੧੨. ਦ੍ਵਾਦਸਮੋ ਪਰਿਚ੍ਛੇਦੋ

ਦਸਾਵਤ੍ਥਾਵਿਭਾਗੋ

੧੬੪੨. ਇਚ੍ਚਟ੍ਠਾਰਸਧਾ ਭਿਨ੍ਨਾ, ਪਟਿਪਕ੍ਖਪ੍ਪਹਾਨਤੋ;

ਲਕ੍ਖਣਾਕਾਰਭੇਦੇਨ, ਤਿਵਿਧਾਪਿ ਚ ਭਾਵਨਾ.

੧੬੪੩. ਕਲਾਪਤੋ ਸਮ੍ਮਸਨਂ, ਉਦਯਬ੍ਬਯਦਸ੍ਸਨਂ;

ਭਙ੍ਗੇ ਞਾਣਂ ਭਯੇ ਞਾਣਂ, ਞਾਣਮਾਦੀਨਵੇਪਿ ਚ.

੧੬੪੪. ਤਥੇਵ ਨਿਬ੍ਬਿਦਾਞਾਣਂ, ਞਾਣਂ ਮੁਚ੍ਚਿਤੁਕਮ੍ਯਤਾ;

ਪਟਿਸਙ੍ਖਾ ਚ ਸਙ੍ਖਾਰੁ-ਪੇਕ੍ਖਾਞਾਣਾਨੁਲੋਮਕਂ.

੧੬੪੫. ਇਚ੍ਚਾਵਤ੍ਥਾਪਭੇਦੇਨ, ਦਸਧਾਪਿ ਵਿਭਾਵਿਤਾ;

ਸਭਾਗਤ੍ਥਵਿਸੇਸੇਨ, ਤਿਧਾ ਸਙ੍ਗਹਿਤਾ ਪੁਨ.

੧੬੪੬. ਯਥਾਭੂਤਂ ਨਾਮ ਞਾਣਤ੍ਤਯਂ ਸਮ੍ਮਸਨਾਦਿਕਂ;

ਭਯਾਦਿਞਾਣਂ ਤਿਵਿਧਂ, ਨਿਬ੍ਬਿਦਾਤਿ ਪਵੁਚ੍ਚਤਿ.

੧੬੪੭. ਤਥਾ ਮੁਚ੍ਚਿਤੁਕਾਮਾਦਿ, ਵਿਰਾਗੋਵ ਚਤੁਬ੍ਬਿਧਂ;

ਲਕ੍ਖਣਤ੍ਤਯਨਿਜ੍ਝਾਨਵਸੇਨ ਪੁਨ ਵੁਟ੍ਠਿਤਾ.

੧੬੪੮. ਸੁਞ੍ਞਤਞ੍ਚਾਨਿਮਿਤ੍ਤਞ੍ਚ, ਤਥਾਪ੍ਪਣਿਹਿਤਨ੍ਤਿ ਚ;

ਸਾਧੇਤਿ ਮਗ੍ਗਸਙ੍ਖਾਤਂ, ਵਿਮੋਕ੍ਖਤ੍ਤਯਮੁਤ੍ਤਮਂ.

੧੬੪੯. ਇਤਿ ਭਾਵੇਤੁਕਾਮਸ੍ਸ, ਵਿਭਾਵੇਤਿ ਯਥਾਕ੍ਕਮਂ;

ਦਸਾਵਤ੍ਥਾਵਿਭਾਗੇਨ, ਸਮਾਦਾਯ ਯਥਾ ਕਥਂ.

੧੬੫੦. ਵਿਸੁਦ੍ਧੋ ਪਠਮਂ ਤਾਵ, ਸਾਧੁ ਸੀਲਵਿਸੁਦ੍ਧਿਯਾ;

ਉਪਚਾਰਪ੍ਪਨਾਯਞ੍ਚ, ਠਤ੍ਵਾ ਚਿਤ੍ਤਵਿਸੁਦ੍ਧਿਯਂ.

੧੬੫੧. ਸਪ੍ਪਚ੍ਚਯਂ ਪਰਿਗ੍ਗਯ੍ਹ, ਨਾਮਰੂਪਂ ਸਭਾਵਤੋ;

ਦਿਟ੍ਠਿਕਙ੍ਖਾਵਿਤਰਣਂ, ਪਤ੍ਵਾ ਸੁਦ੍ਧਿਂ ਤਤੋ ਪਰਂ.

੧੬੫੨. ਅਤੀਤਾਨਾਗਤੇ ਖਨ੍ਧੇ, ਪਚ੍ਚੁਪ੍ਪਨ੍ਨੇ ਚ ਸਾਸਵੇ;

ਕਲਾਪਤੋ ਸਮ੍ਮਸਿਤ੍ਵਾ, ਸਮ੍ਮਸੇਯ੍ਯ ਤਿਲਕ੍ਖਣਂ.

੧੬੫੩. ਆਦਾਨਨਿਕ੍ਖੇਪਨਤੋ,

ਵਯੋਵੁਦ੍ਧਤ੍ਥਗਾਮਿਤੋ;

ਆਹਾਰਤੋਪਿ ਉਤੁਤੋ,

ਕਮ੍ਮਤੋ ਚਾਪਿ ਚਿਤ੍ਤਤੋ.

੧੬੫੪. ਧਮ੍ਮਤਾਰੂਪਤੋ ਚਾਪਿ, ਰੂਪਸਤ੍ਤਕਤੋ ਨਯੇ;

ਕਲਾਪਤੋ ਯਮਕਤੋ, ਖਣਿਕਾ ਪਟਿਪਾਟਿਤੋ.

੧੬੫੫. ਦਿਟ੍ਠਿਮੁਗ੍ਘਾਟਯਨ੍ਤੋ ਚ, ਮਾਨਮੁਗ੍ਘਾਟਯਂ ਤਥਾ;

ਨਿਕਨ੍ਤਿਪਰਿਯਾਦਾਨੋ, ਨਾਮਸਤ੍ਤਕਤੋ ਨਯੇ.

੧੬੫੬. ਨਿਚ੍ਚਾ ਚੇ ਨ ਨਿਰੁਜ੍ਝੇਯ੍ਯੁਂ, ਨ ਬਾਧੇਯ੍ਯੁਂ ਸੁਖਾ ਯਦਿ;

ਵਸੇ ਵਤ੍ਤੇਯ੍ਯੁਮਤ੍ਤਾ ਚੇ, ਤਦਭਾਵਾ ਨ ਤਾਦਿਸਾ.

੧੬੫੭. ਸਮ੍ਭਵਨ੍ਤਿ ਹਿ ਸਙ੍ਖਾਰਾ, ਸਤਿ ਪਚ੍ਚਯਸਮ੍ਭਵੇ;

ਤਤੋ ਪਚ੍ਚਯਨਿਪ੍ਫਨ੍ਨਾ, ਅਵਸ੍ਸਂ ਭੇਦਗਾਮਿਨੋ.

੧੬੫੮. ਤਦਨਿਚ੍ਚਾ ਖਯਟ੍ਠੇਨ, ਦੁਕ੍ਖਾ ਨਾਮ ਭਯਟ੍ਠਤੋ;

ਅਨਤ੍ਤਾਸਾਰਕਟ੍ਠੇਨ, ਸਙ੍ਖਾਰਾਤਿ ਵਿਭਾਵਯਂ.

੧੬੫੯. ਕਾਲੇਨ ਸਮ੍ਮਸੇ ਰੂਪਂ, ਨਾਮਂ ਕਾਲੇਨ ਸਮ੍ਮਸੇ;

ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ, ਸਮਾਸਬ੍ਯਾਸਤੋ ਤਤੋ.

੧੬੬੦. ਯਥੋਪਟ੍ਠਿਤਭੇਦੇਨ, ਸਮ੍ਮਸਨ੍ਤੋ ਸਮੂਹਤੋ;

ਕਲਾਪਤੋ ਸਮ੍ਮਸਨਮਿਤਿ ਭਾਵੇਤਿ ਪਣ੍ਡਿਤੋ.

੧੬੬੧. ਤਸ੍ਸੇਵਂ ਸਮ੍ਮਸਨ੍ਤਸ੍ਸ, ਕਮ੍ਮਞ੍ਞਂ ਹੋਤਿ ਮਾਨਸਂ;

ਸੂਪਟ੍ਠਨ੍ਤਿ ਚ ਸਙ੍ਖਾਰਾ, ਵੋਦਾਯਤਿ ਚ ਭਾਵਨਾ.

੧੬੬੨. ਤਤੋ ਪਰਂ ਵਿਪਸ੍ਸਨ੍ਤੋ, ਪਰਿਗ੍ਗਣ੍ਹਾਤਿ ਪਣ੍ਡਿਤੋ;

ਪਚ੍ਚੁਪ੍ਪਨ੍ਨਸਭਾਵਾਨਂ, ਖਨ੍ਧਾਨਮੁਦਯਬ੍ਬਯਂ.

੧੬੬੩. ਤਣ੍ਹਾਸਮ੍ਮੋਹਕਮ੍ਮੇਹਿ,

ਖਨ੍ਧਪਞ੍ਚਕਸਭਾਵੋ;

ਰੂਪਮਾਹਾਰਤੋ ਹੋਤਿ,

ਫਸ੍ਸਤੋ ਵੇਦਨਾਦਯੋ.

੧੬੬੪. ਵਿਞ੍ਞਾਣਂ ਨਾਮਰੂਪਮ੍ਹਾ, ਸਮ੍ਭੋਤੀਤਿ ਚ ਪਸ੍ਸਤੋ;

ਤਸ੍ਸ ਪਚ੍ਚਯਤੋ ਹੋਤਿ, ਖਨ੍ਧੇਸੁਦਯਦਸ੍ਸਨਂ.

੧੬੬੫. ਤਣ੍ਹਾਦੀਨਂ ਨਿਰੋਧਾ ਚ,

ਨਿਰੋਧੋ ਹੋਤਿ ਪਸ੍ਸਤੋ;

ਤਥਾ ਵੀਸਤਿਧਾ ਹੋਤਿ,

ਤਤ੍ਥੇਵ ਵਯਦਸ੍ਸਨਂ.

੧੬੬੬. ਨਿਬ੍ਬਤ੍ਤਿਵਿਪਰਿਣਾਮਲਕ੍ਖਣਂ ਪਨ ਪਸ੍ਸਤੋ;

ਖਣਤੋ ਦਸਧਾ ਨੇਸਮੁਦਯਬ੍ਬਯਦਸ੍ਸਨਂ.

੧੬੬੭. ਇਤ੍ਥਂ ਪਞ੍ਞਾਸਧਾ ਭੇਦੋ,

ਖਨ੍ਧਾਨਮੁਦਯਬ੍ਬਯੋ;

ਆਯਤਨਾਦਿਭੇਦੋਪਿ,

ਯੋਜੇਤਬ੍ਬੋ ਯਥਾਰਹਂ.

੧੬੬੮. ਤਦੇਵਮਨੁਪਸ੍ਸਨ੍ਤੋ, ਖਨ੍ਧਾਯਤਨਧਾਤੁਯੋ;

ਅਨਿਚ੍ਚਾ ਦੁਕ੍ਖਾਨਤ੍ਤਾਤਿ, ਭਾਵੇਤਿ ਬਹੁਧਾ ਬੁਧੋ.

੧੬੬੯. ਭਾਵਨਾਪਸੁਤਸ੍ਸੇਵਂ, ਪਸ੍ਸਤੋ ਬੋਧਿਪਕ੍ਖਿਯਾ;

ਪਾਤੁਭੂਤਾ ਪਵਤ੍ਤਨ੍ਤਿ, ਵਿਸੇਸੇਨ ਵਿਸਾਰਦਾ.

੧੬੭੦. ਸਲਕ੍ਖਣਪਰਿਚ੍ਛਿਨ੍ਨੇ, ਤਿਲਕ੍ਖਣਵਵਤ੍ਥਿਤੇ;

ਛਨ੍ਦੋ ਸਾਸਵਸਙ੍ਖਾਰੇ, ਸਾਰਦਂ ਪਰਿਯੇਸਤਿ.

੧੬੭੧. ਤਤ੍ਥ ਪੁਬ੍ਬਙ੍ਗਮਂ ਹੁਤ੍ਵਾ, ਸਂਪਕ੍ਖਨ੍ਦਤਿ ਮਾਨਸਂ;

ਸਙ੍ਕਪ੍ਪੋਭਿਨਿਰੋਪੇਤਿ, ਆਹਰਨ੍ਤੋ ਪੁਨਪ੍ਪੁਨਂ.

੧੬੭੨. ਯਥਾਵਤ੍ਥੁਸਭਾਵੇਨ, ਤਤੋ ਸਦ੍ਧਾਧਿਮੁਚ੍ਚਤਿ;

ਸਤਿ ਸੂਪਟ੍ਠਿਤਾ ਹੋਤਿ, ਪਰਿਗ੍ਗਯ੍ਹ ਸਭਾਵਤੋ.

੧੬੭੩. ਪਞ੍ਞਾ ਸਮ੍ਪਟਿਵਿਜ੍ਝਨ੍ਤੀ, ਸਮਾਹਚ੍ਚ ਵਿਪਸ੍ਸਤਿ;

ਪਗ੍ਗਹੇਤ੍ਵਾਨ ਵਾਯਾਮੋ, ਪਟਿਪਾਦੇਤਿ ਭਾਵਨਂ.

੧੬੭੪. ਤਤੋ ਪੀਤਿਮਨੋ ਹੋਤਿ, ਨਿਪ੍ਫਾਦਿਤਮਨੋਰਥੋ;

ਪਾਮੋਜ੍ਜਬਹੁਲੋ ਹੁਤ੍ਵਾ, ਪਸ੍ਸਦ੍ਧਦਰਥੋ ਪਨ.

੧੬੭੫. ਵਿਕ੍ਖੇਪੁਦ੍ਧਚ੍ਚਨਿਤ੍ਤਿਣ੍ਣੋ, ਸਮਾਧਿਯਤਿ ਨਿਚ੍ਚਲੋ;

ਉਪੇਕ੍ਖਾ ਭਾਵਨਾਵੀਥਿਂ, ਅਧਿਟ੍ਠਾਤਿ ਤਤੋ ਪਰਂ.

੧੬੭੬. ਆਰੁਲ਼੍ਹਯੋਗ੍ਗਾਚਰਿਯੋ, ਆਜਾਨੀਯਰਥੋ ਵਿਯ;

ਵਾਤਾਭਾਵੇ ਪਦੀਪੋਵ, ਪਸਨ੍ਨੇਕਮੁਖਟ੍ਠਿਤਾ.

੧੬੭੭. ਸੁਖੁਮਾ ਨਿਪੁਣਾਕਾਰਾ, ਖੁਰਧਾਰਾਗਤਾ ਵਿਯ;

ਗਣ੍ਹਨ੍ਤੀ ਭਾਵਨਾਗਬ੍ਭਂ, ਪਵਡ੍ਢਤਿ ਵਿਪਸ੍ਸਨਾ.

੧੬੭੮. ਸਮ੍ਪਤ੍ਤਪਟਿਵੇਧਸ੍ਸ,

ਤਸ੍ਸੇਵਂ ਤਂ ਵਿਪਸ੍ਸਤੋ;

ਜਾਯਤੇਕੋ ਉਪਕ੍ਲੇਸੋ,

ਦਸੋਪਕ੍ਲੇਸਵਤ੍ਥੁਕਾ.

੧੬੭੯. ਓਭਾਸੋ ਪੀਤਿ ਪਸ੍ਸਦ੍ਧਿ, ਅਧਿਮੋਕ੍ਖੋ ਚ ਪਗ੍ਗਹੋ;

ਸੁਖਂ ਞਾਣਮੁਪਟ੍ਠਾਨਮੁਪੇਕ੍ਖਾ ਚ ਨਿਕਨ੍ਤਿ ਚ.

੧੬੮੦. ਜਾਤੇਸ੍ਵੇਤੇਸੁ ਯਂ ਕਿਞ੍ਚਿ, ਉਲ਼ਾਰਂ ਜਾਤਵਿਮ੍ਹਯੋ;

ਦਿਸ੍ਵਾ ਵਿਪਸ੍ਸਨਾਮਗ੍ਗਾ, ਵੋਕ੍ਕਮਿਤ੍ਵਾ ਤਤੋ ਪਰਂ.

੧੬੮੧. ਤਮਹਂਕਾਰਵਿਕ੍ਖਿਤ੍ਤੋ, ਅਸ੍ਸਾਦੇਨ੍ਤੋ ਮਮਾਯਤਿ;

ਹੋਤਾਧਿਮਾਨਿਕੋ ਵਾਥ, ਮਞ੍ਞਨ੍ਤੋ ਤਮਨੁਤ੍ਤਰਂ.

੧੬੮੨. ਸਿਯਾ ਚੇਵਮੁਪਕ੍ਲਿਟ੍ਠਾ, ਪਤਿਤਾ ਵਾਥ ਭਾਵਨਾ;

ਤਤ੍ਥੇਵਂ ਪਟਿਸਙ੍ਖਾਯ, ਪਟਿਵਿਜ੍ਝਤਿ ਪਣ੍ਡਿਤੋ.

੧੬੮੩. ਨ ਤਣ੍ਹਾਦਿਟ੍ਠਿਮਾਨੇਹਿ, ਪਰਿਯੋਗਾਹਹੇਤੁਤੋ;

ਲਕ੍ਖਣਾਲਮ੍ਬਣਤ੍ਤਾ ਚ, ਲੋਕਿਯਾਯਂ ਵਿਪਸ੍ਸਨਾ.

੧੬੮੪. ਦਿਟ੍ਠਿਮਾਨਨਿਕਨ੍ਤੀ ਚ, ਕੁਮ੍ਮਗ੍ਗਾ ਪਰਿਪਨ੍ਥਕਾ;

ਮਗ੍ਗੋ ਵਿਸੁਦ੍ਧਿਯਾ ਨਾਮ, ਵਿਸੁਦ੍ਧਾ ਚ ਵਿਪਸ੍ਸਨਾ.

੧੬੮੫. ਸਾਰਥੀਵ ਰਥਂ ਭਨ੍ਤਮਿਤਿ ਸਙ੍ਖਾਯ ਸਾਧੁਕਂ;

ਪਵਿਟ੍ਠਮਗ੍ਗਂ ਵਿਕ੍ਖਿਤ੍ਤਂ, ਸਮ੍ਪਾਦੇਤਿ ਯਥਾ ਪੁਰੇ.

੧੬੮੬. ਇਤ੍ਥਂ ਮਗ੍ਗੇ ਅਮਗ੍ਗੇ ਚ, ਯਾਥਾਵਪਟਿਵੇਧਕਂ;

ਮਗ੍ਗਾਮਗ੍ਗਵਿਸੁਦ੍ਧੀਤਿ, ਞਾਣਦਸ੍ਸਨਮੀਰਿਤਂ.

੧੬੮੭. ਚੇਤੋਪਵਤ੍ਤਨਾਕਾਰਮਿਤਿ ਸਲ੍ਲਕ੍ਖਯਂ ਬੁਧੋ;

ਸਾਧੁਕਂ ਪਟਿਵਿਜ੍ਝਨ੍ਤੋ, ਸੁਖੁਮਂ ਨਿਪੁਣਂ ਤਤੋ.

੧੬੮੮. ਪਰਿਪਨ੍ਥੇ ਵਿਮੋਚੇਤ੍ਵਾ, ਬੋਧੇਤ੍ਵਾ ਬੋਧਿਪਕ੍ਖਿਯੇ;

ਭਾਵਨਂ ਪਟਿਪਾਦੇਨ੍ਤੋ, ਪੁਨਦੇਵੋਦਯਬ੍ਬਯਂ.

੧੬੮੯. ਸਮਧਿਟ੍ਠਾਯ ਮੇਧਾਵੀ, ਵਿਪਸ੍ਸਤਿ ਤਿਲਕ੍ਖਣਂ;

ਉਦਯਬ੍ਬਯਞਾਣਨ੍ਤਿ, ਤਮੀਰੇਨ੍ਤਿ ਤਤੋ ਪਰਂ.

੧੬੯੦. ਸਙ੍ਖਾਰਾਨਂ ਵਿਭੂਤਤ੍ਤਾ, ਸਾਕਾਰਾਨਂ ਵਿਸੇਸਤੋ;

ਤਿਲਕ੍ਖਣਾਨਂ ਦਿਟ੍ਠਤ੍ਤਾ, ਸਙ੍ਖਾਰੇਸੁ ਸਭਾਵਤੋ.

੧੬੯੧. ਪਰਿਪਨ੍ਥਾ ਵਿਮੁਤ੍ਤਸ੍ਸ, ਮਗ੍ਗਾਮਗ੍ਗਵਿਸੁਦ੍ਧਿਯਾ;

ਯਥਾਵੀਥਿਪ੍ਪਵਤ੍ਤਸ੍ਸ, ਪਟਿਪਤ੍ਤਿਵਿਸੁਦ੍ਧਿਯਾ.

੧੬੯੨. ਇਨ੍ਦ੍ਰਿਯਾਨਂ ਸੁਤਿਕ੍ਖਤ੍ਤਾ, ਪਰਿਪਕ੍ਕਾ ਵਿਪਸ੍ਸਨਾ;

ਉਦਯਮ੍ਹਾ ਵਿਮੁਚ੍ਚਿਤ੍ਵਾ, ਭਙ੍ਗੇ ਠਾਤਿ ਯਥਾ ਕਥਂ.

੧੬੯੩. ਉਪ੍ਪਾਦੋ ਪਚ੍ਚਯਾਯਤ੍ਤੋ, ਧਮ੍ਮਾਨਮਿਤਿ ਨਿਚ੍ਛਿਤੇ;

ਨਿਰੋਧਾਨੁਗਤਾ ਜਾਤਿ, ਸਿਦ੍ਧਾਵਸ੍ਸਂ ਨਿਯਾਮਤੋ.

੧੬੯੪. ਤਤੋਦਯਾਵ ਪਟ੍ਠਾਯ, ਅਤ੍ਥਾਯ ਸੂਰਿਯੋ ਵਿਯ;

ਵਿਨਾਸਾਯ ਪਵਤ੍ਤਨ੍ਤਾ, ਵਯਨ੍ਤੇਵਾਤਿ ਪੇਕ੍ਖਤਿ.

੧੬੯੫. ਉਦਯਾਭੋਗਮੋਹਾਯ, ਵਯਨ੍ਤਿਚ੍ਚੇਵ ਸਬ੍ਬਥਾ;

ਭੇਦਸ੍ਸਭਾਵਮਾਰਬ੍ਭ, ਧਮ੍ਮੇਸੁ ਸਤਿ ਤਿਟ੍ਠਤਿ.

੧੬੯੬. ਅਤੀਤਾ ਚ ਨਿਰੁਦ੍ਧਾਵ, ਨਿਰੁਜ੍ਝਿਸ੍ਸਨ੍ਤਿਨਾਗਤਾ;

ਨਿਰੁਜ੍ਝਨ੍ਤੇਵ ਵਤ੍ਤਨ੍ਤਾ, ਇਚ੍ਚੇਵਮਨੁਪਸ੍ਸਤੋ.

੧੬੯੭. ਨਿਜ੍ਝਰੋਵ ਗਿਰਗ੍ਗਮ੍ਹਿ, ਵਾਰਿਵੋਣਤਪੋਕ੍ਖਰੇ;

ਪਦੀਪੋ ਵਿਯ ਝਾਯਨ੍ਤੋ, ਆਰਗ੍ਗੇਰਿਵ ਸਾਸਪੋ.

੧੬੯੮. ਆਤਪੇ ਵਿਯ ਉਸ੍ਸਾਵੋ, ਪਰਿਸ੍ਸਾਵੇ ਜਲਂ ਵਿਯ;

ਮਦ੍ਦਿਤਂ ਫੇਣਪਿਣ੍ਡਂਵ, ਲੋਣਪਿਣ੍ਡਮਿਵੋਦਕੇ.

੧੬੯੯. ਉਦਕੇ ਦਣ੍ਡਰਾਜੀਵ, ਵਿਜ੍ਜੁਤਾਵ ਵਲਾਹਕੇ;

ਜਲਂ ਤਤ੍ਤਕਪਾਲੇਵ, ਸਲਿਲੇ ਵਿਯ ਬੁਬ੍ਬੁਲ਼ਂ.

੧੭੦੦. ਵਾਤਬ੍ਭਾਹਤਤੂਲਂਵ, ਤੀਰਂ ਪਤ੍ਤਾਵ ਵੀਚਿਯੋ;

ਫਲਂ ਬਨ੍ਧਨਮੁਤ੍ਤਂਵ, ਤਿਣਾਨੀਵ ਹੁਤਾਵਹੇ.

੧੭੦੧. ਜਾਯਨ੍ਤਾਪਿ ਚ ਜਿਯ੍ਯਨ੍ਤਾ, ਮਿਯ੍ਯਨ੍ਤਾ ਚ ਨਿਰਨ੍ਤਰਂ;

ਨਿਰੋਧਾਯਾਭਿਧਾਵਨ੍ਤਾ, ਭਙ੍ਗਾਭਿਮੁਖਪਾਤਿਨੋ.

੧੭੦੨. ਵਿਗਚ੍ਛਨ੍ਤਾਵ ਦਿਸ੍ਸਨ੍ਤਿ, ਖੀਯਨ੍ਤਨ੍ਤਰਧਾਯਿਨੋ;

ਵਿਦ੍ਧਂਸਯਨ੍ਤਾ ਸਙ੍ਖਾਰਾ, ਪਤਨ੍ਤਾ ਚ ਵਿਨਾਸਿਨੋ.

੧੭੦੩. ਭਙ੍ਗਞਾਣਂ ਤਮਕ੍ਖਾਤਂ, ਯੇਨ ਞਾਣੇਨ ਪਸ੍ਸਤੋ;

ਅਨਿਚ੍ਚਨ੍ਤਾਨੁਧਾਵਨ੍ਤਿ, ਤਿਵਿਧਾਪਿ ਵਿਪਸ੍ਸਨਾ.

੧੭੦੪. ਉਦਯਬ੍ਬਯਭਙ੍ਗੇਸੁ, ਪਾਕਟਾ ਹਿ ਅਨਿਚ੍ਚਤਾ;

ਭਯਾਦੀਨਵਨਿਬ੍ਬੇਦੇ, ਦੁਕ੍ਖਤਾਨਤ੍ਤਤਾ ਤਤੋ.

੧੭੦੫. ਇਤ੍ਥਂ ਭਙ੍ਗਮਧਿਟ੍ਠਾਯ, ਪਸ੍ਸਨ੍ਤਸ੍ਸ ਤਿਲਕ੍ਖਣਂ;

ਸਙ੍ਖਾਰਾ ਸਭਯਾ ਹੁਤ੍ਵਾ, ਸਮੁਪਟ੍ਠਨ੍ਤਿ ਯੋਗਿਨੋ.

੧੭੦੬. ਵਾਲ਼ਮਿਗਾਨੁਬਦ੍ਧਾਵ, ਨਿਮ੍ਮੁਜ੍ਜਨ੍ਤਾ ਵਿਯਣ੍ਣਵੇ;

ਅਮਨੁਸ੍ਸਗਹਿਤਾਵ, ਪਰਿਕ੍ਖਿਤ੍ਤਾਵ ਵੇਰਿਹਿ.

੧੭੦੭. ਕਣ੍ਹਸਪ੍ਪਸਮਾਲੀਲ਼੍ਹਾ, ਚਣ੍ਡਹਤ੍ਥਿਸਮੁਟ੍ਠਿਤਾ;

ਪਪਾਤਾਵਾਟਪਕ੍ਖਨ੍ਤਾ, ਪਤਨ੍ਤਾਵ ਹੁਤਾਵਹੇ.

੧੭੦੮. ਵਜ੍ਝਪ੍ਪਤ੍ਤਾ ਮਹਾਚੋਰਾ, ਛਿਜ੍ਜਨ੍ਤਾ ਵਿਯ ਸੀਸਤੋ;

ਸੂਲਮਾਰੋਪਿਯਨ੍ਤਾਵ, ਪਬ੍ਬਤੇਨੋਤ੍ਥਟਾ ਵਿਯ.

੧੭੦੯. ਜਾਤਿਸਙ੍ਕਟਪਕ੍ਖਨ੍ਤਾ, ਜਰਾਬ੍ਯਾਧਿਨਿਪੀਲ਼ਿਤਾ;

ਮਰਣਾਸਨਿਸਮ੍ਮਦ੍ਦਾ, ਮਹਾਬ੍ਯਸਨਭਾਗਿਨੋ.

੧੭੧੦. ਮਚ੍ਚੁਨਬ੍ਭਾਹਤਾ ਨਿਚ੍ਚਂ, ਦੁਕ੍ਖਭਾਰਸਮੋਤ੍ਥਟਾ;

ਸੋਕੋਪਾਯਾਸਨਿਸ੍ਸਨ੍ਦਾ, ਪਰਿਦੇਵਪਰਾਯਣਾ.