੨੩. ਤੇਵੀਸਤਿਮੋ ਪਰਿਚ੍ਛੇਦੋ
ਕਿਲੇਸਪ੍ਪਹਾਨਕਥਾ
੧੩੭੫. ਏਤੇਸੁ ਯੇਨ ਯੇ ਧਮ੍ਮਾ, ਪਹਾਤਬ੍ਬਾ ਭਵਨ੍ਤਿ ਹਿ;
ਤੇਸਂ ਦਾਨਿ ਕਰਿਸ੍ਸਾਮਿ, ਪਕਾਸਨਮਿਤੋ ਪਰਂ.
ਇਮੇਸੁ ਪਨ ਚਤੂਸੁ ਮਗ੍ਗਞਾਣੇਸੁ ਯੇ ਧਮ੍ਮਾ ਯੇਨ ਞਾਣੇਨ ਪਹਾਤਬ੍ਬਾ, ਤੇਸਂ ਪਹਾਨਮੇਵਂ ਵੇਦਿਤਬ੍ਬਂ. ਏਤਾਨਿ ਹਿ ਯਥਾਯੋਗਂ ਸਂਯੋਜਨਕਿਲੇਸਮਿਚ੍ਛਤ੍ਤਲੋਕਧਮ੍ਮਮਚ੍ਛਰਿਯਵਿਪਲ੍ਲਾਸਗਨ੍ਥਾਗਤਿਆਸਵ- ਓਘਯੋਗਨੀਵਰਣਪਰਾਮਾਸਉਪਾਦਾਨਾਨੁਸਯਮਲਅਕੁਸਲਕਮ੍ਮਪਥ- ਅਕੁਸਲਚਿਤ੍ਤੁਪ੍ਪਾਦਸਙ੍ਖਾਤਾਨਂ ਪਹਾਨਕਰਾਨਿ.
ਤਤ੍ਥ ਸਂਯੋਜਨਾਨੀਤਿ ਦਸ ਸਂਯੋਜਨਾਨਿ. ਸੇਯ੍ਯਥਿਦਂ – ਰੂਪਰਾਗਾਰੂਪਰਾਗਮਾਨਉਦ੍ਧਚ੍ਚਾਵਿਜ੍ਜਾਤਿ ਇਮੇ ਪਞ੍ਚ ਉਦ੍ਧਂਭਾਗਿਯਸਂਯੋਜਨਾਨਿ ਨਾਮ. ਸਕ੍ਕਾਯਦਿਟ੍ਠਿ ਵਿਚਿਕਿਚ੍ਛਾ ਸੀਲਬ੍ਬਤਪਰਾਮਾਸੋ ਕਾਮਰਾਗੋ ਪਟਿਘੋਤਿ ਇਮੇ ਪਞ੍ਚ ਅਧੋਭਾਗਿਯਸਂਯੋਜਨਾਨਿ ਨਾਮ.
ਕਿਲੇਸਾਤਿ ਦਸ ਕਿਲੇਸਾ. ਸੇਯ੍ਯਥਿਦਂ – ਲੋਭੋ ਦੋਸੋ ਮੋਹੋ ਮਾਨੋ ਦਿਟ੍ਠਿ ਵਿਚਿਕਿਚ੍ਛਾ ਥਿਨਂ ਉਦ੍ਧਚ੍ਚਂ ਅਹਿਰਿਕਂ ਅਨੋਤ੍ਤਪ੍ਪਨ੍ਤਿ.
ਮਿਚ੍ਛਤ੍ਤਾਤਿ ਦਸ ਮਿਚ੍ਛਤ੍ਤਾ. ਸੇਯ੍ਯਥਿਦਂ – ਮਿਚ੍ਛਾਦਿਟ੍ਠਿ ਮਿਚ੍ਛਾਸਙ੍ਕਪ੍ਪੋ ਮਿਚ੍ਛਾਵਾਚਾ ਮਿਚ੍ਛਾਕਮ੍ਮਨ੍ਤੋ ਮਿਚ੍ਛਾਆਜੀਵੋ ਮਿਚ੍ਛਾਵਾਯਾਮੋ ਮਿਚ੍ਛਾਸਤਿ ਮਿਚ੍ਛਾਸਮਾਧਿ ਮਿਚ੍ਛਾਞਾਣਂ ਮਿਚ੍ਛਾਵਿਮੁਤ੍ਤੀਤਿ.
ਲੋਕਧਮ੍ਮਾਤਿ ਅਟ੍ਠ ਲੋਕਧਮ੍ਮਾ ਲਾਭੋ ਅਲਾਭੋ ਯਸੋ ਅਯਸੋ ਨਿਨ੍ਦਾ ਪਸਂਸਾ ਸੁਖਂ ਦੁਕ੍ਖਨ੍ਤਿ. ਇਧ ਪਨ ਕਾਰਣੂਪਚਾਰੇਨ ਲਾਭਾਦਿਵਤ੍ਥੁਕਸ੍ਸ ਅਨੁਨਯਸ੍ਸ, ਅਲਾਭਾਦਿਵਤ੍ਥੁਕਸ੍ਸ ਪਟਿਘਸ੍ਸ ਚੇਤਂ ਲੋਕਧਮ੍ਮਗਹਣੇਨ ਗਹਣਂ ਕਤਨ੍ਤਿ ਵੇਦਿਤਬ੍ਬਂ.
ਮਚ੍ਛਰਿਯਾਨੀਤਿ ਪਞ੍ਚ ਮਚ੍ਛਰਿਯਾਨਿ ਆਵਾਸਮਚ੍ਛਰਿਯਂ ਕੁਲਮਚ੍ਛਰਿਯਂ ਲਾਭਮਚ੍ਛਰਿਯਂ ਧਮ੍ਮਮਚ੍ਛਰਿਯਂ ਵਣ੍ਣਮਚ੍ਛਰਿਯਨ੍ਤਿ. ਇਮਾਨਿ ਆਵਾਸਾਦੀਸੁ ਅਞ੍ਞੇਸਂ ਸਾਧਾਰਣਭਾਵਂ ਅਸਹਨਾਕਾਰੇਨ ਪਵਤ੍ਤਾਨਿ ਮਚ੍ਛਰਿਯਾਨਿ.
ਵਿਪਲ੍ਲਾਸਾਤਿ ਅਨਿਚ੍ਚਦੁਕ੍ਖਅਨਤ੍ਤਅਸੁਭੇਸੁਯੇਵ ਵਤ੍ਥੂਸੁ ‘‘ਨਿਚ੍ਚਂ ਸੁਖਂ ਅਤ੍ਤਾ ਸੁਭ’’ਨ੍ਤਿ ਏਵਂ ਪਵਤ੍ਤਾ ਸਞ੍ਞਾਵਿਪਲ੍ਲਾਸੋ ਚਿਤ੍ਤਵਿਪਲ੍ਲਾਸੋ ਦਿਟ੍ਠਿਵਿਪਲ੍ਲਾਸੋਤਿ ਇਮੇ ਤਯੋ ਵਿਪਲ੍ਲਾਸਾ.
ਗਨ੍ਥਾਤਿ ਚਤ੍ਤਾਰੋ ਗਨ੍ਥਾ ਅਭਿਜ੍ਝਾਕਾਯਗਨ੍ਥੋ, ਬ੍ਯਾਪਾਦੋ, ਸੀਲਬ੍ਬਤਪਰਾਮਾਸੋ, ਇਦਂਸਚ੍ਚਾਭਿਨਿਵੇਸੋ ਕਾਯਗਨ੍ਥੋਤਿ.
ਅਗਤੀਤਿ ਛਨ੍ਦਦੋਸਮੋਹਭਯਾਨਿ. ਆਸਵਾਤਿ ਚਤ੍ਤਾਰੋ ਆਸਵਾ – ਕਾਮਰਾਗਭਵਰਾਗਮਿਚ੍ਛਾਦਿਟ੍ਠਿਅਵਿਜ੍ਜਾਸਵੋਤਿ. ਓਘਯੋਗਾਨੀਤਿਪਿ ਤੇਸਮੇਵਾਧਿਵਚਨਂ. ਨੀਵਰਣਾਨੀਤਿ ਕਾਮਚ੍ਛਨ੍ਦਾਦਯੋ. ਪਰਾਮਾਸੋਤਿ ਮਿਚ੍ਛਾਦਿਟ੍ਠਿਯਾ ਅਧਿਵਚਨਂ.
ਉਪਾਦਾਨਾਤਿ ਚਤ੍ਤਾਰਿ ਉਪਾਦਾਨਾਨਿ ਕਾਮੁਪਾਦਾਨਾਦੀਨੀਤਿ. ਅਨੁਸਯਾਤਿ ਸਤ੍ਤ ਅਨੁਸਯਾ ਕਾਮਰਾਗਾਨੁਸਯੋ ਪਟਿਘਮਾਨਦਿਟ੍ਠਿਵਿਚਿਕਿਚ੍ਛਾਭਵਰਾਗਾਵਿਜ੍ਜਾਨੁਸਯੋਤਿ. ਮਲਾਤਿ ਤਯੋ ਮਲਾ – ਲੋਭੋ ਦੋਸੋ ਮੋਹੋਤਿ.
ਅਕੁਸਲਕਮ੍ਮਪਥਾਤਿ ਦਸ ਅਕੁਸਲਕਮ੍ਮਪਥਾ. ਸੇਯ੍ਯਥਿਦਂ – ਪਾਣਾਤਿਪਾਤੋ ਅਦਿਨ੍ਨਾਦਾਨਂ ਕਾਮੇਸੁਮਿਚ੍ਛਾਚਾਰੋ ਮੁਸਾਵਾਦੋ ਪਿਸੁਣਵਾਚਾ ਫਰੁਸਵਾਚਾ ਸਮ੍ਫਪ੍ਪਲਾਪੋ ਅਭਿਜ੍ਝਾ ਬ੍ਯਾਪਾਦੋ ਮਿਚ੍ਛਾਦਿਟ੍ਠੀਤਿ ਦਸ.
ਅਕੁਸਲਚਿਤ੍ਤੁਪ੍ਪਾਦਾਤਿ ਲੋਭਮੂਲਾਨਿ ਅਟ੍ਠ, ਦੋਸਮੂਲਾਨਿ ਦ੍ਵੇ, ਮੋਹਮੂਲਾਨਿ ਦ੍ਵੇਤਿ ਇਮੇ ਦ੍ਵਾਦਸਾਤਿ.
ਏਤੇਸਂ ਸਂਯੋਜਨਾਦੀਨਂ ਏਤਾਨਿ ਯਥਾਸਮ੍ਭਵਂ ਪਹਾਨਕਰਾਨਿ. ਕਥਂ? ਸਂਯੋਜਨੇਸੁ ਤਾਵ ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਾ ਅਪਾਯਗਮਨੀਯਾ ਕਾਮਰਾਗਪਟਿਘਾਤਿ ਏਤੇ ਪਠਮਮਗ੍ਗਞਾਣਵਜ੍ਝਾ, ਸੇਸਾ ਕਾਮਰਾਗਪਟਿਘਾ ਓਲ਼ਾਰਿਕਾ ਦੁਤਿਯਮਗ੍ਗਞਾਣਵਜ੍ਝਾ, ਸੁਖੁਮਾ ਤਤਿਯਮਗ੍ਗਞਾਣਵਜ੍ਝਾ, ਰੂਪਰਾਗਾਦਯੋ ਪਞ੍ਚਪਿ ਚਤੁਤ੍ਥਮਗ੍ਗਞਾਣਵਜ੍ਝਾ ਏਵ.
ਕਿਲੇਸੇਸੁ ਦਿਟ੍ਠਿਵਿਚਿਕਿਚ੍ਛਾ ਪਠਮਮਗ੍ਗਞਾਣਵਜ੍ਝਾ, ਦੋਸੋ ਤਤਿਯਮਗ੍ਗਞਾਣਵਜ੍ਝੋ, ਲੋਭਮੋਹਮਾਨਥਿਨਉਦ੍ਧਚ੍ਚਅਹਿਰਿਕਾਨੋਤ੍ਤਪ੍ਪਾਨਿ ਚਤੁਤ੍ਥਮਗ੍ਗਞਾਣਵਜ੍ਝਾਨਿ.
ਮਿਚ੍ਛਤ੍ਤੇਸੁ ਮਿਚ੍ਛਾਦਿਟ੍ਠਿ ਮੁਸਾਵਾਦੋ ਮਿਚ੍ਛਾਕਮ੍ਮਨ੍ਤੋ ਮਿਚ੍ਛਾਆਜੀਵੋਤਿ ਇਮੇ ਪਠਮਮਗ੍ਗਞਾਣਵਜ੍ਝਾ, ਮਿਚ੍ਛਾਸਙ੍ਕਪ੍ਪੋ ਪਿਸੁਣਵਾਚਾ ਫਰੁਸਵਾਚਾਤਿ ਇਮੇ ਤਤਿਯਮਗ੍ਗਞਾਣਵਜ੍ਝਾ, ਚੇਤਨਾਯੇਵ ਚੇਤ੍ਥ ਮਿਚ੍ਛਾਵਾਚਾਤਿ ਵੇਦਿਤਬ੍ਬਾ, ਸਮ੍ਫਪ੍ਪਲਾਪਮਿਚ੍ਛਾਵਾਯਾਮਸਤਿਸਮਾਧਿਵਿਮੁਤ੍ਤਿਞਾਣਾਨਿ ਚਤੁਤ੍ਥਮਗ੍ਗਞਾਣਵਜ੍ਝਾਨਿ.
ਲੋਕਧਮ੍ਮੇਸੁ ਪਟਿਘੋ ਤਤਿਯਮਗ੍ਗਞਾਣਵਜ੍ਝੋ, ਅਨੁਨਯੋ ਚਤੁਤ੍ਥਮਗ੍ਗਞਾਣਵਜ੍ਝੋ, ਯਸੇ ਪਸਂਸਾਯ ਚ ਅਨੁਨਯੋ ਚਤੁਤ੍ਥਮਗ੍ਗਞਾਣਵਜ੍ਝੋਤਿ ਏਕੇ.
ਮਚ੍ਛਰਿਯਾਨਿ ਪਠਮਮਗ੍ਗਞਾਣਵਜ੍ਝਾਨਿ ਏਵ.
ਵਿਪਲ੍ਲਾਸੇਸੁ ਪਨ ਅਨਿਚ੍ਚੇ ਨਿਚ੍ਚਂ, ਅਨਤ੍ਤਨਿ ਅਤ੍ਤਾਤਿ ਚ ਸਞ੍ਞਾਚਿਤ੍ਤਦਿਟ੍ਠਿਵਿਪਲ੍ਲਾਸਾ, ਦੁਕ੍ਖੇ ਸੁਖਂ, ਅਸੁਭੇ ਸੁਭਨ੍ਤਿ ਦਿਟ੍ਠਿਵਿਪਲ੍ਲਾਸੋ ਚਾਤਿ ਇਮੇ ਪਠਮਮਗ੍ਗਞਾਣਵਜ੍ਝਾ, ਅਸੁਭੇ ਸੁਭਨ੍ਤਿ ਸਞ੍ਞਾਚਿਤ੍ਤਵਿਪਲ੍ਲਾਸਾ ਤਤਿਯਮਗ੍ਗਞਾਣਵਜ੍ਝਾ, ਦੁਕ੍ਖੇ ਸੁਖਨ੍ਤਿ ਚਤੁਤ੍ਥਮਗ੍ਗਞਾਣਵਜ੍ਝਾ.
ਗਨ੍ਥੇਸੁ ਸੀਲਬ੍ਬਤਪਰਾਮਾਸਇਦਂਸਚ੍ਚਾਭਿਨਿਵੇਸਕਾਯਗਨ੍ਥਾ ਪਠਮਮਗ੍ਗਞਾਣਵਜ੍ਝਾ, ਬ੍ਯਾਪਾਦਕਾਯਗਨ੍ਥੋ ਤਤਿਯਮਗ੍ਗਞਾਣਵਜ੍ਝੋ, ਅਭਿਜ੍ਝਾਕਾਯਗਨ੍ਥੋ ਚਤੁਤ੍ਥਮਗ੍ਗਞਾਣਵਜ੍ਝੋਵ.
ਅਗਤਿਯੋ ਪਠਮਮਗ੍ਗਞਾਣਵਜ੍ਝਾ.
ਆਸਵੇਸੁ ਦਿਟ੍ਠਾਸਵੋ ਪਠਮਞਾਣਵਜ੍ਝੋ, ਕਾਮਾਸਵੋ ਤਤਿਯਞਾਣਵਜ੍ਝੋ, ਇਤਰੇ ਦ੍ਵੇ ਚਤੁਤ੍ਥਞਾਣਵਜ੍ਝਾ. ਓਘਯੋਗੇਸੁਪਿ ਏਸੇਵ ਨਯੋ.
ਨੀਵਰਣੇਸੁ ਵਿਚਿਕਿਚ੍ਛਾਨੀਵਰਣਂ ਪਠਮਞਾਣਵਜ੍ਝਂ, ਕਾਮਚ੍ਛਨ੍ਦੋ ਬ੍ਯਾਪਾਦੋ ਕੁਕ੍ਕੁਚ੍ਚਨ੍ਤਿ ਤੀਣਿ ਤਤਿਯਞਾਣਵਜ੍ਝਾਨਿ, ਥਿਨਮਿਦ੍ਧਉਦ੍ਧਚ੍ਚਾਨਿ ਚਤੁਤ੍ਥਞਾਣਵਜ੍ਝਾਨਿ.
ਪਰਾਮਾਸੋ ਪਠਮਞਾਣਵਜ੍ਝੋ.
ਉਪਾਦਾਨੇਸੁ ਸਬ੍ਬੇਸਮ੍ਪਿ ਲੋਕਿਯਧਮ੍ਮਾਨਂ ਵਤ੍ਥੁਕਾਮਵਸੇਨ ‘‘ਕਾਮਾ’’ਤਿ ਆਗਤਤ੍ਤਾ ਰੂਪਾਰੂਪੇਸੁ ਰਾਗੋਪਿ ਕਾਮੁਪਾਦਾਨੇ ਪਤਤਿ, ਤਸ੍ਮਾ ਤਞ੍ਚ ਕਾਮੁਪਾਦਾਨਂ ਚਤੁਤ੍ਥਞਾਣਵਜ੍ਝਂ, ਸੇਸਾਨਿ ਪਠਮਞਾਣਵਜ੍ਝਾਨਿ.
ਅਨੁਸਯੇਸੁ ਦਿਟ੍ਠਿਵਿਚਿਕਿਚ੍ਛਾਨੁਸਯਾ ਪਠਮਞਾਣਵਜ੍ਝਾ, ਕਾਮਰਾਗਪਟਿਘਾਨੁਸਯਾ ਤਤਿਯਞਾਣਵਜ੍ਝਾ, ਮਾਨਭਵਰਾਗਾਵਿਜ੍ਜਾਨੁਸਯਾ ਚਤੁਤ੍ਥਞਾਣਵਜ੍ਝਾ.
ਮਲੇਸੁ ਦੋਸਮਲਂ ਤਤਿਯਞਾਣਵਜ੍ਝਂ, ਇਤਰਾਨਿ ਚਤੁਤ੍ਥਞਾਣਵਜ੍ਝਾਨੇਵ.
ਅਕੁਸਲਕਮ੍ਮਪਥੇਸੁ ਪਾਣਾਤਿਪਾਤੋ ਅਦਿਨ੍ਨਾਦਾਨਂ ਮਿਚ੍ਛਾਚਾਰੋ ਮੁਸਾਵਾਦੋ ਮਿਚ੍ਛਾਦਿਟ੍ਠੀਤਿ ਇਮੇ ਪਠਮਞਾਣਵਜ੍ਝਾ, ਪਿਸੁਣਵਾਚਾ ਫਰੁਸਵਾਚਾ ਬ੍ਯਾਪਾਦੋਤਿ ਤਤਿਯਞਾਣਵਜ੍ਝਾ, ਸਮ੍ਫਪ੍ਪਲਾਪੋ ਅਭਿਜ੍ਝਾ ਚਤੁਤ੍ਥਞਾਣਵਜ੍ਝਾਵ.
ਅਕੁਸਲਚਿਤ੍ਤੁਪ੍ਪਾਦੇਸੁ ਚਤ੍ਤਾਰੋ ਦਿਟ੍ਠਿਗਤਚਿਤ੍ਤੁਪ੍ਪਾਦਾ, ਵਿਚਿਕਿਚ੍ਛਾਸਮ੍ਪਯੁਤ੍ਤੋ ਚਾਤਿ ਪਞ੍ਚ ਪਠਮਞਾਣਵਜ੍ਝਾ, ਦ੍ਵੇ ਪਟਿਘਸਮ੍ਪਯੁਤ੍ਤਾ ਤਤਿਯਞਾਣਵਜ੍ਝਾ, ਸੇਸਾ ਚਤੁਤ੍ਥਞਾਣਵਜ੍ਝਾਤਿ.
ਯਞ੍ਚ ਯੇਨ ਵਜ੍ਝਂ, ਤਂ ਤੇਨ ਪਹਾਤਬ੍ਬਂ ਨਾਮ. ਤੇਨ ਵੁਤ੍ਤਂ ‘‘ਏਤੇਸਂ ਸਂਯੋਜਨਾਦੀਨਂ ਧਮ੍ਮਾਨਂ ਏਤਾਨਿ ਯਥਾਯੋਗਂ ਪਹਾਨਕਰਾਨੀ’’ਤਿ.
੧੩੭੬. ਏਤੇਸੁ ਞਾਣੇਸੁ ਚ ਯੇਨ ਯੇਨ,
ਯੋ ਯੋ ਹਿ ਧਮ੍ਮੋ ਸਮੁਪੇਤਿ ਘਾਤਂ;
ਸੋ ਸੋ ਅਸੇਸੇਨ ਚ ਤੇਨ ਤੇਨ,
ਸਨ੍ਦਸ੍ਸਿਤੋ ਸਾਧੁ ਮਯਾ ਪਨੇਵਂ.
ਕਿਲੇਸਪਹਾਨਕ੍ਕਮਕਥਾਯਂ.
੧੩੭੭. ਪਰਿਞ੍ਞਾਦੀਨਿ ਕਿਚ੍ਚਾਨਿ, ਯਾਨਿ ਵੁਤ੍ਤਾਨਿ ਸਤ੍ਥੁਨਾ;
ਸਚ੍ਚਾਭਿਸਮਯੇ ਤਾਨਿ, ਪਵਕ੍ਖਾਮਿ ਇਤੋ ਪਰਂ.
੧੩੭੮. ਏਕੇਕਸ੍ਸ ਪਨੇਤੇਸੁ,
ਞਾਣਸ੍ਸੇਕਕ੍ਖਣੇ ਸਿਯਾ;
ਪਰਿਞ੍ਞਾ ਚ ਪਹਾਨਞ੍ਚ,
ਸਚ੍ਛਿਕਿਰਿਯਾ ਚ ਭਾਵਨਾ.
੧੩੭੯. ਪਰਿਞ੍ਞਾਦੀਨਿ ਏਤਾਨਿ, ਕਿਚ੍ਚਾਨੇਕਕ੍ਖਣੇ ਪਨ;
ਯਥਾਸਭਾਵਤੋ ਤਾਨਿ, ਜਾਨਿਤਬ੍ਬਾਨਿ ਵਿਞ੍ਞੁਨਾ.
੧੩੮੦. ਪਦੀਪੋ ਹਿ ਯਥਾ ਲੋਕੇ, ਅਪੁਬ੍ਬਾਚਰਿਮਂ ਇਧ;
ਚਤ੍ਤਾਰਿ ਪਨ ਕਿਚ੍ਚਾਨਿ, ਕਰੋਤੇਕਕ੍ਖਣੇ ਪਨ.
੧੩੮੧. ਆਲੋਕਞ੍ਚ ਵਿਦਂਸੇਤਿ, ਨਾਸੇਤਿ ਤਿਮਿਰਮ੍ਪਿ ਚ;
ਪਰਿਯਾਦਿਯਤਿ ਤੇਲਞ੍ਚ, ਵਟ੍ਟਿਂ ਝਾਪੇਤਿ ਏਕਤੋ.
੧੩੮੨. ਏਵਂ ਤਂ ਮਗ੍ਗਞਾਣਮ੍ਪਿ, ਅਪੁਬ੍ਬਾਚਰਿਮਂ ਪਨ;
ਚਤ੍ਤਾਰਿਪਿ ਚ ਕਿਚ੍ਚਾਨਿ, ਕਰੋਤੇਕਕ੍ਖਣੇ ਪਨ.
੧੩੮੩. ਪਰਿਞ੍ਞਾਭਿਸਮਯੇਨੇਵ, ਦੁਕ੍ਖਂ ਅਭਿਸਮੇਤਿ ਸੋ;
ਪਹਾਨਾਭਿਸਮਯੇਨੇਵ, ਤਥਾ ਸਮੁਦਯਮ੍ਪਿ ਚ.
੧੩੮੪. ਭਾਵਨਾਵਿਧਿਨਾਯੇਵ, ਮਗ੍ਗਂ ਅਭਿਸਮੇਤਿ ਤਂ;
ਆਰਮ੍ਮਣਕ੍ਰਿਯਾਯੇਵ, ਨਿਰੋਧਂ ਸਚ੍ਛਿਕਰੋਤਿ ਸੋ.
ਵੁਤ੍ਤਮ੍ਪਿ ਚੇਤਂ ‘‘ਮਗ੍ਗਸਮਙ੍ਗਿਸ੍ਸ ਞਾਣਂ ਦੁਕ੍ਖੇਪੇਤਂ ਞਾਣਂ, ਦੁਕ੍ਖਸਮੁਦਯੇਪੇਤਂ ਞਾਣਂ, ਦੁਕ੍ਖਨਿਰੋਧੇਪੇਤਂ ਞਾਣਂ, ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯਪੇਤਂ ਞਾਣ’’ਨ੍ਤਿ. ਤਤ੍ਥ ਯਥਾ ਪਦੀਪੋ ਵਟ੍ਟਿਂ ਝਾਪੇਤਿ, ਏਵਂ ਮਗ੍ਗਞਾਣਂ ਦੁਕ੍ਖਂ ਪਰਿਜਾਨਾਤਿ. ਯਥਾ ਅਨ੍ਧਕਾਰਂ ਨਾਸੇਤਿ, ਏਵਂ ਸਮੁਦਯਂ ਪਜਹਤਿ. ਯਥਾ ਆਲੋਕਂ ਵਿਦਂਸੇਤਿ, ਏਵਂ ਸਹਜਾਤਾਦਿਪਚ੍ਚਯਤਾਯ ਸਮ੍ਮਾਸਙ੍ਕਪ੍ਪਾਦਿਮਗ੍ਗਂ ਭਾਵੇਤਿ. ਯਥਾ ਤੇਲਂ ਪਰਿਯਾਦਿਯਤਿ, ਏਵਂ ਕਿਲੇਸਪਰਿਯਾਦਾਨੇਨ ਨਿਰੋਧਂ ਸਚ੍ਛਿਕਰੋਤੀਤਿ ਵੇਦਿਤਬ੍ਬਂ.
੧੩੮੫. ਉਗ੍ਗਚ੍ਛਨ੍ਤੋ ਯਥਾਦਿਚ੍ਚੋ, ਅਪੁਬ੍ਬਾਚਰਿਮਂ ਪਨ;
ਚਤ੍ਤਾਰਿ ਪਨ ਕਿਚ੍ਚਾਨਿ, ਕਰੋਤੇਕਕ੍ਖਣੇ ਇਧ.
੧੩੮੬. ਓਭਾਸੇਤਿ ਚ ਰੂਪਾਨਿ, ਨਾਸੇਤਿ ਤਿਮਿਰਮ੍ਪਿ ਚ;
ਆਲੋਕਞ੍ਚ ਵਿਦਂਸੇਤਿ, ਸੀਤਞ੍ਚ ਪਟਿਹਞ੍ਞਤਿ.
੧੩੮੭. ਯਥਾ ਚ ਮਹਤੀ ਨਾਵਾ, ਅਪੁਬ੍ਬਾਚਰਿਮਂ ਪਨ;
ਚਤ੍ਤਾਰਿ ਪਨ ਕਿਚ੍ਚਾਨਿ, ਕਰੋਤੇਕਕ੍ਖਣੇ ਪਨ.
੧੩੮੮. ਜਹਤੀ ਓਰਿਮਂ ਤੀਰਂ, ਸੋਤਂ ਛਿਨ੍ਦਤਿ ਸਾ ਪਨ;
ਤਥਾ ਵਹਤਿ ਭਣ੍ਡਞ੍ਚ, ਤੀਰਮਪ੍ਪੇਤਿ ਪਾਰਿਮਂ.
੧੩੮੯. ਨਾਵਾਯੋਰਿਮਤੀਰਸ੍ਸ, ਯਥਾ ਪਜਹਨਂ ਪਨ;
ਤਥੇਵ ਮਗ੍ਗਞਾਣਸ੍ਸ, ਦੁਕ੍ਖਸ੍ਸ ਪਰਿਜਾਨਨਂ.
੧੩੯੦. ਯਥਾ ਛਿਨ੍ਦਤਿ ਤਂ ਸੋਤਂ, ਤਣ੍ਹਂ ਜਹਤਿ ਤਂ ਤਥਾ;
ਯਥਾ ਵਹਤਿ ਤਂ ਭਣ੍ਡਂ, ਸਹਜਾਤਾਦਿਨਾ ਪਨ.
੧੩੯੧. ਤਥੇਵ ਪਚ੍ਚਯਤ੍ਤੇਨ, ਮਗ੍ਗਂ ਭਾਵੇਤਿ ਨਾਮ ਸੋ;
ਯਥਾ ਪਾਰਂ ਪਨ ਏਵਂ, ਨਿਰੋਧਾਰਮ੍ਮਣਂ ਭਵੇ.
੧੩੯੨. ਲੋਕੁਤ੍ਤਰੇਨ ਨਿਦ੍ਦਿਟ੍ਠਾ, ਯਾ ਲੋਕੁਤ੍ਤਰਭਾਵਨਾ;
ਸਾ ਸਙ੍ਖੇਪਨਯੇਨੇਵਂ, ਮਯਾ ਸਾਧੁ ਪਕਾਸਿਤਾ.
੧੩੯੩. ਕੋ ਹਿ ਨਾਮ ਨਰੋ ਲੋਕੇ,
ਲੋਕੁਤ੍ਤਰਸੁਖਾਵਹਂ;
ਭਾਵਨਂ ਪਨ ਪਞ੍ਞਾਯ,
ਨ ਚ ਭਾਵੇਯ੍ਯ ਪਣ੍ਡਿਤੋ.
੧੩੯੪. ਇਮਂ ਵਿਦਿਤ੍ਵਾ ਹਿਤਭਾਵਨਂ ਵਨਂ,
ਉਪੇਤਿ ਯੋ ਵੇ ਸੁਖਸਂਹਿਤਂ ਹਿਤਂ;
ਵਿਧੂਯ ਚਿਤ੍ਤਸ੍ਸ ਅਨੁਤ੍ਤਮਂ ਤਮਂ,
ਉਪੇਤਿ ਚਾਵਿਗ੍ਗਹਕਮ੍ਪਦਂ ਪਦਂ.
ਇਤਿ ਅਭਿਧਮ੍ਮਾਵਤਾਰੇ ਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੋ ਨਾਮ
ਤੇਵੀਸਤਿਮੋ ਪਰਿਚ੍ਛੇਦੋ.