੧. ਪਠਮੋ ਪਰਿਚ੍ਛੇਦੋ
ਨਾਮਤ੍ਤਯਵਿਭਾਗੋ
੩. ਤਤ੍ਥ ਚਿਤ੍ਤਂ ਚੇਤਸਿਕਂ, ਨਿਬ੍ਬਾਨਨ੍ਤਿ ਮਤਂ ਤਿਧਾ;
ਨਾਮਂ ਰੂਪਂ ਤੁ ਦੁਵਿਧਂ, ਭੂਤੋਪਾਦਾਯਭੇਦਤੋ.
੪. ਕਾਮਭੂਮਾਦਿਭੇਦੇਨ, ਤਤ੍ਥ ਚਿਤ੍ਤਂ ਚਤੁਬ੍ਬਿਧਂ;
ਚੇਤੋਯੁਤ੍ਤਾ ਦ੍ਵਿਪਞ੍ਞਾਸ, ਧਮ੍ਮਾ ਚੇਤਸਿਕਾ ਮਤਾ.
੫. ਚਕ੍ਖੁਸੋਤਘਾਨਜਿਵ੍ਹਾ-ਕਾਯਵਿਞ੍ਞਾਣਧਾਤੁਯੋ;
ਸਮ੍ਪਟਿਚ੍ਛਨਚਿਤ੍ਤਞ੍ਚ, ਤਥਾ ਸਨ੍ਤੀਰਣਦ੍ਵਯਂ.
੬. ਸੋਮਨਸ੍ਸਸਹਗਤਂ, ਉਪੇਕ੍ਖਾਸਹਿਤਨ੍ਤਿ ਚ;
ਇਚ੍ਚਾਹੇਤੁਕਚਿਤ੍ਤਾਨਿ, ਪੁਞ੍ਞਪਾਕਾਨਿ ਅਟ੍ਠਧਾ.
੭. ਸੋਮਨਸ੍ਸਯੁਤਂ ਤਤ੍ਥ, ਹਿਤ੍ਵਾ ਸਨ੍ਤੀਰਣਂ ਤਥਾ;
ਸਤ੍ਤਾਕੁਸਲਪਾਕਾਨਿ, ਤਾਨੇਵਾਤਿ ਵਿਨਿਦ੍ਦਿਸੇ.
੮. ਪਞ੍ਚਦ੍ਵਾਰਮਨੋਦ੍ਵਾਰਾਵਜ੍ਜਨਂ ਹਸਨਨ੍ਤਿ ਚ;
ਕ੍ਰਿਯਚਿਤ੍ਤਮੁਦੀਰਿਤਂ, ਤਿਵਿਧਮ੍ਪਿ ਅਹੇਤੁਕਂ.
੯. ਏਵਂ ਅਟ੍ਠਾਰਸਵਿਧਂ, ਮਾਨਸਂ ਹੋਤਿਹੇਤੁਕਂ;
ਮੂਲਭੇਦੇਨਾਕੁਸਲਂ, ਚਿਤ੍ਤਂ ਤੁ ਤਿਵਿਧਂ ਮਤਂ.
੧੦. ਸੋਮਨਸ੍ਸਸਹਗਤਂ, ਉਪੇਕ੍ਖਾਸਹਿਤਂ ਤਥਾ;
ਦਿਟ੍ਠਿਗਤਸਮ੍ਪਯੁਤ੍ਤਂ, ਵਿਪ੍ਪਯੁਤ੍ਤਨ੍ਤਿ ਭੇਦਿਤਂ.
੧੧. ਅਸਙ੍ਖਾਰਂ ਸਸਙ੍ਖਾਰਮਿਤਿ ਭਿਨ੍ਨਂ ਪਨਟ੍ਠਧਾ;
ਲੋਭਮੂਲਂ ਪਕਾਸੇਨ੍ਤਿ, ਤਤ੍ਥਾਕੁਸਲਮਾਨਸਂ.
੧੨. ਦੋਮਨਸ੍ਸਸਹਗਤਂ, ਪਟਿਘੇਨ ਸਮਾਯੁਤਂ;
ਦੋਸਮੂਲਮਸਙ੍ਖਾਰਂ, ਸਸਙ੍ਖਾਰਨ੍ਤਿਪਿ ਦ੍ਵਿਧਾ.
੧੩. ਵਿਚਿਕਿਚ੍ਛਾਸਹਗਤਂ, ਉਦ੍ਧਚ੍ਚਸਹਿਤਨ੍ਤਿ ਚ;
ਮੋਹਮੂਲਞ੍ਚ ਦੁਵਿਧਂ, ਉਪੇਕ੍ਖਾਯ ਸਮਾਯੁਤਂ.
੧੪. ਦ੍ਵਾਦਸਾਕੁਸਲਾਨੇਵਂ, ਚਿਤ੍ਤਾਨੀਤਿ ਵਿਭਾਵਯੇ;
ਹਿਤ੍ਵਾਹੇਤੁਕਪਾਪਾਨਿ, ਸੋਭਨਾਨਿ ਤਤੋ ਪਰਂ.
੧੫. ਸੋਮਨਸ੍ਸਸਹਗਤਂ, ਉਪੇਕ੍ਖਾਸਹਿਤਂ ਤਥਾ;
ਦ੍ਵਿਧਾ ਞਾਣੇਨ ਸਂਯੁਤ੍ਤਂ, ਵਿਪ੍ਪਯੁਤ੍ਤਨ੍ਤਿ ਭੇਦਿਤਂ.
੧੬. ਅਸਙ੍ਖਾਰਂ ਸਸਙ੍ਖਾਰਮਿਤਿ ਭਿਨ੍ਨਂ ਪਨਟ੍ਠਧਾ;
ਸਹੇਤੁਕਾਮਾਵਚਰ-ਪੁਞ੍ਞਪਾਕਕ੍ਰਿਯਾ ਭਵੇ.
੧੭. ਕਾਮੇ ਤੇਵੀਸ ਪਾਕਾਨਿ, ਪੁਞ੍ਞਾਪੁਞ੍ਞਾਨਿ ਵੀਸਤਿ;
ਏਕਾਦਸ ਕ੍ਰਿਯਾ ਚੇਤਿ, ਚਤੁਪਞ੍ਞਾਸ ਸਬ੍ਬਥਾ.
੧੮. ਤਕ੍ਕਚਾਰਪੀਤਿਸੁਖੇਕਗ੍ਗਤਾਸਹਿਤਂ ਪਨ;
ਪਠਮਜ੍ਝਾਨਕੁਸਲਂ, ਵਿਪਾਕਞ੍ਚ ਕ੍ਰਿਯਾ ਤਥਾ.
੧੯. ਦੁਤਿਯਂ ਤਕ੍ਕਤੋ ਹੀਨਂ, ਤਤਿਯਂ ਤੁ ਵਿਚਾਰਤੋ;
ਚਤੁਤ੍ਥਂ ਪੀਤਿਤੋ ਹੀਨਂ, ਉਪੇਕ੍ਖੇਕਗ੍ਗਤਾਯੁਤਂ.
੨੦. ਪਞ੍ਚਮਂ ਪਞ੍ਚਦਸਧਾ, ਰੂਪਾਵਚਰਮੀਰਿਤਂ;
ਪਞ੍ਚਮਜ੍ਝਾਨਮੇਵੇਕਮਰੂਪਾਵਚਰਂ ਪਨ.
੨੧. ਆਕਾਸਾਨਞ੍ਚਾਯਤਨਂ, ਪੁਞ੍ਞਪਾਕਕ੍ਰਿਯਾ ਤਥਾ;
ਵਿਞ੍ਞਾਣਞ੍ਚਾਯਤਨਞ੍ਚ, ਆਕਿਞ੍ਚਞ੍ਞਾਯਤਨਕਂ;
ਨੇਵਸਞ੍ਞਾਨਾਸਞ੍ਞਾਯਤਨਂ ਦ੍ਵਾਦਸਧਾ ਭਵੇ.
੨੨. ਸੋਤਾਪਤ੍ਤਿਮਗ੍ਗਚਿਤ੍ਤਂ, ਫਲਚਿਤ੍ਤਂ ਤਥਾਪਰਂ;
ਸਕਦਾਗਾਮਾਨਾਗਾਮਿ, ਅਰਹਤ੍ਤਨ੍ਤਿ ਅਟ੍ਠਧਾ.
੨੩. ਝਾਨਙ੍ਗਯੋਗਭੇਦੇਨ, ਕਤ੍ਵੇਕੇਕਂ ਤੁ ਪਞ੍ਚਧਾ;
ਵਿਤ੍ਥਾਰਾਨੁਤ੍ਤਰਂ ਚਿਤ੍ਤਂ, ਚਤ੍ਤਾਲੀਸਵਿਧਂ ਭਵੇ.
੨੪. ਰੂਪਾਵਚਰਚਿਤ੍ਤਾਨਿ, ਗਯ੍ਹਨ੍ਤਾਨੁਤ੍ਤਰਾਨਿ ਚ;
ਪਠਮਾਦਿਜ੍ਝਾਨਭੇਦੇ, ਆਰੁਪ੍ਪਞ੍ਚਾਪਿ ਪਞ੍ਚਮੇ.
੨੫. ਦ੍ਵਾਦਸਾਕੁਸਲਾਨੇਵਂ, ਕੁਸਲਾਨੇਕਵੀਸਤਿ;
ਛਤ੍ਤਿਂਸੇਵ ਵਿਪਾਕਾਨਿ, ਕ੍ਰਿਯਚਿਤ੍ਤਾਨਿ ਵੀਸਤਿ.
੨੬. ਏਕਵੀਸਸਤਂ ਵਾਥ, ਏਕੂਨਨਵੁਤੀਵਿਧਂ;
ਚਿਤ੍ਤਂ ਤਂਸਮ੍ਪਯੋਗੇਨ, ਭਿਨ੍ਨਾ ਚੇਤਸਿਕਾ ਤਥਾ.
੨੭. ਫਸ੍ਸੋ ਚ ਵੇਦਨਾ ਸਞ੍ਞਾ, ਚੇਤਨੇਕਗ੍ਗਤਾ ਤਥਾ;
ਜੀਵਿਤਂ ਮਨਸੀਕਾਰੋ, ਸਬ੍ਬਸਾਧਾਰਣਾ ਮਤਾ.
੨੮. ਤਕ੍ਕਚਾਰਾਧਿਮੋਕ੍ਖਾ ਚ, ਵੀਰਿਯਂ ਛਨ੍ਦਪੀਤਿਯੋ;
ਪਕਿਣ੍ਣਕਾ ਛ ਅਕ੍ਖਾਤਾ, ਤੇਰਸਞ੍ਞਸਮਾਨਤਾ.
੨੯. ਪਕਿਣ੍ਣਕਾ ਨ ਵਿਞ੍ਞਾਣੇ, ਵਿਤਕ੍ਕੋ ਦੁਤਿਯਾਦਿਸੁ;
ਵਿਚਾਰੋ ਤਤਿਯਾਦਿਮ੍ਹਿ, ਅਧਿਮੋਕ੍ਖੋ ਤੁ ਕਙ੍ਖਿਤੇ.
੩੦. ਸਨ੍ਤੀਰਣਮਨੋਧਾਤੁਤ੍ਤਿਕੇਸੁ ਵੀਰਿਯਂ ਤਥਾ;
ਚਤੁਤ੍ਥਸੁਖਿਤੇ ਪੀਤਿ, ਛਨ੍ਦੋਹੇਤੁਮ੍ਹਿ ਮੋਮੁਹੇ.
੩੧. ਛਸਟ੍ਠਿ ਪਞ੍ਚਪਞ੍ਞਾਸ, ਏਕਾਦਸ ਚ ਸੋਲ਼ਸ;
ਸਤ੍ਤਤਿ ਵੀਸਤਿ ਚੇਵ, ਤਾਨਿ ਚਿਤ੍ਤਾਨਿ ਦੀਪਯੇ.
੩੨. ਮੋਹਾਹਿਰਿਕਾਨੋਤ੍ਤਪ੍ਪ-ਮੁਦ੍ਧਚ੍ਚਂ ਸਬ੍ਬਪਾਪਜਂ;
ਇਸ੍ਸਾਮਚ੍ਛੇਰਕੁਕ੍ਕੁਚ੍ਚਦੋਸਾ ਤੁ ਪਟਿਘੇ ਤਥਾ.
੩੩. ਲੋਭੋ ਲੋਭੇ ਤੁ ਦਿਟ੍ਠਿ ਚ, ਦਿਟ੍ਠਿਯੁਤ੍ਤੇ ਵਿਯੁਤ੍ਤਕੇ;
ਮਾਨੋ ਚ ਥਿਨਮਿਦ੍ਧਂ ਤੁ, ਸਸਙ੍ਖਾਰੇਸੁ ਪਞ੍ਚਸੁ.
੩੪. ਕਙ੍ਖਿਤੇ ਵਿਚਿਕਿਚ੍ਛਾਤਿ, ਚੁਦ੍ਦਸਾਕੁਸਲਾਨਿਮੇ;
ਦ੍ਵਾਦਸਾਕੁਸਲੇਸ੍ਵੇਵ, ਨਿਯਮੇਨ ਵਵਤ੍ਥਿਤਾ.
੩੫. ਸਦ੍ਧਾ ਸਤਿ ਹਿਰੋਤ੍ਤਪ੍ਪਂ, ਅਲੋਭਾਦੋਸਮਜ੍ਝਤਾ;
ਕਾਯਚਿਤ੍ਤਾਨਂ ਪਸ੍ਸਦ੍ਧਿ, ਲਹੁਤਾ ਮੁਦੁਤਾ ਤਥਾ.
੩੬. ਕਮ੍ਮਞ੍ਞਤਾ ਚ ਪਾਗੁਞ੍ਞਉਜੁਤਾਤਿ ਯੁਗਾ ਛ ਚ;
ਏਕੂਨਵੀਸਤਿ ਧਮ੍ਮਾ, ਅਞ੍ਞਮਞ੍ਞਾਵਿਯੋਗਿਨੋ;
ਏਕੂਨਸਟ੍ਠਿਚਿਤ੍ਤੇਸੁ, ਸੋਭਨੇਸੁ ਪਵਤ੍ਤਿਤਾ.
੩੭. ਸਮ੍ਮਾਵਾਚਾ ਚ ਕਮ੍ਮਨ੍ਤਾਜੀਵਾਤਿ ਵਿਰਤੀ ਇਮਾ;
ਲੋਕੁਤ੍ਤਰੇ ਸਦਾ ਸਬ੍ਬਾ, ਸਹ ਕਾਮਸੁਭੇ ਵਿਸੁਂ.
੩੮. ਕਰੁਣਾਮੁਦਿਤਾ ਨਾਨਾ, ਰੂਪੇ ਪਞ੍ਚਮਵਜ੍ਜਿਤੇ;
ਕਦਾਚਿ ਕਾਮੇ ਕੁਸਲੇ, ਕ੍ਰਿਯਚਿਤ੍ਤੇ ਸਹੇਤੁਕੇ.
੩੯. ਤਿਹੇਤੁਕੇਸੁ ਚਿਤ੍ਤੇਸੁ, ਪਞ੍ਞਾ ਸਬ੍ਬਤ੍ਥ ਲਬ੍ਭਤਿ;
ਏਤੇ ਸਦ੍ਧਾਦਯੋ ਧਮ੍ਮਾ, ਪਞ੍ਚਵੀਸਤਿ ਸੋਭਨਾ.
੪੦. ਇਸ੍ਸਾਮਚ੍ਛੇਰਕੁਕ੍ਕੁਚ੍ਚਵਿਰਤੀਕਰੁਣਾਦਯੋ;
ਨਾਨਾ ਕਦਾਚਿ ਮਾਨੋ ਚ, ਥਿਨਮਿਦ੍ਧਂ ਤਥਾ ਸਹ.
੪੧. ਸਤ੍ਤ ਸਬ੍ਬਤ੍ਥ ਜਾਯਨ੍ਤਿ, ਛ ਤੁ ਧਮ੍ਮਾ ਯਥਾਰਹਂ;
ਚੁਦ੍ਦਸਾਕੁਸਲੇਸ੍ਵੇਵ, ਸੋਭਨੇਸ੍ਵੇਵ ਸੋਭਨਾ.
੪੨. ਦ੍ਵੇਪਞ੍ਞਾਸ ਪਨਿਚ੍ਚੇਵਂ, ਧਮ੍ਮੇ ਸਙ੍ਗਯ੍ਹ ਮਾਨਸੇ;
ਲਬ੍ਭਮਾਨੇ ਵਿਭਾਵੇਯ੍ਯ, ਪਚ੍ਚੇਕਮ੍ਪਿ ਵਿਚਕ੍ਖਣੋ.
੪੩. ਸੋਭਨਞ੍ਞਸਮਾਨਾ ਚ, ਪਠਮੇ ਵਿਰਤੀ ਵਿਨਾ;
ਦੁਤਿਯਾਦੀਸੁ ਤਕ੍ਕਞ੍ਚ, ਵਿਚਾਰਂ ਤਤਿਯਾਦਿਸੁ.
੪੪. ਚਤੁਤ੍ਥਾਦੀਸੁ ਪੀਤਿਞ੍ਚ, ਕਰੁਣਾਦਿਞ੍ਚ ਪਞ੍ਚਮੇ;
ਹਿਤ੍ਵਾ ਨੇਵ ਵਿਯੋਜੇਯ੍ਯ, ਸਙ੍ਖਿਪਿਤ੍ਵਾਨ ਪਞ੍ਚਧਾ.
੪੫. ਪਞ੍ਚਤਿਂਸ ਚਤੁਤ੍ਤਿਂਸ, ਤੇਤ੍ਤਿਂਸ ਚ ਯਥਾਕ੍ਕਮਂ;
ਦ੍ਵਤ੍ਤਿਂਸ ਤਿਂਸ ਏਵਾਥ, ਜਾਯਨ੍ਤੀਤਿ ਮਹਗ੍ਗਤੇ.
੪੬. ਗਹੇਤ੍ਵਾ ਵਿਰਤੀ ਸਬ੍ਬਾ, ਹਿਤ੍ਵਾਨ ਕਰੁਣਾਦਯੋ;
ਪਠਮੇ ਦੁਤਿਯਾਦਿਮ੍ਹਿ, ਵਿਤਕ੍ਕਾਦਿਂ ਵਿਨਾ ਤਥਾ.
੪੭. ਪਞ੍ਚਧਾਵ ਗਣੇਯ੍ਯੇਵਂ, ਛਤ੍ਤਿਂਸਾ ਚ ਯਥਾਕ੍ਕਮਂ;
ਪਞ੍ਚਤਿਂਸ ਚਤੁਤ੍ਤਿਂਸ, ਤੇਤ੍ਤਿਂਸਦ੍ਵਯਮੁਤ੍ਤਰੇ.
੪੮. ਸੋਭਨਞ੍ਞਸਮਾਨਾ ਚ, ਕਾਮੇਸੁ ਕੁਸਲੇ ਕ੍ਰਿਯੇ;
ਹਿਤ੍ਵਾ ਵਿਰਤਿਯੋ ਪਾਕੇ, ਵਿਰਤੀਕਰੁਣਾਦਯੋ.
੪੯. ਞਾਣਯੁਤ੍ਤੇ ਸੋਮਨਸ੍ਸੇ, ਵਿਯੁਤ੍ਤੇ ਞਾਣਵਜ੍ਜਿਤਾ;
ਉਪੇਕ੍ਖਕੇ ਪੀਤਿਹੀਨਾ, ਵਿਪ੍ਪਯੁਤ੍ਤੇ ਦ੍ਵਯਂ ਵਿਨਾ.
੫੦. ਚਤੁਧਾ ਤਿਵਿਧੇਸ੍ਵੇਵਂ, ਵਿਗਣੇਯ੍ਯ ਦ੍ਵਯਂ ਦ੍ਵਯਂ;
ਨ ਸਨ੍ਤੁਪੇਕ੍ਖਾਸਹਿਤੇ, ਕਰੁਣਾਦੀਤਿ ਕੇਚਨ.
੫੧. ਅਟ੍ਠਤਿਂਸ ਸਤ੍ਤਤਿਂਸਦ੍ਵਯਂ ਛਤ੍ਤਿਂਸਕਂ ਸੁਭੇ;
ਪਞ੍ਚਤਿਂਸ ਚਤੁਤ੍ਤਿਂਸਦ੍ਵਯਂ ਤੇਤ੍ਤਿਂਸਕਂ ਕ੍ਰਿਯੇ.
੫੨. ਤੇਤ੍ਤਿਂਸ ਪਾਕੇ ਦ੍ਵਤ੍ਤਿਂਸਦ੍ਵਯੇਕਤਿਂਸਕਂ ਭਵੇ;
ਸਹੇਤੁਕਾਮਾਵਚਰਪੁਞ੍ਞਪਾਕਕ੍ਰਿਯਾਮਨੇ.
੫੩. ਮੋਹਾਦਯੋ ਸਮਾਨਾ ਚ, ਪਠਮੇ ਲੋਭਦਿਟ੍ਠਿਯਾ;
ਤਤਿਯੇ ਲੋਭਮਾਨੇਨ, ਜਾਯਨ੍ਤੇਕੂਨਵੀਸਤਿ.
੫੪. ਅਟ੍ਠਾਰਸ ਪੀਤਿਹੀਨਾ, ਪਞ੍ਚਮੇ ਸਤ੍ਤਮੇ ਤਥਾ;
ਨਵਮੇ ਦੋਸਕੁਕ੍ਕੁਚ੍ਚਮਚ੍ਛਰਿਸ੍ਸਾਹਿ ਵੀਸਤਿ.
੫੫. ਪਠਮਾਦੀਸੁ ਵੁਤ੍ਤਾਵ, ਦੁਤਿਯਾਦੀਸੁ ਜਾਯਰੇ;
ਥਿਨਮਿਦ੍ਧੇਨੇਕਵੀਸ, ਵੀਸ ਦ੍ਵੇਵੀਸਤਿਕ੍ਕਮਾ.
੫੬. ਛਨ੍ਦਪੀਤਿਂ ਵਿਨੁਦ੍ਧਚ੍ਚੇ, ਕਙ੍ਖਿਤੇ ਨਿਚ੍ਛਯਂ ਵਿਨਾ;
ਪਞ੍ਚਦਸੇਵ ਕਙ੍ਖਾਯ, ਅਸੁਭੇਸੁ ਵਿਭਾਵਯੇ.
੫੭. ਸਿਤੇ ਸਮਾਨਾ ਨਿਚ੍ਛਨ੍ਦਾ, ਦ੍ਵਾਦਸੇਕਾਦਸੇਵ ਤੁ;
ਪੀਤਿਂ ਹਿਤ੍ਵਾਨ ਵੋਟ੍ਠਬ੍ਬੇ, ਵੀਰਿਯਂ ਸੁਖਤੀਰਣੇ.
੫੮. ਦ੍ਵਯਂ ਹਿਤ੍ਵਾ ਮਨੋਧਾਤੁ, ਉਪੇਕ੍ਖਾਤੀਰਣੇ ਦਸ;
ਸਤ੍ਤ ਸਾਧਾਰਣਾ ਏਵ, ਪਞ੍ਚਵਿਞ੍ਞਾਣਸਮ੍ਭਵਾ.
੫੯. ਇਤਿ ਚੇਤਸਿ ਸਮ੍ਭੂਤਾ,
ਦ੍ਵੇਪਞ੍ਞਾਸ ਯਥਾਰਹਂ;
ਞੇਯ੍ਯਾ ਚੇਤਸਿਕਾ ਧਮ੍ਮਾ,
ਚੇਤੋਭੇਦਪ੍ਪਭੇਦਿਨੋ.
੬੦. ਸੁਞ੍ਞਤਞ੍ਚਾਨਿਮਿਤ੍ਤਞ੍ਚ, ਤਥਾਪਣਿਹਿਤਨ੍ਤਿ ਚ;
ਤਿਵਿਧਾਕਾਰਮੀਰੇਨ੍ਤਿ, ਨਿਬ੍ਬਾਨਮਮਤਂ ਬੁਧਾ.
੬੧. ਯਂ ਆਰਬ੍ਭ ਪਵਤ੍ਤਨ੍ਤਂ, ਤਤ੍ਥਾਨੁਤ੍ਤਰਮਾਨਸਂ;
ਸੁਞ੍ਞਤਾਦਿਵਿਮੋਕ੍ਖੋਤਿ, ਨਾਮਮਾਲਮ੍ਬਤੋ ਲਭੇ.
੬੨. ਸੋਪਾਦਿਸੇਸਨਿਬ੍ਬਾਨਧਾਤੁ ਚੇਵ ਤਥਾਪਰਾ;
ਅਨੁਪਾਦਿਸੇਸਾ ਚਾਤਿ, ਦੁਵਿਧਾ ਪਰਿਯਾਯਤੋ.
੬੩. ਤਦੇਤਂ ਵਾਨਨਿਕ੍ਖਨ੍ਤਮਚ੍ਚਨ੍ਤਂ ਸਨ੍ਤਿਲਕ੍ਖਣਂ;
ਅਸ੍ਸਾਸਕਰਣਰਸਂ, ਖੇਮਭਾਵੇਨ ਗਯ੍ਹਤਿ.
੬੪. ਤਂ ਨਾਮੇਤੀਤਿ ਨਿਬ੍ਬਾਨਂ, ਨਮਨ੍ਤੀਤਿ ਤਤੋਪਰੇ;
ਤੇਪਞ੍ਞਾਸਾਤਿ ਨਾਮਾਨਿ, ਚਤੁਪਞ੍ਞਾਸ ਸਬ੍ਬਥਾ.
੬੫. ਚਿਤ੍ਤਚੇਤਸਿਕਯੋਜਨਾਨਯਂ,
ਚਿਤ੍ਤਮੁਤ੍ਤਮਮਿਦਂ ਪਕਾਸਿਤਂ;
ਸਾਧੁ ਚੇਤਸਿ ਨਿਧਾਯ ਪਣ੍ਡਿਤਾ,
ਸਾਧੁ ਸਾਸਨਧਰਾ ਭਵਨ੍ਤਿ ਤੇ.
੬੬. ਬੁਦ੍ਧਪ੍ਪਵਤ੍ਤਮਵਗਾਹਿਤਬੋਧਿਞਾਣ-
ਮਿਚ੍ਚਾਭਿਧਮ੍ਮਮਵਗਾਹਿਤਸਬ੍ਬਧਮ੍ਮਂ;
ਓਗਯ੍ਹ ਨਾਮਗਤਰਾਸਿਮਸੇਸਯਿਤ੍ਵਾ,
ਸਙ੍ਗਯ੍ਹ ਸਬ੍ਬਮਿਧ ਯੋਜਿਤਮਾਦਰੇਨ.
ਇਤਿ ਨਾਮਰੂਪਪਰਿਚ੍ਛੇਦੇ ਨਾਮਤ੍ਤਯਵਿਭਾਗੋ ਨਾਮ
ਪਠਮੋ ਪਰਿਚ੍ਛੇਦੋ.