੧੫. ਪਨ੍ਨਰਸਮੋ ਪਰਿਚ੍ਛੇਦੋ

ਅਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸੋ

੯੮੦. ਰੂਪਾਰੂਪਮਤੀਤੇਨ, ਰੂਪਾਰੂਪਾਦਿਵੇਦਿਨਾ;

ਯਾਨਿ ਚਾਰੂਪਪੁਞ੍ਞਾਨਿ, ਸਰੂਪੇਨੀਰਿਤਾਨਿ ਤੁ.

੯੮੧. ਤੇਸਂ ਦਾਨਿ ਪਵਕ੍ਖਾਮਿ, ਭਾਵਨਾਨਯਮੁਤ੍ਤਮਂ;

ਯੋਗਾਵਚਰਭਿਕ੍ਖੂਨਂ, ਹਿਤਤ੍ਥਾਯ ਸਮਾਸਤੋ.

੯੮੨. ‘‘ਰੂਪੇ ਖੋ ਵਿਜ੍ਜਮਾਨਸ੍ਮਿਂ, ਦਣ੍ਡਾਦਾਨਾਦਯੋ ਸਿਯੁਂ;

ਅਨੇਕਾਪਿ ਪਨਾਬਾਧਾ, ਚਕ੍ਖੁਰੋਗਾਦਯੋ’’ਇਤਿ.

੯੮੩. ਰੂਪੇ ਆਦੀਨਵਂ ਦਿਸ੍ਵਾ, ਰੂਪੇ ਨਿਬ੍ਬਿਨ੍ਦਮਾਨਸੋ;

ਤਸ੍ਸਾਤਿਕ੍ਕਮਨਤ੍ਥਾਯ, ਅਰੂਪਂ ਪਟਿਪਜ੍ਜਤਿ.

੯੮੪. ਤਮ੍ਹਾ ਕਸਿਣਰੂਪਾਪਿ, ਸੋ ਨਿਬ੍ਬਿਜ੍ਜ ਵਿਸਾਰਦੋ;

ਅਪਕ੍ਕਮਿਤੁਕਾਮੋ ਚ, ਸੂਕਰਾਭਿਹਤੋਵ ਸਾ.

੯੮੫. ਚਤੁਤ੍ਥੇ ਪਨ ਝਾਨਸ੍ਮਿਂ, ਹੁਤ੍ਵਾ ਚਿਣ੍ਣਵਸੀ ਵਸੀ;

ਚਤੁਤ੍ਥਜ੍ਝਾਨਤੋ ਧੀਮਾ, ਵੁਟ੍ਠਾਯ ਵਿਧਿਨਾ ਪੁਨ.

੯੮੬. ਕਰੋਤਿ ਪਨਿਦਂ ਚਿਤ੍ਤਂ, ਰੂਪਮਾਰਮ੍ਮਣਂ ਯਤੋ;

ਆਸਨ੍ਨਸੋਮਨਸ੍ਸਞ੍ਚ, ਥੂਲਸਨ੍ਤਵਿਮੋਕ੍ਖਤੋ.

੯੮੭. ਇਤਿ ਆਦੀਨਵਂ ਦਿਸ੍ਵਾ, ਚਤੁਤ੍ਥੇ ਤਤ੍ਥ ਸਬ੍ਬਸੋ;

ਨਿਕਨ੍ਤਿਂ ਪਰਿਯਾਦਾਯ, ਪਠਮਾਰੁਪ੍ਪਞ੍ਚ ਸਨ੍ਤਤੋ.

੯੮੮. ਚਕ੍ਕਵਾਲ਼ਪਰਿਯਨ੍ਤਂ, ਯਤ੍ਤਕਂ ਵਾ ਪਨਿਚ੍ਛਤਿ;

ਤਤ੍ਤਕਂ ਪਤ੍ਥਰਿਤ੍ਵਾਨ, ਫੁਟ੍ਠੋਕਾਸਞ੍ਚ ਤੇਨ ਤਂ.

੯੮੯. ਆਕਾਸੋ ਇਤਿ ਵਾਨਨ੍ਤੋ,

ਆਕਾਸੋ ਇਤਿ ਵਾ ਪੁਨ;

ਮਨਸਾ ਹਿ ਕਰੋਨ੍ਤੋਵ,

ਉਗ੍ਘਾਟੇਤਿ ਪਵੁਚ੍ਚਤਿ.

੯੯੦. ਉਗ੍ਘਾਟੇਨ੍ਤੋ ਹਿ ਕਸਿਣਂ, ਨ ਸਂਵੇਲ੍ਲੇਤਿ ਤਂ ਪਨ;

ਨ ਚੁਦ੍ਧਰਤਿ ਸੋ ਯੋਗੀ, ਪੂਵਂ ਵਿਯ ਕਪਾਲਤੋ.

੯੯੧. ਕੇਵਲਂ ਪਨ ਤਂ ਨੇਵ, ਆਵਜ੍ਜਤਿ ਨ ਪੇਕ੍ਖਤਿ;

ਨਾਵਜ੍ਜਨ੍ਤੋ ਨਪੇਕ੍ਖਨ੍ਤੋ, ਉਗ੍ਘਾਟੇਤਿ ਹਿ ਨਾਮਸੋ.

੯੯੨. ਕਸਿਣੁਗ੍ਘਾਟਿਮਾਕਾਸਂ, ਨਿਮਿਤ੍ਤਂ ਪਨ ਤਂਵ ਸੋ;

ਆਕਾਸੋ ਇਤਿ ਚਿਤ੍ਤੇਨ, ਆਵਜ੍ਜਤਿ ਪੁਨਪ੍ਪੁਨਂ.

੯੯੩. ਆਵਜ੍ਜਤੋ ਹਿ ਤਸ੍ਸੇਵਂ,

ਕਰੋਤੋ ਤਕ੍ਕਾਹਤਮ੍ਪਿ ਚ;

ਪਞ੍ਚ ਨੀਵਰਣਾ ਤਸ੍ਸ,

ਵਿਕ੍ਖਮ੍ਭਨ੍ਤਿ ਹਿ ਸਬ੍ਬਸੋ.

੯੯੪. ਆਸੇਵਤਿ ਚ ਭਾਵੇਤਿ, ਤਂ ਨਿਮਿਤ੍ਤਂ ਪੁਨਪ੍ਪੁਨਂ;

ਕਰੋਤੋ ਪਨ ਤਸ੍ਸੇਵ, ਸਨ੍ਤਚਿਤ੍ਤਸ੍ਸ ਯੋਗਿਨੋ.

੯੯੫. ਤਤ੍ਰਾਕਾਸੇ ਪਨਾਪ੍ਪੇਤਿ, ਪਠਮਾਰੁਪ੍ਪਮਾਨਸਂ;

ਇਧਾਪਿ ਪੁਰਿਮੇ ਭਾਗੇ, ਤੀਣਿ ਚਤ੍ਤਾਰਿ ਵਾ ਪਨ.

੯੯੬. ਜਵਨਾਨਿ ਉਪੇਕ੍ਖਾਯ, ਸਮ੍ਪਯੁਤ੍ਤਾਨਿ ਹੋਨ੍ਤਿ ਹਿ;

ਚਤੁਤ੍ਥਂ ਪਞ੍ਚਮਂ ਵਾਪਿ, ਹੋਤਿ ਆਰੁਪ੍ਪਮਾਨਸਂ.

੯੯੭. ਪੁਨ ਭਾਵੇਤੁਕਾਮੇਨ, ਦੁਤਿਯਾਰੁਪ੍ਪਮਾਨਸਂ;

ਸੁਚਿਣ੍ਣਵਸਿਨਾ ਹੁਤ੍ਵਾ, ਪਠਮਾਰੁਪ੍ਪਮਾਨਸੇ.

੯੯੮. ਆਸਨ੍ਨਰੂਪਾਵਚਰ-ਜ੍ਝਾਨਪਚ੍ਚਤ੍ਥਿਕਨ੍ਤਿ ਚ;

ਦੁਤਿਯਾਰੁਪ੍ਪਚਿਤ੍ਤਂਵ, ਨ ਚ ਸਨ੍ਤਮਿਦਨ੍ਤਿ ਚ.

੯੯੯. ਏਵਮਾਦੀਨਵਂ ਦਿਸ੍ਵਾ, ਪਠਮਾਰੁਪ੍ਪਮਾਨਸੇ;

ਨਿਕਨ੍ਤਿਂ ਪਰਿਯਾਦਾਯ, ਦੁਤਿਯਂ ਸਨ੍ਤਤੋ ਪਨ.

੧੦੦੦. ਤਮਾਕਾਸਂ ਫਰਿਤ੍ਵਾਨ, ਪਵਤ੍ਤਮਾਨਸਂ ਪਨ;

ਤਞ੍ਚ ਵਿਞ੍ਞਾਣਮਿਚ੍ਚੇਵਂ, ਕਤ੍ਤਬ੍ਬਂ ਮਨਸਾ ਬਹੁਂ.

੧੦੦੧. ਆਵਜ੍ਜਨਞ੍ਚ ਕਤ੍ਤਬ੍ਬਂ, ਤਥਾ ਤਕ੍ਕਾਹਤਮ੍ਪਿ ਚ;

‘‘ਅਨਨ੍ਤ’’ਨ੍ਤਿ ‘‘ਅਨਨ੍ਤ’’ਨ੍ਤਿ, ਕਾਤਬ੍ਬਂ ਮਨਸਾ ਨਿਧ.

੧੦੦੨. ਤਸ੍ਮਿਂ ਪਨ ਨਿਮਿਤ੍ਤਸ੍ਮਿਂ, ਵਿਚਾਰੇਨ੍ਤਸ੍ਸ ਮਾਨਸਂ;

ਉਪਚਾਰੇਨ ਤਂ ਚਿਤ੍ਤਂ, ਸਮਾਧਿਯਤਿ ਯੋਗਿਨੋ.

੧੦੦੩. ਆਸੇਵਤਿ ਚ ਭਾਵੇਤਿ, ਤਂ ਨਿਮਿਤ੍ਤਂ ਪੁਨਪ੍ਪੁਨਂ;

ਤਸ੍ਸ ਚੇਵਂ ਕਰੋਨ੍ਤਸ੍ਸ, ਸਤਿਸਮ੍ਪਨ੍ਨਚੇਤਸੋ.

੧੦੦੪. ਆਕਾਸਂ ਫੁਸਵਿਞ੍ਞਾਣੇ, ਦੁਤਿਯਾਰੁਪ੍ਪਮਾਨਸਂ;

ਅਪ੍ਪੇਤਿ ਅਪ੍ਪਨਾ ਯਸ੍ਮਿਂ, ਨਯੋ ਵੁਤ੍ਤਨਯੋਵ ਸੋ.

੧੦੦੫. ਆਕਾਸੋਯਮਨਨ੍ਤੋਤਿ, ਏਵਮਾਕਾਸਮੇਵ ਤਂ;

ਫਰਿਤ੍ਵਾ ਪਵਤ੍ਤਵਿਞ੍ਞਾਣਂ, ‘‘ਵਿਞ੍ਞਾਣਞ੍ਚ’’ਨ੍ਤਿ ਵੁਚ੍ਚਤਿ.

੧੦੦੬. ਮਨਕ੍ਕਾਰਵਸੇਨਾਪਿ, ਅਨਨ੍ਤਂ ਪਰਿਦੀਪਿਤਂ;

‘‘ਵਿਞ੍ਞਾਣਾਨਨ੍ਤ’’ਮਿਚ੍ਚੇਵ, ਵਤ੍ਤਬ੍ਬਂ ਪਨਿਦਂ ਸਿਯਾ.

੧੦੦੭. ਅਥ ਭਾਵੇਤੁਕਾਮੇਨ, ਤਤਿਯਾਰੁਪ੍ਪਮਾਨਸਂ;

ਸੁਚਿਣ੍ਣਵਸਿਨਾ ਹੁਤ੍ਵਾ, ਦੁਤਿਯਾਰੁਪ੍ਪਮਾਨਸੇ.

੧੦੦੮. ਆਸਨ੍ਨਪਠਮਾਰੁਪ੍ਪ-ਚਿਤ੍ਤਪਚ੍ਚਤ੍ਥਿਕਨ੍ਤਿ ਚ;

ਤਤਿਯਾਰੁਪ੍ਪਚਿਤ੍ਤਂਵ, ਨ ਚ ਸਨ੍ਤਮਿਦਨ੍ਤਿ ਚ.

੧੦੦੯. ਏਵਮਾਦੀਨਵਂ ਦਿਸ੍ਵਾ, ਦੁਤਿਯਾਰੁਪ੍ਪਮਾਨਸੇ;

ਨਿਕਨ੍ਤਿਂ ਪਰਿਯਾਦਾਯ, ਤਤਿਯਂ ਸਨ੍ਤਤੋ ਪਨ.

੧੦੧੦. ਏਵਂ ਮਨਸਿ ਕਤ੍ਵਾਨ, ਕਾਤਬ੍ਬੋ ਮਨਸਾ ਪੁਨ;

ਪਠਮਾਰੁਪ੍ਪਵਿਞ੍ਞਾਣਾ-ਭਾਵੋ ਤਸ੍ਸੇਵ ਸੁਞ੍ਞਤੋ.

੧੦੧੧. ਤਂ ਪਨਾਕਾਸਵਿਞ੍ਞਾਣਂ, ਅਕਤ੍ਵਾ ਮਨਸਾ ਪੁਨ;

‘‘ਨਤ੍ਥਿ ਨਤ੍ਥੀ’’ਤਿ ਵਾਤੇਨ, ‘‘ਸੁਞ੍ਞਂ ਸੁਞ੍ਞ’’ਨ੍ਤਿ ਵਾ ਤਤੋ.

੧੦੧੨. ਆਵਜ੍ਜਿਤਬ੍ਬਮੇਵਞ੍ਹਿ, ਕਤ੍ਤਬ੍ਬਂ ਮਨਸਾਪਿ ਚ;

ਤਕ੍ਕਾਹਤਞ੍ਚ ਕਾਤਬ੍ਬਂ, ਪੁਨਪ੍ਪੁਨਂਵ ਧੀਮਤਾ.

੧੦੧੩. ਤਸ੍ਮਿਂ ਨਿਮਿਤ੍ਤੇ ਤਸ੍ਸੇਵਂ, ਵਿਚਾਰੇਨ੍ਤਸ੍ਸ ਮਾਨਸਂ;

ਸਤਿ ਤਿਟ੍ਠਤਿ ਭਿਯ੍ਯੋਪਿ, ਸਮਾਧਿਯਤਿ ਮਾਨਸਂ.

੧੦੧੪. ਆਸੇਵਤਿ ਚ ਭਾਵੇਤਿ, ਤਂ ਨਿਮਿਤ੍ਤਂ ਪੁਨਪ੍ਪੁਨਂ;

ਤਸ੍ਸ ਚੇਵਂ ਕਰੋਨ੍ਤਸ੍ਸ, ਸਤਿਸਮ੍ਪਨ੍ਨਚੇਤਸੋ.

੧੦੧੫. ਕਸਿਣੁਗ੍ਘਾਟਿਮਾਕਾਸਂ, ਫਰਿਤ੍ਵਾਨ ਸਮਨ੍ਤਤੋ;

ਵਿਞ੍ਞਾਣਸ੍ਸ ਪਵਤ੍ਤਸ੍ਸ, ਨਤ੍ਥਿਭਾਵੇ ਅਭਾਵਕੇ.

੧੦੧੬. ਤਤਿਯਾਰੁਪ੍ਪਵਿਞ੍ਞਾਣਂ,

ਤਂ ਪਨਾਪ੍ਪੇਤਿ ਯੋਗਿਨੋ;

ਅਪ੍ਪਨਾਯ ਨਯੋਪੇਤ੍ਥ,

ਹੋਤਿ ਵੁਤ੍ਤਨਯੋਵ ਸੋ.

੧੦੧੭. ਆਕਾਸਗਤਵਿਞ੍ਞਾਣਂ, ਦੁਤਿਯਾਰੁਪ੍ਪਚਕ੍ਖੁਨਾ;

ਪਸ੍ਸਨ੍ਤੋ ਵਿਹਰਿਤ੍ਵਾਨ, ‘‘ਨਤ੍ਥਿ ਨਤ੍ਥੀ’’ਤਿਆਦਿਨਾ.

੧੦੧੮. ਪਰਿਕਮ੍ਮਮਨਕ੍ਕਾਰੇ, ਤਸ੍ਮਿਂ ਅਨ੍ਤਰਹਿਤੇ ਪਨ;

ਤਸ੍ਸਾਪਗਮਮਤ੍ਤਂਵ, ਪਸ੍ਸਨ੍ਤੋ ਵਸਤੀ ਚ ਸੋ.

੧੦੧੯. ਸਨ੍ਨਿਪਾਤਂ ਯਥਾ ਕੋਚਿ, ਦਿਸ੍ਵਾ ਸਙ੍ਘਸ੍ਸ ਕਤ੍ਥਚਿ;

ਗਤੇ ਸਙ੍ਘੇ ਤੁ ਤਂ ਠਾਨਂ, ਸੁਞ੍ਞਮੇਵਾਨੁਪਸ੍ਸਤਿ.

੧੦੨੦. ਪੁਨ ਭਾਵੇਤੁਕਾਮੇਨ, ਚਤੁਤ੍ਥਾਰੁਪ੍ਪਮਾਨਸਂ;

ਸੁਚਿਣ੍ਣਵਸਿਨਾ ਹੁਤ੍ਵਾ, ਤਤਿਯਾਰੁਪ੍ਪਮਾਨਸੇ.

੧੦੨੧. ਆਸਨ੍ਨਦੁਤਿਯਾਰੁਪ੍ਪ-ਚਿਤ੍ਤਪਚ੍ਚਤ੍ਥਿਕਨ੍ਤਿ ਚ;

ਚਤੁਤ੍ਥਾਰੁਪ੍ਪਚਿਤ੍ਤਂਵ, ਨ ਚ ਸਨ੍ਤਮਿਦਨ੍ਤਿ ਚ.

੧੦੨੨. ਏਵਮਾਦੀਨਵਂ ਦਿਸ੍ਵਾ, ਤਤਿਯਾਰੁਪ੍ਪਮਾਨਸੇ;

ਨਿਕਨ੍ਤਿਂ ਪਰਿਯਾਦਾਯ, ਚਤੁਤ੍ਥਂ ਸਨ੍ਤਤੋ ਪਨ.

੧੦੨੩. ਏਵਂ ਮਨਸਿ ਕਤ੍ਵਾਨ, ਪੁਨ ਤਤ੍ਥੇਵ ਧੀਮਤਾ;

ਅਭਾਵਾਰਮ੍ਮਣਂ ਕਤ੍ਵਾ, ਸਮ੍ਪਵਤ੍ਤਮਿਦਂ ਮਨੋ.

੧੦੨੪. ‘‘ਸਨ੍ਤਂ ਸਨ੍ਤਮਿਦਂ ਚਿਤ੍ਤ’’-ਮਿਚ੍ਚੇਵਂ ਤਂ ਪੁਨਪ੍ਪੁਨਂ;

ਹੋਤਿ ਆਵਜ੍ਜਿਤਬ੍ਬਞ੍ਚ, ਕਾਤਬ੍ਬਂ ਮਨਸਾਪਿ ਚ.

੧੦੨੫. ਤਸ੍ਮਿਂ ਨਿਮਿਤ੍ਤੇ ਤਸ੍ਸੇਵਂ, ਵਿਚਾਰੇਨ੍ਤਸ੍ਸ ਮਾਨਸਂ;

ਸਤਿ ਤਿਟ੍ਠਤਿ ਭਿਯ੍ਯੋਪਿ, ਸਮਾਧਿਯਤਿ ਮਾਨਸਂ.

੧੦੨੬. ਆਸੇਵਤਿ ਚ ਭਾਵੇਤਿ, ਤਂ ਨਿਮਿਤ੍ਤਂ ਪੁਨਪ੍ਪੁਨਂ;

ਤਸ੍ਸ ਚੇਵਂ ਕਰੋਨ੍ਤਸ੍ਸ, ਸਤਿਸਮ੍ਪਨ੍ਨਚੇਤਸੋ.

੧੦੨੭. ਤਤਿਯਾਰੁਪ੍ਪਸਙ੍ਖਾਤ-ਖਨ੍ਧੇਸੁ ਚ ਚਤੂਸੁਪਿ;

ਚਤੁਤ੍ਥਾਰੁਪ੍ਪਵਿਞ੍ਞਾਣਂ, ਤਂ ਪਨਾਪ੍ਪੇਤਿ ਯੋਗਿਨੋ.

੧੦੨੮. ਅਪ੍ਪਨਾਯ ਨਯੋਪੇਤ੍ਥ, ਹੇਟ੍ਠਾ ਵੁਤ੍ਤਨਯੂਪਮੋ;

ਅਪਿਚੇਤ੍ਥ ਵਿਸੇਸੋਯਂ, ਵੇਦਿਤਬ੍ਬੋ ਵਿਭਾਵਿਨਾ.

੧੦੨੯. ‘‘ਅਹੋ ਸਨ੍ਤਾ ਵਤਾਯ’’ਨ੍ਤਿ, ਸਮਾਪਤ੍ਤਿ ਪਦਿਸ੍ਸਤਿ;

ਯਾ ਪਨਾਭਾਵਮਤ੍ਤਮ੍ਪਿ, ਕਤ੍ਵਾ ਠਸ੍ਸਤਿ ਗੋਚਰਂ.

੧੦੩੦. ਸਨ੍ਤਾਰਮ੍ਮਣਤਾਯੇਵ, ‘‘ਸਨ੍ਤਾਯ’’ਨ੍ਤਿ ਵਿਪਸ੍ਸਤਿ;

ਸਨ੍ਤਤੋ ਚੇ ਮਨਕ੍ਕਾਰੋ, ਕਥਞ੍ਚ ਸਮਤਿਕ੍ਕਮੋ.

੧੦੩੧. ਅਨਾਪਜ੍ਜਿਤੁਕਾਮਤ੍ਤਾ, ਹੋਤੇਵ ਸਮਤਿਕ੍ਕਮੋ;

‘‘ਸਮਾਪਜ੍ਜਾਮਹਮੇਤ’’-ਮਿਚ੍ਚਾਭੋਗੋ ਨ ਵਿਜ੍ਜਤਿ.

੧੦੩੨. ਸਨ੍ਤਤੋ ਤਂ ਕਰੋਨ੍ਤੋ ਹਿ, ਮਨਸਾ ਸੁਖੁਮਂ ਪਰਂ;

ਅਸਞ੍ਞਂ ਪਨ ਦੁਬ੍ਬਲ੍ਯਂ, ਪਾਪੁਣਾਤਿ ਮਹਗ੍ਗਤਂ.

੧੦੩੩. ਨੇਵਸਞ੍ਞੀ ਚ ਨਾਸਞ੍ਞੀ,

ਯਾਯ ਸਞ੍ਞਾਯ ਹੋਤਿ ਸੋ;

ਨ ਕੇਵਲਂ ਤੁ ਸਞ੍ਞਾਵ,

ਏਦਿਸੀ ਅਥ ਖੋ ਪਨ.

੧੦੩੪. ਏਵਮੇਵ ਭਵਨ੍ਤੇਤ੍ਥ, ਸੁਖੁਮਾ ਵੇਦਨਾਦਯੋ;

ਪਤ੍ਤਮਕ੍ਖਨਤੇਲੇਨ, ਮਗ੍ਗਸ੍ਮਿਂ ਉਦਕੇਨ ਚ.

੧੦੩੫. ਸਾਵੇਤਬ੍ਬੋ ਅਯਂ ਅਤ੍ਥੋ, ਚਤੁਤ੍ਥਾਰੁਪ੍ਪਬੋਧਨੇ;

ਪਟੁਸਞ੍ਞਾਯ ਕਿਚ੍ਚਸ੍ਸ, ਨੇਵਕ੍ਕਰਣਤੋ ਅਯਂ.

੧੦੩੬. ‘‘ਨੇਵਸਞ੍ਞਾ’’ਤਿ ਨਿਦ੍ਦਿਟ੍ਠਾ, ਚਤੁਤ੍ਥਾਰੁਪ੍ਪਸਮ੍ਭਵਾ;

ਪਟੁਸਞ੍ਞਾਯ ਕਿਚ੍ਚਂ ਸਾ, ਕਾਤੁਂ ਸਕ੍ਕੋਤਿ ਨੇਵ ਚ.

੧੦੩੭. ਯਥਾ ਦਹਨਕਿਚ੍ਚਂ ਤੁ, ਤੇਜੋਧਾਤੁ ਸੁਖੋਦਕੇ;

ਸਾ ਸਙ੍ਖਾਰਾਵਸੇਸਤ੍ਤਾ, ਸੁਖੁਮਤ੍ਤੇਨ ਵਿਜ੍ਜਤਿ;

ਤਸ੍ਮਾ ਪਨ ਚ ਸਾ ਸਞ੍ਞਾ, ‘‘ਨਾਸਞ੍ਞਾ’’ਤਿ ਪਵੁਚ੍ਚਤਿ.

੧੦੩੮. ਏਤਾ ਹਿ ਰੂਪਮਾਕਾਸਂ,

ਵਿਞ੍ਞਾਣਂ ਤਦਭਾਵਕਂ;

ਅਤਿਕ੍ਕਮਿਤ੍ਵਾ ਕਮਤੋ,

ਚਤਸ੍ਸੋ ਹੋਨ੍ਤਿ ਆਹ ਚ.

੧੦੩੯. ‘‘ਆਰਮ੍ਮਣਾਤਿਕ੍ਕਮਤੋ, ਚਤਸ੍ਸੋਪਿ ਭਵਨ੍ਤਿਮਾ;

ਅਙ੍ਗਾਤਿਕ੍ਕਮਮੇਤਾਸਂ, ਨ ਇਚ੍ਛਨ੍ਤਿ ਵਿਭਾਵਿਨੋ.

੧੦੪੦. ਸੁਪਣੀਤਤਰਾ ਹੋਨ੍ਤਿ,

ਪਚ੍ਛਿਮਾ ਪਚ੍ਛਿਮਾ ਇਧ;

ਉਪਮਾ ਤਤ੍ਥ ਵਿਞ੍ਞੇਯ੍ਯਾ,

ਪਾਸਾਦਤਲਸਾਟਿਕਾ’’ਤਿ.

੧੦੪੧. ਸਙ੍ਖੇਪੇਨ ਮਯਾਰੁਪ੍ਪ-ਸਮਾਪਤ੍ਤਿਨਯੋ ਅਯਂ;

ਦਸ੍ਸਿਤੋ ਦਸ੍ਸਿਤੋ ਸੁਦ੍ਧ-ਦਸ੍ਸਿਨਾ ਪਿਯਦਸ੍ਸਿਨਾ.

੧੦੪੨. ਰੂਪਾਰੂਪਜ੍ਝਾਨਸਮਾਪਤ੍ਤਿਵਿਧਾਨਂ,

ਜਾਨਾਤਿਮਂ ਸਾਰਤਰਂ ਯੋ ਪਨ ਭਿਕ੍ਖੁ;

ਰੂਪਾਰੂਪਜ੍ਝਾਨਸਮਾਪਤ੍ਤੀਸੁ ਦਕ੍ਖੋ,

ਰੂਪਾਰੂਪਂ ਯਾਤਿ ਭਵਂ ਸੋ ਅਭਿਭੁਯ੍ਯ.

ਇਤਿ ਅਭਿਧਮ੍ਮਾਵਤਾਰੇ ਅਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸੋ ਨਾਮ

ਪਨ੍ਨਰਸਮੋ ਪਰਿਚ੍ਛੇਦੋ.