੫. ਪਞ੍ਚਮੋ ਪਰਿਚ੍ਛੇਦੋ
ਕਮ੍ਮਵਿਭਾਗੋ
੩੨੮. ਵਿਭਾਗਂ ਪਨ ਕਮ੍ਮਾਨਂ,
ਪਵਕ੍ਖਾਮਿ ਇਤੋ ਪਰਂ;
ਕਮ੍ਮਪਾਕਕ੍ਰਿਯਾਭੇਦੇ,
ਅਮੋਹਾਯ ਸਮਾਸਤੋ.
੩੨੯. ਕਮ੍ਮਪਚ੍ਚਯਕਮ੍ਮਨ੍ਤਿ, ਚੇਤਨਾਵ ਸਮੀਰਿਤਾ;
ਤਤ੍ਥਾਪਿ ਨਾਨਕ੍ਖਣਿਕਾ, ਪੁਞ੍ਞਾਪੁਞ੍ਞਾਵ ਚੇਤਨਾ.
੩੩੦. ਦੇਤਿ ਪਾਕਮਧਿਟ੍ਠਾਯ, ਸਮ੍ਪਯੁਤ੍ਤੇ ਯਥਾਰਹਂ;
ਕਮ੍ਮਸ੍ਸਾਯੂਹਨਟ੍ਠੇਨ, ਪਵਤ੍ਤਤ੍ਤਾ ਹਿ ਚੇਤਨਾ.
੩੩੧. ਕ੍ਲੇਸਾਨੁਸਯਸਨ੍ਤਾਨੇ, ਪਾਕਧਮ੍ਮਾ ਹਿ ਜਾਯਰੇ;
ਪਹੀਨਾਨੁਸਯਾਨਂ ਤੁ, ਕ੍ਰਿਯਾਮਤ੍ਤਂ ਪਵਤ੍ਤਤਿ.
੩੩੨. ਮੂਲਭਾਵਾ ਚ ਸਬ੍ਬੇਸਂ, ਤਥੇਵਾਵਜ੍ਜਨਦ੍ਵਯਂ;
ਜਨਿਤਾਨਿ ਚ ਕਮ੍ਮੇਹਿ, ਵਿਪਾਕਾਨਿ ਪਵਤ੍ਤਰੇ.
੩੩੩. ਚਿਤ੍ਤੁਪ੍ਪਾਦਵਸੇਨੇਵ, ਕਮ੍ਮਂ ਤੇਤ੍ਤਿਂਸਧਾ ਠਿਤਂ;
ਕਮ੍ਮਚਤੁਕ੍ਕਭੇਦੇਹਿ, ਵਿਭਾਵੇਯ੍ਯ ਵਿਚਕ੍ਖਣੋ.
੩੩੪. ਪਚ੍ਚੁਪ੍ਪਨ੍ਨਾਦਿਕਣ੍ਹਾਦਿ-ਜਨਕਾਦਿਗਰਾਦਿਤੋ;
ਦਿਟ੍ਠਧਮ੍ਮਾਦਿਕਾਮਾਦਿ-ਭੇਦਾ ਛਧਾ ਯਥਾਕ੍ਕਮਂ.
੩੩੫. ਯਂ ਪਾਪਂ ਸੁਖਵੋਕਿਣ੍ਣਂ, ਅਕਿਚ੍ਛੇਨ ਕਰੀਯਤਿ;
ਪਚ੍ਚੁਪ੍ਪਨ੍ਨਸੁਖਂ ਕਮ੍ਮਂ, ਆਯਤਿਂ ਦੁਕ੍ਖਪਾਕਜਂ.
੩੩੬. ਕਿਚ੍ਛੇਨ ਦੁਕ੍ਖਵੋਕਿਣ੍ਣਂ, ਯਦਿ ਪਾਪਂ ਕਰੀਯਤਿ;
ਪਚ੍ਚੁਪ੍ਪਨ੍ਨੇ ਚ ਤਂ ਦੁਕ੍ਖਂ, ਆਯਤਿਂ ਦੁਕ੍ਖਪਾਕਜਂ.
੩੩੭. ਕਿਚ੍ਛੇਨ ਦੁਕ੍ਖਵੋਕਿਣ੍ਣਂ, ਯਦਿ ਪੁਞ੍ਞਂ ਕਰੀਯਤਿ;
ਪਚ੍ਚੁਪ੍ਪਨ੍ਨਮ੍ਹਿ ਤਂ ਦੁਕ੍ਖਂ, ਆਯਤਿਂ ਸੁਖਪਾਕਜਂ.
੩੩੮. ਯਂ ਪੁਞ੍ਞਂ ਸੁਖਵੋਕਿਣ੍ਣਂ, ਅਕਿਚ੍ਛੇਨ ਕਰੀਯਤਿ;
ਪਚ੍ਚੁਪ੍ਪਨ੍ਨਸੁਖਞ੍ਚੇਵ, ਆਯਤਿਂ ਸੁਖਪਾਕਜਂ.
੩੩੯. ਵਿਸਸਂਸਟ੍ਠਮਧੁਰਂ, ਸਵਿਸਂ ਤਿਤ੍ਤਕਂ ਤਥਾ;
ਗੋਮੁਤ੍ਤਮਧੁਭੇਸਜ੍ਜ-ਮਿਚ੍ਚੋਪਮ੍ਮਂ ਯਥਾਕ੍ਕਮਂ.
੩੪੦. ਸਮਾਦਾਨੇ ਵਿਪਾਕੇ ਚ, ਸੁਖਦੁਕ੍ਖਪ੍ਪਭੇਦਿਤਂ;
ਕਮ੍ਮਮੇਵਂ ਚਤੁਦ੍ਧਾਤਿ, ਪਕਾਸੇਨ੍ਤਿ ਤਥਾਗਤਾ.
੩੪੧. ਆਨਨ੍ਤਰਿਯਕਮ੍ਮਾਦਿ, ਏਕਨ੍ਤਕਟੁਕਾਵਹਂ;
ਕਣ੍ਹਂ ਕਣ੍ਹਵਿਪਾਕਨ੍ਤਿ, ਕਮ੍ਮਂ ਦੁਗ੍ਗਤਿਗਾਮਿਕਂ.
੩੪੨. ਪਠਮਜ੍ਝਾਨਕਮ੍ਮਾਦਿ, ਏਕਨ੍ਤੇਨ ਸੁਖਾਵਹਂ;
ਸੁਕ੍ਕਂ ਸੁਕ੍ਕਵਿਪਾਕਨ੍ਤਿ, ਕਮ੍ਮਂ ਸਗ੍ਗੂਪਪਤ੍ਤਿਕਂ.
੩੪੩. ਵੋਕਿਣ੍ਣਕਮ੍ਮ ਵੋਕਿਣ੍ਣ-ਸੁਖਦੁਕ੍ਖੂਪਪਤ੍ਤਿਕਂ;
ਕਣ੍ਹਸੁਕ੍ਕਂ ਕਣ੍ਹਸੁਕ੍ਕ-ਵਿਪਾਕਨ੍ਤਿ ਸਮੀਰਿਤਂ.
੩੪੪. ਅਕਣ੍ਹਸੁਕ੍ਕਮੀਰੇਨ੍ਤਿ, ਅਕਣ੍ਹਸੁਕ੍ਕਪਾਕਦਂ;
ਕਮ੍ਮਂ ਲੋਕੁਤ੍ਤਰਂ ਲੋਕੇ, ਗਤਿਕਮ੍ਮਕ੍ਖਯਾਵਹਂ.
੩੪੫. ਇਤਿ ਵਟ੍ਟਪ੍ਪਵਤ੍ਤਮ੍ਹਿ, ਕ੍ਲੇਸਵੋਦਾਨਭੇਦਿਤਂ;
ਕਮ੍ਮਕ੍ਖਯੇਨ ਸਙ੍ਗਯ੍ਹ, ਚਤੁਧਾ ਕਮ੍ਮਮੀਰਿਤਂ.
੩੪੬. ਜਨਕਞ੍ਚੇਵੁਪਤ੍ਥਮ੍ਭ-ਮੁਪਪੀਲ਼ੋਪਘਾਤਕਂ;
ਚਤੁਧਾ ਕਿਚ੍ਚਭੇਦੇਨ, ਕਮ੍ਮਮੇਵਂ ਪਵੁਚ੍ਚਤਿ.
੩੪੭. ਜਨੇਤਿ ਜਨਕਂ ਪਾਕਂ, ਤਂ ਛਿਨ੍ਦਤੁਪਪੀਲ਼ਕਂ;
ਤਂ ਪਵਤ੍ਤੇਤੁਪਤ੍ਥਮ੍ਭਂ, ਤਂ ਘਾਤੇਤੋਪਘਾਤਕਂ.
੩੪੮. ਕਰੋਤਿ ਅਤ੍ਤਨੋ ਪਾਕ-ਸ੍ਸਾਵਕਾਸਨ੍ਤਿ ਭਾਸਿਤਂ;
ਪਾਕਦਾਯਕਕਮ੍ਮਂ ਤੁ, ਯਂ ਕਿਞ੍ਚਿ ਜਨਕਂ ਭਵੇ.
੩੪੯. ਬਾਧਮਾਨਕਕਮ੍ਮਂ ਤੁ, ਤਂ ਪਾਕਮੁਪਪੀਲ਼ਕਂ;
ਉਪਘਾਤਕਮੀਰੇਨ੍ਤਿ, ਤਦੁਪਚ੍ਛੇਦਕਂਪਰੇ.
੩੫੦. ਗਰੁਕਾਸਨ੍ਨਮਾਚਿਣ੍ਣਂ, ਕਟਤ੍ਤਾਕਮ੍ਮੁਨਾ ਸਹ;
ਕਮ੍ਮਂ ਚਤੁਬ੍ਬਿਧਂ ਪਾਕ-ਪਰਿਯਾਯਪ੍ਪਭੇਦਤੋ.
੩੫੧. ਮਹਗ੍ਗਤਾਨਨ੍ਤਰਿਯਂ, ਗਰੁਕਮ੍ਮਨ੍ਤਿ ਵੁਚ੍ਚਤਿ;
ਕਤਂ ਚਿਨ੍ਤਿਤਮਾਸਨ੍ਨ-ਮਾਸਨ੍ਨਮਰਣੇਨ ਤੁ.
੩੫੨. ਬਾਹੁਲ੍ਲੇਨ ਸਮਾਚਿਣ੍ਣਮਾਚਿਣ੍ਣਨ੍ਤਿ ਪਵੁਚ੍ਚਤਿ;
ਸੇਸਂ ਪੁਞ੍ਞਮਪੁਞ੍ਞਞ੍ਚ, ਕਟਤ੍ਤਾਕਮ੍ਮਮੀਰਿਤਂ.
੩੫੩. ਦਿਟ੍ਠਧਮ੍ਮੇ ਵੇਦਨੀਯਮੁਪਪਜ੍ਜਾਪਰੇ ਤਥਾ;
ਪਰਿਯਾਯਵੇਦਨੀਯਮਿਤਿ ਚਾਹੋਸਿਕਮ੍ਮੁਨਾ.
੩੫੪. ਪਾਕਕਾਲਵਸੇਨਾਥ, ਕਾਲਾਤੀਤਵਸੇਨ ਚ;
ਚਤੁਧੇਵਮ੍ਪਿ ਅਕ੍ਖਾਤਂ, ਕਮ੍ਮਮਾਦਿਚ੍ਚਬਨ੍ਧੁਨਾ.
੩੫੫. ਦਿਟ੍ਠਧਮ੍ਮੇ ਵੇਦਨੀਯਂ, ਪਠਮਂ ਜਵਨਂ ਭਵੇ;
ਅਲਦ੍ਧਾਸੇਵਨਤ੍ਤਾਵ, ਅਸਮਤ੍ਥਂ ਭਵਨ੍ਤਰੇ.
੩੫੬. ਵੇਦਨੀਯਂ ਤੁਪਪਜ੍ਜਪਰਿਯੋਸਾਨਮੀਰਿਤਂ;
ਪਰਿਨਿਟ੍ਠਿਤਕਮ੍ਮਤ੍ਤਾ, ਵਿਪਚ੍ਚਤਿ ਅਨਨ੍ਤਰੇ.
੩੫੭. ਸੇਸਾਨਿ ਵੇਦਨੀਯਾਨਿ, ਪਰਿਯਾਯਾਪਰੇ ਪਨ;
ਲਦ੍ਧਾਸੇਵਨਤੋ ਪਾਕਂ, ਜਨੇਨ੍ਤਿ ਸਤਿ ਪਚ੍ਚਯੇ.
੩੫੮. ਵੁਚ੍ਚਨ੍ਤਾਹੋਸਿਕਮ੍ਮਾਨਿ, ਕਾਲਾਤੀਤਾਨਿ ਸਬ੍ਬਥਾ;
ਉਚ੍ਛਿਨ੍ਨਤਣ੍ਹਾਮੂਲਾਨਿ, ਪਚ੍ਚਯਾਲਾਭਤੋ ਤਥਾ.
੩੫੯. ਚਤੁਧਾ ਪੁਨ ਕਾਮਾਦਿਭੂਮਿਭੇਦੇਨ ਭਾਸਿਤਂ;
ਪੁਞ੍ਞਾਪੁਞ੍ਞਵਸਾ ਦ੍ਵੇਧਾ, ਕਾਮਾਵਚਰਿਕਂ ਭਵੇ.
੩੬੦. ਅਪੁਞ੍ਞਂ ਤਤ੍ਥ ਸਾਵਜ੍ਜ-ਮਨਿਟ੍ਠਫਲਦਾਯਕਂ;
ਤਂ ਕਮ੍ਮਫਸ੍ਸਦ੍ਵਾਰੇਹਿ, ਦੁਵਿਧਂ ਸਮ੍ਪਵਤ੍ਤਤਿ.+
੩੬੧. ਕਾਯਦ੍ਵਾਰਂ ਵਚੀਦ੍ਵਾਰਂ, ਮਨੋਦ੍ਵਾਰਨ੍ਤਿ ਤਾਦਿਨਾ;
ਕਮ੍ਮਦ੍ਵਾਰਤ੍ਤਯਂ ਵੁਤ੍ਤਂ, ਫਸ੍ਸਦ੍ਵਾਰਾ ਛ ਦੀਪਿਤਾ.
੩੬੨. ਕਮ੍ਮਦ੍ਵਾਰੇ ਮਨੋਦ੍ਵਾਰੇ, ਪਞ੍ਚਦ੍ਵਾਰਾ ਸਮੋਹਿਤਾ;
ਫਸ੍ਸਦ੍ਵਾਰਮਨੋਦ੍ਵਾਰਂ, ਕਮ੍ਮਦ੍ਵਾਰਤ੍ਤਯਂ ਕਤਂ.
੩੬੩. ਤਥਾ ਹਿ ਕਾਯਵਿਞ੍ਞਤ੍ਤਿਂ, ਜਨੇਤ੍ਵਾ ਜਾਤਚੇਤਨਾ;
ਕਾਯਕਮ੍ਮਂ ਵਚੀਕਮ੍ਮਂ, ਵਚੀਭੇਦਪਵਤ੍ਤਿਕਾ.
੩੬੪. ਵਿਞ੍ਞਤ੍ਤਿਦ੍ਵਯਸਮ੍ਪਤ੍ਤਾ, ਮਨੋਕਮ੍ਮਨ੍ਤਿ ਵੁਚ੍ਚਤਿ;
ਭੇਦੋਯਂ ਪਰਿਯਾਯੇਨ, ਕਮ੍ਮਾਨਮਿਤਿ ਦੀਪਿਤੋ.
੩੬੫. ਪਾਣਘਾਤਾਦਿਕਂ ਕਮ੍ਮਂ, ਕਾਯੇ ਬਾਹੁਲ੍ਲਵੁਤ੍ਤਿਤੋ;
ਕਾਯਕਮ੍ਮਂ ਵਚੀਕਮ੍ਮਂ, ਮੁਸਾਵਾਦਾਦਿਕਂ ਤਥਾ.
੩੬੬. ਅਭਿਜ੍ਝਾਦਿ ਮਨੋਕਮ੍ਮਂ, ਤੀਸੁ ਦ੍ਵਾਰੇਸੁ ਜਾਯਤਿ;
ਦ੍ਵੀਸੁ ਦ੍ਵਾਰੇਸੁ ਸੇਸਾਨਿ, ਭੇਦੋਯਂ ਪਰਮਤ੍ਥਤੋ.
੩੬੭. ਫਸ੍ਸਦ੍ਵਾਰਮਨੋਦ੍ਵਾਰੇ, ਵਿਞ੍ਞਤ੍ਤਿਦ੍ਵਯਮੀਰਿਤਂ;
ਪਞ੍ਚਦ੍ਵਾਰੇ ਦ੍ਵਯਂ ਨਤ੍ਥਿ, ਅਯਮੇਤ੍ਥ ਵਿਨਿਚ੍ਛਯੋ.
੩੬੮. ਅਕ੍ਖਨ੍ਤਿਞਾਣ ਕੋਸਜ੍ਜਂ, ਦੁਸ੍ਸਿਲ੍ਯਂ ਮੁਟ੍ਠਸਚ੍ਚਤਾ;
ਇਚ੍ਚਾਸਂਵਰਭੇਦੇਨ, ਅਟ੍ਠਦ੍ਵਾਰੇਸੁ ਜਾਯਤਿ.
੩੬੯. ਕਮ੍ਮਦ੍ਵਾਰਤ੍ਤਯਞ੍ਚੇਵ, ਪਞ੍ਚਦ੍ਵਾਰਾ ਤਥਾਪਰੇ;
ਅਸਂਵਰਾਨਂ ਪਞ੍ਚਨ੍ਨਂ, ਅਟ੍ਠ ਦ੍ਵਾਰਾ ਪਕਾਸਿਤਾ.
੩੭੦. ਤਤ੍ਥ ਕਮ੍ਮਪਥਪ੍ਪਤ੍ਤਂ, ਪਟਿਸਨ੍ਧਿਫਲਾਵਹਂ;
ਪਾਣਘਾਤਾਦਿਭੇਦੇਨ, ਦਸਧਾ ਸਮ੍ਪਵਤ੍ਤਤਿ.
੩੭੧. ਪਾਣਾਤਿਪਾਤੋ ਫਰੁਸਂ, ਬ੍ਯਾਪਾਦੋ ਚ ਤਥਾਪਰੋ;
ਇਚ੍ਚੇਵਂ ਤਿਵਿਧਂ ਕਮ੍ਮਂ, ਦੋਸਮੂਲੇਹਿ ਜਾਯਤਿ.
੩੭੨. ਮਿਚ੍ਛਾਚਾਰੋ ਅਭਿਜ੍ਝਾ ਚ, ਮਿਚ੍ਛਾਦਿਟ੍ਠਿ ਤਥਾਪਰਾ;
ਇਚ੍ਚੇਵਂ ਤਿਵਿਧਂ ਕਮ੍ਮਂ, ਲੋਭਮੂਲੇਹਿ ਜਾਯਤਿ.
੩੭੩. ਥੇਯ੍ਯਾਦਾਨਂ ਮੁਸਾਵਾਦੋ, ਪਿਸੁਣਂ ਸਮ੍ਫਲਾਪਨਂ;
ਕਮ੍ਮਂ ਚਤੁਬ੍ਬਿਧਮ੍ਮੇਤਂ, ਦ੍ਵਿਮੂਲੇਹਿ ਪਵਤ੍ਤਤਿ.
੩੭੪. ਛਨ੍ਦਾਦੋਸਾ ਭਯਾ ਮੋਹਾ, ਪਾਪਂ ਕੁਬ੍ਬਨ੍ਤਿ ਪਾਣਿਨੋ;
ਤਸ੍ਮਾ ਛਨ੍ਦਾਦਿਭੇਦੇਨ, ਚਤ੍ਤਾਲੀਸਵਿਧਂ ਭਵੇ.
੩੭੫. ਇਚ੍ਚਾਪੁਞ੍ਞਂ ਪਕਾਸੇਨ੍ਤਿ, ਚਤੁਰਾਪਾਯਸਾਧਕਂ;
ਅਞ੍ਞਤ੍ਥਾਪਿ ਪਵਤ੍ਤਮ੍ਹਿ, ਵਿਪਤ੍ਤਿਫਲਸਾਧਨਂ.
੩੭੬. ਤਿਵਿਧਂ ਪਨ ਪੁਞ੍ਞਂ ਤੁ, ਅਨਵਜ੍ਜਿਟ੍ਠਪਾਕਦਂ;
ਦਾਨਂ ਸੀਲਂ ਭਾਵਨਾ ਚ, ਤੀਸੁ ਦ੍ਵਾਰੇਸੁ ਜਾਯਤਿ.
੩੭੭. ਮਹਤ੍ਤਗਾਰਵਾ ਸ੍ਨੇਹਾ, ਦਯਾ ਸਦ੍ਧੁਪਕਾਰਤੋ;
ਭੋਗਜੀਵਾਭਯਧਮ੍ਮਂ, ਦਦਤੋ ਦਾਨਮੀਰਿਤਂ.
੩੭੮. ਪੁਞ੍ਞਮਾਚਾਰਵਾਰਿਤ੍ਤ-ਵਤ੍ਤਮਾਰਬ੍ਭ ਕੁਬ੍ਬਤੋ;
ਪਾਪਾ ਚ ਵਿਰਮਨ੍ਤਸ੍ਸ, ਹੋਤਿ ਸੀਲਮਯਂ ਤਦਾ.
੩੭੯. ਦਾਨਸੀਲਵਿਨਿਮੁਤ੍ਤਂ, ਭਾਵਨਾਤਿ ਪਵੁਚ੍ਚਤਿ;
ਪੁਞ੍ਞਂ ਭਾਵੇਨ੍ਤਿ ਸਨ੍ਤਾਨੇ, ਯਸ੍ਮਾ ਤੇਨ ਹਿਤਾਵਹਂ.
੩੮੦. ਜਨੇਤ੍ਵਾ ਕਾਯਵਿਞ੍ਞਤ੍ਤਿਂ, ਯਦਾ ਪੁਞ੍ਞਂ ਕਰੀਯਤਿ;
ਕਾਯਕਮ੍ਮਂ ਤਦਾ ਹੋਤਿ, ਦਾਨਂ ਸੀਲਞ੍ਚ ਭਾਵਨਾ.
੩੮੧. ਵਚੀਵਿਞ੍ਞਤ੍ਤਿਯਾ ਸਦ੍ਧਿਂ, ਯਦਾ ਪੁਞ੍ਞਂ ਕਰੀਯਤਿ;
ਵਚੀਕਮ੍ਮਂ ਮਨੋਕਮ੍ਮਂ, ਵਿਨਾ ਵਿਞ੍ਞਤ੍ਤਿਯਾ ਕਤਂ.
੩੮੨. ਤਂਤਂਦ੍ਵਾਰਿਕਮੇਵਾਹੁ, ਤਂਤਂਦ੍ਵਾਰਿਕਪਾਪਤੋ;
ਵਿਰਮਨ੍ਤਸ੍ਸ ਵਿਞ੍ਞਤ੍ਤਿਂ, ਵਿਨਾ ਵਾ ਸਹ ਵਾ ਪੁਨ.
੩੮੩. ਦਾਨਂ ਸੀਲਂ ਭਾਵਨਾ ਚ, ਵੇਯ੍ਯਾਵਚ੍ਚਾਪਚਾਯਨਾ;
ਪਤ੍ਤਾਨੁਮੋਦਨਾ ਪਤ੍ਤਿ-ਦਾਨਂ ਧਮ੍ਮਸ੍ਸ ਦੇਸਨਾ;
ਸਵਨਂ ਦਿਟ੍ਠਿਜੁਕਮ੍ਮ-ਮਿਚ੍ਚੇਵਂ ਦਸਧਾ ਠਿਤਂ.
੩੮੪. ਕਾਮਪੁਞ੍ਞਂ ਪਕਾਸੇਨ੍ਤਿ, ਕਾਮੇ ਸੁਗਤਿਸਾਧਕਂ;
ਅਞ੍ਞਤ੍ਥਾਪਿ ਪਵਤ੍ਤਮ੍ਹਿ, ਸਮ੍ਪਤ੍ਤਿਫਲਸਾਧਕਂ.
੩੮੫. ਚਿਤ੍ਤੁਪ੍ਪਾਦਪ੍ਪਭੇਦੇਨ, ਕਮ੍ਮਂ ਵੀਸਤਿਧਾ ਠਿਤਂ;
ਕਾਮਾਵਚਰਮਿਚ੍ਚੇਵਂ, ਵਿਭਾਵੇਨ੍ਤਿ ਵਿਭਾਵਿਨੋ.
੩੮੬. ਰੂਪਾਵਚਰਿਕਂ ਕਮ੍ਮ-ਮਪ੍ਪਨਾਭਾਵਨਾਮਯਂ;
ਕਸਿਣਾਦਿਕਮਾਰਬ੍ਭ, ਮਨੋਦ੍ਵਾਰੇ ਪਵਤ੍ਤਤਿ.
੩੮੭. ਪਥਵਾਪੋ ਚ ਤੇਜੋ ਚ,
ਵਾਯੋ ਨੀਲਞ੍ਚ ਪੀਤਕਂ;
ਲੋਹਿਤੋਦਾਤਮਾਕਾਸਂ,
ਆਲੋਕੋਤਿ ਵਿਸਾਰਦਾ.
੩੮੮. ਕਸਿਣਾਨਿ ਦਸੀਰੇਨ੍ਤਿ, ਆਦਿਕਮ੍ਮਿਕਯੋਗਿਨੋ;
ਉਦ੍ਧੁਮਾਤਂ ਵਿਨੀਲਞ੍ਚ, ਵਿਪੁਬ੍ਬਕਂ ਵਿਖਾਦਿਤਂ.
੩੮੯. ਵਿਚ੍ਛਿਦ੍ਦਕਞ੍ਚ ਵਿਕ੍ਖਿਤ੍ਤਂ, ਹਤਵਿਕ੍ਖਿਤ੍ਤਲੋਹਿਤਂ;
ਪੁਲ਼ਵਂ ਅਟ੍ਠਿਕਞ੍ਚੇਤਿ, ਅਸੁਭਂ ਦਸਧਾ ਠਿਤਂ.
੩੯੦. ਬੁਦ੍ਧੇ ਧਮ੍ਮੇ ਚ ਸਙ੍ਘੇ ਚ, ਸੀਲੇ ਚਾਗੇ ਚ ਅਤ੍ਤਨੋ;
ਦੇਵਤੋਪਸਮਾਯਞ੍ਚ, ਵੁਤ੍ਤਾਨੁਸ੍ਸਤਿਭਾਵਨਾ.
੩੯੧. ਮਰਣੇ ਸਤਿ ਨਾਮੇਕਾ, ਤਥਾ ਕਾਯਗਤਾਸਤਿ;
ਆਨਾਪਾਨਸਤਿਚ੍ਚੇਵਂ, ਦਸਧਾਨੁਸ੍ਸਤੀਰਿਤਾ.
੩੯੨. ਮੇਤ੍ਤਾ ਕਰੁਣਾ ਮੁਦਿਤਾ, ਉਪੇਕ੍ਖਾ ਭਾਵਨਾਤਿ ਚ;
ਚਤੁਬ੍ਰਹ੍ਮਵਿਹਾਰਾ ਚ, ਅਪ੍ਪਮਞ੍ਞਾਤਿ ਭਾਸਿਤਾ.
੩੯੩. ਆਹਾਰੇ ਤੁ ਪਟਿਕ੍ਕੂਲ-ਸਞ੍ਞੇਕਾਤਿ ਪਕਾਸਿਤਾ;
ਚਤੁਧਾਤੁਵਵਤ੍ਥਾਨਂ, ਚਤੁਧਾਤੁਪਰਿਗ੍ਗਹੋ.
੩੯੪. ਚਤ੍ਤਾਰੋਰੁਪ੍ਪਕਾ ਚੇਤਿ, ਚਤ੍ਤਾਲੀਸ ਸਮਾਸਤੋ;
ਕਮ੍ਮਟ੍ਠਾਨਾਨਿ ਵੁਤ੍ਤਾਨਿ, ਸਮਥੇ ਭਾਵਨਾਨਯੇ.
੩੯੫. ਆਨਾਪਾਨਞ੍ਚ ਕਸਿਣਂ, ਪਞ੍ਚਕਜ੍ਝਾਨਿਕਂ ਤਹਿਂ;
ਪਠਮਜ੍ਝਾਨਿਕਾ ਵੁਤ੍ਤਾ, ਕੋਟ੍ਠਾਸਾਸੁਭਭਾਵਨਾ.
੩੯੬. ਮੇਤ੍ਤਾਦਯੋ ਚਤੁਜ੍ਝਾਨਾ, ਉਪੇਕ੍ਖਾ ਪਞ੍ਚਮੀ ਮਤਾ;
ਆਰੁਪ੍ਪਾਰੁਪ੍ਪਕਾ ਸੇਸਾ, ਉਪਚਾਰਸਮਾਧਿਕਾ.
੩੯੭. ਕਸਿਣਾਸੁਭਕੋਟ੍ਠਾਸੇ,
ਆਨਾਪਾਨੇ ਚ ਜਾਯਤਿ;
ਪਟਿਭਾਗੋ ਤਮਾਰਬ੍ਭ,
ਤਤ੍ਥ ਵਤ੍ਤਤਿ ਅਪ੍ਪਨਾ.
੩੯੮. ਕਮ੍ਮਟ੍ਠਾਨੇਸੁ ਸੇਸੇਸੁ, ਪਟਿਭਾਗੋ ਨ ਵਿਜ੍ਜਤਿ;