੨੪. ਚਤੁਵੀਸਤਿਮੋ ਪਰਿਚ੍ਛੇਦੋ
ਪਚ੍ਚਯਨਿਦ੍ਦੇਸੋ
੧੩੯੫. ਯੇਸਂ ਪਚ੍ਚਯਧਮ੍ਮਾਨਂ, ਵਸਾ ਸਪ੍ਪਚ੍ਚਯਾ ਇਮੇ;
ਧਮ੍ਮਾ ਤੇ ਪਚ੍ਚਯੇ ਚਾਹਂ, ਦਸ੍ਸਯਿਸ੍ਸਾਮਿਤੋ ਪਰਂ.
ਕਤਮੇ ਪਚ੍ਚਯਾਤਿ? ਵੁਚ੍ਚਤੇ – ਹੇਤਾਰਮ੍ਮਣਾਧਿਪਤਿਅਨਨ੍ਤਰਸਮਨਨ੍ਤਰਸਹਜਾਤ- ਅਞ੍ਞਮਞ੍ਞਨਿਸ੍ਸਯੂਪਨਿਸ੍ਸਯਪੁਰੇਜਾਤਪਚ੍ਛਾਜਾਤਾਸੇਵਨਕਮ੍ਮਵਿਪਾਕਾਹਾਰਿਨ੍ਦ੍ਰਿਯ- ਝਾਨਮਗ੍ਗਸਮ੍ਪਯੁਤ੍ਤਵਿਪ੍ਪਯੁਤ੍ਤਅਤ੍ਥਿਨਤ੍ਥਿਵਿਗਤਾਵਿਗਤਵਸੇਨ ਚਤੁਵੀਸਤਿਵਿਧਾ ਹੋਨ੍ਤਿ.
ਤਤ੍ਥ ਹੇਤੁਪਚ੍ਚਯੋਤਿ ਲੋਭੋ ਦੋਸੋ ਮੋਹੋ ਅਲੋਭੋ ਅਦੋਸੋ ਅਮੋਹੋਤਿ ਇਮੇ ਛ ਧਮ੍ਮਾ ਹੇਤੁਪਚ੍ਚਯਾ. ਆਰਮ੍ਮਣਪਚ੍ਚਯੋਤਿ ਸਬ੍ਬਲੋਕਿਯਲੋਕੁਤ੍ਤਰਂ ਯਂ ਯਂ ਧਮ੍ਮਂ ਆਰਬ੍ਭ ਯੇ ਯੇ ਧਮ੍ਮਾ ਉਪ੍ਪਜ੍ਜਨ੍ਤਿ ਚਿਤ੍ਤਚੇਤਸਿਕਾ ਧਮ੍ਮਾ, ਤੇ ਤੇ ਧਮ੍ਮਾ ਤੇਸਂ ਤੇਸਂ ਧਮ੍ਮਾਨਂ ਆਰਮ੍ਮਣਪਚ੍ਚਯੇਨ ਪਚ੍ਚਯੋ.
ਅਧਿਪਤਿਪਚ੍ਚਯੋਤਿ ਏਤ੍ਥ ਸਹਜਾਤਾਧਿਪਤਿਆਰਮ੍ਮਣਾਧਿਪਤਿਵਸੇਨ ਦੁਵਿਧੋ. ਤਤ੍ਥ ਸਹਜਾਤਾਧਿਪਤਿ ਛਨ੍ਦਚਿਤ੍ਤਵੀਰਿਯਵੀਮਂਸਾਵਸੇਨ ਚਤੁਬ੍ਬਿਧੋ, ਆਰਮ੍ਮਣਾਧਿਪਤਿ ਪਨ ਦੋਮਨਸ੍ਸਵਿਚਿਕਿਚ੍ਛੁਦ੍ਧਚ੍ਚਕਿਰਿਯਾਬ੍ਯਾਕਤਾਕੁਸਲਵਿਪਾਕੇ ਚ ਅਨਿਟ੍ਠਸਮ੍ਮਤਞ੍ਚ ਰੂਪਂ ਠਪੇਤ੍ਵਾ ਅਵਸੇਸਂ. ਅਨਨ੍ਤਰਪਚ੍ਚਯੋਤਿ ਅਨਨ੍ਤਰਨਿਰੁਦ੍ਧਾ ਚਿਤ੍ਤਚੇਤਸਿਕਾ ਧਮ੍ਮਾ. ਤਥਾ ਸਮਨਨ੍ਤਰਪਚ੍ਚਯੋਪਿ.
ਸਹਜਾਤਪਚ੍ਚਯੋਤਿ ਚਿਤ੍ਤਚੇਤਸਿਕਾ, ਮਹਾਭੂਤਾ ਚੇਵ ਹਦਯਵਤ੍ਥੁ ਚ. ਤਥਾ ਅਞ੍ਞਮਞ੍ਞਪਚ੍ਚਯੋਪਿ. ਨਿਸ੍ਸਯਪਚ੍ਚਯੋਤਿ ਵਤ੍ਥੁਰੂਪਾਨਿ ਚੇਵ ਮਹਾਭੂਤਾ, ਚਿਤ੍ਤਚੇਤਸਿਕਾ ਚ. ਉਪਨਿਸ੍ਸਯਪਚ੍ਚਯੋਤਿ ਆਰਮ੍ਮਣਾਨਨ੍ਤਰਪਕਤੂਪਨਿਸ੍ਸਯਵਸੇਨ ਤਿਵਿਧੋ. ਤਤ੍ਥ ਆਰਮ੍ਮਣੂਪਨਿਸ੍ਸਯੋ ਆਰਮ੍ਮਣਾਧਿਪਤਿਯੇਵ, ਅਨਨ੍ਤਰੂਪਨਿਸ੍ਸਯੋ ਪਨ ਅਨਨ੍ਤਰਪਚ੍ਚਯੋਵ, ਪਕਤੂਪਨਿਸ੍ਸਯੋ ਪਨ ਕਾਯਿਕਸੁਖਦੁਕ੍ਖਉਤੁਭੋਜਨਸੇਨਾਸਨਪੁਗ੍ਗਲਾ ਸਦ੍ਧਾਸੀਲਸੁਤਚਾਗਪਞ੍ਞਾਰਾਗਦੋਸਮੋਹਾਦਯੋ ਚ.
ਪੁਰੇਜਾਤਪਚ੍ਚਯੋਤਿ ਵਤ੍ਥਾਰਮ੍ਮਣਵਸੇਨ ਦੁਵਿਧੋ. ਤਤ੍ਥ ਵਤ੍ਥੁਪੁਰੇਜਾਤੋ ਨਾਮ ਵਤ੍ਥੁਰੂਪਾਨਿ, ਆਰਮ੍ਮਣਪੁਰੇਜਾਤੋ ਨਾਮ ਪਚ੍ਚੁਪ੍ਪਨ੍ਨਰੂਪਾਦੀਨੇਵ. ਪਚ੍ਛਾਜਾਤਪਚ੍ਚਯੋਤਿ ਚਿਤ੍ਤਚੇਤਸਿਕਾ ਚ. ਆਸੇਵਨਪਚ੍ਚਯੋਤਿ ਠਪੇਤ੍ਵਾ ਆਵਜ੍ਜਨਦ੍ਵਯਂ ਲੋਕਿਯਕੁਸਲਾਕੁਸਲਕਿਰਿਯਾਬ੍ਯਾਕਤਾ ਧਮ੍ਮਾਵ.
ਕਮ੍ਮਪਚ੍ਚਯੋਤਿ ਸਹਜਾਤਨਾਨਕ੍ਖਣਿਕਵਸੇਨ ਦੁਵਿਧੋ. ਤਤ੍ਥ ਸਹਜਾਤਾ ਲੋਕਿਯਲੋਕੁਤ੍ਤਰਾ ਏਵ, ਨਾਨਕ੍ਖਣਿਕਾ ਪਨ ਸਾਸਵਕੁਸਲਾਕੁਸਲਚੇਤਨਾ, ਅਨਾਸਵਕੁਸਲਚੇਤਨਾ ਅਨਨ੍ਤਰਮੇਵ ਅਤ੍ਤਨੋ ਵਿਪਾਕਸ੍ਸ ਪਚ੍ਚਯੋ ਹੋਤਿ. ਵਿਪਾਕਪਚ੍ਚਯੋਤਿ ਵਿਪਾਕਚਿਤ੍ਤਚੇਤਸਿਕਾ. ਆਹਾਰਪਚ੍ਚਯੋਤਿ ਕਬਲ਼ੀਕਾਰਾਹਾਰਫਸ੍ਸਚੇਤਨਾਵਿਞ੍ਞਾਣਵਸੇਨ ਚਤੁਬ੍ਬਿਧੋ.
ਇਨ੍ਦ੍ਰਿਯਪਚ੍ਚਯੋਤਿ ਰੂਪਸਤ੍ਤਕਮਨਜੀਵਿਤਸੁਖਦੁਕ੍ਖਸੋਮਨਸ੍ਸਦੋਮਨਸ੍ਸਉਪੇਕ੍ਖਾਸਦ੍ਧਾਵੀਰਿਯ- ਸਤਿਸਮਾਧਿਪਞ੍ਞਾਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਅਞ੍ਞਿਨ੍ਦ੍ਰਿਯਅਞ੍ਞਤਾਵਿਨ੍ਦ੍ਰਿਯਾਨੀਤਿ ਵੀਸਤਿਨ੍ਦ੍ਰਿਯਾਨਿ, ਤੇਸੁ ਇਤ੍ਥਿਨ੍ਦ੍ਰਿਯਪੁਰਿਸਿਨ੍ਦ੍ਰਿਯਾਨਿ ਵਜ੍ਜੇਤ੍ਵਾ ਵੀਸਤਿਨ੍ਦ੍ਰਿਯਾਨਿ ਹੋਨ੍ਤਿ. ਝਾਨਪਚ੍ਚਯੋਤਿ ਵਿਤਕ੍ਕਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਵਸੇਨ ਪਞ੍ਚਵਿਧੋ. ਮਗ੍ਗਪਚ੍ਚਯੋਤਿ ਦਿਟ੍ਠਿਸਙ੍ਕਪ੍ਪਵਾਯਾਮਸਤਿਸਮਾਧਿਵਾਚਾਕਮ੍ਮਨ੍ਤਾਜੀਵਮਿਚ੍ਛਾਦਿਟ੍ਠਿਵਸੇਨ ਨਵਵਿਧੋ.
ਸਮ੍ਪਯੁਤ੍ਤਪਚ੍ਚਯੋਤਿ ਚਿਤ੍ਤਚੇਤਸਿਕਾਵ. ਵਿਪ੍ਪਯੁਤ੍ਤਪਚ੍ਚਯੋਤਿ ਵਤ੍ਥੁਪੁਰੇਜਾਤਾਨਿ ਚੇਵ ਪਚ੍ਛਾਜਾਤਾ ਚਿਤ੍ਤਚੇਤਸਿਕਾ ਚ. ਅਤ੍ਥਿਪਚ੍ਚਯੋਤਿ ਜੀਵਿਤਿਨ੍ਦ੍ਰਿਯਕਬਲ਼ੀਕਾਰਆਹਾਰਆਰਮ੍ਮਣਪੁਰੇਜਾਤਾਨਿ ਚੇਵ ਨਿਸ੍ਸਯਪਚ੍ਚਯੇ ਵੁਤ੍ਤਧਮ੍ਮਾਪਿ ਚ. ਨਤ੍ਥਿਪਚ੍ਚਯੋਤਿ ਅਨਨ੍ਤਰਪਚ੍ਚਯੋਵ. ਤਥਾ ਵਿਗਤਪਚ੍ਚਯੋ ਚ. ਅਵਿਗਤਪਚ੍ਚਯੋਤਿ ਅਤ੍ਥਿਪਚ੍ਚਯੋਵ. ਏਵਮਿਮੇ ਚਤੁਵੀਸਤਿ ਪਚ੍ਚਯਾ ਨਾਮ.
ਏਤ੍ਥ ਪਨ ਕਤਿਹਾਕਾਰੇਹਿ ਰੂਪਂ ਰੂਪਸ੍ਸ ਪਚ੍ਚਯੋ ਹੋਤੀਤਿ? ਯਥਾਰਹਂ ਸਹਜਾਤਅਞ੍ਞਮਞ੍ਞਨਿਸ੍ਸਯਾਹਾਰਿਨ੍ਦ੍ਰਿਯਅਤ੍ਥਿਅਵਿਗਤਵਸੇਨ ਸਤ੍ਤਧਾ ਪਚ੍ਚਯੋ ਹੋਤਿ.
ਰੂਪਂ ਅਰੂਪਸ੍ਸ ਯਥਾਰਹਂ ਆਰਮ੍ਮਣਾਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯੂਪਨਿਸ੍ਸਯਪੁਰੇਜਾਤਿਨ੍ਦ੍ਰਿਯਵਿਪ੍ਪ- ਯੁਤ੍ਤਅਤ੍ਥਿਅਵਿਗਤਵਸੇਨ ਏਕਾਦਸਹਿ ਆਕਾਰੇਹਿ ਪਚ੍ਚਯੋ ਹੋਤਿ.
ਰੂਪਂ ਰੂਪਾਰੂਪਸ੍ਸਾਤਿ ਨਤ੍ਥਿ.
੧੩੯੬. ਸਤ੍ਤਧਾ ਰੂਪਂ ਰੂਪਸ੍ਸ, ਭਵਤੇਕਾਦਸੇਹਿ ਤਂ;
ਪਚ੍ਚਯੋ ਨਾਮਧਮ੍ਮਸ੍ਸ, ਮਿਸ੍ਸਕਸ੍ਸ ਨ ਕਿਞ੍ਚਿ ਤੁ.
ਅਰੂਪਂ ਅਰੂਪਸ੍ਸ ਯਥਾਰਹਂ ਹੇਤਾਰਮ੍ਮਣਾਧਿਪਤਿਅਨਨ੍ਤਰਸਮਨਨ੍ਤਰਸਹਜਾਤਅਞ੍ਞਮਞ੍ਞਨਿਸ੍ਸਯੂਪਨਿਸ੍ਸਯਾ- ਸੇਵਨਕਮ੍ਮਵਿਪਾਕਾਹਾਰਿਨ੍ਦ੍ਰਿਯਝਾਨਮਗ੍ਗਸਮ੍ਪਯੁਤ੍ਤਅਤ੍ਥਿਨਤ੍ਥਿਵਿਗਤਾਵਿਗਤ- ਵਸੇਨ ਏਕਵੀਸਤਿਧਾ ਪਚ੍ਚਯੋ ਹੋਤਿ.
ਅਰੂਪਂ ਰੂਪਸ੍ਸ ਯਥਾਰਹਂ ਹੇਤਾਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਪਚ੍ਛਾਜਾਤਕਮ੍ਮਵਿਪਾਕਾਹਾਰਿਨ੍ਦ੍ਰਿਯ- ਝਾਨਮਗ੍ਗਵਿਪ੍ਪਯੁਤ੍ਤਅਤ੍ਥਿਅਵਿਗਤਵਸੇਨ ਪਨ੍ਨਰਸਧਾ ਪਚ੍ਚਯੋ ਹੋਤਿ.
ਅਰੂਪਂ ਰੂਪਾਰੂਪਸ੍ਸ ਯਥਾਰਹਂ ਹੇਤਾਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਕਮ੍ਮਵਿਪਾਕਾਹਾਰਿਨ੍ਦ੍ਰਿਯਝਾਨਮਗ੍ਗ- ਅਤ੍ਥਿਅਵਿਗਤਵਸੇਨ ਤੇਰਸਧਾ ਪਚ੍ਚਯੋ ਹੋਤਿ.
੧੩੯੭. ਏਕਵੀਸਤਿਧਾ ਨਾਮਂ, ਪਚ੍ਚਯੋ ਭਵਤਤ੍ਤਨੋ;
ਤਿਪਞ੍ਚਹਿ ਤਂ ਰੂਪਸ੍ਸ, ਉਭਿਨ੍ਨਂ ਤੇਰਸਧਾ ਪਨ.
ਰੂਪਾਰੂਪਂ ਰੂਪਸ੍ਸ ਯਥਾਰਹਂ ਸਹਜਾਤਨਿਸ੍ਸਯਅਤ੍ਥਿਅਵਿਗਤਵਸੇਨ ਚਤੁਧਾ ਪਚ੍ਚਯੋ ਹੋਤਿ.
ਰੂਪਾਰੂਪਂ ਅਰੂਪਸ੍ਸ ਯਥਾਰਹਂ ਸਹਜਾਤਅਞ੍ਞਮਞ੍ਞਨਿਸ੍ਸਯਿਨ੍ਦ੍ਰਿਯਅਤ੍ਥਿਅਵਿਗਤਵਸੇਨ ਛਧਾ ਪਚ੍ਚਯੋ ਹੋਤਿ.
ਰੂਪਾਰੂਪਂ ਰੂਪਸ੍ਸਾਤਿ ਨਤ੍ਥਿ.
੧੩੯੮. ਉਭੋਪਿ ਰੂਪਧਮ੍ਮਸ੍ਸ, ਚਤੁਧਾ ਹੋਨ੍ਤਿ ਪਚ੍ਚਯਾ;
ਛਬ੍ਬਿਧਾ ਨਾਮਧਮ੍ਮਸ੍ਸ, ਮਿਸ੍ਸਕਸ੍ਸ ਨ ਕਿਞ੍ਚਿ ਤੁ.
ਏਤੇਸੁ ਪਨ ਪਚ੍ਚਯੇਸੁ ਕਤਿ ਰੂਪਾ, ਕਤਿ ਅਰੂਪਾ, ਕਤਿਮਿਸ੍ਸਕਾਤਿ? ਪੁਰੇਜਾਤਪਚ੍ਚਯੋ ਏਕੋ ਰੂਪਧਮ੍ਮੋਵ, ਹੇਤੁਅਨਨ੍ਤਰਸਮਨਨ੍ਤਰਪਚ੍ਛਾਜਾਤਾਸੇਵਨਕਮ੍ਮਵਿਪਾਕਝਾਨਮਗ੍ਗਸਮ੍ਪਯੁਤ੍ਤਨਤ੍ਥਿ- ਵਿਗਤਾਨਂ ਵਸੇਨ ਦ੍ਵਾਦਸ ਪਚ੍ਚਯਾ ਅਰੂਪਧਮ੍ਮਾਵ, ਸੇਸਾ ਪਨ ਏਕਾਦਸ ਪਚ੍ਚਯਾ ਰੂਪਾਰੂਪਮਿਸ੍ਸਕਾਤਿ ਵੇਦਿਤਬ੍ਬਾ.
ਪੁਨ ਕਾਲਵਸੇਨ ਹੇਤੁਸਹਜਾਤਅਞ੍ਞਮਞ੍ਞਨਿਸ੍ਸਯਪੁਰੇਜਾਤਪਚ੍ਛਾਜਾਤਵਿਪਾਕਾਹਾਰਿਨ੍ਦ੍ਰਿਯਝਾਨਮਗ੍ਗ- ਸਮ੍ਪਯੁਤ੍ਤਵਿਪ੍ਪਯੁਤ੍ਤਅਤ੍ਥਿਅਵਿਗਤਾਨਂ ਵਸੇਨ ਪਨ੍ਨਰਸ ਪਚ੍ਚਯਾ ਪਚ੍ਚੁਪ੍ਪਨ੍ਨਾਵ ਹੋਨ੍ਤਿ. ਅਨਨ੍ਤਰਸਮਨਨ੍ਤਰਾਸੇਵਨਨਤ੍ਥਿਵਿਗਤਪਚ੍ਚਯਾ ਅਤੀਤਾਵ, ਕਮ੍ਮਪਚ੍ਚਯੋ ਅਤੀਤੋ ਵਾ ਹੋਤਿ ਪਚ੍ਚੁਪ੍ਪਨ੍ਨੋ ਵਾ, ਆਰਮ੍ਮਣਾਧਿਪਤਿਉਪਨਿਸ੍ਸਯਪਚ੍ਚਯਾ ਪਨ ਤਿਕਾਲਿਕਾ ਹੋਨ੍ਤਿ ਕਾਲਵਿਨਿਮੁਤ੍ਤਾ ਚ.
੧੩੯੯. ਪਚ੍ਚੁਪ੍ਪਨ੍ਨਾਵ ਹੋਨ੍ਤੇਤ੍ਥ,
ਪਚ੍ਚਯਾ ਦਸ ਪਞ੍ਚ ਚ;
ਅਤੀਤਾ ਏਵ ਪਞ੍ਚੇਕੋ,
ਦ੍ਵੇਕਾਲਿਕੋਵ ਦਸ੍ਸਿਤੋ;
ਤਯੋ ਤਿਕਾਲਿਕਾ ਚੇਵ,
ਵਿਨਿਮੁਤ੍ਤਾਪਿ ਕਾਲਤੋ.
ਸਬ੍ਬੇ ਪਨਿਮੇ ਚਤੁਵੀਸਤਿ ਪਚ੍ਚਯਾ ਯਥਾਰਹਂ ਆਰਮ੍ਮਣੂਪਨਿਸ੍ਸਯਕਮ੍ਮਅਤ੍ਥਿਪਚ੍ਚਯਾਨਂ ਵਸੇਨ ਚਤੂਸੁ ਪਚ੍ਚਯੇਸੁ ਸਙ੍ਗਹਂ ਗਚ੍ਛਨ੍ਤੀਤਿ ਵੇਦਿਤਬ੍ਬਾ.
ਇਤਿ ਅਭਿਧਮ੍ਮਾਵਤਾਰੇ ਪਚ੍ਚਯਨਿਦ੍ਦੇਸੋ ਨਾਮ
ਚਤੁਵੀਸਤਿਮੋ ਪਰਿਚ੍ਛੇਦੋ.
ਨਿਗਮਨਕਥਾ
੧੪੦੦. ਅਭਿਧਮ੍ਮਾਵਤਾਰੋਯਂ, ਵਰੋ ਪਰਮਗਮ੍ਭੀਰੋ;
ਇਚ੍ਛਤਾ ਨਿਪੁਣਂ ਬੁਦ੍ਧਿਂ, ਭਿਕ੍ਖੁਨਾ ਪਨ ਸੋਤਬ੍ਬੋ.
੧੪੦੧. ਸੁਮਤਿਮਤਿਵਿਚਾਰਬੋਧਨੋ,
ਵਿਮਤਿਵਿਮੋਹਵਿਨਾਸਨੋ ਅਯਂ;
ਕੁਮਤਿਮਤਿਮਹਾਤਮੋਨਾਸੋ,
ਪਟੁਮਤਿਭਾਸਕਰੋ ਮਤੋ ਮਯਾ.
੧੪੦੨. ਯਤੋ ਸੁਮਤਿਨਾ ਮਤੋ ਨਾਮਤੋ,
ਆਯਾਚਿਤਸਮ੍ਮਾਨਤੋ ਮਾਨਤੋ;
ਤਤੋ ਹਿ ਰਚਿਤੋ ਸਦਾ ਤੋਸਦਾ,
ਮਯਾ ਹਿਤਵਿਭਾਵਨਾ ਭਾਵਨਾ.
੧੪੦੩. ਅਤ੍ਥਤੋ ਗਨ੍ਥਤੋ ਚਾਪਿ, ਯੁਤ੍ਤਿਤੋ ਚਾਪਿ ਏਤ੍ਥ ਚ;
ਅਯੁਤ੍ਤਂ ਵਾ ਵਿਰੁਦ੍ਧਂ ਵਾ, ਯਦਿ ਦਿਸ੍ਸਤਿ ਕਿਞ੍ਚਿਪਿ.
੧੪੦੪. ਪੁਬ੍ਬਾਪਰਂ ਵਿਲੋਕੇਤ੍ਵਾ, ਵਿਚਾਰੇਤ੍ਵਾ ਪੁਨਪ੍ਪੁਨਂ;
ਧੀਮਤਾ ਸਙ੍ਗਹੇਤਬ੍ਬਂ, ਗਹੇਤਬ੍ਬਂ ਨ ਦੋਸਤੋ.
੧੪੦੫. ਤਿਵਿਧਾ ਬ੍ਯਪ੍ਪਥਾਨਞ੍ਹਿ, ਗਤਿਯੋ ਦੁਬ੍ਬਿਧਾਪਿ ਚੇ;
ਤਸ੍ਮਾ ਉਪਪਰਿਕ੍ਖਿਤ੍ਵਾ, ਵੇਦਿਤਬ੍ਬਂ ਵਿਭਾਵਿਨਾ.
੧੪੦੬. ਨਿਕਾਯਨ੍ਤਰਲਦ੍ਧੀਹਿ, ਅਸਮ੍ਮਿਸ੍ਸੋ ਅਨਾਕੁਲੋ;
ਮਹਾਵਿਹਾਰਵਾਸੀਨਂ, ਵਾਚਨਾਮਗ੍ਗਨਿਸ੍ਸਿਤੋ.
੧੪੦੭. ਮਧੁਰਕ੍ਖਰਸਂਯੁਤ੍ਤੋ, ਅਤ੍ਥੋ ਯਸ੍ਮਾ ਪਕਾਸਿਤੋ;
ਤਸ੍ਮਾ ਹਿਤਤ੍ਥਕਾਮੇਨ, ਕਾਤਬ੍ਬੋ ਏਤ੍ਥ ਆਦਰੋ.
੧੪੦੮. ਸਦ੍ਧਮ੍ਮਟ੍ਠਿਤਿਕਾਮੇਨ, ਕਰੋਨ੍ਤੇਨ ਚ ਯਂ ਮਯਾ;
ਪੁਞ੍ਞਮਧਿਗਤਂ ਤੇਨ, ਸੁਖਂ ਪਪ੍ਪੋਨ੍ਤੁ ਪਾਣਿਨੋ.
੧੪੦੯. ਅਨ੍ਤਰਾਯਂ ਵਿਨਾ ਚਾਯਂ, ਯਥਾਸਿਦ੍ਧਿਮੁਪਾਗਤੋ;
ਤਥਾ ਕਲ੍ਯਾਣਸਙ੍ਕਪ੍ਪਾ, ਸਿਦ੍ਧਿਂ ਗਚ੍ਛਨ੍ਤੁ ਪਾਣਿਨਂ.
੧੪੧੦. ਨਰਨਾਰਿਗਣਾਕਿਣ੍ਣੇ, ਅਸਂਕਿਣ੍ਣਕੁਲਾਕੁਲੇ;
ਫੀਤੇ ਸਬ੍ਬਙ੍ਗਸਮ੍ਪਨ੍ਨੇ, ਸੁਪਸਨ੍ਨਸਿਤੋਦਕੇ.
੧੪੧੧. ਨਾਨਾਰਤਨਸਮ੍ਪੁਣ੍ਣੇ, ਵਿਵਿਧਾਪਣਸਙ੍ਕਟੇ;
ਕਾਵੇਰਪਟ੍ਟਨੇ ਰਮ੍ਮੇ, ਨਾਨਾਰਾਮੋਪਸੋਭਿਤੇ.
੧੪੧੨. ਕੇਲਾਸਸਿਖਰਾਕਾਰਪਾਸਾਦਪਟਿਮਣ੍ਡਿਤੇ;
ਕਾਰਿਤੇ ਕਣ੍ਹਦਾਸੇਨ, ਦਸ੍ਸਨੀਯੇ ਮਨੋਰਮੇ.
੧੪੧੩. ਵਿਹਾਰੇ ਵਿਵਿਧਾਕਾਰਚਾਰੁਪਾਕਾਰਗੋਪੁਰੇ;
ਤਤ੍ਥ ਪਾਚੀਨਪਾਸਾਦੇ, ਮਯਾ ਨਿਵਸਤਾ ਸਦਾ.
੧੪੧੪. ਅਸਲ੍ਲੇਖਮਸਾਖਲ੍ਯੇ, ਸੀਲਾਦਿਗੁਣਸੋਭਿਨਾ;
ਅਯਂ ਸੁਮਤਿਨਾ ਸਾਧੁ, ਯਾਚਿਤੇਨ ਕਤੋ ਸਤਾ.
੧੪੧੫. ਦੇਵਾ ਕਾਲੇਨ ਵਸ੍ਸਨ੍ਤੁ, ਵਸ੍ਸਂ ਵਸ੍ਸਵਲਾਹਕਾ;
ਪਾਲਯਨ੍ਤੁ ਮਹੀਪਾਲਾ, ਧਮ੍ਮਤੋ ਸਕਲਂ ਮਹਿਂ.
੧੪੧੬. ਯਾਵ ਤਿਟ੍ਠਤਿ ਲੋਕਸ੍ਮਿਂ, ਹਿਮਵਾ ਪਬ੍ਬਤੁਤ੍ਤਮੋ;
ਤਾਵ ਤਿਟ੍ਠਤੁ ਸਦ੍ਧਮ੍ਮੋ, ਧਮ੍ਮਰਾਜਸ੍ਸ ਸਤ੍ਥੁਨੋਤਿ.
ਉਰਗਪੁਰਨਿਵਸਨੇਨ ਆਚਰਿਯੇਨ ਭਦਨ੍ਤਬੁਦ੍ਧਦਤ੍ਤੇਨ ਸੀਲਾਚਾਰਸਮ੍ਪਨ੍ਨੇਨ ਕਤੋ ਅਭਿਧਮ੍ਮਾਵਤਾਰੋ ਨਾਮਾਯਂ.
ਅਭਿਧਮ੍ਮਾਵਤਾਰੋ ਨਿਟ੍ਠਿਤੋ.
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ
ਨਾਮਰੂਪਪਰਿਚ੍ਛੇਦੋ
ਗਨ੍ਥਾਰਮ੍ਭਕਥਾ
੧. ਸਮ੍ਮਾ ਸਮ੍ਮਾਭਿਸਮ੍ਬੁਦ੍ਧਂ, ਧਮ੍ਮਂ ਧਮ੍ਮਪ੍ਪਕਾਸਨਂ;
ਸਂਘਂ ਸਂਘੁਤ੍ਤਮਂ ਲੋਕੇ, ਵਨ੍ਦਿਤ੍ਵਾ ਵਨ੍ਦਨਾਰਹਂ.
੨. ਨਾਮਰੂਪਪਰਿਚ੍ਛੇਦਂ, ਪਵਕ੍ਖਾਮਿ ਸਮਾਸਤੋ;
ਮਹਾਵਿਹਾਰਵਾਸੀਨਂ, ਵਣ੍ਣਨਾਨਯਨਿਸ੍ਸਿਤਂ.