੧੯. ਏਕੂਨਵੀਸਤਿਮੋ ਪਰਿਚ੍ਛੇਦੋ

ਕਙ੍ਖਾਵਿਤਰਣਵਿਸੁਦ੍ਧਿਨਿਦ੍ਦੇਸੋ

੧੨੨੭. ਏਤਸ੍ਸ ਨਾਮਰੂਪਸ੍ਸ, ਜਾਨਿਤ੍ਵਾ ਹੇਤੁਪਚ੍ਚਯੇ;

ਕਙ੍ਖਾ ਤੀਸੁ ਪਨਦ੍ਧਾਸੁ, ਵਿਤਰਿਤ੍ਵਾ ਠਿਤਂ ਪਨ.

੧੨੨੮. ਕਙ੍ਖਾਵਿਤਰਣਂ ਨਾਮ, ਞਾਣਂ ਤਂ ਸਮੁਦੀਰਿਤਂ;

ਤਂ ਸਮ੍ਪਾਦੇਤੁਕਾਮੇਨ, ਅਤ੍ਥਕਾਮੇਨ ਭਿਕ੍ਖੁਨਾ.

੧੨੨੯. ਨਾਮਰੂਪਸ੍ਸ ਕੋ ਹੇਤੁ, ਕੋਨੁ ਵਾ ਪਚ੍ਚਯੋ ਭਵੇ;

ਆਵਜ੍ਜਿਤ੍ਵਾ ਤਮਿਚ੍ਚੇਵਂ, ਰੂਪਕਾਯਸ੍ਸ ਤਾਵਦੇ.

੧੨੩੦. ਕੇਸਾ ਲੋਮਾ ਨਖਾ ਦਨ੍ਤਾ, ਤਚੋ ਮਂਸਂ ਨਹਾਰੁ ਚ;

ਅਟ੍ਠਿਮਿਞ੍ਜਞ੍ਚ ਵਕ੍ਕਞ੍ਚ, ਹਦਯਂ ਯਕਨਮ੍ਪਿ ਚ.

੧੨੩੧. ਇਚ੍ਚੇਵਮਾਦਿਬਾਤ੍ਤਿਂਸ-ਕੋਟ੍ਠਾਸਪਚ੍ਚਯਸ੍ਸ ਹਿ;

ਪਰਿਗ੍ਗਣ੍ਹਤਿ ਕਾਯਸ੍ਸ, ਮਨਸਾ ਹੇਤੁਪਚ੍ਚਯੇ.

੧੨੩੨. ਅਵਿਜ੍ਜਾ ਤਣ੍ਹੁਪਾਦਾਨਂ, ਕਮ੍ਮਂ ਹੇਤੁ ਚਤੁਬ੍ਬਿਧੋ;

ਏਤਸ੍ਸ ਰੂਪਕਾਯਸ੍ਸ, ਆਹਾਰੋ ਪਚ੍ਚਯੋ ਮਤੋ.

੧੨੩੩. ਜਨਕੋ ਹੇਤੁ ਅਕ੍ਖਾਤੋ,

ਪਚ੍ਚਯੋ ਅਨੁਪਾਲਕੋ;

ਹੇਤ੍ਵਙ੍ਕੁਰਸ੍ਸ ਬੀਜਂ ਤੁ,

ਪਚ੍ਚਯਾ ਪਥਵਾਦਯੋ.

੧੨੩੪. ਇਤਿਮੇ ਪਞ੍ਚ ਧਮ੍ਮਾ ਹਿ, ਹੇਤੁਪਚ੍ਚਯਤਂ ਗਤਾ;

ਅਵਿਜ੍ਜਾਦਯੋ ਤਯੋ ਤਤ੍ਥ, ਮਾਤਾਵ ਉਪਨਿਸ੍ਸਯਾ.

੧੨੩੫. ਜਨਕਂ ਪਨ ਕਮ੍ਮਂ ਤੁ, ਪੁਤ੍ਤਸ੍ਸ ਹਿ ਪਿਤਾ ਵਿਯ;

ਧਾਤੀ ਵਿਯ ਕੁਮਾਰਸ੍ਸ, ਆਹਾਰੋ ਧਾਰਕੋ ਭਵੇ.

੧੨੩੬. ਇਚ੍ਚੇਵਂ ਰੂਪਕਾਯਸ੍ਸ, ਸੋ ਪਚ੍ਚਯਪਰਿਗ੍ਗਹਂ;

ਕਤ੍ਵਾ ਪੁਨਪਿ ‘‘ਚਕ੍ਖੁਞ੍ਚ, ਰੂਪਮਾਲੋਕਮੇਵ ਚ.

੧੨੩੭. ਪਟਿਚ੍ਚ ਚਕ੍ਖੁਵਿਞ੍ਞਾਣਂ, ਹੋਤਿ’’ਇਚ੍ਚੇਵਮਾਦਿਨਾ;

ਨਯੇਨ ਨਾਮਕਾਯਸ੍ਸ, ਪਚ੍ਚਯਂ ਪਰਿਗਣ੍ਹਤਿ.

੧੨੩੮. ਸੋ ਏਵਂ ਨਾਮਰੂਪਸ੍ਸ, ਵੁਤ੍ਤਿਂ ਦਿਸ੍ਵਾਨ ਪਚ੍ਚਯਾ;

ਯਥਾ ਏਤਰਹਿਦਂ ਤੁ, ਅਤੀਤੇਪਿ ਤਥੇਵਿਦਂ.

੧੨੩੯. ਪਚ੍ਚਯਾ ਚ ਪਵਤ੍ਤਿਤ੍ਥ, ਤਥੇਵਾਨਾਗਤੇਪਿ ਚ;

ਪਵਤ੍ਤਿਸ੍ਸਤਿ ਅਦ੍ਧਾਸੁ, ਤੀਸ੍ਵੇਵਂ ਅਨੁਪਸ੍ਸਤਿ.

੧੨੪੦. ਤਸ੍ਸੇਵਂ ਪਸ੍ਸਤੋ ਯਾ ਸਾ, ਪੁਬ੍ਬਨ੍ਤੇ ਪਞ੍ਚਧਾ ਤਥਾ;

ਅਪਰਨ੍ਤੇ ਸਿਯਾ ਕਙ੍ਖਾ, ਪਞ੍ਚਧਾ ਸਮੁਦੀਰਿਤਾ.

੧੨੪੧. ਪਚ੍ਚੁਪ੍ਪਨ੍ਨੇਪਿ ਅਦ੍ਧਾਨੇ, ਛਬ੍ਬਿਧਾ ਪਰਿਕਿਤ੍ਤਿਤਾ;

ਸਬ੍ਬਾ ਚਾਨਵਸੇਸਾਵ, ਯੋਗਿਨੋ ਸਾ ਪਹਿਯ੍ਯਤਿ.

੧੨੪੨. ਏਕੋ ਕਮ੍ਮਵਿਪਾਕਾਨਂ, ਵਸੇਨਾਪਿ ਚ ਪਣ੍ਡਿਤੋ;

ਏਤਸ੍ਸ ਨਾਮਰੂਪਸ੍ਸ, ਪਚ੍ਚਯਂ ਪਰਿਗਣ੍ਹਤਿ.

੧੨੪੩. ਕਮ੍ਮਂ ਚਤੁਬ੍ਬਿਧਂ ਦਿਟ੍ਠ-ਧਮ੍ਮਵੇਦਨਿਯਂ ਤਥਾ;

ਉਪਪਜ੍ਜਾਪਰਾਪਰਿਯਾ-ਹੋਸਿਕਮ੍ਮਵਸਾ ਪਨ.

ਤਤ੍ਥ ਏਕਜਵਨਵੀਥਿਯਂ ਸਤ੍ਤਸੁ ਚਿਤ੍ਤੇਸੁ ਕੁਸਲਾ ਵਾ ਅਕੁਸਲਾ ਵਾ ਪਠਮਜਵਨਚੇਤਨਾ ਦਿਟ੍ਠਧਮ੍ਮਵੇਦਨੀਯਕਮ੍ਮਂ ਨਾਮ. ਤਂ ਇਮਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦੇਤਿ, ਤਥਾ ਅਸਕ੍ਕੋਨ੍ਤਂ ਪਨ ‘‘ਅਹੋਸਿਕਮ੍ਮਂ ਨਾਹੋਸਿ ਕਮ੍ਮਵਿਪਾਕੋ, ਨ ਭਵਿਸ੍ਸਤਿ ਕਮ੍ਮਵਿਪਾਕੋ, ਨਤ੍ਥਿ ਕਮ੍ਮਵਿਪਾਕੋ’’ਤਿ ਇਮਸ੍ਸ ਤਿਕਸ੍ਸ ਵਸੇਨ ਅਹੋਸਿਕਮ੍ਮਂ ਨਾਮ ਹੋਤਿ. ਅਤ੍ਥਸਾਧਿਕਾ ਪਨ ਸਤ੍ਤਮਜਵਨਚੇਤਨਾ ਉਪਪਜ੍ਜਵੇਦਨੀਯਕਮ੍ਮਂ ਨਾਮ. ਤਮਨਨ੍ਤਰੇ ਅਤ੍ਤਭਾਵੇ ਵਿਪਾਕਂ ਦੇਤਿ, ਤਥਾ ਅਸਕ੍ਕੋਨ੍ਤਂ ਵੁਤ੍ਤਨਯੇਨ ਅਹੋਸਿਕਮ੍ਮਂ ਨਾਮ ਹੋਤਿ. ਉਭਿਨ੍ਨਮਨ੍ਤਰੇ ਪਞ੍ਚਜਵਨਚੇਤਨਾ ਅਪਰਾਪਰਿਯਵੇਦਨੀਯਕਮ੍ਮਂ ਨਾਮ. ਤਮਨਾਗਤੇ ਯਦਾ ਓਕਾਸਂ ਲਭਤਿ, ਤਦਾ ਵਿਪਾਕਂ ਦੇਤਿ, ਸਤਿ ਸਂਸਾਰਪ੍ਪਵਤ੍ਤਿਯਾ ਅਹੋਸਿਕਮ੍ਮਂ ਨਾਮ ਨ ਹੋਤਿ.

੧੨੪੪. ਅਪਰਂ ਚਤੁਬ੍ਬਿਧਂ ਕਮ੍ਮਂ, ਗਰੁਕਂ ਬਹੁਲਮ੍ਪਿ ਚ;

ਆਸਨ੍ਨਞ੍ਚ ਕਟਤ੍ਤਾ ਚ, ਕਮ੍ਮਨ੍ਤਿ ਸਮੁਦੀਰਿਤਂ.

੧੨੪੫. ਅਞ੍ਞਂ ਚਤੁਬ੍ਬਿਧਂ ਕਮ੍ਮਂ, ਜਨਕਂ ਉਪਥਮ੍ਭਕਂ;

ਤਥੂਪਪੀਲ਼ਕਂ ਕਮ੍ਮ-ਮੁਪਘਾਤਕਮੇਵ ਚ.

ਤਤ੍ਥ ਜਨਕਂ ਨਾਮ ਕੁਸਲਂ ਵਾ ਅਕੁਸਲਂ ਵਾ ਕਮ੍ਮਂ ਪਟਿਸਨ੍ਧਿਯਮ੍ਪਿ ਪਵਤ੍ਤੇਪਿ ਰੂਪਾਰੂਪਵਿਪਾਕਕ੍ਖਨ੍ਧੇ ਜਨੇਤਿ. ਉਪਤ੍ਥਮ੍ਭਕਂ ਪਨ ਵਿਪਾਕਂ ਜਨੇਤੁਂ ਨ ਸਕ੍ਕੋਤਿ, ਅਞ੍ਞੇਨ ਕਮ੍ਮੇਨ ਦਿਨ੍ਨਾਯ ਪਟਿਸਨ੍ਧਿਯਾ ਜਨਿਤੇ ਵਿਪਾਕੇ ਉਪ੍ਪਜ੍ਜਨਕਸੁਖਦੁਕ੍ਖਂ ਉਪਤ੍ਥਮ੍ਭੇਤਿ, ਅਦ੍ਧਾਨਂ ਪਵਤ੍ਤੇਤਿ. ਉਪਪੀਲ਼ਕਂ ਪਨ ਅਞ੍ਞੇਨ ਕਮ੍ਮੇਨ ਦਿਨ੍ਨਾਯ ਪਟਿਸਨ੍ਧਿਯਾ ਜਨਿਤੇ ਵਿਪਾਕੇ ਉਪ੍ਪਜ੍ਜਨਕਸੁਖਦੁਕ੍ਖਂ ਪੀਲ਼ੇਤਿ ਬਾਧਤਿ, ਅਦ੍ਧਾਨਂ ਪਵਤ੍ਤਿਤੁਂ ਨ ਦੇਤਿ. ਉਪਘਾਤਕਂ ਪਨ ਸਯਂ ਕੁਸਲਮ੍ਪਿ ਅਕੁਸਲਮ੍ਪਿ ਸਮਾਨਂ ਅਞ੍ਞਂ ਦੁਬ੍ਬਲਕਮ੍ਮਂ ਘਾਤੇਤ੍ਵਾ ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਕਰੋਤਿ. ਏਵਂ ਪਨ ਕਮ੍ਮੇਨ ਓਕਾਸੇ ਕਤੇ ਤਂਵਿਪਾਕਮੁਪ੍ਪਨ੍ਨਂ ਨਾਮ ਹੋਤਿ. ਇਤਿ ਇਮਂ ਦ੍ਵਾਦਸਵਿਧਂ ਕਮ੍ਮਂ ਕਮ੍ਮਵਟ੍ਟੇ ਪਕ੍ਖਿਪਿਤ੍ਵਾ ਏਵਮੇਕੋ ਕਮ੍ਮਵਿਪਾਕਵਸੇਨ ਨਾਮਰੂਪਸ੍ਸ ਪਚ੍ਚਯਪਰਿਗ੍ਗਹਂ ਕਰੋਤਿ.

ਇਤਿ ਏਵਂ ਕਮ੍ਮਵਿਪਾਕਵਟ੍ਟਵਸੇਨ ਨਾਮਰੂਪਸ੍ਸ ਪਵਤ੍ਤਿਂ ਦਿਸ੍ਵਾ ‘‘ਯਥਾ ਇਦਂ ਏਤਰਹਿ, ਏਵਮਤੀਤੇਪਿ ਅਦ੍ਧਾਨੇ ਕਮ੍ਮਵਿਪਾਕਵਸੇਨ ਪਚ੍ਚਯਤੋ ਪਵਤ੍ਤਿਤ੍ਥ, ਅਨਾਗਤੇਪਿ ਪਵਤ੍ਤਿਸ੍ਸਤੀ’’ਤਿ ਇਤਿ ਕਮ੍ਮਞ੍ਚੇਵ ਵਿਪਾਕੋ ਚਾਤਿ ਕਮ੍ਮਵਿਪਾਕਵਸੇਨ ਲੋਕੋ ਪਵਤ੍ਤਤੀਤਿ ਤਂ ਸਮਨੁਪਸ੍ਸਤਿ. ਤਸ੍ਸੇਵਂ ਸਮਨੁਪਸ੍ਸਤੋ ਸਬ੍ਬਾ ਸੋਲ਼ਸਵਿਧਾ ਕਙ੍ਖਾ ਪਹਿਯ੍ਯਤਿ.

੧੨੪੬. ਹੇਤੁਫਲਸ੍ਸ ਸਮ੍ਬਨ੍ਧਵਸੇਨੇਵ ਪਵਤ੍ਤਤਿ;

ਕੇਵਲਂ ਨਾਮਰੂਪਨ੍ਤਿ, ਸਮ੍ਮਾ ਸਮਨੁਪਸ੍ਸਤਿ.

੧੨੪੭. ਏਵਂ ਕਾਰਣਤੋ ਉਦ੍ਧਂ, ਕਾਰਣਂ ਨ ਚ ਪਸ੍ਸਤਿ;

ਪਾਕਪਵਤ੍ਤਿਤੋ ਉਦ੍ਧਂ, ਨ ਪਾਕਪਟਿਵੇਦਕਂ.

ਤੇਨਾਹੁ ਪੋਰਾਣਾ –

੧੨੪੮. ‘‘ਕਮ੍ਮਸ੍ਸ ਕਾਰਕੋ ਨਤ੍ਥਿ, ਵਿਪਾਕਸ੍ਸ ਚ ਵੇਦਕੋ;

ਸੁਦ੍ਧਧਮ੍ਮਾ ਪਵਤ੍ਤਨ੍ਤਿ, ਏਵੇਤਂ ਸਮ੍ਮਦਸ੍ਸਨਂ.

੧੨੪੯. ਏਵਂ ਕਮ੍ਮੇ ਵਿਪਾਕੇ ਚ, ਵਤ੍ਤਮਾਨੇ ਸਹੇਤੁਕੇ;

ਬੀਜਰੁਕ੍ਖਾਦਿਕਾਨਂਵ, ਪੁਬ੍ਬਾ ਕੋਟਿ ਨ ਨਾਯਤਿ.

੧੨੫੦. ਅਨਾਗਤੇਪਿ ਸਂਸਾਰੇ, ਅਪ੍ਪਵਤ੍ਤਿ ਨ ਦਿਸ੍ਸਤਿ;

ਏਤਮਤ੍ਥਮਨਞ੍ਞਾਯ, ਤਿਤ੍ਥਿਯਾ ਅਸਯਂਵਸੀ.

੧੨੫੧. ਸਤ੍ਤਸਞ੍ਞਂ ਗਹੇਤ੍ਵਾਨ, ਸਸ੍ਸਤੁਚ੍ਛੇਦਦਸ੍ਸਿਨੋ;

ਦ੍ਵਾਸਟ੍ਠਿਦਿਟ੍ਠਿਂ ਗਣ੍ਹਨ੍ਤਿ, ਅਞ੍ਞਮਞ੍ਞਵਿਰੋਧਿਨੋ.

੧੨੫੨. ਦਿਟ੍ਠਿਬਨ੍ਧਨਬਦ੍ਧਾ ਤੇ, ਤਣ੍ਹਾਸੋਤੇਨ ਵੁਯ੍ਹਰੇ;

ਤਣ੍ਹਾਸੋਤੇਨ ਵੁਯ੍ਹਨ੍ਤਾ, ਨ ਤੇ ਦੁਕ੍ਖਾ ਪਮੁਚ੍ਚਰੇ.

੧੨੫੩. ਏਵਮੇਤਂ ਅਭਿਞ੍ਞਾਯ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;

ਗਮ੍ਭੀਰਂ ਨਿਪੁਣਂ ਸੁਞ੍ਞਂ, ਪਚ੍ਚਯਂ ਪਟਿਵਿਜ੍ਝਤਿ.

੧੨੫੪. ਕਮ੍ਮਂ ਨਤ੍ਥਿ ਵਿਪਾਕਮ੍ਹਿ, ਪਾਕੋ ਕਮ੍ਮੇ ਨ ਵਿਜ੍ਜਤਿ;

ਅਞ੍ਞਮਞ੍ਞਂ ਉਭੋ ਸੁਞ੍ਞਾ, ਨ ਚ ਕਮ੍ਮਂ ਵਿਨਾ ਫਲਂ.

੧੨੫੫. ਯਥਾ ਨ ਸੂਰਿਯੇ ਅਗ੍ਗਿ, ਨ ਮਣਿਮ੍ਹਿ ਨ ਗੋਮਯੇ;

ਨ ਤੇਸਂ ਬਹਿ ਸੋ ਅਤ੍ਥਿ, ਸਮ੍ਭਾਰੇਹਿ ਚ ਜਾਯਤਿ.

੧੨੫੬. ਤਥਾ ਨ ਅਨ੍ਤੋ ਕਮ੍ਮਸ੍ਸ, ਵਿਪਾਕੋ ਉਪਲਬ੍ਭਤਿ;

ਬਹਿਦ੍ਧਾਪਿ ਨ ਕਮ੍ਮਸ੍ਸ, ਨ ਕਮ੍ਮਂ ਤਤ੍ਥ ਵਿਜ੍ਜਤਿ.

੧੨੫੭. ਫਲੇਨ ਸੁਞ੍ਞਂ ਤਂ ਕਮ੍ਮਂ, ਫਲਂ ਕਮ੍ਮੇ ਨ ਵਿਜ੍ਜਤਿ;

ਕਮ੍ਮਞ੍ਚ ਖੋ ਉਪਾਦਾਯ, ਤਤੋ ਨਿਬ੍ਬਤ੍ਤਤੇ ਫਲਂ.

੧੨੫੮. ਨ ਹੇਤ੍ਥ ਦੇਵੋ ਬ੍ਰਹ੍ਮਾ ਵਾ,

ਸਂਸਾਰਸ੍ਸਤ੍ਥਿ ਕਾਰਕੋ;

ਸੁਦ੍ਧਧਮ੍ਮਾ ਪਵਤ੍ਤਨ੍ਤਿ,

ਹੇਤੁਸਮ੍ਭਾਰਪਚ੍ਚਯਾ’’ਤਿ.

੧੨੫੯. ਏਵਂ ਨਾਨਪ੍ਪਕਾਰੇਹਿ, ਨਾਮਰੂਪਸ੍ਸ ਪਚ੍ਚਯਂ;

ਪਰਿਗ੍ਗਹੇਤ੍ਵਾ ਅਦ੍ਧਾਸੁ, ਤਰਿਤ੍ਵਾ ਕਙ੍ਖਮੁਟ੍ਠਿਤਂ.

੧੨੬੦. ਕਙ੍ਖਾਵਿਤਰਣਂ ਨਾਮ, ਞਾਣਂ ਤਂ ਸਮੁਦੀਰਿਤਂ;

ਧਮ੍ਮਟ੍ਠਿਤਿ ਯਥਾਭੂਤਂ, ਤਂ ਸਮ੍ਮਾਦਸ੍ਸਨਨ੍ਤਿਪਿ.

੧੨੬੧. ਇਮਿਨਾ ਪਨ ਞਾਣੇਨ,

ਸਂਯੁਤ੍ਤੋ ਬੁਦ੍ਧਸਾਸਨੇ;

ਹੋਤਿ ਲਦ੍ਧਪਤਿਟ੍ਠੋਵ,

ਸੋਤਾਪਨ੍ਨੋ ਹਿ ਚੂਲ਼ਕੋ.

੧੨੬੨. ਤਸ੍ਮਾ ਸਪਞ੍ਞੋ ਪਨ ਅਤ੍ਥਕਾਮੋ,

ਯੋ ਨਾਮਰੂਪਸ੍ਸ ਹੇਤੁਪਚ੍ਚਯਾਨਿ;

ਪਰਿਗ੍ਗਹਂ ਸਾਧੁ ਕਰੋਤਿ ਧੀਰੋ,

ਖਿਪ੍ਪਂ ਸ ਨਿਬ੍ਬਾਨਪੁਰਂ ਉਪੇਤਿ.

ਇਤਿ ਅਭਿਧਮ੍ਮਾਵਤਾਰੇ ਕਙ੍ਖਾਵਿਤਰਣਵਿਸੁਦ੍ਧਿਨਿਦ੍ਦੇਸੋ ਨਾਮ

ਏਕੂਨਵੀਸਤਿਮੋ ਪਰਿਚ੍ਛੇਦੋ.