੨੦. ਵੀਸਤਿਮੋ ਪਰਿਚ੍ਛੇਦੋ

ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੋ

੧੨੬੩. ਕਲਾਪਸਮ੍ਮਸਨੇਨੇਵ,

ਯੋਗੋ ਕਰਣਿਯੋ ਸਿਯਾ;

ਮਗ੍ਗਾਮਗ੍ਗੇ ਤੁ ਞਾਣਂ ਤ-

ਮਧਿਗਨ੍ਤੁਂ ਪਨਿਚ੍ਛਤਾ.

੧੨੬੪. ਪਚ੍ਚੁਪ੍ਪਨ੍ਨਸ੍ਸ ਧਮ੍ਮਸ੍ਸ, ਨਿਬ੍ਬਤ੍ਤਿ ਉਦਯੋ ਮਤੋ;

ਵਯੋ ਵਿਪਰਿਣਾਮੋਤਿ, ਤਸ੍ਸੇਵ ਸਮੁਦੀਰਿਤਾ.

੧੨੬੫. ਅਨੁਪਸ੍ਸਨਾਪਿ ਞਾਣਨ੍ਤਿ, ਵਰਞਾਣੇਨ ਦੇਸਿਤਂ;

ਸੋ ਪਨੇਵਂ ਪਜਾਨਾਤਿ, ਯੋਗਾਵਚਰਮਾਣਵੋ.

੧੨੬੬. ਇਮਸ੍ਸ ਨਾਮਰੂਪਸ੍ਸ, ਪੁਬ੍ਬੇ ਉਪ੍ਪਤ੍ਤਿਤੋ ਪਨ;

ਨਿਚਯੋ ਰਾਸਿ ਵਾ ਨਤ੍ਥਿ, ਤਥਾ ਉਪ੍ਪਜ੍ਜਤੋਪਿ ਚ.

੧੨੬੭. ਰਾਸਿਤੋ ਨਿਚਯਾ ਵਾਪਿ, ਨਤ੍ਥਿ ਆਗਮਨਨ੍ਤਿ ਚ;

ਤਥਾ ਨਿਰੁਜ੍ਝਮਾਨਸ੍ਸ, ਨ ਦਿਸਾਗਮਨਨ੍ਤਿ ਚ.

੧੨੬੮. ਨਿਰੁਦ੍ਧਸ੍ਸਾਪਿ ਏਕਸ੍ਮਿਂ, ਠਾਨੇ ਨਤ੍ਥਿ ਚਯੋਤਿ ਚ;

ਏਤ੍ਥ ਵੀਣੂਪਮਾ ਵੁਤ੍ਤਾ, ਏਤਸ੍ਸਤ੍ਥਸ੍ਸ ਦੀਪਨੇ.

੧੨੬੯. ਉਦਬ੍ਬਯਮਨਕ੍ਕਾਰਮੇਵਂ ਸਙ੍ਖੇਪਤੋ ਪਨ;

ਕਤ੍ਵਾ ਤਸ੍ਸੇਵ ਞਾਣਸ੍ਸ, ਵਿਭਙ੍ਗਸ੍ਸ ਵਸੇਨ ਤੁ.

੧੨੭੦. ‘‘ਅਵਿਜ੍ਜਾਸਮੁਦਯਾ ਰੂਪਸਮੁਦਯੋ’’ਤਿ ਹਿ ਆਦਿਨਾ;

ਨਯੇਨੇਕੇਕਖਨ੍ਧਸ੍ਸ, ਉਦਯਬ੍ਬਯਦਸ੍ਸਨੇ.

੧੨੭੧. ਦਸ ਦਸਾਤਿ ਕਤ੍ਵਾਨ, ਵੁਤ੍ਤਾ ਪਞ੍ਞਾਸਲਕ੍ਖਣਾ;

ਤੇਸਂ ਪਨ ਵਸੇਨਾਪਿ, ਧਮ੍ਮੇ ਸਮਨੁਪਸ੍ਸਤਿ.

੧੨੭੨. ਏਵਂ ਰੂਪੁਦਯੋ ਹੋਤਿ, ਏਵਮਸ੍ਸ ਵਯੋ ਇਤਿ;

ਉਦੇਤਿ ਏਵਂ ਰੂਪਮ੍ਪਿ, ਏਵਂ ਰੂਪਂ ਤੁ ਵੇਤਿ ਚ.

੧੨੭੩. ਏਵਂ ਪਚ੍ਚਯਤੋਪੇਤ੍ਥ, ਖਣਤੋ ਉਦਯਬ੍ਬਯਂ;

ਪਸ੍ਸਤੋ ਸਬ੍ਬਧਮ੍ਮਾ ਚ, ਪਾਕਟਾ ਹੋਨ੍ਤਿ ਤਸ੍ਸ ਤੇ.

੧੨੭੪. ਉਦਕੇ ਦਣ੍ਡਰਾਜੀਵ, ਆਰਗ੍ਗੇਰਿਵ ਸਾਸਪੋ;

ਵਿਜ੍ਜੁਪ੍ਪਾਦਾਵ ਧਮ੍ਮਾ ਤੇ, ਪਰਿਤ੍ਤਟ੍ਠਾਯਿਨੋ ਸਿਯੁਂ.

੧੨੭੫. ਕਦਲੀਸੁਪਿਨਾਲਾਤਚਕ੍ਕਮਾਯੁਪਮਾ ਇਮੇ;

ਅਸਾਰਾ ਪਨ ਨਿਸ੍ਸਾਰਾ, ਹੁਤ੍ਵਾ ਖਾਯਨ੍ਤਿ ਯੋਗਿਨੋ.

੧੨੭੬. ਏਵਮੇਤ੍ਤਾਵਤਾ ਤੇਨ, ਉਦਯਬ੍ਬਯਦਸ੍ਸਨਂ;

ਲਕ੍ਖਣਾਨਿ ਚ ਪਞ੍ਞਾਸ, ਪਟਿਵਿਜ੍ਝ ਠਿਤਂ ਪਨ.

੧੨੭੭. ਞਾਣਂ ਅਧਿਗਤਂ ਹੋਤਿ, ਤਰੁਣਂ ਪਠਮਂ ਪਨ;

ਯਸ੍ਸ ਚਾਧਿਗਮਾ ਯੋਗੀ, ਹੋਤਾਰਦ੍ਧਵਿਪਸ੍ਸਕੋ.

੧੨੭੮. ਵਿਪਸ੍ਸਨਾਯ ਹੇਤਾਯ,

ਕਰੁਣਾਯਾਥ ਯੋਗਿਨੋ;

ਵਿਪਸ੍ਸਕਸ੍ਸ ਜਾਯਨ੍ਤੇ,

ਉਪਕ੍ਲੇਸਾ ਦਸੇਵਿਮੇ.

੧੨੭੯. ਓਭਾਸੋ ਪੀਤਿ ਪਸ੍ਸਦ੍ਧਿ, ਞਾਣਂ ਸਦ੍ਧਾ ਸਤੀ ਸੁਖਂ;

ਉਪੇਕ੍ਖਾ ਵੀਰਿਯਂ ਨਿਕਨ੍ਤੀਤਿ, ਉਪਕ੍ਲੇਸਾ ਦਸੇਵਿਮੇ.

੧੨੮੦. ਸਮ੍ਪਤ੍ਤਪਟਿਵੇਧਸ੍ਸ, ਸੋਤਾਪਨ੍ਨਾਦਿਨੋਪਿ ਚ;

ਤਥਾ ਵਿਪ੍ਪਟਿਪਨ੍ਨਸ੍ਸ, ਉਪਕ੍ਲੇਸਾ ਨ ਜਾਯਰੇ.

੧੨੮੧. ਸਮ੍ਮਾਵ ਪਟਿਪਨ੍ਨਸ੍ਸ, ਯੁਤ੍ਤਯੋਗਸ੍ਸ ਭਿਕ੍ਖੁਨੋ;

ਸਦਾ ਵਿਪਸ੍ਸਕਸ੍ਸੇਵ, ਉਪ੍ਪਜ੍ਜਨ੍ਤਿ ਕਿਰਸ੍ਸੁ ਤੇ.

੧੨੮੨. ਵਿਪਸ੍ਸਨਾਯ ਓਭਾਸੋ, ਓਭਾਸੋਤਿ ਪਵੁਚ੍ਚਤਿ;

ਤਸ੍ਮਿਂ ਪਨ ਸਮੁਪ੍ਪਨ੍ਨੇ, ਯੋਗਾਵਚਰਭਿਕ੍ਖੁ ਸੋ.

੧੨੮੩. ਮਗ੍ਗਪ੍ਪਤ੍ਤੋ ਫਲਪ੍ਪਤ੍ਤੋ, ਅਹਮਸ੍ਮੀਤਿ ਗਣ੍ਹਤਿ;

ਅਮਗ੍ਗਂਯੇਵ ਮਗ੍ਗੋਤਿ, ਤਸ੍ਸੇਵਂ ਪਨ ਗਣ੍ਹਤੋ.

੧੨੮੪. ਏਵਂ ਵਿਪਸ੍ਸਨਾਵੀਥਿ,

ਓਕ੍ਕਨ੍ਤਾ ਨਾਮ ਹੋਤਿ ਸਾ;

ਓਭਾਸਮੇਵ ਸੋ ਭਿਕ੍ਖੁ,

ਅਸ੍ਸਾਦੇਨ੍ਤੋ ਨਿਸੀਦਤਿ.

੧੨੮੫. ਪੀਤਿ ਵਿਪ੍ਪਸ੍ਸਨਾਪੀਤਿ, ਤਸ੍ਸ ਤਸ੍ਮਿਂ ਖਣੇ ਪਨ;

ਤਦਾ ਪਞ੍ਚਵਿਧਾ ਪੀਤਿ, ਜਾਯਨ੍ਤੇ ਖੁਦ੍ਦਿਕਾਦਿਕਾ.

੧੨੮੬. ਵਿਪਸ੍ਸਨਾਯ ਪਸ੍ਸਦ੍ਧਿ, ਪਸ੍ਸਦ੍ਧੀਤਿ ਪਵੁਚ੍ਚਤਿ;

ਯੋਗਿਨੋ ਕਾਯਚਿਤ੍ਤਾਨਿ, ਪਸ੍ਸਦ੍ਧਾਨੇਵ ਹੋਨ੍ਤਿ ਹਿ.

੧੨੮੭. ਲਹੂਨਿ ਚ ਮੁਦੂਨੇਵ, ਕਮ੍ਮਞ੍ਞਾਨੇਵ ਹੋਨ੍ਤਿ ਹਿ;

ਪਸ੍ਸਦ੍ਧਾਦੀਹਿ ਸੋ ਭਿਕ੍ਖੁ, ਅਨੁਗ੍ਗਹਿਤਮਾਨਸੋ.

੧੨੮੮. ਅਮਾਨੁਸਿਂ ਰਤਿਂ ਨਾਮ,

ਅਨੁਭੋਤਿ ਅਨੁਤ੍ਤਰਂ;

ਯਂ ਸਨ੍ਧਾਯ ਚ ਗਾਥਾਯੋ,

ਭਾਸਿਤਾ ਹਿ ਮਹੇਸਿਨਾ.

੧੨੮੯. ‘‘ਸੁਞ੍ਞਾਗਾਰਂ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;

ਅਮਾਨੁਸੀ ਰਤਿ ਹੋਤਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ.

੧੨੯੦. ‘‘ਯਤੋ ਯਤੋ ਸਮ੍ਮਸਤਿ, ਖਨ੍ਧਾਨਂ ਉਦਯਬ੍ਬਯਂ;

ਲਭਤੀ ਪੀਤਿਪਾਮੋਜ੍ਜਂ, ਅਮਤਂ ਤਂ ਵਿਜਾਨਤ’’ਨ੍ਤਿ.

੧੨੯੧. ਞਾਣਾਦਯੋ ਉਪਕ੍ਲੇਸਾ, ਞੇਯ੍ਯਾ ਵੁਤ੍ਤਨਯੇਨਿਧ;

ਏਤੇ ਦਸ ਉਪਕ੍ਲੇਸਾ, ਵਜ੍ਜਨੀਯਾਵ ਯੋਗਿਨਾ.

੧੨੯੨. ਏਤ੍ਥੋਭਾਸਾਦਯੋ ਧਮ੍ਮਾ,

ਉਪਕ੍ਲੇਸਸ੍ਸ ਵਤ੍ਥੁਤੋ;

ਉਪਕ੍ਲੇਸਾਤਿ ਨਿਦ੍ਦਿਟ੍ਠਾ,

ਉਪਕ੍ਲੇਸਨਿਕਨ੍ਤਿ ਤੁ.

੧੨੯੩. ਤਂ ਤਮਾਵਜ੍ਜਮਾਨਸ੍ਸ, ਭਾਵਨਾ ਪਰਿਹਾਯਤਿ;

ਅਸਤ੍ਤੇ ਸਤ੍ਤਸਞ੍ਞੀ ਚ, ਹੋਤਿ ਅਪ੍ਪਸ੍ਸੁਤੋ ਨਰੋ.

੧੨੯੪. ਸਬ੍ਬੋਭਾਸਾਦਯੋ ਧਮ੍ਮੇ, ਨ ਮਗ੍ਗੋਤਿ ਵਿਚਾਰਯਂ;

ਮਗ੍ਗੋ ਵਿਪਸ੍ਸਨਾਞਾਣਂ, ਇਚ੍ਚੇਵਂ ਪਨ ਪਣ੍ਡਿਤੋ.

੧੨੯੫. ਵਵਤ੍ਥਪੇਤਿ ਮਗ੍ਗਞ੍ਚ, ਅਮਗ੍ਗਞ੍ਚੇਵ ਚੇਤਸਾ;

ਤਸ੍ਸ ਚੇਵਂ ਅਯਂ ਮਗ੍ਗੋ, ਨਾਯਂ ਮਗ੍ਗੋਤਿ ਯੋਗਿਨੋ.

੧੨੯੬. ਮਗ੍ਗਾਮਗ੍ਗਞ੍ਚ ਵਿਞ੍ਞਾਯ, ਠਿਤਞਾਣਮਿਦਂ ਪਨ;

ਮਗ੍ਗਾਮਗ੍ਗੇਸੁਞਾਣਨ੍ਤਿ, ਭੂਰਿਞਾਣੇਨ ਦੇਸਿਤਂ.

੧੨੯੭. ਮਗ੍ਗਾਮਗ੍ਗਞਾਣਦਸ੍ਸਨੇਸੁ ਕੋਵਿਦਾ,

ਸਾਰਾਸਾਰਵੇਦਿਨੋ ਸਮਾਹਿਤਾਹਿਤਾ;

ਮਗ੍ਗਾਮਗ੍ਗਞਾਣਦਸ੍ਸਨਨ੍ਤਿ ਤਂ ਇਦਂ,

ਬੁਦ੍ਧਾ ਬੁਦ੍ਧਸਾਵਕਾ ਵਦਨ੍ਤਿ ਵਾਦਿਨੋ.

ਇਤਿ ਅਭਿਧਮ੍ਮਾਵਤਾਰੇ ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੋ

ਨਾਮ ਵੀਸਤਿਮੋ ਪਰਿਚ੍ਛੇਦੋ.