੩. ਤਤਿਯੋ ਪਰਿਚ੍ਛੇਦੋ
ਭੇਦਸਙ੍ਗਹਵਿਭਾਗੋ
੧੨੩. ਏਵਂ ਭੇਦਸਭਾਵੇਸੁ, ਤੇਸ੍ਵੇਵ ਪੁਨ ਸਙ੍ਗਹਂ;
ਸਭਾਵਤ੍ਥਵਿਸੇਸੇਹਿ, ਪਵਕ੍ਖਾਮਿ ਇਤੋ ਪਰਂ.
੧੨੪. ਅਸਾਧਾਰਣਞਾਣੇਹਿ, ਸਤ੍ਥਾ ਵਤ੍ਥੁਵਿਵੇਚਕੋ;
ਸਙ੍ਗਹੇਤ੍ਵਾ ਸਭਾਗੇਹਿ, ਧਮ੍ਮੇ ਦਸ੍ਸੇਸਿ ਚਕ੍ਖੁਮਾ.
੧੨੫. ਦਿਟ੍ਠਿਭਿਨਿਵੇਸਟ੍ਠੇਨ, ਯਥਾਭੂਤਸਭਾਵਤੋ;
ਪਰਮਾਮਸਤਿਚ੍ਚੇਕਾ, ਪਰਾਮਾਸੋਤਿ ਭਾਸਿਤਾ.
੧੨੬. ਕਿਲੇਸਾਸੁਚਿਭਾਵੇਨ, ਵਣਸ੍ਸਾਵਰਸੋ ਵਿਯ;
ਆਲਿਮ੍ਪਨ੍ਤਾਵ ਸਨ੍ਤਾਨਂ, ਸਵਨ੍ਤੀਤਿ ਪਕਾਸਿਤਾ.
੧੨੭. ਕਾਮਤਣ੍ਹਾ ਭਵਤਣ੍ਹਾ, ਦਿਟ੍ਠਾਵਿਜ੍ਜਾਤਿ ਆਸਵਾ;
ਚਤ੍ਤਾਰੋ ਆਸਵਟ੍ਠੇਨ, ਤਯੋ ਧਮ੍ਮਾ ਸਭਾਵਤੋ.
੧੨੮. ਏਤੇਵੋ ਘਾਤਿ ਵੁਤ੍ਤਾਵ, ਦ੍ਵਾਰਾਲਮ੍ਬਾਭਿਵਾਹਿਨੋ;
ਓਤ੍ਥਰਿਤ੍ਵਾ ਪਰਾਭੂਤੇ, ਹਰਨ੍ਤਾ ਪਾਣਿਨੋ ਭਵੇ.
੧੨੯. ਯੋਗਾਤਿ ਚਾਹੁ ਤੇ ਏਵ, ਪਾਣਿਨੋ ਭਵਯਨ੍ਤਕੇ;
ਦ੍ਵਾਰਾਲਮ੍ਬਾਭਿਸਮ੍ਬਨ੍ਧਾ, ਯਨ੍ਤਬਨ੍ਧਾਵ ਯੋਜਿਤਾ.
੧੩੦. ਸਨ੍ਤਾਨਮਧਿਗਣ੍ਹਨ੍ਤਾ, ਮਾਲੁਵਾਵ ਮਹਾਤਰੁਂ;
ਗਣ੍ਹਨ੍ਤਾ ਦਲ਼੍ਹਮਾਲਮ੍ਬਂ, ਮਣ੍ਡੂਕਮਿਵ ਪਨ੍ਨਗੋ.
੧੩੧. ਕਾਮਤਣ੍ਹਾ ਚ ਦਿਟ੍ਠਿ ਚ, ਉਪਾਦਾਨਾ ਚਤੁਬ੍ਬਿਧਾ;
ਦਿਟ੍ਠਿ ਦਿਟ੍ਠਿਸੀਲਬ੍ਬਤ-ਮਤ੍ਤਵਾਦੋਤਿ ਭੇਦਿਤਾ.
੧੩੨. ਕਾਯੇਨ ਕਾਯਂ ਗਨ੍ਥੇਨ੍ਤਾ, ਦੁਪ੍ਪਮੁਞ੍ਚਾਨੁਵੇਠਿਨੋ;
ਕਥਿਤਾ ਕਾਯਗਨ੍ਥਾਤਿ, ਤਣ੍ਹਾਬ੍ਯਾਪਾਦਦਿਟ੍ਠਿਯੋ.
੧੩੩. ਸੀਲਬ੍ਬਤਪਰਾਮਾਸੋ, ਇਤਿ ਦਿਟ੍ਠਿ ਵਿਭੇਦਿਤਾ;
ਇਦਂਸਚ੍ਚਾਭਿਨਿਵੇਸੋ, ਇਤਿ ਚੇਵਂ ਚਤੁਬ੍ਬਿਧਾ.
੧੩੪. ਨੇਕ੍ਖਮ੍ਮਂ ਪਲਿਬੋਧੇਨ੍ਤਾ, ਭਾਵਨਾਪਰਿਪਨ੍ਥਕਾ;
ਸਨ੍ਤਾਨਮਣ੍ਡਕੋਸਾਵ, ਪਰਿਯੋਨਨ੍ਧਕਾਤਿ ਚ.
੧੩੫. ਕਾਮਚ੍ਛਨ੍ਦੋ ਚ ਬ੍ਯਾਪਾਦੋ, ਥਿਨਮਿਦ੍ਧਞ੍ਚ ਸਂਸਯੋ;
ਅਵਿਜ੍ਜੁਦ੍ਧਚ੍ਚਕੁਕ੍ਕੁਚ੍ਚਮਿਤਿ ਨੀਵਰਣਾ ਮਤਾ.
੧੩੬. ਆਗਾਲ਼੍ਹਂ ਪਰਿਯਾਦਾਯ, ਓਗਯ੍ਹਨੁਪ੍ਪਵਤ੍ਤਿਨੋ;
ਯੋਪ੍ਪਰੋਗਾਵ ਸਨ੍ਤਾਨ-ਮਨੁਸੇਨ੍ਤੀਤਿ ਭਾਸਿਤਾ.
੧੩੭. ਕਾਮਰਾਗੋ ਭਵਰਾਗੋ, ਪਟਿਘੋ ਮਾਨਦਿਟ੍ਠਿਯੋ;
ਕਙ੍ਖਾਵਿਜ੍ਜਾਤਿ ਸਤ੍ਤੇਵ, ਛ ਧਮ੍ਮਾਨੁਸਯਾ ਮਤਾ.
੧੩੮. ਦ੍ਵਾਰਾਲਮ੍ਬਣਬਨ੍ਧੇਨ, ਪਾਣੀਨਂ ਭਵਮਣ੍ਡਲੇ;
ਸਂਯੋਜਨਾਨਿ ਵੁਤ੍ਤਾਨਿ, ਪਾਸਬਨ੍ਧਾਵ ਪਕ੍ਖਿਨਂ.
੧੩੯. ਕਾਮਰੂਪਾਰੂਪਰਾਗਾ, ਪਟਿਘੋ ਮੋਹਸਂਸਯੋ;
ਦਿਟ੍ਠਿ ਸੀਲਬ੍ਬਤਂ ਮਾਨੋ, ਉਦ੍ਧਚ੍ਚੇਨ ਦਸਾ ਭਵੇ.
੧੪੦. ਰੂਪਾਰੂਪਰਾਗੁਦ੍ਧਚ੍ਚਂ, ਅਭਿਧਮ੍ਮੇ ਵਿਨਾ ਪੁਨ;
ਭਵਰਾਗਿਸ੍ਸ ਮਚ੍ਛੇਰਂ, ਗਹੇਤ੍ਵਾ ਦਸਧਾ ਸਿਯੁਂ.
੧੪੧. ਸਂਕ੍ਲੇਪਯਨ੍ਤਿ ਸਨ੍ਤਾਨਂ, ਉਪਘਾਤੇਨ੍ਤਿ ਪਾਣਿਨੋ;
ਸਹਜਾਤੇਕ੍ਲੇਸੇਨ੍ਤੀਤਿ, ਕਿਲੇਸਾਤਿ ਪਕਾਸਿਤਾ.
੧੪੨. ਲੋਭੋ ਦੋਸੋ ਚ ਮੋਹੋ ਚ,
ਦਿਟ੍ਠਿ ਮਾਨੋ ਚ ਸਂਸਯੋ;
ਥਿਨਾਹਿਰਿਕਨੋਤ੍ਤਪ੍ਪ-
ਮੁਦ੍ਧਚ੍ਚੇਨ ਸਿਯੁਂ ਦਸ.
੧੪੩. ਨਵਸਙ੍ਗਹਿਤਾ ਏਤ੍ਥ, ਦਿਟ੍ਠਿਲੋਭਾ ਪਕਾਸਿਤਾ;
ਸਤ੍ਤਸਙ੍ਗਹਿਤਾਵਿਜ੍ਜਾ, ਪਟਿਘੋ ਪਞ੍ਚਸਙ੍ਗਹੋ.
੧੪੪. ਚਤੁਸਙ੍ਗਹਿਤਾ ਕਙ੍ਖਾ, ਮਾਨੁਦ੍ਧਚ੍ਚਾ ਤਿਸਙ੍ਗਹਾ;
ਦੁਕਸਙ੍ਗਹਿਤਂ ਥੀਨਂ, ਕੁਕ੍ਕੁਚ੍ਚਮੇਕਸਙ੍ਗਹਂ.
੧੪੫. ਦ੍ਵਿਧਾਹਿਰਿਕਨੋਤ੍ਤਪ੍ਪ-ਮਿਸ੍ਸਾਮਚ੍ਛਰਿਯਂ ਤਥਾ;
ਇਚ੍ਚੇਵਂ ਦਸਧਾ ਵੁਤ੍ਤਾ, ਪਾਪਕੇਸ੍ਵੇਵ ਸਙ੍ਗਹਾ.
੧੪੬. ਪਰਾਮਾਸਾਸਵੋਘਾ ਚ, ਯੋਗੁਪਾਦਾਨਗਨ੍ਥਤੋ;
ਨੀਵਾਰਣਾਨੁਸਯਤੋ, ਸਂਯੋਜਨਕਿਲੇਸਤੋ.
੧੪੭. ਚੁਦ੍ਦਸੇਵ ਤੁ ਸਙ੍ਖੇਪਾ, ਸਤ੍ਤਪਞ੍ਞਾਸ ਭੇਦਤੋ;
ਯਥਾਧਮ੍ਮਾਨੁਸਾਰੇਨ, ਚਿਤ੍ਤੁਪ੍ਪਾਦੇਸੁ ਯੋਜਯੇ.
੧੪੮. ਤਤੋਪਰੇ ਨੋਪਰਾਮਾ-ਸਾਦਿਭੇਦਿਤਸਙ੍ਗਹਾ;
ਚਿਤ੍ਤਂ ਚੇਤਸਿਕਂ ਰੂਪਂ, ਨਿਬ੍ਬਾਨਮਿਤਿ ਦੀਪਯੇ.
੧੪੯. ਇਚ੍ਚਾਕੁਸਲਧਮ੍ਮਾਨਂ, ਞਤ੍ਵਾ ਸਙ੍ਗਹਮੁਤ੍ਤਰਂ;
ਮਿਸ੍ਸਕਾ ਨਾਮ ਵਿਞ੍ਞੇਯ੍ਯਾ, ਯਥਾਸਮ੍ਭਵਤੋ ਕਥਂ;
੧੫੦. ਲੋਭੋ ਦੋਸੋ ਚ ਮੋਹੋ ਚ,
ਏਕਨ੍ਤਾਕੁਸਲਾ ਤਯੋ;
ਅਲੋਭਾਦੋਸਾਮੋਹੋ ਚ,
ਕੁਸਲਾਬ੍ਯਾਕਤਾ ਤਥਾ.
੧੫੧. ਪਾਦਪਸ੍ਸੇਵ ਮੂਲਾਨਿ, ਥਿਰਭਾਵਾਯ ਪਚ੍ਚਯਾ;
ਮੂਲਭਾਵੇਨ ਧਮ੍ਮਾਨਂ, ਹੇਤੂ ਧਮ੍ਮਾ ਛ ਦੀਪਿਤਾ.
੧੫੨. ਵਿਤਕ੍ਕੋ ਚ ਵਿਚਾਰੋ ਚ, ਪੀਤਿ ਚੇਕਗ੍ਗਤਾ ਤਥਾ;
ਸੋਮਨਸ੍ਸਂ ਦੋਮਨਸ੍ਸਂ, ਉਪੇਕ੍ਖਾਤਿ ਚ ਵੇਦਨਾ.
੧੫੩. ਆਹਚ੍ਚੁਪਨਿਜ੍ਝਾਯਨ੍ਤਾ, ਨਿਜ੍ਝਾਨਟ੍ਠੇਨ ਪਚ੍ਚਯਾ;
ਝਾਨਧਮ੍ਮਾਤਿ ਸਤ੍ਥਾਹ, ਪਞ੍ਚ ਵਤ੍ਥੁਸਭਾਵਤੋ.
੧੫੪. ਸਮ੍ਮਾਦਿਟ੍ਠਿ ਚ ਸਙ੍ਕਪ੍ਪੋ, ਵਾਯਾਮੋ ਵਿਰਤਿਤ੍ਤਯਂ;
ਸਮ੍ਮਾਸਤਿ ਸਮਾਧੀ ਚ, ਮਿਚ੍ਛਾਦਿਟ੍ਠਿ ਚ ਸਮ੍ਭਵਾ.
੧੫੫. ਸਮ੍ਮਾਮਿਚ੍ਛਾ ਚ ਨੀਯਨ੍ਤਾ, ਨਿਯ੍ਯਾਨਟ੍ਠੇਨ ਪਚ੍ਚਯਾ;
ਮਗ੍ਗਙ੍ਗਾ ਦ੍ਵਾਦਸਕ੍ਖਾਤਾ, ਨਵ ਧਮ੍ਮਾ ਸਭਾਵਤੋ.
੧੫੬. ਅਤ੍ਤਭਾਵਂ ਪਵਤ੍ਤੇਨ੍ਤਾ, ਓਜਟ੍ਠਮਕਵੇਦਨਂ;
ਪਟਿਸਨ੍ਧਿਨਾਮਰੂਪ-ਮਾਹਰਨ੍ਤਾ ਯਥਾਕ੍ਕਮਂ.
੧੫੭. ਕਬਲ਼ੀਕਾਰੋ ਆਹਾਰੋ,
ਫਸ੍ਸੋ ਸਞ੍ਚੇਤਨਾ ਤਥਾ;
ਵਿਞ੍ਞਾਣਮਿਤਿ ਚਤ੍ਤਾਰੋ,
ਆਹਾਰਾਤਿ ਪਕਾਸਿਤਾ.
੧੫੮. ਧਮ੍ਮਾਨਂ ਸਹਜਾਤਾਨਂ, ਇਨ੍ਦ੍ਰਿਯਟ੍ਠੇਨ ਪਚ੍ਚਯਾ;
ਅਤ੍ਤਾਨਮਿਸ੍ਸਰਟ੍ਠੇਨ, ਅਨੁਵਤ੍ਤਾਪਕਾ ਤਥਾ.
੧੫੯. ਸਦ੍ਧਾ ਚ ਸਤਿ ਪਞ੍ਞਾ ਚ, ਵੀਰਿਯੇਕਗ੍ਗਤਾਪਿ ਚ;
ਵੇਦਨਾ ਜੀਵਿਤਂ ਚਿਤ੍ਤਂ, ਅਟ੍ਠ ਰੂਪਿਨ੍ਦ੍ਰਿਯਾਨਿ ਚ.
੧੬੦. ਕਥਂ ਜੀਵਿਤਮੇਕਂ ਤੁ, ਸੁਖਂ ਦੁਕ੍ਖਨ੍ਤਿ ਵੇਦਨਾ;
ਸੋਮਨਸ੍ਸਂ ਦੋਮਨਸ੍ਸਂ, ਉਪੇਕ੍ਖਾਤਿ ਚ ਭੇਦਿਤਾ.
੧੬੧. ਪਞ੍ਞਾਦਿਮਗ੍ਗੇਨਞ੍ਞਾਤ-ਞ੍ਞਸ੍ਸਾਮੀਤਿਨ੍ਦ੍ਰਿਯਂ ਭਵੇ;
ਮਜ੍ਝੇ ਅਞ੍ਞਿਨ੍ਦ੍ਰਿਯਮਨ੍ਤੇ, ਅਞ੍ਞਾਤਾਵਿਨ੍ਦ੍ਰਿਯਂ ਤਥਾ.
੧੬੨. ਸੋਲ਼ਸੇਵ ਸਭਾਵੇਨ, ਇਨ੍ਦ੍ਰਿਯਟ੍ਠਵਿਭਾਗਤੋ;
ਇਨ੍ਦ੍ਰਿਯਾਨੀਤਿ ਵੁਤ੍ਤਾਨਿ, ਬਾਵੀਸਤਿ ਵਿਭਾਵਯੇ.
੧੬੩. ਦਲ਼੍ਹਾਧਿਟ੍ਠਿਤਸਨ੍ਤਾਨਾ, ਵਿਪਕ੍ਖੇਹਿ ਅਕਮ੍ਪਿਯਾ;
ਬਲਵਨ੍ਤਸਭਾਵੇਨ, ਬਲਧਮ੍ਮਾ ਪਕਾਸਿਤਾ.
੧੬੪. ਸਦ੍ਧਾ ਸਤਿ ਹਿਰੋਤ੍ਤਪ੍ਪਂ, ਵੀਰਿਯੇਕਗ੍ਗਤਾ ਤਥਾ;
ਪਞ੍ਞਾਹਿਰਿਕਾਨੋਤ੍ਤਪ੍ਪ-ਮਿਚ੍ਚੇਵਂ ਨਵਧਾ ਮਤਾ.
੧੬੫. ਜੇਟ੍ਠਾ ਪੁਬ੍ਬਙ੍ਗਮਟ੍ਠੇਨ, ਪੁਞ੍ਞਾਪੁਞ੍ਞਪਵਤ੍ਤਿਯਂ;
ਪਚ੍ਚਯਾਧਿਪ੍ਪਤੇਯ੍ਯੇਨ, ਸਹਜਾਨਂ ਯਥਾਰਹਂ.
੧੬੬. ਚਤ੍ਤਾਰੋਧਿਪਤੀ ਵੁਤ੍ਤਾ, ਆਧਿਪ੍ਪਚ੍ਚਸਭਾਵਤੋ;
ਛਨ੍ਦੋ ਚਿਤ੍ਤਞ੍ਚ ਵੀਰਿਯਂ, ਵੀਮਂਸਾਤਿ ਚ ਤਾਦਿਨਾ.
੧੬੭. ਪਞ੍ਚਸਙ੍ਗਹਿਤਾ ਪਞ੍ਞਾ, ਵਾਯਾਮੇਕਗ੍ਗਤਾ ਪਨ;
ਚਤੁਸਙ੍ਗਹਿਤਾ ਚਿਤ੍ਤਂ, ਸਤਿ ਚੇਵ ਤਿਸਙ੍ਗਹਾ.
੧੬੮. ਸਙ੍ਕਪ੍ਪੋ ਵੇਦਨਾ ਸਦ੍ਧਾ, ਦੁਕਸਙ੍ਗਹਿਤਾ ਮਤਾ;
ਏਕੇਕਸਙ੍ਗਹਾ ਸੇਸਾ, ਅਟ੍ਠਵੀਸਤਿ ਭਾਸਿਤਾ;
ਇਚ੍ਚੇਵਂ ਸਤ੍ਤਧਾ ਭੇਦੋ, ਵੁਤ੍ਤੋ ਮਿਸ੍ਸਕਸਙ੍ਗਹੋ.
੧੬੯. ਹੇਤੁਝਾਨਙ੍ਗਮਗ੍ਗਙ੍ਗਾ, ਆਹਾਰਿਨ੍ਦ੍ਰਿਯਤੋ ਤਥਾ;
ਬਲਾਧਿਪ੍ਪਤਿਤੋ ਚੇਵ, ਪੁਞ੍ਞਾਪੁਞ੍ਞਾਦਿਮਿਸ੍ਸਤਾ;
ਛਤ੍ਤਿਂਸੇਵ ਸਭਾਵੇਨ, ਚਤੁਸਟ੍ਠਿ ਪਭੇਦਤੋ.
੧੭੦. ਇਚ੍ਚੇਵਂ ਸਙ੍ਗਹੇਤ੍ਵਾਨ, ਵਿਭਾਵੇਯ੍ਯ ਤਤੋ ਪਰਂ;
ਚਿਤ੍ਤੁਪ੍ਪਾਦਪਭੇਦੇਸੁ, ਯਥਾਸਮ੍ਭਵਤੋ ਕਥਂ.
੧੭੧. ਸਿਤਾਵਜ੍ਜਨਵਿਞ੍ਞਾਣਂ, ਸਮ੍ਪਟਿਚ੍ਛਨਤੀਰਣਾ;
ਅਟ੍ਠਾਰਸਾਹੇਤੁਕਾਵ, ਮੋਮੂਹਾ ਏਕਹੇਤੁਕਾ.
੧੭੨. ਸੇਸਾ ਤੁ ਕੁਸਲਾ ਞਾਣਵਿਯੁਤ੍ਤਾ ਚ ਦ੍ਵਿਹੇਤੁਕਾ;
ਚਿਤ੍ਤੁਪ੍ਪਾਦਾਪਰੇ ਸਤ੍ਤ-ਚਤ੍ਤਾਲੀਸ ਤਿਹੇਤੁਕਾ.
੧੭੩. ਪਞ੍ਚਵਿਞ੍ਞਾਣਮਜ੍ਝਾਨਂ, ਦ੍ਵਿਝਾਨਙ੍ਗਿਕਮੀਰਿਤਂ;
ਚਤੁਤ੍ਥਪਞ੍ਚਮਜ੍ਝਾਨਂ, ਤਿਝਾਨਂ ਤਤਿਯਂ ਮਤਾ.
੧੭੪. ਚਤੁਝਾਨਂ ਤੁ ਦੁਤਿਯਂ, ਕਾਮੇ ਚ ਸੁਖਵਜ੍ਜਿਤਾ;
ਪਞ੍ਚਝਾਨਂ ਤੁ ਪਠਮਂ, ਕਾਮੇ ਚ ਸੁਖਿਤਾ ਮਤਾ.
੧੭੫. ਪਠਮਾਨੁਤ੍ਤਰਂ ਝਾਨਂ, ਅਟ੍ਠਮਗ੍ਗਙ੍ਗਿਕਂ ਮਤਂ;
ਸਤ੍ਤਮਗ੍ਗਙ੍ਗਿਕਂ ਨਾਮ, ਸੇਸਝਾਨਮਨੁਤ੍ਤਰਂ.
੧੭੬. ਲੋਕਿਯਂ ਪਠਮਂ ਝਾਨਂ, ਤਥਾ ਕਾਮੇ ਤਿਹੇਤੁਕਾ;
ਪਞ੍ਚਮਗ੍ਗਙ੍ਗਿਕਾ ਨਾਮ, ਚਿਤ੍ਤੁਪ੍ਪਾਦਾ ਪਕਾਸਿਤਾ.
੧੭੭. ਸੇਸਂ ਮਹਗ੍ਗਤਂ ਝਾਨਂ, ਸਮ੍ਪਯੁਤ੍ਤਾ ਚ ਦਿਟ੍ਠਿਯਾ;
ਞਾਣੇਨ ਵਿਪ੍ਪਯੁਤ੍ਤਾ ਚ, ਚਤੁਮਗ੍ਗਙ੍ਗਿਕਾ ਮਤਾ.
੧੭੮. ਪਟਿਘੁਦ੍ਧਚ੍ਚਯੁਤ੍ਤਾ ਚ, ਵਿਪ੍ਪਯੁਤ੍ਤਾ ਚ ਦਿਟ੍ਠਿਯਾ;
ਤਿਮਗ੍ਗਙ੍ਗਂ ਦੁਮਗ੍ਗਙ੍ਗਂ, ਕਙ੍ਖਿਤਂ ਸਮੁਦੀਰਿਤਂ.
੧੭੯. ਨ ਹੋਨ੍ਤਾਹੇਤੁਕੇ ਮਗ੍ਗਾ, ਚਿਤ੍ਤਟ੍ਠਿਤਿ ਚ ਕਙ੍ਖਿਤੇ;
ਵਿਦਿਤਾ ਨਿਯਤਤਾ ਚ, ਲੋਕਿਯੇਸੁ ਨ ਉਦ੍ਧਟਾ.
੧੮੦. ਕਾਮੇਸੁ ਕਬਲ਼ੀਕਾਰੋ, ਅਨਾਹਾਰੋ ਅਸਞ੍ਞਿਨੋ;
ਚਿਤ੍ਤੁਪ੍ਪਾਦੇਸੁ ਸਬ੍ਬਤ੍ਥ, ਆਹਾਰਤ੍ਤਯਮੀਰਿਤਂ.
੧੮੧. ਇਨ੍ਦ੍ਰਿਯਾਨਿ ਵਿਭਾਵੇਯ੍ਯ, ਨਵਧਾਨੁਤ੍ਤਰੇ ਬੁਧੋ;
ਅਟ੍ਠਧਾ ਸਮੁਦੀਰੇਯ੍ਯ, ਲੋਕਿਯੇਸੁ ਤਿਹੇਤੁਕੇ.
੧੮੨. ਸਤ੍ਤਧਾ ਪਨ ਞਾਣੇਨ, ਵਿਪ੍ਪਯੁਤ੍ਤੇ ਪਕਾਸਯੇ;
ਸਿਤਵੋਟ੍ਠਬ੍ਬਨਾਪੁਞ੍ਞੇ, ਪਞ੍ਚਧਾ ਕਙ੍ਖਿਤੇ ਪਨ.
੧੮੩. ਚਤੁਧਾ ਤਿਵਿਧਾ ਸੇਸੇ, ਚਿਤ੍ਤੁਪ੍ਪਾਦੇ ਸਮੀਰਯੇ;
ਤਿਹੇਤੁਕਾ ਸਤ੍ਤਬਲਾ, ਛਬਲਾ ਤੁ ਦੁਹੇਤੁਕਾ.
੧੮੪. ਚਤੁਬਲਾ ਅਕੁਸਲਾ, ਕਙ੍ਖਿਤਂ ਤਿਬਲਂ ਮਤਂ;
ਦ੍ਵਿਬਲਂ ਸਿਤਵੋਟ੍ਠਬ੍ਬ-ਮਬਲਂ ਸੇਸਮੀਰਿਤਂ.
੧੮੫. ਜਵਨੇਧਿਪਤੀਨਂ ਤੁ, ਯੋ ਕੋਚੇਕੋ ਤਿਹੇਤੁਕੇ;
ਦ੍ਵਿਹੇਤੁਕੇ ਵਾ ਕੁਸਲੇ, ਵੀਮਂਸਾ ਨੋਪਲਬ੍ਭਤਿ.
੧੮੬. ਲੋਕਿਯੇਸੁ ਵਿਪਾਕੇਸੁ,
ਮੋਹਮੂਲੇ ਅਹੇਤੁਕੇ;
ਯਥਾਸਮ੍ਭਵਵੁਤ੍ਤਿਤ੍ਤਾ,
ਨਤ੍ਥਾਧਿਪਤਿ ਕੋਚਿਪਿ.
੧੮੭. ਸਮ੍ਭੋਤਿ ਕਾਯਵਿਞ੍ਞਾਣੇ, ਪੁਞ੍ਞਪਾਕੇ ਸੁਖਿਨ੍ਦ੍ਰਿਯਂ;
ਦੁਕ੍ਖਿਨ੍ਦ੍ਰਿਯਮ੍ਪਿ ਤਤ੍ਥੇਵ, ਪਾਪਪਾਕਮ੍ਹਿ ਭਾਸਿਤਂ.
੧੮੮. ਸਨ੍ਤੀਰਣਞ੍ਚ ਹਸਨਂ, ਸੋਮਨਸ੍ਸਾਨਿ ਸੋਲ਼ਸ;
ਪਠਮਾਦਿਚਤੁਜ੍ਝਾਨਂ, ਸੋਮਨਸ੍ਸਯੁਤਂ ਭਵੇ.
੧੮੯. ਦੋਮਨਸ੍ਸਯੁਤ੍ਤਾ ਦ੍ਵੇਵ, ਚਿਤ੍ਤੁਪ੍ਪਾਦਾ ਪਕਾਸਿਤਾ;
ਤਦਞ੍ਞੇ ਪਨ ਸਬ੍ਬੇਪਿ, ਪਞ੍ਚਪਞ੍ਞਾਸੁਪੇਕ੍ਖਕਾ.
੧੯੦. ਵੇਦਨਾਸਮ੍ਪਯੋਗਞ੍ਚ, ਵਿਨਿਬ੍ਭੁਜ੍ਜੇਵਮਟ੍ਠਧਾ;
ਹੇਤੁਯੋਗਾਦਿਭੇਦੇਹਿ, ਚਿਤ੍ਤੁਪ੍ਪਾਦਾ ਪਕਾਸਿਤਾ.
੧੯੧. ਤਂਤਂਵਿਯੋਗਭੇਦਞ੍ਚ, ਪਚ੍ਚੇਕਮਥ ਮਿਸ੍ਸਿਤਂ;
ਯਥਾਵੁਤ੍ਤਾਨੁਸਾਰੇਨ, ਯਥਾਸਮ੍ਭਵਤੋ ਨਯੇ.