੮. ਅਟ੍ਠਮੋ ਪਰਿਚ੍ਛੇਦੋ
ਕਸਿਣਾਸੁਭਵਿਭਾਗੋ
੮੮੦. ਇਤੋ ਪਰਂ ਪਵਕ੍ਖਾਮਿ, ਭਾਵਨਾਨਯਮੁਤ੍ਤਮਂ;
ਨਾਮਰੂਪਂ ਪਰਿਗ੍ਗਯ੍ਹ, ਪਟਿਪਜ੍ਜਿਤੁਮੀਹਤੋ.
੮੮੧. ਭਾਵਨਾ ਦੁਵਿਧਾ ਤਤ੍ਥ, ਸਮਥੋ ਚ ਵਿਪਸ੍ਸਨਾ;
ਸਮਥੋ ਦੁਵਿਧੋ ਤਤ੍ਥ, ਪਰਿਤ੍ਤੋ ਚ ਮਹਗ੍ਗਤੋ.
੮੮੨. ਉਪਚਾਰਮਨੁਪ੍ਪਤ੍ਤੋ, ਪਰਿਤ੍ਤੋਤਿ ਪਵੁਚ੍ਚਤਿ;
ਮਹਗ੍ਗਤਪ੍ਪਨਾਪਤ੍ਤੋ, ਸਮਥੋ ਲੋਕਿਯੋ ਮਤੋ.
੮੮੩. ਕਸਿਣਾਨਿ ਦਸਾਸੁਭਾ, ਦਸਧਾਨੁਸ੍ਸਤੀ ਤਥਾ;
ਅਪ੍ਪਮਞ੍ਞਾ ਚ ਸਞ੍ਞਾ ਚ, ਵਵਤ੍ਥਾਰੁਪ੍ਪਕਾਨਿ ਚ.
੮੮੪. ਕਮ੍ਮਟ੍ਠਾਨਾਨਿ ਤਤ੍ਥਾਹੁ, ਚਤ੍ਤਾਲੀਸ ਵਿਚਕ੍ਖਣਾ;
ਯਤ੍ਥਾਨੁਯੋਗਂ ਕੁਬ੍ਬਨ੍ਤਾ, ਭਾਵੇਨ੍ਤਿ ਸਮਥਦ੍ਵਯਂ.
੮੮੫. ਤਂ ਪਯੋਗਵਿਸੁਦ੍ਧੇਨ, ਪਤ੍ਵਾਨੋਪਾਯਸਮ੍ਪਦਂ;
ਅਜ੍ਝਾਸਯਂ ਵਿਸੋਧੇਤ੍ਵਾ, ਭਾਵੇਤਬ੍ਬਨ੍ਤਿ ਭਾਸਿਤਂ.
੮੮੬. ਕਥਂ ਕਰੋਨ੍ਤੋ ਚਾਰਿਤ੍ਤਂ, ਵਾਰਿਤ੍ਤਞ੍ਚ ਵਿਵਜ੍ਜਿਯ;
ਪਾਤਿਮੋਕ੍ਖਂ ਸਮਾਦਾਯ, ਸਦ੍ਧਾਯ ਪਰਿਪੂਰਯੇ.
੮੮੭. ਪਟਿਸਙ੍ਖਾਯ ਸੋਧੇਤ੍ਵਾ, ਛਦ੍ਵਾਰੇਸੁ ਮਲਾਸਵਂ;
ਛਲ਼ਿਨ੍ਦ੍ਰਿਯਾਨਿ ਮੇਧਾਵੀ, ਸਤਾਰਕ੍ਖੇਨ ਗੋਪਯੇ.
੮੮੮. ਪਾਪਕਾਜੀਵਨਿਸ੍ਸਙ੍ਗੋ, ਕੁਹਕਾਚਾਰਨਿਸ੍ਸਟੋ;
ਆਜੀਵਂ ਪਰਿਸੋਧੇਯ੍ਯ, ਪਹਿਤਤ੍ਤੇਟ੍ਠਿਸੁਦ੍ਧਿਯਾ.
੮੮੯. ਇਦਮਤ੍ਥਿਤਮਾਰਬ੍ਭ, ਪਟਿਸਙ੍ਖਾਯ ਯੋਨਿਸੋ;
ਪਞ੍ਞਵਾ ਸਮ੍ਪਜਞ੍ਞੇਨ, ਪਰਿਭੁਞ੍ਜੇਯ੍ਯ ਪਚ੍ਚਯੇ.
੮੯੦. ਸਂਵਰਂ ਪਾਤਿਮੋਕ੍ਖੇ ਚ, ਸੀਲਮਿਨ੍ਦ੍ਰਿਯਸਂਵਰਂ;
ਆਜੀਵਪਾਰਿਸੁਦ੍ਧਿਞ੍ਚ, ਤਥਾ ਪਚ੍ਚਯਨਿਸ੍ਸਿਤਂ.
੮੯੧. ਸਮਾਦਾਯ ਚਤੁਦ੍ਧੇਵ-ਮਧਿਟ੍ਠੇਯ੍ਯ ਤਤੋ ਪਰਂ;
ਤਸ੍ਸੇਵ ਪਰਿਵਾਰਾਯ, ਧੁਤਙ੍ਗਾਨਿ ਯਥਾਰਹਂ.
੮੯੨. ਪਂਸੁਕੂਲਿਕਮਙ੍ਗਂ ਤਿ-ਚੀਵਰਂ ਚੀਵਰਾਯੁਗਂ;
ਪਿਣ੍ਡਪਾਤਿਕਮਙ੍ਗਞ੍ਚ, ਸਪਦਾਨਿਕਮੁਤ੍ਤਮਂ.
੮੯੩. ਖਲੁਪਚ੍ਛਾਭਤ੍ਤਿਕਙ੍ਗਂ, ਧੁਤਙ੍ਗਂ ਪਤ੍ਤਪਿਣ੍ਡਿਕਂ;
ਏਕਾਸਨਿਕਮਿਚ੍ਚੇਵਂ, ਪਞ੍ਚਧਾ ਭੋਜਨੇ ਠਿਤਂ.
੮੯੪. ਆਰਞ੍ਞਿਕਂ ਯਥਾਸਨ੍ਥ-
ਤਿਕਙ੍ਗਂ ਰੁਕ੍ਖਮੂਲਿਕਂ;
ਅਬ੍ਭੋਕਾਸਿਕਸੋਸਾਨਿ-
ਕਙ੍ਗਾ ਨੇਸਜ੍ਜਿਕਂ ਤਥਾ.
੮੯੫. ਛ ਸੇਨਾਸਨਮਾਰਬ੍ਭ, ਧੁਤਙ੍ਗਾਨੀਤਿ ਤੇਰਸ;
ਕਪ੍ਪਿਯੇਪਿ ਚ ਲੋਲੁਪ੍ਪ-ਸਮਾਚਾਰਵਿਮੁਤ੍ਤਿਯਾ.
੮੯੬. ਸਾਮੀਚਿਪਟਿਪਤ੍ਤੀਤਿ, ਕਤ੍ਵਾ ਸਲ੍ਲੇਖਵੁਤ੍ਤਿਯਾ;
ਪਚ੍ਚਯਤ੍ਤਯਮਾਹਚ੍ਚ, ਪਞ੍ਞਤ੍ਤਾਨਿ ਮਹੇਸਿਨਾ.
੮੯੭. ਚਤੁਪਾਰਿਸੁਦ੍ਧਿਸੀਲਂ, ਧੁਤਙ੍ਗਪਰਿਵਾਰਿਤਂ;
ਪੂਰੇਤ੍ਵਾਨ ਵਿਸੁਦ੍ਧੇਵਂ, ਪਯੋਗਪਰਿਸੁਦ੍ਧਿਯਾ.
੮੯੮. ਤਤੋ ਪਣਿਧਿਸਮ੍ਪਨ੍ਨੋ, ਭਾਵਨਾਯ ਵਿਸਾਰਦੋ;
ਉਪਾਯਂ ਪਟਿਪਾਦੇਯ੍ਯ, ਪਵਿਵੇਕਰਤੋ ਕਥਂ?
੮੯੯. ਆਵਾਸੋ ਚ ਕੁਲਂ ਲਾਭੋ,
ਗਣੋ ਕਮ੍ਮਞ੍ਚ ਪਞ੍ਚਮਂ;
ਅਦ੍ਧਾਨਂ ਞਾਤਿ ਆਬਾਧੋ,
ਗਨ੍ਥੋ ਇਦ੍ਧੀਤਿ ਤੇ ਦਸ.
੯੦੦. ਛੇਤ੍ਵਾਨ ਨਿਪਕੋ ਯੋਗੀ,
ਪਲਿਬੋਧੇ ਯਥਾਰਹਂ;
ਨਿਰਾਲਯੋ ਨਿਰਾਰਮ੍ਭੋ,
ਪਪਞ੍ਚੋਪਸਮੇ ਰਤੋ.
੯੦੧. ਪਿਯਂ ਗਰੁਂ ਭਾਵਨਿਯਂ, ਵਤ੍ਤਾਰਂ ਵਚਨਕ੍ਖਮਂ;
ਕਤ੍ਤਾਰਮਤਿਗਮ੍ਭੀਰਕਥਂ ਠਾਨਨਿਯੋਜਕਂ.
੯੦੨. ਬਹੁਸ੍ਸੁਤਂ ਗੁਣਵਨ੍ਤ-ਮਾਗਮ੍ਮਾਚਰਿਯਂ ਬੁਧੋ;
ਖਮੋ ਪਦਕ੍ਖਿਣਗ੍ਗਾਹੀ, ਨਿਯ੍ਯਾਤਤ੍ਤੁਜੁ ਭਦ੍ਰਕੋ.
੯੦੩. ਆਰਾਧੇਤ੍ਵਾਨ ਗਣ੍ਹੇਯ੍ਯ, ਤਂ ਕਮ੍ਮਟ੍ਠਾਨਦਾਯਕਂ;
ਕਮ੍ਮਟ੍ਠਾਨਂ ਪਰਿਕ੍ਖਿਤ੍ਵਾ, ਚਰਿਯਾਰਹਮਤ੍ਤਨੋ.
੯੦੪. ਰਾਗੋ ਦੋਸੋ ਚ ਮੋਹੋ ਚ,
ਚਰਿਯਾ ਤੀਹਿ ਪਣ੍ਡਿਤਾ;
ਸਦ੍ਧਾਬੁਦ੍ਧਿਵਿਤਕ੍ਕੇਹਿ,
ਛਬ੍ਬਿਧਾ ਚ ਵਿਭਾਵਯੁਂ.
੯੦੫. ਰਾਗੁਸ੍ਸਨ੍ਨਸ੍ਸ ਸਪ੍ਪਾਯਾ, ਕੋਟ੍ਠਾਸਾਸੁਭਭਾਵਨਾ;
ਦੋਸੁਸ੍ਸਨ੍ਨਸ੍ਸਪ੍ਪਮਞ੍ਞਾ, ਨੀਲਾਦਿ ਚ ਚਤੁਬ੍ਬਿਧਾ.
੯੦੬. ਵਿਤਕ੍ਕਂ ਮੋਹੁਸ੍ਸਨ੍ਨਾਨਂ, ਆਨਾਪਾਨਂ ਪਕਾਸਿਤਂ;
ਛ ਸਦ੍ਧਾਚਰਿਤਸ੍ਸਾਹੁ, ਬੁਦ੍ਧਾਨੁਸ੍ਸਤਿਆਦਯੋ.
੯੦੭. ਮਰਣੋਪਸਮਾਸਞ੍ਞਾਵਵਤ੍ਥਾਨਾਨਿ ਬੁਦ੍ਧਿਨੋ;
ਸੇਸਾਨਿ ਪਨ ਸਬ੍ਬੇਸਂ, ਤਤ੍ਥਾਪਿ ਕਸਿਣਂ ਬੁਧਾ.
੯੦੮. ਵਿਤਕ੍ਕਪਕਤਿਕਸ੍ਸ, ਪਰਿਤ੍ਤਂ ਮੋਹਚਾਰਿਨੋ;
ਮਹਨ੍ਤਮਿਤਿ ਸਪ੍ਪਾਯਂ, ਗਹੇਤ੍ਵਾਨ ਤਤੋ ਪਰਂ.
੯੦੯. ਮਹਾਵਾਸਂ ਨਵਂ ਜਿਣ੍ਣਂ, ਪਨ੍ਥਸੋਣ੍ਡਿਕਸਨ੍ਤਿਕਂ;
ਪਣ੍ਣਪੁਪ੍ਫਫਲਾਕਿਣ੍ਣਂ, ਬਹੁਸਮ੍ਮਾਨਪਤ੍ਥਿਤਂ.
੯੧੦. ਸੀਮਨ੍ਤਦਾਰੁਨਗਰ-ਕ੍ਖੇਤ੍ਤਪਚ੍ਚਨ੍ਤਨਿਸ੍ਸਿਤਂ;
ਵਿਸਭਾਗਮਸਪ੍ਪਾਯਂ, ਪਟ੍ਟਨਂ ਮਿਤ੍ਤਦੁਲ੍ਲਭਂ.
੯੧੧. ਠਾਨਾਨਿਟ੍ਠਾਰਸੇਤਾਨਿ, ਪਰਿਵਜ੍ਜੇਯ੍ਯ ਪਣ੍ਡਿਤੋ;
ਸੇਵੇਯ੍ਯ ਭਾਵਨਾਯੋਗ੍ਗਂ, ਸੇਨਾਸਨਮਤਨ੍ਦਿਤੋ.
੯੧੨. ਨਾਤਿਦੂਰਂ ਨਾਚ੍ਚਾਸਨ੍ਨਂ, ਅਪ੍ਪਸਦ੍ਦਮਨਾਕੁਲਂ;
ਗਮਨਾਗਮਨਸਮ੍ਪਨ੍ਨਂ, ਅਪ੍ਪਡਂਸਾਨੁਪਦ੍ਦਵਂ.
੯੧੩. ਅਕਿਚ੍ਛਪਚ੍ਚਯੁਪ੍ਪਾਦਂ, ਲਜ੍ਜੀਭਿਕ੍ਖੁਗਣੋਚਿਤਂ;
ਵਿਵੇਕਟ੍ਠਾਨਬਹੁਲਂ, ਬਹੁਸ੍ਸੁਤਨਿਸੇਵਿਤਂ.
੯੧੪. ਅਪ੍ਪਭਯਂ ਨਿਰਾਸਙ੍ਕਂ, ਅਪ੍ਪਦੋਸਂ ਮਹਾਗੁਣਂ;
ਵਿਹਾਰਮਨੁਸੇਵਨ੍ਤੋ, ਤਤ੍ਥ ਨਿਸ੍ਸਙ੍ਗਚੇਤਸਾ.
੯੧੫. ਤਤੋ ਕੇਸਨਖਚ੍ਛੇਦ-ਰਜਨਾਦਿਮਸੇਸਤੋ;
ਖੁਦ੍ਦਕਂ ਪਲਿਬੋਧਞ੍ਚ, ਛਿਨ੍ਦਿਤ੍ਵਾਨ ਯਥਾਰਹਂ.
੯੧੬. ਆਵਾਸਂ ਗੋਚਰਂ ਭਸ੍ਸਂ, ਪੁਗ੍ਗਲਂ ਭੋਜਨਂ ਤਥਾ;
ਵਜ੍ਜੇਨ੍ਤੋਤੁਮਸਪ੍ਪਾਯਂ, ਇਰਿਯਾਪਥਮਤ੍ਤਨੋ.
੯੧੭. ਸੇਵਨ੍ਤੋ ਸਤ੍ਤ ਸਪ੍ਪਾਯੇ, ਤੇ ਏਵਾਤਿ ਪਧਾਨਵਾ;
ਭਾਵਨੂਪਾਯਸਮ੍ਪਨ੍ਨੋ, ਵੂਪਕਟ੍ਠੋ ਰਹੋਗਤੋ.
੯੧੮. ਕਾਮੇਸ੍ਵਾਦੀਨਵਂ ਦਿਸ੍ਵਾ, ਨੇਕ੍ਖਮ੍ਮਂ ਦਟ੍ਠੁ ਖੇਮਤੋ;
ਪਰਿਯੁਟ੍ਠਾਨਨਿਬ੍ਬਿਨ੍ਦੋ, ਸੋਧੇਯ੍ਯਜ੍ਝਾਸਯਂ ਕਥਂ.
੯੧੯. ਅਪ੍ਪਸ੍ਸਾਦਾ ਮਹਾਦੁਕ੍ਖਾ, ਕਾਮਾ ਹਿ ਕਟੁਕਪ੍ਫਲਾ;
ਦੁਸ੍ਸਂਹਾਰਾ ਦੁਰਾਰਕ੍ਖਾ, ਬਹ੍ਵਾਦੀਨਵਸਣ੍ਠਿਤਾ.
੯੨੦. ਅਟ੍ਠਿਕਾ ਖਜ੍ਜਮਾਨਾਵ, ਵਿਘਾਤਾਯ ਪਭਿਜ੍ਜਿਤਾ;
ਗਯ੍ਹਨ੍ਤਤ੍ਤਵਧਾਯੇਤੇ, ਮਂਸਪੇਸੀਵ ਪਕ੍ਖਿਭਿ.
੯੨੧. ਪਟਿਵਾਤੇ ਤਿਣੁਕ੍ਕਾਵ, ਪਰਿਗ੍ਗਾਹਕਦਾਹਿਨੋ;
ਅਙ੍ਗਾਰਕਾਸੁਸਙ੍ਕਾਸਾ, ਸਬ੍ਬਙ੍ਗਪਰਿਤਾਸਕਾ.
੯੨੨. ਸੁਪਿਨੇ ਪਰਿਭੁਤ੍ਤਾਵ, ਨਾਲਂ ਕਸ੍ਸਚਿ ਤਿਤ੍ਤਿਯਾ;
ਨ ਤੁ ਕਸ੍ਸਚਿ ਅਚ੍ਚਨ੍ਤਾ, ਅਲਙ੍ਕਾਰਾਵ ਯਾਚਿਤਾ.
੯੨੩. ਛਜ੍ਜਨ੍ਤਾ ਫਲਰੁਕ੍ਖਾਵ, ਪਟਿਪਨ੍ਨਪਭਞ੍ਜਿਨੋ;
ਅਸਿਸੂਨੂਪਮਾ ਨਿਚ੍ਚ-ਮਧਿਕੋਟ੍ਟੇਨ੍ਤਿ ਪਾਣਿਨੋ.
੯੨੪. ਸਤ੍ਤਿਸੂਲੂਪਮਾ ਦਲ਼੍ਹਂ, ਤਣ੍ਹਾਸਲ੍ਲਾਨੁਵੇਧਿਨੋ;
ਘੋਰਾਨਤ੍ਥਵਿਸਾਕਿਣ੍ਣਾ, ਕਣ੍ਹਸਪ੍ਪਸਿਰੂਪਮਾ.
੯੨੫. ਸਬ੍ਬਾਸਵਪਰਿਕ੍ਲਿਟ੍ਠਾ, ਸਬ੍ਬਾਸਂਕ੍ਲੇਸਵਤ੍ਥੁਕਾ;
ਗਮ੍ਮਾ ਚ ਚਪਲਾ ਨੀਚਾ, ਪੁਥੁਜ੍ਜਨਮਮਾਯਿਤਾ.
੯੨੬. ਬਹੁਸਾਧਾਰਣਾ ਚੇਤੇ, ਸਪਤ੍ਤਜਨਪਤ੍ਥਿਤਾ;
ਮਹੋਪਦ੍ਦਵੁਪਯਟ੍ਠਾ, ਬਹ੍ਵਾਯਾਸਾ ਭਯਾਵਹਾ.
੯੨੭. ਮਹਾਰਮ੍ਭਸਮਾਰਦ੍ਧਾ, ਖਿਪ੍ਪਾਕਾਰਵਿਧਂਸਿਨੋ;
ਸੋਕਸਲ੍ਲਂ ਪਵੇਸੇਨ੍ਤਾ, ਵਿਗਚ੍ਛਨ੍ਤਿ ਸੁਵੇ ਸੁਵੇ.
੯੨੮. ਨਾਲਂ ਕਸ੍ਸਚਿ ਤਾਣਾਯ, ਨਾਲਮਸ੍ਸਾਸਨਾਯ ਚ;
ਅਵਿਸਾਸਨਿਯਾਵਸ੍ਸਂ, ਕਿਤਵਾ ਮਾਰਕਿਂਕਰਾ.
੯੨੯. ਸਤ੍ਤਾਨਮੁਪਘਾਤਾਯ, ਮਧੁਰਾਕਾਰਨਿਮ੍ਮਿਤਾ;
ਰਕ੍ਖਸੀ ਵਿਯ ਸਨ੍ਤਾਨ-ਮਾਵਿਸਨ੍ਤਿ ਮਨੋਹਰਾ.
੯੩੦. ਆਵਿਟ੍ਠਾ ਯੇਹਿ ਦੁਮ੍ਮੇਧਾ, ਬ੍ਯਸਨਾਹਿਤਸਮ੍ਭਵਾ;
ਵਿਪਲ੍ਲਾਸਪਰਾਭੂਤਾ, ਬ੍ਯਾਪਜ੍ਜਨ੍ਤਾ ਵਿਹਞ੍ਞਰੇ.
੯੩੧. ਚੇਤੋਸਙ੍ਕਪ੍ਪਰਚਿਤਾ, ਨਨ੍ਦਿਰਾਗੋਪਸੇਵਨਾ;
ਮਧੁਲਿਤ੍ਤਾਸਿਧਾਰਾਵ, ਬ੍ਯਾਪਾਰੇਨੋਪਸੇਵਿਤਾ.
੯੩੨. ਮਨੋਰਮਸੁਭਾਕਾਰਾ, ਪਿਯਰੂਪੋਪਲਮ੍ਭਿਨੋ;
ਮਿਤ੍ਤਮੁਖਂ ਸਪਤ੍ਤਾਵ, ਵਞ੍ਚਯਨ੍ਤਿ ਮਹਾਜਨਂ.
੯੩੩. ਵਞ੍ਚਿਤਾ ਯੇਹਿ ਦੁਮ੍ਮੇਧਾ, ਸਬ੍ਬਸਮ੍ਪਤ੍ਤਿਧਂਸਿਤਾ;
ਖੇਮਮਗ੍ਗਾ ਪਰਿਬ੍ਭਟ੍ਠਾ, ਧਾਰੇਨ੍ਤਿ ਵਧਮਤ੍ਤਨੋ.
੯੩੪. ਵਿਰੂਪਰੂਪਾਕਾਰੇਨ, ਨਿਮ੍ਮਥੇਨ੍ਤਾ ਪਲੋਭਿਨੋ;
ਅਭਾਵਿਤਾਨਂ ਬਾਲਾਨਂ, ਮਾਨਸਂ ਨਿਹਨਨ੍ਤਿਮੇ.
੯੩੫. ਯਤ੍ਥ ਰਾਗਸਲ੍ਲਵਿਦ੍ਧਾ, ਸਲ੍ਲੇਨੇਵ ਵਨੇ ਮਿਗਾ;
ਤਤ੍ਥ ਤਤ੍ਥਾਨੁਧਾਵਨ੍ਤਾ, ਵਿਪ੍ਫਨ੍ਦਨ੍ਤਿ ਨਿਰਨ੍ਤਰਂ.
੯੩੬. ਮਮਂਕਾਰੇਨ ਵੁਡ੍ਢਨ੍ਤਾ, ਘੋਰਮਾਸੀਵਿਸਂ ਯਥਾ;
ਵਿਸ੍ਸਟ੍ਠਾ ਭੋਗਧਮ੍ਮੇਸੁ, ਅਸ੍ਸਾਦੇਨ੍ਤਿ ਅਵਿਦ੍ਦਸੁ.
੯੩੭. ਅਨਯਬ੍ਯਸਨਾਯੇਤੇ, ਵਸੀ ਕੁਬ੍ਬਨ੍ਤਿ ਪਾਣਿਨੋ;
ਵਿਚਿਤ੍ਤਾਕਾਰਸਣ੍ਠਾਨਾ, ਪਿਸਾਚਨਗਰਂ ਯਥਾ.
੯੩੮. ਅਨਤ੍ਥਾਵਹਿਤਾ ਬਾਲਾ, ਵਾਗੁਰਂ ਨਾਵਬੁਜ੍ਝਰੇ;
ਤਤ੍ਥੇਵ ਪਟਿਵਮਨ੍ਤਿ, ਯਥਾ ਹਞ੍ਞਨ੍ਤਿ ਮੁਚ੍ਛਿਤਾ.
੯੩੯. ਸੀਘਵਾਹੀ ਮਹੋਘੋਯਂ, ਕ੍ਲੇਸਵਟ੍ਟਂ ਮਹਬ੍ਭਯੋ;
ਸਕਣ੍ਟਕਞ੍ਚ ਗਹਨਂ, ਪਙ੍ਕੋਵ ਦੁਰਤਿਕ੍ਕਮੋ.
੯੪੦. ਚੇਤੋਸਂਮੋਹਨਟ੍ਠਾਨਂ, ਪਮਾਦਪਟਿਸਨ੍ਧਿਤਂ;
ਓਹਾਰਿ ਸਿਥਿਲਂ ਚੇਤਂ, ਦੁਪ੍ਪਮੁਞ੍ਚਞ੍ਚ ਬਨ੍ਧਨਂ.
੯੪੧. ਜਾਲਂਵ ਵਿਤ੍ਥਤਂ ਲੋਕੇ,
ਮਾਰਪਾਸੋ ਸਮੋਡ੍ਡਿਤੋ;
ਪਞ੍ਜਰਂ ਚਾਰਕੋ ਚੇਸੋ,
ਸਤ੍ਤਾਨਮਨਯਾਵਹੋ.
੯੪੨. ਯਤ੍ਥਾਨੁਰਾਗਸਮ੍ਬਦ੍ਧਾ, ਪਲਿਗੁਣ੍ਠਿਤਸਾਯਿਨੋ;
ਮਕ੍ਕਟਾਲੇਪਬਦ੍ਧਾਵ, ਨਿਤ੍ਥੁਨਨ੍ਤਿ ਵਿਘਾਤਿਨੋ.
੯੪੩. ਬਲ਼ਿਸਂਵਾਮਿਸਚ੍ਛਨ੍ਨਂ, ਸਵਿਸਂ ਵਿਯ ਭੋਜਨਂ;
ਮਿਗਲੁਦ੍ਦਨਿਵਾਪੋਵ, ਵਿਨਾਸਾਯ ਸਮੋਡ੍ਡਿਤਾ.
੯੪੪. ਮੀਨਕਾ ਵਙ੍ਕਗਿਦ੍ਧਾਵ, ਯੇ ਗਿਲਿਤ੍ਵਾ ਪੁਥੁਜ੍ਜਨਾ;
ਘੋਰਂ ਮਚ੍ਚੁਮੁਖਂ ਪਤ੍ਵਾ, ਸੋਚਨ੍ਤਾਪਾਯਭਾਗਿਨੋ.
੯੪੫. ਪਾਪਕ੍ਖੇਤ੍ਤਮਿਦਂ ਠਾਨਂ, ਮਿਚ੍ਛਾਲੋਭਨਿਸੇਵਨਂ;
ਦੁਚ੍ਚਰੀਤਙ੍ਕੁਰਾਰੋਹਂ, ਅਪਾਯਫਲਪੂਰਣਂ.
੯੪੬. ਅਜ੍ਝੋਸਿਤਾ ਪਨੇਤ੍ਥ ਚ, ਲੋਭਮੁਚ੍ਛਾਵਿਦਾਹਿਨੋ;
ਕੋਧੂਪਨਾਹਜਲਿਤਾ, ਇਸ੍ਸਾਮਚ੍ਛੇਰਧੂਪਿਤਾ.
੯੪੭. ਸਾਰਮ੍ਭਾਯੁਧਸਨ੍ਨਦ੍ਧਾ, ਵਿਪ੍ਫੁਰਨ੍ਤਾ ਮਨੋਰਥਾ;
ਆਬਨ੍ਧਿਚ੍ਛਾ ਮਹਾਕਚ੍ਛਾ, ਠਨ੍ਤਿ ਲੋਕਵਿਪਤ੍ਤਿਯਾ.
੯੪੮. ਅਵਜ੍ਜਂ ਨਤ੍ਥਿ ਏਤੇਸ-ਮਕਤ੍ਤਬ੍ਬਂ ਨ ਵਿਜ੍ਜਤਿ;
ਸਮ੍ਮੁਟ੍ਠਸਚ੍ਚਤਾ ਤੇਸੁ, ਨ ਪਤਿਟ੍ਠਾਤਿ ਸਾਧੁਤਾ.