੧. ਪਠਮੋ ਪਰਿਚ੍ਛੇਦੋ
ਚਿਤ੍ਤਨਿਦ੍ਦੇਸੋ
੮. ਚਿਤ੍ਤਂ ਚੇਤਸਿਕਂ ਰੂਪਂ, ਨਿਬ੍ਬਾਨਨ੍ਤਿ ਨਿਰੁਤ੍ਤਰੋ;
ਚਤੁਧਾ ਦੇਸਯੀ ਧਮ੍ਮੇ, ਚਤੁਸਚ੍ਚਪ੍ਪਕਾਸਨੋ.
ਤਤ੍ਥ ਚਿਤ੍ਤਨ੍ਤਿ ਵਿਸਯਵਿਜਾਨਨਂ ਚਿਤ੍ਤਂ, ਤਸ੍ਸ ਪਨ ਕੋ ਵਚਨਤ੍ਥੋ? ਵੁਚ੍ਚਤੇ – ਸਬ੍ਬਸਙ੍ਗਾਹਕਵਸੇਨ ਪਨ ਚਿਨ੍ਤੇਤੀਤਿ ਚਿਤ੍ਤਂ, ਅਤ੍ਤਸਨ੍ਤਾਨਂ ਵਾ ਚਿਨੋਤੀਤਿਪਿ ਚਿਤ੍ਤਂ.
੯. ਵਿਚਿਤ੍ਤਕਰਣਾ ਚਿਤ੍ਤਂ, ਅਤ੍ਤਨੋ ਚਿਤ੍ਤਤਾਯ ਵਾ;
ਪਞ੍ਞਤ੍ਤਿਯਮ੍ਪਿ ਵਿਞ੍ਞਾਣੇ, ਵਿਚਿਤ੍ਤੇ ਚਿਤ੍ਤਕਮ੍ਮਕੇ;
ਚਿਤ੍ਤਸਮ੍ਮੁਤਿ ਦਟ੍ਠਬ੍ਬਾ, ਵਿਞ੍ਞਾਣੇ ਇਧ ਵਿਞ੍ਞੁਨਾ.
ਤਂ ਪਨ ਸਾਰਮ੍ਮਣਤੋ ਏਕਵਿਧਂ, ਸਵਿਪਾਕਾਵਿਪਾਕਤੋ ਦੁਵਿਧਂ. ਤਤ੍ਥ ਸਵਿਪਾਕਂ ਨਾਮ ਕੁਸਲਾਕੁਸਲਂ, ਅਵਿਪਾਕਂ ਅਬ੍ਯਾਕਤਂ. ਕੁਸਲਾਕੁਸਲਾਬ੍ਯਾਕਤਜਾਤਿਭੇਦਤੋ ਤਿਵਿਧਂ.
ਤਤ੍ਥ ਕੁਸਲਨ੍ਤਿ ਪਨੇਤਸ੍ਸ ਕੋ ਵਚਨਤ੍ਥੋ?
੧੦. ਕੁਚ੍ਛਿਤਾਨਂ ਸਲਨਤੋ, ਕੁਸਾਨਂ ਲਵਨੇਨ ਵਾ;
ਕੁਸੇਨ ਲਾਤਬ੍ਬਤ੍ਤਾ ਵਾ, ਕੁਸਲਨ੍ਤਿ ਪਵੁਚ੍ਚਤਿ.
੧੧. ਛੇਕੇ ਕੁਸਲਸਦ੍ਦੋਯਂ, ਆਰੋਗ੍ਯੇ ਅਨਵਜ੍ਜਕੇ;
ਦਿਟ੍ਠੋ ਇਟ੍ਠਵਿਪਾਕੇਪਿ, ਅਨਵਜ੍ਜਾਦਿਕੇ ਇਧ.
ਤਸ੍ਮਾ ਅਨਵਜ੍ਜਇਟ੍ਠਵਿਪਾਕਲਕ੍ਖਣਂ ਕੁਸਲਂ, ਅਕੁਸਲਵਿਦ੍ਧਂਸਨਰਸਂ, ਵੋਦਾਨਪਚ੍ਚੁਪਟ੍ਠਾਨਂ. ਵਜ੍ਜਪਟਿਪਕ੍ਖਤ੍ਤਾ ਅਨਵਜ੍ਜਲਕ੍ਖਣਂ ਵਾ ਕੁਸਲਂ, ਵੋਦਾਨਭਾਵਰਸਂ, ਇਟ੍ਠਵਿਪਾਕਪਚ੍ਚੁਪਟ੍ਠਾਨਂ, ਯੋਨਿਸੋਮਨਸਿਕਾਰਪਦਟ੍ਠਾਨਂ. ਸਾਵਜ੍ਜਾਨਿਟ੍ਠਵਿਪਾਕਲਕ੍ਖਣਮਕੁਸਲਂ. ਤਦੁਭਯਵਿਪਰੀਤਲਕ੍ਖਣਮਬ੍ਯਾਕਤਂ, ਅਵਿਪਾਕਾਰਹਂ ਵਾ.
ਤਤ੍ਥ ਕੁਸਲਚਿਤ੍ਤਂ ਏਕਵੀਸਤਿਵਿਧਂ ਹੋਤਿ, ਤਦਿਦਂ ਭੂਮਿਤੋ ਚਤੁਬ੍ਬਿਧਂ ਹੋਤਿ – ਕਾਮਾਵਚਰਂ, ਰੂਪਾਵਚਰਂ, ਅਰੂਪਾਵਚਰਂ, ਲੋਕੁਤ੍ਤਰਞ੍ਚੇਤਿ.
ਤਤ੍ਥ ਕਾਮਾਵਚਰਕੁਸਲਚਿਤ੍ਤਂ ਭੂਮਿਤੋ ਏਕਵਿਧਂ, ਸਵਤ੍ਥੁਕਾਵਤ੍ਥੁਕਭੇਦਤੋ ਦੁਵਿਧਂ, ਹੀਨਮਜ੍ਝਿਮਪਣੀਤਭੇਦਤੋ ਤਿਵਿਧਂ, ਸੋਮਨਸ੍ਸੁਪੇਕ੍ਖਾਞਾਣਪ੍ਪਯੋਗਭੇਦਤੋ ਅਟ੍ਠਵਿਧਂ ਹੋਤਿ. ਸੇਯ੍ਯਥਿਦਂ – ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਸੋਮਨਸ੍ਸਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਉਪੇਕ੍ਖਾਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਉਪੇਕ੍ਖਾਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਨ੍ਤਿ ਇਦਂ ਅਟ੍ਠਵਿਧਮ੍ਪਿ ਕਾਮਾਵਚਰਕੁਸਲਚਿਤ੍ਤਂ ਨਾਮ.
੧੨. ਉਦ੍ਦਾਨਤੋ ਦੁਵੇ ਕਾਮਾ, ਕ੍ਲੇਸਵਤ੍ਥੁਵਸਾ ਪਨ;
ਕਿਲੇਸੋ ਛਨ੍ਦਰਾਗੋਵ, ਵਤ੍ਥੁ ਤੇਭੂਮਵਟ੍ਟਕਂ.
੧੩. ਕਿਲੇਸਕਾਮੋ ਕਾਮੇਤਿ, ਵਤ੍ਥੁ ਕਾਮੀਯਤੀਤਿ ਚ;
ਸਿਜ੍ਝਤਿ ਦੁਵਿਧੋਪੇਸ, ਕਾਮੋ ਵੋ ਕਾਰਕਦ੍ਵਯੇ.
੧੪. ਯਸ੍ਮਿਂ ਪਨ ਪਦੇਸੇ ਸੋ, ਕਾਮੋਯਂ ਦੁਵਿਧੋਪਿ ਚ;
ਸਮ੍ਪਤ੍ਤੀਨਂ ਵਸੇਨਾਵ-ਚਰਤੀਤਿ ਚ ਸੋ ਪਨ.
੧੫. ਪਦੇਸੋ ਚਤੁਪਾਯਾਨਂ, ਛਨ੍ਨਂ ਦੇਵਾਨਮੇਵ ਚ;
ਮਨੁਸ੍ਸਾਨਂ ਵਸੇਨੇਵ, ਏਕਾਦਸਵਿਧੋ ਪਨ.
੧੬. ਕਾਮੋਵਚਰਤੀਤੇਤ੍ਥ, ਕਾਮਾਵਚਰਸਞ੍ਞਿਤੋ;
ਅਸ੍ਸਾਭਿਲਕ੍ਖਿਤਤ੍ਤਾ ਹਿ, ਸਸਤ੍ਥਾਵਚਰੋ ਵਿਯ.
੧੭. ਸ੍ਵਾਯਂ ਰੂਪਭਵੋ ਰੂਪਂ, ਏਵਂ ਕਾਮੋਤਿ ਸਞ੍ਞਿਤੋ;
ਉਤ੍ਤਰਸ੍ਸ ਪਦਸ੍ਸੇਵ, ਲੋਪਂ ਕਤ੍ਵਾ ਉਦੀਰਿਤੋ.
੧੮. ਤਸ੍ਮਿਂ ਕਾਮੇ ਇਦਂ ਚਿਤ੍ਤਂ, ਸਦਾਵਚਰਤੀਤਿ ਚ;
ਕਾਮਾਵਚਰਮਿਚ੍ਚੇਵਂ, ਕਥਿਤਂ ਕਾਮਘਾਤਿਨਾ.
੧੯. ਪਟਿਸਨ੍ਧਿਂ ਭਵੇ ਕਾਮੇ, ਅਵਚਾਰਯਤੀਤਿ ਵਾ;
ਕਾਮਾਵਚਰਮਿਚ੍ਚੇਵਂ, ਪਰਿਯਾਪਨ੍ਨਨ੍ਤਿ ਤਤ੍ਰ ਵਾ.
੨੦. ਇਦਂ ਅਟ੍ਠਵਿਧਂ ਚਿਤ੍ਤਂ, ਕਾਮਾਵਚਰਸਞ੍ਞਿਤਂ;
ਦਸਪੁਞ੍ਞਕ੍ਰਿਯਵਤ੍ਥੁ-ਵਸੇਨੇਵ ਪਵਤ੍ਤਤਿ.
੨੧. ਦਾਨਂ ਸੀਲਂ ਭਾਵਨਾ ਪਤ੍ਤਿਦਾਨਂ,
ਵੇਯ੍ਯਾਵਚ੍ਚਂ ਦੇਸਨਾ ਚਾਨੁਮੋਦੋ;
ਦਿਟ੍ਠਿਜ੍ਜੁਤ੍ਤਂ ਸਂਸੁਤਿਚ੍ਚਾਪਚਾਯੋ,
ਞੇਯ੍ਯੋ ਏਵਂ ਪੁਞ੍ਞਵਤ੍ਥੁਪ੍ਪਭੇਦੋ.
੨੨. ਗਚ੍ਛਨ੍ਤਿ ਸਙ੍ਗਹਂ ਦਾਨੇ, ਪਤ੍ਤਿਦਾਨਾਨੁਮੋਦਨਾ;
ਤਥਾ ਸੀਲਮਯੇ ਪੁਞ੍ਞੇ, ਵੇਯ੍ਯਾਵਚ੍ਚਾਪਚਾਯਨਾ.
੨੩. ਦੇਸਨਾ ਸਵਨਂ ਦਿਟ੍ਠਿ-ਉਜੁਕਾ ਭਾਵਨਾਮਯੇ;
ਪੁਨ ਤੀਣੇਵ ਸਮ੍ਭੋਨ੍ਤਿ, ਦਸ ਪੁਞ੍ਞਕ੍ਰਿਯਾਪਿ ਚ.
੨੪. ਸਬ੍ਬਾਨੁਸ੍ਸਤਿਪੁਞ੍ਞਞ੍ਚ, ਪਸਂਸਾ ਸਰਣਤ੍ਤਯਂ;
ਯਨ੍ਤਿ ਦਿਟ੍ਠਿਜੁਕਮ੍ਮਸ੍ਮਿਂ, ਸਙ੍ਗਹਂ ਨਤ੍ਥਿ ਸਂਸਯੋ.
੨੫. ਪੁਰਿਮਾ ਮੁਞ੍ਚਨਾ ਚੇਵ, ਪਰਾ ਤਿਸ੍ਸੋਪਿ ਚੇਤਨਾ;
ਹੋਤਿ ਦਾਨਮਯਂ ਪੁਞ੍ਞਂ, ਏਵਂ ਸੇਸੇਸੁ ਦੀਪਯੇ.
ਇਦਾਨਿ ਅਸ੍ਸ ਪਨਟ੍ਠਵਿਧਸ੍ਸਾਪਿ ਕਾਮਾਵਚਰਕੁਸਲਚਿਤ੍ਤਸ੍ਸ ਅਯਮੁਪ੍ਪਤ੍ਤਿਕ੍ਕਮੋ ਵੇਦਿਤਬ੍ਬੋ. ਯਦਾ ਹਿ ਯੋ ਦੇਯ੍ਯਧਮ੍ਮਪ੍ਪਟਿਗ੍ਗਾਹਕਾਦਿਸਮ੍ਪਤ੍ਤਿਂ, ਅਞ੍ਞਂ ਵਾ ਸੋਮਨਸ੍ਸਹੇਤੁਂ ਆਗਮ੍ਮ ਹਟ੍ਠਪਹਟ੍ਠੋ ‘‘ਅਤ੍ਥਿ ਦਿਨ੍ਨ’’ਨ੍ਤਿ ਆਦਿਨਯਪ੍ਪਵਤ੍ਤਂ ਸਮ੍ਮਾਦਿਟ੍ਠਿਂ ਪੁਰਕ੍ਖਤ੍ਵਾ ਪਰੇਹਿ ਅਨੁਸ੍ਸਾਹਿਤੋ ਦਾਨਾਦੀਨਿ ਪੁਞ੍ਞਾਨਿ ਕਰੋਤਿ, ਤਦਾਸ੍ਸ ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਿਕਂ ਪਠਮਂ ਮਹਾਕੁਸਲਚਿਤ੍ਤਂ ਉਪ੍ਪਜ੍ਜਤਿ. ਯਦਾ ਪਨ ਵੁਤ੍ਤਨਯੇਨੇਵ ਹਟ੍ਠਪਹਟ੍ਠੋ ਸਮ੍ਮਾਦਿਟ੍ਠਿਂ ਪੁਰਕ੍ਖਤ੍ਵਾ ਪਰੇਹਿ ਉਸ੍ਸਾਹਿਤੋ ਕਰੋਤਿ, ਤਦਾਸ੍ਸ ਤਮੇਵ ਚਿਤ੍ਤਂ ਸਸਙ੍ਖਾਰਿਕਂ ਹੋਤਿ. ਇਮਸ੍ਮਿਂ ਪਨਤ੍ਥੇ ਸਙ੍ਖਾਰੋਤਿ ਅਤ੍ਤਨੋ ਵਾ ਪਰਸ੍ਸ ਵਾ ਪਵਤ੍ਤਸ੍ਸ ਪੁਬ੍ਬਪ੍ਪਯੋਗਸ੍ਸਾਧਿਵਚਨਂ. ਯਦਾ ਪਨ ਞਾਤਿਜਨਸ੍ਸ ਪਟਿਪਤ੍ਤਿਦਸ੍ਸਨੇਨ ਜਾਤਪਰਿਚਯਾ ਬਾਲਕਾ ਭਿਕ੍ਖੂ ਦਿਸ੍ਵਾ ਸੋਮਨਸ੍ਸਜਾਤਾ ਸਹਸਾ ਯਂ ਕਿਞ੍ਚਿ ਹਤ੍ਥਗਤਂ ਦਦਨ੍ਤਿ ਵਾ ਵਨ੍ਦਨ੍ਤਿ ਵਾ, ਤਦਾ ਤੇਸਂ ਤਤਿਯਚਿਤ੍ਤਮੁਪ੍ਪਜ੍ਜਤਿ. ਯਦਾ ਪਨ ਤੇ ‘‘ਦੇਥ ਵਨ੍ਦਥ, ਅਯ੍ਯੇ’’ਤਿ ਵਦਨ੍ਤਿ, ਏਵਂ ਞਾਤਿਜਨੇਨ ਉਸ੍ਸਾਹਿਤਾ ਹੁਤ੍ਵਾ ਹਤ੍ਥਗਤਂ ਦਦਨ੍ਤਿ ਵਾ ਵਨ੍ਦਨ੍ਤਿ ਵਾ, ਤਦਾ ਤੇਸਂ ਚਤੁਤ੍ਥਚਿਤ੍ਤਮੁਪ੍ਪਜ੍ਜਤਿ. ਯਦਾ ਪਨ ਦੇਯ੍ਯਧਮ੍ਮਪ੍ਪਟਿਗ੍ਗਾਹਕਾਦੀਨਂ ਅਸਮ੍ਪਤ੍ਤਿਂ ਵਾ ਅਞ੍ਞੇਸਂ ਵਾ ਸੋਮਨਸ੍ਸਹੇਤੂਨਂ ਅਭਾਵਂ ਆਗਮ੍ਮ ਚਤੂਸੁਪਿ ਵਿਕਪ੍ਪੇਸੁ ਸੋਮਨਸ੍ਸਰਹਿਤਾ ਹੋਨ੍ਤਿ, ਤਦਾ ਸੇਸਾਨਿ ਚਤ੍ਤਾਰਿ ਉਪੇਕ੍ਖਾਸਹਗਤਾਨਿ ਉਪ੍ਪਜ੍ਜਨ੍ਤਿ. ਏਵਂ ਸੋਮਨਸ੍ਸੁਪੇਕ੍ਖਾਞਾਣਪ੍ਪਯੋਗਭੇਦਤੋ ਅਟ੍ਠਵਿਧਂ ਕਾਮਾਵਚਰਕੁਸਲਚਿਤ੍ਤਂ ਵੇਦਿਤਬ੍ਬਂ.
੨੬. ਦਸਪੁਞ੍ਞਕ੍ਰਿਯਾਦੀਨਂ, ਵਸੇਨ ਚ ਬਹੂਨਿਪਿ;
ਏਤਾਨਿ ਪਨ ਚਿਤ੍ਤਾਨਿ, ਭਵਨ੍ਤੀਤਿ ਪਕਾਸਯੇ.
੨੭. ਸਤ੍ਤਰਸ ਸਹਸ੍ਸਾਨਿ, ਦ੍ਵੇ ਸਤਾਨਿ ਅਸੀਤਿ ਚ;
ਕਾਮਾਵਚਰਪੁਞ੍ਞਾਨਿ, ਭਵਨ੍ਤੀਤਿ ਵਿਨਿਦ੍ਦਿਸੇ.
ਤਂ ਪਨ ਯਥਾਨੁਰੂਪਂ ਕਾਮਾਵਚਰਸੁਗਤਿਯਂ ਭਵਭੋਗਸਮ੍ਪਤ੍ਤਿਂ ਅਭਿਨਿਪ੍ਫਾਦੇਤਿ.
ਇਤਰੇਸੁ ਪਨ ਰੂਪਾਵਚਰਕੁਸਲਚਿਤ੍ਤਂ ਸਵਤ੍ਥੁਕਤੋ ਏਕਵਿਧਂ, ਦ੍ਵੀਸੁ ਭਵੇਸੁ ਉਪ੍ਪਜ੍ਜਨਤੋ ਦੁਵਿਧਂ, ਹੀਨਮਜ੍ਝਿਮਪਣੀਤਭੇਦਤੋ ਤਿਵਿਧਂ, ਪਟਿਪਦਾਦਿਭੇਦਤੋ ਚਤੁਬ੍ਬਿਧਂ, ਝਾਨਙ੍ਗਯੋਗਭੇਦਤੋ ਪਞ੍ਚਵਿਧਂ. ਸੇਯ੍ਯਥਿਦਂ – ਕਾਮਚ੍ਛਨ੍ਦਬ੍ਯਾਪਾਦਥਿਨਮਿਦ੍ਧਉਦ੍ਧਚ੍ਚਕੁਕ੍ਕੁਚ੍ਚਵਿਚਿਕਿਚ੍ਛਾਵਿਪ੍ਪਹੀਨਂ ਵਿਤਕ੍ਕਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਠਮਂ, ਵਿਤਕ੍ਕਵਿਪ੍ਪਹੀਨਂ ਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਦੁਤਿਯਂ, ਵਿਤਕ੍ਕਵਿਚਾਰਵਿਪ੍ਪਹੀਨਂ ਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਤਤਿਯਂ, ਵਿਤਕ੍ਕਵਿਚਾਰਪੀਤਿਵਿਪ੍ਪਹੀਨਂ ਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਚਤੁਤ੍ਥਂ, ਵਿਤਕ੍ਕਵਿਚਾਰਪੀਤਿਸੁਖਵਿਪ੍ਪਹੀਨਂ ਉਪੇਕ੍ਖਾਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਞ੍ਚਮਨ੍ਤਿ ਇਦਂ ਪਞ੍ਚਵਿਧਂ ਰੂਪਾਵਚਰਕੁਸਲਚਿਤ੍ਤਂ ਨਾਮ.
ਤਂ ਪਨ ਯਥਾਸਮ੍ਭਵਂ ਪਥਵੀਕਸਿਣਾਦੀਸੁ ਆਰਮ੍ਮਣੇਸੁ ਪਵਤ੍ਤਿਵਸੇਨ ਅਨੇਕਵਿਧਂ ਹੋਤਿ. ਸਬ੍ਬਂ ਪਨੇਤਂ ਰੂਪਾਵਚਰਭਾਵਨਾਪੁਞ੍ਞਵਸਪ੍ਪਵਤ੍ਤਂ ਯਥਾਨੁਰੂਪਂ ਰੂਪਾਵਚਰੂਪਪਤ੍ਤਿਨਿਪ੍ਫਾਦਕਂ ਹੋਤਿ. ਏਵਂ ਤਾਵ ਰੂਪਾਵਚਰਕੁਸਲਂ ਵੇਦਿਤਬ੍ਬਂ.
ਸੇਸੇਸੁ ਪਨ ਦ੍ਵੀਸੁ ਅਰੂਪਾਵਚਰਕੁਸਲਚਿਤ੍ਤਂ ਤਾਵ ਉਪੇਕ੍ਖਾਵੇਦਨਾਯੋਗਭੇਦਤੋ ਏਕਵਿਧਂ, ਸਵਤ੍ਥੁਕਾਵਤ੍ਥੁਕਭੇਦਤੋ ਦੁਵਿਧਂ, ਹੀਨਮਜ੍ਝਿਮਪਣੀਤਭੇਦਤੋ ਤਿਵਿਧਂ, ਆਰਮ੍ਮਣਭੇਦਤੋ ਚਤੁਬ੍ਬਿਧਂ. ਕਸਿਣੁਗ੍ਘਾਟਿਮਾਕਾਸਂ, ਤਤ੍ਥ ਪਵਤ੍ਤਵਿਞ੍ਞਾਣਂ, ਤਸ੍ਸ ਅਪਗਮੋ, ਆਕਿਞ੍ਚਞ੍ਞਾਯਤਨਨ੍ਤਿ ਇਦਮਸ੍ਸ ਚਤੁਬ੍ਬਿਧਮਾਰਮ੍ਮਣਂ. ਯਥਾਪਟਿਪਾਟਿਯਾ ਏਤਸ੍ਸਾਰਮ੍ਮਣਸ੍ਸ ਭੇਦਤੋ ਚਤੁਬ੍ਬਿਧਂ ਹੋਤਿ. ਸੇਯ੍ਯਥਿਦਂ – ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਾ ਪਟਿਘਸਞ੍ਞਾਨਂ ਅਤ੍ਥਙ੍ਗਮਾ ਨਾਨਤ੍ਤਸਞ੍ਞਾਨਂ ਅਮਨਸਿਕਾਰਾ ਆਕਾਸਾਨਞ੍ਚਾਯਤਨਸਞ੍ਞਾਸਹਗਤਂ, ਵਿਞ੍ਞਾਣਞ੍ਚਾਯਤਨਸਞ੍ਞਾਸਹਗਤਂ, ਆਕਿਞ੍ਚਞ੍ਞਾਯਤਨਸਞ੍ਞਾਸਹਗਤਂ, ਨੇਵਸਞ੍ਞਾਨਾਸਞ੍ਞਾਯਤਨਸਞ੍ਞਾਸਹਗਤਨ੍ਤਿ ਇਦਂ ਚਤੁਬ੍ਬਿਧਂ ਅਰੂਪਾਵਚਰਕੁਸਲਚਿਤ੍ਤਂ ਨਾਮ. ਸਬ੍ਬਂ ਪਨੇਤਂ ਅਰੂਪਾਵਚਰਭਾਵਨਾਪੁਞ੍ਞਵਸਪ੍ਪਵਤ੍ਤਂ ਯਥਾਨੁਰੂਪਂ ਅਰੂਪੂਪਪਤ੍ਤਿਨਿਪ੍ਫਾਦਕਂ ਹੋਤਿ. ਏਵਂ ਅਰੂਪਾਵਚਰਕੁਸਲਚਿਤ੍ਤਂ ਵੇਦਿਤਬ੍ਬਂ.
ਇਤਰਂ ਪਨ ਲੋਕੁਤ੍ਤਰਕੁਸਲਚਿਤ੍ਤਂ ਨਿਬ੍ਬਾਨਾਰਮ੍ਮਣਤੋ ਏਕਵਿਧਂ, ਨਿਯਤਾਨਿਯਤਵਤ੍ਥੁਕਭੇਦਤੋ ਦੁਵਿਧਂ, ਤੀਹਿ ਵਿਮੋਕ੍ਖਮੁਖੇਹਿ ਪਤ੍ਤਬ੍ਬਤੋ ਤਿਵਿਧਂ, ਚਤੁਮਗ੍ਗਯੋਗਭੇਦਤੋ ਚਤੁਬ੍ਬਿਧਂ. ਸੇਯ੍ਯਥਿਦਂ – ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਸਞ੍ਞੋਜਨਪ੍ਪਹਾਨਕਰਂ ਸੋਤਾਪਤ੍ਤਿਮਗ੍ਗਚਿਤ੍ਤਂ, ਰਾਗਦੋਸਮੋਹਾਨਂ ਤਨੁਤ੍ਤਕਰਂ ਸਕਦਾਗਾਮਿਮਗ੍ਗਚਿਤ੍ਤਂ, ਕਾਮਰਾਗਬ੍ਯਾਪਾਦਾਨਂ ਨਿਰਵਸੇਸਪ੍ਪਹਾਨਕਰਂ ਅਨਾਗਾਮਿਮਗ੍ਗਚਿਤ੍ਤਂ, ਰੂਪਰਾਗਅਰੂਪਰਾਗਮਾਨਉਦ੍ਧਚ੍ਚਅਵਿਜ੍ਜਾਪਹਾਨਕਰਂ ਅਰਹਤ੍ਤਮਗ੍ਗਚਿਤ੍ਤਨ੍ਤਿ ਇਦਂ ਚਤੁਬ੍ਬਿਧਂ ਲੋਕੁਤ੍ਤਰਕੁਸਲਚਿਤ੍ਤਂ ਨਾਮ. ਏਕੇਕਂ ਪਨੇਤ੍ਥ ਝਾਨਙ੍ਗਯੋਗਭੇਦਤੋ ਪਞ੍ਚਵਿਧਂ ਹੋਤਿ, ਤਸ੍ਮਾ ਵੀਸਤਿਵਿਧਂ ਹੋਤਿ. ਸਬ੍ਬਂ ਪਨੇਤਂ ਲੋਕੁਤ੍ਤਰਭਾਵਨਾਪੁਞ੍ਞਵਸਪ੍ਪਵਤ੍ਤਂ ਮਗ੍ਗਾਨੁਰੂਪਫਲਪ੍ਪਵਤ੍ਤਿਯਾ ਚਤ੍ਤਾਰੋ ਅਰਿਯਪੁਗ੍ਗਲੇ ਅਭਿਨਿਪ੍ਫਾਦੇਤਿ. ਏਵਂ ਲੋਕੁਤ੍ਤਰਕੁਸਲਂ ਵੇਦਿਤਬ੍ਬਂ.
੨੮. ਕਾਮੇ ਅਟ੍ਠੇਵ ਰੂਪੇ ਚ, ਪਞ੍ਚ ਚਤ੍ਤਾਰਿਰੂਪਿਸੁ;
ਚਤ੍ਤਾਰਾਨੁਤ੍ਤਰਾਨੇਵਂ, ਕੁਸਲਾਨੇਕਵੀਸਤਿ.
੨੯. ਕੁਸਲਾਕੁਸਲਾਪਗਤੇਨ ਸਤਾ,
ਕੁਸਲੇ ਕੁਸਲੇਨ ਚ ਯਂ ਕੁਸਲਂ;
ਚਤੁਭੂਮਿਗਤਂ ਮੁਨਿਨਾ ਵਸਿਨਾ,
ਲਪਿਤਂ ਲਪਿਤਂ ਸਕਲਮ੍ਪਿ ਮਯਾ.
ਅਕੁਸਲਂ ਪਨ ਭੂਮਿਤੋ ਏਕਵਿਧਂ ਕਾਮਾਵਚਰਮੇਵ, ਨਿਯਤਾਨਿਯਤਵਤ੍ਥੁਵਸੇਨ ਚ ਏਕਹੇਤੁਕਦੁਹੇਤੁਕਵਸੇਨ ਚ ਪਟਿਸਨ੍ਧਿਜਨਕਾਜਨਕਵਸੇਨ ਚ ਦੁਵਿਧਂ, ਤੀਹਿ ਵੇਦਨਾਹਿ ਯੋਗਤੋ ਚ ਲੋਭਮੂਲਂ ਦੋਸਮੂਲਂ ਮੋਹਮੂਲਨ੍ਤਿ ਮੂਲਤੋ ਚ ਤਿਵਿਧਂ ਹੋਤਿ. ਤਤ੍ਥ ਲੋਭਮੂਲਂ ਪਨ ਸੋਮਨਸ੍ਸੁਪੇਕ੍ਖਾਦਿਟ੍ਠਿਪ੍ਪਯੋਗਭੇਦਤੋ ਅਟ੍ਠਵਿਧਂ ਹੋਤਿ. ਸੇਯ੍ਯਥਿਦਂ – ਸੋਮਨਸ੍ਸਸਹਗਤਂ ਦਿਟ੍ਠਿਗਤਸਮ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਸੋਮਨਸ੍ਸਸਹਗਤਂ ਦਿਟ੍ਠਿਗਤਵਿਪ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਉਪੇਕ੍ਖਾਸਹਗਤਂ ਦਿਟ੍ਠਿਗਤਸਮ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਉਪੇਕ੍ਖਾਸਹਗਤਂ ਦਿਟ੍ਠਿਗਤਵਿਪ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਨ੍ਤਿ.
ਯਦਾ ਹਿ ‘‘ਨਤ੍ਥਿ ਕਾਮੇਸੁ ਆਦੀਨਵੋ’’ਤਿਆਦਿਨਾ ਨਯੇਨ ਮਿਚ੍ਛਾਦਿਟ੍ਠਿਂ ਪੁਰਕ੍ਖਤ੍ਵਾ ਕੇਵਲਂ ਹਟ੍ਠਤੁਟ੍ਠੋ ਕਾਮੇ ਵਾ ਪਰਿਭੁਞ੍ਜਤਿ, ਦਿਟ੍ਠਮਙ੍ਗਲਾਦੀਨਿ ਵਾ ਸਾਰਤੋ ਪਚ੍ਚੇਤਿ ਸਭਾਵਤਿਕ੍ਖੇਨੇਵ ਅਨੁਸ੍ਸਾਹਿਤੇਨ ਚਿਤ੍ਤੇਨ, ਤਦਾਸ੍ਸ ਪਠਮਂ ਅਕੁਸਲਚਿਤ੍ਤਂ ਉਪ੍ਪਜ੍ਜਤਿ. ਯਦਾ ਪਨ ਮਨ੍ਦੇਨ ਸਮੁਸ੍ਸਾਹਿਤੇਨ, ਤਦਾ ਦੁਤਿਯਂ. ਯਦਾ ਮਿਚ੍ਛਾਦਿਟ੍ਠਿਂ ਅਪੁਰਕ੍ਖਤ੍ਵਾ ਕੇਵਲਂ ਹਟ੍ਠਤੁਟ੍ਠੋ ਮੇਥੁਨਂ ਧਮ੍ਮਂ ਵਾ ਪਰਿਭੁਞ੍ਜਤਿ, ਪਰਸਮ੍ਪਤ੍ਤਿਂ ਵਾ ਅਭਿਜ੍ਝਾਯਤਿ, ਪਰਸ੍ਸ ਭਣ੍ਡਂ ਵਾ ਹਰਤਿ ਸਭਾਵਤਿਕ੍ਖੇਨੇਵ ਅਨੁਸ੍ਸਾਹਿਤੇਨ ਚਿਤ੍ਤੇਨ, ਤਦਾ ਤਤਿਯਂ. ਯਦਾ ਮਨ੍ਦੇਨ ਸਮੁਸ੍ਸਾਹਿਤੇਨ, ਤਦਾ ਚਤੁਤ੍ਥਂ ਉਪ੍ਪਜ੍ਜਤਿ. ਯਦਾ ਪਨ ਕਾਮਾਨਂ ਵਾ ਅਸਮ੍ਪਤ੍ਤਿਂ ਆਗਮ੍ਮ ਅਞ੍ਞੇਸਂ ਵਾ ਸੋਮਨਸ੍ਸਹੇਤੂਨਂ ਅਭਾਵੇਨ ਚਤੂਸੁਪਿ ਵਿਕਪ੍ਪੇਸੁ ਸੋਮਨਸ੍ਸਰਹਿਤਾ ਹੋਨ੍ਤਿ, ਤਦਾ ਸੇਸਾਨਿ ਚਤ੍ਤਾਰਿ ਉਪੇਕ੍ਖਾਸਹਗਤਾਨਿ ਉਪ੍ਪਜ੍ਜਨ੍ਤੀਤਿ. ਏਵਂ ਸੋਮਨਸ੍ਸੁਪੇਕ੍ਖਾਦਿਟ੍ਠਿਪ੍ਪਯੋਗਭੇਦਤੋ ਅਟ੍ਠਵਿਧਂ ਲੋਭਮੂਲਂ ਵੇਦਿਤਬ੍ਬਂ.
ਦੋਸਮੂਲਂ ਪਨ ਏਕਨ੍ਤਸਵਤ੍ਥੁਕਤੋ ਏਕਵਿਧਂ, ਅਸਙ੍ਖਾਰਸਸਙ੍ਖਾਰਭੇਦਤੋ ਦੁਵਿਧਂ ਦੋਮਨਸ੍ਸਸਹਗਤਂ ਪਟਿਘਸਮ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਨ੍ਤਿ. ਅਸ੍ਸ ਪਨ ਪਾਣਾਤਿਪਾਤਾਦੀਸੁ ਤਿਕ੍ਖਮਨ੍ਦਪ੍ਪਵਤ੍ਤਿਕਾਲੇ ਉਪ੍ਪਤ੍ਤਿ ਵੇਦਿਤਬ੍ਬਾ.
ਮੋਹਮੂਲਮ੍ਪਿ ਵਿਚਿਕਿਚ੍ਛੁਦ੍ਧਚ੍ਚਯੋਗਤੋ ਦੁਵਿਧਂ ਹੋਤਿ ਉਪੇਕ੍ਖਾਸਹਗਤਂ ਵਿਚਿਕਿਚ੍ਛਾਸਮ੍ਪਯੁਤ੍ਤਂ, ਉਪੇਕ੍ਖਾਸਹਗਤਂ ਉਦ੍ਧਚ੍ਚਸਮ੍ਪਯੁਤ੍ਤਨ੍ਤਿ. ਤਸ੍ਸ ਅਸਨ੍ਨਿਟ੍ਠਾਨਵਿਕ੍ਖੇਪਕਾਲੇਸੁ ਪਵਤ੍ਤਿ ਵੇਦਿਤਬ੍ਬਾਤਿ.
ਏਵਂ ਤਾਵ ਦ੍ਵਾਦਸਵਿਧਂ ਅਕੁਸਲਚਿਤ੍ਤਂ ਵੇਦਿਤਬ੍ਬਂ, ਸਬ੍ਬਂ ਪਨੇਤਂ ਯਥਾਨੁਰੂਪਂ ਅਪਾਯੇਸੁ ਉਪਪਤ੍ਤਿਯਾ, ਸੁਗਤਿਯਮ੍ਪਿ ਦੁਕ੍ਖਵਿਸੇਸਸ੍ਸ ਅਭਿਨਿਪ੍ਫਾਦਕਂ ਹੋਤਿ.
੩੦. ਲੋਭਮੂਲਵਸੇਨਟ੍ਠ, ਦੋਸਮੂਲਵਸਾ ਦੁਵੇ;
ਮੋਹਮੂਲਵਸੇਨ ਦ੍ਵੇ, ਏਵਂ ਦ੍ਵਾਦਸਧਾ ਸਿਯੁਂ.
੩੧. ਪਾਪਾਪਾਪੇਸ੍ਵਪਾਪੇਨ, ਯਂ ਵੁਤ੍ਤਂ ਪਾਪਮਾਨਸਂ;
ਪਾਪਾਪਾਪਪ੍ਪਹੀਨੇਨ, ਤਂ ਮਯਾ ਸਮੁਦਾਹਟਂ.
ਇਤਰਂ ਪਨ ਅਬ੍ਯਾਕਤਮਵਿਪਾਕਾਰਹਤੋ ਏਕਵਿਧਂ ਹੋਤਿ, ਜਾਤਿਭੇਦਤੋ ਦੁਵਿਧਂ ਵਿਪਾਕਚਿਤ੍ਤਂ ਕਿਰਿਯਚਿਤ੍ਤਨ੍ਤਿ. ਤਤ੍ਥ ਵਿਪਾਕਚਿਤ੍ਤਂ ਭੂਮਿਭੇਦਤੋ ਚਤੁਬ੍ਬਿਧਂ ਕਾਮਾਵਚਰਂ ਰੂਪਾਵਚਰਂ ਅਰੂਪਾਵਚਰਂ ਲੋਕੁਤ੍ਤਰਨ੍ਤਿ. ਤਤ੍ਥ ਕਾਮਾਵਚਰਂ ਦੁਵਿਧਂ ਕੁਸਲਵਿਪਾਕਂ ਅਕੁਸਲਵਿਪਾਕਨ੍ਤਿ. ਕੁਸਲਵਿਪਾਕਂ ਦੁਵਿਧਂ ਸਹੇਤੁਕਮਹੇਤੁਕਞ੍ਚੇਤਿ.
ਤਤ੍ਥ ਸਹੇਤੁਕਵਿਪਾਕਚਿਤ੍ਤਂ ਸਕਕੁਸਲਂ ਵਿਯ ਸੋਮਨਸ੍ਸੁਪੇਕ੍ਖਾਞਾਣਪ੍ਪਯੋਗਭੇਦਤੋ ਅਟ੍ਠਵਿਧਂ. ਸੇਯ੍ਯਥਿਦਂ – ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਂ, ਸੋਮਨਸ੍ਸਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਂ, ਉਪੇਕ੍ਖਾਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਂ, ਉਪੇਕ੍ਖਾਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਨ੍ਤਿ ਇਦਂ ਅਟ੍ਠਵਿਧਂ ਸਹੇਤੁਕਵਿਪਾਕਂ ਨਾਮ.
ਯਥਾ ਪਨਸ੍ਸ ਕੁਸਲਂ ਦਾਨਾਦਿਵਸੇਨ ਛਸੁ ਆਰਮ੍ਮਣੇਸੁ ਪਵਤ੍ਤਤਿ, ਨ ਇਦਂ ਤਥਾ. ਇਦਂ ਹਿ ਪਟਿਸਨ੍ਧਿਭਵਙ੍ਗਚੁਤਿਤਦਾਰਮ੍ਮਣਵਸੇਨ ਪਰਿਤ੍ਤਧਮ੍ਮਪਰਿਯਾਪਨ੍ਨੇਸੁਯੇਵ ਛਸੁ ਆਰਮ੍ਮਣੇਸੁ ਪਵਤ੍ਤਤਿ. ਸਮ੍ਪਯੁਤ੍ਤਧਮ੍ਮਾਨਞ੍ਚ ਵਿਸੇਸੇ ਅਸਤਿਪਿ ਆਦਾਸਤਲਾਦੀਸੁ ਮੁਖਨਿਮਿਤ੍ਤਂ ਵਿਯ ਨਿਰੁਸ੍ਸਾਹਂ ਵਿਪਾਕਂ, ਮੁਖਂ ਵਿਯ ਸਉਸ੍ਸਾਹਂ ਕੁਸਲਨ੍ਤਿ ਵੇਦਿਤਬ੍ਬਂ. ਇਮੇਸਂ ਪਨ ਵਿਪਚ੍ਚਨਟ੍ਠਾਨਂ ਵੇਦਿਤਬ੍ਬਂ. ਇਮਾਨਿ ਹਿ ਪਟਿਸਨ੍ਧਿਭਵਙ੍ਗਚੁਤਿਤਦਾਰਮ੍ਮਣਾਨਿ ਹੁਤ੍ਵਾ ਵਿਪਚ੍ਚਨ੍ਤਿ.
੩੨. ਕਾਮਾਵਚਰਦੇਵਾਨਂ, ਮਨੁਸ੍ਸਾਨਂ ਇਮੇ ਪਨ;
ਦੁਹੇਤੁਕਤਿਹੇਤੂਨਂ, ਭਵਨ੍ਤਿ ਪਟਿਸਨ੍ਧਿਯੋ.
੩੩. ਤਤੋ ਪਵਤ੍ਤਿਯਂ ਹੁਤ੍ਵਾ, ਭਵਙ੍ਗਂ ਯਾਵਤਾਯੁਕਂ;
ਬਲਵਾਰਮ੍ਮਣੇ ਹੁਤ੍ਵਾ, ਤਦਾਰਮ੍ਮਣਮੇਵ ਚ.
੩੪. ਤਤੋ ਮਰਣਕਾਲਸ੍ਮਿਂ, ਚੁਤਿ ਹੁਤ੍ਵਾ ਪਵਤ੍ਤਰੇ;
ਏਵਂ ਚਤੂਸੁ ਠਾਨੇਸੁ, ਵਿਪਚ੍ਚਨ੍ਤੀਤਿ ਨਿਦ੍ਦਿਸੇ.
੩੫. ਸਭੂਮਿਕੁਸਲੇਹੇਵ, ਮਹਾਪਾਕਾ ਸਮਾ ਵਿਨਾ;
ਕਮ੍ਮਦ੍ਵਾਰਞ੍ਚ ਕਮ੍ਮਞ੍ਚ, ਪੁਞ੍ਞਾਨਂ ਕ੍ਰਿਯਵਤ੍ਥੁਕਂ.
੩੬. ਅਵਿਞ੍ਞਤ੍ਤਿਜਨਤ੍ਤਾ ਹਿ, ਅਵਿਪਾਕਸਭਾਵਤੋ;
ਅਪ੍ਪਵਤ੍ਤਨਤੋ ਚੇਵ, ਪਾਕਾ ਪੁਞ੍ਞੇਹਿ ਨੋ ਸਮਾ.
੩੭. ਪਰਿਤ੍ਤਾਰਮ੍ਮਣਤ੍ਤਾ ਹਿ, ਤੇਸਮੇਕਨ੍ਤਤੋ ਪਨ;
ਕਰੁਣਾਮੁਦਿਤਾ ਤੇਸੁ, ਨ ਜਾਯਨ੍ਤਿ ਕਦਾਚਿਪਿ.
੩੮. ਤਥਾ ਵਿਰਤਿਯੋ ਤਿਸ੍ਸੋ, ਨ ਪਨੇਤੇਸੁ ਜਾਯਰੇ;
ਪਞ੍ਚ ਸਿਕ੍ਖਾਪਦਾ ਵੁਤ੍ਤਾ, ਕੁਸਲਾਤਿ ਹਿ ਸਤ੍ਥੁਨਾ.
੩੯. ਤਥਾਧਿਪਤਿਨੋਪੇਤ੍ਥ, ਨ ਸਨ੍ਤੀਤਿ ਵਿਨਿਦ੍ਦਿਸੇ;
ਛਨ੍ਦਾਦੀਨਿ ਧੁਰਂ ਕਤ੍ਵਾ, ਅਨੁਪ੍ਪਜ੍ਜਨਤੋ ਪਨ.
੪੦. ਅਸਙ੍ਖਾਰਸਸਙ੍ਖਾਰ-ਵਿਧਾਨਂ ਪਨ ਪੁਞ੍ਞਤੋ;
ਞੇਯ੍ਯਂ ਪਚ੍ਚਯਤੋ ਚੇਵ, ਵਿਪਾਕੇਸੁ ਚ ਵਿਞ੍ਞੁਨਾ.
੪੧. ਹੀਨਾਦੀਨਂ ਵਿਪਾਕਤ੍ਤਾ, ਪੁਞ੍ਞਾਨਂ ਪੁਞ੍ਞਵਾਦਿਨਾ;
ਹੀਨਾਦਯੋ ਭਵਨ੍ਤੀਤਿ, ਵਿਪਾਕਾ ਪਰਿਦੀਪਿਤਾ.
੪੨. ਇਦਂ ਅਟ੍ਠਵਿਧਂ ਚਿਤ੍ਤਂ, ਏਕਨ੍ਤੇਨ ਸਵਤ੍ਥੁਕਂ;
ਜਾਯਤੇ ਕਾਮਲੋਕਸ੍ਮਿਂ, ਨ ਪਨਞ੍ਞਤ੍ਥ ਜਾਯਤੇ.
ਏਵਂ ਤਾਵ ਸਹੇਤੁਕਵਿਪਾਕਚਿਤ੍ਤਂ ਵੇਦਿਤਬ੍ਬਂ.
ਅਹੇਤੁਕਵਿਪਾਕਚਿਤ੍ਤਂ ਪਨ ਅਲੋਭਾਦਿਹੇਤੁਵਿਰਹਿਤਂ ਉਪੇਕ੍ਖਾਸਹਗਤਂ ਚਕ੍ਖੁਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਸੋਤਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਘਾਨਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਜਿਵ੍ਹਾਵਿਞ੍ਞਾਣਂ, ਸੁਖਸਹਗਤਂ ਕਾਯਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਅਹੇਤੁਕਮਨੋਧਾਤੁਸਮ੍ਪਟਿਚ੍ਛਨਂ, ਸੋਮਨਸ੍ਸਸਹਗਤਂ ਅਹੇਤੁਕਮਨੋਵਿਞ੍ਞਾਣਧਾਤੁਸਨ੍ਤੀਰਣਂ, ਉਪੇਕ੍ਖਾਸਹਗਤਂ ਅਹੇਤੁਕਮਨੋਵਿਞ੍ਞਾਣਧਾਤੁਸਨ੍ਤੀਰਣਨ੍ਤਿ ਇਦਂ ਪਨ ਅਟ੍ਠਵਿਧਂ ਅਹੇਤੁਕਵਿਪਾਕਚਿਤ੍ਤਂ ਨਾਮ.
ਇਦਂ ਪਨ ਅਟ੍ਠਵਿਧਂ ਨਿਯਤਵਤ੍ਥੁਕਤੋ ਏਕਵਿਧਂ, ਨਿਯਤਾਨਿਯਤਾਰਮ੍ਮਣਤੋ ਦੁਵਿਧਂ. ਤਤ੍ਥ ਵਿਞ੍ਞਾਣਪਞ੍ਚਕਂ ਨਿਯਤਾਰਮ੍ਮਣਂ, ਸੇਸਤ੍ਤਯਂ ਅਨਿਯਤਾਰਮ੍ਮਣਂ. ਸੁਖਸੋਮਨਸ੍ਸੁਪੇਕ੍ਖਾਵੇਦਨਾਯੋਗਤੋ ਤਿਵਿਧਂ. ਤਤ੍ਥ ਸੁਖਸਹਗਤਂ ਕਾਯਵਿਞ੍ਞਾਣਂ, ਦ੍ਵਿਟ੍ਠਾਨਿਕਂ ਸਨ੍ਤੀਰਣਂ ਸੋਮਨਸ੍ਸੁਪੇਕ੍ਖਾਯੁਤ੍ਤਂ, ਸੇਸਮੁਪੇਕ੍ਖਾਯੁਤ੍ਤਨ੍ਤਿ.
ਦਿਟ੍ਠਾਰਮ੍ਮਣਸੁਤਾਰਮ੍ਮਣਮੁਤਾਰਮ੍ਮਣਦਿਟ੍ਠਸੁਤਮੁਤਾਰਮ੍ਮਣਦਿਟ੍ਠ-ਸੁਤਮੁਤਵਿਞ੍ਞਾਤਾਰਮ੍ਮਣਵਸੇਨ ਪਞ੍ਚਵਿਧਂ. ਤਤ੍ਥ ਦਿਟ੍ਠਾਰਮ੍ਮਣਂ ਚਕ੍ਖੁਵਿਞ੍ਞਾਣਂ, ਸੁਤਾਰਮ੍ਮਣਂ ਸੋਤਵਿਞ੍ਞਾਣਂ, ਮੁਤਾਰਮ੍ਮਣਂ ਘਾਨਜਿਵ੍ਹਾਕਾਯਵਿਞ੍ਞਾਣਤ੍ਤਯਂ, ਦਿਟ੍ਠਸੁਤਮੁਤਾਰਮ੍ਮਣਂ ਮਨੋਧਾਤੁਸਮ੍ਪਟਿਚ੍ਛਨਂ, ਦਿਟ੍ਠਸੁਤਮੁਤਵਿਞ੍ਞਾਤਾਰਮ੍ਮਣਂ ਸੇਸਮਨੋਵਿਞ੍ਞਾਣਧਾਤੁਦ੍ਵਯਨ੍ਤਿ.
ਵਤ੍ਥੁਤੋ ਛਬ੍ਬਿਧਂ. ਕਥਂ? ਚਕ੍ਖੁਵਿਞ੍ਞਾਣਸ੍ਸ ਚਕ੍ਖੁਮੇਵ ਵਤ੍ਥੁ, ਤਥਾ ਸੋਤਘਾਨਜਿਵ੍ਹਾਕਾਯਵਿਞ੍ਞਾਣਾਨਂ ਸੋਤਘਾਨਜਿਵ੍ਹਾਕਾਯਵਤ੍ਥੁ, ਅਵਸੇਸਤ੍ਤਯਸ੍ਸ ਹਦਯਵਤ੍ਥੁਮੇਵਾਤਿ.
ਆਰਮ੍ਮਣਤੋ ਸਤ੍ਤਵਿਧਂ ਹੋਤਿ. ਕਥਂ? ਰੂਪਾਰਮ੍ਮਣਮੇਵ ਚਕ੍ਖੁਵਿਞ੍ਞਾਣਂ, ਤਥਾ ਸਦ੍ਦਗਨ੍ਧਰਸਫੋਟ੍ਠਬ੍ਬਾਰਮ੍ਮਣਾਨਿ ਪਟਿਪਾਟਿਯਾ ਸੋਤਘਾਨਜਿਵ੍ਹਾਕਾਯਵਿਞ੍ਞਾਣਾਨਿ, ਰੂਪਾਦਿਪਞ੍ਚਾਰਮ੍ਮਣਾ ਮਨੋਧਾਤੁ, ਸੇਸਮਨੋਵਿਞ੍ਞਾਣਧਾਤੁਦ੍ਵਯਂ ਛਲ਼ਾਰਮ੍ਮਣਨ੍ਤਿ.
ਤਂ ਸਬ੍ਬਂ ਪਨ ਅਹੇਤੁਕਵਿਪਾਕਚਿਤ੍ਤਂ ਕਿਚ੍ਚਤੋ ਅਟ੍ਠਵਿਧਂ ਹੋਤਿ. ਕਥਂ? ਦਸ੍ਸਨਕਿਚ੍ਚਂ ਚਕ੍ਖੁਵਿਞ੍ਞਾਣਂ, ਸਵਨਘਾਯਨਸਾਯਨਫੁਸਨਸਮ੍ਪਟਿਚ੍ਛਨਸਨ੍ਤੀਰਣਤਦਾਰਮ੍ਮਣਕਿਚ੍ਚਾਨਿ ਅਵਸੇਸਾਨਿ.
ਤਤ੍ਥ ਚਕ੍ਖੁਤੋ ਪਵਤ੍ਤਂ ਵਿਞ੍ਞਾਣਂ, ਚਕ੍ਖੁਮ੍ਹਿ ਸਨ੍ਨਿਸ੍ਸਿਤਂ ਵਿਞ੍ਞਾਣਨ੍ਤਿ ਵਾ ਚਕ੍ਖੁਵਿਞ੍ਞਾਣਂ, ਤਥਾ ਸੋਤਵਿਞ੍ਞਾਣਾਦੀਨਿ. ਤਤ੍ਥ ਚਕ੍ਖੁਸਨ੍ਨਿਸ੍ਸਿਤਰੂਪਵਿਜਾਨਨਲਕ੍ਖਣਂ ਚਕ੍ਖੁਵਿਞ੍ਞਾਣਂ, ਰੂਪਮਤ੍ਤਾਰਮ੍ਮਣਰਸਂ, ਰੂਪਾਭਿਮੁਖਭਾਵਪਚ੍ਚੁਪਟ੍ਠਾਨਂ, ਰੂਪਾਰਮ੍ਮਣਾਯ ਕਿਰਿਯਾਮਨੋਧਾਤੁਯਾ ਅਪਗਮਪਦਟ੍ਠਾਨਂ. ਤਥਾ ਸੋਤਘਾਨਜਿਵ੍ਹਾਕਾਯਵਿਞ੍ਞਾਣਾਨਿ ਸੋਤਾਦਿਸਨ੍ਨਿਸ੍ਸਿਤਸਦ੍ਦਾਦਿਵਿਜਾਨਨਲਕ੍ਖਣਾਨਿ, ਸਦ੍ਦਾਦਿਮਤ੍ਤਾਰਮ੍ਮਣਰਸਾਨਿ, ਸਦ੍ਦਾਦੀਸੁ ਅਭਿਮੁਖਭਾਵਪਚ੍ਚੁਪਟ੍ਠਾਨਾਨਿ, ਸਦ੍ਦਾਦਿਆਰਮ੍ਮਣਾਨਂ ਕਿਰਿਯਾਮਨੋਧਾਤੂਨਂ ਅਪਗਮਪਦਟ੍ਠਾਨਾਨਿ. ਮਨੋਧਾਤੁਸਮ੍ਪਟਿਚ੍ਛਨਂ ਪਨ ਚਕ੍ਖੁਵਿਞ੍ਞਾਣਾਦੀਨਂ ਅਨਨ੍ਤਰਾ ਰੂਪਾਦਿਵਿਜਾਨਨਲਕ੍ਖਣਂ, ਰੂਪਾਦਿਸਮ੍ਪਟਿਚ੍ਛਨਰਸਂ, ਤਥਾਭਾਵਪਚ੍ਚੁਪਟ੍ਠਾਨਂ, ਚਕ੍ਖੁਵਿਞ੍ਞਾਣਾਦੀਨਂ ਅਪਗਮਪਦਟ੍ਠਾਨਂ.
ਸੇਸਾ ਪਨ ਦ੍ਵੇ ਅਹੇਤੁਕਮਨੋਵਿਞ੍ਞਾਣਧਾਤੁਯੋ ਛਲ਼ਾਰਮ੍ਮਣਵਿਜਾਨਨਲਕ੍ਖਣਾ, ਸਨ੍ਤੀਰਣਾਦਿਰਸਾ, ਤਥਾਭਾਵਪਚ੍ਚੁਪਟ੍ਠਾਨਾ, ਹਦਯਵਤ੍ਥੁਪਦਟ੍ਠਾਨਾਤਿ ਵੇਦਿਤਬ੍ਬਾ. ਤਤ੍ਥ ਪਠਮਾ ਏਕਨ੍ਤਮਿਟ੍ਠਾਰਮ੍ਮਣੇ ਪਵਤ੍ਤਿਸਬ੍ਭਾਵਤੋ ਸੋਮਨਸ੍ਸਯੁਤ੍ਤਾਵ ਹੁਤ੍ਵਾ ਪਞ੍ਚਦ੍ਵਾਰੇ ਸਨ੍ਤੀਰਣਕਿਚ੍ਚਂ ਸਾਧਯਮਾਨਾ ਪਞ੍ਚਸੁ ਦ੍ਵਾਰੇਸੁ ਠਤ੍ਵਾ ਵਿਪਚ੍ਚਤਿ, ਛਸੁ ਪਨ ਦ੍ਵਾਰੇਸੁ ਬਲਵਾਰਮ੍ਮਣੇ ਤਦਾਰਮ੍ਮਣਂ ਹੁਤ੍ਵਾ ਵਿਪਚ੍ਚਤਿ. ਦੁਤਿਯਾ ਪਨ ਇਟ੍ਠਮਜ੍ਝਤ੍ਤਾਰਮ੍ਮਣੇ ਪਵਤ੍ਤਿਸਬ੍ਭਾਵਤੋ ਉਪੇਕ੍ਖਾਸਹਗਤਾ ਹੁਤ੍ਵਾ ਸਨ੍ਤੀਰਣਤਦਾਰਮ੍ਮਣਪਟਿਸਨ੍ਧਿਭਵਙ੍ਗਚੁਤਿਵਸੇਨ ਪਵਤ੍ਤਨਤੋ ਪਞ੍ਚਸੁ ਠਾਨੇਸੁ ਵਿਪਚ੍ਚਤਿ. ਕਥਂ? ਮਨੁਸ੍ਸਲੋਕੇ ਤਾਵ ਜਚ੍ਚਨ੍ਧਜਚ੍ਚਬਧਿਰਜਚ੍ਚਜਲ਼ਜਚ੍ਚੁਮ੍ਮਤ੍ਤਕਪਣ੍ਡਕਉਭਤੋਬ੍ਯਞ੍ਜਨਨਪੁਂਸਕਾਦੀਨਂ ਪਟਿਸਨ੍ਧਿਗ੍ਗਹਣਕਾਲੇ ਪਟਿਸਨ੍ਧਿ ਹੁਤ੍ਵਾ ਵਿਪਚ੍ਚਤਿ. ਪਟਿਸਨ੍ਧਿਯਾ ਵੀਤਿਵਤ੍ਤਾਯ ਪਵਤ੍ਤਿਯਂ ਯਾਵਤਾਯੁਕਂ ਭਵਙ੍ਗਂ ਹੁਤ੍ਵਾ ਵਿਪਚ੍ਚਤਿ. ਇਟ੍ਠਮਜ੍ਝਤ੍ਤੇ ਪਞ੍ਚਾਰਮ੍ਮਣਵੀਥਿਯਾ ਸਨ੍ਤੀਰਣਂ ਹੁਤ੍ਵਾ, ਬਲਵਾਰਮ੍ਮਣੇ ਛਦ੍ਵਾਰੇ ਤਦਾਰਮ੍ਮਣਂ ਹੁਤ੍ਵਾ, ਮਰਣਕਾਲੇ ਚੁਤਿ ਹੁਤ੍ਵਾਤਿ ਇਮੇਸੁ ਪਨ ਪਞ੍ਚਸੁ ਠਾਨੇਸੁ ਵਿਪਚ੍ਚਤੀਤਿ. ਏਵਂ ਤਾਵ ਅਹੇਤੁਕਵਿਪਾਕਚਿਤ੍ਤਾਨਿ ਵੇਦਿਤਬ੍ਬਾਨਿ.
੪੩. ਕਾਮਾਵਚਰਪੁਞ੍ਞਸ੍ਸ, ਵਿਪਾਕਾ ਹੋਨ੍ਤਿ ਸੋਲ਼ਸ;
ਤਂ ਤਿਹੇਤੁਕਪੁਞ੍ਞਸ੍ਸ, ਵਸੇਨ ਪਰਿਦੀਪਯੇ.
ਇਦਾਨਿ ਰੂਪਾਵਚਰਵਿਪਾਕਚਿਤ੍ਤਾਨਿ ਵੁਚ੍ਚਨ੍ਤਿ. ਤਾਨਿ ਨਿਯਤਵਤ੍ਥੁਕਤੋ ਏਕਵਿਧਾਨਿ, ਝਾਨਙ੍ਗਯੋਗਭੇਦਤੋ ਪਞ੍ਚਵਿਧਾਨਿ. ਕਥਂ? ਵਿਤਕ੍ਕਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਠਮਂ, ਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਦੁਤਿਯਂ, ਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਤਤਿਯਂ, ਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਚਤੁਤ੍ਥਂ, ਉਪੇਕ੍ਖਾਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਞ੍ਚਮਨ੍ਤਿ ਇਮਾਨਿ ਪਞ੍ਚਪਿ ਰੂਪਾਵਚਰਵਿਪਾਕਚਿਤ੍ਤਾਨਿ ਉਪਪਤ੍ਤਿਯਂ ਪਟਿਸਨ੍ਧਿਭਵਙ੍ਗਚੁਤਿਵਸੇਨ ਪਵਤ੍ਤਨ੍ਤਿ.
ਇਦਾਨਿ ਅਰੂਪਾਵਚਰਵਿਪਾਕਚਿਤ੍ਤਾਨਿ ਵੁਚ੍ਚਨ੍ਤਿ. ਤਾਨਿ ਸਕਕੁਸਲਾਨਿ ਵਿਯ ਆਰਮ੍ਮਣਭੇਦਤੋ ਚਤੁਬ੍ਬਿਧਾਨਿ ਹੋਨ੍ਤਿ. ਕਥਂ? ਆਕਾਸਾਨਞ੍ਚਾਯਤਨਸਞ੍ਞਾਸਹਗਤਂ, ਵਿਞ੍ਞਾਣਞ੍ਚਾਯਤਨਸਞ੍ਞਾਸਹਗਤਂ, ਆਕਿਞ੍ਚਞ੍ਞਾਯਤਨਸਞ੍ਞਾਸਹਗਤਂ, ਨੇਵਸਞ੍ਞਾਨਾਸਞ੍ਞਾਯਤਨਸਞ੍ਞਾਸਹਗਤਨ੍ਤਿ ਇਮਾਨਿ ਚਤ੍ਤਾਰਿ ਅਰੂਪਾਵਚਰਵਿਪਾਕਚਿਤ੍ਤਾਨਿ.
੪੪. ਕੁਸਲਾਨੁਗਤਂ ਕਤ੍ਵਾ, ਭਾਜਿਤਂ ਕਿਂ ਮਹਗ੍ਗਤਂ;
ਕਾਮਾਵਚਰਪੁਞ੍ਞਂਵ, ਨਾਸਮਾਨਫਲਂ ਯਤੋ.
੪੫. ਅਤ੍ਤਨੋ ਕੁਸਲੇਹੇਵ, ਸਮਾਨਂ ਸਬ੍ਬਥਾ ਇਦਂ;
ਗਜਾਦੀਨਂ ਯਥਾ ਛਾਯਾ, ਗਜਾਦਿਸਦਿਸਾ ਤਥਾ.
੪੬. ਕਾਮਾਵਚਰਪੁਞ੍ਞਂਵ, ਨਾਪਰਾਪਰਿਯਵੇਦਨਂ;
ਝਾਨਾ ਅਪਰਿਹੀਨਸ੍ਸ, ਸਤ੍ਤਸ੍ਸ ਭਵਗਾਮਿਨੋ.
੪੭. ਕੁਸਲਾਨਨ੍ਤਰਂਯੇਵ, ਫਲਂ ਉਪ੍ਪਜ੍ਜਤੀਤਿ ਚ;
ਞਾਪਨਤ੍ਥਂ ਪਨੇਤਸ੍ਸ, ਕੁਸਲਾਨੁਗਤਂ ਕਤਂ.
੪੮. ਪਟਿਪ੍ਪਦਾਕ੍ਕਮੋ ਚੇਵ, ਹੀਨਾਦੀਨਞ੍ਚ ਭੇਦਤੋ;
ਝਾਨਾਗਮਨਤੋ ਚੇਤ੍ਥ, ਵੇਦਿਤਬ੍ਬੋ ਵਿਭਾਵਿਨਾ.
੪੯. ਅਭਾਵੋਧਿਪਤੀਨਞ੍ਚ, ਅਯਮੇਵ ਵਿਸੇਸਕੋ;
ਸੇਸਂ ਸਬ੍ਬਂ ਚ ਸੇਸੇਨ, ਕੁਸਲੇਨ ਸਮਂ ਮਤਂ. –
ਏਵਂ ਰੂਪਾਵਚਰਾਰੂਪਾਵਚਰਵਿਪਾਕਾ ਵੇਦਿਤਬ੍ਬਾ.
ਇਦਾਨਿ ਲੋਕੁਤ੍ਤਰਵਿਪਾਕਚਿਤ੍ਤਾਨਿ ਹੋਨ੍ਤਿ. ਤਾਨਿ ਚਤੁਮਗ੍ਗਯੁਤ੍ਤਚਿਤ੍ਤਫਲਤ੍ਤਾ ਚਤੁਬ੍ਬਿਧਾਨਿ ਹੋਨ੍ਤਿ. ਕਥਂ? ਸੋਤਾਪਤ੍ਤਿਮਗ੍ਗਫਲਚਿਤ੍ਤਂ, ਸਕਦਾਗਾਮਿਮਗ੍ਗਫਲਚਿਤ੍ਤਂ, ਅਨਾਗਾਮਿਮਗ੍ਗਫਲਚਿਤ੍ਤਂ, ਅਰਹਤ੍ਤਮਗ੍ਗਫਲਚਿਤ੍ਤਨ੍ਤਿ. ਏਵਂ ਪਨੇਤ੍ਥ ਏਕੇਕਂ ਝਾਨਙ੍ਗਯੋਗਭੇਦਤੋ ਪਞ੍ਚਵਿਧਂ, ਪੁਨ ਮਗ੍ਗਵੀਥਿਫਲਸਮਾਪਤ੍ਤਿਵਸੇਨ ਪਵਤ੍ਤਿਤੋ ਦੁਵਿਧਂ. ਏਵਂ ਲੋਕੁਤ੍ਤਰਕੁਸਲਵਿਪਾਕਚਿਤ੍ਤਾਨਿ ਵੇਦਿਤਬ੍ਬਾਨਿ.
੫੦. ਸੁਞ੍ਞਤਂ ਅਨਿਮਿਤ੍ਤਨ੍ਤਿ, ਤਥਾਪਣਿਹਿਤਨ੍ਤਿਪਿ;
ਏਤਾਨਿ ਤੀਣਿ ਨਾਮਾਨਿ, ਮਗ੍ਗਸ੍ਸਾਨਨ੍ਤਰੇ ਫਲੇ.
੫੧. ਲਬ੍ਭਨ੍ਤਿ ਪਰਭਾਗਸ੍ਮਿਂ, ਵਲ਼ਞ੍ਜਨਫਲੇਸੁ ਨ;
ਵਿਪਸ੍ਸਨਾਵਸੇਨੇਵ, ਤਾਨਿ ਨਾਮਾਨਿ ਲਬ੍ਭਰੇ.
੫੨. ਹੋਨ੍ਤਿ ਸਾਧਿਪਤੀਨੇਵ, ਲੋਕੁਤ੍ਤਰਫਲਾਨਿ ਤੁ;
ਵਿਪਾਕੇਧਿਪਤੀ ਨਤ੍ਥਿ, ਠਪੇਤ੍ਵਾ ਤੁ ਅਨਾਸਵੇ.
੫੩. ਅਤ੍ਤਨੋ ਮਗ੍ਗਭਾਵੇਨ, ਮਗ੍ਗੋ ‘‘ਮਗ੍ਗੋ’’ਤਿ ਵੁਚ੍ਚਤਿ;
ਫਲਂ ਮਗ੍ਗਮੁਪਾਦਾਯ, ਮਗ੍ਗੋ ਨਾਮਾਤਿ ਵੁਚ੍ਚਤਿ. –
ਏਵਂ ਲੋਕੁਤ੍ਤਰਵਿਪਾਕਾ ਵੇਦਿਤਬ੍ਬਾ.
ਇਦਾਨਿ ਸਤ੍ਤਾਕੁਸਲਵਿਪਾਕਾਨਿ ਵੁਚ੍ਚਨ੍ਤਿ. ਅਕੁਸਲਵਿਪਾਕਂ ਉਪੇਕ੍ਖਾਸਹਗਤਂ ਚਕ੍ਖੁਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਸੋਤਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਘਾਨਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਜਿਵ੍ਹਾਵਿਞ੍ਞਾਣਂ, ਦੁਕ੍ਖਸਹਗਤਂ ਕਾਯਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਅਹੇਤੁਕਮਨੋਧਾਤੁਸਮ੍ਪਟਿਚ੍ਛਨਂ, ਉਪੇਕ੍ਖਾਸਹਗਤਂ ਅਹੇਤੁਕਮਨੋਵਿਞ੍ਞਾਣਧਾਤੁਸਨ੍ਤੀਰਣਨ੍ਤਿ ਇਮਾਨਿ ਸਤ੍ਤ ਅਕੁਸਲਵਿਪਾਕਚਿਤ੍ਤਾਨਿ.
ਏਤ੍ਥ ਪਨ ਉਪੇਕ੍ਖਾਸਹਗਤਾਹੇਤੁਕਮਨੋਵਿਞ੍ਞਾਣਧਾਤੁ ਏਕਾਦਸਵਿਧੇਨਾਪਿ ਅਕੁਸਲਚਿਤ੍ਤੇਨ ਕਮ੍ਮੇ ਆਯੂਹਿਤੇ ਕਮ੍ਮਕਮ੍ਮਨਿਮਿਤ੍ਤਗਤਿਨਿਮਿਤ੍ਤੇਸੁ ਅਞ੍ਞਤਰਂ ਆਰਮ੍ਮਣਂ ਕਤ੍ਵਾ ਚਤੂਸੁ ਅਪਾਯੇਸੁ ਪਟਿਸਨ੍ਧਿ ਹੁਤ੍ਵਾ ਵਿਪਚ੍ਚਤਿ, ਪਟਿਸਨ੍ਧਿਯਾ ਵੀਤਿਵਤ੍ਤਾਯ ਦੁਤਿਯਚਿਤ੍ਤਵਾਰਂ ਤਤੋ ਪਟ੍ਠਾਯ ਯਾਵਤਾਯੁਕਂ ਭਵਙ੍ਗਂ ਹੁਤ੍ਵਾ, ਅਨਿਟ੍ਠਮਜ੍ਝਤ੍ਤਾਰਮ੍ਮਣਾਯ ਪਞ੍ਚਵਿਞ੍ਞਾਣਵੀਥਿਯਾ ਸਨ੍ਤੀਰਣਂ ਹੁਤ੍ਵਾ, ਬਲਵਾਰਮ੍ਮਣੇ ਛਸੁ ਦ੍ਵਾਰੇਸੁ ਤਦਾਰਮ੍ਮਣਂ ਹੁਤ੍ਵਾ, ਮਰਣਕਾਲੇ ਚੁਤਿ ਹੁਤ੍ਵਾ ਵਿਪਚ੍ਚਤਿ. ਏਵਂ ਪਞ੍ਚਸੁ ਠਾਨੇਸੁ ਵਿਪਚ੍ਚਤਿ. ਕੇਵਲਂ ਹਿ ਤਾਨਿ ਕੁਸਲਵਿਪਾਕਾਹੇਤੁਕਚਿਤ੍ਤਾਨਿ ਕੁਸਲਕਮ੍ਮਪਚ੍ਚਯਾਨਿ, ਇਮਾਨਿ ਅਕੁਸਲਕਮ੍ਮਪਚ੍ਚਯਾਨਿ. ਅਯਮਿਮੇਸਂ, ਤੇਸਞ੍ਚ ਵਿਸੇਸੋ.
੫੪. ਅਨਿਟ੍ਠਾਨਿਟ੍ਠਮਜ੍ਝਤ੍ਤਗੋਚਰੇ ਵਤ੍ਤਰੇ ਇਮੇ;
ਸੁਖਾਦਿਤ੍ਤਯਯੁਤ੍ਤਾ ਤੇ, ਦੁਕ੍ਖੁਪੇਕ੍ਖਾਯੁਤਾ ਇਮੇ.
ਏਵਂ ਕਾਮਾਵਚਰਕੁਸਲਵਿਪਾਕਸਹੇਤੁਕਮਟ੍ਠਵਿਧਂ, ਅਹੇਤੁਕਮਟ੍ਠਵਿਧਂ, ਝਾਨਙ੍ਗਯੋਗਭੇਦਤੋ ਰੂਪਾਵਚਰਵਿਪਾਕਂ ਪਞ੍ਚਵਿਧਂ, ਆਰਮ੍ਮਣਭੇਦਤੋ ਅਰੂਪਾਵਚਰਵਿਪਾਕਂ ਚਤੁਬ੍ਬਿਧਂ, ਮਗ੍ਗਸਮ੍ਪਯੁਤ੍ਤਚਿਤ੍ਤਫਲਭੇਦਤੋ ਲੋਕੁਤ੍ਤਰਵਿਪਾਕਂ ਚਤੁਬ੍ਬਿਧਂ, ਚਕ੍ਖੁਵਿਞ੍ਞਾਣਾਦਿਭੇਦਤੋ ਅਕੁਸਲਵਿਪਾਕਂ ਸਤ੍ਤਵਿਧਨ੍ਤਿ ਛਤ੍ਤਿਂਸਵਿਧਂ ਵਿਪਾਕਚਿਤ੍ਤਂ ਵੇਦਿਤਬ੍ਬਂ.
੫੫. ਏਵਂ ਛਤ੍ਤਿਂਸਧਾ ਪਾਕਂ, ਪਾਕਸਾਸਨਪੂਜਿਤੋ;
ਸਵਿਪਾਕਾਵਿਪਾਕੇਸੁ, ਕੁਸਲੋ ਸੁਗਤੋਬ੍ਰਵਿ.
ਕਿਰਿਯਾਬ੍ਯਾਕਤਚਿਤ੍ਤਂ ਪਨ ਅਵਿਪਾਕਤੋ ਏਕਵਿਧਂ, ਪਰਿਤ੍ਤਮਹਗ੍ਗਤਤੋ ਦੁਵਿਧਂ, ਕਾਮਾਵਚਰਰੂਪਾਵਚਰਅਰੂਪਾਵਚਰਭੂਮਿਭੇਦਤੋ ਤਿਵਿਧਂ. ਤਤ੍ਥ ਕਾਮਾਵਚਰਂ ਦੁਵਿਧਂ ਸਹੇਤੁਕਮਹੇਤੁਕਨ੍ਤਿ. ਤਤ੍ਥ ਸਹੇਤੁਕਂ ਏਕਵਿਧਂ ਅਰਹਤੋ ਏਵ ਉਪ੍ਪਜ੍ਜਨਤੋ. ਸੋਮਨਸ੍ਸੁਪੇਕ੍ਖਾਞਾਣਪ੍ਪਯੋਗਭੇਦਤੋ ਕਾਮਾਵਚਰਕੁਸਲਂ ਵਿਯ ਅਟ੍ਠਵਿਧਂ ਹੋਤਿ. ਸੇਯ੍ਯਥਿਦਂ – ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਿਕਂ, ਸਸਙ੍ਖਾਰਿਕਂ, ਸੋਮਨਸ੍ਸਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਿਕਂ, ਸਸਙ੍ਖਾਰਿਕਂ, ਉਪੇਕ੍ਖਾਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਿਕਂ, ਸਸਙ੍ਖਾਰਿਕਂ, ਉਪੇਕ੍ਖਾਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਿਕਂ, ਸਸਙ੍ਖਾਰਿਕਨ੍ਤਿ ਇਮਾਨਿ ਅਟ੍ਠ ਸਹੇਤੁਕਕਿਰਿਯਚਿਤ੍ਤਾਨਿ. ਏਤਾਨਿ ਪਨ ਯਥਾਨੁਰੂਪਂ ਦਾਨਾਦਿਵਸੇਨ ਖੀਣਾਸਵਾਨਂਯੇਵ ਪਵਤ੍ਤਨ੍ਤਿ. ਏਵਂ ਸਹੇਤੁਕਕਿਰਿਯਚਿਤ੍ਤਾਨਿ ਵੇਦਿਤਬ੍ਬਾਨਿ.
ਅਹੇਤੁਕਕਿਰਿਯਚਿਤ੍ਤਂ ਪਨ ਤਿਵਿਧਂ ਕਿਰਿਯਾਹੇਤੁਕਮਨੋਧਾਤੁਉਪੇਕ੍ਖਾਸਹਗਤਾਵਜ੍ਜਨਚਿਤ੍ਤਂ, ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁਸੋਮਨਸ੍ਸਸਹਗਤਂ ਹਸਿਤੁਪ੍ਪਾਦਚਿਤ੍ਤਂ, ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁਉਪੇਕ੍ਖਾਸਹਗਤਂ ਵੋਟ੍ਠਬ੍ਬਨਚਿਤ੍ਤਨ੍ਤਿ.
ਤਤ੍ਥ ਕਿਰਿਯਾਹੇਤੁਕਮਨੋਧਾਤੁ ਉਪੇਕ੍ਖਾਸਹਗਤਾ ਹਦਯਵਤ੍ਥੁਂ ਨਿਸ੍ਸਾਯ ਚਕ੍ਖੁਦ੍ਵਾਰੇ ਇਟ੍ਠਇਟ੍ਠਮਜ੍ਝਤ੍ਤਅਨਿਟ੍ਠਅਨਿਟ੍ਠਮਜ੍ਝਤ੍ਤੇਸੁ ਰੂਪਾਰਮ੍ਮਣੇਸੁ ਯੇਨ ਕੇਨਚਿ ਪਸਾਦੇ ਘਟ੍ਟਿਤੇ ਤਂ ਤਂ ਆਰਮ੍ਮਣਂ ਗਹੇਤ੍ਵਾ ਆਵਜ੍ਜਨਵਸੇਨ ਚਕ੍ਖੁਵਿਞ੍ਞਾਣਸ੍ਸ ਪੁਰੇਚਾਰੀ ਹੁਤ੍ਵਾ ਭਵਙ੍ਗਂ ਆਵਟ੍ਟਯਮਾਨਾ ਉਪ੍ਪਜ੍ਜਤਿ. ਸੋਤਦ੍ਵਾਰਾਦੀਸੁਪਿ ਏਸੇਵ ਨਯੋ. ਇਤਰਾ ਪਨ ਦ੍ਵੇ ਅਹੇਤੁਕਮਨੋਵਿਞ੍ਞਾਣਧਾਤੁਯੋ ਸਾਧਾਰਣਾਸਾਧਾਰਣਾਤਿ ਦੁਵਿਧਾ ਹੋਨ੍ਤਿ. ਤਤ੍ਥ ਅਸਾਧਾਰਣਾ ਪਨ ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁ ਸੋਮਨਸ੍ਸਸਹਗਤਾ ਖੀਣਾਸਵਸ੍ਸੇਵ ਛਸੁ ਦ੍ਵਾਰੇਸੁ ਛਸੁ ਅਨੁਲ਼ਾਰੇਸੁ ਆਰਮ੍ਮਣੇਸੁ ਹਸਿਤੁਪ੍ਪਾਦਕਿਚ੍ਚਾ ਨਿਯਤਵਤ੍ਥੁਕਾ ਉਪ੍ਪਜ੍ਜਤਿ. ਸਾਧਾਰਣਾ ਪਨ ਅਹੇਤੁਕਮਨੋਵਿਞ੍ਞਾਣਧਾਤੁ ਉਪੇਕ੍ਖਾਸਹਗਤਾ ਛਲ਼ਾਰਮ੍ਮਣਵਿਜਾਨਨਲਕ੍ਖਣਾ, ਤਥਾਭਾਵਪਚ੍ਚੁਪਟ੍ਠਾਨਾ, ਸਾ ਤੀਸੁ ਭਵੇਸੁ ਸਬ੍ਬੇਸਂ ਸਚਿਤ੍ਤਕਸਤ੍ਤਾਨਂ ਸਾਧਾਰਣਾ, ਨ ਕਸ੍ਸਚਿ ਪਨ ਸਚਿਤ੍ਤਕਸ੍ਸ ਨ ਉਪ੍ਪਜ੍ਜਤਿ ਨਾਮ. ਉਪ੍ਪਜ੍ਜਮਾਨਾ ਪਨਾਯਂ ਪਞ੍ਚਦ੍ਵਾਰਮਨੋਦ੍ਵਾਰੇਸੁ ਵੋਟ੍ਠਬ੍ਬਨਾਵਜ੍ਜਨਕਿਚ੍ਚਾ ਉਪ੍ਪਜ੍ਜਤਿ. ਛ ਅਸਾਧਾਰਣਞਾਣਾਨਿਪਿ ਏਤਾਯ ਗਹਿਤਾਰਮ੍ਮਣਮੇਵ ਗਣ੍ਹਨ੍ਤਿ. ਸਬ੍ਬਾਰਮ੍ਮਣਗਹਣਸਮਤ੍ਥਤਾਯ ਸਬ੍ਬਞ੍ਞੁਤਞ੍ਞਾਣਗਤਿਕਾਤਿ ਵੇਦਿਤਬ੍ਬਾ. ਇਮਾਨਿ ਤੀਣਿ ਅਹੇਤੁਕਕਿਰਿਯਚਿਤ੍ਤਾਨਿ.
ਇਧ ਠਤ੍ਵਾ ਹਸਨਚਿਤ੍ਤਾਨਿ ਪਰਿਗ੍ਗਣ੍ਹਿਤਬ੍ਬਾਨਿ. ਤੇਰਸ ਹਸਨਚਿਤ੍ਤਾਨਿ. ਕੁਸਲਤੋ ਚਤੂਹਿ ਸੋਮਨਸ੍ਸਸਹਗਤੇਹਿ, ਅਕੁਸਲਤੋ ਚਤੂਹੀਤਿ ਇਮੇਹਿ ਅਟ੍ਠਹਿ ਚਿਤ੍ਤੇਹਿ ਪੁਥੁਜ੍ਜਨਾ ਹਸਨ੍ਤਿ, ਸੇਖਾ ਪਨ ਕੁਸਲਤੋ ਚਤੂਹਿ, ਅਕੁਸਲਤੋ ਦ੍ਵੀਹਿ ਦਿਟ੍ਠਿਗਤਵਿਪ੍ਪਯੁਤ੍ਤਸੋਮਨਸ੍ਸਸਹਗਤੇਹੀਤਿ ਛਹਿ ਹਸਨ੍ਤਿ, ਖੀਣਾਸਵਾ ਕਿਰਿਯਤੋ ਪਞ੍ਚਹਿ ਸੋਮਨਸ੍ਸਸਹਗਤੇਹਿ ਹਸਨ੍ਤੀਤਿ.
੫੬. ਸੋਮਨਸ੍ਸਯੁਤਾਨਟ੍ਠ, ਕੁਸਲਾਕੁਸਲਾਨਿ ਚ;
ਕ੍ਰਿਯਤੋ ਪਨ ਪਞ੍ਚੇਵਂ, ਹਾਸਚਿਤ੍ਤਾਨਿ ਤੇਰਸ.
੫੭. ਪੁਥੁਜ੍ਜਨਾ ਹਸਨ੍ਤੇਤ੍ਥ, ਚਿਤ੍ਤੇਹਿ ਪਨ ਅਟ੍ਠਹਿ;
ਛਹਿ ਸੇਖਾ ਅਸੇਖਾ ਚ, ਹਸਨ੍ਤਿ ਪਨ ਪਞ੍ਚਹਿ.
ਇਦਾਨਿ ਰੂਪਾਵਚਰਕਿਰਿਯਚਿਤ੍ਤਾਨਿ ਹੋਨ੍ਤਿ. ਵਿਤਕ੍ਕਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਠਮਂ, ਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਦੁਤਿਯਂ, ਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਤਤਿਯਂ, ਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਚਤੁਤ੍ਥਂ, ਉਪੇਕ੍ਖਾਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਞ੍ਚਮਨ੍ਤਿ ਇਮਾਨਿ ਪਞ੍ਚ ਰੂਪਾਵਚਰਕਿਰਿਯਚਿਤ੍ਤਾਨਿ.
ਇਦਾਨਿ ਅਰੂਪਾਵਚਰਕਿਰਿਯਚਿਤ੍ਤਾਨਿ ਵੁਚ੍ਚਨ੍ਤਿ. ਆਕਾਸਾਨਞ੍ਚਾਯਤਨਸਞ੍ਞਾਸਹਗਤਂ, ਵਿਞ੍ਞਾਣਞ੍ਚਾਯਤਨਸਞ੍ਞਾਸਹਗਤਂ, ਆਕਿਞ੍ਚਞ੍ਞਾਯਤਨਸਞ੍ਞਾਸਹਗਤਂ, ਨੇਵਸਞ੍ਞਾਨਾਸਞ੍ਞਾਯਤਨਸਞ੍ਞਾਸਹਗਤਨ੍ਤਿ ਇਮਾਨਿ ਚਤ੍ਤਾਰਿ ਅਰੂਪਾਵਚਰਕਿਰਿਯਚਿਤ੍ਤਾਨਿ. ਇਮਾਨਿ ਪਨ ਰੂਪਾਰੂਪਕਿਰਿਯਚਿਤ੍ਤਾਨਿ ਸਕਸਕਭੂਮਿਕੁਸਲਸਦਿਸਾਨਿ. ਕੇਵਲਂ ਪਨੇਤਾਨਿ ਕਿਰਿਯਚਿਤ੍ਤਾਨਿ ਖੀਣਾਸਵਾਨਂਯੇਵ ਉਪ੍ਪਜ੍ਜਨ੍ਤਿ, ਕੁਸਲਾਨਿ ਪਨ ਸੇਖਪੁਥੁਜ੍ਜਨਾਨਂ. ਇਮਾਨਿ ਚ ਖੀਣਾਸਵਾਨਂ ਭਾਵਨਾਕਾਰਵਸਪ੍ਪਵਤ੍ਤਾਨਿ, ਤਾਨਿ ਪਨ ਸੇਖਪੁਥੁਜ੍ਜਨਾਨਂ ਭਾਵਨਾਪੁਞ੍ਞਵਸਪ੍ਪਵਤ੍ਤਾਨੀਤਿ ਅਯਮੇਵ ਇਮੇਸਂ, ਤੇਸਞ੍ਚ ਵਿਸੇਸੋ.