੨. ਦੁਤਿਯੋ ਪਰਿਚ੍ਛੇਦੋ
ਚੇਤਸਿਕਨਿਦ੍ਦੇਸੋ
੬੭. ਚਿਤ੍ਤਾਨਨ੍ਤਰਮੁਦ੍ਦਿਟ੍ਠਾ, ਯੇ ਚ ਚੇਤਸਿਕਾ ਮਯਾ;
ਤੇਸਂ ਦਾਨਿ ਕਰਿਸ੍ਸਾਮਿ, ਵਿਭਾਜਨਮਿਤੋ ਪਰਂ.
ਤਤ੍ਥ ਚਿਤ੍ਤਸਮ੍ਪਯੁਤ੍ਤਾ, ਚਿਤ੍ਤੇ ਭਵਾ ਵਾ ਚੇਤਸਿਕਾ. ਤੇਪਿ ਚਿਤ੍ਤਂ ਵਿਯ ਸਾਰਮ੍ਮਣਤੋ ਏਕਵਿਧਾ, ਸਵਿਪਾਕਾਵਿਪਾਕਤੋ ਦੁਵਿਧਾ, ਕੁਸਲਾਕੁਸਲਾਬ੍ਯਾਕਤਭੇਦਤੋ ਤਿਵਿਧਾ, ਕਾਮਾਵਚਰਾਦਿਭੇਦਤੋ ਚਤੁਬ੍ਬਿਧਾ.
ਤਤ੍ਥ ਕਾਮਾਵਚਰਚਿਤ੍ਤਸਮ੍ਪਯੁਤ੍ਤਾ ਕਾਮਾਵਚਰਾ. ਤੇਸੁ ਕਾਮਾਵਚਰਪਠਮਮਹਾਕੁਸਲਚਿਤ੍ਤਸਮ੍ਪਯੁਤ੍ਤਾ ਤਾਵ ਨਿਯਤਾ ਸਰੂਪੇਨ ਆਗਤਾ ਏਕੂਨਤਿਂਸ ਧਮ੍ਮਾ ਹੋਨ੍ਤਿ. ਸੇਯ੍ਯਥਿਦਂ – ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਵਿਤਕ੍ਕੋ ਵਿਚਾਰੋ ਪੀਤਿ ਚਿਤ੍ਤੇਕਗ੍ਗਤਾ ਸਦ੍ਧਾ ਸਤਿ ਵੀਰਿਯਂ ਪਞ੍ਞਾ ਜੀਵਿਤਿਨ੍ਦ੍ਰਿਯਂ ਅਲੋਭੋ ਅਦੋਸੋ ਹਿਰੀ ਓਤ੍ਤਪ੍ਪਂ ਕਾਯਪ੍ਪਸ੍ਸਦ੍ਧਿ ਚਿਤ੍ਤਪ੍ਪਸ੍ਸਦ੍ਧਿ ਕਾਯਲਹੁਤਾ ਚਿਤ੍ਤਲਹੁਤਾ ਕਾਯਮੁਦੁਤਾ ਚਿਤ੍ਤਮੁਦੁਤਾ ਕਾਯਕਮ੍ਮਞ੍ਞਤਾ ਚਿਤ੍ਤਕਮ੍ਮਞ੍ਞਤਾ ਕਾਯਪਾਗੁਞ੍ਞਤਾ ਚਿਤ੍ਤਪਾਗੁਞ੍ਞਤਾ ਕਾਯੁਜੁਕਤਾ ਚਿਤ੍ਤੁਜੁਕਤਾਤਿ. ਪੁਨ ਛਨ੍ਦੋ, ਅਧਿਮੋਕ੍ਖੋ, ਤਤ੍ਰਮਜ੍ਝਤ੍ਤਤਾ, ਮਨਸਿਕਾਰੋ ਚਾਤਿ ਚਤ੍ਤਾਰੋ ਨਿਯਤਯੇਵਾਪਨਕਾ ਹੋਨ੍ਤਿ. ਇਮੇਹਿ ਚਤੂਹਿ ਤੇਤ੍ਤਿਂਸ ਹੋਨ੍ਤਿ. ਪੁਨ ਕਰੁਣਾ ਮੁਦਿਤਾ ਕਾਯਦੁਚ੍ਚਰਿਤਵਿਰਤਿ ਵਚੀਦੁਚ੍ਚਰਿਤਵਿਰਤਿ ਮਿਚ੍ਛਾਜੀਵਵਿਰਤਿ ਚੇਤਿ ਇਮੇ ਪਞ੍ਚ ਅਨਿਯਤਾ. ਇਮੇ ਪਨ ਕਦਾਚਿ ਉਪ੍ਪਜ੍ਜਨ੍ਤਿ.
ਇਮੇਸੁ ਪਨ ਕਰੁਣਾਮੁਦਿਤਾਵਸੇਨ ਭਾਵਨਾਕਾਲੇ ਕਰੁਣਾਪੁਬ੍ਬਭਾਗੋ ਵਾ ਮੁਦਿਤਾਪੁਬ੍ਬਭਾਗੋ ਵਾ ਏਤਾ ਉਪ੍ਪਜ੍ਜਨ੍ਤਿ, ਨ ਪਨੇਕਤੋ ਉਪ੍ਪਜ੍ਜਨ੍ਤਿ. ਯਦਾ ਪਨ ਇਮਿਨਾ ਚਿਤ੍ਤੇਨ ਮਿਚ੍ਛਾਕਮ੍ਮਨ੍ਤਾਦੀਹਿ ਵਿਰਮਤਿ, ਤਦਾ ਸਮ੍ਮਾਕਮ੍ਮਨ੍ਤਾਦੀਨਿ ਪਰਿਪੂਰੇਨ੍ਤਿ, ਏਕਾ ਵਿਰਤਿ ਉਪ੍ਪਜ੍ਜਤਿ, ਕਰੁਣਾਮੁਦਿਤਾਹਿ ਸਹ, ਅਞ੍ਞਮਞ੍ਞੇਨ ਚ ਨ ਉਪ੍ਪਜ੍ਜਨ੍ਤਿ. ਤਸ੍ਮਾ ਏਤੇਸੁ ਏਕੇਨ ਸਹ ਚਤੁਤ੍ਤਿਂਸੇਵ ਧਮ੍ਮਾ ਹੋਨ੍ਤਿ.
੬੮. ਆਦਿਨਾ ਪੁਞ੍ਞਚਿਤ੍ਤੇਨ, ਤੇਤ੍ਤਿਂਸ ਨਿਯਤਾ ਮਤਾ;
ਕਰੁਣਾਮੁਦਿਤੇਕੇਨ, ਚਤੁਤ੍ਤਿਂਸ ਭਵਨ੍ਤਿ ਤੇ.
੬੯. ਕਸ੍ਮਾ ਪਨੇਤ੍ਥ ਮੇਤ੍ਤਾ ਚ, ਉਪੇਕ੍ਖਾ ਚ ਨ ਉਦ੍ਧਟਾ;
ਯੇਵਾਪਨਕਧਮ੍ਮੇਸੁ, ਧਮ੍ਮਰਾਜੇਨ ਸਤ੍ਥੁਨਾ.
੭੦. ਅਬ੍ਯਾਪਾਦੇਨ ਮੇਤ੍ਤਾਪਿ, ਤਤ੍ਰਮਜ੍ਝਤ੍ਤਤਾਯ ਚ;
ਉਪੇਕ੍ਖਾ ਗਹਿਤਾ ਯਸ੍ਮਾ, ਤਸ੍ਮਾ ਨ ਗਹਿਤਾ ਉਭੋ.
੭੧. ਕਸ੍ਮਾ ਯੇਵਾਪਨਾ ਧਮ੍ਮਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ;
ਸਰੂਪੇਨੇਵ ਸਬ੍ਬੇਤੇ, ਪਾਲ਼ਿਯਂ ਨ ਚ ਉਦ੍ਧਟਾ.
੭੨. ਯਸ੍ਮਾ ਅਨਿਯਤਾ ਕੇਚਿ, ਯਸ੍ਮਾ ਰਾਸਿਂ ਭਜਨ੍ਤਿ ਨ;
ਯਸ੍ਮਾ ਚ ਦੁਬ੍ਬਲਾ ਕੇਚਿ, ਤਸ੍ਮਾ ਵੁਤ੍ਤਾ ਨ ਪਾਲ਼ਿਯਂ.
੭੩. ਛਨ੍ਦਾਧਿਮੋਕ੍ਖਮੁਦਿਤਾ ਮਨਸਿ ਚ ਕਾਰੋ,
ਮਜ੍ਝਤ੍ਤਤਾ ਚ ਕਰੁਣਾ ਵਿਰਤਿਤ੍ਤਯਂ ਚ;
ਪੁਞ੍ਞੇਸੁ ਤੇਨ ਨਿਯਤਾਨਿਯਤਾ ਚ ਸਬ੍ਬੇ,
ਯੇਵਾਪਨਾ ਮੁਨਿਵਰੇਨ ਨ ਚੇਵ ਵੁਤ੍ਤਾ.
੭੪. ਕਸ੍ਮਾ ਪਨੇਤ੍ਥ ਫਸ੍ਸੋਵ, ਪਠਮਂ ਸਮੁਦੀਰਿਤੋ;
ਪਠਮਾਭਿਨਿਪਾਤਤ੍ਤਾ, ਚਿਤ੍ਤਸ੍ਸਾਰਮ੍ਮਣੇ ਕਿਰ.
੭੫. ਫੁਸਿਤ੍ਵਾ ਪਨ ਫਸ੍ਸੇਨ, ਵੇਦਨਾਯ ਚ ਵੇਦਯੇ;
ਸਞ੍ਜਾਨਾਤਿ ਚ ਸਞ੍ਞਾਯ, ਚੇਤਨਾਯ ਚ ਚੇਤਯੇ.
੭੬. ਬਲਵਪਚ੍ਚਯਤ੍ਤਾ ਚ, ਸਹਜਾਤਾਨਮੇਵ ਹਿ;
ਫਸ੍ਸੋਵ ਪਠਮਂ ਵੁਤ੍ਤੋ, ਤਸ੍ਮਾ ਇਧ ਮਹੇਸਿਨਾ.
੭੭. ਅਕਾਰਣਮਿਦਂ ਸਬ੍ਬਂ, ਚਿਤ੍ਤਾਨਂ ਤੁ ਸਹੇਵ ਚ;
ਏਕੁਪ੍ਪਾਦਾਦਿਭਾਵੇਨ, ਚਿਤ੍ਤਜਾਨਂ ਪਵਤ੍ਤਿਤੋ.
੭੮. ਅਯਂ ਤੁ ਪਠਮੁਪ੍ਪਨ੍ਨੋ, ਅਯਂ ਪਚ੍ਛਾਤਿ ਨਤ੍ਥਿਦਂ;
ਬਲਵਪਚ੍ਚਯਤ੍ਤੇਪਿ, ਕਾਰਣਞ੍ਚ ਨ ਦਿਸ੍ਸਤਿ.
੭੯. ਦੇਸਨਾਕ੍ਕਮਤੋ ਚੇਵ, ਪਠਮਂ ਸਮੁਦੀਰਿਤੋ;
ਇਚ੍ਚੇਵਂ ਪਨ ਵਿਞ੍ਞੇਯ੍ਯਂ, ਵਿਞ੍ਞੁਨਾ ਨ ਵਿਸੇਸਤੋ.
੮੦. ਨ ਚ ਪਰਿਯੇਸਿਤਬ੍ਬੋਯਂ, ਤਸ੍ਮਾ ਪੁਬ੍ਬਾਪਰਕ੍ਕਮੋ;
ਵਚਨਤ੍ਥਲਕ੍ਖਣਾਦੀਹਿ, ਧਮ੍ਮਾ ਏਵ ਵਿਜਾਨਤਾ.
ਯਸ੍ਮਾ ਪਨ ਇਮੇ ਧਮ੍ਮਾ ਵਚਨਤ੍ਥਲਕ੍ਖਣਾਦੀਹਿ ਵੁਚ੍ਚਮਾਨਾ ਪਾਕਟਾ ਹੋਨ੍ਤਿ ਸੁਵਿਞ੍ਞੇਯ੍ਯਾਵ, ਤਸ੍ਮਾ ਤੇਸਂ ਵਚਨਤ੍ਥਲਕ੍ਖਣਾਦੀਨਿ ਪਵਕ੍ਖਾਮਿ. ਸੇਯ੍ਯਥਿਦਂ – ਫੁਸਤੀਤਿ ਫਸ੍ਸੋ. ਸ੍ਵਾਯਂ ਫੁਸਨਲਕ੍ਖਣੋ, ਸਙ੍ਘਟ੍ਟਨਰਸੋ, ਸਨ੍ਨਿਪਾਤਪਚ੍ਚੁਪਟ੍ਠਾਨੋ, ਫਲਟ੍ਠੇਨ ਵੇਦਨਾਪਚ੍ਚੁਪਟ੍ਠਾਨੋ ਵਾ, ਆਪਾਥਗਤਵਿਸਯਪਦਟ੍ਠਾਨੋ. ਅਯਂ ਹਿ ਅਰੂਪਧਮ੍ਮੋਪਿ ਸਮਾਨੋ ਆਰਮ੍ਮਣੇਸੁ ਫੁਸਨਾਕਾਰੇਨੇਵ ਪਵਤ੍ਤਤਿ, ਸੋ ਦ੍ਵਿਨ੍ਨਂ ਮੇਣ੍ਡਾਨਂ ਸਨ੍ਨਿਪਾਤੋ ਵਿਯ ਦਟ੍ਠਬ੍ਬੋ.
ਸੁਨ੍ਦਰਂ ਮਨੋਤਿ ਸੁਮਨੋ, ਸੁਮਨਸ੍ਸ ਭਾਵੋ ਸੋਮਨਸ੍ਸਂ, ਸੋਮਨਸ੍ਸਮੇਵ ਵੇਦਨਾ ਸੋਮਨਸ੍ਸਵੇਦਨਾ. ਸਾ ਵੇਦਯਿਤਲਕ੍ਖਣਾ, ਇਟ੍ਠਾਕਾਰਾਨੁਭਵਨਰਸਾ ਰਾਜਾ ਵਿਯ ਸੁਭੋਜਨਰਸਂ, ਚੇਤਸਿਕਅਸ੍ਸਾਦਪਚ੍ਚੁਪਟ੍ਠਾਨਾ, ਪਸ੍ਸਦ੍ਧਿਪਦਟ੍ਠਾਨਾ.
ਨੀਲਾਦਿਭੇਦਂ ਆਰਮ੍ਮਣਂ ਸਞ੍ਜਾਨਾਤੀਤਿ ਸਞ੍ਞਾ. ਸਾ ਸਞ੍ਜਾਨਨਲਕ੍ਖਣਾ, ਪਚ੍ਚਾਭਿਞ੍ਞਾਣਕਰਣਰਸਾ ਵਡ੍ਢਕਿਸ੍ਸ ਅਭਿਞ੍ਞਾਣਕਰਣਮਿਵ, ਯਥਾਗਹਿਤਨਿਮਿਤ੍ਤਵਸੇਨ ਅਭਿਨਿਵੇਸਕਰਣਪਚ੍ਚੁਪਟ੍ਠਾਨਾ, ਯਥੋਪਟ੍ਠਿਤਵਿਸਯਪਦਟ੍ਠਾਨਾ.
ਚੇਤਯਤੀਤਿ ਚੇਤਨਾ. ਸਦ੍ਧਿਂ ਅਤ੍ਤਨਾ ਸਮ੍ਪਯੁਤ੍ਤਧਮ੍ਮੇ ਆਰਮ੍ਮਣੇ ਅਭਿਸਨ੍ਦਹਤੀਤਿ ਅਤ੍ਥੋ. ਸਾ ਚੇਤਯਿਤਲਕ੍ਖਣਾ, ਆਯੂਹਨਰਸਾ, ਸਂਵਿਦਹਨਪਚ੍ਚੁਪਟ੍ਠਾਨਾ ਸਕਕਿਚ੍ਚਪਰਕਿਚ੍ਚਸਾਧਕਾ ਜੇਟ੍ਠਸਿਸ੍ਸਮਹਾਵਡ੍ਢਕਿਆਦਯੋ ਵਿਯ.
ਵਿਤਕ੍ਕੇਤੀਤਿ ਵਿਤਕ੍ਕੋ. ਵਿਤਕ੍ਕਨਂ ਵਾ ਵਿਤਕ੍ਕੋ. ਸ੍ਵਾਯਂ ਆਰਮ੍ਮਣੇ ਚਿਤ੍ਤਸ੍ਸ ਅਭਿਨਿਰੋਪਨਲਕ੍ਖਣੋ, ਆਹਨਨਪਰਿਯਾਹਨਨਰਸੋ, ਆਰਮ੍ਮਣੇ ਚਿਤ੍ਤਸ੍ਸ ਆਨਯਨਪਚ੍ਚੁਪਟ੍ਠਾਨੋ.
ਆਰਮ੍ਮਣੇ ਤੇਨ ਚਿਤ੍ਤਂ ਵਿਚਰਤੀਤਿ ਵਿਚਾਰੋ. ਵਿਚਰਣਂ ਵਾ ਵਿਚਾਰੋ. ਅਨੁਸਞ੍ਚਰਣਨ੍ਤਿ ਵੁਤ੍ਤਂ ਹੋਤਿ. ਸ੍ਵਾਯਂ ਆਰਮ੍ਮਣਾਨੁਮਜ੍ਜਨਲਕ੍ਖਣੋ, ਤਤ੍ਥ ਸਹਜਾਤਾਨੁਯੋਜਨਰਸੋ, ਚਿਤ੍ਤਸ੍ਸ ਅਨੁਪਬਨ੍ਧਪਚ੍ਚੁਪਟ੍ਠਾਨੋ.
ਪਿਨਯਤੀਤਿ ਪੀਤਿ. ਸਾ ਸਮ੍ਪਿਯਾਯਨਲਕ੍ਖਣਾ, ਕਾਯਚਿਤ੍ਤਪੀਣਨਰਸਾ, ਫਰਣਰਸਾ ਵਾ, ਓਦਗ੍ਯਪਚ੍ਚੁਪਟ੍ਠਾਨਾ.
ਚਿਤ੍ਤਸ੍ਸ ਏਕਗ੍ਗਭਾਵੋ ਚਿਤ੍ਤੇਕਗ੍ਗਤਾ. ਸਮਾਧਿਸ੍ਸੇਤਂ ਨਾਮਂ. ਸੋ ਅਵਿਸਾਰਲਕ੍ਖਣੋ, ਅਵਿਕ੍ਖੇਪਲਕ੍ਖਣੋ ਵਾ, ਸਹਜਾਤਾਨਂ ਸਮ੍ਪਿਣ੍ਡਨਰਸੋ ਨ੍ਹਾਨਿਯਚੁਣ੍ਣਾਨਂ ਉਦਕਂ ਵਿਯ, ਉਪਸਮਪਚ੍ਚੁਪਟ੍ਠਾਨੋ, ਵਿਸੇਸਤੋ ਸੁਖਪਦਟ੍ਠਾਨੋ.
ਸਦ੍ਦਹਨ੍ਤਿ ਏਤਾਯ, ਸਯਂ ਵਾ ਸਦ੍ਦਹਤਿ, ਸਦ੍ਦਹਨਮਤ੍ਤਮੇਵ ਵਾ ਏਸਾਤਿ ਸਦ੍ਧਾ. ਸਾ ਪਨੇਸਾ ਸਦ੍ਦਹਨਲਕ੍ਖਣਾ, ਪਸਾਦਨਰਸਾ ਉਦਕਪ੍ਪਸਾਦਕਮਣਿ ਵਿਯ, ਅਕਾਲੁਸਿਯਪਚ੍ਚੁਪਟ੍ਠਾਨਾ, ਸਦ੍ਧੇਯ੍ਯਵਤ੍ਥੁਪਦਟ੍ਠਾਨਾ.
ਸਰਨ੍ਤਿ ਏਤਾਯ, ਸਯਂ ਵਾ ਸਰਤਿ, ਸਰਣਮਤ੍ਤਮੇਵ ਵਾ ਏਸਾਤਿ ਸਤਿ. ਸਾ ਅਪਿਲਾਪਨਲਕ੍ਖਣਾ, ਅਸਮ੍ਮੋਸਰਸਾ, ਆਰਕ੍ਖਪਚ੍ਚੁਪਟ੍ਠਾਨਾ, ਥਿਰਸਞ੍ਞਾਪਦਟ੍ਠਾਨਾ.
ਵੀਰਭਾਵੋ ਵੀਰਿਯਂ. ਵੀਰਾਨਂ ਵਾ ਕਮ੍ਮਂ ਵੀਰਿਯਂ. ਤਂ ਪਨੇਤਂ ਉਸ੍ਸਾਹਨਲਕ੍ਖਣਂ, ਸਹਜਾਤਾਨਂ ਉਪਤ੍ਥਮ੍ਭਨਰਸਂ, ਅਸਂਸੀਦਨਭਾਵਪਚ੍ਚੁਪਟ੍ਠਾਨਂ, ਸਂਵੇਗਪਦਟ੍ਠਾਨਂ.
ਪਜਾਨਾਤੀਤਿ ਪਞ੍ਞਾ. ਸਾ ਪਨੇਸਾ ਵਿਜਾਨਨਲਕ੍ਖਣਾ, ਵਿਸਯੋਭਾਸਨਰਸਾ ਪਦੀਪੋ ਵਿਯ, ਅਸਮ੍ਮੋਹਪਚ੍ਚੁਪਟ੍ਠਾਨਾ ਅਰਞ੍ਞਗਤਸੁਦੇਸਕੋ ਵਿਯ.
ਜੀਵਨ੍ਤਿ ਤੇਨ ਤਂਸਮ੍ਪਯੁਤ੍ਤਧਮ੍ਮਾਤਿ ਜੀਵਿਤਂ. ਤਂ ਪਨ ਅਤ੍ਤਨਾ ਅਵਿਨਿਬ੍ਭੁਤ੍ਤਾਨਂ ਧਮ੍ਮਾਨਂ ਅਨੁਪਾਲਨਲਕ੍ਖਣਂ, ਤੇਸਂ ਪਵਤ੍ਤਨਰਸਂ, ਤੇਸਂਯੇਵ ਠਪਨਪਚ੍ਚੁਪਟ੍ਠਾਨਂ, ਯਾਪਯਿਤਬ੍ਬਧਮ੍ਮਪਦਟ੍ਠਾਨਂ. ਸਨ੍ਤੇਪਿ ਚ ਤੇਸਂ ਅਨੁਪਾਲਨਲਕ੍ਖਣਾਦਿਮ੍ਹਿ ਵਿਧਾਨੇ ਅਤ੍ਥਿਕ੍ਖਣੇਯੇਵ ਤਂ ਤੇ ਧਮ੍ਮੇ ਅਨੁਪਾਲੇਤਿ ਉਦਕਂ ਵਿਯ ਉਪ੍ਪਲਾਦੀਨਿ, ਯਥਾਸਕਂ ਪਚ੍ਚਯੁਪ੍ਪਨ੍ਨੇਪਿ ਚ ਧਮ੍ਮੇ ਅਨੁਪਾਲੇਤਿ ਧਾਤਿ ਵਿਯ ਕੁਮਾਰਂ, ਸਯਂਪਵਤ੍ਤਿਤਧਮ੍ਮਸਮ੍ਬਨ੍ਧੇਨੇਵ ਪਵਤ੍ਤਤਿ ਨਿਯਾਮਕੋ ਵਿਯ, ਨ ਭਙ੍ਗਤੋ ਉਦ੍ਧਂ ਪਵਤ੍ਤਯਤਿ ਅਤ੍ਤਨੋ ਚ ਪਵਤ੍ਤਯਿਤਬ੍ਬਾਨਞ੍ਚ ਅਭਾਵਾ, ਨ ਭਙ੍ਗਕ੍ਖਣੇ ਠਪੇਤਿ ਸਯਂ ਭਿਜ੍ਜਮਾਨਤ੍ਤਾ ਖੀਯਮਾਨੋ ਵਿਯ ਵਤ੍ਤਿਸ੍ਨੇਹੋਵ ਪਦੀਪਸਿਖਨ੍ਤਿ.
ਨ ਲੁਬ੍ਭਨ੍ਤਿ ਤੇਨ, ਸਯਂ ਵਾ ਨ ਲੁਬ੍ਭਤਿ, ਅਲੁਬ੍ਭਨਮਤ੍ਤਮੇਵ ਵਾ ਤਨ੍ਤਿ ਅਲੋਭੋ. ਸੋ ਆਰਮ੍ਮਣੇ ਚਿਤ੍ਤਸ੍ਸ ਅਲਗ੍ਗਭਾਵਲਕ੍ਖਣੋ ਕਮਲਦਲੇ ਜਲਬਿਨ੍ਦੁ ਵਿਯ, ਅਪਰਿਗ੍ਗਹਰਸੋ ਮੁਤ੍ਤਭਿਕ੍ਖੁ ਵਿਯ, ਅਨਲ੍ਲੀਨਭਾਵਪਚ੍ਚੁਪਟ੍ਠਾਨੋ ਅਸੁਚਿਮ੍ਹਿ ਪਤਿਤਪੁਰਿਸੋ ਵਿਯ.
ਨ ਦੁਸ੍ਸਨ੍ਤਿ ਤੇਨ, ਸਯਂ ਵਾ ਨ ਦੁਸ੍ਸਤਿ, ਅਦੁਸ੍ਸਨਮਤ੍ਤਮੇਵ ਵਾ ਤਨ੍ਤਿ ਅਦੋਸੋ. ਸੋ ਅਚਣ੍ਡਿਕ੍ਕਲਕ੍ਖਣੋ, ਅਵਿਰੋਧਲਕ੍ਖਣੋ ਵਾ ਅਨੁਕੂਲਮਿਤ੍ਤੋ ਵਿਯ, ਆਘਾਤਵਿਨਯਨਰਸੋ, ਪਰਿਲ਼ਾਹਵਿਨਯਨਰਸੋ ਵਾ ਚਨ੍ਦਨਂ ਵਿਯ, ਸੋਮ੍ਮਭਾਵਪਚ੍ਚੁਪਟ੍ਠਾਨੋ ਪੁਣ੍ਣਚਨ੍ਦੋ ਵਿਯ.
ਕਾਯਦੁਚ੍ਚਰਿਤਾਦੀਹਿ ਹਿਰੀਯਤੀਤਿ ਹਿਰੀ. ਲਜ੍ਜਾਯੇਤਂ ਅਧਿਵਚਨਂ. ਤੇਹਿਯੇਵ ਓਤ੍ਤਪ੍ਪਤੀਤਿ ਓਤ੍ਤਪ੍ਪਂ. ਪਾਪਤੋ ਉਬ੍ਬੇਗਸ੍ਸੇਤਂ ਅਧਿਵਚਨਂ. ਤਤ੍ਥ ਪਾਪਤੋ ਜਿਗੁਚ੍ਛਨਲਕ੍ਖਣਾ ਹਿਰੀ, ਓਤ੍ਤਾਸਲਕ੍ਖਣਂ ਓਤ੍ਤਪ੍ਪਂ. ਉਭੋਪਿ ਪਾਪਾਨਂ ਅਕਰਣਰਸਾ, ਪਾਪਤੋ ਸਙ੍ਕੋਚਨਪਚ੍ਚੁਪਟ੍ਠਾਨਾ, ਅਤ੍ਤਗਾਰਵਪਰਗਾਰਵਪਦਟ੍ਠਾਨਾ. ਇਮੇ ਧਮ੍ਮਾ ਲੋਕਪਾਲਾਤਿ ਦਟ੍ਠਬ੍ਬਾ.
ਕਾਯਪਸ੍ਸਮ੍ਭਨਂ ਕਾਯਪਸ੍ਸਦ੍ਧਿ. ਚਿਤ੍ਤਪਸ੍ਸਮ੍ਭਨਂ ਚਿਤ੍ਤਪਸ੍ਸਦ੍ਧਿ. ਕਾਯੋਤਿ ਚੇਤ੍ਥ ਵੇਦਨਾਦਯੋ ਤਯੋ ਖਨ੍ਧਾ. ਉਭੋਪਿ ਪਨੇਤਾ ਏਕਤੋ ਹੁਤ੍ਵਾ ਕਾਯਚਿਤ੍ਤਦਰਥਵੂਪਸਮਲਕ੍ਖਣਾ, ਕਾਯਚਿਤ੍ਤਦਰਥਨਿਮ੍ਮਦਨਰਸਾ, ਕਾਯਚਿਤ੍ਤਾਨਂ ਅਪਰਿਪ੍ਫਨ੍ਦਨਸੀਤਿਭਾਵਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਅਵੂਪਸਮਤਾਉਦ੍ਧਚ੍ਚਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਵੇਦਿਤਬ੍ਬਾ.
ਕਾਯਲਹੁਭਾਵੋ ਕਾਯਲਹੁਤਾ. ਚਿਤ੍ਤਲਹੁਭਾਵੋ ਚਿਤ੍ਤਲਹੁਤਾ. ਕਾਯਚਿਤ੍ਤਾਨਂ ਗਰੁਭਾਵਵੂਪਸਮਲਕ੍ਖਣਾ, ਕਾਯਚਿਤ੍ਤਗਰੁਭਾਵਨਿਮ੍ਮਦਨਰਸਾ, ਕਾਯਚਿਤ੍ਤਾਨਂ ਅਦਨ੍ਧਤਾਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਗਰੁਭਾਵਕਰਥਿਨਮਿਦ੍ਧਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਵੇਦਿਤਬ੍ਬਾ.
ਕਾਯਮੁਦੁਭਾਵੋ ਕਾਯਮੁਦੁਤਾ. ਚਿਤ੍ਤਮੁਦੁਭਾਵੋ ਚਿਤ੍ਤਮੁਦੁਤਾ. ਕਾਯਚਿਤ੍ਤਾਨਂ ਥਦ੍ਧਭਾਵਵੂਪਸਮਲਕ੍ਖਣਾ, ਕਾਯਚਿਤ੍ਤਾਨਂ ਥਦ੍ਧਭਾਵਨਿਮ੍ਮਦਨਰਸਾ, ਅਪ੍ਪਟਿਘਾਤਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਥਦ੍ਧਭਾਵਕਰਦਿਟ੍ਠਿਮਾਨਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਵੇਦਿਤਬ੍ਬਾ.
ਕਾਯਕਮ੍ਮਞ੍ਞਭਾਵੋ ਕਾਯਕਮ੍ਮਞ੍ਞਤਾ. ਚਿਤ੍ਤਕਮ੍ਮਞ੍ਞਭਾਵੋ ਚਿਤ੍ਤਕਮ੍ਮਞ੍ਞਤਾ. ਕਾਯਚਿਤ੍ਤਾਨਂ ਅਕਮ੍ਮਞ੍ਞਭਾਵਵੂਪਸਮਲਕ੍ਖਣਾ, ਕਾਯਚਿਤ੍ਤਾਨਂ ਅਕਮ੍ਮਞ੍ਞਭਾਵਨਿਮ੍ਮਦਨਰਸਾ, ਕਾਯਚਿਤ੍ਤਾਨਂ ਆਰਮ੍ਮਣਕਰਣਸਮ੍ਪਤ੍ਤਿਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਂ, ਕਾਯਚਿਤ੍ਤਾਨਂ ਅਕਮ੍ਮਞ੍ਞਭਾਵਕਰਅਵਸੇਸਨੀਵਰਣਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਵੇਦਿਤਬ੍ਬਾ.
ਕਾਯਪਾਗੁਞ੍ਞਭਾਵੋ ਕਾਯਪਾਗੁਞ੍ਞਤਾ. ਚਿਤ੍ਤਪਾਗੁਞ੍ਞਭਾਵੋ ਚਿਤ੍ਤਪਾਗੁਞ੍ਞਤਾ. ਕਾਯਚਿਤ੍ਤਾਨਂ ਅਗੇਲਞ੍ਞਭਾਵਲਕ੍ਖਣਾ, ਕਾਯਚਿਤ੍ਤਾਨਂ ਗੇਲਞ੍ਞਨਿਮ੍ਮਦਨਰਸਾ, ਨਿਰਾਦੀਨਵਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਗੇਲਞ੍ਞਭਾਵਕਰਅਸ੍ਸਦ੍ਧਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਦਟ੍ਠਬ੍ਬਾ.
ਕਾਯਸ੍ਸ ਉਜੁਕਭਾਵੋ ਕਾਯੁਜੁਕਤਾ. ਚਿਤ੍ਤਸ੍ਸ ਉਜੁਕਭਾਵੋ ਚਿਤ੍ਤੁਜੁਕਤਾ. ਕਾਯਚਿਤ੍ਤਾਨਂ ਅਕੁਟਿਲਭਾਵਲਕ੍ਖਣਾ, ਕਾਯਚਿਤ੍ਤਾਨਂ ਅਜ੍ਜਵਲਕ੍ਖਣਾ ਵਾ, ਕਾਯਚਿਤ੍ਤਾਨਂ ਕੁਟਿਲਭਾਵਨਿਮ੍ਮਦਨਰਸਾ, ਅਜਿਮ੍ਹਤਾਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਕੁਟਿਲਭਾਵਕਰਮਾਯਾਸਾਠੇਯ੍ਯਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਦਟ੍ਠਬ੍ਬਾ.
ਛਨ੍ਦੋਤਿ ਕਤ੍ਤੁਕਮ੍ਯਤਾਯੇਤਂ ਅਧਿਵਚਨਂ. ਤਸ੍ਮਾ ਸੋ ਕਤ੍ਤੁਕਮ੍ਯਤਾਲਕ੍ਖਣੋ ਛਨ੍ਦੋ, ਆਰਮ੍ਮਣਪਰਿਯੇਸਨਰਸੋ, ਆਰਮ੍ਮਣੇਨ ਅਤ੍ਥਿਕਤਾਪਚ੍ਚੁਪਟ੍ਠਾਨੋ, ਤਦੇਵਸ੍ਸ ਪਦਟ੍ਠਾਨੋ.
ਅਧਿਮੁਚ੍ਚਨਂ ਅਧਿਮੋਕ੍ਖੋ. ਸੋ ਸਨ੍ਨਿਟ੍ਠਾਨਲਕ੍ਖਣੋ, ਅਸਂਸਪ੍ਪਨਰਸੋ, ਨਿਚ੍ਛਯਪਚ੍ਚੁਪਟ੍ਠਾਨੋ, ਸਨ੍ਨਿਟ੍ਠੇਯ੍ਯਧਮ੍ਮਪਦਟ੍ਠਾਨੋ, ਆਰਮ੍ਮਣੇ ਨਿਚ੍ਚਲਭਾਵੇਨ ਇਨ੍ਦਖੀਲੋ ਵਿਯ ਦਟ੍ਠਬ੍ਬੋ.
ਤੇਸੁ ਤੇਸੁ ਧਮ੍ਮੇਸੁ ਮਜ੍ਝਤ੍ਤਭਾਵੋ ਤਤ੍ਰਮਜ੍ਝਤ੍ਤਤਾ. ਸਾ ਚਿਤ੍ਤਚੇਤਸਿਕਾਨਂ ਸਮਵਾਹਿਤਲਕ੍ਖਣਾ, ਊਨਾਧਿਕਤਾਨਿਵਾਰਣਰਸਾ, ਪਕ੍ਖਪਾਤੁਪਚ੍ਛੇਦਨਰਸਾ ਵਾ, ਮਜ੍ਝਤ੍ਤਭਾਵਪਚ੍ਚੁਪਟ੍ਠਾਨਾ.
ਕਿਰਿਯਾ ਕਾਰੋ, ਮਨਸ੍ਮਿਂ ਕਾਰੋ ਮਨਸਿਕਾਰੋ. ਪੁਰਿਮਮਨਤੋ ਵਿਸਦਿਸਂ ਮਨਂ ਕਰੋਤੀਤਿ ਚ ਮਨਸਿਕਾਰੋ.
ਸ੍ਵਾਯਂ ਆਰਮ੍ਮਣਪਟਿਪਾਦਕੋ, ਵੀਥਿਪਟਿਪਾਦਕੋ, ਜਵਨਪਟਿਪਾਦਕੋਤਿ ਤਿਪ੍ਪਕਾਰੋ. ਤਤ੍ਥ ਆਰਮ੍ਮਣਪਟਿਪਾਦਕੋ ਮਨਸ੍ਮਿਂ ਕਾਰੋ ਮਨਸਿਕਾਰੋ. ਸੋ ਸਾਰਣਲਕ੍ਖਣੋ, ਸਮ੍ਪਯੁਤ੍ਤਾਨਂ ਆਰਮ੍ਮਣੇ ਸਂਯੋਜਨਰਸੋ, ਆਰਮ੍ਮਣਾਭਿਮੁਖਭਾਵਪਚ੍ਚੁਪਟ੍ਠਾਨੋ, ਆਰਮ੍ਮਣਪਦਟ੍ਠਾਨੋ, ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਆਰਮ੍ਮਣਪਟਿਪਾਦਕਤ੍ਤੇਨ ਸਮ੍ਪਯੁਤ੍ਤਾਨਂ ਸਾਰਥੀ ਵਿਯ ਦਟ੍ਠਬ੍ਬੋ. ਵੀਥਿਪਟਿਪਾਦਕੋਤਿ ਪਞ੍ਚਦ੍ਵਾਰਾਵਜ੍ਜਨਸ੍ਸੇਤਂ ਅਧਿਵਚਨਂ, ਜਵਨਪਟਿਪਾਦਕੋਤਿ ਮਨੋਦ੍ਵਾਰਾਵਜ੍ਜਨਸ੍ਸੇਤਂ ਅਧਿਵਚਨਂ, ਨ ਤੇ ਇਧ ਅਧਿਪ੍ਪੇਤਾ.
ਕਰੁਣਾਤਿ ਪਰਦੁਕ੍ਖੇ ਸਤਿ ਸਾਧੂਨਂ ਹਦਯਕਮ੍ਪਨਂ ਕਰੋਤੀਤਿ ਕਰੁਣਾ, ਕਿਨਾਤਿ ਵਿਨਾਸੇਤਿ ਵਾ ਪਰਦੁਕ੍ਖਨ੍ਤਿ ਕਰੁਣਾ. ਸਾ ਪਰਦੁਕ੍ਖਾਪਨਯਨਾਕਾਰਪ੍ਪਵਤ੍ਤਿਲਕ੍ਖਣਾ, ਪਰਦੁਕ੍ਖਾਸਹਨਰਸਾ, ਅਵਿਹਿਂਸਾਪਚ੍ਚੁਪਟ੍ਠਾਨਾ, ਦੁਕ੍ਖਾਭਿਭੂਤਾਨਂ ਅਨਾਥਭਾਵਦਸ੍ਸਨਪਦਟ੍ਠਾਨਾ.
ਮੋਦਨ੍ਤਿ ਤਾਯ, ਸਯਂ ਵਾ ਮੋਦਤੀਤਿ ਮੁਦਿਤਾ. ਸਾ ਪਮੋਦਨਲਕ੍ਖਣਾ, ਅਨਿਸ੍ਸਾਯਨਰਸਾ, ਅਰਤਿਵਿਘਾਤਪਚ੍ਚੁਪਟ੍ਠਾਨਾ, ਸਤ੍ਤਾਨਂ ਸਮ੍ਪਤ੍ਤਿਦਸ੍ਸਨਪਦਟ੍ਠਾਨਾ. ਕੇਚਿ ਪਨ ਮੇਤ੍ਤੁਪੇਕ੍ਖਾਯੋਪਿ ਅਨਿਯਤੇ ਇਚ੍ਛਨ੍ਤਿ, ਤਂ ਨ ਗਹੇਤਬ੍ਬਂ. ਅਤ੍ਥਤੋ ਹਿ ਅਦੋਸੋ ਏਵ ਮੇਤ੍ਤਾ, ਤਤ੍ਰਮਜ੍ਝਤ੍ਤੁਪੇਕ੍ਖਾਯੇਵ ਉਪੇਕ੍ਖਾਤਿ.
ਕਾਯਦੁਚ੍ਚਰਿਤਤੋ ਵਿਰਤਿ ਕਾਯਦੁਚ੍ਚਰਿਤਵਿਰਤਿ. ਏਸੇਵ ਨਯੋ ਸੇਸੇਸੁਪਿ ਦ੍ਵੀਸੁ. ਲਕ੍ਖਣਾਦਿਤੋ ਪਨ ਏਤਾ ਤਿਸ੍ਸੋਪਿ ਵਿਰਤਿਯੋ ਕਾਯਦੁਚ੍ਚਰਿਤਾਦਿਵਤ੍ਥੂਨਂ ਅਵੀਤਿਕ੍ਕਮਲਕ੍ਖਣਾ, ਕਾਯਦੁਚ੍ਚਰਿਤਾਦਿਵਤ੍ਥੁਤੋ ਸਙ੍ਕੋਚਨਰਸਾ, ਅਕਿਰਿਯਪਚ੍ਚੁਪਟ੍ਠਾਨਾ, ਸਦ੍ਧਾਹਿਰਿਓਤ੍ਤਪ੍ਪਅਪ੍ਪਿਚ੍ਛਤਾਦਿਗੁਣਪਦਟ੍ਠਾਨਾ. ਕੇਚਿ ਪਨ ਇਮਾਸੁ ਏਕੇਕਂ ਨਿਯਤਂ ਵਿਰਤਿਂ ਇਚ੍ਛਨ੍ਤਿ. ਏਵਂ ਕਾਮਾਵਚਰਪਠਮਮਹਾਕੁਸਲਚਿਤ੍ਤੇਨ ਇਮੇ ਤੇਤ੍ਤਿਂਸ ਵਾ ਚਤੁਤ੍ਤਿਂਸ ਵਾ ਧਮ੍ਮਾ ਸਮ੍ਪਯੋਗਂ ਗਚ੍ਛਨ੍ਤੀਤਿ ਵੇਦਿਤਬ੍ਬਾ.
ਯਥਾ ਚ ਪਠਮੇਨ, ਏਵਂ ਦੁਤਿਯਚਿਤ੍ਤੇਨਾਪਿ. ਸਸਙ੍ਖਾਰਭਾਵਮਤ੍ਤਮੇਵ ਹਿ ਏਤ੍ਥ ਵਿਸੇਸੋ. ਪੁਨ ਤਤਿਯੇਨ ਞਾਣਵਿਪ੍ਪਯੋਗਤੋ ਠਪੇਤ੍ਵਾ ਅਮੋਹਂ ਅਵਸੇਸਾ ਦ੍ਵਤ੍ਤਿਂਸ ਵਾ ਤੇਤ੍ਤਿਂਸ ਵਾ ਵੇਦਿਤਬ੍ਬਾ. ਤਥਾ ਚਤੁਤ੍ਥੇਨਾਪਿ ਸਸਙ੍ਖਾਰਭਾਵਮਤ੍ਤਮੇਵ ਵਿਸੇਸੋ, ਪਠਮੇ ਵੁਤ੍ਤੇਸੁ ਪਨ ਠਪੇਤ੍ਵਾ ਪੀਤਿਂ ਅਵਸੇਸਾ ਪਞ੍ਚਮੇਨ ਸਮ੍ਪਯੋਗਂ ਗਚ੍ਛਨ੍ਤਿ. ਸੋਮਨਸ੍ਸਟ੍ਠਾਨੇ ਚੇਤ੍ਥ ਉਪੇਕ੍ਖਾਵੇਦਨਾ ਪਵਿਟ੍ਠਾ. ਸਾ ਪਨ ਇਟ੍ਠਾਨਿਟ੍ਠਵਿਪਰੀਤਾਨੁਭਵਨਲਕ੍ਖਣਾ, ਪਕ੍ਖਪਾਤੁਪਚ੍ਛੇਦਨਰਸਾ. ਯਥਾ ਚ ਪਞ੍ਚਮੇਨ, ਏਵਂ ਛਟ੍ਠੇਨਾਪਿ. ਸਸਙ੍ਖਾਰਮਤ੍ਤਮੇਵ ਹੋਤਿ ਵਿਸੇਸੋ. ਸਤ੍ਤਮੇਨ ਪਨ ਠਪੇਤ੍ਵਾ ਪਞ੍ਞਂ ਅਵਸੇਸਾ ਏਕਤਿਂਸ ਵਾ ਦ੍ਵਤ੍ਤਿਂਸ ਵਾ ਧਮ੍ਮਾ ਹੋਨ੍ਤਿ, ਤਥਾ ਅਟ੍ਠਮੇਨਾਪਿ. ਸਸਙ੍ਖਾਰਮਤ੍ਤਮੇਵ ਵਿਸੇਸੋ. ਏਵਂ ਤਾਵ ਕਾਮਾਵਚਰਕੁਸਲਚੇਤਸਿਕਾ ਵੇਦਿਤਬ੍ਬਾ.
੮੧. ਉਪੇਕ੍ਖਾਯੁਤ੍ਤਚਿਤ੍ਤੇਸੁ, ਨ ਦੁਕ੍ਖਸੁਖਪੀਤਿਯੋ;
ਜਾਯਨ੍ਤੇਵ ਵਿਸੁਂ ਪਞ੍ਚ, ਕਰੁਣਾਮੁਦਿਤਾਦਯੋ.
ਅਵਸੇਸੇਸੁ ਪਨ ਰੂਪਾਵਚਰਚਿਤ੍ਤਸਮ੍ਪਯੁਤ੍ਤਾ ਰੂਪਾਵਚਰਾ, ਤਤ੍ਥ ਪਠਮਚਿਤ੍ਤਸਮ੍ਪਯੁਤ੍ਤਾ ਤਾਵ ਕਾਮਾਵਚਰਪਠਮਚਿਤ੍ਤੇ ਵੁਤ੍ਤੇਸੁ ਠਪੇਤ੍ਵਾ ਵਿਰਤਿਤ੍ਤਯਂ ਅਵਸੇਸਾ ਵੇਦਿਤਬ੍ਬਾ. ਵਿਰਤਿਯੋ ਪਨ ਕਾਮਾਵਚਰਕੁਸਲਲੋਕੁਤ੍ਤਰੇਸ੍ਵੇਵ ਉਪ੍ਪਜ੍ਜਨ੍ਤਿ, ਨ ਅਞ੍ਞੇਸੁ. ਦੁਤਿਯੇਨ ਵਿਤਕ੍ਕਵਜ੍ਜਾ ਦ੍ਵਤ੍ਤਿਂਸ ਵਾ ਤੇਤ੍ਤਿਂਸ ਵਾ. ਤਤਿਯੇਨ ਵਿਚਾਰਵਜ੍ਜਾ ਏਕਤਿਂਸ ਵਾ ਦ੍ਵਤ੍ਤਿਂਸ ਵਾ. ਚਤੁਤ੍ਥੇਨ ਤਤੋ ਪੀਤਿਵਜ੍ਜਾ ਤਿਂਸ ਵਾ ਏਕਤਿਂਸ ਵਾ. ਪਞ੍ਚਮੇਨ ਤਤੋ ਕਰੁਣਾਮੁਦਿਤਾਵਜ੍ਜਾ ਤਿਂਸ ਹੋਨ੍ਤਿ, ਸੋਮਨਸ੍ਸਟ੍ਠਾਨੇ ਉਪੇਕ੍ਖਾ ਪਵਿਟ੍ਠਾ. ਏਵਂ ਰੂਪਾਵਚਰਕੁਸਲਚੇਤਸਿਕਾ ਵੇਦਿਤਬ੍ਬਾ.
ਅਰੂਪਾਵਚਰਚਿਤ੍ਤਸਮ੍ਪਯੁਤ੍ਤਾ ਅਰੂਪਾਵਚਰਾ, ਤੇ ਪਨ ਰੂਪਾਵਚਰਪਞ੍ਚਮੇ ਵੁਤ੍ਤਨਯੇਨ ਵੇਦਿਤਬ੍ਬਾ. ਅਰੂਪਾਵਚਰਭਾਵੋਵੇਤ੍ਥ ਵਿਸੇਸੋ.
ਲੋਕੁਤ੍ਤਰਚਿਤ੍ਤਸਮ੍ਪਯੁਤ੍ਤਾ ਲੋਕੁਤ੍ਤਰਾ, ਤੇ ਪਨ ਪਠਮਜ੍ਝਾਨਿਕੇ ਮਗ੍ਗਚਿਤ੍ਤੇ ਪਠਮਰੂਪਾਵਚਰਚਿਤ੍ਤੇ ਵੁਤ੍ਤਨਯੇਨ ਦੁਤਿਯਜ੍ਝਾਨਿਕਾਦਿਭੇਦੇਪਿ ਮਗ੍ਗਚਿਤ੍ਤੇ ਦੁਤਿਯਰੂਪਾਵਚਰਚਿਤ੍ਤਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਕਰੁਣਾਮੁਦਿਤਾਨਮਭਾਵੋ ਚ ਨਿਯਤਵਿਰਤਿਭਾਵੋ ਚ ਲੋਕੁਤ੍ਤਰਭਾਵੋ ਚੇਤ੍ਥ ਵਿਸੇਸੋ. ਏਵਂ ਤਾਵ ਕੁਸਲਚਿਤ੍ਤਸਮ੍ਪਯੁਤ੍ਤਚੇਤਸਿਕਾ ਵੇਦਿਤਬ੍ਬਾ.
ਅਕੁਸਲਾ ਪਨ ਚੇਤਸਿਕਾ ਭੂਮਿਤੋ ਏਕਵਿਧਾ ਕਾਮਾਵਚਰਾਯੇਵ, ਤੇਸੁ ਲੋਭਮੂਲਪਠਮਾਕੁਸਲਚਿਤ੍ਤਸਮ੍ਪਯੁਤ੍ਤਾ ਤਾਵ ਨਿਯਤਾ ਸਰੂਪੇਨਾਗਤਾ ਪਨ੍ਨਰਸ, ਯੇਵਾਪਨਕਾ ਨਿਯਤਾ ਚਤ੍ਤਾਰੋਤਿ ਏਕੂਨਵੀਸਤਿ ਹੋਨ੍ਤਿ. ਅਨਿਯਤਾ ਛ ਯੇਵਾਪਨਕਾਤਿ ਸਬ੍ਬੇ ਪਞ੍ਚਵੀਸਤਿ ਹੋਨ੍ਤਿ. ਸੇਯ੍ਯਥਿਦਂ – ਫਸ੍ਸੋ ਸੋਮਨਸ੍ਸਵੇਦਨਾ ਸਞ੍ਞਾ ਚੇਤਨਾ ਵਿਤਕ੍ਕੋ ਵਿਚਾਰੋ ਪੀਤਿ ਚਿਤ੍ਤਸ੍ਸੇਕਗ੍ਗਤਾ ਵੀਰਿਯਂ ਜੀਵਿਤਂ ਅਹਿਰਿਕਂ ਅਨੋਤ੍ਤਪ੍ਪਂ ਲੋਭੋ ਮੋਹੋ ਮਿਚ੍ਛਾਦਿਟ੍ਠੀਤਿ ਇਮੇ ਸਰੂਪੇਨਾਗਤਾ ਪਨ੍ਨਰਸ, ਛਨ੍ਦੋ ਅਧਿਮੋਕ੍ਖੋ ਉਦ੍ਧਚ੍ਚਂ ਮਨਸਿਕਾਰੋਤਿ ਇਮੇ ਚਤ੍ਤਾਰੋ ਨਿਯਤਯੇਵਾਪਨਕਾ, ਇਮੇ ਪਨ ਪਟਿਪਾਟਿਯਾ ਦਸਸੁ ਚਿਤ੍ਤੇਸੁ ਨਿਯਤਾ ਹੋਨ੍ਤਿ, ਮਾਨੋ ਇਸ੍ਸਾ ਮਚ੍ਛਰਿਯਂ ਕੁਕ੍ਕੁਚ੍ਚਂ ਥਿਨਮਿਦ੍ਧਨ੍ਤਿ ਇਮੇ ਛਯੇਵ ਅਨਿਯਤਯੇਵਾਪਨਕਾ.
੮੨. ਏਵਂ ਯੇਵਾਪਨਾ ਸਬ੍ਬੇ, ਨਿਯਤਾਨਿਯਤਾ ਦਸ;
ਨਿਦ੍ਦਿਟ੍ਠਾ ਪਾਪਚਿਤ੍ਤੇਸੁ, ਹਤਪਾਪੇਨ ਤਾਦਿਨਾ.
ਤਤ੍ਥ ਫਸ੍ਸੋਤਿ ਅਕੁਸਲਚਿਤ੍ਤਸਹਜਾਤੋ ਫਸ੍ਸੋ. ਏਸ ਨਯੋ ਸੇਸੇਸੁਪਿ. ਨ ਹਿਰੀਯਤੀਤਿ ਅਹਿਰਿਕੋ, ਅਹਿਰਿਕਸ੍ਸ ਭਾਵੋ ਅਹਿਰਿਕਂ. ਕਾਯਦੁਚ੍ਚਰਿਤਾਦੀਹਿ ਓਤ੍ਤਪ੍ਪਤੀਤਿ ਓਤ੍ਤਪ੍ਪਂ, ਨ ਓਤ੍ਤਪ੍ਪਂ ਅਨੋਤ੍ਤਪ੍ਪਂ. ਤਤ੍ਥ ਕਾਯਦੁਚ੍ਚਰਿਤਾਦੀਹਿ ਅਜਿਗੁਚ੍ਛਨਲਕ੍ਖਣਂ, ਅਲਜ੍ਜਾਲਕ੍ਖਣਂ ਵਾ ਅਹਿਰਿਕਂ, ਅਨੋਤ੍ਤਪ੍ਪਂ ਤੇਹੇਵ ਅਸਾਰਜ੍ਜਨਲਕ੍ਖਣਂ, ਅਨੁਤ੍ਤਾਸਲਕ੍ਖਣਂ ਵਾ.
ਲੁਬ੍ਭਨ੍ਤਿ ਤੇਨ, ਸਯਂ ਵਾ ਲੁਬ੍ਭਤਿ, ਲੁਬ੍ਭਨਮਤ੍ਤਮੇਵ ਵਾ ਤਨ੍ਤਿ ਲੋਭੋ. ਸੋ ਆਰਮ੍ਮਣਗਹਣਲਕ੍ਖਣੋ ਮਕ੍ਕਟਾਲੇਪੋ ਵਿਯ, ਅਭਿਸਙ੍ਗਰਸੋ ਤਤ੍ਤਕਪਾਲੇ ਪਕ੍ਖਿਤ੍ਤਮਂਸਪੇਸਿ ਵਿਯ, ਅਪਰਿਚ੍ਚਾਗਪਚ੍ਚੁਪਟ੍ਠਾਨੋ ਤੇਲਞ੍ਜਨਰਾਗੋ ਵਿਯ, ਸਂਯੋਜਨਿਯੇਸੁ ਧਮ੍ਮੇਸੁ ਅਸ੍ਸਾਦਦਸ੍ਸਨਪਦਟ੍ਠਾਨੋ.
ਮੁਯ੍ਹਨ੍ਤਿ ਤੇਨ, ਸਯਂ ਵਾ ਮੁਯ੍ਹਤਿ, ਮੁਯ੍ਹਨਮਤ੍ਤਮੇਵ ਵਾ ਤਨ੍ਤਿ ਮੋਹੋ. ਸੋ ਚਿਤ੍ਤਸ੍ਸ ਅਨ੍ਧਭਾਵਲਕ੍ਖਣੋ, ਅਞ੍ਞਾਣਲਕ੍ਖਣੋ ਵਾ, ਅਸਮ੍ਪਟਿਵੇਧਰਸੋ, ਆਰਮ੍ਮਣਸਭਾਵਚ੍ਛਾਦਨਰਸੋ ਵਾ, ਅਨ੍ਧਕਾਰਪਚ੍ਚੁਪਟ੍ਠਾਨੋ, ਅਯੋਨਿਸੋਮਨਸਿਕਾਰਪਦਟ੍ਠਾਨੋ.
ਮਿਚ੍ਛਾ ਪਸ੍ਸਨ੍ਤਿ ਤਾਯ, ਸਯਂ ਵਾ ਮਿਚ੍ਛਾ ਪਸ੍ਸਤਿ, ਮਿਚ੍ਛਾਦਸ੍ਸਨਮਤ੍ਤਮੇਵ ਵਾ ਏਸਾਤਿ ਮਿਚ੍ਛਾਦਿਟ੍ਠਿ. ਸਾ ਅਯੋਨਿਸੋਅਭਿਨਿਵੇਸਲਕ੍ਖਣਾ, ਪਰਾਮਾਸਰਸਾ, ਮਿਚ੍ਛਾਭਿਨਿਵੇਸਪਚ੍ਚੁਪਟ੍ਠਾਨਾ, ਅਰਿਯਾਨਂ ਅਦਸ੍ਸਨਕਾਮਤਾਦਿਪਦਟ੍ਠਾਨਾ.
ਉਦ੍ਧਤਭਾਵੋ ਉਦ੍ਧਚ੍ਚਂ. ਤਂ ਅਵੂਪਸਮਲਕ੍ਖਣਂ ਵਾਤਾਭਿਘਾਤਚਲਜਲਂ ਵਿਯ, ਅਨਵਟ੍ਠਾਨਰਸਂ ਵਾਤਾਭਿਘਾਤਚਲਧਜਪਟਾਕਾ ਵਿਯ, ਭਨ੍ਤਤ੍ਤਪਚ੍ਚੁਪਟ੍ਠਾਨਂ ਪਾਸਾਣਾਭਿਘਾਤਸਮੁਦ੍ਧਤਭਸ੍ਮਂ ਵਿਯ, ਅਯੋਨਿਸੋਮਨਸਿਕਾਰਪਦਟ੍ਠਾਨਂ.
ਮਞ੍ਞਤੀਤਿ ਮਾਨੋ. ਸੋ ਉਣ੍ਣਤਿਲਕ੍ਖਣੋ, ਸਮ੍ਪਗ੍ਗਹਣਰਸੋ, ਕੇਤੁਕਮ੍ਯਤਾਪਚ੍ਚੁਪਟ੍ਠਾਨੋ, ਦਿਟ੍ਠਿਵਿਪ੍ਪਯੁਤ੍ਤਲੋਭਪਦਟ੍ਠਾਨੋ.
ਇਸ੍ਸਤੀਤਿ ਇਸ੍ਸਾ. ਸਾ ਪਰਸਮ੍ਪਤ੍ਤੀਨਂ ਉਸੂਯਨਲਕ੍ਖਣਾ, ਤਤ੍ਥੇਵ ਅਨਭਿਰਤਿਰਸਾ, ਤਤੋ ਵਿਮੁਖਭਾਵਪਚ੍ਚੁਪਟ੍ਠਾਨਾ, ਪਰਸਮ੍ਪਤ੍ਤਿਪਦਟ੍ਠਾਨਾ.
ਮਚ੍ਛਰਭਾਵੋ ਮਚ੍ਛਰਿਯਂ. ਤਂ ਅਤ੍ਤਨੋ ਸਮ੍ਪਤ੍ਤੀਨਂ ਨਿਗੁਹਣਲਕ੍ਖਣਂ, ਤਾਸਂਯੇਵ ਪਰੇਹਿ ਸਾਧਾਰਣਭਾਵਅਕ੍ਖਮਨਰਸਂ, ਸਙ੍ਕੋਚਨਪਚ੍ਚੁਪਟ੍ਠਾਨਂ, ਅਤ੍ਤਸਮ੍ਪਤ੍ਤਿਪਦਟ੍ਠਾਨਂ.
ਕੁਚ੍ਛਿਤਂ ਕਤਂ ਕੁਕਤਂ, ਤਸ੍ਸ ਭਾਵੋ ਕੁਕ੍ਕੁਚ੍ਚਂ. ਤਂ ਪਚ੍ਛਾਨੁਤਾਪਲਕ੍ਖਣਂ, ਕਤਾਕਤਾਨੁਸੋਚਨਰਸਂ, ਵਿਪ੍ਪਟਿਸਾਰਪਚ੍ਚੁਪਟ੍ਠਾਨਂ, ਕਤਾਕਤਪਦਟ੍ਠਾਨਂ.
ਥਿਨਤਾ ਥਿਨਂ. ਮਿਦ੍ਧਤਾ ਮਿਦ੍ਧਂ. ਅਨੁਸ੍ਸਾਹਨਸਂਸੀਦਨਤਾ, ਅਸਤ੍ਤਿਵਿਘਾਤੋ ਚਾਤਿ ਅਤ੍ਥੋ. ਥਿਨਞ੍ਚ ਮਿਦ੍ਧਞ੍ਚ ਥਿਨਮਿਦ੍ਧਂ. ਤਤ੍ਥ ਥਿਨਂ ਅਨੁਸ੍ਸਾਹਨਲਕ੍ਖਣਂ, ਵੀਰਿਯਵਿਨੋਦਨਰਸਂ, ਸਂਸੀਦਨਭਾਵਪਚ੍ਚੁਪਟ੍ਠਾਨਂ. ਮਿਦ੍ਧਂ ਅਕਮ੍ਮਞ੍ਞਤਾਲਕ੍ਖਣਂ, ਓਨਹਨਰਸਂ, ਲੀਨਤਾਪਚ੍ਚੁਪਟ੍ਠਾਨਂ, ਉਭਯਮ੍ਪਿ ਅਯੋਨਿਸੋਮਨਸਿਕਾਰਪਦਟ੍ਠਾਨਂ. ਸੇਸਾ ਕੁਸਲੇ ਵੁਤ੍ਤਨਯੇਨ ਵੇਦਿਤਬ੍ਬਾ.
ਏਤ੍ਥ ਪਨ ਵਿਤਕ੍ਕਵੀਰਿਯਸਮਾਧੀਨਂ ਮਿਚ੍ਛਾਸਙ੍ਕਪ੍ਪਮਿਚ੍ਛਾਵਾਯਾਮਮਿਚ੍ਛਾਸਮਾਧਯੋ ਵਿਸੇਸਕਾ. ਇਤਿ ਇਮੇ ਏਕੂਨਵੀਸਤਿ ਚੇਤਸਿਕਾ ਪਠਮਾਕੁਸਲਚਿਤ੍ਤੇਨ ਸਮ੍ਪਯੋਗਂ ਗਚ੍ਛਨ੍ਤੀਤਿ ਵੇਦਿਤਬ੍ਬਾ. ਯਥਾ ਚ ਪਠਮੇਨ, ਏਵਂ ਦੁਤਿਯੇਨਾਪਿ. ਸਸਙ੍ਖਾਰਭਾਵੋ ਚੇਤ੍ਥ ਥਿਨਮਿਦ੍ਧਸ੍ਸ ਨਿਯਤਭਾਵੋ ਚ ਵਿਸੇਸੋ. ਤਤਿਯੇਨ ਪਠਮੇ ਵੁਤ੍ਤੇਸੁ ਠਪੇਤ੍ਵਾ ਦਿਟ੍ਠਿਂ ਸੇਸਾ ਅਟ੍ਠਾਰਸ ਵੇਦਿਤਬ੍ਬਾ. ਮਾਨੋ ਪਨੇਤ੍ਥ ਅਨਿਯਤੋ ਹੋਤਿ, ਦਿਟ੍ਠਿਯਾ ਸਹ ਨ ਉਪ੍ਪਜ੍ਜਤੀਤਿ. ਚਤੁਤ੍ਥੇਨ ਦੁਤਿਯੇ ਵੁਤ੍ਤੇਸੁ ਠਪੇਤ੍ਵਾ ਦਿਟ੍ਠਿਂ ਅਵਸੇਸਾ ਵੇਦਿਤਬ੍ਬਾ. ਏਤ੍ਥਾਪਿ ਚ ਮਾਨੋ ਅਨਿਯਤੋ ਹੋਤਿ. ਪਞ੍ਚਮੇਨ ਪਠਮੇ ਵੁਤ੍ਤੇਸੁ ਠਪੇਤ੍ਵਾ ਪੀਤਿਂ ਅਵਸੇਸਾ ਸਮ੍ਪਯੋਗਂ ਗਚ੍ਛਨ੍ਤੀਤਿ. ਸੋਮਨਸ੍ਸਟ੍ਠਾਨੇ ਪਨੇਤ੍ਥ ਉਪੇਕ੍ਖਾ ਪਵਿਟ੍ਠਾ. ਛਟ੍ਠੇਨਾਪਿ ਪਞ੍ਚਮੇ ਵੁਤ੍ਤਸਦਿਸਾ ਏਵ. ਸਸਙ੍ਖਾਰਤਾ, ਥਿਨਮਿਦ੍ਧਸ੍ਸ ਨਿਯਤਭਾਵੋ ਚ ਵਿਸੇਸੋ. ਸਤ੍ਤਮੇਨ ਪਞ੍ਚਮੇ ਵੁਤ੍ਤੇਸੁ ਠਪੇਤ੍ਵਾ ਦਿਟ੍ਠਿਂ ਅਵਸੇਸਾ ਵੇਦਿਤਬ੍ਬਾ. ਮਾਨੋ ਪਨੇਤ੍ਥ ਅਨਿਯਤੋ. ਅਟ੍ਠਮੇਨ ਛਟ੍ਠੇ ਵੁਤ੍ਤੇਸੁ ਠਪੇਤ੍ਵਾ ਦਿਟ੍ਠਿਂ ਅਵਸੇਸਾ ਵੇਦਿਤਬ੍ਬਾ. ਏਤ੍ਥਾਪਿ ਮਾਨੋ ਅਨਿਯਤੋ ਹੋਤਿ. ਏਵਂ ਲੋਭਮੂਲਚੇਤਸਿਕਾ ਵੇਦਿਤਬ੍ਬਾ.
ਦੋਮਨਸ੍ਸਸਹਗਤੇਸੁ ਪਟਿਘਸਮ੍ਪਯੁਤ੍ਤੇਸੁ ਦੋਸਮੂਲੇਸੁ ਦ੍ਵੀਸੁ ਪਠਮੇਨ ਅਸਙ੍ਖਾਰਿਕੇਨ ਸਮ੍ਪਯੁਤ੍ਤਾ ਨਿਯਤਾ ਸਰੂਪੇਨਾਗਤਾ ਤੇਰਸ. ਸੇਯ੍ਯਥਿਦਂ – ਫਸ੍ਸੋ ਦੋਮਨਸ੍ਸਵੇਦਨਾ ਸਞ੍ਞਾ ਚੇਤਨਾ ਚਿਤ੍ਤੇਕਗ੍ਗਤਾ ਵਿਤਕ੍ਕੋ ਵਿਚਾਰੋ ਵੀਰਿਯਂ ਜੀਵਿਤਂ ਅਹਿਰਿਕਂ ਅਨੋਤ੍ਤਪ੍ਪਂ ਦੋਸੋ ਮੋਹੋ ਚੇਤਿ ਇਮੇ ਤੇਰਸ ਧਮ੍ਮਾ ਛਨ੍ਦਾਦੀਹਿ ਚਤੂਹਿ ਨਿਯਤਯੇਵਾਪਨਕੇਹਿ ਸਤ੍ਤਰਸ ਹੋਨ੍ਤਿ ਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚੇਸੁ ਅਨਿਯਤੇਸੁ ਤੀਸੁ ਏਕੇਨ ਸਹ ਅਟ੍ਠਾਰਸ ਹੋਨ੍ਤਿ, ਏਤੇਪਿ ਤਯੋ ਨ ਏਕਤੋ ਉਪ੍ਪਜ੍ਜਨ੍ਤਿ.
ਤਤ੍ਥ ਦੁਟ੍ਠੁ ਮਨੋਤਿ ਦੁਮਨੋ, ਦੁਮਨਸ੍ਸ ਭਾਵੋ ਦੋਮਨਸ੍ਸਂ, ਦੋਮਨਸ੍ਸਵੇਦਨਾਯੇਤਂ ਅਧਿਵਚਨਂ. ਤੇਨ ਸਹਗਤਂ ਦੋਮਨਸ੍ਸਸਹਗਤਂ. ਤਂ ਅਨਿਟ੍ਠਾਰਮ੍ਮਣਾਨੁਭਵਨਲਕ੍ਖਣਂ, ਅਨਿਟ੍ਠਾਕਾਰਸਮ੍ਭੋਗਰਸਂ, ਚੇਤਸਿਕਾਬਾਧਪਚ੍ਚੁਪਟ੍ਠਾਨਂ, ਏਕਨ੍ਤੇਨੇਵ ਹਦਯਵਤ੍ਥੁਪਦਟ੍ਠਾਨਂ.
ਦੁਸ੍ਸਨ੍ਤਿ ਤੇਨ, ਸਯਂ ਵਾ ਦੁਸ੍ਸਤਿ, ਦੁਸ੍ਸਨਮਤ੍ਤਮੇਵ ਵਾ ਤਨ੍ਤਿ ਦੋਸੋ. ਸੋ ਚਣ੍ਡਿਕ੍ਕਲਕ੍ਖਣੋ ਪਹਤਾਸੀਵਿਸੋ ਵਿਯ, ਵਿਸਪ੍ਪਨਰਸੋ ਵਿਸਨਿਪਾਤੋ ਵਿਯ, ਅਤ੍ਤਨੋ ਨਿਸ੍ਸਯਦਹਨਰਸੋ ਵਾ ਦਾਵਗ੍ਗਿ ਵਿਯ, ਦੁਸ੍ਸਨਪਚ੍ਚੁਪਟ੍ਠਾਨੋ ਲਦ੍ਧੋਕਾਸੋ ਵਿਯ ਸਪਤ੍ਤੋ, ਆਘਾਤਵਤ੍ਥੁਪਦਟ੍ਠਾਨੋ. ਅਵਸੇਸਾ ਹੇਟ੍ਠਾ ਵੁਤ੍ਤਪ੍ਪਕਾਰਾਵ. ਇਤਿ ਇਮੇ ਸਤ੍ਤਰਸ ਵਾ ਅਟ੍ਠਾਰਸ ਵਾ ਨਵਮੇਨ ਸਮ੍ਪਯੋਗਂ ਗਚ੍ਛਨ੍ਤੀਤਿ ਵੇਦਿਤਬ੍ਬਾ. ਯਥਾ ਚ ਨਵਮੇਨ, ਏਵਂ ਦਸਮੇਨਾਪਿ. ਸਸਙ੍ਖਾਰਤਾ, ਪਨੇਤ੍ਥ ਥਿਨਮਿਦ੍ਧਸਮ੍ਭਵੋ ਚ ਵਿਸੇਸੋ.
ਦ੍ਵੀਸੁ ਪਨ ਮੋਹਮੂਲੇਸੁ ਵਿਚਿਕਿਚ੍ਛਾਸਮ੍ਪਯੁਤ੍ਤੇਨ ਏਕਾਦਸਮੇਨ ਸਮ੍ਪਯੁਤ੍ਤਾ ਤਾਵ ਫਸ੍ਸੋ ਉਪੇਕ੍ਖਾਵੇਦਨਾ ਸਞ੍ਞਾ ਚੇਤਨਾ ਵਿਤਕ੍ਕੋ ਵਿਚਾਰੋ ਵੀਰਿਯਂ ਜੀਵਿਤਂ ਚਿਤ੍ਤਟ੍ਠਿਤਿ ਅਹਿਰਿਕਂ ਅਨੋਤ੍ਤਪ੍ਪਂ ਮੋਹੋ ਵਿਚਿਕਿਚ੍ਛਾਤਿ ਸਰੂਪੇਨਾਗਤਾ ਤੇਰਸ, ਉਦ੍ਧਚ੍ਚਂ ਮਨਸਿਕਾਰੋਤਿ ਦ੍ਵੇ ਯੇਵਾਪਨਕਾ ਨਿਯਤਾ. ਤੇਹਿ ਸਦ੍ਧਿਂ ਪਨ੍ਨਰਸ ਹੋਨ੍ਤਿ.
ਤਤ੍ਥ ਪਵਤ੍ਤਟ੍ਠਿਤਿਮਤ੍ਤਾ ਏਕਗ੍ਗਤਾ. ਵਿਗਤਾ ਚਿਕਿਚ੍ਛਾਤਿ ਵਿਚਿਕਿਚ੍ਛਾ. ਸਭਾਵਂ ਵਿਚਿਨਨ੍ਤੋ ਏਤਾਯ ਕਿਚ੍ਛਤਿ ਕਿਲਮਤੀਤਿ ਵਿਚਿਕਿਚ੍ਛਾ. ਸਾ ਸਂਸਯਲਕ੍ਖਣਾ, ਕਮ੍ਪਨਰਸਾ, ਅਨਿਚ੍ਛਯਪਚ੍ਚੁਪਟ੍ਠਾਨਾ, ਅਯੋਨਿਸੋਮਨਸਿਕਾਰਪਦਟ੍ਠਾਨਾ. ਸੇਸਾ ਵੁਤ੍ਤਨਯਾ ਏਵ.
ਦ੍ਵਾਦਸਮੇਨ ਉਦ੍ਧਚ੍ਚਸਮ੍ਪਯੁਤ੍ਤੇਨ ਸਮ੍ਪਯੁਤ੍ਤਾ ਸਰੂਪੇਨਾਗਤਾ ਵਿਚਿਕਿਚ੍ਛਾਸਹਗਤੇ ਵੁਤ੍ਤੇਸੁ ਵਿਚਿਕਿਚ੍ਛਾਹੀਨਾ ਉਦ੍ਧਚ੍ਚਂ ਸਰੂਪੇਨ ਆਗਤਂ, ਤਸ੍ਮਾ ਤੇਰਸੇਵ ਹੋਨ੍ਤਿ. ਵਿਚਿਕਿਚ੍ਛਾਯ ਅਭਾਵੇਨ ਪਨੇਤ੍ਥ ਅਧਿਮੋਕ੍ਖੋ ਉਪ੍ਪਜ੍ਜਤਿ, ਤੇਨ ਸਦ੍ਧਿਂ ਚੁਦ੍ਦਸ ਹੋਨ੍ਤਿ. ਅਧਿਮੋਕ੍ਖਸਮ੍ਭਵਤੋ ਸਮਾਧਿ ਬਲਵਾ ਹੋਤਿ, ਅਧਿਮੋਕ੍ਖਮਨਸਿਕਾਰਾ ਦ੍ਵੇ ਯੇਵਾਪਨਕਾ, ਤੇਹਿ ਸਹ ਪਨ੍ਨਰਸੇਵ ਹੋਨ੍ਤਿ. ਏਵਂ ਤਾਵ ਅਕੁਸਲਚੇਤਸਿਕਾ ਵੇਦਿਤਬ੍ਬਾ.
ਇਦਾਨਿ ਅਬ੍ਯਾਕਤਾ ਵੁਚ੍ਚਨ੍ਤਿ, ਅਬ੍ਯਾਕਤਾ ਪਨ ਦੁਵਿਧਾ ਵਿਪਾਕਕਿਰਿਯਭੇਦਤੋ. ਤਤ੍ਥ ਵਿਪਾਕਾ ਕੁਸਲਾ ਵਿਯ ਭੂਮਿਵਸੇਨ ਚਤੁਬ੍ਬਿਧਾ ਕਾਮਾਵਚਰਂ ਰੂਪਾਵਚਰਂ ਅਰੂਪਾਵਚਰਂ ਲੋਕੁਤ੍ਤਰਞ੍ਚੇਤਿ. ਤਤ੍ਥ ਕਾਮਾਵਚਰਵਿਪਾਕਾ ਸਹੇਤੁਕਾਹੇਤੁਕਵਸੇਨ ਦੁਵਿਧਾ. ਤਤ੍ਥ ਸਹੇਤੁਕਵਿਪਾਕਸਮ੍ਪਯੁਤ੍ਤਾ ਸਹੇਤੁਕਾ. ਤੇ ਸਹੇਤੁਕਕਾਮਾਵਚਰਕੁਸਲਸਮ੍ਪਯੁਤ੍ਤਸਦਿਸਾ. ਯਾ ਪਨ ਕਰੁਣਾਮੁਦਿਤਾ ਅਨਿਯਤਾ, ਤਾ ਸਤ੍ਤਾਰਮ੍ਮਣਤ੍ਤਾ ਵਿਪਾਕੇਸੁ ਨੁਪ੍ਪਜ੍ਜਨ੍ਤਿ. ਕਾਮਾਵਚਰਵਿਪਾਕਾਨਂ ਏਕਨ੍ਤਪਰਿਤ੍ਤਾਰਮ੍ਮਣਤ੍ਤਾ ਵਿਰਤਿਯੋ ਪਨੇਤ੍ਥ ਏਕਨ੍ਤਕੁਸਲਤ੍ਤਾ ਨ ਲਬ੍ਭਨ੍ਤਿ. ਵਿਭਙ੍ਗੇ ‘‘ਪਞ੍ਚ ਸਿਕ੍ਖਾਪਦਾ ਕੁਸਲਾਯੇਵਾ’’ਤਿ ਹਿ ਵੁਤ੍ਤਂ. ਏਵਂ ਕਾਮਾਵਚਰਸਹੇਤੁਕਵਿਪਾਕਚੇਤਸਿਕਾ ਵੇਦਿਤਬ੍ਬਾ.
੮੩. ਤੇਤ੍ਤਿਂਸਾਦਿਦ੍ਵਯੇ ਧਮ੍ਮਾ, ਦ੍ਵਤ੍ਤਿਂਸੇਵ ਤਤੋ ਪਰੇ;
ਬਾਤ੍ਤਿਂਸ ਪਞ੍ਚਮੇ ਛਟ੍ਠੇ, ਏਕਤਿਂਸ ਤਤੋ ਪਰੇ.
ਅਹੇਤੁਕਚਿਤ੍ਤਸਮ੍ਪਯੁਤ੍ਤਾ ਪਨ ਅਹੇਤੁਕਾ. ਤੇਸੁ ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਾ ਤਾਵ ਫਸ੍ਸੋ ਉਪੇਕ੍ਖਾਵੇਦਨਾ ਸਞ੍ਞਾ ਚੇਤਨਾ ਜੀਵਿਤਂ ਚਿਤ੍ਤਟ੍ਠਿਤੀਤਿ ਸਰੂਪੇਨਾਗਤਾ ਛ, ਮਨਸਿਕਾਰੇਨ ਚ ਸਤ੍ਤ ਹੋਨ੍ਤਿ. ਸੋਤਘਾਨਜਿਵ੍ਹਾਕਾਯਵਿਞ੍ਞਾਣਸਮ੍ਪਯੁਤ੍ਤਾਪਿ ਸਤ੍ਤ ਸਤ੍ਤੇਵ ਚੇਤਸਿਕਾ. ਤਤ੍ਥ ਕਾਯਵਿਞ੍ਞਾਣਸਮ੍ਪਯੁਤ੍ਤੇਸੁ ਪਨ ਉਪੇਕ੍ਖਾਠਾਨੇ ਸੁਖਵੇਦਨਾ ਪਵਿਟ੍ਠਾ. ਸਾ ਕਾਯਿਕਸਾਤਲਕ੍ਖਣਾ, ਪੀਣਨਰਸਾ, ਸੇਸਾ ਵੁਤ੍ਤਨਯਾ ਏਵ.
੮੪. ਇਟ੍ਠਾਰਮ੍ਮਣਯੋਗਸ੍ਮਿਂ, ਚਕ੍ਖੁਵਿਞ੍ਞਾਣਕਾਦਿਸੁ;
ਸਤਿ ਕਸ੍ਮਾ ਉਪੇਕ੍ਖਾਵ, ਵੁਤ੍ਤਾ ਚਤੂਸੁ ਸਤ੍ਥੁਨਾ.
੮੫. ਉਪਾਦਾਯ ਚ ਰੂਪੇਨ, ਉਪਾਦਾਰੂਪਕੇ ਪਨ;
ਸਙ੍ਘਟ੍ਟਨਾਨਿਘਂਸਸ੍ਸ, ਦੁਬ੍ਬਲਤ੍ਤਾਤਿ ਦੀਪਯੇ.
੮੬. ਪਸਾਦਂ ਪਨਤਿਕ੍ਕਮ੍ਮ, ਕੂਟਂਵ ਪਿਚੁਪਿਣ੍ਡਕਂ;
ਭੂਤਰੂਪੇਨ ਭੂਤਾਨਂ, ਘਟ੍ਟਨਾਯ ਸੁਖਾਦਿਕਂ.
ਤਸ੍ਮਾ ਕਾਯਵਿਞ੍ਞਾਣਂ ਸੁਖਾਦਿਸਮ੍ਪਯੁਤ੍ਤਨ੍ਤਿ ਵੇਦਿਤਬ੍ਬਂ. ਮਨੋਧਾਤੁਨਾ ਸਮ੍ਪਯੁਤ੍ਤਾ ਸਰੂਪੇਨਾਗਤਾ ਚਕ੍ਖੁਵਿਞ੍ਞਾਣੇਨ ਸਦ੍ਧਿਂ ਵੁਤ੍ਤਾ ਛ, ਵਿਤਕ੍ਕਵਿਚਾਰੇਹਿ ਸਹ ਅਟ੍ਠ, ਅਧਿਮੋਕ੍ਖਮਨਸਿਕਾਰੇਹਿ ਦ੍ਵੀਹਿ ਯੇਵਾਪਨਕੇਹਿ ਦਸ ਧਮ੍ਮਾ ਹੋਨ੍ਤਿ. ਤਥਾ ਮਨੋਵਿਞ੍ਞਾਣਧਾਤੁਉਪੇਕ੍ਖਾਸਹਗਤੇਨ. ਸੋਮਨਸ੍ਸਸਹਗਤੇਨ ਪੀਤਿਅਧਿਕਾ ਵੇਦਨਾਪਰਿਵਤ੍ਤਨਞ੍ਚ ਨਾਨਤ੍ਤਂ. ਤਸ੍ਮਾਵੇਤ੍ਥ ਏਕਾਦਸ ਧਮ੍ਮਾ ਹੋਨ੍ਤਿ. ਏਵਂ ਅਹੇਤੁਕਾਪਿ ਕਾਮਾਵਚਰਵਿਪਾਕਚੇਤਸਿਕਾ ਵੇਦਿਤਬ੍ਬਾ.
ਰੂਪਾਵਚਰਵਿਪਾਕਚਿਤ੍ਤਸਮ੍ਪਯੁਤ੍ਤਾ ਪਨ ਰੂਪਾਵਚਰਾ. ਅਰੂਪਾਵਚਰਵਿਪਾਕਚਿਤ੍ਤਸਮ੍ਪਯੁਤ੍ਤਾ ਅਰੂਪਾਵਚਰਾ. ਤੇ ਸਬ੍ਬੇਪਿ ਅਤ੍ਤਨੋ ਅਤ੍ਤਨੋ ਕੁਸਲਚਿਤ੍ਤਸਮ੍ਪਯੁਤ੍ਤਚੇਤਸਿਕੇਹਿ ਸਦਿਸਾਯੇਵਾਤਿ.
ਲੋਕੁਤ੍ਤਰਵਿਪਾਕਚਿਤ੍ਤਸਮ੍ਪਯੁਤ੍ਤਾ ਲੋਕੁਤ੍ਤਰਾ. ਤੇ ਸਬ੍ਬੇ ਤੇਸਂਯੇਵ ਲੋਕੁਤ੍ਤਰਵਿਪਾਕਚਿਤ੍ਤਾਨਂ ਸਦਿਸਾ ਕੁਸਲਚਿਤ੍ਤਸਮ੍ਪਯੁਤ੍ਤੇਹਿ ਚੇਤਸਿਕੇਹਿ ਸਦਿਸਾ. ਏਵਂ ਰੂਪਾਵਚਰਾਰੂਪਾਵਚਰਲੋਕੁਤ੍ਤਰਵਿਪਾਕਚੇਤਸਿਕਾ ਵੇਦਿਤਬ੍ਬਾ.
ਅਕੁਸਲਵਿਪਾਕਚਿਤ੍ਤਸਮ੍ਪਯੁਤ੍ਤਾ ਪਨ ਅਕੁਸਲਵਿਪਾਕਚੇਤਸਿਕਾ ਨਾਮ. ਤੇ ਪਨ ਕੁਸਲਵਿਪਾਕਾਹੇਤੁਕਚਿਤ੍ਤੇਸੁ ਚਕ੍ਖੁਵਿਞ੍ਞਾਣਾਦੀਸੁ ਵੁਤ੍ਤਚੇਤਸਿਕਸਦਿਸਾ. ਏਤ੍ਥ ਪਨ ਕਾਯਵਿਞ੍ਞਾਣੇ ਦੁਕ੍ਖਵੇਦਨਾ ਪਵਿਟ੍ਠਾ. ਸਾ ਕਾਯਿਕਾਬਾਧਲਕ੍ਖਣਾ. ਸੇਸਾ ਵੁਤ੍ਤਨਯਾਯੇਵਾਤਿ. ਏਵਂ ਛਤ੍ਤਿਂਸ ਵਿਪਾਕਚਿਤ੍ਤਸਮ੍ਪਯੁਤ੍ਤਚੇਤਸਿਕਾ ਵੇਦਿਤਬ੍ਬਾ.
ਕਿਰਿਯਾਬ੍ਯਾਕਤਾ ਚ ਚੇਤਸਿਕਾ ਭੂਮਿਤੋ ਤਿਵਿਧਾ ਹੋਨ੍ਤਿ ਕਾਮਾਵਚਰਾ ਰੂਪਾਵਚਰਾ ਅਰੂਪਾਵਚਰਾਤਿ. ਤਤ੍ਥ ਕਾਮਾਵਚਰਾ ਸਹੇਤੁਕਾਹੇਤੁਕਤੋ ਦੁਵਿਧਾ ਹੋਨ੍ਤਿ. ਤੇਸੁ ਸਹੇਤੁਕਕਿਰਿਯਚਿਤ੍ਤਸਮ੍ਪਯੁਤ੍ਤਾ ਸਹੇਤੁਕਾ, ਤੇ ਪਨ ਅਟ੍ਠਹਿ ਕਾਮਾਵਚਰਕੁਸਲਚਿਤ੍ਤਸਮ੍ਪਯੁਤ੍ਤੇਹਿ ਸਮਾਨਾ ਠਪੇਤ੍ਵਾ ਵਿਰਤਿਤ੍ਤਯਂ ਅਨਿਯਤਯੇਵਾਪਨਕੇਸੁ ਕਰੁਣਾਮੁਦਿਤਾਯੇਵ ਉਪ੍ਪਜ੍ਜਨ੍ਤਿ. ਅਹੇਤੁਕਕਿਰਿਯਚਿਤ੍ਤਸਮ੍ਪਯੁਤ੍ਤਾ ਅਹੇਤੁਕਾ, ਤੇ ਕੁਸਲਵਿਪਾਕਾਹੇਤੁਕਮਨੋਧਾਤੁਮਨੋਵਿਞ੍ਞਾਣਧਾਤੁਚਿਤ੍ਤਸਮ੍ਪਯੁਤ੍ਤੇਹਿ ਸਮਾਨਾ. ਮਨੋਵਿਞ੍ਞਾਣਧਾਤੁਦ੍ਵਯੇ ਪਨ ਵੀਰਿਯਿਨ੍ਦ੍ਰਿਯਂ ਅਧਿਕਂ. ਵੀਰਿਯਿਨ੍ਦ੍ਰਿਯਸਮ੍ਭਵਤੋ ਪਨੇਤ੍ਥ ਬਲਪ੍ਪਤ੍ਤੋ ਸਮਾਧਿ ਹੋਤਿ. ਹਸਿਤੁਪ੍ਪਾਦਚਿਤ੍ਤੇਨ ਸਮ੍ਪਯੁਤ੍ਤਾ ਦ੍ਵਾਦਸ ਧਮ੍ਮਾ ਹੋਨ੍ਤਿ ਪੀਤਿਯਾ ਸਹ. ਅਯਮੇਤ੍ਥ ਵਿਸੇਸੋ.
ਰੂਪਾਵਚਰਕਿਰਿਯਚਿਤ੍ਤਸਮ੍ਪਯੁਤ੍ਤਾ ਪਨ ਰੂਪਾਵਚਰਾ. ਅਰੂਪਾਵਚਰਕਿਰਿਯਚਿਤ੍ਤਸਮ੍ਪਯੁਤ੍ਤਾ ਅਰੂਪਾਵਚਰਾ. ਤੇ ਸਬ੍ਬੇਪਿ ਸਕਸਕਭੂਮਿਕੁਸਲਚਿਤ੍ਤਸਮ੍ਪਯੁਤ੍ਤੇਹਿ ਸਮਾਨਾਤਿ. ਏਵਂ ਵੀਸਤਿ ਕਿਰਿਯਚਿਤ੍ਤਸਮ੍ਪਯੁਤ੍ਤਾ ਚ ਚੇਤਸਿਕਾ ਵੇਦਿਤਬ੍ਬਾ.
ਏਤ੍ਤਾਵਤਾ ਕੁਸਲਾਕੁਸਲਵਿਪਾਕਕਿਰਿਯਭੇਦਭਿਨ੍ਨੇਨ ਏਕੂਨਨਵੁਤਿਯਾ ਚਿਤ੍ਤੇਨ ਸਮ੍ਪਯੁਤ੍ਤਾ ਚੇਤਸਿਕਾ ਨਿਦ੍ਦਿਟ੍ਠਾ ਹੋਨ੍ਤਿ.
੮੭. ਕੁਸਲਾਕੁਸਲੇਹਿ ਵਿਪਾਕਕ੍ਰਿਯਾ-
ਹਦਯੇਹਿ ਯੁਤਾ ਪਨ ਚੇਤਸਿਕਾ;
ਸਕਲਾਪਿ ਚ ਸਾਧੁ ਮਯਾ ਕਥਿਤਾ,
ਸੁਗਤੇਨ ਮਹਾਮੁਨਿਨਾ ਕਥਿਤਾ.
੮੮. ਅਵਗਚ੍ਛਤਿ ਯੋ ਇਮਂ ਅਨੁਨਂ,
ਪਰਮਂ ਤਸ੍ਸ ਸਮਨ੍ਤਤੋ ਮਤਿ;
ਅਭਿਧਮ੍ਮਨਯੇ ਦੂਰਾਸਦੇ,
ਅਤਿਗਮ੍ਭੀਰਠਾਨੇ ਵਿਜਮ੍ਭਤੇ.
ਇਤਿ ਅਭਿਧਮ੍ਮਾਵਤਾਰੇ ਚੇਤਸਿਕਨਿਦ੍ਦੇਸੋ ਨਾਮ
ਦੁਤਿਯੋ ਪਰਿਚ੍ਛੇਦੋ.