੭. ਸਤ੍ਤਮੋ ਪਰਿਚ੍ਛੇਦੋ
ਸਬ੍ਬਸਙ੍ਗਹਵਿਭਾਗੋ
੬੧੭. ਚਤੁਪਞ੍ਞਾਸ ਧਮ੍ਮਾ ਹਿ, ਨਾਮਨਾਮੇਨ ਭਾਸਿਤਾ;
ਅਟ੍ਠਾਰਸਵਿਧਾ ਵੁਤ੍ਤਾ, ਰੂਪਧਮ੍ਮਾਤਿ ਸਬ੍ਬਥਾ.
੬੧੮. ਅਭਿਞ੍ਞੇਯ੍ਯਾ ਸਭਾਵੇਨ, ਦ੍ਵਾਸਤ੍ਤਤਿ ਸਮੀਰਿਤਾ;
ਸਚ੍ਚਿਕਟ੍ਠਪਰਮਤ੍ਥਾ, ਵਤ੍ਥੁਧਮ੍ਮਾ ਸਲਕ੍ਖਣਾ.
੬੧੯. ਤੇਸਂ ਦਾਨਿ ਪਵਕ੍ਖਾਮਿ, ਸਬ੍ਬਸਙ੍ਗਾਹਿਕਂ ਨਯਂ;
ਆਭਿਧਮ੍ਮਿਕਭਿਕ੍ਖੂਨਂ, ਹਤ੍ਥਸਾਰਮਨੁਤ੍ਤਰਂ.
੬੨੦. ਦੁਕਾ ਤਿਕਾ ਚ ਖਨ੍ਧਾਯਤਨਤੋ ਧਾਤੁਸਚ੍ਚਤੋ;
ਪਟਿਚ੍ਚਸਮੁਪ੍ਪਾਦਾ ਚ, ਪਚ੍ਚਯਾ ਚ ਸਮਞ੍ਞਤੋ.
੬੨੧. ਪਚ੍ਚਯੋ ਏਵ ਨਿਬ੍ਬਾਨਮਪਚ੍ਚਯਮਸਙ੍ਖਤਂ;
ਅਸਙ੍ਖਾਰਮਨੁਪ੍ਪਾਦਂ, ਸਸ੍ਸਤਂ ਨਿਚ੍ਚਲਕ੍ਖਣਂ.
੬੨੨. ਪਚ੍ਚਯਾ ਚੇਵ ਸਙ੍ਖਾਰਾ, ਸਙ੍ਖਤਾ ਚ ਤਤੋਪਰੇ;
ਉਪ੍ਪਾਦਵਯਧਮ੍ਮਾ ਚ, ਪਚ੍ਚਯਟ੍ਠਿਤਿਕਾ ਤਥਾ.
੬੨੩. ਨਿਬ੍ਬਾਨਂ ਰੂਪਧਮ੍ਮਾ ਚ, ਵਿਪ੍ਪਯੁਤ੍ਤਾਵ ਕੇਵਲਂ;
ਆਰਮ੍ਮਣਾ ਏਵ ਨਾਮ, ਨਾਲਮ੍ਬਨ੍ਤਿ ਹਿ ਕਿਞ੍ਚਿਪਿ.
੬੨੪. ਏਕੁਪ੍ਪਾਦਨਿਰੋਧਾ ਚ, ਏਕਾਲਮ੍ਬਣਵਤ੍ਥੁਕਾ;
ਸਂਸਟ੍ਠਾ ਸਮ੍ਪਯੁਤ੍ਤਾ ਚ, ਸਹਜਾਤਾ ਯਥਾਰਹਂ.
੬੨੫. ਅਞ੍ਞਮਞ੍ਞੇਨੁਪਤ੍ਥਦ੍ਧਾ, ਸਬ੍ਬਤ੍ਥ ਸਹਵੁਤ੍ਤਿਨੋ;
ਸਾਰਮ੍ਮਣਾਰਮ੍ਮਣਾ ਚ, ਚਿਤ੍ਤਚੇਤਸਿਕਾ ਮਤਾ.
੬੨੬. ਵਿਪਸ੍ਸਨਾਯ ਭੂਮੀਤਿ, ਤਤ੍ਥ ਤੇਭੂਮਕਾ ਮਤਾ;
ਲੋਕਿਯਾ ਪਰਿਯਾਪਨ੍ਨਾ, ਵਟ੍ਟਧਮ੍ਮਾ ਸਉਤ੍ਤਰਾ.
੬੨੭. ਸਕ੍ਕਾਯਧਮ੍ਮਾ ਸਭਯਾ, ਤੀਰਮੋਰਿਮਨਾਮਕਂ;
ਸਂਯੋਜਨਿਯਾ ਸਮਲਾ, ਤਥਾ ਨੀਵਰਣੀਯਕਾ.
੬੨੮. ਸਂਕ੍ਲੇਸਿਕਾ ਪਰਾਮਟ੍ਠਾ, ਉਪਾਦਾਨੀਯਸਾਸਵਾ;
ਓਘਨੀਯਾ ਯੋਗਨੀਯਾ, ਗਨ੍ਥਨੀਯਾਤਿ ਭਾਸਿਤਾ.
੬੨੯. ਅਞ੍ਞੇ ਅਪਰਿਯਾਪਨ੍ਨਾ, ਵਿਵਟ੍ਟਾ ਚਾਵਿਪਸ੍ਸਿਯਾ;
ਲੋਕੁਤ੍ਤਰਾਨੁਤ੍ਤਰਾ ਚ, ਨੋਸਂਯੋਜਨਿਯਾਦਯੋ.
੬੩੦. ਕਮ੍ਮਜਾਤਾ ਉਪਾਦਿਨ੍ਨਾ, ਨਾਮ ਵੁਚ੍ਚਨ੍ਤਿ ਸਾਸਵਾ;
ਅਨੁਪਾਦਿਨ੍ਨਕਾ ਨਾਮ, ਤਤੋ ਸੇਸਾ ਪਵੁਚ੍ਚਰੇ.
੬੩੧. ਧਮ੍ਮਾ ਸਪ੍ਪਟਿਭਾਗਾਤਿ, ਕੁਸਲਾਕੁਸਲਾ ਮਤਾ;
ਅਪ੍ਪਟਿਭਾਗਧਮ੍ਮਾਤਿ, ਤਦਞ੍ਞੇ ਪਰਿਦੀਪਯੇ.
੬੩੨. ਸਰਣਾ ਚ ਪਹਾਤਬ੍ਬਾ, ਦ੍ਵਾਦਸਾਕੁਸਲਾ ਪਨ;
ਤਦਞ੍ਞੇ ਅਰਣਾ ਨਾਮ, ਪਹਾਤਬ੍ਬਾ ਨ ਕੇਹਿਚਿ.
੬੩੩. ਰੂਪਿਨੋ ਰੂਪਧਮ੍ਮਾ ਚ, ਨਾਮਧਮ੍ਮਾ ਅਰੂਪਿਨੋ;
ਏਵਮਾਦਿਪ੍ਪਭੇਦੇਨ, ਦ੍ਵਿਧਾ ਭੇਦਂ ਵਿਭਾਵਯੇ.
੬੩੪. ਬਾਲਾ ਧਮ੍ਮਾ ਤਪਨੀਯਾ, ਕਣ੍ਹਾ ਚ ਕਟੁਕਪ੍ਫਲਾ;
ਅਸੇਵਿਤਬ੍ਬਾ ਸਾਵਜ੍ਜਾ, ਦ੍ਵਾਦਸਾਕੁਸਲਾ ਮਤਾ.
੬੩੫. ਪਣ੍ਡਿਤਾ ਚਾਤਪਨੀਯਾ, ਸੁਕ੍ਕਾ ਚ ਸੁਖਦਾਯਕਾ;
ਸੇਵਿਤਬ੍ਬਾਨਵਜ੍ਜਾ ਚ, ਕੁਸਲਾ ਏਕਵੀਸਤਿ.
੬੩੬. ਕ੍ਰਿਯਾ ਵਿਪਾਕਾ ਰੂਪਞ੍ਚ, ਨਿਬ੍ਬਾਨਨ੍ਤਿ ਚਤੁਬ੍ਬਿਧਾ;
ਵੁਤ੍ਤਾ ਅਬ੍ਯਾਕਤਾ ਨਾਮ, ਧਮ੍ਮਾ ਤਬ੍ਬਿਪਰੀਤਤੋ.
੬੩੭. ਹੀਨਾ ਧਮ੍ਮਾ ਪਰਿਤ੍ਤਾ ਚ, ਕਾਮਾਵਚਰਭੂਮਿਕਾ;
ਰੂਪਾਰੂਪਾ ਪਵੁਚ੍ਚਨ੍ਤਿ, ਮਜ੍ਝਿਮਾ ਚ ਮਹਗ੍ਗਤਾ.
੬੩੮. ਅਪ੍ਪਮਾਣਾ ਪਣੀਤਾ ਚ, ਧਮ੍ਮਾ ਲੋਕੁਤ੍ਤਰਾ ਮਤਾ;
ਸਂਕਿਲਿਟ੍ਠਸਂਕ੍ਲੇਸਿਕਾ, ਦ੍ਵਾਦਸਾਕੁਸਲਾ ਤਥਾ.
੬੩੯. ਅਸਂਕਿਲਿਟ੍ਠਸਂਕ੍ਲੇਸਿਕਾ, ਧਮ੍ਮਾ ਤੇਭੂਮਕਾਪਰੇ;
ਅਸਂਕ੍ਲਿਟ੍ਠਾਸਂਕ੍ਲੇਸਿਕਾ, ਨਵ ਲੋਕੁਤ੍ਤਰਾ ਸਿਯੁਂ.
੬੪੦. ਵਿਪਾਕਾ ਤੇ ਪਵੁਚ੍ਚਨ੍ਤਿ, ਵਿਪਾਕਾ ਚਤੁਭੂਮਕਾ;
ਵਿਪਾਕਧਮ੍ਮਾ ਨਾਮਾਤਿ, ਕੁਸਲਾਕੁਸਲਾ ਮਤਾ.
੬੪੧. ਕ੍ਰਿਯਾ ਰੂਪਞ੍ਚ ਨਿਬ੍ਬਾਨਂ, ਨ ਪਾਕਂ ਨ ਤੁ ਪਚ੍ਚਤਿ;
ਆਚਯਗਾਮਿਨੋ ਧਮ੍ਮਾ, ਪੁਞ੍ਞਾਪੁਞ੍ਞਾਵ ਸਾਸਵਾ.
੬੪੨. ਵੁਤ੍ਤਾਪਚਯਗਾਮਿਨੋ, ਕੁਸਲਾਨੁਤ੍ਤਰਾ ਪਨ;
ਕ੍ਰਿਯਾ ਰੂਪਞ੍ਚ ਨਿਬ੍ਬਾਨਂ, ਪਾਕਾ ਚੋਭਯਵਜ੍ਜਿਤਾ.
੬੪੩. ਪਠਮਾਨੁਤ੍ਤਰੋ ਮਗ੍ਗੋ, ਦਸ੍ਸਨਂ ਭਾਵਨਾਪਰੇ;
ਤਦਞ੍ਞੇ ਦ੍ਵਯਨਿਮ੍ਮੁਤ੍ਤਾ, ਸਬ੍ਬੇਪਿ ਪਰਮਤ੍ਥਤੋ.
੬੪੪. ਸਤ੍ਤ ਲੋਕੁਤ੍ਤਰਾ ਹੇਟ੍ਠਾ, ਵੁਤ੍ਤਾ ਸੇਕ੍ਖਾਤਿ ਤਾਦਿਨਾ;
ਅਰਹਤ੍ਤਫਲਮੇਵ, ਅਸੇਕ੍ਖਨ੍ਤਿ ਪਕਾਸਿਤਂ.
੬੪੫. ਲੋਕਿਯਾਪਿ ਚ ਨਿਬ੍ਬਾਨਂ, ਭਾਸਿਤੋਭਯਵਜ੍ਜਿਤਾ;
ਏਵਮਾਦਿਪ੍ਪਕਾਰੇਹਿ, ਤਿਵਿਧਾਤਿ ਵਿਭਾਵਯੇ.
੬੪੬. ਅਤੀਤਾਨਾਗਤਂ ਰੂਪਂ, ਪਚ੍ਚੁਪ੍ਪਨ੍ਨਮਥਾਪਰਂ;
ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ, ਸੁਖੁਮੋਲ਼ਾਰਿਕਂ ਤਥਾ.
੬੪੭. ਹੀਨਂ ਪਣੀਤਂ ਯਂ ਦੂਰੇ, ਸਨ੍ਤਿਕੇ ਵਾ ਤਦੇਕਤੋ;
ਸਬ੍ਬਂ ਰੂਪਂ ਸਮੋਧਾਯ, ਰੂਪਕ੍ਖਨ੍ਧੋਤਿ ਵੁਚ੍ਚਤਿ.
੬੪੮. ਤਥੇਵ ਵੇਦਨਾਕ੍ਖਨ੍ਧੋ, ਨਾਮ ਯਾ ਕਾਚਿ ਵੇਦਨਾ;
ਸਞ੍ਞਾਕ੍ਖਨ੍ਧੋਤਿ ਸਞ੍ਞਾ ਚ, ਰਾਸਿਭਾਵੇਨ ਭਾਸਿਤਾ.
੬੪੯. ਵਟ੍ਟਧਮ੍ਮੇਸੁ ਅਸ੍ਸਾਦਂ, ਤਦਸ੍ਸਾਦੋਪਸੇਵਨਂ;
ਵਿਨਿਭੁਜ੍ਜ ਨਿਦਸ੍ਸੇਤੁਂ, ਖਨ੍ਧਦ੍ਵਯਮੁਦਾਹਟਂ.
੬੫੦. ਵਿਵਾਦਮੂਲਸਂਸਾਰ-ਕਮਹੇਤੁਨਿਦਸ੍ਸਨਂ;
ਸਨ੍ਧਾਯ ਵੇਦਨਾ ਸਞ੍ਞਾ, ਕਤਾ ਨਾਨਾਤਿ ਕੇਚਨ.
੬੫੧. ਚਿਤ੍ਤਸਂਸਟ੍ਠਧਮ੍ਮਾਨਂ, ਚੇਤਨਾਮੁਖਤੋ ਪਨ;
ਸਙ੍ਖਾਰਕ੍ਖਨ੍ਧਨਾਮੇਨ, ਧਮ੍ਮਾ ਚੇਤਸਿਕਾ ਮਤਾ.
੬੫੨. ਸਬ੍ਬਭੇਦਂ ਤਥਾ ਚਿਤ੍ਤਂ, ਵਿਞ੍ਞਾਣਕ੍ਖਨ੍ਧ ਸਮ੍ਮਤਂ;
ਭੇਦਾਭਾਵੇਨ ਨਿਬ੍ਬਾਨਂ, ਖਨ੍ਧਸਙ੍ਗਹਨਿਸ੍ਸਟਂ.
੬੫੩. ਆਲਮ੍ਬਨੀਯਭਾਵੇਨ, ਉਪਾਦਾਨੋਪਕਾਰਤੋ;
ਪਞ੍ਚੁਪਾਦਾਨਕ੍ਖਨ੍ਧਾਤਿ, ਲੋਕੁਤ੍ਤਰਵਿਵਜ੍ਜਿਤਾ.
੬੫੪. ਯਥਾ ਥੂਲਂ ਹਿਤਤ੍ਥਾਯ, ਪਰਿਗ੍ਗਾਹਕਯੋਗਿਨਂ;
ਧਮ੍ਮਾ ਤੇਭੂਮਕਾ ਏਕ-ਭੂਮਿਭਾਵਾਯ ਦੇਸਿਤਾ.
੬੫੫. ਭਾਜਨਂ ਭੋਜਨਂ ਤਸ੍ਸ, ਬ੍ਯਞ੍ਜਨਂ ਭੋਜਕੋ ਤਥਾ;
ਭੁਞ੍ਜਿਤਾ ਚਾਤਿ ਪਞ੍ਚੇਤੇ, ਉਪਮੇਨ੍ਤਿ ਯਥਾਕ੍ਕਮਂ.
੬੫੬. ਗਿਲਾਨਸਾਲਾ ਗੇਲਞ੍ਞਂ, ਅਸਪ੍ਪਾਯੋਪਸੇਵਨਾ;
ਸਮੁਟ੍ਠਾਨਂ ਗਿਲਾਨੋਤਿ, ਉਪਮੇਨ੍ਤਿ ਚ ਪਣ੍ਡਿਤਾ.
੬੫੭. ਚਾਰਕੋ ਕਾਰਣਂ ਤਤ੍ਥ, ਅਪਰਾਧੋ ਚ ਕਾਰਕੋ;
ਅਪਰਾਧਕਤੋ ਚੋਰੋ, ਇਤਿ ਚੋਪਮਿਤਾ ਪੁਨ.
੬੫੮. ਨਿਚ੍ਚਾਧਿਪੀਲ਼ਨਟ੍ਠੇਨ, ਭਾਰਾਤਿ ਪਰਿਦੀਪਿਤਾ;
ਕ੍ਲੇਸਦੁਕ੍ਖਮੁਖੇਨੇਤੇ, ਖਾਦਕਾ ਚ ਨਿਰਨ੍ਤਰਂ.
੬੫੯. ਅਨਤ੍ਥਾਵਹਿਤਾ ਨਿਚ੍ਚਮੁਕ੍ਖਿਤ੍ਤਾਸਿਕਵੇਰਿਨੋ;
ਮਚ੍ਚੁਮਾਰਾਭਿਧੇਯ੍ਯਤ੍ਤਾ, ਵਧਕਾਤਿ ਚ ਭਾਸਿਤਾ.
੬੬੦. ਵਿਮਦ੍ਦਾਸਹਨਂ ਰੂਪਂ, ਫੇਣਪਿਣ੍ਡਂਵ ਦੁਬ੍ਬਲਂ;
ਮੁਹੁਤ੍ਤਰਮਣੀਯਤ੍ਤਾ, ਵੇਦਨਾ ਬੁਬ੍ਬੁਲ਼ੂਪਮਾ.
੬੬੧. ਮਰੀਚਿਕੂਪਮਾ ਸਞ੍ਞਾ, ਵਿਪਲ੍ਲਾਸਕਭਾਵਤੋ;
ਸਙ੍ਖਾਰਾਪਿ ਚ ਨਿਸ੍ਸਾਰਾ, ਕਦਲਿਕ੍ਖਨ੍ਧਸਾਦਿਸਾ.
੬੬੨. ਨਾਨਪ੍ਪਕਾਰਂ ਚਿਨ੍ਤੇਨ੍ਤਂ, ਨਾਨਾਕ੍ਲੇਸਵਿਮੋਹਿਤਂ;
ਪਲਮ੍ਭਤੀਤਿ ਵਿਞ੍ਞਾਣਂ, ਮਾਯਾਸਮਮੁਦੀਰਿਤਂ.
੬੬੩. ਇਚ੍ਚੇਵਂ ਪਞ੍ਚੁਪਾਦਾਨਕ੍ਖਨ੍ਧਾ ਖਨ੍ਧਾ ਚ ਕੇਵਲਂ;
ਪਞ੍ਚਕ੍ਖਨ੍ਧਾਤਿ ਨਾਮੇਨ, ਦੇਸਿਤਾਤਿ ਵਿਭਾਵਯੇ.
੬੬੪. ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ, ਵਿਞ੍ਞਾਣੁਪ੍ਪਤ੍ਤਿਕਾਰਣਂ;
ਦ੍ਵਾਰਾਲਮ੍ਬਣਭੇਦੇਨ, ਦ੍ਵੇਧਾਯਤਨਮੀਰਿਤਂ.
੬੬੫. ਚਕ੍ਖਾਦਜ੍ਝਤ੍ਤਿਕਂ ਤਤ੍ਥ, ਛਦ੍ਵਾਰਾਯਤਨਂ ਭਵੇ;
ਬਾਹਿਰਾਯਤਨਂ ਨਾਮ, ਤਥਾ ਰੂਪਾਦਿਗੋਚਰਂ.
੬੬੬. ਇਤਿ ਵੀਥਿਪ੍ਪਵਤ੍ਤਾਨਂ, ਦ੍ਵਾਰਾਲਮ੍ਬਣਸਙ੍ਗਹੋ;
ਆਗਮੇ ਅਭਿਧਮ੍ਮੇ ਤੁ, ਸਬ੍ਬਥਾਪਿ ਯਥਾਰਹਂ.
੬੬੭. ਤਥਾਹਨਨ੍ਤਰਾਤੀਤੋ, ਜਾਯਮਾਨਸ੍ਸ ਪਚ੍ਛਤੋ;
ਮਨੋ ਸਬ੍ਬੋਪਿ ਸਬ੍ਬਸ੍ਸ, ਮਨਸ੍ਸਾਯਤਨਂ ਭਵੇ.
੬੬੮. ਤਥਾ ਪੁਬ੍ਬਙ੍ਗਮਟ੍ਠੇਨ, ਸਹਜਾਨਮਰੂਪਿਨਂ;
ਦ੍ਵਾਰਭਾਵੇਨ ਵਿਞ੍ਞਾਣਂ, ਸਬ੍ਬਮਾਯਤਨਂ ਮਤਂ.
੬੬੯. ਮਨਾਯਤਨਮਿਚ੍ਚੇਵਂ, ਪਸਾਦਾਯਤਨਂ ਤਥਾ;
ਪਞ੍ਚਵਿਞ੍ਞਾਣਧਮ੍ਮਾਨਂ, ਇਤਿ ਛਦ੍ਧਾ ਵਿਭਾਵਯੇ.
੬੭੦. ਪਞ੍ਚਪ੍ਪਸਾਦਵਿਸਯਾ, ਪਞ੍ਚਾਯਤਨਸਮ੍ਮਤਾ;
ਸੇਸਂ ਰੂਪਞ੍ਚ ਨਿਬ੍ਬਾਨਂ, ਸਬ੍ਬੇ ਚੇਤਸਿਕਾਤਿ ਚ.
੬੭੧. ਏਕੂਨਸਟ੍ਠਿਧਮ੍ਮਾਨਂ, ਧਮ੍ਮਾਯਤਨਸਙ੍ਗਹੋ;
ਇਤਿ ਛਦ੍ਧਾ ਪਕਾਸੇਨ੍ਤਿ, ਬਾਹਿਰਾਯਤਨਂ ਬੁਧਾ.
੬੭੨. ਸੁਞ੍ਞਗਾਮੋਵ ਦਟ੍ਠਬ੍ਬ-ਮਜ੍ਝਤ੍ਤਿਕਮਸਾਰਤੋ;
ਗਾਮਘਾਤਕਚੋਰਾਵ, ਤਂ ਹਨਨ੍ਤਂਵ ਬਾਹਿਰਂ.
੬੭੩. ਨਾਮਪ੍ਪਵਤ੍ਤਿਮੁਲ਼੍ਹਾਨਂ, ਤਦੁਪ੍ਪਤ੍ਤਿਕਕਾਰਣਂ;
ਦ੍ਵਾਦਸਾਯਤਨਾਨੀਤਿ, ਵੁਤ੍ਤਮਿਤ੍ਥਂ ਮਹੇਸਿਨਾ.
੬੭੪. ਸਮਤ੍ਤਾ ਭਾਵਮਤ੍ਤੇਨ, ਧਾਰੇਨ੍ਤੀਤਿ ਸਲਕ੍ਖਣਂ;
ਦ੍ਵਾਰਾਲਮ੍ਬਤਦੁਪ੍ਪਨ੍ਨ-ਪਰਿਯਾਯੇਨ ਭੇਦਿਤਾ.
੬੭੫. ਮਨਾਯਤਨਮੇਤ੍ਥਾਹ, ਸਤ੍ਤ ਵਿਞ੍ਞਾਣਧਾਤੁਯੋ;
ਏਕਾਦਸ ਯਥਾਵੁਤ੍ਤਾ, ਇਚ੍ਚਟ੍ਠਾਰਸ ਧਾਤੁਯੋ.
੬੭੬. ਅਨ੍ਤਾਦਿਕਾ ਮਨੋਧਾਤੁ, ਮਨੋਵਿਞ੍ਞਾਣਧਾਤੁਯਾ;
ਪਵੇਸਾਪਗਮੇ ਦ੍ਵਾਰ-ਪਰਿਯਾਯੇਨ ਤਿਟ੍ਠਤਿ.
੬੭੭. ਭੇਰੀਤਲਦਣ੍ਡਘੋਸ-ਸਮਂ ਛਕ੍ਕਂ ਯਥਾਕ੍ਕਮਂ;
ਕਟ੍ਠਾਰਣਿਪਾਵਕਾਦਿ-ਸਮਞ੍ਚ ਤਿਵਿਧਂ ਭਵੇ.
੬੭੮. ਦੁਕ੍ਖਂ ਸਮੁਦਯੋ ਚੇਵ, ਨਿਰੋਧੋ ਚ ਤਥਾਪਰੋ;
ਮਗ੍ਗੋ ਚਾਤਿ ਚਤੁਦ੍ਧਾਹ, ਸਚ੍ਚਂ ਸਚ੍ਚਪਰਕ੍ਕਮੋ.
੬੭੯. ਭਾਰੋ ਚ ਭਾਰਦਾਨਞ੍ਚ, ਭਾਰਨਿਕ੍ਖੇਪਨਂ ਤਥਾ;
ਭਾਰਨਿਕ੍ਖੇਪਨੂਪਾਯੋ, ਇਚ੍ਚੋਪਮ੍ਮਂ ਯਥਾਕ੍ਕਮਂ.
੬੮੦. ਰੋਗੋ ਰੋਗਨਿਦਾਨਞ੍ਚ, ਰੋਗਵੂਪਸਮੋ ਤਥਾ;
ਰੋਗਭੇਸਜ੍ਜਮਿਚ੍ਚੇਵ-ਮੁਪਮਾਹਿ ਚ ਦੀਪਿਤਂ.
੬੮੧. ਵਿਸਰੁਕ੍ਖੋ ਰੁਕ੍ਖਮੂਲਂ, ਰੁਕ੍ਖਚ੍ਛੇਦੋ ਤਥਾਪਰੋ;
ਰੁਕ੍ਖਚ੍ਛੇਦਕਸਤ੍ਥਨ੍ਤਿ, ਚਤੁਧੋਪਮਿਤਂ ਤਥਾ.
੬੮੨. ਤੀਰਮੋਰਿਮਸਙ੍ਖਾਤਂ, ਮਹੋਘੋ ਪਾਰਿਮਂ ਤਥਾ;
ਤਦਤਿਕ੍ਕਮੁਪਾਯੋਤਿ, ਉਪਮੇਨ੍ਤਿ ਚ ਤਂ ਬੁਧਾ.
੬੮੩. ਸਚ੍ਛਿਕਤ੍ਵਾਨ ਪਚ੍ਚਕ੍ਖ-ਮਿਚ੍ਚੋਪਮ੍ਮਂ ਯਥਾਕ੍ਕਮਂ;
ਸਮਾਚਿਕ੍ਖਿ ਵਿਮੋਕ੍ਖਾਯ, ਸਚ੍ਚਂ ਤਚ੍ਛਨਿਯਾਮਤੋ.
੬੮੪. ਤਥਾ ਹਿ ਦੁਕ੍ਖਂ ਨਾਬਾਧਂ, ਨਾਞ੍ਞਂ ਦੁਕ੍ਖਾ ਚ ਬਾਧਕਂ;
ਬਾਧਕਤ੍ਤਨਿਯਾਮੇਨ, ਦੁਕ੍ਖਸਚ੍ਚਮਿਤੀਰਿਤਂ.
੬੮੫. ਤਂ ਵਿਨਾ ਨਾਞ੍ਞਤੋ ਦੁਕ੍ਖਂ, ਨ ਹੋਤਿ ਨ ਚ ਤਂ ਤਤੋ;
ਦੁਕ੍ਖਹੇਤੁਨਿਯਾਮੇਨ, ਸਚ੍ਚਮਾਹ ਵਿਸਤ੍ਤਿਕਂ.
੬੮੬. ਨਾਞ੍ਞਾ ਨਿਬ੍ਬਾਨਤੋ ਸਨ੍ਤਿ, ਨ ਚ ਸਨ੍ਤਂ ਨ ਤਂ ਯਤੋ;
ਸਨ੍ਤਭਾਵਨਿਯਾਮੇਨ, ਨਿਬ੍ਬਾਨਂ ਸਚ੍ਚਮੁਤ੍ਤਮਂ.
੬੮੭. ਨਾਞ੍ਞਂ ਮਗ੍ਗਾਚ ਨਿਯ੍ਯਾਨਂ, ਅਨਿਯ੍ਯਾਨੋ ਨ ਚਾਪਿ ਸੋ;
ਤਸ੍ਮਾ ਨਿਯ੍ਯਾਨਭਾਵੇਨ, ਮਗ੍ਗੋ ਸਚ੍ਚਨ੍ਤਿ ਸਮ੍ਮਤੋ.
੬੮੮. ਇਤਿ ਤਚ੍ਛਾਵਿਪਲ੍ਲਾਸ-ਭੂਤਭਾਵੋ ਚਤੂਸੁਪਿ;
ਸਚ੍ਚਟ੍ਠੋਤਿ ਵਿਨਿਦ੍ਦਿਟ੍ਠੋ, ਦੁਕ੍ਖਾਦੀਸ੍ਵਵਿਸੇਸਤੋ.
੬੮੯. ਪੀਲ਼ਨਟ੍ਠੋ ਸਙ੍ਖਤਟ੍ਠੋ, ਸਨ੍ਤਾਪਟ੍ਠੋ ਚ ਭਾਸਿਤੋ;
ਵਿਪਰੀਣਾਮਟ੍ਠੋ ਚਾਤਿ, ਦੁਕ੍ਖਸ੍ਸੇਵਂ ਚਤੁਬ੍ਬਿਧਾ.
੬੯੦. ਆਯੂਹਨਾ ਨਿਦਾਨਾ ਚ, ਸਂਯੋਗਾ ਪਲਿਬੋਧਤੋ;
ਦੁਕ੍ਖਸ੍ਸਮੁਦਯਸ੍ਸਾਪਿ, ਚਤੁਧਤ੍ਥਾ ਪਕਾਸਿਤਾ.