਨ੍ਤਿ, ਸੁਦ੍ਧਾਵਾਸਵਿਵਜ੍ਜਿਤੇ.
੨੩੬. ਦੋਸਮੂਲਦ੍ਵਯਞ੍ਚੇਵ, ਘਾਨਾਦਿਤ੍ਤਯਮਾਨਸਾ;
ਅਟ੍ਠ ਸਬ੍ਬਤ੍ਥ ਜਾਯਨ੍ਤਿ, ਮਹਗ੍ਗਤਵਿਵਜ੍ਜਿਤੇ.
੨੩੭. ਚਤੁਤ੍ਥਾਰੁਪ੍ਪਜਵਨਂ, ਅਨਾਗਾਮਿਫਲਾਦਯੋ;
ਮਹਾਕ੍ਰਿਯਾ ਚ ਜਾਯਨ੍ਤਿ, ਤੇਰਸਾਪਾਯਵਜ੍ਜਿਤੇ.
੨੩੮. ਹੇਟ੍ਠਾਰੁਪ੍ਪਜਵਾ ਦ੍ਵੇ ਦ੍ਵੇ, ਛਾਪਾਯੁਪਰਿਵਜ੍ਜਿਤੇ;
ਸਿਤਰੂਪਜਵਾ ਹੋਨ੍ਤਿ, ਅਰੂਪਾਪਾਯਵਜ੍ਜਿਤੇ.
੨੩੯. ਸੋਤਾਪਤ੍ਤਿਫਲਾਦੀਨਿ, ਸੁਦ੍ਧਾਪਾਯਵਿਵਜ੍ਜਿਤੇ;
ਪਠਮਾਨੁਤ੍ਤਰਂ ਸੁਦ੍ਧਾ-ਪਾਯਾਰੂਪਵਿਵਜ੍ਜਿਤੇ.
੨੪੦. ਅਵਤ੍ਥਾਭੂਮਿਭੂਤਤ੍ਤਾ, ਨ ਗਯ੍ਹਨ੍ਤਿ ਅਨੁਤ੍ਤਰਾ;
ਏਕਵੋਕਾਰਭੂਮਿ ਚ, ਰੂਪਮਤ੍ਤਾ ਨ ਗਯ੍ਹਤਿ.
੨੪੧. ਸਭੁਮ੍ਮਾ ਸਬ੍ਬਭੁਮ੍ਮਾ ਚ, ਏਕਦ੍ਵਿਤ੍ਤਯਵਜ੍ਜਿਤਾ;
ਤਥਾਰੂਪਸੁਦ੍ਧਾਵਾਸ-ਬ੍ਰਹ੍ਮਾਪਾਯਵਸਾਤਿ ਚ.
੨੪੨. ਮਾਨਸਾ ਪਞ੍ਚ ਕੋਟ੍ਠਾਸਾ, ਸਤ੍ਤਰਸ ਚਤੁਦ੍ਦਸ;
ਛਤ੍ਤਿਂਸਤੇਕਵੀਸਾ ਚ, ਏਕਞ੍ਚੇਵ ਯਥਾਕ੍ਕਮਂ.
੨੪੩. ਅਟ੍ਠਾਰਸਾਪਿ ਹੋਨ੍ਤੇਤੇ, ਨਵਧਾਪਿ ਪੁਨੇਕਧਾ;
ਚਤੁਧਾ ਤਿਵਿਧਾ ਚੇਵ, ਏਕਧਾਤਿ ਚ ਭੇਦਤੋ.
੨੪੪. ਤੇਰਸਾਪਿ ਚ ਕੋਟ੍ਠਾਸਾ, ਭਵਨ੍ਤੇਕਤਿਭੂਮਕਾ;
ਛਸਤ੍ਤੇਕਾਦਸਸਤ੍ਤ-ਰਸਭੂਮਕਮਾਨਸਾ.
੨੪੫. ਏਕਦ੍ਵਯਤਿਚਤੁਕ੍ਕਪਞ੍ਚਕਾਧਿਕਵੀਸਜਾ;
ਛਬ੍ਬੀਸਤਿਂਸਜਾ ਚੇਤਿ, ਯਥਾਨੁਕ੍ਕਮਤੋ ਭਵੇ.
੨੪੬. ਚਤ੍ਤਾਰਿ ਪੁਨ ਚਤ੍ਤਾਰਿ, ਏਕਮਟ੍ਠਟ੍ਠ ਚੇਕਕਂ;
ਚਤ੍ਤਾਰੇਕਾਦਸ ਦ੍ਵੇ ਦ੍ਵੇ, ਸਤ੍ਤ ਤੇਵੀਸ ਚੁਦ੍ਦਸ.
੨੪੭. ਕ੍ਰਿਯਾਜਵਮਹਾਪਾਕਾ, ਲੋਕੁਤ੍ਤਰਮਹਗ੍ਗਤਾ;
ਦ੍ਵੇਪਞ੍ਞਾਸ ਨ ਲਬ੍ਭਨ੍ਤਿ, ਚਤੁਰਾਪਾਯਭੂਮਿਯਂ.
੨੪੮. ਕਾਮਾਵਚਰਦੇਵੇਸੁ, ਛਸੁ ਭੁਮ੍ਮੇ ਚ ਮਾਨਵੇ;
ਕਾਮਸੁਗਤਿਯਂ ਨਤ੍ਥਿ, ਨਵ ਪਾਕਾ ਮਹਗ੍ਗਤਾ.
੨੪੯. ਦੋਸਮੂਲਮਹਾਪਾਕਾ, ਘਾਨਾਦਿਤ੍ਤਯਮਾਨਸਾ;
ਨਤ੍ਥਾਰੂਪਵਿਪਾਕਾ ਚ, ਵੀਸਤੀ ਰੂਪਭੂਮਿਯਂ.
੨੫੦. ਕਙ੍ਖਾਦਿਟ੍ਠਿਯੁਤਾ ਪਞ੍ਚਾਰੂਪਪਾਕਾ ਚਤੁਬ੍ਬਿਧਾ;
ਪਞ੍ਚਾਦੋਨੁਤ੍ਤਰਾ ਚੇਵ, ਸੁਦ੍ਧਾਵਾਸੇ ਨ ਲਬ੍ਭਰੇ.
੨੫੧. ਆਦਾਵਜ੍ਜਨਮਗ੍ਗਾ ਚ, ਪਟਿਘਾਰੂਪਮਾਨਸਾ;
ਕਾਮਪਾਕਾ ਸਿਤਾਰੂਪੇ, ਤੇਚਤ੍ਤਾਲੀਸ ਨਤ੍ਥਿ ਤੇ.
੨੫੨. ਸਤ੍ਤਤਿਂਸ ਪਰਿਤ੍ਤਾ ਚ, ਲਬ੍ਭਨ੍ਤਾਪਾਯਭੂਮਿਯਂ;
ਮਾਨਸਾਸੀਤਿ ਲਬ੍ਭਨ੍ਤਿ, ਕਾਮਸੁਗਤਿਯਂ ਪਨ.
੨੫੩. ਏਕੂਨਸਤ੍ਤਤਿ ਰੂਪੇ, ਸੁਦ੍ਧੇ ਪਞ੍ਞਾਸ ਪਞ੍ਚ ਚ;
ਛਚਤ੍ਤਾਲੀਸ ਆਰੁਪ੍ਪੇ, ਨਤ੍ਥਾਸਞ੍ਞੀਸੁ ਕਿਞ੍ਚਿਪਿ.
੨੫੪. ਇਤ੍ਥਮੇਕਦ੍ਵਿਤਿਚਤੁਪਞ੍ਚਭੁਮ੍ਮਾਨਿ ਸੋਲ਼ਸ;
ਦਸ ਪਞ੍ਚਦਸੇਵਾਥ, ਚਤੁਤ੍ਤਿਂਸ ਚਤੁਦ੍ਦਸ.
੨੫੫. ਅਪਾਯਾਹੇਤੁਕਾਨਂ ਤੁ, ਮਹਾਪਾਕਕ੍ਰਿਯਾਜਵੇ;
ਹਿਤ੍ਵਾ ਸੇਸਪਰਿਤ੍ਤਾਨਿ, ਚਿਤ੍ਤਾਨਿ ਪਨ ਲਬ੍ਭਰੇ.
੨੫੬. ਦ੍ਵਿਹੇਤੁਕਾਹੇਤੁਕਾਨਂ, ਸੇਸਾਨਂ ਕਾਮਮਾਨਸਾ;
ਲਬ੍ਭਨ੍ਤਿ ਪਨ ਹਿਤ੍ਵਾਨ, ਞਾਣਪਾਕਕ੍ਰਿਯਾਜਵੇ.
੨੫੭. ਤਿਹੇਤੁਕਾਨਂ ਸਤ੍ਤਾਨਂ, ਤਤ੍ਥ ਤਤ੍ਥੂਪਪਤ੍ਤਿਯਂ;
ਤਤ੍ਥ ਤਤ੍ਥੂਪਪਨ੍ਨਾਨਂ, ਲਬ੍ਭਮਾਨਾਨਿ ਲਬ੍ਭਰੇ.
੨੫੮. ਤਿਹੇਤੁਕਾਨਂ ਸਬ੍ਬੇਪਿ, ਮਾਨਸਾਪਾਯਪਾਣਿਨਂ;
ਸਤ੍ਤਤਿਂਸਾਵਸੇਸਾਨਂ, ਏਕਤਾਲੀਸ ਨਿਦ੍ਦਿਸੇ.
੨੫੯. ਪੁਥੁਜ੍ਜਨਾਨ ਸੇਕ੍ਖਾਨਂ, ਨ ਸਨ੍ਤਿ ਜਵਨਕ੍ਰਿਯਾ;
ਨ ਸਨ੍ਤਿ ਵੀਤਰਾਗਾਨਂ, ਪੁਞ੍ਞਾਪੁਞ੍ਞਾਨਿ ਸਬ੍ਬਥਾ.
੨੬੦. ਕਙ੍ਖਾਦਿਟ੍ਠਿਯੁਤਾ ਪਞ੍ਚ, ਸੇਕ੍ਖਾਨਂ ਨਤ੍ਥਿ ਮਾਨਸਾ;
ਦੋਸਮੂਲਦ੍ਵਯਞ੍ਚਾਪਿ, ਨਤ੍ਥਾਨਾਗਾਮਿਨੋ ਪਨ.
੨੬੧. ਵਵਤ੍ਥਿਤਾਰਿਯੇਸ੍ਵੇਵ, ਯਥਾਸਕਮਨੁਤ੍ਤਰਾ;
ਮਗ੍ਗਟ੍ਠਾਨਂ ਸਕੋ ਮਗ੍ਗੋ, ਨਤ੍ਥਞ੍ਞਂ ਕਿਞ੍ਚਿ ਸਬ੍ਬਥਾ.
੨੬੨. ਪੁਥੁਜ੍ਜਨਾਨਂ ਦ੍ਵਿਨ੍ਨਮ੍ਪਿ, ਫਲਟ੍ਠਾਨਂ ਯਥਾਕ੍ਕਮਂ;
ਤਤਿਯਸ੍ਸ ਫਲਟ੍ਠਸ੍ਸ, ਚਤੁਤ੍ਥਸ੍ਸ ਚ ਸਮ੍ਭਵਾ.
੨੬੩. ਤੇਸਟ੍ਠਿ ਚੇਵ ਚਿਤ੍ਤਾਨਿ, ਲਬ੍ਭਨ੍ਤੇਕੂਨਸਟ੍ਠਿ ਚ;
ਸਤ੍ਤਪਞ੍ਞਾਸ ਚਿਤ੍ਤਾਨਿ, ਤੇਪਞ੍ਞਾਸ ਚ ਸਬ੍ਬਥਾ.
੨੬੪. ਚਤੁਪਞ੍ਞਾਸ ਪਞ੍ਞਾਸ, ਪਞ੍ਞਾਸਦ੍ਵਯਹੀਨਕਾ;
ਕਾਮੇਸੁ ਤੇਸਂ ਸਮ੍ਭੋਨ੍ਤਿ, ਚਤੁਤਾਲੀਸ ਚਕ੍ਕਮਾ.
੨੬੫. ਤੇਚਤ੍ਤਾਲੀਸ ਚੇਕੂਨਚਤ੍ਤਾਲੀਸ ਯਥਾਕ੍ਕਮਂ;
ਭਵਨ੍ਤੇਕੂਨਤਾਲੀਸ, ਪਞ੍ਚਤ੍ਤਿਂਸ ਚ ਰੂਪਿਸੁ.
੨੬੬. ਸਤ੍ਤਵੀਸ ਚ ਤੇਵੀਸ, ਤੇਵੀਸ ਚ ਯਥਾਕ੍ਕਮਂ;
ਆਰੁਪ੍ਪੇਸੁਪਿ ਲਬ੍ਭਨ੍ਤਿ, ਤੇਸਮਟ੍ਠਾਰਸੇਵ ਚ.
੨੬੭. ਪੁਥੁਜ੍ਜਨਾ ਚ ਚਤ੍ਤਾਰੋ, ਅਪਾਯਾਹੇਤੁਕਾਦਯੋ;
ਅਰਿਯਾ ਚੇਵ ਅਟ੍ਠਾਤਿ, ਦ੍ਵਾਦਸਨ੍ਨਂ ਵਸਾ ਸਿਯੁਂ.
੨੬੮. ਛਬ੍ਬਿਧਾ ਚਿਤ੍ਤਕੋਟ੍ਠਾਸਾ, ਏਕਪੁਗ੍ਗਲਿਕਾ ਤਥਾ;
ਚਤੁਪਞ੍ਚਛਸਤ੍ਤਟ੍ਠ-ਪੁਗ੍ਗਲਟ੍ਠਾਤਿ ਚਕ੍ਕਮਾ.
੨੬੯. ਛਬ੍ਬੀਸ ਚੁਦ੍ਦਸੇਵਾਥ, ਤੇਰਸ ਦ੍ਵੇ ਚ ਮਾਨਸਾ;
ਦਸ ਸਤ੍ਤਾਧਿਕਾ ਚੇਵ, ਪੁਨ ਸਤ੍ਤਾਧਿਕਾ ਦਸਾਤਿ.
ਇਤਿ ਚਿਤ੍ਤਵਿਭਾਗੇ ਭੂਮਿਪੁਗ੍ਗਲਚਿਤ੍ਤਪ੍ਪਵਤ੍ਤਿਕਥਾ ਨਿਟ੍ਠਿਤਾ.
ਛਟ੍ਠੋ ਪਰਿਚ੍ਛੇਦੋ.