੯. ਨਵਮੋ ਪਰਿਚ੍ਛੇਦੋ
ਦਸਾਨੁਸ੍ਸਤਿਵਿਭਾਗੋ
੧੧੦੦. ਸਦ੍ਧਾਪਬ੍ਬਜਿਤੋ ਯੋਗੀ, ਭਾਵੇਨ੍ਤੋਨੁਸ੍ਸਤਿਂ ਪਨ;
ਦਸਾਨੁਸ੍ਸਤਿਭੇਦੇਸੁ, ਭਾਵੇਯ੍ਯਞ੍ਞਤਰਂ ਕਥਂ.
੧੧੦੧. ਅਰਹਂ ਸੁਗਤੋ ਲੋਕੇ, ਭਗਵਾ ਲੋਕਪਾਰਗੂ;
ਵਿਜ੍ਜਾਚਰਣਸਮ੍ਪਨ੍ਨੋ, ਵਿਮੁਤ੍ਤਿਪਰਿਨਾਯਕੋ.
੧੧੦੨. ਜੇਟ੍ਠੋ ਸਮ੍ਮਾਭਿਸਮ੍ਬੁਦ੍ਧੋ, ਸੇਟ੍ਠੋ ਪੁਰਿਸਸਾਰਥੀ;
ਸਤ੍ਥਾ ਦੇਵਮਨੁਸ੍ਸਾਨਂ, ਬੁਦ੍ਧੋ ਅਪ੍ਪਟਿਪੁਗ੍ਗਲੋ.
੧੧੦੩. ਸਬ੍ਬਲੋਕਹਿਤੋ ਬਨ੍ਧੁ, ਸਮਤ੍ਤਰਤਨਾਲਯੋ;
ਸਤ੍ਤਾਨਮਨੁਕਮ੍ਪਾਯ, ਜਾਤੋ ਨਾਥੋ ਸਿਵਂਕਰੋ.
੧੧੦੪. ਚਕ੍ਖੁਮਾ ਤਿਤ੍ਥਕੁਸਲੋ, ਧਮ੍ਮਸ੍ਸਾਮੀ ਤਥਾਗਤੋ;
ਮਚ੍ਚੁਧੇਯ੍ਯਵਿਮੋਕ੍ਖਾਯ, ਪਟਿਪਾਦਯਿ ਪਾਣਿਨੋ.
੧੧੦੫. ਸਤ੍ਥਵਾਹੋ ਮਹਾਯੋਗ੍ਗੋ, ਮਗ੍ਗਾਮਗ੍ਗਯੁਧਨ੍ਧਰੋ;
ਸਿਰਿਸਤ੍ਥਮਧਿਗ੍ਗਯ੍ਹ, ਵਿਚਰਿਤ੍ਥ ਮਹਾਪਥਂ,
੧੧੦੬. ਅਨੋਮੋ ਅਸਮੋ ਧੀਰੋ,
ਲੋਕਹੀਤਪਰਕ੍ਕਮੋ;
ਸਬ੍ਬਾਕਾਰਵਰੋਪੇਤੋ,
ਅਚ੍ਛੇਰਬ੍ਭੁਤਪੁਗ੍ਗਲੋ.
੧੧੦੭. ਅਤ੍ਥਭੂਤੋ ਧਮ੍ਮਭੂਤੋ,
ਬ੍ਰਹ੍ਮਭੂਤੋ ਮਹਾਯਸੋ;
ਞਾਣਾਲੋਕਪਰਿਚ੍ਛਿਨ੍ਨ-
ਞੇਯ੍ਯਾਸੇਸਪਰਿਗ੍ਗਹੋ.
੧੧੦੮. ਆਨੁਭਾਵਵਸਿਪ੍ਪਤ੍ਤੋ, ਆਸਭਣ੍ਡਾਨਨਿਚ੍ਚਲੋ;
ਮਹਨ੍ਤਮਰਿਯਾਦੋਯਮਨਨ੍ਤਗਤਿਗੋਚਰੋ.
੧੧੦੯. ਸਬ੍ਬਾ ਭਿਞ੍ਞਾਬਲਪ੍ਪਤ੍ਤੋ, ਵੇਸਾਰਜ੍ਜਵਿਸਾਰਦੋ;
ਸਬ੍ਬਸਮ੍ਪਤ੍ਤਿਨਿਟ੍ਠਾਨੋ, ਗੁਣਪਾਰਮਿਪੂਰਕੋ.
੧੧੧੦. ਅਪ੍ਪਮੇਯ੍ਯੋ ਮਹਾਨਾਗੋ, ਮਹਾਵੀਰੋ ਮਹਾਮੁਨਿ;
ਮਹੇਸੀ ਮਹਿਤਾਚਾਰੋ, ਮਹਾਮਹੋ ਮਹਿਦ੍ਧਿਕੋ.
੧੧੧੧. ਸਬ੍ਬਤ੍ਥਸਿਦ੍ਧਿਸਞ੍ਚਾਰੋ, ਮਹੇਸੀਗਣਪੂਜਿਤੋ;
ਰਾਜਾਧਿਰਾਜਮਹਿਤੋ, ਦੇਵਬ੍ਰਹ੍ਮਾਭਿਵਨ੍ਦਿਤੋ.
੧੧੧੨. ਅਭਿਭੂਯ ਤਯੋ ਲੋਕੇ, ਆਦਿਚ੍ਚੋਵ ਨਭਨ੍ਤਰੇ;
ਵਿਰੋਚਤਿ ਮਹਾਤੇਜੋ, ਅਨ੍ਧਕਾਰੇ ਪਭਙ੍ਕਰੋ.
੧੧੧੩. ਬ੍ਯਾਮਪ੍ਪਭਾਪਰਿਕ੍ਖਿਤ੍ਤੋ, ਕੇਤੁਮਾਲਾਹਲਙ੍ਕਤੋ;
ਦ੍ਵਤ੍ਤਿਂਸਲਕ੍ਖਣਾਸੀਤਿਅਨੁਬ੍ਯਞ੍ਜਨਸੋਭਿਤੋ.
੧੧੧੪. ਛਬ੍ਬਣ੍ਣਰਂਸਿਲਲਿਤੋ, ਰਤਨਗ੍ਘਿਯਸਨ੍ਨਿਭੋ;
ਸਮਿਦ੍ਧਿਰੂਪਸੋਭਗ੍ਗੋ, ਦਸ੍ਸਨੇਯ੍ਯਂਵ ਪਿਣ੍ਡਿਤਂ.
੧੧੧੫. ਫੁਲ੍ਲਂ ਪਦੁਮਸਣ੍ਡਂਵ, ਕਪ੍ਪਰੁਕ੍ਖੋਵਲਙ੍ਕਤੋ;
ਨਭਂਵ ਤਾਰਕਾਕਿਣ੍ਣਂ, ਉਤ੍ਤਮੋ ਪਟਿਦਿਸ੍ਸਤਿ.
੧੧੧੬. ਸਤ੍ਥੁਕਪ੍ਪਮਹਾਵੀਰਪੁਤ੍ਤੇਹਿ ਪਰਿਵਾਰਿਤੋ;
ਸਬ੍ਬਲੋਕਮਹਿਦ੍ਧਾਯ, ਧਮ੍ਮਰਾਜਾ ਸਯਂਵਸੀ.
੧੧੧੭. ਨਿਦ੍ਧੋਤਮਲਚਨ੍ਦੋਵ, ਨਕ੍ਖਤ੍ਤਪਰਿਵਾਰਿਤੋ;
ਖਤ੍ਤਸਙ੍ਘਪਰਿਬ੍ਯੁਲ਼੍ਹੋ, ਚਕ੍ਕਵਤ੍ਤੀਵ ਸੋਭਤਿ.
੧੧੧੮. ਇਚ੍ਚਾਨਨ੍ਤਗੁਣਾਕਿਣ੍ਣਮਸੇਸਮਲਨਿਸ੍ਸਟਂ;
ਸਬ੍ਬਸਮ੍ਪਤ੍ਤਿਦਾਤਾਰਂ, ਵਿਪਤ੍ਤਿਵਿਨਿਬਨ੍ਧਕਂ.
੧੧੧੯. ਦਯਾਪਰਮਹੋਰਤ੍ਤਂ, ਭਗਵਨ੍ਤਮਨੁਸ੍ਸਰਂ;
ਭਾਵੇਤਿ ਪਞ੍ਞਵਾ ਯੋਗੀ, ਬੁਦ੍ਧਾਨੁਸ੍ਸਤਿਭਾਵਨਂ.
੧੧੨੦. ਸ੍ਵਾਖਾਤੋ ਤੇਨ ਸਦ੍ਧਮ੍ਮੋ, ਸਮ੍ਬੁਦ੍ਧੇਨ ਸਤੀਮਤਾ;
ਪਚ੍ਚਤ੍ਤਪਟਿਵੇਧੇਨ, ਪਸ੍ਸਿਤਬ੍ਬੋ ਯਥਾਰਹਂ.
੧੧੨੧. ਤਣ੍ਹਾਦਲਿਦ੍ਦਨਾਸਾਯ, ਮਨੋਰਥਸਮਿਦ੍ਧਿਯਾ;
ਕਾਲਨ੍ਤਰਮਨਾਗਮ੍ਮ, ਪਚ੍ਚਕ੍ਖਫਲਦਾਯਕੋ.
੧੧੨੨. ਉਪਨਿਸ੍ਸਯਵਨ੍ਤਾਨਂ, ‘‘ਏਹਿ ਪਸ੍ਸਾ’’ਤਿ ਦਸ੍ਸਿਯੋ;
ਪਚ੍ਚਤ੍ਤਮੇਵ ਵਿਞ੍ਞੂਹਿ, ਵੇਦਿਤਬ੍ਬੋ ਸਭਾਵਤੋ.
੧੧੨੩. ਸਬ੍ਬਾਸਵਸਮੁਗ੍ਘਾਤੀ, ਸੁਦ੍ਧੋ ਸੋਵਤ੍ਥਿਕੋ ਸਿਵੋ;
ਪਿਹਿਤਾਪਾਯਕੁਮ੍ਮਗ੍ਗੋ, ਮਗ੍ਗੋ ਨਿਬ੍ਬਾਨਪਤ੍ਤਿਯਾ.
੧੧੨੪. ਕ੍ਲੇਸਸਂਕਟਦੁਗ੍ਗਮ੍ਹਾ, ਦੁਕ੍ਖਕ੍ਖਨ੍ਧਮਹਬ੍ਭਯਾ;
ਖੇਮਨ੍ਤਭੂਮਿਂ ਨਿਯ੍ਯਾਤਿ, ਅਚ੍ਚਨ੍ਤਮਨੁਪਦ੍ਦਵਂ.
੧੧੨੫. ਪੁਞ੍ਞਤਿਤ੍ਥਮਿਦਂ ਨਾਮ, ਮਙ੍ਗਲਞ੍ਚ ਸਿਵਙ੍ਕਰਂ;
ਹਿਤੋਦਯਸੁਖਾਧਾਨ-ਮਮਤਾਹਾਰਮੁਤ੍ਤਮਂ.
੧੧੨੬. ਅਵਿਜ੍ਜਾਪਟਲੁਦ੍ਧਾਰਵਿਜ੍ਜਾਨੇਤ੍ਤੋਸਧਂ ਵਰਂ;
ਪਞ੍ਞਾਧਾਰਮਿਦਂ ਸਤ੍ਥਂ, ਕ੍ਲੇਸਗਣ੍ਡਪ੍ਪਭੇਦਕਂ.
੧੧੨੭. ਚਤੁਰੋਘਨਿਮੁਗ੍ਗਾਨਂ, ਸੇਤੁਬਨ੍ਧੋ ਸਮੁਗ੍ਗਤੋ;
ਭਵਚਾਰਕਰੁਦ੍ਧਾਨਂ, ਮਹਾਦ੍ਵਾਰੋ ਅਪਾਰੁਤੋ.
੧੧੨੮. ਸੋਕੋਪਾਯਾਸਵਿਦ੍ਧਾਨਂ, ਪਰਿਦੇਵਸਮਙ੍ਗਿਨਂ;
ਸਲ੍ਲਨੀਹਰਣੋਪਾਯੋ, ਅਚ੍ਚਨ੍ਤਸੁਖਮੀਰਿਤੋ.
੧੧੨੯. ਬ੍ਯਸਨੋਪਦ੍ਦਵਾਪੇਤੋ, ਸਂਕ੍ਲੇਸਮਲਨਿਸ੍ਸਟੋ;
ਉਜੁਸਮ੍ਮਤ੍ਤਨਿਯਤੋ, ਪਟਿਪਤ੍ਤਿਵਿਸੁਦ੍ਧਿਯਾ.
੧੧੩੦. ਸੁਦ੍ਧਸੀਲਪਰਿਕ੍ਖਾਰੋ, ਸਮਾਧਿਮਯਪਞ੍ਜਰੋ;
ਸਮ੍ਮਾਸਙ੍ਕਪ੍ਪਚਕ੍ਕਙ੍ਗੋ, ਸਮ੍ਮਾਵਾਯਾਮਵਾਹਨੋ.
੧੧੩੧. ਸਤਿਸਾਰਥਿਸਂਯੁਤ੍ਤੋ, ਸਮ੍ਮਾਦਿਟ੍ਠਿਪੁਰੇਜਵੋ;
ਏਸ ਧਮ੍ਮਰਥੋ ਯਾਤਿ, ਯੋਗਕ੍ਖੇਮਸ੍ਸ ਪਤ੍ਤਿਯਾ.
੧੧੩੨. ਵਿਪਤ੍ਤਿਪਟਿਬਾਹਾਯ, ਸਬ੍ਬਸਮ੍ਪਤ੍ਤਿਸਿਦ੍ਧਿਯਾ;
ਸਬ੍ਬਖਨ੍ਧਵਿਮੋਕ੍ਖਾਯ, ਧਮ੍ਮਂ ਦੇਸੇਸਿ ਚਕ੍ਖੁਮਾ.
੧੧੩੩. ਹਿਤੇਸੀ ਸਬ੍ਬਪਾਣੀਨਂ, ਦਯਾਪਨ੍ਨੋ ਮਹਾਮੁਨਿ;
ਧਮ੍ਮਾਲੋਕਂ ਪਕਾਸੇਸਿ, ਚਕ੍ਖੁਮਨ੍ਤਾਨਮੁਤ੍ਤਮੋ.
੧੧੩੪. ਯਂ ਧਮ੍ਮਂ ਸਮ੍ਮਦਞ੍ਞਾਯ, ਖੇਮਮਗ੍ਗਪ੍ਪਤਿਟ੍ਠਿਤਾ;
ਪਾਪਕਾਪਗਤਾ ਧੀਰਾ, ਪਸ੍ਸਦ੍ਧਿਦਰਥਾਸਯਾ.
੧੧੩੫. ਭਵਯੋਗਾ ਵਿਨਿਮੁਤ੍ਤਾ, ਪਹੀਨਭਯਭੇਰਵਾ;
ਅਚ੍ਚਨ੍ਤਸੁਖਮੇਧੇਨ੍ਤਿ, ਸੋਤ੍ਥਿਪਤ੍ਤਾ ਮਹੇਸਯੋ.
੧੧੩੬. ਤਮੇਵਮੁਤ੍ਤਮਂ ਧਮ੍ਮਂ, ਚਿਨ੍ਤੇਨ੍ਤੋ ਪਨ ਪਣ੍ਡਿਤੋ;
ਭਾਵੇਤੀਤਿ ਪਕਾਸੇਨ੍ਤਿ, ਧਮ੍ਮਾਨੁਸ੍ਸਤਿਭਾਵਨਂ.
੧੧੩੭. ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;
ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ.
੧੧੩੮. ਪਲਾਪਾਪਗਤੋ ਸੁਦ੍ਧੋ, ਪਟਿਪਤ੍ਤਿਪਤਿਟ੍ਠਿਤੋ;
ਪਰਿਗ੍ਗਹਿਤਸਦ੍ਧਮ੍ਮੋ, ਸਮਿਦ੍ਧਿਗੁਣਸੋਭਿਤੋ.
੧੧੩੯. ਪਹੀਨਾਪਾਯਗਮਨੋ, ਪਾਪਕ੍ਲੇਸਵਿਨਿਸ੍ਸਟੋ;
ਪਰਿਪਨ੍ਥਸਮੁਚ੍ਛੇਦੀ, ਭਵਚਾਰਕਭੇਦਕੋ.
੧੧੪੦. ਉਤ੍ਤਮਦਮਥਪ੍ਪਤ੍ਤੋ, ਸੁਵਿਨੀਤੋ ਮਹੇਸਿਨਾ;
ਵਿਜ੍ਜਾਵਿਮੁਤ੍ਤਿਵੋਦਾਤੋ, ਆਜਾਨੀਯਪਥੇ ਠਿਤੋ.
੧੧੪੧. ਸੁਗਤੋਰਸਿ ਸਮ੍ਭੂਤੋ, ਸੁਚਿਧਮ੍ਮਸਿਰਿਨ੍ਧਰੋ;
ਪਟਿਪਾਦਿਤਸਮ੍ਪਤ੍ਤੋ, ਧਮ੍ਮਸਾਸਨਸੇਵਿਤੋ.
੧੧੪੨. ਭਯਭੇਰਵਨਿਸ੍ਸਙ੍ਗੋ, ਜਿਨਤੇਜਾਨੁਪਾਲਿਤੋ;
ਮੋਨੇਯ੍ਯਪਥਸਞ੍ਚਾਰੋ, ਸੁਗਤੋਵਾਦਭਾਜਨੋ.
੧੧੪੩. ਅਪ੍ਪਮਾਦਪਰਿਤ੍ਤਾਣੋ, ਸੀਲਾਲਙ੍ਕਾਰਭੂਸਿਤੋ;
ਚੇਤੋਸਮਾਧਿਸਨ੍ਨਦ੍ਧੋ, ਪਞ੍ਞਾਯੁਧਸਮੁਜ੍ਜਲੋ.
੧੧੪੪. ਉਜੁਮਗ੍ਗਮਧਿਟ੍ਠਾਯ, ਮਾਰਕਾਯਪ੍ਪਦਾਲਨੋ;
ਅਪਰਾਜਿਤਸਙ੍ਗਾਮੋ, ਲਲਿਤੋਦਾਤਵਿਕ੍ਕਮੋ.
੧੧੪੫. ਮਚ੍ਚੁਧੇਯ੍ਯਮਤਿਕ੍ਕਨ੍ਤੋ, ਬੋਧਿਧਮ੍ਮਪ੍ਪਤਿਟ੍ਠਿਤੋ;
ਛਲ਼ਾਭਿਞ੍ਞਾਬਲਪ੍ਪਤ੍ਤੋ, ਸਮਾਰਾਧਿਤਸਾਸਨੋ.
੧੧੪੬. ਅਨੁਬੋਧਿਮਨੁਪ੍ਪਤ੍ਤੋ, ਪਭਿਨ੍ਨਪਟਿਸਮ੍ਭਿਦੋ;
ਸਾਮਞ੍ਞਪਾਰਮਿਪ੍ਪਤ੍ਤੋ, ਤੋਸੇਤਿ ਜਿਨਮਾਨਸਂ.
੧੧੪੭. ਨੇਕਾਕਾਰਵਰੂਪੇਤੋ, ਨਾਨਾਸਮ੍ਪਤ੍ਤਿਫੁਲ੍ਲਿਤੋ;
ਵਿਪਤ੍ਤਿਪਥਨਿਤ੍ਤਿਣ੍ਣੋ, ਅਭਿਬੁਦ੍ਧਿਪਰਾਯਣੋ.
੧੧੪੮. ਆਹੁਨੇਯ੍ਯੋ ਪਾਹੁਨੇਯ੍ਯੋ,
ਦਕ੍ਖਿਣੇਯ੍ਯੋ ਸੁਦੁਲ੍ਲਭੋ;
ਸਦੇਵਕਸ੍ਸ ਲੋਕਸ੍ਸ,
ਪੁਞ੍ਞਕ੍ਖੇਤ੍ਤਮਨੁਤ੍ਤਰਂ.
੧੧੪੯. ਯਤ੍ਥ ਸੁਦ੍ਧਿਮ੍ਹਿ ਨਿਦ੍ਦੋਸੇ, ਸਦ੍ਧਾਬੀਜਂ ਪਤਿਟ੍ਠਿਤਂ;
ਅਚ੍ਚਨ੍ਤਂ ਪਰਿਪਾਚੇਤਿ, ਸਮ੍ਪਤ੍ਤਿਫਲਮੁਤ੍ਤਮਂ.
੧੧੫੦. ਯਂ ਫਲਂ ਪਰਿਭੁਞ੍ਜਨ੍ਤਾ, ਵਿਮੁਤ੍ਤਿਰਸਸੇਵਨਂ;
ਅਚ੍ਚਨ੍ਤਸੁਖਿਤਾ ਧੀਰਾ, ਭਵਨ੍ਤਿ ਅਜਰਾਮਰਾ.
੧੧੫੧. ਤਂ ਫਲਂ ਪਤ੍ਥਯਨ੍ਤੇਨ, ਸਙ੍ਘਾਨੁਸ੍ਸਤਿਭਾਵਨਾ;
ਭਾਵੇਤਬ੍ਬਾ ਪਨਿਚ੍ਚੇਵਮਿਤਿ ਭਾਸਨ੍ਤਿ ਪਣ੍ਡਿਤਾ.
੧੧੫੨. ਪਞ੍ਚਸੀਲਂ ਦਸਸੀਲਂ, ਪਾਤਿਮੋਕ੍ਖਮੁਪੋਸਥਂ;
ਚਾਤੁਪਾਰਿਸੁਦ੍ਧਿਸੀਲਂ, ਧੁਤਙ੍ਗਪਰਿਵਾਰਿਤਂ.
੧੧੫੩. ਏਵਮੇਤੇਸੁ ਯਂ ਕਿਞ੍ਚਿ, ਸਮਾਦਾਯ ਰਹੋਗਤੋ;
ਤਮਾਨਿਸਂਸਂ ਗੁਣਤੋ, ਫਲਤੋ ਚ ਵਿਚਿਨ੍ਤਯੇ.
੧੧੫੪. ਆਦਿ ਚੇਤਂ ਪਤਿਟ੍ਠਾ ਚ, ਮੁਖਂ ਪਮੁਖਮੁਤ੍ਤਮਂ;
ਮੂਲਂ ਕੁਸਲਧਮ੍ਮਾਨਂ, ਪਭਵਂ ਪਟਿਪਤ੍ਤਿਯਾ.
੧੧੫੫. ਸਾਸਨੋਤਰਣਦ੍ਵਾਰਂ, ਤਿਤ੍ਥਂ ਸਦ੍ਧਮ੍ਮਵਾਪਿਯਾ;
ਪਾਰਿਸੁਦ੍ਧਿਪਦਟ੍ਠਾਨਂ, ਮਗ੍ਗੋ ਖੇਮਨ੍ਤਪਾਪਕੋ.
੧੧੫੬. ਸਾਧੁ ਸਿਕ੍ਖਾਸਮਾਦਾਨਂ, ਬਾਹੁਸਚ੍ਚਵਿਭੂਸਨਂ;
ਅਰਿਯਾਚਾਰਚਾਰਿਤ੍ਤ-ਮਵਣ੍ਣਮਲਵਜ੍ਜਨਂ.
੧੧੫੭. ਕੁਲਪੁਤ੍ਤਅਲਙ੍ਕਾਰੋ, ਪਾਪਜਲ੍ਲਪਵਾਹਨਂ;
ਅਨਪਾਯਿ ਸੁਗਨ੍ਧਞ੍ਚ, ਮਹਾਪੁਰਿਸਸੇਵਿਤਂ.
੧੧੫੮. ਪਚ੍ਛਾਨੁਤਾਪਹਰਣਂ, ਪੀਤਿਪਾਮੋਜ੍ਜਵਡ੍ਢਨਂ;
ਨੇਕ੍ਖਮ੍ਮਭਾਵਨੋਪੇਤਂ, ਪਬ੍ਬਜ੍ਜਾਵੇਸਸੋਭਨਂ.
੧੧੫੯. ਸੋਪਾਨਂ ਸਗ੍ਗਲੋਕਸ੍ਸ, ਦਲ਼੍ਹਾਪਾਯਵਿਧਾਨਕਂ;
ਅਨੁਪਦ੍ਦਵਸਮ੍ਪਤ੍ਤਿ, ਸਮਤ੍ਥਗੁਣਸੂਦਨੀ.
੧੧੬੦. ਕ੍ਲੇਸਪਞ੍ਜਰਵਿਚ੍ਛੇਦਿ, ਵਿਪਤ੍ਤਿਪਥਵਾਰਣਂ;
ਸੋਤ੍ਥਿਕਮ੍ਮਸਮੁਟ੍ਠਾਨਂ, ਅਸਾਧਾਰਣਮਙ੍ਗਲਂ.
੧੧੬੧. ‘‘ਸੁਲਦ੍ਧਾ ਵਤ ਮੇ ਲਦ੍ਧਾ, ਸਦ੍ਧਾ ਸੁਗਤਸਾਸਨੇ;
ਸੀਲਂ ਮੇ ਯਸ੍ਸ ਕਲ੍ਯਾਣਂ, ਪਰਿਸੁਦ੍ਧਮਖਣ੍ਡਿਤਂ.
੧੧੬੨. ‘‘ਦੁਲ੍ਲਭੋ ਵਤ ਮੇ ਲਦ੍ਧੋ,
ਮਹਾਲਾਭੋ ਅਨਪ੍ਪਕੋ;
ਯੋਹਮਕ੍ਖਲਿਤਾਚਾਰੋ,
ਉਪਘਾਤਵਿਵਜ੍ਜਿਤੋ.
੧੧੬੩. ‘‘ਧਮ੍ਮਙ੍ਕੁਰਿਤਸਨ੍ਤਾਨੋ, ਮੂਲਜਾਤੋਸ੍ਮਿ ਸਾਸਨੇ;
ਉਜੁਮਗ੍ਗਂ ਸਮਾਰੁਲ਼੍ਹੋ, ਪਿਹਿਤਾ ਸਭਯਾ ਦਿਸਾ.
੧੧੬੪. ‘‘ਅਵਞ੍ਚਾ ਵਤ ਮੇ ਜਾਤਿ, ਆਰਦ੍ਧਾ ਖਣਸਮ੍ਪਦਾ;
ਪਤਿਟ੍ਠਿਤੋਮ੍ਹਿ ਸਦ੍ਧਮ੍ਮੇ, ਸਫਲਂ ਮਮ ਜੀਵਿਤਂ’’.
੧੧੬੫. ਇਤ੍ਥਂ ਨਾਨਪ੍ਪਕਾਰੇਨ, ਚਿਨ੍ਤੇਨ੍ਤੋ ਗੁਣਮਤ੍ਤਨੋ;
ਸੀਲਕ੍ਖਨ੍ਧਸ੍ਸ ਭਾਵੇਤਿ, ਸੀਲਾਨੁਸ੍ਸਤਿਭਾਵਨਂ.
੧੧੬੬. ਸਦ੍ਧਾਯ ਸੀਲਵਨ੍ਤੇਸੁ, ਦਤ੍ਵਾ ਦਾਨਂ ਯਥਾਰਹਂ;
ਨਿਦ੍ਧੋਤਮਲਮਚ੍ਛੇਰੋ, ਵਿਵਿਤ੍ਤੋ ਤਮਨੁਸ੍ਸਰੇ.
੧੧੬੭. ਦਾਨਂ ਨਿਧਾਨਮਨੁਗਂ, ਅਸਾਧਾਰਣਮੁਤ੍ਤਮਂ;
ਅਵਿਨਾਸਸੁਖਾਧਾਨਂ, ਅਚ੍ਚਨ੍ਤਂ ਸਬ੍ਬਕਾਮਦਂ.
੧੧੬੮. ਕੋਪਦਾਹੋਪਸਮਨਂ, ਮਚ੍ਛੇਰਮਲਸੋਧਨਂ;
ਪਮਾਦਨਿਦ੍ਦਾਵੁਟ੍ਠਾਨਂ, ਲੋਭਪਾਸਵਿਮੋਚਨਂ.
੧੧੬੯. ਚੇਤੋਵਿਕਾਰਦਮਨਂ, ਮਿਚ੍ਛਾਮਗ੍ਗਨਿਵਾਰਣਂ;
ਵਿਤ੍ਤਿਲਾਭਸੁਖਸ੍ਸਾਦੋ, ਵਿਭਵੋਦਯਮਙ੍ਗਲਂ.