੬. ਛਟ੍ਠੋ ਪਰਿਚ੍ਛੇਦੋ
ਰੂਪਵਿਭਾਗੋ
੪੮੧. ਇਤਿ ਪਞ੍ਚਪਰਿਚ੍ਛੇਦ-ਪਰਿਚ੍ਛਿਨ੍ਨਤ੍ਥਸਙ੍ਗਹਂ;
ਨਾਮਧਮ੍ਮਮਸੇਸੇਨ, ਵਿਭਾਵੇਤ੍ਵਾ ਸਭਾਵਤੋ.
੪੮੨. ਸਪ੍ਪਭੇਦਂ ਪਵਕ੍ਖਾਮਿ, ਰੂਪਧਮ੍ਮਮਿਤੋ ਪਰਂ;
ਭੂਤੋਪਾਦਾਯਭੇਦੇਨ, ਦੁਵਿਧਮ੍ਪਿ ਪਕਾਸਿਤਂ.
੪੮੩. ਉਦ੍ਦੇਸਲਕ੍ਖਣਾਦੀਹਿ, ਵਿਭਾਗਜਨਕਾ ਤਥਾ;
ਕਲਾਪੁਪ੍ਪਤ੍ਤਿਤੋ ਚਾਪਿ, ਯਥਾਨੁਕ੍ਕਮਤੋ ਕਥਂ?
੪੮੪. ਰੁਪ੍ਪਤੀਤਿ ਭਵੇ ਰੂਪਵਿਕਾਰਪ੍ਪਚ੍ਚਯੇਸਤਿ;
ਰੂਪਰੂਪਂ ਤਥਾ ਰੂਪਪਰਿਯਾਪਨ੍ਨਤੋਪਰਂ.
੪੮੫. ਭੂਤਰੂਪਂ ਤੁ ਪਥਵੀ, ਆਪੋ ਤੇਜੋ ਤਥਾਪਰੋ;
ਵਾਯੋ ਚ ਭਵਤੂਪਾਦਾਰੂਪਮੇਤ੍ਥਾਤਿ ਭਾਸਿਤਂ.
੪੮੬. ਭੂਤਰੂਪਮੁਪਾਦਾਯ, ਪਵਤ੍ਤਤਿ ਨ ਚਞ੍ਞਥਾ;
ਇਚ੍ਚੁਪਾਦਾਯਰੂਪਨ੍ਤਿ, ਰੂਪਂ ਸੇਸਮੁਦੀਰਿਤਂ.
੪੮੭. ਚਕ੍ਖੁ ਸੋਤਞ੍ਚ ਘਾਨਞ੍ਚ, ਜਿਵ੍ਹਾ ਕਾਯੋਤਿ ਪਞ੍ਚਧਾ;
ਪਸਾਦਰੂਪਮਕ੍ਖਾਤਂ, ਨੋਪਸਾਦਂ ਪਨੇਤਰਂ.
੪੮੮. ਰੂਪਸਦ੍ਦਗਨ੍ਧਰਸਾ, ਫੋਟ੍ਠਬ੍ਬਮਿਤਿ ਪਞ੍ਚਧਾ;
ਰੂਪਂ ਪਸਾਦਵਿਸਯਂ, ਪਸਾਦੋ ਗੋਚਰਂਪਰਂ.
੪੮੯. ਇਤ੍ਥਤ੍ਤਂ ਪੁਰਿਸਤ੍ਤਞ੍ਚ, ਭਾਵਰੂਪਮੁਦੀਰਿਤਂ;
ਜੀਵਿਤਿਨ੍ਦ੍ਰਿਯਰੂਪਨ੍ਤਿ, ਉਪਾਦਿਨ੍ਨਪਵਤ੍ਤਿਕਂ.
੪੯੦. ਵਤ੍ਥੁਰੂਪਂ ਤੁ ਹਦਯਂ, ਯਂ ਧਾਤੁਦ੍ਵਯਨਿਸ੍ਸਯਂ;
ਕਬਲ਼ੀਕਾਰਮਾਹਾਰਰੂਪਮਿਚ੍ਚਾਹੁ ਪਣ੍ਡਿਤਾ.
੪੯੧. ਰੂਪਧਮ੍ਮਸਭਾਵਤ੍ਤਾ, ਰੂਪਨ੍ਤਿ ਪਰਿਦੀਪਿਤਂ;
ਇਚ੍ਚੇਵਮਟ੍ਠਾਰਸਧਾ, ਰੂਪਰੂਪਮੁਦੀਰਿਤਂ.
੪੯੨. ਅਨਿਪ੍ਫਨ੍ਨਸਭਾਵਤ੍ਤਾ, ਰੂਪਾਕਾਰੋਪਲਕ੍ਖਿਤਂ;
ਅਨਿਪ੍ਫਨ੍ਨਂ ਨਾਮ ਰੂਪਂ, ਦਸਧਾ ਪਰਿਦੀਪਿਤਂ.
੪੯੩. ਰੂਪਪ੍ਪਰਿਚ੍ਛੇਦਂ ਰੂਪਮਿਚ੍ਚਾਕਾਸੋ ਪਕਾਸਿਤੋ;
ਕਾਯਬ੍ਬਚੀਵਿਞ੍ਞਤ੍ਤਿਕਂ, ਦ੍ਵਯਂ ਵਿਞ੍ਞਤ੍ਤਿਰੂਪਕਂ.
੪੯੪. ਲਹੁਤਾ ਮੁਦੁਤਾ ਕਮ੍ਮ-ਞ੍ਞਤਾ ਵਿਞ੍ਞਤ੍ਤਿਯਾ ਸਹ;
ਵਿਕਾਰਰੂਪਮਿਚ੍ਚਾਹੁ, ਪਞ੍ਚਧਾ ਚ ਵਿਭਾਵਿਨੋ.
੪੯੫. ਉਪਚਯੋ ਸਨ੍ਤਤਿ ਚ, ਜਰਤਾਨਿਚ੍ਚਤਾਤਿ ਚ;
ਚਤੁਧਾ ਲਕ੍ਖਣਰੂਪਂ, ਰੂਪਕਣ੍ਡੇ ਵਿਭਾਵਿਤਂ.
੪੯੬. ਇਚ੍ਚੇਵਮਟ੍ਠਵੀਸਤਿਵਿਧਾਨਿਪਿ ਵਿਚਕ੍ਖਣੋ;
ਰੂਪਾਨਿ ਲਕ੍ਖਣਾਦੀਹਿ, ਵਿਭਾਵੇਯ੍ਯ ਯਥਾਕ੍ਕਮਂ.
੪੯੭. ਖਰਤਾ ਪਥਵੀਧਾਤੁ, ਸਾਯਂ ਕਕ੍ਖਲ਼ਲਕ੍ਖਣਾ;
ਕਲਾਪਾਧਿਟ੍ਠਾਨਰਸਾ, ਪਟਿਗ੍ਗਾਹੋਤਿ ਗਯ੍ਹਤਿ.
੪੯੮. ਆਬਨ੍ਧਨਮਾਪੋਧਾਤੁ, ਸਾ ਪਗ੍ਘਰਣਲਕ੍ਖਣਾ;
ਕਲਾਪਾਬਨ੍ਧਨਰਸਾ, ਸਙ੍ਗਹਤ੍ਤੇਨ ਗਯ੍ਹਤਿ.
੪੯੯. ਤੇਜਨਤ੍ਤਂ ਤੇਜੋਧਾਤੁ, ਸਾਯਮੁਣ੍ਹਤ੍ਤਲਕ੍ਖਣਾ;
ਪਾਚਨਰਸਾ ਮਦ੍ਦਵਾ-ਨੁਪ੍ਪਾਦਨਨ੍ਤਿ ਗਯ੍ਹਤਿ.
੫੦੦. ਵਾਯੋਧਾਤੁ ਵਾਯਨਤ੍ਤਂ, ਸਾ ਵਿਤ੍ਥਮ੍ਭਨਲਕ੍ਖਣਾ;
ਸਮੀਰਣਰਸਾਭਿਨਿ-ਹਾਰਭਾਵੇਨ ਗਯ੍ਹਤਿ.
੫੦੧. ਸਬ੍ਬਤ੍ਥਾਵਿਨਿਭੁਤ੍ਤਾਪਿ, ਅਸਮ੍ਮਿਸ੍ਸਿਤਲਕ੍ਖਣਾ;
ਤਂਤਂਭਾਵਸਮੁਸ੍ਸਨ੍ਨਸਮ੍ਭਾਰੇਸੁਪਲਕ੍ਖਿਤਾ.
੫੦੨. ਅਞ੍ਞਮਞ੍ਞੇਨੁਪਤ੍ਥਦ੍ਧਾ, ਸੇਸਰੂਪਸ੍ਸ ਨਿਸ੍ਸਯਾ;
ਚਤੁਦ੍ਧੇਵਂ ਕਲਾਪੇਸੁ, ਮਹਾਭੂਤਾ ਪਵਤ੍ਤਰੇ.
੫੦੩. ਚਕ੍ਖੁ ਸਮ੍ਭਾਰਚਕ੍ਖੁਮ੍ਹਿ, ਸਤ੍ਤਕ੍ਖਿਪਟਲੋਚਿਤੇ;
ਕਣ੍ਹਮਣ੍ਡਲਮਜ੍ਝਮ੍ਹਿ, ਪਸਾਦੋਤਿ ਪਵੁਚ੍ਚਤਿ.
੫੦੪. ਯੇਨ ਚਕ੍ਖੁਪਸਾਦੇਨ, ਰੂਪਾਨਿ ਅਨੁਪਸ੍ਸਤਿ;
ਪਰਿਤ੍ਤਂ ਸੁਖੁਮਂ ਚੇਤਂ, ਊਕਾਸਿਰਸਮੂਪਮਂ.
੫੦੫. ਸੋਤਂ ਸੋਤਬਿਲਸ੍ਸਨ੍ਤੋ,
ਤਮ੍ਬਲੋਮਾਚਿਤੇ ਤਥਾ;
ਅਙ੍ਗੁਲਿਵੇਧਨਾਕਾਰੇ,
ਪਸਾਦੋਤਿ ਪਵੁਚ੍ਚਤਿ.
੫੦੬. ਅਨ੍ਤੋ ਅਜਪਦਟ੍ਠਾਨੇ, ਘਾਨਂ ਘਾਨਬਿਲੇ ਠਿਤਂ;
ਜਿਵ੍ਹਾ ਜਿਵ੍ਹਾਯ ਮਜ੍ਝਮ੍ਹਿ, ਉਪ੍ਪਲਾਕਾਰਸਨ੍ਨਿਭੇ.
੫੦੭. ਇਚ੍ਚੇਵਂ ਪਨ ਚਤ੍ਤਾਰੋ, ਤਂਤਂਦੇਸਵਵਤ੍ਥਿਤਾ;
ਕਾਯਪ੍ਪਸਾਦੋ ਕਾਯਮ੍ਹਿ, ਉਪਾਦਿਨ੍ਨੇਤਿ ਪਞ੍ਚਧਾ.
੫੦੮. ਕਪ੍ਪਾਸਪਟਲਸ੍ਨੇਹ-ਸਨ੍ਨਿਭਾ ਭੂਤਨਿਸ੍ਸਿਤਾ;
ਪਸਾਦਾ ਜੀਵਿਤਾਰਕ੍ਖਾ, ਰੂਪਾਦਿਪਰਿਵਾਰਿਤਾ.
੫੦੯. ਧੀਤਾ ਰਾਜਕੁਮਾਰਾਵ, ਕਲਾਪਨ੍ਤਰਵੁਤ੍ਤਿਨੋ;
ਦ੍ਵਾਰਭੂਤਾਵ ਪਚ੍ਚੇਕਂ, ਪਞ੍ਚਵਿਞ੍ਞਾਣਵੀਥਿਯਾ.
੫੧੦. ਰੂਪਾਦਾਭਿਘਾਤਾਰਹਭੂਤਾਨਂ ਵਾ ਯਥਾਕ੍ਕਮਂ;
ਦਟ੍ਠੁਕਾਮਨਿਦਾਨਾਦਿਕਮ੍ਮਭੂਤਾਨਮੇਵ ਵਾ.
੫੧੧. ਪਸਾਦਲਕ੍ਖਣਾ ਰੂਪਾ-ਦਾਵਿਞ੍ਜਨਰਸਾ ਤਥਾ;
ਪਞ੍ਚਵਿਞ੍ਞਾਣਯੁਗਲ਼ਂ, ਦ੍ਵਾਰਭਾਵੇਨ ਗਯ੍ਹਰੇ.
੫੧੨. ਰੂਪਂ ਨਿਭਾਸੋ ਭੂਤਾਨਂ, ਸਦ੍ਦੋ ਨਿਗ੍ਘੋਸਨਂ ਤਥਾ;
ਗਨ੍ਧੋਵ ਗਨ੍ਧਨਂ ਤਤ੍ਥ, ਰਸੋ ਚ ਰਸਨੀਯਤਾ.
੫੧੩. ਇਚ੍ਚੇਵਂ ਪਨ ਚਤ੍ਤਾਰੋ, ਗੋਚਰਾ ਭੂਤਨਿਸ੍ਸਿਤਾ;
ਭੂਤਤ੍ਤਯਞ੍ਚ ਫੋਟ੍ਠਬ੍ਬਮਾਪੋਧਾਤੁਵਿਵਜ੍ਜਿਤਂ.
੫੧੪. ਸਦ੍ਦੋ ਅਨਿਯਤੋ ਤਤ੍ਥ, ਤਦਞ੍ਞੋ ਸਹਵੁਤ੍ਤਿਨੋ;
ਤਂਤਂਸਭਾਵਭੇਦੇਨ, ਤਂਤਂਦ੍ਵਾਰੋਪਲਕ੍ਖਿਤੋ.
੫੧੫. ਪਞ੍ਚੇਵ ਪਞ੍ਚਵਿਞ੍ਞਾਣਵੀਥਿਯਾ ਵਿਸਯਾ ਮਤਾ;
ਚਕ੍ਖਾਦਿਪਟਿਹਨਨਲਕ੍ਖਣਾਵ ਯਥਾਕ੍ਕਮਂ.
੫੧੬. ਪਞ੍ਚਵਿਞ੍ਞਾਣਯੁਗਲ਼ਾਲਮ੍ਬਭਾਵਰਸਾ ਤਥਾ;
ਪਞ੍ਚਵਿਞ੍ਞਾਣਯੁਗਲ਼ਂ, ਗੋਚਰਤ੍ਤੇਨ ਗਯ੍ਹਰੇ.
੫੧੭. ਇਤ੍ਥਿਨ੍ਦ੍ਰਿਯਂ ਪਨਿਤ੍ਥਤ੍ਤਮਿਤ੍ਥਿਭਾਵੋਤਿ ਭਾਸਿਤੋ;
ਪੁਰਿਸਤ੍ਤਂ ਤਥਾ ਭਾਵੋ, ਪੁਰਿਸਿਨ੍ਦ੍ਰਿਯਨਾਮਕੋ.
੫੧੮. ਤਂ ਦ੍ਵਯਂ ਪਨੁਪਾਦਿਨ੍ਨਕਾਯੇ ਸਬ੍ਬਤ੍ਥ ਲਬ੍ਭਤਿ;
ਕਲਾਪਨ੍ਤਰਭਿਨ੍ਨਞ੍ਚ, ਭਿਨ੍ਨਸਨ੍ਤਾਨਵੁਤ੍ਤਿ ਚ.
੫੧੯. ਵਸੇ ਵਤ੍ਤੇਤਿ ਲਿਙ੍ਗਾਨ-ਮਿਤ੍ਥਿਪੁਮ੍ਭਾਵਲਕ੍ਖਣਂ;
ਇਤ੍ਥੀਤਿ ਚ ਪੁਰਿਸੋਤਿ, ਪਕਾਸਨਰਸਂ ਤਥਾ.
੫੨੦. ਇਤ੍ਥੀਨਂ ਪੁਰਿਸਾਨਞ੍ਚ, ਲਿਙ੍ਗਸ੍ਸ ਚ ਯਥਾਕ੍ਕਮਂ;
ਨਿਮਿਤ੍ਤਕੁਤ੍ਤਾਕਪ੍ਪਾਨਂ, ਕਾਰਣਤ੍ਤੇਨ ਗਯ੍ਹਤਿ.
੫੨੧. ਸਤ੍ਤਾ ਮਰਨ੍ਤਿ ਨਾਸੇਨ, ਯਸ੍ਸ ਪਾਣਨ੍ਤਿ ਵੁਤ੍ਤਿਯਾ;
ਸਜੀਵਮਤਕਾਯਾਨਂ, ਭੇਦੋ ਯੇਨੋਪਲਕ੍ਖਿਤੋ.
੫੨੨. ਤਦੇਤਂ ਕਮ੍ਮਜਾਤਾਨ-ਮਨੁਪਾਲਨਲਕ੍ਖਣਂ;
ਜੀਵਿਤਂ ਜੀਵਨਰਸਂ, ਆਯੁਬਦ੍ਧੋਤਿ ਗਯ੍ਹਤਿ.
੫੨੩. ਮਨੋਧਾਤੁਯਾ ਚ ਤਥਾ, ਮਨੋਵਿਞ੍ਞਾਣਧਾਤੁਯਾ;
ਨਿਸ੍ਸਯਲਕ੍ਖਣਂ ਵਤ੍ਥੁ-ਰੂਪਂ ਹਦਯਸਮ੍ਮਤਂ.
੫੨੪. ਸਮਾਧਾਨਰਸਂ ਤਾਸ-ਮੁਬ੍ਬਾਹਤ੍ਤੇਨ ਗਯ੍ਹਤਿ;
ਯਸ੍ਮਿਂ ਕੁਪ੍ਪਿਤਕਾਲਮ੍ਹਿ, ਵਿਕ੍ਖਿਤ੍ਤਾ ਹੋਨ੍ਤਿ ਪਾਣਿਨੋ.
੫੨੫. ਕਾਯੋ ਯਸ੍ਸਾਨੁਸਾਰੇਨ, ਚਿਤ੍ਤਕ੍ਖੇਪੇਨ ਖਿਜ੍ਜਤਿ;
ਯਸ੍ਮਿਂ ਨਿਰੁਦ੍ਧੇ ਵਿਞ੍ਞਾਣ-ਸੋਤੋਪਿ ਚ ਨਿਰੁਜ੍ਝਤਿ.
੫੨੬. ਯਂ ਨਿਸ੍ਸਾਯ ਪਤਿਟ੍ਠਾਤਿ, ਪਟਿਸਨ੍ਧਿ ਭਵਨ੍ਤਰੇ;
ਤਦੇਤਂ ਕਮ੍ਮਸਮ੍ਭੂਤਂ, ਪਞ੍ਚਵੋਕਾਰਭੂਮਿਯਂ.
੫੨੭. ਮਜ੍ਝੇ ਹਦਯਕੋਸਮ੍ਹਿ, ਅਡ੍ਢਪਸਤਲੋਹਿਤੇ;
ਭੂਤਰੂਪਮੁਪਾਦਾਯ, ਚਕ੍ਖਾਦਿ ਵਿਯ ਵਤ੍ਤਤਿ.
੫੨੮. ਕਬਲ਼ੀਕਾਰੋ ਆਹਾਰੋ, ਰੂਪਾਹਰਣਲਕ੍ਖਣੋ;
ਕਾਯਾਨੁਯਾਪਨਰਸੋ, ਉਪਤ੍ਥਮ੍ਭੋਤਿ ਗਯ੍ਹਤਿ.
੫੨੯. ਓਜਾਯ ਯਾਯ ਯਾਪੇਨ੍ਤਿ, ਆਹਾਰਸ੍ਨੇਹਸਤ੍ਤਿਯਾ;
ਪਾਣਿਨੋ ਕਾਮਲੋਕਮ੍ਹਿ, ਸਾਯਮੇਵਂ ਪਵੁਚ੍ਚਤਿ.
੫੩੦. ਆਕਾਸਧਾਤੁ ਰੂਪਾਨਂ, ਪਰਿਯੋਸਾਨਲਕ੍ਖਣਾ;
ਪਰਿਚ੍ਛੇਦਰਸਾ ਰੂਪਮਰਿਯਾਦੋਤਿ ਗਯ੍ਹਤਿ.
੫੩੧. ਸਲਕ੍ਖਣਪਰਿਚ੍ਛਿਨ੍ਨਰੂਪਧਮ੍ਮਪਰਿਗ੍ਗਹੇ;
ਯੋਗੀਨਮੁਪਕਾਰਾਯ, ਯਂ ਦੇਸੇਸਿ ਦਯਾਪਰੋ.
੫੩੨. ਪਰਿਚ੍ਛਿਨ੍ਨਸਭਾਵਾਨਂ, ਕਲਾਪਾਨਂ ਯਥਾਰਹਂ;
ਪਰਿਯਨ੍ਤਾਨਮੇਵੇਸ, ਤਦਾਕਾਰੋ ਪਵੁਚ੍ਚਤਿ.
੫੩੩. ਗਮਨਾਦਿਵਚੀਘੋਸਪਵਤ੍ਤਮ੍ਹਿ ਯਥਾਕ੍ਕਮਂ;
ਵਾਯੋਪਥਵਿਧਾਤੂਨਂ, ਯੋ ਵਿਕਾਰੋ ਸਮਤ੍ਥਤਾ.
੫੩੪. ਸਹਜੋਪਾਦਿਨ੍ਨਕਾਨਂ, ਕ੍ਰਿਯਾਵਾਚਾਪਵਤ੍ਤਿਯਾ;
ਵਿਪ੍ਫਨ੍ਦਘਟ੍ਟਨਾਹੇਤੁ, ਚਿਤ੍ਤਾਨੁਪਰਿਵਤ੍ਤਕੋ.
੫੩੫. ਸ ਵਿਕਾਰਵਿਸੇਸੋਯਂ, ਵਿਞ੍ਞਤ੍ਤੀਤਿ ਪਕਾਸਿਤੋ;
ਵਿਞ੍ਞਾਪੇਤੀਤਿ ਕਾਯੇਨ, ਵਾਚਾਯ ਚ ਵਿਚਿਨ੍ਤਿਤਂ.
੫੩੬. ਵਾਯੋਪਥਵਾਧਿਕਾਨਂ, ਭੂਤਾਨਮਿਤਿ ਕੇਚਨ;
ਪਵੁਤ੍ਤਾ ਤਾਦਿਨਾ ਕਾਯ-ਪਰਿਗ੍ਗਹਸੁਖਾਯ ਯਾ.
੫੩੭. ਕਾਯੋ ਯਸ੍ਸਾਨੁਭਾਵੇਨ,
ਸਹਾਭੋਗੋਵ ਖਾਯਤਿ;
ਯਂ ਨਿਰੋਧਾ ਪਰਾਭੂਤੋ,
ਸੇਤਿ ਨਿਚ੍ਚੇਤਨੋ ਯਥਾ.
੫੩੮. ਲੋਕੇ ਪਪਞ੍ਚਾ ਵਤ੍ਤਨ੍ਤਿ, ਬਹੁਧਾ ਯਾਯ ਨਿਮ੍ਮਿਤਾ;
ਕਪ੍ਪੇਨ੍ਤਿ ਕਾਯਮਤ੍ਤਾਨਂ, ਬਾਲਾ ਯਾਯ ਚ ਵਞ੍ਚਿਤਾ.
੫੩੯. ਸਾਯਂ ਕਾਯਵਚੀਕਮ੍ਮ-ਦ੍ਵਾਰਭਾਵੇਨ ਲਕ੍ਖਿਤਾ;
ਬ੍ਯਾਪਾਰਘਟ੍ਟਨਾਹੇਤੁ-ਵਿਕਾਰਾਕਾਰਲਕ੍ਖਣਾ.
੫੪੦. ਕਾਯਵਾਚਾਅਧਿਪ੍ਪਾਯ-ਪਕਾਸਨਰਸਾ ਤਥਾ;
ਕਾਯਵਿਪ੍ਫਨ੍ਦਘਟ੍ਟਨ-ਹੇਤੁਭਾਵੇਨ ਗਯ੍ਹਤਿ.
੫੪੧. ਲਹੁਤਾ ਪਨ ਰੂਪਾਨਂ, ਅਦਨ੍ਧਾਕਾਰਲਕ੍ਖਣਾ;
ਅਵਿਤ੍ਥਾਨਰਸਾ ਸਲ੍ਲ-ਹੁਕਵੁਤ੍ਤੀਤਿ ਗਯ੍ਹਤਿ.
੫੪੨. ਮੁਦੁਤਾਪਿ ਚ ਰੂਪਾਨਂ, ਕਕ੍ਖਲ਼ਾਭਾਵਲਕ੍ਖਣਾ;
ਕਿਚ੍ਚਾਵਿਰੁਜ੍ਝਨਰਸਾ, ਅਨੁਕੁਲ੍ਯਨ੍ਤਿ ਗਯ੍ਹਤਿ.
੫੪੩. ਕਮ੍ਮਞ੍ਞਤਾ ਚ ਰੂਪਾਨਂ, ਅਲਂਕਿਚ੍ਚਸ੍ਸ ਲਕ੍ਖਣਾ;
ਪਵਤ੍ਤਿਸਮ੍ਪਤ੍ਤਿਰਸਾ, ਯੋਗ੍ਗਭਾਵੋਤਿ ਗਯ੍ਹਤਿ.
੫੪੪. ਸਪ੍ਪਾਯਮੁਤੁਮਾਹਾਰਂ, ਲਦ੍ਧਾ ਚਿਤ੍ਤਮਨਾਮਯਂ;
ਲਹੂ ਮੁਦੁ ਚ ਕਮ੍ਮਞ੍ਞਂ, ਯਦਾ ਰੂਪਂ ਪਵਤ੍ਤਤਿ.
੫੪੫. ਤਥਾ ਪਵਤ੍ਤਰੂਪਸ੍ਸ, ਪਵਤ੍ਤਾਕਾਰਭੇਦਿਤਂ;
ਲਹੁਤਾਦਿਤ੍ਤਯਮ੍ਪੇਤਂ, ਸਹਵੁਤ੍ਤਿ ਤਦਾ ਭਵੇ.
੫੪੬. ਸਪ੍ਪਾਯਪਟਿਵੇਧਾਯ, ਪਟਿਪਤ੍ਤੁਪਕਾਰਿਕਾ;
ਸਾਕਾਰਾ ਰੂਪਸਮ੍ਪਤ੍ਤਿ, ਪਞ੍ਞਤ੍ਤੇਵਂ ਮਹੇਸਿਨਾ.
੫੪੭. ਰੂਪਸ੍ਸੋਪਚਯੋ ਨਾਮ, ਰੂਪਸ੍ਸਾਚਯਲਕ੍ਖਣੋ;
ਰੂਪੁਮ੍ਮੁਜ੍ਜਾਪਨਰਸੋ, ਪਾਰਿਪੂਰੀਤਿ ਗਯ੍ਹਤਿ.
੫੪੮. ਪਵਤ੍ਤਿਲਕ੍ਖਣਾ ਰੂਪ-ਸਨ੍ਤਤੀਤਿ ਪਕਾਸਿਤਾ;
ਅਨੁਪ੍ਪਬਨ੍ਧਨਰਸਾ, ਅਵਿਚ੍ਛੇਦੋਤਿ ਗਯ੍ਹਤਿ.
੫੪੯. ਰੂਪਮਾਚਯਰੂਪੇਨ, ਜਾਯਤਿਚ੍ਚੁਪਰੂਪਰਿ;
ਪੇਕ੍ਖਤੋਪਚਾਯਾਕਾਰਾ, ਜਾਤਿ ਗਯ੍ਹਤਿ ਯੋਗਿਨਾ.
੫੫੦. ਅਨੁਪ੍ਪਬਨ੍ਧਾਕਾਰੇਨ, ਜਾਯਤੀਤਿ ਸਮੇਕ੍ਖਤੋ;
ਤਦਾਯਂ ਸਨ੍ਤਤਾਕਾਰਾ, ਸਮੁਪਟ੍ਠਾਸਿ ਚੇਤਸਿ.
੫੫੧. ਏਵਮਾਭੋਗਭੇਦੇਨ, ਜਾਤਿਰੂਪਂ ਦ੍ਵਿਧਾ ਕਤਂ;
ਅਤ੍ਥੂਪਲਦ੍ਧਿਭਾਵੇਨ, ਜਾਯਨ੍ਤਂ ਵਾਥ ਕੇਵਲਂ.
੫੫੨. ਰੂਪਵਿਵਿਤ੍ਤਮੋਕਾਸਂ, ਪੁਰਕ੍ਖਤ੍ਤੇਨ ਚੀਯਤਿ;
ਅਭਾਵਾ ਪਨ ਭਾਵਾਯ, ਪਵਤ੍ਤਮਿਤਿ ਸਨ੍ਤਤਿ.