੪. ਚਤੁਤ੍ਥੋ ਪਰਿਚ੍ਛੇਦੋ
ਪਕਿਣ੍ਣਕਵਿਭਾਗੋ
੨੧੧. ਇਤੋ ਪਰਂ ਕਿਚ੍ਚਤੋ ਚ, ਦ੍ਵਾਰਾਲਮ੍ਬਣਵਤ੍ਥੁਤੋ;
ਭੂਮਿਪੁਗ੍ਗਲਤੋ ਠਾਨਾ, ਜਨਕਾ ਚ ਯਥਾਰਹਂ.
੨੧੨. ਸਙ੍ਗਹੋ ਚ ਪਵਤ੍ਤਿ ਚ, ਪਟਿਸਨ੍ਧਿਪਵਤ੍ਤਿਸੁ;
ਚਿਤ੍ਤੁਪ੍ਪਾਦਵਸੇਨੇਵ, ਸਂਖਿਪਿਤ੍ਵਾਨ ਨਿਯ੍ਯਤੇ.
੨੧੩. ਰੂਪਾਰੂਪਮਹਾਪਾਕਾ, ਮੁਪੇਕ੍ਖਾਤੀਰਣਦ੍ਵਯਂ;
ਚੁਤਿਸਨ੍ਧਿਭਵਙ੍ਗਾਨਿ, ਚਿਤ੍ਤਾਨੇਕੂਨਵੀਸਤਿ.
੨੧੪. ਆਵਜ੍ਜਨਂ ਤੁ ਯੁਗਲ਼ਂ, ਦਸ੍ਸਨਂ ਸਵਨਂ ਤਥਾ;
ਘਾਯਨਂ ਸਾਯਨਞ੍ਚੇਵ, ਫੁਸਨਂ ਸਮ੍ਪਟਿਚ੍ਛਨਂ.
੨੧੫. ਤੀਣਿ ਤੀਰਣਚਿਤ੍ਤਾਨਿ, ਏਕਂ ਵੋਟ੍ਠਬ੍ਬਨਂ ਮਤਂ;
ਪਞ੍ਚਦ੍ਵਾਰੇ ਮਨੋਦ੍ਵਾਰੇ, ਤਦਾਵਜ੍ਜਨਨਾਮਕਂ.
੨੧੬. ਪਞ੍ਚਪਞ੍ਞਾਸ ਜਵਨਕਿਚ੍ਚਾਨੀਤਿ ਵਿਨਿਦ੍ਦਿਸੇ;
ਕ੍ਰਿਯਾ ਚਾਵਜ੍ਜਨਂ ਹਿਤ੍ਵਾ, ਕੁਸਲਾਕੁਸਲਪ੍ਫਲਂ.
੨੧੭. ਤਦਾਲਮ੍ਬਣਚਿਤ੍ਤਾਨਿ, ਭਵਨ੍ਤੇਕਾਦਸੇਵ ਹਿ;
ਮਹਾਵਿਪਾਕਚਿਤ੍ਤਾਨਿ, ਅਟ੍ਠ ਸਨ੍ਤੀਰਣਤ੍ਤਯਂ.
੨੧੮. ਪਞ੍ਚਕਿਚ੍ਚਨ੍ਤਿ ਭਾਸਨ੍ਤਿ, ਉਪੇਕ੍ਖਾਤੀਰਣਦ੍ਵਯਂ;
ਚਤੁਕਿਚ੍ਚਾ ਮਹਾਪਾਕਾ, ਤਿਕਕਿਚ੍ਚਾ ਮਹਗ੍ਗਤਾ.
੨੧੯. ਦੁਕਿਚ੍ਚਮਿਤਿ ਵੋਟ੍ਠਬ੍ਬਂ, ਸੁਖਤੀਰਣਮੀਰਿਤਂ;
ਪਞ੍ਚਵਿਞ੍ਞਾਣਜਵਨਮਨੋਧਾਤੁਤ੍ਤਿਕਂ ਪਨ.
੨੨੦. ਏਕਕਿਚ੍ਚਾਤਿ ਭਾਸਨ੍ਤਿ, ਅਟ੍ਠਸਟ੍ਠਿ ਵਿਭਾਵਿਨੋ;
ਇਚ੍ਚੇਵਂ ਕਿਚ੍ਚਭੇਦੇਨ, ਚਿਤ੍ਤੁਪ੍ਪਾਦਾ ਵਵਤ੍ਥਿਤਾ.
੨੨੧. ਚਕ੍ਖੁਸੋਤਘਾਨਜਿਵ੍ਹਾ-ਕਾਯਧਾਤੁ ਯਥਾਕ੍ਕਮਂ;
ਪਞ੍ਚਦ੍ਵਾਰਾ ਭਵਙ੍ਗਂ ਤੁ, ਮਨੋਦ੍ਵਾਰਂ ਪਵੁਚ੍ਚਤਿ.
੨੨੨. ਘਾਨਾਦਯੋ ਤਯੋ ਰੂਪੇ, ਪਞ੍ਚ ਚਕ੍ਖਾਦਯੋ ਤਥਾ;
ਅਰੂਪੇ ਨਤ੍ਥੁਭਯਤ੍ਥ, ਤਦਾਲਮ੍ਬਣਮਾਨਸਂ.
੨੨੩. ਛ ਦ੍ਵਾਰਾ ਵੀਥਿਚਿਤ੍ਤਾਨਿ, ਸਤ੍ਤ ਕਾਮੀਸੁ ਰੂਪਿਸੁ;
ਦ੍ਵਾਰਤ੍ਤਯਂ ਛ ਚਿਤ੍ਤਾਨਿ, ਮਨੋਦ੍ਵਾਰਮਰੂਪਿਸੁ.
੨੨੪. ਪਟਿਸਨ੍ਧਾਦਿਭੂਤਾ ਹਿ, ਅਵਸਾਨੇ ਚੁਤਿਟ੍ਠਿਤਾ;
ਮਜ੍ਝੇ ਭਵਙ੍ਗਂ ਛੇਤ੍ਵਾਨ, ਪਚ੍ਚੇਕਂ ਵੀਥਿ ਜਾਯਤਿ.
੨੨੫. ਰੂਪਾਦਾਰਮ੍ਮਣੇ ਚਕ੍ਖੁ-ਪਸਾਦਾਦਿਮ੍ਹਿ ਘਟ੍ਟਿਤੇ;
ਆਵਜ੍ਜਨਾਦਯੋ ਹੋਨ੍ਤਿ, ਭਵਙ੍ਗਦ੍ਵਿਚਲਾ ਪਰਂ.
੨੨੬. ਪਰਿਣਾਮੇ ਭਵਙ੍ਗਸ੍ਸ, ਆਲਮ੍ਬੇ ਗਹਣਾਰਹੇ;
ਤਥਾ ਵੀਥਿ ਮਨੋਦ੍ਵਾਰੇ, ਯਥਾਸਮ੍ਭਵਤੋ ਭਵੇ.
੨੨੭. ਆਵਜ੍ਜਾ ਪਞ੍ਚਵਿਞ੍ਞਾਣਂ, ਸਮ੍ਪਟਿਚ੍ਛਨਤੀਰਣਂ;
ਵੋਟ੍ਠਬ੍ਬਕਾਮਜਵਨਂ, ਤਦਾਲਮ੍ਬਣਮਾਨਸਂ.
੨੨੮. ਸਤ੍ਤੇਵਂ ਵੀਥਿਚਿਤ੍ਤਾਨਿ, ਚਿਤ੍ਤੁਪ੍ਪਾਦਾ ਚਤੁਦ੍ਦਸ;
ਚਤੁਪਞ੍ਞਾਸ ਵਿਤ੍ਥਾਰਾ, ਪਞ੍ਚਦ੍ਵਾਰੇ ਯਥਾਰਹਂ.
੨੨੯. ਉਪ੍ਪਾਦਟ੍ਠਿਤਿਭਙ੍ਗਾਨਂ, ਵਸਾ ਚਿਤ੍ਤਕ੍ਖਣਂ ਤਯਂ;
ਰੂਪਾਨਂ ਠਿਤਿ ਏਕੂਨ-ਪਞ੍ਞਾਸਞ੍ਚ ਦੁਕੇ ਦੁਕਂ.
੨੩੦. ਪਰਿਤ੍ਤੇਤਿਪਰਿਤ੍ਤੇ ਚ, ਮਹਨ੍ਤੇਤਿਮਹਨ੍ਤਕੇ;
ਵੋਟ੍ਠਬ੍ਬਮੋਘਜਵਨਂ, ਤਦਾਲਮ੍ਬਨ੍ਤਿ ਤਂ ਕਮਾ.
੨੩੧. ਆਵਜ੍ਜਨਞ੍ਚ ਜਵਨਂ, ਮਨੋਦ੍ਵਾਰੇ ਤੁ ਗੋਚਰੇ;
ਵਿਭੂਤੇ ਤੁ ਤਦਾਲਮ੍ਬਂ, ਵਿਤ੍ਥਾਰਾ ਸਤ੍ਤਸਟ੍ਠਿ ਤੇ.
੨੩੨. ਕਾਮੇ ਜਵਨਸਤ੍ਤਾਲ-ਮ੍ਬਣਾਨਂ ਨਿਯਮੇ ਸਤਿ;
ਵਿਭੂਤੇਤਿਮਹਨ੍ਤੇ ਚ, ਤਦਾਲਮ੍ਬਣਮੀਰਿਤਂ.
੨੩੩. ਪਞ੍ਚਦ੍ਵਾਰੇ ਮਨੋਧਾਤੁ, ਪਚ੍ਚੇਕਮ੍ਹਿ ਯਥਾਕ੍ਕਮਂ;
ਪਞ੍ਚਵਿਞ੍ਞਾਣਯੁਗਲ਼ਂ, ਪਚ੍ਚੇਕਂ ਤੁ ਪਕਾਸਿਤਂ.
੨੩੪. ਮਨੋਦ੍ਵਾਰੇ ਤੁ ਜਵਨਂ, ਮਹਗ੍ਗਤਮਨੁਤ੍ਤਰਂ;
ਸੁਖਤੀਰਣਵੋਟ੍ਠਬ੍ਬਂ, ਪਰਿਤ੍ਤਜਵਨਂ ਛਸੁ.
੨੩੫. ਮਹਾਵਿਪਾਕਚਿਤ੍ਤਾਨਿ, ਉਪੇਕ੍ਖਾਤੀਰਣਦ੍ਵਯਂ;
ਛਸੁ ਦ੍ਵਾਰੇਸੁ ਜਾਯਨ੍ਤਿ, ਵੀਥਿਮੁਤ੍ਤਾਨਿ ਚੇਕਦਾ.
੨੩੬. ਸਤ੍ਤਤਿ ਵੀਥਿਚਿਤ੍ਤਾਨਿ, ਵਿਪਾਕਾ ਤੁ ਮਹਗ੍ਗਤਾ;
ਨਵ ਵੀਥਿਵਿਮੁਤ੍ਤਾ ਚ, ਦੁਵਿਧਾਪਿ ਦਸੀਰਿਤਾ.
੨੩੭. ਇਚ੍ਚੇਵਂ ਦ੍ਵਾਰਭੇਦੇਨ, ਵਿਭਾਵੇਤ੍ਵਾ ਤਤੋ ਪਰਂ;
ਞੇਯ੍ਯਾ ਗੋਚਰਭੇਦੇਨ, ਚਿਤ੍ਤੁਪ੍ਪਾਦਾ ਯਥਾਰਹਂ.
੨੩੮. ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਾ ਪਞ੍ਚ ਗੋਚਰਾ;
ਸੇਸਞ੍ਚ ਰੂਪਪਞ੍ਞਤ੍ਤਿਨਾਮਞ੍ਚ ਧਮ੍ਮਗੋਚਰਂ.
੨੩੯. ਪਞ੍ਚਦ੍ਵਾਰੇ ਵਤ੍ਤਮਾਨਂ, ਪਞ੍ਚਾਲਮ੍ਬਂ ਯਥਾਕ੍ਕਮਂ;
ਛਾਲਮ੍ਬਣਂ ਮਨੋਦ੍ਵਾਰੇ, ਅਤੀਤਾਨਾਗਤਮ੍ਪਿ ਚ.
੨੪੦. ਪਞ੍ਞਤ੍ਤਾਤੀਤਵਤ੍ਤਨ੍ਤਂ, ਛਦ੍ਵਾਰਗ੍ਗਹਿਤਂ ਪਨ;
ਛਲ਼ਾਰਮ੍ਮਣਸਙ੍ਖਾਤਂ, ਯੇਭੁਯ੍ਯੇਨ ਭਵਨ੍ਤਰੇ.
੨੪੧. ਨਿਮਿਤ੍ਤਗਤਿਕਮ੍ਮਾਨਂ, ਕਮ੍ਮਮੇਵਾਥ ਗੋਚਰਂ;
ਪਟਿਸਨ੍ਧਿਭਵਙ੍ਗਾਨਂ, ਚੁਤਿਯਾਵ ਯਥਾਰਹਂ.
੨੪੨. ਪਞ੍ਚਾਲਮ੍ਬੇ ਮਨੋਧਾਤੁ, ਪਚ੍ਚੇਕਮ੍ਹਿ ਯਥਾਕ੍ਕਮਂ;
ਪਞ੍ਚਵਿਞ੍ਞਾਣਯੁਗਲ਼ਂ, ਪਚ੍ਚੇਕਂ ਤੁ ਪਕਾਸਿਤਂ.
੨੪੩. ਕਾਮਪਾਕਾਨਿ ਸੇਸਾਨਿ, ਹਸਨਞ੍ਚ ਪਰਿਤ੍ਤਕੇ;
ਞਾਣਹੀਨਾਨਿਪੁਞ੍ਞਾਨਿ, ਜਵਨਾਨਿ ਅਨਿਮ੍ਮਲੇ.
੨੪੪. ਤਿਹੇਤੁਕਾਮਪੁਞ੍ਞਾਨਿ, ਪੁਞ੍ਞਾਭਿਞ੍ਞਾ ਚ ਲੋਕਿਯਾ;
ਸਬ੍ਬਾਲਮ੍ਬੇ ਪਵਤ੍ਤਨ੍ਤਿ, ਅਗ੍ਗਮਗ੍ਗਫਲਂ ਵਿਨਾ.
੨੪੫. ਕ੍ਰਿਯਾਭਿਞ੍ਞਾ ਚ ਵੋਟ੍ਠਬ੍ਬਂ, ਕ੍ਰਿਯਾ ਕਾਮੇ ਤਿਹੇਤੁਕਾ;
ਸਬ੍ਬਾਲਮ੍ਬੇ ਪਵਤ੍ਤਨ੍ਤਿ, ਨਿਬ੍ਬਾਨੇ ਨਿਮ੍ਮਲਾ ਸਿਯੁਂ.
੨੪੬. ਦੁਤਿਯਞ੍ਚ ਚਤੁਤ੍ਥਞ੍ਚ, ਆਰੁਪ੍ਪੇਸੁ ਮਹਗ੍ਗਤੇ;
ਮਹਗ੍ਗਤਞ੍ਞੇ ਵੋਹਾਰੇ, ਅਯਮਾਲਮ੍ਬਣੇ ਨਯੋ.
੨੪੭. ਚਕ੍ਖੁਸੋਤਘਾਨਜਿਵ੍ਹਾ-ਕਾਯਹਦਯਵਤ੍ਥੁਨਾ;
ਕਾਮਲੋਕੇ ਛਵਤ੍ਥੂਨਿ, ਨਿਸ੍ਸਿਤਾ ਸਤ੍ਤ ਧਾਤੁਯੋ.
੨੪੮. ਪਞ੍ਚਵਿਞ੍ਞਾਣਧਾਤੂ ਚ, ਤਾਸਂ ਪੁਬ੍ਬਾਪਰਤ੍ਤਯਂ;
ਮਨੋਧਾਤੁ ਤਤੋ ਸੇਸਾ, ਮਨੋਵਿਞ੍ਞਾਣਧਾਤੁ ਚ.
੨੪੯. ਚਤਸ੍ਸੋ ਧਾਤੁਯੋ ਰੂਪੇ, ਤੀਣਿ ਵਤ੍ਥੂਨਿ ਨਿਸ੍ਸਿਤਾ;
ਅਰੂਪੇ ਤੁ ਅਨਿਸ੍ਸਾਯ, ਧਾਤ੍ਵੇਕਾਵ ਪਵਤ੍ਤਤਿ.
੨੫੦. ਪਞ੍ਚਪ੍ਪਸਾਦੇ ਨਿਸ੍ਸਾਯ, ਪਚ੍ਚੇਕਂ ਤੁ ਯਥਾਕ੍ਕਮਂ;
ਪਞ੍ਚਵਿਞ੍ਞਾਣਯੁਗਲ਼ਂ, ਭਵਤੀਤਿ ਪਕਾਸਿਤਂ.
੨੫੧. ਕਾਮਪਾਕਾਨਿ ਸੇਸਾਨਿ, ਮਗ੍ਗਾਵਜ੍ਜਨਮਾਦਿਤੋ;
ਹਸਨਂ ਪਟਿਘਾਰੂਪਾ-ਵਚਰਂ ਵਤ੍ਥੁਨਿਸ੍ਸਿਤਂ.
੨੫੨. ਦ੍ਵੇਚਤ੍ਤਾਲੀਸ ਨਿਸ੍ਸਾਯ, ਅਨਿਸ੍ਸਾਯ ਚ ਜਾਯਰੇ;
ਅਨਿਸ੍ਸਾਯ ਵਿਪਾਕਾਨਿ, ਆਰੁਪ੍ਪੇਤਿ ਸਮੀਰਿਤਂ.
੨੫੩. ਇਚ੍ਚੇਵਂ ਵਤ੍ਥੁਭੇਦੇਨ, ਚਿਤ੍ਤੁਪ੍ਪਾਦਾ ਪਕਾਸਿਤਾ;
ਤਤੋ ਪਰਂ ਵਿਭਾਵੇਯ੍ਯ, ਭੂਮਿਭੇਦੇਨ ਪਣ੍ਡਿਤੋ.
੨੫੪. ਨਿਰਯੇ ਪੇਤਲੋਕੇ ਚ, ਤਿਰਚ੍ਛਾਨਾਸੁਰੇ ਤਥਾ;
ਪਾਪਕਮ੍ਮੋਪਪਜ੍ਜਨ੍ਤਿ, ਪਾਪਪਾਕਾਯ ਸਨ੍ਧਿਯਾ.
੨੫੫. ਭੂਮਿਸ੍ਸਿਤੇਸੁ ਦੇਵੇਸੁ, ਮਨੁਸ੍ਸੇਸੁਪਿ ਹੀਨਕਾ;
ਅਹੇਤੁਕਾਯ ਜਾਯਨ੍ਤਿ, ਪੁਞ੍ਞਪਾਕਾਯ ਸਨ੍ਧਿਯਾ.
੨੫੬. ਚਾਤੁਮਹਾਰਾਜਿਕਾ ਚ, ਤਾਵਤਿਂਸਾ ਚ ਯਾਮਕਾ;
ਤੁਸਿਤਾ ਚੇਵ ਨਿਮ੍ਮਾਨਰਤਿਨੋ ਵਸਵਤ੍ਤਿਨੋ.
੨੫੭. ਇਚ੍ਚੇਵਂ ਛਸੁ ਦੇਵੇਸੁ, ਮਨੁਸ੍ਸੇਸੁ ਚ ਜਾਯਰੇ;
ਮਹਾਵਿਪਾਕਸਨ੍ਧੀਹਿ, ਕਾਮਪੁਞ੍ਞਕਤਾ ਜਨਾ.
੨੫੮. ਬ੍ਰਹ੍ਮਾਨਂ ਪਾਰਿਸਜ੍ਜਾ ਚ, ਤਥਾ ਬ੍ਰਹ੍ਮਪੁਰੋਹਿਤਾ;
ਮਹਾਬ੍ਰਹ੍ਮਾ ਚ ਜਾਯਨ੍ਤਿ, ਪਠਮਜ੍ਝਾਨਸਨ੍ਧਿਯਾ.
੨੫੯. ਪਰਿਤ੍ਤਾ ਅਪ੍ਪਮਾਣਾਭਾ, ਜਾਯਨ੍ਤਾਭਸ੍ਸਰਾ ਤਥਾ;
ਦੁਤਿਯਜ੍ਝਾਨਪਾਕਾਯ, ਤਤਿਯਾਯ ਚ ਸਨ੍ਧਿਯਾ.
੨੬੦. ਪਰਿਤ੍ਤਸੁਭਪ੍ਪਮਾਣਸੁਭਾ ਚ ਸੁਭਕਿਣ੍ਹਕਾ;
ਚਤੁਤ੍ਥਾਯ ਤੁ ਜਾਯਨ੍ਤਿ, ਤਤਿਯਜ੍ਝਾਨਭੂਮਿਕਾ.
੨੬੧. ਵੇਹਪ੍ਫਲਾ ਅਸਞ੍ਞੀ ਚ, ਸੁਦ੍ਧਾਵਾਸਾਤਿ ਸਤ੍ਤਸੁ;
ਪਞ੍ਚਮਾਯ ਚ ਜਾਯਨ੍ਤਿ, ਅਸਞ੍ਞੀਚਿਤ੍ਤਵਜ੍ਜਿਤਾ.
੨੬੨. ਅਵਿਹਾ ਚ ਅਤਪ੍ਪਾ ਚ, ਸੁਦਸ੍ਸਾ ਚ ਸੁਦਸ੍ਸਿਨੋ;
ਅਕਨਿਟ੍ਠਾਤਿ ਪਞ੍ਚੇਤੇ, ਸੁਦ੍ਧਾਵਾਸਾ ਪਕਾਸਿਤਾ.
੨੬੩. ਆਕਾਸਾਨਞ੍ਚਾਯਤਨਪਾਕਾਦੀਹਿ ਯਥਾਕ੍ਕਮਂ;
ਆਕਾਸਾਨਞ੍ਚਾਯਤਨਭੂਮਿਕਾਦੀਸੁ ਜਾਯਰੇ.
੨੬੪. ਚੁਤਿਸਨ੍ਧਿਭਵਙ੍ਗਾਨਂ, ਵਸਾ ਪਾਕਾ ਮਹਗ੍ਗਤਾ;
ਕਾਮੇ ਸਹੇਤੁਕਾ ਪਾਕਾ, ਤਦਾਲਮ੍ਬਣਤੋਪਿ ਚ.
੨੬੫. ਯਥਾਵੁਤ੍ਤਨਿਯਾਮੇਨ, ਭੂਮੀਸ੍ਵੇਕਾਵ ਜਾਯਰੇ;
ਚਿਤ੍ਤੁਪ੍ਪਾਦੇਸੁ ਸਬ੍ਬਤ੍ਥ, ਨ ਤ੍ਵੇਵਾਸਞ੍ਞਿਨੋ ਮਤਾ.
੨੬੬. ਘਾਨਜਿਵ੍ਹਾਕਾਯਧਾਤੁ-ਨਿਸ੍ਸਿਤਂ ਮਾਨਸਂ ਤਥਾ;
ਪਟਿਘਦ੍ਵਯਮਿਚ੍ਚੇਵਮਟ੍ਠ ਹੋਨ੍ਤੇਵ ਕਾਮਿਸੁ.
੨੬੭. ਚਕ੍ਖੁਸੋਤਞ੍ਚ ਵਿਞ੍ਞਾਣਂ, ਮਨੋਧਾਤੁ ਚ ਤੀਰਣਂ;
ਕਾਮਰੂਪੇਸੁ ਜਾਯਨ੍ਤਿ, ਯਥਾਸਮ੍ਭਵਤੋ ਦਸ.
੨੬੮. ਵੋਟ੍ਠਬ੍ਬਕਾਮਪੁਞ੍ਞਾਨਿ, ਵਿਪ੍ਪਯੁਤ੍ਤਾਨਿ ਦਿਟ੍ਠਿਯਾ;
ਉਦ੍ਧਚ੍ਚਸਹਿਤਞ੍ਚੇਤਿ, ਸਬ੍ਬਤ੍ਥੇਤਾਨਿ ਚੁਦ੍ਦਸ.
੨੬੯. ਕਙ੍ਖਿਤਂ ਦਿਟ੍ਠਿਯੁਤ੍ਤਾਨਿ, ਸੁਦ੍ਧਾਵਾਸਵਿਵਜ੍ਜਿਤੇ;
ਸਿਤਞ੍ਚ ਰੂਪਜਵਨ-ਮਾਰੁਪ੍ਪਾਪਾਯਵਜ੍ਜਿਤੇ.
੨੭੦. ਕਾਮਕ੍ਰਿਯਾ ਸਹੇਤੂ ਚ, ਉਦ੍ਧਂ ਲੋਕੁਤ੍ਤਰਤ੍ਤਯਂ;
ਚਤੁਤ੍ਥਾਰੁਪ੍ਪਜਵਨਂ, ਸਬ੍ਬਤ੍ਥਾਪਾਯਵਜ੍ਜਿਤੇ.
੨੭੧. ਸੇਸਮਾਰੁਪ੍ਪਜਵਨਂ, ਹਿਤ੍ਵਾਪਾਯਂ ਯਥਾਕ੍ਕਮਂ;
ਉਦ੍ਧਮਾਰੁਪ੍ਪਭੂਮਿਞ੍ਚ, ਜਾਯਤੀਤਿ ਵਿਭਾਵਯੇ.
੨੭੨. ਸੋਤਾਪਤ੍ਤਿਫਲਾਦੀਨਿ, ਚਤ੍ਤਾਰਾਨੁਤ੍ਤਰਾਨਿ ਤੁ;
ਸੁਦ੍ਧਾਵਾਸਮਪਾਯਞ੍ਚ, ਹਿਤ੍ਵਾ ਸਬ੍ਬਤ੍ਥ ਜਾਯਰੇ.
੨੭੩. ਸੁਦ੍ਧਾਵਾਸਮਪਾਯਞ੍ਚ, ਹਿਤ੍ਵਾਰੂਪਞ੍ਚ ਸਬ੍ਬਥਾ;
ਪਠਮਾਨੁਤ੍ਤਰੋ ਮਗ੍ਗੋ, ਸੇਸਟ੍ਠਾਨੇਸੁ ਜਾਯਤਿ.
੨੭੪. ਸਤ੍ਤਤਿਂਸ ਅਪਾਯੇਸੁ, ਕਾਮੇਸੀਤਿ ਪਕਾਸਿਤਾ;
ਪਞ੍ਚਪਞ੍ਞਾਸ ਸੁਦ੍ਧੇਸੁ, ਰੂਪੇਸ੍ਵੇਕੂਨਸਤ੍ਤਤਿ.
੨੭੫. ਛਚਤ੍ਤਾਲੀਸ ਆਰੁਪ੍ਪੇ, ਉਪ੍ਪਜ੍ਜਨ੍ਤਿ ਯਥਾਰਹਂ;
ਇਚ੍ਚੇਵਂ ਭੂਮਿਭੇਦੇਨ, ਚਿਤ੍ਤੁਪ੍ਪਾਦਾ ਪਕਾਸਿਤਾ.
੨੭੬. ਤਿਹੇਤੁਸਤ੍ਤੇ ਸਬ੍ਬਾਨਿ, ਦ੍ਵਿਹੇਤੁਕਾਹੇਤੁਕੇ ਪਨ;
ਪਰਿਤ੍ਤਾਨਿ ਵਿਵਜ੍ਜੇਤ੍ਵਾ, ਞਾਣਪਾਕਕ੍ਰਿਯਾਜਵੇ.
੨੭੭. ਪੁਥੁਜ੍ਜਨਾਨਂ ਸਮ੍ਭੋਨ੍ਤਿ, ਦਿਟ੍ਠਿਯੁਤ੍ਤਞ੍ਚ ਕਙ੍ਖਿਤਂ;
ਸੋਤਾਪਨ੍ਨਾਦਿਤਿਣ੍ਣਮ੍ਪਿ, ਫਲਂ ਹੋਤਿ ਯਥਾਸਕਂ.
੨੭੮. ਵੀਤਰਾਗਸ੍ਸ ਜਵਨਂ, ਕ੍ਰਿਯਾ ਚਨ੍ਤਿਮਨੁਤ੍ਤਰਂ;
ਪੁਥੁਜ੍ਜਨਾਦਿਤਿਣ੍ਣਮ੍ਪਿ, ਪਟਿਘਂ ਸਮੁਦੀਰਿਤਂ.
੨੭੯. ਜਵਾ ਪੁਥੁਜ੍ਜਨਾਦੀਨਂ, ਚਤੁਨ੍ਨਂ ਸੇਸ ਸਾਸਵਾ;
ਸਾਸਵਾਵਜ੍ਜਪਾਕਾਨਿ, ਪਞ੍ਚਨ੍ਨਮਪਿ ਦੀਪਯੇ.
੨੮੦. ਪੁਥੁਜ੍ਜਨੇਸੁ ਤੇਸਟ੍ਠਿ, ਸੋਤਾਪਨ੍ਨਾਦਿਕਦ੍ਵਯੇ;
ਏਕੂਨਸਟ੍ਠਿ ਚਿਤ੍ਤਾਨਿ, ਅਨਾਗਾਮਿਕਪੁਗ੍ਗਲੇ.
੨੮੧. ਸਤ੍ਤਪਞ੍ਞਾਸ ਜਾਯਨ੍ਤਿ, ਤੇਪਞ੍ਞਾਸ ਅਨਾਸਵੇ;
ਮਗ੍ਗਟ੍ਠੇਸੁ ਸਕੋ ਮਗ੍ਗੋ, ਪੁਗ੍ਗਲੇਸੁ ਅਯਂ ਨਯੋ.
੨੮੨. ਤਿਹੇਤੁਕਾਮਚੁਤਿਯਾ, ਸਬ੍ਬਾਪਿ ਪਟਿਸਨ੍ਧਿਯੋ;
ਦ੍ਵਿਹੇਤਾਹੇਤੁਚੁਤਿਯਾ, ਕਾਮਾਵਚਰਸਨ੍ਧਿਯੋ.
੨੮੩. ਰੂਪਾਵਚਰਚੁਤਿਯਾ, ਸਹੇਤੁਪਟਿਸਨ੍ਧਿਯੋ;
ਆਰੁਪ੍ਪਾਰੁਪ੍ਪਚੁਤਿਯਾ, ਹੇਟ੍ਠਿਮਾਰੁਪ੍ਪਵਜ੍ਜਿਤਾ.
੨੮੪. ਪਟਿਸਨ੍ਧਿ ਤਥਾ ਕਾਮੇ, ਤਿਹੇਤੁਪਟਿਸਨ੍ਧਿਯੋ;
ਭਵਨ੍ਤੀਤਿ ਚ ਮੇਧਾਵੀ, ਚੁਤਿਸਨ੍ਧਿਨਯਂ ਨਯੇ.