੨. ਦੁਤਿਯੋ ਪਰਿਚ੍ਛੇਦੋ
ਲਕ੍ਖਣਰਸੁਪਟ੍ਠਾਨਵਿਭਾਗੋ
੬੭. ਸਭਾਵੋ ਲਕ੍ਖਣਂ ਨਾਮ, ਕਿਚ੍ਚਸਮ੍ਪਜ੍ਜਨਾ ਰਸੋ;
ਗਯ੍ਹਾਕਾਰੋ ਉਪਟ੍ਠਾਨਂ, ਪਦਟ੍ਠਾਨਂ ਤੁ ਪਚ੍ਚਯੋ.
੬੮. ਅਤ੍ਤੁਪਲਦ੍ਧਿਸਙ੍ਖਾਤਾ, ਸਮ੍ਪਤ੍ਤਾ ਚ ਪਨਤ੍ਥਤੋ;
ਲਕ੍ਖਣਰਸੁਪਟ੍ਠਾਨਾ, ਵੋਹਾਰਾਭੋਗਭੇਦਿਤਾ.
੬੯. ਤੇਪਞ੍ਞਾਸਸਭਾਵੇਸੁ, ਤਸ੍ਮਾ ਭੇਦਂ ਯਥਾਰਹਂ;
ਲਕ੍ਖਣਾਦਿਪ੍ਪਕਾਰੇਹਿ, ਪਵਕ੍ਖਾਮਿ ਇਤੋ ਪਰਂ.
੭੦. ਚਿਨ੍ਤੇਤੀਤਿ ਭਵੇ ਚਿਤ੍ਤਂ, ਚਿਨ੍ਤਨਮਤ੍ਤਮੇਵ ਵਾ;
ਸਮ੍ਪਯੁਤ੍ਤਾਥ ਵਾ ਤੇਨ, ਚਿਨ੍ਤੇਨ੍ਤੀਤਿ ਚ ਗੋਚਰਂ.
੭੧. ਫੁਸਤੀਤਿ ਭਵੇ ਫਸ੍ਸੋ, ਫੁਸਨਂ ਵਾਥ ਕੇਵਲਂ;
ਸਮ੍ਪਯੁਤ੍ਤਾਥ ਵਾ ਤੇਨ, ਫੁਸਨ੍ਤੀਤਿ ਚ ਗੋਚਰਂ.
੭੨. ਏਵਂ ਕਤ੍ਤਰਿ ਭਾਵੇ ਚ, ਕਰਣੇ ਚ ਯਥਾਰਹਂ;
ਤੇਪਞ੍ਞਾਸਸਭਾਵੇਸੁ, ਸਦ੍ਦਨਿਬ੍ਬਚਨਂ ਨਯੇ.
੭੩. ਆਲਮ੍ਬਣਮਨਂ ਚਿਤ੍ਤਂ, ਤਂਵਿਜਾਨਨਲਕ੍ਖਣਂ;
ਸਹਜਾਧਿਟ੍ਠਾਨਰਸਂ, ਚਿਨ੍ਤਾਕਪ੍ਪੋਤਿ ਗਯ੍ਹਤਿ.
੭੪. ਆਲਮ੍ਬਣਸਮੋਧਾਨੋ,
ਫਸ੍ਸੋ ਫੁਸਨਲਕ੍ਖਣੋ;
ਸਙ੍ਘਟ੍ਟਨਰਸੋ ਤਤ੍ਥ,
ਸਨ੍ਨਿਪਾਤੋਤਿ ਗਯ੍ਹਤਿ.
੭੫. ਵੇਦਨਾਲਮ੍ਬਣਰਸਾ, ਸਾ ਵੇਦਯਿਤਲਕ੍ਖਣਾ;
ਗੋਚਰਾਨੁਭਵਰਸਾ, ਅਨੁਭੁਤ੍ਤੀਤਿ ਗਯ੍ਹਤਿ.
੭੬. ਆਕਾਰਗਹਣਂ ਸਞ੍ਞਾ, ਸਾ ਸਞ੍ਜਾਨਨਲਕ੍ਖਣਾ;
ਨਿਮਿਤ੍ਤੁਪ੍ਪਾਦਨਰਸਾ, ਉਪਲਕ੍ਖਾਤਿ ਗਯ੍ਹਤਿ.
੭੭. ਚੇਤਨਾ ਚਿਤ੍ਤਵਿਪ੍ਫਾਰਾ, ਸਾਯਂ ਬ੍ਯਾਪਾਰਲਕ੍ਖਣਾ;
ਕਮ੍ਮਨ੍ਤਾਯੂਹਨਰਸਾ, ਸਂਵਿਧਾਨਨ੍ਤਿ ਗਯ੍ਹਤਿ.
੭੮. ਏਕਗ੍ਗਤਾ ਅਵਿਕ੍ਖੇਪੋ, ਸਾਵਿਸਾਹਾਰਲਕ੍ਖਣਾ;
ਸਮ੍ਪਿਣ੍ਡਨਰਸਾ ਚਿਤ੍ਤਂ, ਸਮੋਧਾਨਨ੍ਤਿ ਗਯ੍ਹਤਿ.
੭੯. ਯਾਪਨਂ ਸਹਜਾਤਾਨ-ਮਨੁਪਾਲਨਲਕ੍ਖਣਂ;
ਜੀਵਿਤਂ ਜੀਵਨਰਸਂ, ਆਯੁਬਨ੍ਧੋਤਿ ਗਯ੍ਹਤਿ.
੮੦. ਸਾਰਣਾ ਮਨਸੀਕਾਰੋ, ਸਮਨ੍ਨਾਹਾਰਲਕ੍ਖਣੋ;
ਸਂਯੋਜਨਰਸੋ ਚਿਤ੍ਤ-ਪਟਿਪਤ੍ਤੀਤਿ ਗਯ੍ਹਤਿ.
੮੧. ਸਙ੍ਕਪ੍ਪਨਲਕ੍ਖਣੋ ਤਕ੍ਕੋ, ਸਹਜਾਭਿਨਿਰੋਪਨੋ;
ਆਲਮ੍ਬਾਹਨਨਰਸੋ, ਸਨ੍ਨਿਰੁਜ੍ਝੋਤਿ ਗਯ੍ਹਤਿ.
੮੨. ਵਿਚਾਰੋ ਅਨੁਸਨ੍ਧਾਨੋ, ਅਨੁਮਜ੍ਜਨਲਕ੍ਖਣੋ;
ਚਿਤ੍ਤਾਨੁਯੋਜਨਰਸੋ, ਅਨੁਪੇਕ੍ਖਾਤਿ ਗਯ੍ਹਤਿ.
੮੩. ਅਧਿਮੋਕ੍ਖੋ ਅਸਂਸਪ੍ਪੋ, ਸੁਸਨ੍ਨਿਟ੍ਠਾਨਲਕ੍ਖਣੋ;
ਨਿਚ੍ਚਲਾਪਾਦਨਰਸੋ, ਦਲ਼੍ਹਵੁਤ੍ਤੀਤਿ ਗਯ੍ਹਤਿ.
੮੪. ਵੀਰਿਯਂ ਪਨ ਵਾਯਾਮੋ, ਮਹੁਸ੍ਸਾਹਨਲਕ੍ਖਣੋ;
ਕਿਚ੍ਚਾਸਂਸੀਦਨਰਸੋ, ਉਪਤ੍ਥਮ੍ਭੋਤਿ ਗਯ੍ਹਤਿ.
੮੫. ਆਲਮ੍ਬਤ੍ਥਿਕਤਾ ਛਨ੍ਦੋ, ਕਤ੍ਤੁਕਾਮਤਲਕ੍ਖਣੋ;
ਆਲਮ੍ਬਣੇਸਨਰਸੋ, ਹਤ੍ਥਾਦਾਨਨ੍ਤਿ ਗਯ੍ਹਤਿ.
੮੬. ਸਹਜਾਤਾਨੁਫਰਣਾ, ਸਮ੍ਪਿਯਾਯਨਲਕ੍ਖਣਾ;
ਸਮ੍ਪੀਨਨਰਸਾ ਪੀਤਿ, ਪਾਮੋਜ੍ਜਮਿਤਿ ਗਯ੍ਹਤਿ.
੮੭. ਚੇਤੋਸਦ੍ਦਹਨਂ ਸਦ੍ਧਾ, ਭੂਤੋਕਪ੍ਪਨਲਕ੍ਖਣਾ;
ਹਿਤਪਕ੍ਖਨ੍ਦਨਰਸਾ, ਅਧਿਮੁਤ੍ਤੀਤਿ ਗਯ੍ਹਤਿ.
੮੮. ਅਸਮ੍ਮੋਸਾ ਸਭਾਵੇਸੁ, ਸਤਿ ਧਾਰਣਲਕ੍ਖਣਾ;
ਧਮ੍ਮਾਪਿਲਾਪਨਰਸਾ, ਅਪ੍ਪਮਾਦੋਤਿ ਗਯ੍ਹਤਿ.
੮੯. ਹਿਰੀ ਜੇਗੁਚ੍ਛਾ ਪਾਪੇਸੁ, ਸਾ ਹਰਾਯਨਲਕ੍ਖਣਾ;
ਹੀਲ਼ਸਂਕੋਚਨਰਸਾ, ਪਾਪਲਜ੍ਜਾਤਿ ਗਯ੍ਹਤਿ.
੯੦. ਪਾਪਸਾਰਜ੍ਜਮੋਤ੍ਤਪ੍ਪਂ, ਉਬ੍ਬੇਗੁਤ੍ਤਾਸਲਕ੍ਖਣਂ;
ਭਯਸਙ੍ਕੋਚਨਰਸਂ, ਅਵਿਸ੍ਸਾਸੋਤਿ ਗਯ੍ਹਤਿ.
੯੧. ਅਲੋਭੋ ਅਨਭਿਸਙ੍ਗੋ, ਅਪਰਿਗ੍ਗਹਲਕ੍ਖਣੋ;
ਮੁਤ੍ਤਪ੍ਪਵਤ੍ਤਨਰਸੋ, ਅਸਂਸਗ੍ਗੋਤਿ ਗਯ੍ਹਤਿ.
੯੨. ਅਦੋਸੋ ਚਿਤ੍ਤਸਾਖਲ੍ਯਂ, ਅਬ੍ਯਾਪਜ੍ਜਨਲਕ੍ਖਣੋ;
ਸਣ੍ਹਪ੍ਪਵਤ੍ਤਨਰਸੋ, ਸੋਮ੍ਮਭਾਵੋਤਿ ਗਯ੍ਹਤਿ.
੯੩. ਅਮੋਹੋ ਖਲਿਤਾਭਾਵੋ, ਪਟਿਵਿਜ੍ਝਨਲਕ੍ਖਣੋ;
ਵਿਸਯੋਭਾਸਨਰਸੋ, ਪਟਿਬੋਧੋਤਿ ਗਯ੍ਹਤਿ.
੯੪. ਤਤ੍ਰਮਜ੍ਝਤ੍ਤਤੋਪੇਕ੍ਖਾ, ਸਮੀਕਰਣਲਕ੍ਖਣਾ;
ਅਪਕ੍ਖਪਾਤਨਰਸਾ, ਸਮਵਾਹੋਤਿ ਗਯ੍ਹਤਿ.
੯੫. ਪਸ੍ਸਦ੍ਧਿ ਕਾਯਚਿਤ੍ਤਾਨਂ, ਦਰਥਾਭਾਵਲਕ੍ਖਣਾ;
ਅਪਰਿਪ੍ਫਨ੍ਦਨਰਸਾ, ਸੀਤਿਭਾਵੋਤਿ ਗਯ੍ਹਤਿ.
੯੬. ਲਹੁਤਾ ਕਾਯਚਿਤ੍ਤਾਨਂ, ਅਦਨ੍ਧਾਕਾਰਲਕ੍ਖਣਾ;
ਅਵਿਤ੍ਥਾਰਰਸਾ ਸਲ੍ਲਹੁਕਵੁਤ੍ਤੀਤਿ ਗਯ੍ਹਤਿ.
੯੭. ਮੁਦੁਤਾ ਕਾਯਚਿਤ੍ਤਾਨਂ, ਕਕ੍ਖਲ਼ਾਭਾਵਲਕ੍ਖਣਾ;
ਕਿਚ੍ਚਾਵਿਰੋਧਨਰਸਾ, ਅਨੁਕੁਲ੍ਯਨ੍ਤਿ ਗਯ੍ਹਤਿ.
੯੮. ਕਮ੍ਮਞ੍ਞਤਾ ਉਭਿਨ੍ਨਮ੍ਪਿ, ਅਲਂਕਿਚ੍ਚਸ੍ਸ ਲਕ੍ਖਣਾ;
ਪਵਤ੍ਤਿਸਮ੍ਪਤ੍ਤਿਰਸਾ, ਯੋਗਭਾਵੋਤਿ ਗਯ੍ਹਤਿ.
੯੯. ਤਥਾ ਪਾਗੁਞ੍ਞਤਾ ਦ੍ਵਿਨ੍ਨਂ, ਵਿਸਦਾਕਾਰਲਕ੍ਖਣਾ;
ਸੁਖਪ੍ਪਵਤ੍ਤਨਰਸਾ, ਸੇਰਿਭਾਵੋਤਿ ਗਯ੍ਹਤਿ.
੧੦੦. ਉਜੁਤਾ ਕਾਯਚਿਤ੍ਤਾਨਂ, ਕੁਟਿਲਾਭਾਵਲਕ੍ਖਣਾ;
ਜਿਮ੍ਹਨਿਮ੍ਮਦਨਰਸਾ, ਉਜੁਵੁਤ੍ਤੀਤਿ ਗਯ੍ਹਤਿ.
੧੦੧. ਸਮ੍ਮਾਵਾਚਾ ਵਚੀਸੁਦ੍ਧਿ, ਵਾਚਾਸਂਯਮਲਕ੍ਖਣਾ;
ਮਿਚ੍ਛਾਵਾਚੋਰਮਰਸਾ, ਵਚੀਵੇਲਾਤਿ ਗਯ੍ਹਤਿ.
੧੦੨. ਸਮ੍ਮਾਕਮ੍ਮਂ ਕ੍ਰਿਯਾਸੁਦ੍ਧਂ, ਸਮ੍ਮਾਕਰਣਲਕ੍ਖਣਂ;
ਮਿਚ੍ਛਾਕਮ੍ਮੋਰਮਰਸਂ, ਕ੍ਰਿਯਾਵੇਲਾਤਿ ਗਯ੍ਹਤਿ.
੧੦੩. ਸਮ੍ਮਾਜੀਵੋ ਵਿਸੁਦ੍ਧੇਟ੍ਠਿ, ਅਲ੍ਲਿਟ੍ਠਾਜੀਵਲਕ੍ਖਣੋ;
ਮਿਚ੍ਛਾਜੀਵੋਰਮਰਸੋ, ਸਮ੍ਮਾਵੁਤ੍ਤੀਤਿ ਗਯ੍ਹਤਿ.
੧੦੪. ਕਰੁਣਾ ਦੀਨਸਤ੍ਤੇਸੁ, ਦੁਕ੍ਖਾਪਨਯਲਕ੍ਖਣਾ;
ਸੋਤ੍ਥਿਤਾਪਤ੍ਥਨਰਸਾ, ਅਨੁਕਮ੍ਪਾਤਿ ਗਯ੍ਹਤਿ.
੧੦੫. ਸੁਖਟ੍ਠਿਤੇਸੁ ਮੁਦਿਤਾ, ਅਨੁਮੋਦਨਲਕ੍ਖਣਾ;
ਚੇਤੋਵਿਕਾਸਨਰਸਾ, ਅਵਿਰੋਧੋਤਿ ਗਯ੍ਹਤਿ.
੧੦੬. ਚੇਤੋਸਾਰਜ੍ਜਨਾ ਲੋਭੋ, ਅਪਰਿਚ੍ਚਾਗਲਕ੍ਖਣੋ;
ਆਲਮ੍ਬਗਿਜ੍ਝਨਰਸੋ, ਅਭਿਲਗ੍ਗੋਤਿ ਗਯ੍ਹਤਿ.
੧੦੭. ਚੇਤੋਬ੍ਯਾਪਜ੍ਜਨਂ ਦੋਸੋ, ਸਮ੍ਪਦੁਸ੍ਸਨਲਕ੍ਖਣੋ;
ਆਲਮ੍ਬਣਘਾਤਰਸੋ, ਚਣ੍ਡਿਕ੍ਕਮਿਤਿ ਗਯ੍ਹਤਿ.
੧੦੮. ਚੇਤੋਸਮ੍ਮੁਯ੍ਹਨਂ ਮੋਹੋ,
ਸੋ ਸਮ੍ਮੁਯ੍ਹਨਲਕ੍ਖਣੋ;
ਸਭਾਵਚ੍ਛਾਦਨਰਸੋ,
ਅਨ੍ਧਭਾਵੋਤਿ ਗਯ੍ਹਤਿ.
੧੦੯. ਪਾਪਾਜਿਗੁਚ੍ਛਾਹਿਰਿਕਂ, ਨਿਲ੍ਲਜ੍ਜਾਕਾਰਲਕ੍ਖਣਂ;
ਪਾਪੋਪਲਾਪਨਰਸਂ, ਮਲਗ੍ਗਾਹੋਤਿ ਗਯ੍ਹਤਿ.
੧੧੦. ਅਸਾਰਜ੍ਜਨਮਨੋਤ੍ਤਪ੍ਪਮਨੁਤ੍ਤਾਸਨਲਕ੍ਖਣਂ;
ਪਾਪਪਕ੍ਖਨ੍ਦਨਰਸਂ, ਪਾਗਬ੍ਭਮਿਤਿ ਗਯ੍ਹਤਿ.
੧੧੧. ਦਿਟ੍ਠਿ ਦਲ਼੍ਹਵਿਪਲ੍ਲਾਸੋ, ਸਾ ਪਰਾਮਾਸਲਕ੍ਖਣਾ;
ਤੁਚ੍ਛਾਭਿਨਿਵੇਸਨਰਸਾ, ਮਿਚ੍ਛਾਗਾਹੋਤਿ ਗਯ੍ਹਤਿ.
੧੧੨. ‘‘ਅਹਸ੍ਮੀ’’ਤਿ ਮਞ੍ਞਮਾਨੋ, ਸੋ ਸਮੁਨ੍ਨਤਿਲਕ੍ਖਣੋ;
ਕੇਤੁਸਮ੍ਪਗ੍ਗਹਰਸੋ, ਅਹਂਕਾਰੋਤਿ ਗਯ੍ਹਤਿ.
੧੧੩. ਪਰਸਮ੍ਪਤ੍ਤੀਸੁ ਇਸ੍ਸਾ, ਅਕ੍ਖਮਾਕਾਰਲਕ੍ਖਣਾ;
ਚੇਤੋਵਿਕੁਚਨਰਸਾ, ਵਿਮੁਖਤ੍ਤਨ੍ਤਿ ਗਯ੍ਹਤਿ.
੧੧੪. ਪਰਿਗ੍ਗਹੇਸੁ ਮਚ੍ਛੇਰਂ, ਸਨ੍ਨਿਗੂਹਨਲਕ੍ਖਣਂ;
ਸਾਮਞ੍ਞਾਸਹਨਰਸਂ, ਵੇਵਿਚ੍ਛਮਿਤਿ ਗਯ੍ਹਤਿ.
੧੧੫. ਚੇਤੋਪਹਨਨਂ ਥੀਨਂ, ਤਂ ਸਂਸੀਦਨਲਕ੍ਖਣਂ;
ਉਸ੍ਸਾਹਭਞ੍ਜਨਰਸਂ, ਸਂਖਿਤ੍ਤਤ੍ਤਨ੍ਤਿ ਗਯ੍ਹਤਿ.
੧੧੬. ਵਿਘਾਤੋ ਸਹਜਾਤਾਨਂ, ਮਿਦ੍ਧਂ ਮੋਹਨਲਕ੍ਖਣਂ;
ਸਤ੍ਤਿਸਂਭਞ੍ਜਨਰਸਂ, ਆਤੁਰਤ੍ਤਨ੍ਤਿ ਗਯ੍ਹਤਿ.
੧੧੭. ਉਦ੍ਧਚ੍ਚਂ ਚਿਤ੍ਤਵਿਕ੍ਖੇਪੋ, ਅਵੂਪਸਮਲਕ੍ਖਣਂ;
ਚੇਤੋਨਵਟ੍ਠਾਨਰਸਂ, ਭਨ੍ਤਤ੍ਤਮਿਤਿ ਗਯ੍ਹਤਿ.
੧੧੮. ਵਿਪ੍ਪਟਿਸਾਰੋ ਕੁਕ੍ਕੁਚ੍ਚਮਨੁਸੋਚਨਲਕ੍ਖਣਂ;
ਅਤ੍ਤਾਨੁਸੋਚਨਰਸਂ, ਪਚ੍ਛਾਤਾਪੋਤਿ ਗਯ੍ਹਤਿ.
੧੧੯. ਕਙ੍ਖਾਯਨਾ ਵਿਚਿਕਿਚ੍ਛਾ, ਅਸਨ੍ਨਿਟ੍ਠਾਨਲਕ੍ਖਣਾ;
ਅਨੇਕਗਾਹਨਰਸਾ, ਅਪ੍ਪਤਿਟ੍ਠਾਤਿ ਗਯ੍ਹਤਿ.
੧੨੦. ਇਚ੍ਚੇਵਂ ਲਕ੍ਖਣਾਦੀਹਿ, ਵਿਭਾਵੇਯ੍ਯ ਵਿਚਕ੍ਖਣੋ;
ਤੇਪਞ੍ਞਾਸਸਭਾਵੇਸੁ, ਸਭਾਵਾਕਾਰਲਕ੍ਖਣਂ.
੧੨੧. ਲਕ੍ਖਣਤ੍ਥਕੁਸਲਾ ਸਲਕ੍ਖਣੇ,
ਲਕ੍ਖਣਤ੍ਥਪਰਮੇਪਿ ਕੇਵਲਂ;
ਲਕ੍ਖਣੁਗ੍ਗਹਸੁਖਾਯ ਵਣ੍ਣਯੁਂ,
ਲਕ੍ਖਣਾਦਿਮੁਖਤੋ ਸਲਕ੍ਖਣਂ.
੧੨੨. ਅਤ੍ਥਂ ਤਮੇਵਮਨੁਗਮ੍ਮ ਮਯੇਤ੍ਥ ਵੁਤ੍ਤ-
ਮਤ੍ਥਾਨਮਤ੍ਥਨਯਨਤ੍ਥਮਨੇਕਧਾਪਿ;
ਪਤ੍ਥੇਯ੍ਯ ਮੇਤ੍ਥ ਵਚਨਤ੍ਥਨਯੇਹਿ ਞਾਣ-
ਮਤ੍ਥੇਸੁ ਬੁਦ੍ਧਵਚਨਤ੍ਥਨਯਤ੍ਥਿਕੇਹਿ.
ਇਤਿ ਨਾਮਰੂਪਪਰਿਚ੍ਛੇਦੇ ਲਕ੍ਖਣਰਸੁਪਟ੍ਠਾਨਵਿਭਾਗੋ ਨਾਮ
ਦੁਤਿਯੋ ਪਰਿਚ੍ਛੇਦੋ.