੨੨. ਬਾਵੀਸਤਿਮੋ ਪਰਿਚ੍ਛੇਦੋ

ਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੋ

੧੩੧੯. ਇਤੋ ਪਰਂ ਤੁ ਭਿਕ੍ਖੁਸ੍ਸ, ਹੋਤਿ ਗੋਤ੍ਰਭੁਮਾਨਸਂ;

ਆਵਜ੍ਜਨਿਯਠਾਨਤ੍ਤਾ, ਮਗ੍ਗਚਿਤ੍ਤਸ੍ਸ ਤਂ ਪਨ.

੧੩੨੦. ਨ ਚਪ੍ਪਟਿਪਦਾਞਾਣ-ਦਸ੍ਸਨਂ ਵਾ ਤਥੇਵ ਚ;

ਞਾਣਦਸ੍ਸਨਸੁਦ੍ਧਿਂ ਵਾ, ਭਜਤੇ ਨ ਕੁਦਾਚਨਂ.

੧੩੨੧. ਉਭਿਨ੍ਨਮਨ੍ਤਰਾ ਏਤਂ, ਅਬ੍ਬੋਹਾਰਿਕਮੇਵ ਤਂ;

ਵਿਪਸ੍ਸਨਾਯ ਸੋਤਸ੍ਮਿਂ, ਪਤਿਤਤ੍ਤਾ ਵਿਪਸ੍ਸਨਾ.

੧੩੨੨. ਪੋਥੁਜ੍ਜਨਿਕਗੋਤ੍ਤਂ ਵਾ, ਅਭਿਭੁਯ੍ਯ ਪਵਤ੍ਤਿਤੋ;

ਗੋਤ੍ਤਂ ਵੁਚ੍ਚਤਿ ਨਿਬ੍ਬਾਨਂ, ਤਤੋ ਭਵਤਿ ਗੋਤ੍ਰਭੁ.

੧੩੨੩. ਞਾਣਂ ਚਤੂਸੁ ਮਗ੍ਗੇਸੁ, ਞਾਣਦਸ੍ਸਨਸੁਦ੍ਧਿਕਂ;

ਤਤ੍ਥ ਤਂ ਪਠਮਂ ਮਗ੍ਗਂ, ਸਮ੍ਪਾਦੇਤੁਂ ਪਨਿਚ੍ਛਤਾ.

੧੩੨੪. ਅਞ੍ਞਂ ਕਿਞ੍ਚਿਪਿ ਕਾਤਬ੍ਬਂ, ਭਿਕ੍ਖੁਨਾ ਤੇਨ ਨਤ੍ਥਿ ਤਂ;

ਯਞ੍ਹਿ ਤੇਨ ਚ ਕਾਤਬ੍ਬਂ, ਸਿਯਾ ਤਂ ਕਤਮੇਵ ਤੁ.

੧੩੨੫. ਅਨੁਲੋਮਾਵਸਾਨਞ੍ਹਿ, ਸੂਰਂ ਤਿਕ੍ਖਂ ਵਿਪਸ੍ਸਨਂ;

ਉਪ੍ਪਾਦੇਨ੍ਤੇਨ ਤਂ ਸਬ੍ਬਂ, ਕਤਮੇਵ ਚ ਯੋਗਿਨਾ.

੧੩੨੬. ਤਸ੍ਸਾਨੁਲੋਮਞਾਣਸ੍ਸ, ਅਨ੍ਤੇ ਤੁ ਅਨਿਮਿਤ੍ਤਕਂ;

ਵਿਸਙ੍ਖਾਰਂ ਨਿਰੋਧਞ੍ਚ, ਨਿਬ੍ਬਾਨਂ ਅਮਤਂ ਪਦਂ.

੧੩੨੭. ਗੋਚਰਂ ਕੁਰੁਮਾਨਂ ਤਂ, ਨਿਬ੍ਬਾਨਾਰਮ੍ਮਣੇ ਪਨ;

ਪਠਮਾਵਜ੍ਜਨਞ੍ਚੇਵ, ਪਠਮਾਭੋਗਤਾਪਿ ਚ.

੧੩੨੮. ਮਗ੍ਗਸ੍ਸਾਨਨ੍ਤਰਾਦੀਹਿ, ਪਚ੍ਚਯੇਹਿ ਪਨਚ੍ਛਹਿ;

ਤਸ੍ਸ ਪਚ੍ਚਯਭਾਵਞ੍ਚ, ਸਾਧਯਨ੍ਤਂ ਤਤੋ ਪਨ.

੧੩੨੯. ਵਿਪਸ੍ਸਨਾਯ ਮੁਦ੍ਧਞ੍ਹਿ, ਸਿਖਾਪਤ੍ਤਾਯ ਤਾਯ ਤਂ;

ਉਪ੍ਪਜ੍ਜਤਿ ਅਨਾਵਤ੍ਤਂ-ਰਮ੍ਮਣਂ ਤਸ੍ਸ ਗੋਤ੍ਰਭੁ.

੧੩੩੦. ਏਕੇਨਾਵਜ੍ਜਨੇਨੇਵ, ਏਕਿਸ੍ਸਾਯੇਵ ਵੀਥਿਯਾ;

ਨਾਨਾਰਮ੍ਮਣਤਾ ਚਾਨੁ-ਲੋਮਗੋਤ੍ਰਭੁਚੇਤਸਂ.

੧੩੩੧. ਠਤ੍ਵਾ ਆਵਜ੍ਜਨਟ੍ਠਾਨੇ, ਤਮਨਾਵਜ੍ਜਨਮ੍ਪਿ ਚ;

ਮਗ੍ਗਸ੍ਸ ਪਨ ਤਂ ਸਞ੍ਞਂ, ਦਤ੍ਵਾ ਵਿਯ ਨਿਰੁਜ੍ਝਤਿ.

੧੩੩੨. ਮਗ੍ਗੋਪਿ ਤੇਨ ਤਂ ਦਿਨ੍ਨਂ, ਅਮੁਞ੍ਚਿਤ੍ਵਾਵ ਸਞ੍ਹਿਤਂ;

ਤਂ ਞਾਣਮਨੁਬਨ੍ਧਨ੍ਤੋ, ਜਾਯਤੇ ਤਦਨਨ੍ਤਰਂ.

੧੩੩੩. ਕਦਾਚਿਪਿ ਅਨਿਬ੍ਬਿਦ੍ਧਪੁਬ੍ਬਂ ਮਗ੍ਗੋ ਪਨੇਸ ਹਿ;

ਲੋਭਂ ਦੋਸਞ੍ਚ ਮੋਹਞ੍ਚ, ਵਿਦ੍ਧਂਸਨ੍ਤੋਵ ਜਾਯਤਿ.

੧੩੩੪. ਨ ਕੇਵਲਮਯਂ ਮਗ੍ਗੋ, ਦੋਸਨਾਸਨਮੇਵ ਚ;

ਕਰੋਤਿ ਅਥ ਖੋਪਾਯਦ੍ਵਾਰਾਨਿਪਿ ਪਿਧੇਤਿ ਚ.

੧੩੩੫. ਅਨਾਮਤਗ੍ਗਸਂਸਾਰਵਟ੍ਟਦੁਕ੍ਖਮਹੋਦਧਿਂ;

ਅਪਾਰਮਤਿਘੋਰਞ੍ਚ, ਸੋਸੇਤਿ ਚ ਅਸੇਸਤੋ.

੧੩੩੬. ਮਿਚ੍ਛਾਮਗ੍ਗਂ ਪਨਟ੍ਠਙ੍ਗਂ, ਜਾਯਮਾਨੋ ਚ ਉਜ੍ਝਤਿ;

ਸਬ੍ਬਵੇਰਭਯਾਨੇਤ੍ਥ, ਨਿਚ੍ਚਂ ਵੂਪਸਮੇਤਿ ਚ.

੧੩੩੭. ਬੁਦ੍ਧਸ੍ਸੋਰਸਪੁਤ੍ਤਤ੍ਤਂ, ਉਪਨੇਤਿ ਨਯਂ ਪਨ;

ਆਨਿਸਂਸੇ ਅਨੇਕੇਪਿ, ਪਵਤ੍ਤਯਤਿ ਯੋਗਿਨੋ.

੧੩੩੮. ਦਾਯਕੇਨਾਨਿਸਂਸਾਨਂ, ਅਨੇਕੇਸਮਨੇਨ ਚ;

ਆਦਿਮਗ੍ਗੇਨ ਸਂਯੁਤ੍ਤਂ, ਞਾਣਨ੍ਤਿ ਞਾਣਦਸ੍ਸਨਂ.

ਪਠਮਮਗ੍ਗਞਾਣਂ.

੧੩੩੯. ਤਸ੍ਸੇਵਾਨਨ੍ਤਰਂ ਤਸ੍ਸ, ਵਿਪਾਕਾ ਦ੍ਵੇਪਿ ਤੀਣਿ ਵਾ;

ਫਲਚਿਤ੍ਤਾਨਿ ਜਾਯਨ੍ਤੇ, ਨ ਜਾਯਨ੍ਤੇ ਤਤੋ ਪਰਂ.

੧੩੪੦. ਕੇਚਿ ਏਕਞ੍ਚ ਦ੍ਵੇ ਤੀਣਿ, ਚਤ੍ਤਾਰੀਤਿ ਵਦਨ੍ਤਿ ਤੁ;

ਨ ਪਨੇਤਂ ਗਹੇਤਬ੍ਬਂ, ਅਜਾਨਿਤ੍ਵਾ ਵਦਨ੍ਤਿ ਤੇ.

੧੩੪੧. ਏਕਸ੍ਸਾਸੇਵਨਂ ਨਤ੍ਥਿ, ਤਸ੍ਮਾ ਦ੍ਵੇ ਅਨੁਲੋਮਕਾ;

ਤੇਹਿ ਆਸੇਵਨਂ ਲਦ੍ਧਾ, ਤਤਿਯਂ ਹੋਤਿ ਗੋਤ੍ਰਭੁ.

੧੩੪੨. ਚਤੁਤ੍ਥਂ ਮਗ੍ਗਚਿਤ੍ਤਂ ਤੁ,

ਤਸ੍ਮਾ ਤੀਣਿ ਫਲਾਨਿ ਹਿ;

ਅਨੁਲੋਮਾ ਤਯੋ ਹੋਨ੍ਤਿ,

ਚਤੁਤ੍ਥਂ ਹੋਤਿ ਗੋਤ੍ਰਭੁ.

੧੩੪੩. ਪਞ੍ਚਮਂ ਮਗ੍ਗਚਿਤ੍ਤਞ੍ਚ, ਫਲਾਨਿ ਦ੍ਵੇ ਤਤੋ ਪਨ;

ਸਤ੍ਤਚਿਤ੍ਤਪਰਮਾਵ, ਏਕਾਵਜ੍ਜਨਵੀਥਿ ਹਿ.

੧੩੪੪. ਏਤ੍ਤਾਵਤਾ ਪਨੇਸੋ ਹਿ, ਸੋਤਾਪਨ੍ਨੋਤਿ ਵੁਚ੍ਚਤਿ;

ਫਲਸ੍ਸ ਪਰਿਯੋਸਾਨੇ, ਭਵਙ੍ਗੋਤ੍ਤਰਣਂ ਸਿਯਾ.

੧੩੪੫. ਤਤੋ ਭਵਙ੍ਗਂ ਛਿਨ੍ਦਿਤ੍ਵਾ, ਮਗ੍ਗਪੇਕ੍ਖਨਹੇਤੁਕਂ;

ਉਪ੍ਪਜ੍ਜਤਿ ਮਨੋਦ੍ਵਾਰੇ, ਆਵਜ੍ਜਨਮਨੋ ਪਨ.

੧੩੪੬. ਤਸ੍ਮਿਂ ਨਿਰੁਦ੍ਧੇ ਮਗ੍ਗਸ੍ਸ, ਪਚ੍ਚਵੇਕ੍ਖਣਸਞ੍ਞਿਤਾ;

ਜਵਨਾਨਿ ਹਿ ਜਾਯਨ੍ਤੇ, ਸਤ੍ਤੇਵ ਪਟਿਪਾਟਿਯਾ.

੧੩੪੭. ਏਸੇਵ ਚ ਨਯੋ ਞੇਯ੍ਯੋ, ਫਲਾਦੀਨਮ੍ਪਿ ਪੇਕ੍ਖਨੇ;

ਪਚ੍ਚਵੇਕ੍ਖਣਞਾਣਾਨਿ, ਭਵਨ੍ਤੇਕੂਨਵੀਸਤਿ.

੧੩੪੮. ਮਗ੍ਗੋ ਫਲਂ ਪਹੀਨਾ ਚ, ਕਿਲੇਸਾ ਅਵਸਿਟ੍ਠਕਾ;

ਨਿਬ੍ਬਾਨਞ੍ਚੇਤਿ ਪਞ੍ਚੇਤੇ, ਪਚ੍ਚਵੇਕ੍ਖਣਭੂਮਿਯੋ.

੧੩੪੯. ਏਵਂ ਸੋ ਪਚ੍ਚਵੇਕ੍ਖਿਤ੍ਵਾ, ਸੋਤਾਪਨ੍ਨੋਪਪਤ੍ਤਿਯਾ;

ਯੋਗਮਾਰਭਤੇ ਧੀਰੋ, ਦੁਤਿਯਾਯ ਚ ਭੂਮਿਯਾ.

੧੩੫੦. ਖਨ੍ਧਪਞ੍ਚਕਸਙ੍ਖਾਤਂ, ਤਂ ਸਙ੍ਖਾਰਗਤਂ ਪੁਨ;

ਅਨਿਚ੍ਚਂ ਦੁਕ੍ਖਮਨਤ੍ਤਾਤਿ, ਞਾਣੇਨ ਪਰਿਮਜ੍ਜਤਿ.

੧੩੫੧. ਤਤੋ ਵਿਪਸ੍ਸਨਾਵੀਥਿ-ਮੋਗਾਹਤਿ ਚ ਤਾਵਦੇ;

ਤਸ੍ਸੇਵਂ ਪਟਿਪਨ੍ਨਸ੍ਸ, ਹੇਟ੍ਠਾ ਵੁਤ੍ਤਨਯੇਨ ਤੁ.

੧੩੫੨. ਤਤੋ ਸਙ੍ਖਾਰੁਪੇਕ੍ਖਾਯ, ਅਵਸਾਨੇ ਤਥੇਵ ਚ;

ਏਕਾਵਜ੍ਜਨਵਾਰਸ੍ਮਿਂ, ਗੋਤ੍ਰਭੁਸ੍ਸ ਅਨਨ੍ਤਰਂ.

੧੩੫੩. ਬ੍ਯਾਪਾਦਕਾਮਰਾਗਾਨਂ, ਤਨੁਭਾਵਂ ਤੁ ਸਾਧਯਂ;

ਸਕਦਾਗਾਮਿਮਗ੍ਗੋਯਂ, ਜਾਯਤੇ ਦੁਤਿਯੋ ਪਨ.

ਦੁਤਿਯਮਗ੍ਗਞਾਣਂ.

੧੩੫੪. ਇਮਸ੍ਸਾਪਿ ਚ ਞਾਣਸ੍ਸ, ਹੇਟ੍ਠਾ ਵੁਤ੍ਤਨਯੇਨਿਧ;

ਫਲਚਿਤ੍ਤਾਨਿ ਞੇਯ੍ਯਾਨਿ, ਵਿਞ੍ਞੁਨਾ ਦ੍ਵੇਪਿ ਤੀਣਿ ਵਾ.

੧੩੫੫. ਏਤ੍ਤਾਵਤਾ ਪਨੇਸੋ ਹਿ, ਸਕਦਾਗਾਮਿ ਨਾਮਯਂ;

ਸਕਿਦੇਵ ਇਮਂ ਲੋਕਂ, ਆਗਨ੍ਤ੍ਵਾਨ੍ਤਕਰੋ ਭਵੇ.

੧੩੫੬. ਹੇਟ੍ਠਾ ਵੁਤ੍ਤਨਯੇਨੇਵ, ਪਞ੍ਚਧਾ ਪਚ੍ਚਵੇਕ੍ਖਣਂ;

ਏਵਂ ਸੋ ਪਚ੍ਚਵੇਕ੍ਖਿਤ੍ਵਾ, ਸਕਦਾਗਾਮਿਪਤ੍ਤਿਯਾ.

੧੩੫੭. ਯੋਗਮਾਰਭਤੇ ਧੀਰੋ, ਤਤਿਯਾਯ ਚ ਭੂਮਿਯਾ;

ਬ੍ਯਾਪਾਦਕਾਮਰਾਗਾਨਂ, ਪਹਾਨਾਯ ਚ ਪਣ੍ਡਿਤੋ.

੧੩੫੮. ਖਨ੍ਧਪਞ੍ਚਕਸਙ੍ਖਾਤਂ, ਤਂ ਸਙ੍ਖਾਰਗਤਂ ਪਨ;

ਅਨਿਚ੍ਚਂ ਦੁਕ੍ਖਮਨਤ੍ਤਾਤਿ, ਞਾਣੇਨ ਪਰਿਮਜ੍ਜਤਿ.

੧੩੫੯. ਤਤੋ ਵਿਪਸ੍ਸਨਾਵੀਥਿ-ਮੋਗਾਹਤਿ ਚ ਤਾਵਦੇ;

ਤਸ੍ਸੇਵਂ ਪਟਿਪਨ੍ਨਸ੍ਸ, ਹੇਟ੍ਠਾ ਵੁਤ੍ਤਨਯੇਨ ਤੁ.

੧੩੬੦. ਤਤੋ ਸਙ੍ਖਾਰੁਪੇਕ੍ਖਾਯ, ਅਵਸਾਨੇ ਤਥੇਵ ਚ;

ਏਕਾਵਜ੍ਜਨਵੀਥਿਮ੍ਹਿ, ਗੋਤ੍ਰਭੁਸ੍ਸ ਅਨਨ੍ਤਰਂ.

੧੩੬੧. ਬ੍ਯਾਪਾਦਕਾਮਰਾਗਾਨਂ, ਮੂਲਘਾਤਂ ਤੁ ਸਾਧਯਂ;

ਤਸ੍ਸਾਨਾਗਾਮਿਮਗ੍ਗੋਯਂ, ਜਾਯਤੇ ਤਤਿਯੋ ਪਨ.

ਤਤਿਯਮਗ੍ਗਞਾਣਂ.

੧੩੬੨. ਇਮਸ੍ਸਾਪਿ ਚ ਞਾਣਸ੍ਸ, ਹੇਟ੍ਠਾ ਵੁਤ੍ਤਨਯੇਨਿਧ;

ਪਵਤ੍ਤਿ ਫਲਚਿਤ੍ਤਾਨਂ, ਵੇਦਿਤਬ੍ਬਾ ਵਿਭਾਵਿਨਾ.

੧੩੬੩. ਏਤ੍ਤਾਵਤਾ ਪਨੇਸੋਪਿ, ਹੋਤਿਨਾਗਾਮਿ ਨਾਮਯਂ;

ਤਤ੍ਥੇਵ ਪਰਿਨਿਬ੍ਬਾਯੀ, ਅਨਾਵਤ੍ਤਿਸਭਾਵਤੋ.

੧੩੬੪. ਹੇਟ੍ਠਾ ਵੁਤ੍ਤਨਯੇਨੇਵ, ਪਞ੍ਚਧਾ ਪਚ੍ਚਵੇਕ੍ਖਣਂ;

ਏਵਂ ਸੋ ਪਚ੍ਚਵੇਕ੍ਖਿਤ੍ਵਾ, ਅਨਾਗਾਮਿਰਿਯਸਾਵਕੋ.

੧੩੬੫. ਯੋਗਮਾਰਭਤੇ ਧੀਰੋ, ਚਤੁਤ੍ਥਾਯ ਚ ਭੂਮਿਯਾ;

ਪਤ੍ਤਿਯਾਰੂਪਰਾਗਾਦਿ-ਪਹਾਨਾਯ ਚ ਪਣ੍ਡਿਤੋ.

੧੩੬੬. ਤਥੇਵ ਸਙ੍ਖਾਰਗਤਂ, ਅਨਿਚ੍ਚਾਦਿਵਸੇਨ ਸੋ;

ਪਰਿਵਤ੍ਤਤਿ ਞਾਣੇਨ, ਤਥੇਵ ਪਰਿਮਜ੍ਜਤਿ.

੧੩੬੭. ਤਤੋ ਵਿਪਸ੍ਸਨਾਵੀਥਿ-ਮੋਗਾਹਤਿ ਚ ਤਾਵਦੇ;

ਤਸ੍ਸੇਵਂ ਪਟਿਪਨ੍ਨਸ੍ਸ, ਹੇਟ੍ਠਾ ਵੁਤ੍ਤਨਯੇਨ ਤੁ.

੧੩੬੮. ਤਤੋ ਸਙ੍ਖਾਰੁਪੇਕ੍ਖਾਯ, ਅਵਸਾਨੇ ਤਥੇਵ ਚ;

ਏਕਾਵਜ੍ਜਨਵਾਰਸ੍ਮਿਂ, ਗੋਤ੍ਰਭੁਸ੍ਸ ਅਨਨ੍ਤਰਂ.

੧੩੬੯. ਤਸ੍ਸਾਰਹਤ੍ਤਮਗ੍ਗੋਯਂ,

ਜਾਯਤੇ ਤੁ ਤਤੋ ਪਰਂ;

ਰੂਪਰਾਗਾਦਿਦੋਸਾਨਂ,

ਵਿਦ੍ਧਂਸਾਯ ਕਰੋ ਪਨ.

ਚਤੁਤ੍ਥਮਗ੍ਗਞਾਣਂ.

੧੩੭੦. ਇਮਸ੍ਸਾਪਿ ਚ ਞਾਣਸ੍ਸ, ਹੇਟ੍ਠਾ ਵੁਤ੍ਤਨਯੇਨਿਧ;

ਪਵਤ੍ਤਿ ਫਲਚਿਤ੍ਤਾਨਂ, ਵੇਦਿਤਬ੍ਬਾ ਵਿਭਾਵਿਨਾ.

੧੩੭੧. ਏਤ੍ਤਾਵਤਾ ਪਨੇਸੋ ਹਿ,

ਅਰਹਾ ਨਾਮ ਅਟ੍ਠਮੋ;

ਅਰਿਯੋ ਪੁਗ੍ਗਲੋ ਹੋਤਿ,

ਮਹਾਖੀਣਾਸਵੋ ਅਯਂ.

੧੩੭੨. ਅਨੁਪ੍ਪਤ੍ਤਸਦਤ੍ਥੋ ਚ,

ਖੀਣਸਂਯੋਜਨੋ ਮੁਨਿ;

ਸਦੇਵਕਸ੍ਸ ਲੋਕਸ੍ਸ,

ਦਕ੍ਖਿਣੇਯ੍ਯੋ ਅਨੁਤ੍ਤਰੋ.

੧੩੭੩. ਏਤ੍ਤਾਵਤਾ ਚਤਸ੍ਸੋਪਿ, ਞਾਣਦਸ੍ਸਨਸੁਦ੍ਧਿਯੋ;

ਹਿਤਤ੍ਥਾਯ ਚ ਭਿਕ੍ਖੂਨਂ, ਸਙ੍ਖੇਪੇਨੇਵ ਦਸ੍ਸਿਤਾ.

੧੩੭੪. ਸਦ੍ਧੇਨ ਸਮ੍ਮਾ ਪਨ ਭਾਵਨੀਯਾ,

ਅਰਿਯਾਯ ਪਞ੍ਞਾਯ ਚ ਭਾਵਨਾਯ;

ਵਿਸੁਦ੍ਧਿਕਾਮੇਨ ਤਪੋਧਨੇਨ,

ਭਵਕ੍ਖਯਂ ਪਤ੍ਥਯਤਾ ਬੁਧੇਨ.

ਇਤਿ ਅਭਿਧਮ੍ਮਾਵਤਾਰੇ ਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੋ ਨਾਮ

ਬਾਵੀਸਤਿਮੋ ਪਰਿਚ੍ਛੇਦੋ.