੧੧. ਏਕਾਦਸਮੋ ਪਰਿਚ੍ਛੇਦੋ
ਵਿਪਸ੍ਸਨਾਵਿਭਾਗੋ
੧੫੦੬. ਦ੍ਵਿਧਾ ਸਮੁਟ੍ਠਾਨਧੁਰਾ, ਤਿਵਿਧਾ ਭੂਮਿਯੋ ਮਤਾ;
ਤਿਵਿਧਾਭਿਨਿਵੇਸਾ ਚ, ਸਰੀਰਂ ਤੁ ਚਤੁਬ੍ਬਿਧਂ.
੧੫੦੭. ਤਿਵਿਧਾ ਭਾਵਨਾ ਤਤ੍ਥ, ਸਙ੍ਖਾਰੇਸੁ ਯਥਾਰਹਂ;
ਦੁਵਿਧਾਕਾਰਮਾਰਬ੍ਭ, ਨਿਜ੍ਝਾਯਤਿ ਤਿਲਕ੍ਖਣਂ.
੧੫੦੮. ਅਟ੍ਠਾਰਸਾਕਾਰਭਿਨ੍ਨਾ, ਦਸਾਵਤ੍ਥਾ ਵਿਭਾਵਿਤਾ;
ਤਿਧਾ ਵਿਭਾਗਾ ਸਾਧੇਤਿ, ਵਿਮੋਕ੍ਖਤ੍ਤਯਮੁਤ੍ਤਮਂ.
੧੫੦੯. ਚਤੁਸਚ੍ਚਪਟਿਵੇਧਾ, ਸਤ੍ਤਟ੍ਠਾਰਿਯਪੁਗ੍ਗਲਾ;
ਕ੍ਲੇਸਹਾਨੀ ਯਥਾਯੋਗਂ, ਚਤਸ੍ਸੋ ਪਟਿਸਮ੍ਭਿਦਾ.
੧੫੧੦. ਤਿਵਿਧਾ ਚ ਸਮਾਪਤ੍ਤਿ, ਨਿਰੋਧਾ ਚ ਤਥਾਪਰਾ;
ਨਿਸ੍ਸਨ੍ਦਫਲਮਿਚ੍ਚਾਹੁ, ਤਸ੍ਸਾ ਸਾਸਨਕੋਵਿਦਾ.
੧੫੧੧. ਵਿਪਸ੍ਸਨਾਭਾਵਨਾਯ-ਮਿਤਿ ਭਾਸਨ੍ਤਿ ਪਣ੍ਡਿਤਾ;
ਤਮਿਦਾਨਿ ਪਵਕ੍ਖਾਮਿ, ਯਥਾਨੁਕ੍ਕਮਤੋ ਕਥਂ.
੧੫੧੨. ਭੂਮਿਧਮ੍ਮੇ ਪਰਿਗ੍ਗਯ੍ਹ, ਵਿਚਿਨਨ੍ਤਸ੍ਸ ਯੋਗਿਨੋ;
ਸਤਿਯਾ ਸਮਥਾ ਵਾਥ, ਸਮੁਟ੍ਠਾਤਿ ਵਿਪਸ੍ਸਨਾ.
੧੫੧੩. ਸਭਾਵਪਟਿਵੇਧੇ ਚ, ਸਦ੍ਧਮ੍ਮਪਟਿਪਤ੍ਤਿਯਂ;
ਪਞ੍ਞਾਸਦ੍ਧਾਦ੍ਵਯਂ ਤਸ੍ਸਾ, ਧੁਰਮਾਹੁ ਧੁਰਨ੍ਧਰਾ.
੧੫੧੪. ਤੇਭੂਮਕਸਭਾਵਾਨਂ, ਸਪ੍ਪਚ੍ਚਯਪਰਿਗ੍ਗਹੋ;
ਞਾਤਪਰਿਞ੍ਞਾ ਨਾਮਾਯਂ, ਭੂਮੀਤਿ ਪਠਮਾ ਮਤਾ.
੧੫੧੫. ਕਲਾਪਤੋ ਸਮ੍ਮਸਨਂ, ਉਦਯਬ੍ਬਯਦਸ੍ਸਨਂ;
ਪਰਿਞ੍ਞਾਤੀਰਣਾ ਨਾਮ, ਦੁਤਿਯਾ ਭੂਮਿ ਭਾਸਿਤਾ.
੧੫੧੬. ਪਹਾਨਪਰਿਞ੍ਞਾ ਭੂਮਿ, ਤਤਿਯਾਹੁ ਤਤੋਪਰਂ;
ਭਙ੍ਗਾਦਿਞਾਣਮਿਚ੍ਚੇਵਂ, ਤਿਵਿਧਾ ਭੂਮਿਯੋ ਮਤਾ.
੧੫੧੭. ਖਣਸਨ੍ਤਤਿਅਦ੍ਧਾਨ-ਵਸੇਨੇਤ੍ਥ ਸਮੀਰਿਤਾ;
ਅਨਿਚ੍ਚਾ ਦੁਕ੍ਖਾਨਤ੍ਤਾਤਿ, ਤਿਵਿਧਾਭਿਨਿਵੇਸਨਾ.
੧੫੧੮. ਦਿਟ੍ਠਿਕਙ੍ਖਾਵਿਤਰਣਾ, ਮਗ੍ਗਾਮਗ੍ਗਪਟਿਪ੍ਪਦਾ;
ਵਿਸੁਦ੍ਧਿਯੋ ਚਤਸ੍ਸੋਪਿ, ਸਰੀਰਨ੍ਤਿ ਨਿਦਸ੍ਸਿਤਾ.
੧੫੧੯. ਸਲਕ੍ਖਣਵਵਤ੍ਥਾਨਂ, ਪਚ੍ਚਯਾਕਾਰਨਿਚ੍ਛਯੋ;
ਕੁਮ੍ਮਗ੍ਗਪਰਿਹਾਰੋ ਚ, ਤਿਲਕ੍ਖਣਵਿਪਸ੍ਸਨਾ.
੧੫੨੦. ਇਤਿ ਲਕ੍ਖਣਭਿਨ੍ਨਤ੍ਤਾ, ਲਬ੍ਭਨ੍ਤੇਕਕ੍ਖਣੇਪਿ ਚ;
ਦੇਸਿਤਾ ਹੇਤੁਭੂਤੇਨ, ਕਮੇਨੇਵਂ ਵਿਸੁਦ੍ਧਿਯੋ.
੧੫੨੧. ਸੀਲਬ੍ਬਿਸੁਦ੍ਧਿਆਦੀਨਂ, ਤਥਾ ਸਾਵ ਪਰਮ੍ਪਰਾ;
ਚਿਤ੍ਤਬ੍ਬਿਸੁਦ੍ਧਿਆਦੀਨਮਤ੍ਥਾਯਾਤਿ ਪਕਾਸਿਤਾ.
੧੫੨੨. ਦਿਸ੍ਸਮਾਨਸਭਾਵਾਨਂ, ਪਸ੍ਸਨ੍ਤੋ ਪਚ੍ਚਯਟ੍ਠਿਤਿ;
ਪਰਿਪਨ੍ਥਵਿਮੁਤ੍ਤੋ ਹਿ, ਪਟਿਪਾਦੇਤਿ ਭਾਵਨਂ.
੧੫੨੩. ਤਥਾਪਿ ਚ ਵਿਸੇਸੇਨ, ਪਟਿਪਨ੍ਨਸ੍ਸ ਯੋਗਿਨੋ;
ਤਤ੍ਥ ਤਤ੍ਥ ਵਿਭੂਤਤ੍ਤਾ, ਠਾਨਤੋ ਭੇਦਿਤਾ ਕਥਂ.
੧੫੨੪. ਰੂਪਪੁਬ੍ਬਙ੍ਗਮਂ ਵਾਥ, ਨਾਮਪੁਬ੍ਬਙ੍ਗਮਂ ਤਥਾ;
ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ, ਯਥਾਪਾਕਟਧਮ੍ਮਤੋ.
੧੫੨੫. ਨਾਮਰੂਪਾਦਿਭੇਦੇਨ, ਭੂਮਿਧਮ੍ਮਪਰਿਗ੍ਗਹੋ;
ਵੁਤ੍ਤਾ ਦਿਟ੍ਠਿਵਿਸੁਦ੍ਧੀਤਿ, ਅਤ੍ਤਦਿਟ੍ਠਿਪ੍ਪਹਾਨਤੋ.
੧੫੨੬. ਆਹਚ੍ਚ ਪਚ੍ਚਯੁਪ੍ਪਨ੍ਨਾ, ਤਥਾ ਤਬ੍ਭਾਵਭਾਵਿਨੋ;
ਪਵਤ੍ਤਨ੍ਤੀਤਿ ਸਙ੍ਖਾਰੇ, ਪਸ੍ਸਤੋ ਪਨ ਯੋਨਿਸੋ.
੧੫੨੭. ਪਚ੍ਚਯਗ੍ਗਾਹਿਨੀ ਪਞ੍ਞਾ, ਨਾਮਰੂਪਪ੍ਪਵਤ੍ਤਿਯਾ;
ਕਙ੍ਖਾ ਤਰਨ੍ਤਿ ਤਾਯਾਤਿ, ਕਙ੍ਖਾਵਿਤਰਣਾ ਮਤਾ.
੧੫੨੮. ਅਨਿਚ੍ਚਾ ਦੁਕ੍ਖਾਨਤ੍ਤਾਤਿ, ਪਚ੍ਚਯਾਯਤ੍ਤਵੁਤ੍ਤਿਤੋ;
ਸਙ੍ਖਿਪਿਤ੍ਵਾ ਕਲਾਪੇਨ, ਸਮ੍ਮਸੀਯਨ੍ਤਿ ਸਙ੍ਖਤਾ.
੧੫੨੯. ਉਪ੍ਪਾਦਵਯਭਾਵੋਪਿ, ਲਕ੍ਖਣਤ੍ਤਯਸਾਧਕੋ;
ਪਚ੍ਚਯਾਕਾਰਮਾਰਬ੍ਭ, ਲਕ੍ਖੀਯਤਿ ਵਿਸੇਸਤੋ.
੧੫੩੦. ਤਸ੍ਮਾ ਸਮ੍ਮਸਨਞਾਣਂ, ਉਦਯਬ੍ਬਯਦਸ੍ਸਨਂ;
ਕਙ੍ਖਾਵਿਤਰਣਾਯਂ ਤੁ, ਸਙ੍ਗਯ੍ਹਤਿ ਵਿਸੁਦ੍ਧਿਯਂ.
੧੫੩੧. ਤਤ੍ਥ ਸਂਕ੍ਲੇਸਵਿਕ੍ਖੇਪਂ, ਕੁਮ੍ਮਗ੍ਗਂ ਪਰਿਵਜ੍ਜਤੋ;
ਮਗ੍ਗਾਮਗ੍ਗਵਿਸੁਦ੍ਧੀਤਿ, ਞਾਣਦਸ੍ਸਨਮੀਰਿਤਂ.
੧੫੩੨. ਤਤੋ ਕਥੇਨ੍ਤਿ ਅਕ੍ਲਿਟ੍ਠਮੁਦਯਬ੍ਬਯਦਸ੍ਸਨਂ;
ਆਦਿਂ ਕਤ੍ਵਾ ਪਟਿਪਦਾਞਾਣਦਸ੍ਸਨਸੁਦ੍ਧਿਯਂ.
੧੫੩੩. ਪਚ੍ਚਯਪਚ੍ਚਯੁਪ੍ਪਨ੍ਨੇ, ਯਥਾਵਤ੍ਥੁਵਵਤ੍ਥਿਤੇ;
ਪਹਾਤੁਮੀਹਮਾਨਾਨਂ, ਨਿਯ੍ਯਾਨਪਟਿਪਤ੍ਤਿਤੋ.
੧੫੩੪. ਉਪਕ੍ਲੇਸਵਿਸੁਦ੍ਧੋ ਹਿ, ਪੁਨਦੇਵੋਦਯਬ੍ਬਯਂ;
ਅਧਿਟ੍ਠਹਿਤ੍ਵਾ ਭਙ੍ਗਾਦਿ-ਞਾਣੇਹਿ ਪਟਿਪਜ੍ਜਤਿ.
੧੫੩੫. ਤਥਾ ਚਾਭਿਨਵੁਪ੍ਪਨ੍ਨੇ, ਭਿਜ੍ਜਮਾਨੇ ਵਿਪਸ੍ਸਤੋ;
ਸਂਵੇਗਕਡ੍ਢਿਤਂ ਞਾਣਂ, ਭਙ੍ਗਾਦਿਮਨੁਤਿਟ੍ਠਤਿ.
੧੫੩੬. ਤਤੋ ਪੁਬ੍ਬੇ ਪਵਤ੍ਤਾ ਹਿ, ਸਂਕ੍ਲੇਸਾਪਾਯਸਮ੍ਭਵਾ;
ਪਟਿਪਤ੍ਤਿਵਿਸੁਦ੍ਧੀਤਿ, ਨ ਸਙ੍ਗਯ੍ਹਤਿ ਭਾਵਨਾ.
੧੫੩੭. ਸਮ੍ਪਾਦੇਨ੍ਤੋ ਪਨਿਚ੍ਚੇਤਾ, ਚਤਸ੍ਸੋਪਿ ਵਿਸੁਦ੍ਧਿਯੋ;
ਅਨਿਚ੍ਚਾ ਦੁਕ੍ਖਾਨਤ੍ਤਾਤਿ, ਭਾਵੇਯ੍ਯ ਤਿਵਿਧਾ ਕਥਂ.
੧੫੩੮. ਪਚ੍ਚਯਪਚ੍ਚਯੁਪ੍ਪਨ੍ਨਾ, ਜਾਤਾਨਨ੍ਤਰਭੇਦਿਨੋ;
ਅਨਿਚ੍ਚਾ ਚ ਪਭਙ੍ਗੂ ਚ, ਪਲੁਜ੍ਜਨ੍ਤਿ ਚਵਨ੍ਤਿ ਚ.
੧੫੩੯. ਅਦ੍ਧੁਵਾ ਚ ਅਸਾਰਾ ਚ, ਵਿਭਵਾ ਚ ਵਿਨਾਸਿਨੋ;
ਸਙ੍ਖਤਾ ਵਿਪਰਿਣਾਮ-ਧਮ੍ਮਾ ਇਤ੍ਤਰਕਾਲਿਕਾ.
੧੫੪੦. ਖਯਧਮ੍ਮਾ ਵਯਧਮ੍ਮਾ, ਲਹੁਕਾਲਪ੍ਪਵਤ੍ਤਿਨੋ;
ਤਾਵਕਾਲਿਕਧਮ੍ਮਾ ਚ, ਪਰਿਤ੍ਤਟ੍ਠਿਤਿਕਾ ਤਥਾ.
੧੫੪੧. ਖਣਤ੍ਤਯਪਰਿਚ੍ਛਿਨ੍ਨਾ, ਪੁਬ੍ਬਾਪਰਵਿਚਿਤ੍ਤਕਾ;
ਪੁਰਕ੍ਖਤਾ ਨਿਰੋਧਸ੍ਸ, ਸਸ੍ਸਤਾ ਨ ਕੁਦਾਚਨਂ.
੧੫੪੨. ਜਾਯਨ੍ਤਿ ਪਰਿਹਾਨਾਯ, ਨ ਤੁ ਜਾਯਨ੍ਤਿ ਵੁਦ੍ਧਿਯਾ;
ਜਿਯ੍ਯਮਾਨਾਵ ਤਿਟ੍ਠਨ੍ਤਿ, ਜਿਣ੍ਣਾ ਭਙ੍ਗਪਰਾਯਣਾ.
੧੫੪੩. ਅਹੁਤ੍ਵਾਯੇਵੁਪ੍ਪਜ੍ਜਨ੍ਤਿ, ਨ ਕੁਤੋਚਿਪਿ ਆਗਤਾ;
ਹੁਤ੍ਵਾ ਅਨ੍ਤਰਧਾਯਨ੍ਤਿ, ਨ ਤੁ ਕਤ੍ਥਚਿ ਸਞ੍ਚਿਤਾ.
੧੫੪੪. ਤਂ ਤਂ ਪਚ੍ਚਯਸਾਮਗ੍ਗਿ-ਮਤ੍ਤਲਾਭਾਯ ਨਿਸ੍ਸਿਤਾ;
ਨਿਰੋਧਧਮ੍ਮਾ ਜਾਯਨ੍ਤਿ, ਜਾਤਾ ਬ੍ਯਨ੍ਤਿ ਭਵਨ੍ਤਿ ਤੇ.
੧੫੪੫. ਯਥਾ ਨਦੀ ਪਬ੍ਬਤੇਯ੍ਯਾ, ਯਥਾ ਦੀਪਸਿਖਾ ਤਥਾ;
ਸੀਘਸੀਘਂ ਪਵਤ੍ਤਨ੍ਤਾ, ਉਪ੍ਪਜ੍ਜਨ੍ਤਿ ਵਯਨ੍ਤਿ ਚ.
੧੫੪੬. ਜਾਤਾ ਜਾਤਾ ਨਿਰੁਜ੍ਝਨ੍ਤਿ, ਅਞ੍ਞੇ ਅਞ੍ਞੇ ਤੁ ਜਾਯਰੇ;
ਅਵੀਚਿ ਅਨੁਸਮ੍ਬਨ੍ਧਾ, ਨ ਜਾਨਨ੍ਤਿ ਵਿਸੇਸਤੋ.
੧੫੪੭. ਇਤਿ ਨਾਨਪ੍ਪਕਾਰੇਨ, ਵਿਪਸ੍ਸਨ੍ਤੋ ਵਿਚਕ੍ਖਣੋ;
ਅਨਿਚ੍ਚਭਾਵਨਂ ਧੀਰੋ, ਪਰਿਪਾਚੇਤਿ ਸਾਧੁਕਂ.
੧੫੪੮. ਦੁਕ੍ਖਾ ਚ ਦੁਕ੍ਖਵਤ੍ਥੂ ਚ, ਅਭਿਣ੍ਹਪਰਿਪੀਲ਼ਿਤਾ;
ਰੋਗਾ ਗਣ੍ਡਾ ਚ ਸਲ੍ਲਾ ਚ, ਅਘਤੋ ਚ ਉਪਦ੍ਦਵਾ.
੧੫੪੯. ਭਯੋਪਸਗ੍ਗਾਘਮੂਲਾ,
ਸਾਸਵਾਦੀਨਵੀਤਿਤਾ;
ਅਲੇਣਾਸਰਣਾਤਾਣਾ,
ਵਧਕਾ ਮਾਰਕਾਮਿਸਾ.
੧੫੫੦. ਜਾਤਿਧਮ੍ਮਾ ਜਰਾਬ੍ਯਾਧਿ-
ਸੋਕੋਪਾਯਾਸਭਾਗਿਨੋ;
ਪਰਿਦੇਵਸਭਾਵਾ ਚ,
ਸਂਕ੍ਲੇਸਾ ਦੁਕ੍ਖਭਾਗਿਨੋ.
੧੫੫੧. ਜੇਗੁਚ੍ਛਾ ਪਟਿਕੂਲਾ ਚ, ਬੀਭਚ੍ਛਾ ਚ ਵਿਰੂਪਿਨੋ;
ਅਜਞ੍ਞਾ ਚਪਲਾ ਹੀਨਾ, ਦੁਗ੍ਗਨ੍ਧਾ ਬਾਲਸੇਵਿਤਾ.
੧੫੫੨. ਸੋਕਨ੍ਤਰਿਕਤਾਨਿਚ੍ਚਂ, ਤਣ੍ਹਾਯ ਕਡ੍ਢਿਤਾ ਭੁਸਂ;
ਕਪਣਾ ਦੁਗ੍ਗਤਾ ਦੀਨਾ, ਵਿਪਨ੍ਨਾ ਚ ਵਿਘਾਤਿਨੋ.
੧੫੫੩. ਅਤ੍ਤਲਾਭਂ ਗਵੇਸਨ੍ਤਿ, ਤਂਤਂਪਚ੍ਚਯਨਿਸ੍ਸਿਤਾ;
ਦੁਕ੍ਖਾਧਿਟ੍ਠਾਨਮਚ੍ਚਨ੍ਤਂ, ਜਾਤਾ ਪੁਨ ਵਿਹਞ੍ਞਰੇ.
੧੫੫੪. ਅਗ੍ਗਿਕੂਪੇ ਨਿਮੁਗ੍ਗਾਵ, ਕ੍ਲੇਸਸਨ੍ਤਾਪਭਾਗਿਨੋ;
ਓਵਿਦ੍ਧਾ ਵਿਯ ਸਤ੍ਤੀਹਿ, ਸਙ੍ਖਾਰਾ ਨਿਚ੍ਚਦੁਕ੍ਖਿਤਾ.
੧੫੫੫. ਜਾਯਮਾਨਾ ਚ ਜਿਯ੍ਯਨ੍ਤਾ, ਮਿਯ੍ਯਨ੍ਤਾ ਚ ਖਣੇ ਖਣੇ;
ਪਸੁਕਾ ਵਿਯ ਨਿਚ੍ਚਮ੍ਮਾ, ਹਞ੍ਞਨ੍ਤਿ ਸੇਰਿਕਾਤੁਰਾ.
੧੫੫੬. ਤਿਲਾਨਿ ਤਿਲਯਨ੍ਤੇਵ, ਉਚ੍ਛੁਯਨ੍ਤੇਵ ਉਚ੍ਛੁਯੋ;
ਉਦਯਬ੍ਬਯਾਵਸ੍ਸਂ ਤੇ, ਪੀਲ਼ਯਨ੍ਤਿ ਅਭਿਣ੍ਹਸੋ.
੧੫੫੭. ਮਨੋਰਮਨਵਾਕਾਰਾ, ਵਿਪਲ੍ਲਾਸਪਰਿਕ੍ਖਤਾ;
ਇਰਿਯਾਪਥਸਞ੍ਛਨ੍ਨਾ, ਨੋਪਤਿਟ੍ਠਨ੍ਤਿ ਦੁਕ੍ਖਤੋ.
੧੫੫੮. ਸਙ੍ਖਾਰੇਸੁ ਪਨੇਤੇਸੁ, ਵੇਦਨਾਸ੍ਸਾਦਰੋਧਿਨੋ;
ਸਾਵ ਸਨ੍ਦੁਲਸਮ੍ਬਦ੍ਧਾ, ਸਮ੍ਮੋਹਪਰਿਵਾਰਿਤਾ.
੧੫੫੯. ‘‘ਅਦੁਂ ਦੁਕ੍ਖਮਿਦਂ ਦੁਕ੍ਖ’’-ਮਿਤਿ ਸਂਸਾਰਚਾਰਿਨੋ;
ਦੁਕ੍ਖਹੇਤੁਮਜਾਨਨ੍ਤਾ, ਸਮ੍ਭਮਨ੍ਤਿ ਅਵਿਦ੍ਦਸੁ.
੧੫੬੦. ਸੁਖਾਕਾਰਮਪਸ੍ਸਨ੍ਤਾ, ਦੁਕ੍ਖਭਾਰਨਿਪੀਲ਼ਿਤਾ;
ਪਤ੍ਥੇਨ੍ਤਿ ਦੁਕ੍ਖਮੇਵਞ੍ਞਂ, ਬਾਲਾ ਬ੍ਯਸਨਭਾਗਿਨੋ.
੧੫੬੧. ਚਵਨ੍ਤਾ ਉਪਪਜ੍ਜਨ੍ਤਾ, ਰੁਕ੍ਖਸਾਖਂਵ ਮਕ੍ਕਟੋ;
ਦੁਕ੍ਖਮੇਕਂ ਵਿਮੁਚ੍ਚਨ੍ਤਿ, ਤਤੋ ਗਣ੍ਹਨ੍ਤਿ ਚਾਪਰਂ.
੧੫੬੨. ਤੇ ਦੀਘਰਤ੍ਤਂ ਸੋਚਨ੍ਤਿ, ਤਣ੍ਹਾਸਲ੍ਲਸਮਪ੍ਪਿਤਾ;
ਦਿਟ੍ਠਿਪਾਸਸਮੁਪੇਤਾ, ਮਾਨਤ੍ਥਮ੍ਭਾਨੁਸਾਯਿਨੋ.
੧੫੬੩. ਤਮਾਕਾਰਂ ਪਨਿਚ੍ਚੇਵਂ, ਵਿਪਸ੍ਸਨ੍ਤੋ ਵਿਸਾਰਦੋ;
ਦੁਕ੍ਖਾਨੁਪਸ੍ਸਨਂ ਨਾਮ, ਪਰਿਪਾਚੇਤਿ ਭਾਵਨਂ.
੧੫੬੪. ਧਮ੍ਮਟ੍ਠਿਤਿਨਿਯਾਮਾ ਹਿ, ਖਨ੍ਧਾਯਤਨਧਾਤੁਯੋ;
ਅਨਤ੍ਤਾਸਸ੍ਸਤਨ੍ਤਾ ਚ, ਈਹਾਭੋਗਵਿਵਜ੍ਜਿਤਾ.
੧੫੬੫. ਪਯੋਜਨਮਧਿਟ੍ਠਾਯ, ਨ ਤੁ ਬ੍ਯਾਪਾਰਯਨ੍ਤਿ ਚ;
ਪਚ੍ਚਯਪਚ੍ਚਯੁਪ੍ਪਨ੍ਨਾ, ਜਨੇਤੁਂ ਵਾਥ ਜਾਯਿਤੁਂ.
੧੫੬੬. ਤਥਾਪਿ ਹੇਤੁਸਾਮਗ੍ਗਿ-ਸਮ੍ਭਵੇ ਸਮ੍ਭਵਨ੍ਤਿ ਤੇ;
ਤਬ੍ਭਾਵਭਾਵਿਭਾਵੇਨ, ਅਞ੍ਞਮਞ੍ਞਪਵਤ੍ਤਿਤਾ.
੧੫੬੭. ਅਜਾਯਿਤੁਂ ਨ ਸਕ੍ਕੋਨ੍ਤਿ, ਸਤਿ ਪਚ੍ਚਯਸਮ੍ਭਵੇ;
ਪਚ੍ਚਯਾਨਮਲਾਭੇ ਤੁ, ਨ ਜਾਯਨ੍ਤਿ ਕੁਦਾਚਨਂ.
੧੫੬੮. ਨ ਕਿਞ੍ਚੇਤ੍ਥ ਅਪੇਕ੍ਖਿਤ੍ਵਾ, ਸਮਗ੍ਗਾ ਹੋਨ੍ਤਿ ਪਚ੍ਚਯਾ;
ਨ ਜਨੇਤੁਂ ਨ ਸਕ੍ਕੋਨ੍ਤਿ, ਸਮਗ੍ਗਾ ਚ ਕੁਦਾਚਨਂ.
੧੫੬੯. ਯਥਾਪਚ੍ਚਯਲਾਭੇਨ, ਪਵਤ੍ਤਨ੍ਤਿ ਯਥਾ ਤਥਾ;
ਰਕ੍ਖਿਤਾ ਵਾ ਵਿਧਾਤਾ ਵਾ, ਨਤ੍ਥਿ ਅਸ੍ਸਾਮਿਕਾ ਤਥਾ.
੧੫੭੦. ‘‘ਅਹਂ ਮਮ’’ਨ੍ਤਿ ਗਣ੍ਹਨ੍ਤਾ, ਪਰਿਣਾਮੇਨ੍ਤਿ ਅਞ੍ਞਥਾ;
ਵਿਸ੍ਸਸਨ੍ਤਾ ਹਰਨ੍ਤੇਤੇ, ਪਰਾਭੂਤਾ ਪਲਮ੍ਭਿਨੋ.
੧੫੭੧. ਰਿਤ੍ਤਾ ਤੁਚ੍ਛਾ ਚ ਸੁਞ੍ਞਾ ਚ, ਵਿਵਿਤ੍ਤਾ ਸਾਰਵਜ੍ਜਿਤਾ;
ਸਲਕ੍ਖਣਪਰਿਚ੍ਛਿਨ੍ਨਾ, ਧਮ੍ਮਾ ਨਤ੍ਥੇਤ੍ਥ ਪੁਗ੍ਗਲੋ.
੧੫੭੨. ਜਾਯਮਾਨਾ ਚ ਜਿਯ੍ਯਨ੍ਤਾ, ਮਿਯ੍ਯਮਾਨਾ ਚ ਸਙ੍ਖਤਾ;
ਵਿਵਸਾ ਪਰਿਵਤ੍ਤਨ੍ਤਿ, ਵਸੋ ਤੇਸਂ ਨ ਕਤ੍ਥਚਿ.
੧੫੭੩. ਨ ਤੇਸੁ ਕਸ੍ਸਚਿਸ੍ਸੇਰਂ, ਨ ਤੇਸਞ੍ਚਤ੍ਥਿ ਕਤ੍ਥਚਿ;
ਨ ਚਤ੍ਤਨੀਤਿ ਸਙ੍ਖਾਰਾ, ਆਧਿਪਚ੍ਚਵਿਵਜ੍ਜਿਤਾ.
੧੫੭੪. ਕਦਲੀਪਤ੍ਤਵਟ੍ਟੀਵ, ਅਞ੍ਞਮਞ੍ਞਪਤਿਟ੍ਠਿਤਾ;
ਸਹਜਾਤਗ੍ਘਨੀਭੂਤਾ, ਨੋਪਟ੍ਠਨ੍ਤਿ ਅਨਤ੍ਤਤੋ.
੧੫੭੫. ਅਰੂਪਨਿਸ੍ਸਿਤਂ ਰੂਪਂ, ਅਰੂਪਂ ਰੂਪਨਿਸ੍ਸਿਤਂ;
ਜਚ੍ਚਨ੍ਧਪੀਠਸਪ੍ਪੀਵ, ਅਞ੍ਞਮਞ੍ਞਵਵਤ੍ਥਿਤਂ.
੧੫੭੬. ਯਨ੍ਤਸੁਤ੍ਤੇਨ ਯਨ੍ਤਂਵ, ਕਾਯਯਨ੍ਤਂ ਪਵਤ੍ਤਤਿ;
ਨਾਮਾਵਕਡ੍ਢਿਤਂ ਤਤ੍ਥ, ਨਤ੍ਥਿ ਅਤ੍ਤਾ ਸਯਂਵਸੀ.
੧੫੭੭. ਚੇਤੋਵਿਪ੍ਫਾਰਨਿਪ੍ਫਨ੍ਨਾ, ਵਾਯੋਧਾਤੁਸਮੁਟ੍ਠਿਤਾ;
ਇਰਿਯਾਪਥਵਿਞ੍ਞਤ੍ਤਿਵਿਕਾਰਾ ਪਾਲਕਾ ਮਤਾ.