੧੮. ਅਟ੍ਠਾਰਸਮੋ ਪਰਿਚ੍ਛੇਦੋ

ਦਿਟ੍ਠਿਵਿਸੁਦ੍ਧਿਨਿਦ੍ਦੇਸੋ

੧੧੭੦. ਸਮਾਧਿਂ ਪਨ ਸਾਭਿਞ੍ਞਂ, ਭਾਵੇਤ੍ਵਾ ਤਦਨਨ੍ਤਰਂ;

ਭਾਵੇਤਬ੍ਬਾ ਯਤੋ ਪਞ੍ਞਾ, ਭਿਕ੍ਖੁਨਾ ਤੇਨ ਧੀਮਤਾ.

੧੧੭੧. ਤਤੋਹਂ ਦਾਨਿ ਵਕ੍ਖਾਮਿ, ਪਞ੍ਞਾਭਾਵਨਮੁਤ੍ਤਮਂ;

ਸਮਾਸੇਨੇਵ ਭਿਕ੍ਖੂਨਂ, ਪਰਂ ਪੀਤਿਸੁਖਾਵਹਂ.

੧੧੭੨. ਕਾ ਪਞ੍ਞਾ ਪਨ ਕੋ ਚਤ੍ਥੋ,

ਕਿਮਸ੍ਸਾ ਲਕ੍ਖਣਾਦਿਕਂ;

ਕਤਿਧਾ ਸਾ ਕਥਂ ਤੇਨ,

ਭਾਵੇਤਬ੍ਬਾਤਿ ਵੁਚ੍ਚਤੇ. –

੧੧੭੩. ਪਞ੍ਞਾ ਵਿਪਸ੍ਸਨਾਪਞ੍ਞਾ, ਪੁਞ੍ਞਚਿਤ੍ਤਸਮਾਯੁਤਾ;

ਪਜਾਨਾਤੀਤਿ ਪਞ੍ਞਾ ਸਾ, ਜਾਨਨਾ ਵਾ ਪਕਾਰਤੋ.

੧੧੭੪. ਸਞ੍ਞਾਵਿਞ੍ਞਾਣਪਞ੍ਞਾਨਂ, ਕੋ ਵਿਸੇਸੋ ਕਿਮਨ੍ਤਰਂ;

ਸਞ੍ਞਾਵਿਞ੍ਞਾਣਪਞ੍ਞਾਨਂ, ਜਾਨਨਤ੍ਤੇ ਸਮੇਪਿ ਚ.

੧੧੭੫. ਯਾ ਸਞ੍ਜਾਨਨਮਤ੍ਤਂਵ, ਸਞ੍ਞਾ ਨੀਲਾਦਿਤੋ ਪਨ;

ਲਕ੍ਖਣਪ੍ਪਟਿਵੇਧਂ ਤੁ, ਕਾਤੁਂ ਸਕ੍ਕੋਤਿ ਨੇਵ ਸਾ.

੧੧੭੬. ਵਿਞ੍ਞਾਣਂ ਪਨ ਜਾਨਾਤਿ, ਨੀਲਪੀਤਾਦਿਗੋਚਰਂ;

ਸਕ੍ਕੋਤਿਪਿ ਅਨਿਚ੍ਚਾਦਿਲਕ੍ਖਣਂ ਪਟਿਵਿਜ੍ਝਿਤੁਂ.

੧੧੭੭. ਉਸ੍ਸਕ੍ਕਿਤ੍ਵਾ ਨ ਸਕ੍ਕੋਤਿ, ਮਗ੍ਗਂ ਪਾਪੇਤੁਮੇਵ ਤਂ;

ਪਞ੍ਞਾ ਵੁਤ੍ਤਨਯਂ ਕਾਤੁਂ, ਸਕ੍ਕੋਤਿ ਤਿਵਿਧਮ੍ਪਿ ਤਂ.

੧੧੭੮. ਇਮੇਸਂ ਪਨ ਤਿਣ੍ਣਮ੍ਪਿ, ਵਿਸੇਸੋ ਸਮੁਦੀਰਿਤੋ;

ਸਬ੍ਬੇਸਂ ਪਨ ਧਮ੍ਮਾਨਂ, ਸਭਾਵਪਟਿਵੇਧਨਂ.

੧੧੭੯. ਲਕ੍ਖਣਂ ਪਨ ਪਞ੍ਞਾਯ, ਲਕ੍ਖਣਞ੍ਞੂਹਿ ਦੀਪਿਤਂ;

ਸਮ੍ਮੋਹਨਨ੍ਧਕਾਰਸ੍ਸ, ਵਿਦ੍ਧਂਸਨਰਸਾ ਮਤਾ.

੧੧੮੦. ਅਸਮ੍ਮੋਹਪਚ੍ਚੁਪਟ੍ਠਾਨਾ, ਸਮਾਧਾਸਨ੍ਨਕਾਰਣਾ;

ਏਵਮੇਤ੍ਥ ਚ ਵਿਞ੍ਞੇਯ੍ਯਾ, ਪਞ੍ਞਾਯ ਲਕ੍ਖਣਾਦਿਕਾ.

ਕਤਿਧਾਤਿ ਏਤ੍ਥ –

੧੧੮੧. ਲਕ੍ਖਣੇਨੇਕਧਾ ਵੁਤ੍ਤਾ,

ਲੋਕਿਕਾਲੋਕਿਕਾ ਦ੍ਵਿਧਾ;

ਲੋਕਿਯੇਨੇਤ੍ਥ ਮਗ੍ਗੇਨ,

ਯੁਤ੍ਤਾ ਸਾ ਲੋਕਿਕਾ ਸਿਯਾ.

੧੧੮੨. ਲੋਕੁਤ੍ਤਰੇਨ ਮਗ੍ਗੇਨ, ਯੁਤ੍ਤਾ ਲੋਕੁਤ੍ਤਰਾ ਮਤਾ;

ਤਿਵਿਧਾਪਿ ਸਿਯਾ ਪਞ੍ਞਾ, ਚਿਨ੍ਤਾਸੁਤਮਯਾਦਿਤੋ.

੧੧੮੩. ਤਤ੍ਥਤ੍ਤਨੋਵ ਚਿਨ੍ਤਾਯ, ਨਿਪ੍ਫਨ੍ਨਤ੍ਤਾਤਿ ਤਸ੍ਸ ਸਾ;

ਹੋਤਿ ਚਿਨ੍ਤਾਮਯਾ ਪਞ੍ਞਾ, ਭੂਰਿਪਞ੍ਞੇਨ ਦੇਸਿਤਾ.

੧੧੮੪. ਪਰਤੋ ਪਨ ਸੁਤ੍ਵਾਨ, ਲਦ੍ਧਾ ਪਞ੍ਞਾ ਅਯਂ ਇਧ;

ਸੁਤੇਨੇਵ ਚ ਨਿਪ੍ਫਨ੍ਨਾ, ਪਞ੍ਞਾ ਸੁਤਮਯਾ ਮਤਾ.

੧੧੮੫. ਯਥਾ ਵਾਪਿ ਤਥਾ ਚੇਤ੍ਥ, ਭਾਵਨਾਯ ਵਸੇਨ ਤੁ;

ਨਿਪ੍ਫਨ੍ਨਾ ਅਪ੍ਪਨਾਪਤ੍ਤਾ, ਪਞ੍ਞਾ ਸਾ ਭਾਵਨਾਮਯਾ.

੧੧੮੬. ਪਟਿਸਮ੍ਭਿਦਾਚਤੁਕ੍ਕਸ੍ਸ, ਵਸੇਨ ਚਤੁਧਾ ਸਿਯਾ;

ਅਤ੍ਥਧਮ੍ਮਨਿਰੁਤ੍ਤੀਸੁ, ਞਾਣਂ ਞਾਣੇਸੁ ਤੀਸੁਪਿ.

੧੧੮੭. ਯਂ ਕਿਞ੍ਚਿ ਪਚ੍ਚਯੁਪ੍ਪਨ੍ਨਂ, ਵਿਪਾਕਾ ਚ ਕ੍ਰਿਯਾ ਤਥਾ;

ਨਿਬ੍ਬਾਨਂ ਭਾਸਿਤਤ੍ਥੋ ਚ, ਪਞ੍ਚੇਤੇ ਅਤ੍ਥਸਞ੍ਞਿਤਾ.

੧੧੮੮. ਫਲਨਿਬ੍ਬਤ੍ਤਕੋ ਹੇਤੁ, ਅਰਿਯਮਗ੍ਗੋ ਚ ਭਾਸਿਤਂ;

ਕੁਸਲਾਕੁਸਲਞ੍ਚੇਤਿ, ਪਞ੍ਚੇਤੇ ਧਮ੍ਮਸਞ੍ਞਿਤਾ.

੧੧੮੯. ਤਸ੍ਮਿਂ ਅਤ੍ਥੇ ਚ ਧਮ੍ਮੇ ਚ, ਯਾ ਸਭਾਵਨਿਰੁਤ੍ਤਿ ਤੁ;

ਨਿਰੁਤ੍ਤੀਤਿ ਚ ਨਿਦ੍ਦਿਟ੍ਠਾ, ਨਿਰੁਤ੍ਤਿਕੁਸਲੇਨ ਸਾ.

੧੧੯੦. ਞਾਣਂ ਆਰਮ੍ਮਣਂ ਕਤ੍ਵਾ, ਤਿਵਿਧਂ ਪਚ੍ਚਵੇਕ੍ਖਤੋ;

ਤੇਸੁ ਞਾਣੇਸੁ ਯਂ ਞਾਣਂ, ਪਟਿਭਾਨਨ੍ਤਿ ਤਂ ਮਤਂ.

੧੧੯੧. ਪਰਿਯਤ੍ਤਿਪਰਿਪੁਚ੍ਛਾਹਿ, ਸਵਨਾਧਿਗਮੇਹਿ ਚ;

ਪੁਬ੍ਬਯੋਗੇਨ ਗਚ੍ਛਨ੍ਤਿ, ਪਭੇਦਂ ਪਟਿਸਮ੍ਭਿਦਾ.

ਕਥਂ ਭਾਵੇਤਬ੍ਬਾਤਿ ਏਤ੍ਥ –

੧੧੯੨. ਖਨ੍ਧਾਦੀਸੁ ਹਿ ਧਮ੍ਮੇਸੁ, ਭੂਮਿਭੂਤੇਸੁ ਯੋਗਿਨਾ;

ਉਗ੍ਗਹਾਦਿਵਸੇਨੇਤ੍ਥ, ਕਤ੍ਵਾ ਪਰਿਚਯਂ ਪਨ.

੧੧੯੩. ਸੀਲਂ ਚਿਤ੍ਤਵਿਸੁਦ੍ਧਿਞ੍ਚ, ਸਮ੍ਪਾਦੇਤ੍ਵਾ ਤਤੋ ਪਰਂ;

ਦਿਟ੍ਠਿਸੁਦ੍ਧਾਦਯੋ ਪਞ੍ਚ, ਸਮ੍ਪਾਦੇਨ੍ਤੇਨ ਸੁਦ੍ਧਿਯਾ.

੧੧੯੪. ਤਾਯ ਪਞ੍ਞਾਯ ਯੁਤ੍ਤੇਨ, ਭੀਤੇਨ ਜਨਨਾਦਿਤੋ;

ਭਾਵੇਤਬ੍ਬਾ ਭਵਾਭਾਵਂ, ਪਤ੍ਥਯਨ੍ਤੇਨ ਭਿਕ੍ਖੁਨਾ.

੧੧੯੫. ਰੂਪਞ੍ਚ ਵੇਦਨਾ ਸਞ੍ਞਾ, ਸਙ੍ਖਾਰਾ ਚੇਵ ਸਬ੍ਬਸੋ;

ਵਿਞ੍ਞਾਣਞ੍ਚੇਤਿ ਪਞ੍ਚੇਤੇ, ਖਨ੍ਧਾ ਸਮ੍ਬੁਦ੍ਧਦੇਸਿਤਾ.

੧੧੯੬. ਤਤ੍ਥ ਯਂ ਕਿਞ੍ਚਿ ਰੂਪਂ ਤਂ, ਅਤੀਤਾਨਾਗਤਾਦਿਕਂ;

ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ, ਸੁਖੁਮੋਲ਼ਾਰਿਕਮ੍ਪਿ ਵਾ.

੧੧੯੭. ਹੀਨਂ ਵਾਪਿ ਪਣੀਤਂ ਵਾ, ਯਂ ਦੂਰੇ ਯਞ੍ਚ ਸਨ੍ਤਿਕੇ;

ਸਬ੍ਬਂ ਤਮੇਕਤੋ ਕਤ੍ਵਾ, ਰੂਪਕ੍ਖਨ੍ਧੋਤਿ ਵੁਚ੍ਚਤਿ.

੧੧੯੮. ਇਤਰੇਸੁਪਿ ਯਂ ਕਿਞ੍ਚਿ, ਤਂ ਵੇਦਯਿਤਲਕ੍ਖਣਂ;

ਸਬ੍ਬਂ ਤਮੇਕਤੋ ਕਤ੍ਵਾ, ਵੇਦਨਾਕ੍ਖਨ੍ਧਤਾ ਕਤਾ.

੧੧੯੯. ਚਿਤ੍ਤਜਂ ਪਨ ਯਂ ਕਿਞ੍ਚਿ, ਤਂ ਸਞ੍ਜਾਨਨਲਕ੍ਖਣਂ;

ਸਬ੍ਬਂ ਤਮੇਕਤੋ ਕਤ੍ਵਾ, ਸਞ੍ਞਾਕ੍ਖਨ੍ਧੋਤਿ ਵੁਚ੍ਚਤਿ.

੧੨੦੦. ਯਂ ਕਿਞ੍ਚਿ ਚਿਤ੍ਤਸਮ੍ਭੂਤਂ, ਅਭਿਸਙ੍ਖਾਰਲਕ੍ਖਣਂ;

ਸਬ੍ਬਂ ਤਮੇਕਤੋ ਕਤ੍ਵਾ, ਸਙ੍ਖਾਰਕ੍ਖਨ੍ਧਤਾ ਕਤਾ.

੧੨੦੧. ਤਤ੍ਥ ਚਿਤ੍ਤਂ ਤੁ ਯਂ ਕਿਞ੍ਚਿ, ਤਂ ਵਿਜਾਨਨਲਕ੍ਖਣਂ;

ਸਬ੍ਬਂ ਤਮੇਕਤੋ ਕਤ੍ਵਾ, ਵਿਞ੍ਞਾਣਕ੍ਖਨ੍ਧਤਾ ਕਤਾ.

੧੨੦੨. ਚਤ੍ਤਾਰੋ ਚ ਮਹਾਭੂਤਾ, ਉਪਾਦਾ ਚਤੁਵੀਸਤਿ;

ਅਟ੍ਠਵੀਸਤਿਧਾ ਚੇਤਂ, ਰੂਪਂ ਰੂਪਨ੍ਤਿ ਗਣ੍ਹਤਿ.

੧੨੦੩. ਏਕਾਸੀਤਿਯਾ ਚਿਤ੍ਤੇਨ, ਸਂਯੁਤ੍ਤਾ ਵੇਦਨਾਦਯੋ;

ਵੇਦਨਾਸਞ੍ਞਾਸਙ੍ਖਾਰ-ਵਿਞ੍ਞਾਣਕ੍ਖਨ੍ਧਸਞ੍ਞਿਤਾ.

੧੨੦੪. ਚਤ੍ਤਾਰੋਰੂਪਿਨੋ ਖਨ੍ਧੇ, ਨਾਮਨ੍ਤਿ ਪਰਿਗਣ੍ਹਤਿ;

ਰੂਪਕ੍ਖਨ੍ਧੋ ਭਵੇ ਰੂਪਂ, ਨਾਮਕ੍ਖਨ੍ਧਾ ਅਰੂਪਿਨੋ.

੧੨੦੫. ਰੁਪ੍ਪਨਲਕ੍ਖਣਂ ਰੂਪਂ, ਨਾਮਂ ਨਮਨਲਕ੍ਖਣਂ;

ਇਤਿ ਸਙ੍ਖੇਪਤੋ ਨਾਮ-ਰੂਪਂ ਸੋ ਪਰਿਗਣ੍ਹਤਿ.

੧੨੦੬. ਫਾਲੇਨ੍ਤੋ ਵਿਯ ਤਾਲਸ੍ਸ, ਕਨ੍ਦਂ ਤੁ ਯਮਕਂ ਦ੍ਵਿਧਾ;

ਵਵਤ੍ਥਪੇਤਿ ਨਾਮਞ੍ਚ, ਰੂਪਞ੍ਚਾਤਿ ਦ੍ਵਿਧਾ ਪਨ.

੧੨੦੭. ਨਾਮਤੋ ਰੂਪਤੋ ਅਞ੍ਞੋ,

ਸਤ੍ਤੋ ਵਾ ਪੁਗ੍ਗਲੋਪਿ ਵਾ;

ਅਤ੍ਤਾ ਵਾ ਕੋਚਿ ਨਤ੍ਥੀਤਿ,

ਨਿਟ੍ਠਂ ਗਚ੍ਛਤਿ ਸਬ੍ਬਦਾ.

੧੨੦੮. ਏਵਂ ਵਵਤ੍ਥਪੇਤ੍ਵਾ ਸੋ, ਨਾਮਰੂਪਂ ਸਭਾਵਤੋ;

ਸਤ੍ਤਸਮ੍ਮੋਹਘਾਤਤ੍ਥਂ, ਬਹੁਸੁਤ੍ਤਵਸੇਨਿਧ.

੧੨੦੯. ਨਾਮਰੂਪਮਤ੍ਤਞ੍ਞੇਵ, ਨਤ੍ਥਿ ਕੋਚਿਧ ਪੁਗ੍ਗਲੋ;

ਏਵਮੇਤ੍ਥ ਪਣ੍ਡਿਤੋ ਪੋਸੋ, ਵਵਤ੍ਥਪੇਤਿ ਤਂ ਪਨ.

ਵੁਤ੍ਤਂ ਹੇਤਂ –

੧੨੧੦. ‘‘ਯਥਾਪਿ ਅਙ੍ਗਸਮ੍ਭਾਰਾ,

ਹੋਤਿ ਸਦ੍ਦੋ ਰਥੋ ਇਤਿ;

ਏਵਂ ਖਨ੍ਧੇਸੁ ਸਨ੍ਤੇਸੁ,

ਹੋਤਿ ਸਤ੍ਤੋਤਿ ਸਮ੍ਮੁਤੀ’’ਤਿ.

੧੨੧੧. ਯਥਾਪਿ ਦਾਰੁਯਨ੍ਤਮ੍ਪਿ, ਨਿਜ੍ਜੀਵਞ੍ਚ ਨਿਰੀਹਕਂ;

ਦਾਰੁਰਜ੍ਜੁਸਮਾਯੋਗੇ, ਤਂ ਗਚ੍ਛਤਿਪਿ ਤਿਟ੍ਠਤਿ.

੧੨੧੨. ਤਥੇਦਂ ਨਾਮਰੂਪਮ੍ਪਿ, ਨਿਜ੍ਜੀਵਞ੍ਚ ਨਿਰੀਹਕਂ;

ਅਞ੍ਞਮਞ੍ਞਸਮਾਯੋਗੇ, ਤਂ ਗਚ੍ਛਤਿਪਿ ਤਿਟ੍ਠਤਿ.

ਤੇਨਾਹੁ ਪੋਰਾਣਾ –

੧੨੧੩. ‘‘ਨਾਮਞ੍ਚ ਰੂਪਞ੍ਚ ਇਧਤ੍ਥਿ ਸਚ੍ਚਤੋ,

ਨ ਹੇਤ੍ਥ ਸਤ੍ਤੋ ਮਨੁਜੋ ਚ ਵਿਜ੍ਜਤਿ;

ਸੁਞ੍ਞਂ ਇਦਂ ਯਨ੍ਤਮਿਵਾਭਿਸਙ੍ਖਤਂ,

ਦੁਕ੍ਖਸ੍ਸ ਪੁਞ੍ਜੋ ਤਿਣਕਟ੍ਠਸਾਦਿਸੋ’’ਤਿ.

੧੨੧੪. ਅਞ੍ਞਮਞ੍ਞੂਪਨਿਸ੍ਸਾਯ, ਦਣ੍ਡਕੇਸੁ ਠਿਤੇਸੁ ਹਿ;

ਏਕਸ੍ਮਿਂ ਪਤਮਾਨੇ ਤੁ, ਤਥੇਵ ਪਤਤੀਤਰੋ.

ਤੇਨਾਹੁ ਪੋਰਾਣਾ –

੧੨੧੫. ‘‘ਯਮਕਂ ਨਾਮਰੂਪਞ੍ਚ, ਉਭੋ ਅਞ੍ਞੋਞ੍ਞਨਿਸ੍ਸਿਤਾ;

ਏਕਸ੍ਮਿਂ ਭਿਜ੍ਜਮਾਨਸ੍ਮਿਂ, ਉਭੋ ਭਿਜ੍ਜਨ੍ਤਿ ਪਚ੍ਚਯਾ’’ਤਿ.

੧੨੧੬. ਉਤਿਨ੍ਨਂ ਨਾਮਰੂਪਾਨਂ, ਨਾਮਂ ਨਿਤ੍ਤੇਜਮੇਤ੍ਥ ਤਂ;

ਸਕੇਨੇਵ ਹਿ ਤੇਜੇਨ, ਨ ਸਕ੍ਕੋਤਿ ਪਵਤ੍ਤਿਤੁਂ.

੧੨੧੭. ਨ ਬ੍ਯਾਹਰਤਿ ਨੋ ਸੇਤਿ, ਨ ਤਿਟ੍ਠਤਿ ਨ ਗਚ੍ਛਤਿ;

ਨ ਭੇਦੇਤਿ ਨ ਚੋਰੇਤਿ, ਨ ਭੁਞ੍ਜਤਿ ਨ ਖਾਦਤਿ.

੧੨੧੮. ਤਥਾ ਰੂਪਮ੍ਪਿ ਨਿਤ੍ਤੇਜਂ, ਵਿਨਾ ਨਾਮਞ੍ਚ ਸਬ੍ਬਥਾ;

ਸਕੇਨੇਵ ਹਿ ਤੇਜੇਨ, ਨ ਸਕ੍ਕੋਤਿ ਪਵਤ੍ਤਿਤੁਂ.

੧੨੧੯. ਭੁਞ੍ਜਾਮੀਤਿ ਪਿਵਾਮੀਤਿ, ਖਾਦਾਮੀਤਿ ਤਥੇਵ ਚ;

ਰੋਦਾਮੀਤਿ ਹਸਾਮੀਤਿ, ਰੂਪਸ੍ਸੇਤਂ ਨ ਵਿਜ੍ਜਤਿ.

੧੨੨੦. ਨਾਮਂ ਨਿਸ੍ਸਾਯ ਰੂਪਂ ਤੁ, ਰੂਪਂ ਨਿਸ੍ਸਾਯ ਨਾਮਕਂ;

ਪਵਤ੍ਤਤਿ ਸਦਾ ਸਬ੍ਬਂ, ਪਞ੍ਚਵੋਕਾਰਭੂਮਿਯਂ.

੧੨੨੧. ਇਮਸ੍ਸ ਪਨ ਅਤ੍ਥਸ੍ਸ, ਆਵਿਭਾਵਤ੍ਥਮੇਵ ਚ;

ਜਚ੍ਚਨ੍ਧਪੀਠਸਪ੍ਪੀਨਂ, ਵਤ੍ਤਬ੍ਬਾ ਉਪਮਾ ਇਧ.

੧੨੨੨. ਯਥਾ ਹਿ ਨਾਵਂ ਨਿਸ੍ਸਾਯ, ਮਨੁਸ੍ਸਾ ਯਨ੍ਤਿ ਅਣ੍ਣਵੇ;

ਏਵਂ ਰੂਪਮ੍ਪਿ ਨਿਸ੍ਸਾਯ, ਨਾਮਕਾਯੋ ਪਵਤ੍ਤਤਿ.

੧੨੨੩. ਯਥਾ ਮਨੁਸ੍ਸੇ ਨਿਸ੍ਸਾਯ, ਨਾਵਾ ਗਚ੍ਛਤਿ ਅਣ੍ਣਵੇ;

ਏਵਂ ਨਾਮਮ੍ਪਿ ਨਿਸ੍ਸਾਯ, ਰੂਪਕਾਯੋ ਪਵਤ੍ਤਤਿ.

੧੨੨੪. ਸਤ੍ਤਸਞ੍ਞਂ ਵਿਨੋਦੇਤ੍ਵਾ, ਨਾਮਰੂਪਸ੍ਸ ਸਬ੍ਬਥਾ;

ਯਾਥਾਵਦਸ੍ਸਨਂ ਏਤਂ, ‘‘ਦਿਟ੍ਠਿਸੁਦ੍ਧੀ’’ਤਿ ਵੁਚ੍ਚਤਿ.

੧੨੨੫. ਪਰਿਮੁਚ੍ਚਿਤੁਕਾਮੋ ਚ, ਦੁਕ੍ਖਤੋ ਜਾਤਿਆਦਿਤੋ;

ਅਨ੍ਤਦ੍ਵਯਂ ਵਿਵਜ੍ਜੇਤ੍ਵਾ, ਭਾਵਯੇ ਪਨ ਪਣ੍ਡਿਤੋ.

੧੨੨੬. ਦਿਟ੍ਠਿਵਿਸੁਦ੍ਧਿਮਿਮਂ ਪਰਿਸੁਦ੍ਧਂ,

ਸੁਟ੍ਠੁਤਰਂ ਤੁ ਕਰੋਤਿ ਨਰੋ ਯੋ;

ਦਿਟ੍ਠਿਗਤਾਨਿ ਮਲਾਨਿ ਅਸੇਸਂ,

ਨਾਸਮੁਪੇਨ੍ਤਿ ਹਿ ਤਸ੍ਸ ਨਰਸ੍ਸ.

ਇਤਿ ਅਭਿਧਮ੍ਮਾਵਤਾਰੇ ਦਿਟ੍ਠਿਵਿਸੁਦ੍ਧਿਨਿਦ੍ਦੇਸੋ ਨਾਮ

ਅਟ੍ਠਾਰਸਮੋ ਪਰਿਚ੍ਛੇਦੋ.