੨੧. ਏਕਵੀਸਤਿਮੋ ਪਰਿਚ੍ਛੇਦੋ
ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੋ
੧੨੯੮. ਅਟ੍ਠਞਾਣਵਸੇਨੇਵ, ਸਿਖਾਪਕ੍ਕਾ ਵਿਪਸ੍ਸਨਾ;
ਨਵਮਂ ਪਟਿਪਦਾਞਾਣ-ਦਸ੍ਸਨਨ੍ਤਿ ਪਵੁਚ੍ਚਤਿ.
੧੨੯੯. ਅਟ੍ਠ ਞਾਣਾਨਿ ਨਾਮੇਤ੍ਥ, ਵੇਦਿਤਬ੍ਬਾਨਿ ਵਿਞ੍ਞੁਨਾ;
ਉਪਕ੍ਲੇਸਵਿਨਿਮੁਤ੍ਤਂ, ਞਾਣਂ ਸੁਵਿਸਦਂ ਪਨ.
੧੩੦੦. ਉਦਯਬ੍ਬਯੇ ਚ ਭਙ੍ਗੇ ਚ, ਭਯੇ ਆਦੀਨਵੇ ਤਥਾ;
ਨਿਬ੍ਬਿਦਾਪਸ੍ਸਨਾਞਾਣਂ, ਞਾਣਂ ਮੁਚ੍ਚਿਤੁਕਮ੍ਯਤਾ.
੧੩੦੧. ਪਟਿਸਙ੍ਖਾ ਚ ਸਙ੍ਖਾਰੇ, ਉਪੇਕ੍ਖਾਞਾਣਮਟ੍ਠਮਂ;
ਇਮਾਨਿ ਅਟ੍ਠ ਞਾਣਾਨਿ, ਨਵਮਂ ਸਚ੍ਚਾਨੁਲੋਮਕਂ.
੧੩੦੨. ਸਚ੍ਚਾਨੁਲੋਮਞਾਣਨ੍ਤਿ, ਅਨੁਲੋਮਂ ਪਵੁਚ੍ਚਤਿ;
ਤਂ ਸਮ੍ਪਾਦੇਤੁਕਾਮੇਨ, ਯੋਗਾਵਚਰਭਿਕ੍ਖੁਨਾ.
੧੩੦੩. ਉਦਯਬ੍ਬਯਞਾਣਂ ਤਂ, ਆਦਿਂ ਕਤ੍ਵਾ ਪਨਟ੍ਠਸੁ;
ਏਤੇਸੁ ਪਨ ਞਾਣੇਸੁ, ਯੋਗੋ ਕਰਣਿਯੋ ਪਨ.
੧੩੦੪. ਯਥਾਨੁਕ੍ਕਮਤੋ ਤਸ੍ਸ, ਤੇਸੁ ਞਾਣੇਸੁ ਅਟ੍ਠਸੁ;
ਅਨਿਚ੍ਚਾਦਿਵਸੇਨੇਵ, ਯੋਗਂ ਕਤ੍ਵਾ ਠਿਤਸ੍ਸ ਹਿ.
੧੩੦੫. ਅਨਿਚ੍ਚਂ ਦੁਕ੍ਖਮਨਤ੍ਤਾਤਿ, ਸਙ੍ਖਾਰੇ ਅਨੁਪਸ੍ਸਤੋ;
ਅਟ੍ਠਨ੍ਨਂ ਪਨ ਞਾਣਾਨਂ, ਵਸੇਨ ਪਨ ਯੋਗਿਨੋ.
੧੩੦੬. ਵਿਪਸ੍ਸਨਾ ਸਿਖਾਪਤ੍ਤਾ, ਹੋਤਿ ਵੁਟ੍ਠਾਨਗਾਮਿਨੀ;
ਸਚ੍ਚਾਨੁਲੋਮਞਾਣਨ੍ਤਿ, ਅਯਮੇਵ ਪਵੁਚ੍ਚਤਿ.
੧੩੦੭. ਸਙ੍ਖਾਰੁਪੇਕ੍ਖਾਞਾਣਂ ਤਂ, ਆਸੇਵਨ੍ਤਸ੍ਸ ਯੋਗਿਨੋ;
ਇਦਾਨਿ ਤਸ੍ਸ ਮਗ੍ਗੋ ਚ, ਸਮੁਪ੍ਪਜ੍ਜਿਸ੍ਸਤੀਤਿ ਹਿ.
੧੩੦੮. ਸਙ੍ਖਾਰੁਪੇਕ੍ਖਾ ਸਙ੍ਖਾਰੇ, ਅਨਿਚ੍ਚਾ ਦੁਕ੍ਖਾਤਿ ਵਾ ਤਥਾ;
ਸਮ੍ਮਸਿਤ੍ਵਾ ਭਵਙ੍ਗਂ ਤੁ, ਪੁਨ ਵੋਤਰਤੇਵ ਸਾ.
੧੩੦੯. ਭਵਙ੍ਗਾਨਨ੍ਤਰਂ ਸਙ੍ਖਾਰੁ-ਪੇਕ੍ਖਾਗਤਨਯੇਨ ਤੁ;
ਅਨਿਚ੍ਚਾਦਿਵਸੇਨੇਵ, ਸਙ੍ਖਾਰੇ ਪਨ ਗੋਚਰਂ.
੧੩੧੦. ਕੁਰੁਮਾਨਂ ਮਨੋਦ੍ਵਾਰੇ, ਜਾਯਤਾਵਜ੍ਜਨਂ ਤਤੋ;
ਭਵਙ੍ਗਾਵਟ੍ਟਨਂ ਕਤ੍ਵਾ, ਜਾਤਸ੍ਸਾਨਨ੍ਤਰਂ ਪਨ.
੧੩੧੧. ਸਙ੍ਖਾਰੇ ਗੋਚਰਂ ਕਤ੍ਵਾ, ਪਠਮਂ ਜਵਨਮਾਨਸਂ;
ਉਪ੍ਪਜ੍ਜਤੀਤਿ ਤਂ ਚਿਤ੍ਤਂ, ਪਰਿਕਮ੍ਮਨ੍ਤਿ ਵੁਚ੍ਚਤਿ.
੧੩੧੨. ਤਦਨਨ੍ਤਰਮੇਵਞ੍ਞਂ, ਸਙ੍ਖਾਰਾਰਮ੍ਮਣਂ ਪੁਨ;
ਦੁਤਿਯਂ ਜਵਨਂ ਹੋਤਿ, ਉਪਚਾਰਨ੍ਤਿ ਤਂ ਮਤਂ.
੧੩੧੩. ਤਦਨਨ੍ਤਰਂ ਤਂ ਹੋਤਿ, ਤਥਾ ਸਙ੍ਖਾਰਗੋਚਰਂ;
ਤਤਿਯਂ ਜਵਨਚਿਤ੍ਤਂ, ਅਨੁਲੋਮਨ੍ਤਿ ਸਞ੍ਞਿਤਂ.
੧੩੧੪. ਪੁਰਿਮਾਨਂ ਪਨਟ੍ਠਨ੍ਨਂ, ਞਾਣਾਨਂ ਅਨੁਲੋਮਤੋ;
ਬੋਧਿਪਕ੍ਖਿਯਧਮ੍ਮਾਨਂ, ਉਦ੍ਧਞ੍ਚ ਅਨੁਲੋਮਤੋ.
੧੩੧੫. ਤੇਨੇਵ ਤਂ ਹਿ ਸਚ੍ਚਾਨੁਲੋਮਞਾਣਂ ਪਵੁਚ੍ਚਤਿ;
ਇਦਂ ਹਿ ਪਨ ਸਚ੍ਚਾਨੁ-ਲੋਮਞਾਣਂ ਮਹੇਸਿਨਾ.
੧੩੧੬. ‘‘ਵੁਟ੍ਠਾਨਗਾਮਿਨੀਯਾ ਹਿ, ਪਰਿਯੋਸਾਨ’’ਨ੍ਤਿ ਭਾਸਿਤਂ;
ਞੇਯ੍ਯਂ ਸਬ੍ਬਪਕਾਰੇਨ, ਪਰਿਯੋਸਾਨਨ੍ਤਿ ਗੋਤ੍ਰਭੁ.
੧੩੧੭. ਇਤਿਨੇਕੇਹਿ ਨਾਮੇਹਿ, ਕਿਤ੍ਤਿਤਾਯਾ ਮਹੇਸਿਨਾ;
ਵੁਟ੍ਠਾਨਗਾਮਿਨੀ ਸਨ੍ਤਾ, ਪਰਿਸੁਦ੍ਧਾ ਵਿਪਸ੍ਸਨਾ.
੧੩੧੮. ਵੁਟ੍ਠਾਤੁਕਾਮੋ ਸਂਸਾਰਦੁਕ੍ਖਪਙ੍ਕਾ ਮਹਬ੍ਭਯਾ;
ਕਰੇਯ੍ਯ ਸਤਤਂ ਤਤ੍ਥ, ਯੋਗਂ ਪਣ੍ਡਿਤਜਾਤਿਕੋ.
ਇਤਿ ਅਭਿਧਮ੍ਮਾਵਤਾਰੇ ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੋ ਨਾਮ
ਏਕਵੀਸਤਿਮੋ ਪਰਿਚ੍ਛੇਦੋ.