੧੦. ਦਸਮੋ ਪਰਿਚ੍ਛੇਦੋ
ਸੇਸਕਮ੍ਮਟ੍ਠਾਨਵਿਭਾਗੋ
੧੨੯੮. ਬ੍ਯਾਪਾਦਾਦੀਨਵਂ ਦਿਸ੍ਵਾ, ਖੇਮਭਾਵਞ੍ਚ ਖਨ੍ਤਿਯਂ;
ਅਪ੍ਪਮਞ੍ਞਾ ਤੁ ਭਾਵੇਨ੍ਤੋ, ਵਿਨੇਯ੍ਯ ਪਟਿਘਂ ਕਥਂ.
੧੨੯੯. ਚੇਤੋਸਨ੍ਤਾਪਨੋ ਕੋਧੋ,
ਸਮ੍ਪਸਾਦਵਿਕੋਪਨੋ;
ਵਿਰੂਪਬੀਭਚ੍ਛਕਰੋ,
ਮੁਖਵਣ੍ਣਪ੍ਪਧਂਸਨੋ.
੧੩੦੦. ਸੀਲਕਾਲੁਸ੍ਸਿਯੁਪ੍ਪਾਦੋ, ਚਿਤ੍ਤਵਿਕ੍ਖੇਪਸਮ੍ਭਵੋ;
ਪਞ੍ਞਾਪਜ੍ਜੋਤਵਿਦ੍ਧਂਸੀ, ਪਟਿਪਤ੍ਤਿਵਿਬਨ੍ਧਕੋ.
੧੩੦੧. ਅਪਾਯੇਕਾਯਨੋ ਮਗ੍ਗੋ, ਪਾਪਕਣ੍ਟਕਬਨ੍ਧਕੋ;
ਧਮ੍ਮਮਗ੍ਗਸਮੁਚ੍ਛੇਦੀ, ਮਗ੍ਗਦ੍ਵਾਰਪਿਧਾਨਕੋ.
੧੩੦੨. ਯਸੋਵਣ੍ਣਵਿਸਙ੍ਖਾਰੋ, ਗੁਣਮੂਲਪ੍ਪਭਞ੍ਜਕੋ;
ਦੁਕ੍ਖਧਮ੍ਮਸਮੋਧਾਨੋ, ਬ੍ਯਸਨੋਪਦ੍ਦਵਾਕਰੋ.
੧੩੦੩. ਦੁਨ੍ਨਿਮਿਤ੍ਤਮਿਦਂ ਜਾਤਂ, ਸਬ੍ਬਸਮ੍ਪਤ੍ਤਿਧਂਸਨਂ;
ਧੂਮਕੇਤੁਸਮੁਪ੍ਪਾਦੋ, ਸਬ੍ਬਲੋਕਵਿਨਾਸਕੋ.
੧੩੦੪. ਸਬ੍ਬਕਲ੍ਯਾਣਧਮ੍ਮਾਨਂ, ਅਵਮਙ੍ਗਲਮੁਟ੍ਠਿਤਂ;
ਹਿਤਾਰਮ੍ਭਸਮੁਗ੍ਘਾਤੀ, ਅਨ੍ਤਰਾਯਸਮਾਗਮੋ.
੧੩੦੫. ਸਬ੍ਬਾਕਾਰਪਟਿਕ੍ਕੂਲਂ, ਸਬ੍ਬਵਿਦ੍ਦੇਸਕਾਰਣਂ;
ਵਿਪਤ੍ਤਿਮੁਖਮੁਪ੍ਪਨ੍ਨਂ, ਅਮਿਤ੍ਤਜਨਪਤ੍ਥਿਤਂ.
੧੩੦੬. ਸਪਤ੍ਤਕਰਣਂ ਘੋਰਂ, ਸਬ੍ਬਾਨਤ੍ਥਵਿਧਾਯਕਂ;
ਭਯਮਨ੍ਤਰਤੋ ਜਾਤਂ, ਤਂ ਜਨੋ ਨਾਵਬੁਜ੍ਝਤਿ.
੧੩੦੭. ਖੁਰਧਾਰਂ ਲਿਹਨ੍ਤਾਵ, ਗਿਲਨ੍ਤਾਵ ਹੁਤਾਸਨਂ;
ਤਿਤ੍ਤਲਾਬੁਂਵ ਖਾਦਨ੍ਤਾ, ਗਣ੍ਹਨ੍ਤਾਦਿਤ੍ਤਮਾਯੁਧਂ.
੧੩੦੮. ਬ੍ਯਾਪਾਦਮਤ੍ਤਸਮ੍ਭਵ-ਮਤ੍ਤਘਞ੍ਞਾਯ ਕੇਵਲਂ;
ਉਪਲਾਲ਼ੇਨ੍ਤਿ ਦੁਮ੍ਮੇਧਾ, ਘੋਰਮਾਸੀਵਿਸਂ ਯਥਾ.
੧੩੦੯. ਦੋਸਤੇਜੇਨ ਰੁਕ੍ਖੋਵ, ਸੁਸਿਰਾਰੁਲ਼੍ਹਪਾਵਕੋ;
ਅਨ੍ਤੋਨੁਦਯ੍ਹਮਾਨਾਪਿ, ਵਿਪ੍ਫਨ੍ਦਨ੍ਤਿ ਵਿਘਾਤਿਨੋ.
੧੩੧੦. ਨਾਵਬੁਜ੍ਝਨ੍ਤਿ ਦੁਮ੍ਮੇਧਾ, ਚੇਤੋਸਙ੍ਕਪ੍ਪਵਾਯੁਨਾ;
ਉਕ੍ਕਾਮੁਖਾਮਿਵਾਦਿਤ੍ਤ-ਮੁਜ੍ਜਲਨ੍ਤਾ ਪੁਨਪ੍ਪੁਨਂ.
੧੩੧੧. ਭਯਮਗ੍ਗਸਮਾਰੁਲ਼੍ਹਾ, ਖੇਮਮਗ੍ਗਵਿਰੋਧਿਨੋ;
ਬ੍ਯਾਪਨ੍ਨਾ ਕਿਬ੍ਬਿਸਾਕਿਣ੍ਣਾ, ਅਤ੍ਥਦ੍ਵਯਵਿਰੋਧਿਨੋ.
੧੩੧੨. ਅਨਾਥਾ ਸਲ੍ਲਕਾਵਿਦ੍ਧਾ, ਵਿਸਟ੍ਟਾ ਅਨੁਸੋਚਿਨੋ;
ਅਨ੍ਧਾ ਵਿਯ ਮਿਗਾਰਞ੍ਞੇ, ਭਮਨ੍ਤਿ ਹਤਚਕ੍ਖੁਕਾ.
੧੩੧੩. ਅਸਂਵਿਹਿਤਕਮ੍ਮਨ੍ਤਾ, ਬਾਲਾ ਕੋਧਵਸਾਨੁਗਾ;
ਖਿਪ੍ਪਂ ਲਕ੍ਖਿਂ ਪਰਿਚ੍ਚਤ੍ਤਾ, ਯਸੋਭੋਗੇਹਿ ਧਂਸਰੇ.
੧੩੧੪. ਦੁਪ੍ਪਟਿਪ੍ਪਾਦਿਤਾਰਮ੍ਭਾ, ਕੋਧਸਙ੍ਖੋਭਮੋਹਿਤਾ;
ਧਮ੍ਮਾਮਤਰਸਸ੍ਸਾਦਂ, ਨ ਵਿਨ੍ਦਨ੍ਤਿ ਅਵਿਦ੍ਦਸੁ.
੧੩੧੫. ਬਹ੍ਵਾਦੀਨਵਮਿਚ੍ਚੇਵ-ਮਨ੍ਤੋ ਬ੍ਯਾਧਿਮਿਵੁਟ੍ਠਿਤਂ;
ਜਾਤਾਨਲਮਿਵੁਚ੍ਛਙ੍ਗੇ, ਅਜ੍ਝੁਪੇਕ੍ਖਨ੍ਤਿ ਦੁਜ੍ਜਨਾ.
੧੩੧੬. ਚੋਦਯਮਾਨਾ ਦੁਕ੍ਖੇਹਿ, ਕ੍ਲੇਸਾਚਿਣ੍ਣਮਲੀਮਹਾ;
ਪਾਪਕਮ੍ਮੇਹਿ ਪੂਰੇਨ੍ਤਾ, ਸੇਨ੍ਤਿ ਮਚ੍ਚੁਪਥੇ ਚਿਰਂ.
੧੩੧੭. ਤਮੇਵਂ ਪਟਿਸਙ੍ਖਾਯ, ਪਟਿਘਂ ਪਨ ਯੋਨਿਸੋ;
ਵਾਲ਼ਮਿਗਂਵ ਧਾਵਨ੍ਤਂ, ਆਵਿਸਨ੍ਤਂਵ ਰਕ੍ਖਸਂ.
੧੩੧੮. ਪਾਵਕਂਵ ਪਰਿਬ੍ਯੁਲ਼੍ਹਂ, ਭਾਯਮਾਨਸ੍ਸ ਯੋਗਿਨੋ;
ਸੋਤ੍ਥਿਭਾਵਾਯ ਖੇਮਨ੍ਤ-ਮੁਪਞ੍ਞਤ੍ਤਂ ਮਹੇਸਿਨਾ.
੧੩੧੯. ਮਾਤਾ ਕਲ੍ਯਾਣਧਮ੍ਮਾਨਂ, ਖਮਾ ਨਾਮ ਮਹਿਦ੍ਧਿਕਾ;
ਸਮਪ੍ਪਵਤ੍ਤਿ ਸਤ੍ਤੇਸੁ, ਸਬ੍ਬਸਮ੍ਪਤ੍ਤਿਸਾਧਿਕਾ.
੧੩੨੦. ਕੋਧਾਨਲਜਲਾਸੇਕੋ,
ਸੋਕੋਪਾਯਾਸਨਾਸਨਂ;
ਆਘਾਤਸਲ੍ਲਨਿਦ੍ਧਾਰੀ,
ਉਪਨਾਹਵਿਮੋਚਨਂ.
੧੩੨੧. ਵਣ੍ਣਕਿਤ੍ਤਿਸਮੁਟ੍ਠਾਨਂ, ਗੁਣਮੂਲਾਭਿਸੇਵਨਂ;
ਅਪਾਰੁਤਮੁਖਂਵੇਤ-ਮਤ੍ਥਦ੍ਵਯਸਮਿਦ੍ਧਿਯਾ.
੧੩੨੨. ਵਿਘਾਤਪਰਿਯਾਦਾਨ-ਮਾਸਵਾਨਮਸੇਸਤੋ;
ਪਟਿਪਸ੍ਸਮ੍ਭਨਂ ਚੇਤੋ-ਪੀਤਿਕਰਣਚਨ੍ਦਨਂ.
੧੩੨੩. ਸਬ੍ਬਦੁਕ੍ਖਸਮੁਗ੍ਘਾਤਿ, ਸੁਖੁਪਟ੍ਠਾਨਮੁਤ੍ਤਮਂ;
ਬ੍ਯਸਨੋਦਯਵਿਚ੍ਛੇਦੋ, ਭਯਭੇਰਵਨਿਗ੍ਗਮੋ.
੧੩੨੪. ਚੇਤੋਪਸਾਦਸਨ੍ਧਾਨੋ, ਪਾਸਾਦਿਕਫਲਾਵਹੋ;
ਪਵਰੋ ਬੋਧਿਸਮ੍ਭਾਰੋ, ਨਰਾਨਰਨਿਸੇਵਿਤੋ.
੧੩੨੫. ਪਾਪਕਨ੍ਤਾਰਨਿਤ੍ਥਾਰੋ, ਚਤੁਰਾਪਾਯਰੋਧਕੋ;
ਦ੍ਵਾਰਾਵਾਪੁਰਣਞ੍ਚੇਤਂ, ਦੇਵਲੋਕੂਪਪਤ੍ਤਿਯਾ.
੧੩੨੬. ਪਞ੍ਞਾਸੀਲਸਮਾਧਾਨਂ, ਪਟਿਪਤ੍ਤਿਵਿਸੋਧਨੋ;
ਪਿਯਙ੍ਕਰੋ ਸੋਮ੍ਮਭਾਵੋ, ਦੁਲ੍ਲਭੋ ਬਹੁਪਤ੍ਥਿਤੋ.
੧੩੨੭. ਕ੍ਲੇਸਸਙ੍ਖੋਭਵਿਕ੍ਖੇਪ-ਵਿਪ੍ਫਨ੍ਦਪਟਿਬਨ੍ਧਨਂ;
ਤਿਤਿਕ੍ਖਾਗੁਣਮਕ੍ਖਾਤ-ਮਾਰਕ੍ਖਵਿਧਿਮਤ੍ਤਨੋ.
੧੩੨੮. ਵਿਹਿਂਸਾਰਤਿਸਾਰਮ੍ਭ-ਪਟਿਰੋਧਵਿਮੋਚਨਂ;
ਵੇਰਿਕਿਬ੍ਬਿਸਵਿਦ੍ਧਂਸੀ, ਲੋਕਾਨੁਗ੍ਗਹਕਾਰਣਂ.
੧੩੨੯. ਧਮ੍ਮਪਜ੍ਜੋਤਕਰਣਂ, ਸਂਯੋਗਮਲਸੋਧਨਂ;
ਸਮ੍ਮੋਹਤਿਮਿਰੁਦ੍ਧਾਰਿ, ਸਮ੍ਪਤ੍ਤਿਪਟਿਪਾਦਨਂ.
੧੩੩੦. ਇਚ੍ਚਤ੍ਤਤ੍ਥਂ ਪਰਤ੍ਥਞ੍ਚ, ਸਮ੍ਪਾਦੇਤ੍ਵਾ ਖਮਾਪਰੋ;
ਸਾਧੇਤਿ ਸਬ੍ਬਸਮ੍ਪਤ੍ਤਿ-ਮਿਧ ਚੇਵ ਪਰਤ੍ਥ ਚ.
੧੩੩੧. ਤਿਤਿਕ੍ਖਾਗੁਣਸਮ੍ਪਨ੍ਨੋ, ਪਾਣਭੂਤਾਨੁਕਮ੍ਪਕੋ;
ਅਨਾਕੁਲਿਤਕਮ੍ਮਨ੍ਤੋ, ਸੋਰਤੋ ਸਖਿਲੋ ਸੁਚਿ.
੧੩੩੨. ਨਿਵਾਤੋ ਸਮਿਤਾਚਾਰੋ, ਸੁਭਗੋ ਪਿਯਦਸ੍ਸਨੋ;
ਪਟਿਸਙ੍ਖਾਬਲਪ੍ਪਤ੍ਤੋ, ਧਿਤਿਮਾ ਮਤਿਪਾਟਵੋ.
੧੩੩੩. ਅਕ੍ਖੋਭੋ ਅਧਿਵਾਸੇਨ੍ਤੋ,
ਸਬ੍ਬਾਨਤ੍ਥੇ ਪਰਿਸ੍ਸਯੇ;
ਭੀਮਸਙ੍ਗਾਮਾਵਚਰੋ,
ਹਤ੍ਥਿਨਾਗੋਵ ਸੋਭਤਿ.
੧੩੩੪. ਇਤ੍ਥਂ ਸਮਨ੍ਤਤੋ ਭਦ੍ਦਂ, ਤਿਤਿਕ੍ਖਂ ਪਚ੍ਚਵੇਕ੍ਖਤੋ;
ਪਸ੍ਸਮ੍ਭੇਤਿ ਸਮੁਟ੍ਠਾਯ, ਖਮਾ ਬ੍ਯਾਪਾਦਸਮ੍ਭਮਂ.
੧੩੩੫. ਦਿਬ੍ਬੋਸਧਮਿਵਾਤਙ੍ਕਂ, ਮੇਘਜ੍ਜਵਂ ਹੁਤਾਸਨਂ;
ਖਿਪ੍ਪਮਨ੍ਤਰਧਾਪੇਤਿ, ਤਿਤਿਕ੍ਖਾ ਕੋਧਮਤ੍ਤਨੋ.
੧੩੩੬. ਤਤੋਨੇਕਗੁਣੋਪੇਤਂ, ਨੇਕਦੋਸਪ੍ਪਭਞ੍ਜਨਂ;
ਖਨ੍ਤਿਧਮ੍ਮਮਧਿਟ੍ਠਾਯ, ਪਸਨ੍ਨਧੀਰਮਾਨਸੋ.
੧੩੩੭. ਭਾਵੇਯ੍ਯ ਪਠਮਂ ਤਾਵ, ਮੇਤ੍ਤਾਭਾਵਨਮੁਤ੍ਤਮਂ;
ਅਤ੍ਤਾਨਮੁਪਮਂ ਕਤ੍ਵਾ, ਸਤ੍ਤੇਸੁ ਹਿਤਵੁਡ੍ਢਿਯਾ.
੧੩੩੮. ਸਬ੍ਬੇ ਸਤ੍ਤਾ ਚ ਪਾਣਾ ਚ, ਭੂਤਾ ਜੀਵਾ ਚ ਪੁਗ੍ਗਲਾ;
ਅਬ੍ਯਾਪਜ੍ਜਾ ਤਥਾਵੇਰਾ, ਅਨੀਘਾ ਚ ਸੁਖੇਧਿਨੋ.
੧੩੩੯. ਵਿਜ੍ਜਾਸਮ੍ਪਤ੍ਤਿਭੋਗੇਹਿ, ਪਵਡ੍ਢਨ੍ਤੁ ਯਸਸ੍ਸਿਨੋ;
ਪਰਿਵਾਰਬਲਪ੍ਪਤ੍ਤਾ, ਭਯੋਪਦ੍ਦਵਵਜ੍ਜਿਤਾ.
੧੩੪੦. ਸਖਿਲਾ ਸੁਖਸਮ੍ਭਾਸਾ, ਅਞ੍ਞਮਞ੍ਞਾਵਿਰੋਧਿਨੋ;
ਮੋਦਨ੍ਤੁ ਸੁਹਿਤਾ ਸਬ੍ਬੇ, ਮਾ ਕਿਞ੍ਚਿ ਪਾਪਮਾਗਮਾ.
੧੩੪੧. ਸਦ੍ਧਾਪਾਮੋਜ੍ਜਬਹੁਲਾ, ਦਾਨਸੀਲਮਹੁਸ੍ਸਵਾ;
ਗੁਣਭੂਸਿਤਸਨ੍ਤਾਨਾ, ਆਯੁਂ ਪਾਲੇਨ੍ਤਨਾਮਯਂ.
੧੩੪੨. ਸਮ੍ਮਾਦਿਟ੍ਠਿਂ ਪੁਰੋਧਾਯ, ਸਦ੍ਧਮ੍ਮਪਟਿਪਤ੍ਤਿਯਾ;
ਆਰਾਧੇਨ੍ਤੁ ਹਿਤੋਪਾਯ-ਮਚ੍ਚਨ੍ਤਂ ਸੁਖਸਾਧਨਂ.
੧੩੪੩. ਇਤਿ ਨਾਨਪ੍ਪਕਾਰੇਨ, ਸਤ੍ਤੇਸੁ ਹਿਤਮਾਨਸਂ;
ਮਾਤਾਵ ਪਿਯਪੁਤ੍ਤਮ੍ਹਿ, ਪਵਤ੍ਤੇਯ੍ਯ ਨਿਰਨ੍ਤਰਂ.
੧੩੪੪. ਸਿਨੇਹਂ ਪਰਿਵਜ੍ਜੇਨ੍ਤੋ, ਬ੍ਯਾਪਾਦਞ੍ਚ ਵਿਨਾਸਯਂ;
ਪਰਿਸੁਦ੍ਧੇਨ ਚਿਤ੍ਤੇਨ, ਹਿਤਕਾਮੋਵ ਕੇਵਲਂ.
੧੩੪੫. ਮੇਤ੍ਤਾਯ ਮਿਤ੍ਤੇ ਮਜ੍ਝਤ੍ਤੇ, ਵੇਰਿਕੇ ਚ ਯਥਾਕ੍ਕਮਂ;
ਕਰੋਨ੍ਤੋ ਸੀਮਸਮ੍ਭੇਦਂ, ਅਤ੍ਤਨਿ ਚ ਸਮਂ ਫਰੇ.
੧੩੪੬. ਆਸੇਵਨ੍ਤਸ੍ਸ ਤਸ੍ਸੇਵਂ, ਹਿਤਾਭੋਗਸਮਾਹਿਤਂ;
ਸਤ੍ਤਪਞ੍ਞਤ੍ਤਿਮਾਰਬ੍ਭ, ਸਮਾਧਿਯਤਿ ਮਾਨਸਂ.
੧੩੪੭. ਤਤੋ ਅਨੀਘੋ ਏਕਗ੍ਗੋ, ਉਪਸਨ੍ਤਮਨੋਰਥੋ;
ਝਾਨਤ੍ਤਿਕਂ ਚਤੁਕ੍ਕਂ ਵਾ, ਮੇਤ੍ਤਾਚੇਤੋਵਿਮੁਤ੍ਤਿਯਾ.
੧੩੪੮. ਭੂਮਿਦੇਸਦਿਸਾਸਤ੍ਤ-ਭੇਦਭਿਨ੍ਨੇਸੁ ਓਧਿਸੋ;
ਯਥਾਸਮ੍ਭਵਮਪ੍ਪੇਤਿ, ਸਬ੍ਬਸਤ੍ਤੇਸ੍ਵਨੋਧਿਸੋ.
੧੩੪੯. ਤਦੇਵਮੇਕਸਤ੍ਤਮ੍ਹਿ, ਪਰਿਚ੍ਛੇਦਨਿਯਾਮਤੋ;
ਬਹੁਕੇਸੁ ਚ ਸਤ੍ਤੇਸੁ, ਸਬ੍ਬੇਸੁ ਚ ਪਵਤ੍ਤਤਿ.
੧੩੫੦. ਤਥਾਸੇਵਿਤਸਨ੍ਤਾਨੋ,
ਮੇਤ੍ਤਾਚੇਤੋਵਿਮੁਤ੍ਤਿਯਾ;
ਕਰੁਣਾਭਾਵਨਾਯੋਗ-
ਮਾਰਭੇਯ੍ਯ ਤਤੋ ਪਰਂ.
੧੩੫੧. ਸਤ੍ਤਾਨਂ ਦੁਕ੍ਖਿਤਾਕਾਰ-ਮਾਵਜ੍ਜਿਤ੍ਵਾਨ ਯੋਨਿਸੋ;
‘‘ਅਹੋ ਦੁਕ੍ਖਾ ਵਿਮੁਚ੍ਚਨ੍ਤੁ, ਸਬ੍ਬੇ ਸਤ੍ਤਾ’’ਤਿ ਚਿਨ੍ਤਯਂ.
੧੩੫੨. ਕਥਂ ਮਾਣਵਕੋਯਞ੍ਚ, ਭਯਭੇਰਵਕਮ੍ਪਿਤੋ;
ਬ੍ਯਸਨੋਪਦ੍ਦਵਾਵਿਦ੍ਧੋ, ਵਿਪ੍ਫਨ੍ਦਤਿ ਵਿਘਾਤਵਾ.
੧੩੫੩. ਤਥਾ ਹੇਤੇ ਵਿਮੋਸਾਯ, ਪਟਿਪਨ੍ਨਾ ਵਿਰੋਧਿਨੋ;
ਸਬ੍ਯਾਪਜ੍ਜਾ ਵਿਹਞ੍ਞਨ੍ਤਿ, ਚੇਤੋਦੁਕ੍ਖਸਮਪ੍ਪਿਤਾ.
੧੩੫੪. ਅਥਞ੍ਞੇ ਪਰਿਦੇਵਨ੍ਤਿ, ਵਿਪਤ੍ਤਿਵਿਨਿਪਾਤਿਕਾ;
ਪਧੁਪਾਯਿਕਸਙ੍ਕਪ੍ਪਾ, ਸੋਕੋਪਾਯਾਸਭਾਗਿਨੋ.
੧੩੫੫. ਅਥਾਪਰੇ ਪਰਾਭੂਤਾ, ਕਾਮਕ੍ਲੇਸਵਸੀਕਤਾ;
ਮੋਹਨ੍ਧਕਾਰਪਕ੍ਖਨ੍ਤਾ, ਸਤ੍ਤਾ ਗਚ੍ਛਨ੍ਤਿ ਦੁਗ੍ਗਤਿਂ.
੧੩੫੬. ਤੇ ਤਤ੍ਥ ਕਟੁਕਂ ਘੋਰਮਨੁਭੋਨ੍ਤਾ ਸਕਂ ਫਲਂ;
ਦੁਕ੍ਖਸੂਲਸਮਾਵਿਦ੍ਧਾ, ਬਾਹਾ ਪਗ੍ਗਯ੍ਹ ਕਨ੍ਦਰੇ.
੧੩੫੭. ਦੀਘਰਤ੍ਤਾਧਿਮੁਤ੍ਤਾਯ, ਦੇਵਲੋਕਸਮਿਦ੍ਧਿਯਾ;
ਦੇਵਕਾਯਾ ਵਿਹਾਯਨ੍ਤਿ, ਅਕਾਮਾ ਪਰਿਵਤ੍ਤਿਨੋ.
੧੩੫੮. ਚਿਰਕਾਲਂ ਜਲਿਤ੍ਵਾਨ, ਸੂਰਿਯੋਵ ਨਭਨ੍ਤਰੇ;
ਬ੍ਰਹ੍ਮਾਨੋਪਿ ਪਤਨ੍ਤੇਵ, ਬ੍ਰਹ੍ਮਲੋਕਾਪਰਾਯਣਾ.
੧੩੫੯. ਖਨ੍ਧਪਞ੍ਚਕਮਿਚ੍ਚੇਵਂ, ਦੁਕ੍ਖਾਗਾਰਂ ਸਮੁਬ੍ਬਹਂ;
ਨਾਨਾਗਤੀਸੁ ਵਿਕ੍ਖਿਤ੍ਤਂ, ਪਾਣਜਾਤਂ ਵਿਹਞ੍ਞਤਿ.
੧੩੬੦. ਅਨਾਥਮਨਯਾਪਨ੍ਨਂ, ਪਰਿਹਾਨਿਭਯਾਕੁਲਂ;
ਵਾਤਮਣ੍ਡਲਿਕਕ੍ਖਿਤ੍ਤਪਕ੍ਖੀਵ ਪਰਿਵਤ੍ਤਤਿ.
੧੩੬੧. ਇਤਿ ਦਿਸ੍ਵਾਨ ਸੁਤ੍ਵਾ ਵਾ, ਸਮ੍ਭਾਵੇਤ੍ਵਾਨ ਵਾ ਪੁਨ;
ਦੁਕ੍ਖਾਪਗਮਮਿਚ੍ਛਨ੍ਤੋ, ਦੁਕ੍ਖਾਪਗਮ ਪਤ੍ਥਯਂ.
੧੩੬੨. ਸੁਖਿਤੇਸੁ ਚ ਮੇਧਾਵੀ, ਦੁਕ੍ਖਾਕਾਰਮਨੁਸ੍ਸਰਂ;
ਪਵਤ੍ਤੇਯ੍ਯ ਦਯਾਪਨ੍ਨੋ, ਕਰੁਣਾਭਾਵਨਪ੍ਪਨਂ.
੧੩੬੩. ‘‘ਅਹੋ ਸਤ੍ਤਾ ਵਿਮੁਚ੍ਚਨ੍ਤੁ, ਦੁਕ੍ਖਧਮ੍ਮੇਹਿ ਸਬ੍ਬਥਾ;
ਸਾਧੁ ਸਮੇਨ੍ਤੁਪਾਯਾਸਾ, ਸੋਕਾ ਚ ਪਰਿਦੇਵਨਾ.
੧੩੬੪. ‘‘ਖੀਯਨ੍ਤੁ ਪਾਪਧਮ੍ਮਾ ਚ, ਪਸ੍ਸਮ੍ਭੇਨ੍ਤਾਮਯਾ ਤਥਾ;
ਸਂਕ੍ਲੇਸਾ ਪਲਿਬੋਧਾ ਚ, ਸਮੁਚ੍ਛਿਜ੍ਜਨ੍ਤੁ ਪਾਣਿਨਂ.
੧੩੬੫. ‘‘ਬ੍ਯਾਪਾਦਾ ਚ ਵਿਹਾਯਨ੍ਤੁ, ਵਿਨਿਵਤ੍ਤਨ੍ਤੁਪਦ੍ਦਵਾ;
ਬ੍ਯਸਨਾਨਿ ਵਿਨਸ੍ਸਨ੍ਤੁ, ਵਿਗਚ੍ਛਨ੍ਤੁ ਵਿਪਤ੍ਤਿਯੋ.
੧੩੬੬. ‘‘ਵਿਹੇਸਾ ਚ ਵਿਘਾਤਾ ਚ, ਖੀਯਨ੍ਤੁ ਭਯਭੇਰਵਾ;
ਪਟਿਕ੍ਕਮਨ੍ਤੁ ਵਿਸ੍ਸਟ੍ਠਾ, ਸੋਤ੍ਥਿਂ ਪਸ੍ਸਨ੍ਤੁ ਪਾਣਿਨੋ’’.
੧੩੬੭. ਇਚ੍ਚੇਵਮਨੁਕਮ੍ਪਨ੍ਤੋ, ਸਬ੍ਬਸਤ੍ਤੇਪਿ ਸਬ੍ਬਥਾ;
ਸਬ੍ਬਦੁਕ੍ਖਸਮੁਗ੍ਘਾਤਂ, ਪਤ੍ਥੇਨ੍ਤੋ ਕਰੁਣਾਯਤਿ.