੧੬. ਸੋਲ਼ਸਮੋ ਪਰਿਚ੍ਛੇਦੋ

ਅਭਿਞ੍ਞਾਨਿਦ੍ਦੇਸੋ

੧੦੪੩. ਇਤੋ ਪਰਂ ਕਰਿਸ੍ਸਾਮਿ, ਪਞ੍ਞਾਸੁਦ੍ਧਿਕਰਂ ਪਰਂ;

ਪਞ੍ਚਨ੍ਨਮ੍ਪਿ ਅਭਿਞ੍ਞਾਨਂ, ਮੁਖਮਤ੍ਤਨਿਦਸ੍ਸਨਂ.

੧੦੪੪. ਰੂਪਾਰੂਪਸਮਾਪਤ੍ਤੀ,

ਨਿਬ੍ਬਤ੍ਤੇਤ੍ਵਾ ਪਨਟ੍ਠਪਿ;

ਲੋਕਿਕਾਪਿ ਅਭਿਞ੍ਞਾਯੋ,

ਭਾਵੇਤਬ੍ਬਾ ਵਿਭਾਵਿਨਾ.

੧੦੪੫. ਚਤੁਤ੍ਥਜ੍ਝਾਨਮਤ੍ਤੇਪਿ, ਸੁਚਿਣ੍ਣਵਸਿਨਾ ਸਤਾ;

ਅਨੁਯੋਗਮਭਿਞ੍ਞਾਸੁ, ਕਾਤੁਂ ਵਤ੍ਤਤਿ ਯੋਗਿਨੋ.

੧੦੪੬. ਅਭਿਞ੍ਞਾ ਨਾਮ ਭਿਕ੍ਖੂਨਂ, ਸਾਭਿਞ੍ਞਾਨਂ ਅਨੁਤ੍ਤਰੋ;

ਅਲਙ੍ਕਾਰੋ ਹਿ ਤਾਣਨ੍ਤਿ, ਸਤ੍ਥਨ੍ਤਿ ਚ ਪਵੁਚ੍ਚਤਿ.

੧੦੪੭. ਨਿਬ੍ਬਤ੍ਤਿਤਾਸ੍ਵਭਿਞ੍ਞਾਸੁ, ਯੋਗਾਵਚਰਭਿਕ੍ਖੁਨਾ;

ਸਮਾਧਿਭਾਵਨਾ ਹਿਸ੍ਸ, ਤਦਾ ਨਿਟ੍ਠਙ੍ਗਤਾ ਸਿਯਾ.

੧੦੪੮. ਦਿਬ੍ਬਾਨਿ ਚਕ੍ਖੁਸੋਤਾਨਿ, ਇਦ੍ਧਿਚਿਤ੍ਤਵਿਜਾਨਨਂ;

ਪੁਬ੍ਬੇਨਿਵਾਸਞਾਣਨ੍ਤਿ, ਪਞ੍ਚਾਭਿਞ੍ਞਾ ਇਮਾ ਸਿਯੁਂ.

੧੦੪੯. ਕਸਿਣਾਨੁਲੋਮਤਾਦੀਹਿ, ਚਤੁਦ੍ਦਸਨਯੇਹਿ ਚ;

ਦਮੇਤਬ੍ਬਮਭਿਞ੍ਞਾਯੋ, ਪਤ੍ਤੁਕਾਮੇਨ ਮਾਨਸਂ.

੧੦੫੦. ਦਨ੍ਤੇ ਸਮਾਹਿਤੇ ਸੁਦ੍ਧੇ, ਪਰਿਯੋਦਾਤੇ ਅਨਙ੍ਗਣੇ;

ਨੁਪਕ੍ਲੇਸੇ ਮੁਦੁਭੂਤੇ, ਕਮ੍ਮਨੀਯੇ ਠਿਤਾਚਲੇ.

੧੦੫੧. ਇਤਿ ਅਟ੍ਠਙ੍ਗਸਮ੍ਪਨ੍ਨੇ, ਚਿਤ੍ਤੇ ਇਦ੍ਧਿਵਿਧਾਯ ਚ;

ਅਭਿਨੀਹਰਤਿ ਚੇ ਚਿਤ੍ਤਂ, ਸਿਜ੍ਝਤਿਦ੍ਧਿਵਿਕੁਬ੍ਬਨਂ.

੧੦੫੨. ਅਭਿਞ੍ਞਾਪਾਦਕਜ੍ਝਾਨਂ, ਸਮਾਪਜ੍ਜ ਤਤੋ ਪਨ;

ਵੁਟ੍ਠਾਯ ਹਿ ਸਤਂ ਵਾਪਿ, ਸਹਸ੍ਸਂ ਵਾ ਯਦਿਚ੍ਛਤਿ.

੧੦੫੩. ‘‘ਸਤਂ ਹੋਮਿ ਸਤਂ ਹੋਮੀ’’-ਚ੍ਚੇਵਂ ਕਤ੍ਵਾਨ ਮਾਨਸਂ;

ਅਭਿਞ੍ਞਾਪਾਦਕਜ੍ਝਾਨਂ, ਸਮਾਪਜ੍ਜ ਤਤੋ ਪਨ.

੧੦੫੪. ਵੁਟ੍ਠਾਯ ਪੁਨਧਿਟ੍ਠਾਤਿ,

ਸਹਾਧਿਟ੍ਠਾਨਚੇਤਸਾ;

ਸਤਂ ਹੋਤਿ ਹਿ ਸੋ ਯੋਗੀ,

ਸਹਸ੍ਸਾਦੀਸ੍ਵਯਂ ਨਯੋ.

੧੦੫੫. ਪਾਦਕਜ੍ਝਾਨਚਿਤ੍ਤਂ ਤੁ, ਨਿਮਿਤ੍ਤਾਰਮ੍ਮਣਂ ਸਿਯਾ;

ਪਰਿਕਮ੍ਮਮਨਾਨੇਤ੍ਥ, ਸਤਾਰਮ੍ਮਣਿਕਾਨਿ ਤੁ.

੧੦੫੬. ਤਦਾਧਿਟ੍ਠਾਨਚਿਤ੍ਤਮ੍ਪਿ, ਸਤਾਰਮ੍ਮਣਮੇਵ ਤਂ;

ਪੁਬ੍ਬੇ ਵੁਤ੍ਤਪ੍ਪਨਾਚਿਤ੍ਤਂ, ਵਿਯ ਗੋਤ੍ਰਭੁਨਨ੍ਤਰਂ.

੧੦੫੭. ਤਮੇਕਂ ਜਾਯਤੇ ਤਤ੍ਥ, ਚਤੁਤ੍ਥਜ੍ਝਾਨਿਕਂ ਮਨੋ;

ਪਰਿਕਮ੍ਮਵਿਸੇਸੋਵ, ਸੇਸਂ ਪੁਬ੍ਬਸਮਂ ਇਧ.

ਇਦ੍ਧਿਵਿਧਞਾਣਂ.

੧੦੫੮. ਦਿਬ੍ਬਸੋਤਮਿਦਂ ਤਤ੍ਥ, ਭਾਵੇਤਬ੍ਬਂ ਕਥਂ ਸਿਯਾ;

ਅਭਿਞ੍ਞਾਪਾਦਕਜ੍ਝਾਨਂ, ਸਮਾਪਜ੍ਜ ਤਤੋ ਪੁਨ.

੧੦੫੯. ਵੁਟ੍ਠਾਯ ਪਰਿਕਮ੍ਮੇਨ, ਕਾਮਾਵਚਰਚੇਤਸਾ;

ਸਦ੍ਦੋ ਆਵਜ੍ਜਿਤਬ੍ਬੋਵ, ਮਹਨ੍ਤੋ ਸੁਖੁਮੋਪਿ ਚ.

੧੦੬੦. ਤਸ੍ਸੇਵਂ ਪਨ ਸਦ੍ਦਸ੍ਸ, ਨਿਮਿਤ੍ਤਂ ਮਨਸਿ ਕੁਬ੍ਬਤੋ;

ਦਿਬ੍ਬਸੋਤਮਿਦਾਨਿਸ੍ਸ, ਉਪ੍ਪਜ੍ਜਿਸ੍ਸਤਿ ਤਂ ਇਤਿ.

੧੦੬੧. ਸਦ੍ਦੇਸ੍ਵਞ੍ਞਤਰਂ ਸਦ੍ਦਂ, ਕਤ੍ਵਾ ਆਰਮ੍ਮਣਂ ਤਤੋ;

ਉਪ੍ਪਜ੍ਜਿਤ੍ਵਾ ਨਿਰੁਦ੍ਧੇ ਤੁ, ਮਨੋਦ੍ਵਾਰਾਵਜ੍ਜਨੇ ਪੁਨ.

੧੦੬੨. ਜਵਨਾਨਿ ਹਿ ਜਾਯਨ੍ਤੇ, ਤਸ੍ਸ ਚਤ੍ਤਾਰਿ ਪਞ੍ਚ ਵਾ;

ਪੁਰਿਮਾਨੇਤ੍ਥ ਚਿਤ੍ਤੇਸੁ, ਤੀਣਿ ਚਤ੍ਤਾਰਿ ਵਾ ਪਨ.

੧੦੬੩. ਪਰਿਕਮ੍ਮੋਪਚਾਰਾਨੁ-ਲੋਮਗੋਤ੍ਰਭੁਨਾਮਕਾ;

ਚਤੁਤ੍ਥਂ ਪਞ੍ਚਮਂ ਵਾਪਿ, ਅਪ੍ਪਨਾਚਿਤ੍ਤਮੀਰਿਤਂ.

੧੦੬੪. ਸਹਜਾਤਂ ਤੁ ਯਂ ਞਾਣਂ, ਅਪ੍ਪਨਾਮਾਨਸੇਨ ਹਿ;

ਤਂ ਞਾਣਂ ਦਿਬ੍ਬਸੋਤਨ੍ਤਿ, ਵਦਨ੍ਤਿ ਸੁਤਕੋਵਿਦਾ.

੧੦੬੫. ਥਾਮਜਾਤਂ ਕਰੋਨ੍ਤੇਨ, ਤਂ ਞਾਣਂ ਤੇਨ ਯੋਗਿਨਾ;

‘‘ਏਤ੍ਥਨ੍ਤਰਗਤਂ ਸਦ੍ਦਂ, ਸੁਣਾਮੀ’’ਤਿ ਚ ਚੇਤਸਾ.

੧੦੬੬. ਅਙ੍ਗੁਲਂ ਦ੍ਵਙ੍ਗੁਲਂ ਭਿਯ੍ਯੋ,

ਵਿਦਤ੍ਥਿ ਰਤਨਂ ਤਥਾ;

ਗਾਮੋ ਦੇਸੋ ਤਤੋ ਯਾਵ,

ਚਕ੍ਕਵਾਲ਼ਾ ਤਤੋ ਪਰਂ.

੧੦੬੭. ਇਚ੍ਚੇਵਂ ਤੁ ਪਰਿਚ੍ਛਿਜ੍ਜ, ਵਡ੍ਢੇਤਬ੍ਬਂ ਯਥਾਕ੍ਕਮਂ;

ਏਸੋ ਅਧਿਗਤਾਭਿਞ੍ਞੋ, ਪਾਦਕਾਰਮ੍ਮਣੇਨ ਤੁ.

੧੦੬੮. ਫੁਟ੍ਠੋਕਾਸਗਤੇ ਸਦ੍ਦੇ, ਸਬ੍ਬੇ ਪਨ ਸੁਣਾਤਿ ਸੋ;

ਸੁਣਨ੍ਤੋ ਪਾਟਿਯੇਕ੍ਕਮ੍ਪਿ, ਸਲ੍ਲਕ੍ਖੇਤੁਂ ਪਹੋਤਿ ਸੋ.

ਦਿਬ੍ਬਸੋਤਞਾਣਂ.

੧੦੬੯. ਕਥਂ ਪਨੁਪ੍ਪਾਦੇਤਬ੍ਬਂ, ਚੇਤੋਪਰਿਯਮਾਨਸਂ;

ਦਿਬ੍ਬਚਕ੍ਖੁਵਸੇਨੇਵ, ਇਦਂ ਞਾਣਂ ਪਨਿਜ੍ਝਤਿ.

੧੦੭੦. ਆਲੋਕਂ ਪਨ ਵਡ੍ਢੇਤ੍ਵਾ, ਤਸ੍ਮਾ ਦਿਬ੍ਬੇਨ ਚਕ੍ਖੁਨਾ;

ਹਦਯਂ ਪਨ ਨਿਸ੍ਸਾਯ, ਵਤ੍ਤਮਾਨਂ ਤੁ ਲੋਹਿਤਂ.

੧੦੭੧. ਦਿਸ੍ਵਾ ਪਰਸ੍ਸ ਵਿਞ੍ਞੇਯ੍ਯਂ,

ਹੋਤਿ ਚਿਤ੍ਤਂ ਤੁ ਭਿਕ੍ਖੁਨਾ;

ਸੋਮਨਸ੍ਸਯੁਤੇ ਚਿਤ੍ਤੇ,

ਲੋਹਿਤਂ ਲੋਹਿਤਂ ਸਿਯਾ.

੧੦੭੨. ਦੋਮਨਸ੍ਸਯੁਤੇ ਚਿਤ੍ਤੇ, ਵਤ੍ਤਮਾਨੇ ਤੁ ਕਾਲ਼ਕਂ;

ਉਪੇਕ੍ਖਾਸਹਿਤੇ ਚਿਤ੍ਤੇ, ਤਿਲਤੇਲੂਪਮਂ ਸਿਯਾ.

੧੦੭੩. ਤਸ੍ਮਾ ਪਰਸ੍ਸ ਸਤ੍ਤਸ੍ਸ, ਦਿਸ੍ਵਾ ਹਦਯਲੋਹਿਤਂ;

ਚੇਤੋਪਰਿਯਞਾਣਂ ਤਂ, ਕਾਤਬ੍ਬਂ ਥਾਮਤਂ ਗਤਂ.

੧੦੭੪. ਏਵਂ ਥਾਮਗਤੇ ਤਸ੍ਮਿਂ, ਯਥਾਨੁਕ੍ਕਮਤੋ ਪਨ;

ਚਿਤ੍ਤਮੇਵ ਵਿਜਾਨਾਤਿ, ਵਿਨਾ ਲੋਹਿਤਦਸ੍ਸਨਂ.

੧੦੭੫. ਕਾਮਾਵਚਰਚਿਤ੍ਤਞ੍ਚ, ਰੂਪਾਰੂਪੇਸੁ ਮਾਨਸਂ;

ਸਬ੍ਬਮੇਵ ਵਿਜਾਨਾਤਿ, ਸਰਾਗਾਦਿਪ੍ਪਭੇਦਕਂ.

ਚੇਤੋਪਰਿਯਞਾਣਂ.

੧੦੭੬. ਪੁਬ੍ਬੇਨਿਵਾਸਞਾਣੇਨ, ਕਤ੍ਤਬ੍ਬਾ ਤਦਨੁਸ੍ਸਤਿ;

ਤਂ ਸਮ੍ਪਾਦੇਤੁਕਾਮੇਨ, ਆਦਿਕਮ੍ਮਿਕਭਿਕ੍ਖੁਨਾ;

ਝਾਨਾਨਿ ਪਨ ਚਤ੍ਤਾਰਿ, ਸਮਾਪਜ੍ਜਾਨੁਪੁਬ੍ਬਤੋ.

੧੦੭੭. ਅਭਿਞ੍ਞਾਪਾਦਕਜ੍ਝਾਨਾ, ਵੁਟ੍ਠਾਯ ਹਿ ਤਤੋ ਪੁਨ;

ਭਿਕ੍ਖੁਨਾ ਵਜ੍ਜਿਤਬ੍ਬਾਵ, ਨਿਸਜ੍ਜਾ ਸਬ੍ਬਪਚ੍ਛਿਮਾ.

੧੦੭੮. ਤਤੋ ਪਭੁਤਿ ਸਬ੍ਬਮ੍ਪਿ, ਪਟਿਲੋਮਕ੍ਕਮਾ ਪਨ;

ਸਬ੍ਬਮਾਵਜ੍ਜਿਤਬ੍ਬਂ ਤਂ, ਦਿਵਸੇ ਰਤ੍ਤਿਯਂ ਕਤਂ.

੧੦੭੯. ਪਟਿਲੋਮਕ੍ਕਮੇਨੇਵ, ਦੁਤਿਯੇ ਤਤਿਯੇਪਿ ਚ;

ਦਿਵਸੇ ਪਕ੍ਖਮਾਸੇਸੁ, ਤਥਾ ਸਂਵਚ੍ਛਰੇਸੁਪਿ.

੧੦੮੦. ਯਾਵ ਅਸ੍ਮਿਂ ਭਵੇ ਸਨ੍ਧਿ, ਤਾਵ ਤੇਨ ਚ ਭਿਕ੍ਖੁਨਾ;

ਕਤਮਾਵਜ੍ਜਿਤਬ੍ਬਂ ਤਂ, ਪੁਰਿਮਸ੍ਮਿਂ ਭਵੇਪਿ ਚ.

੧੦੮੧. ਚੁਤਿਕ੍ਖਣੇਪਿ ਨਿਬ੍ਬਤ੍ਤਂ, ਨਾਮਰੂਪਞ੍ਚ ਸਾਧੁਕਂ;

ਏਵਮਾਵਜ੍ਜਿਤੇ ਤਸ੍ਮਿਂ, ਨਾਮਰੂਪੇ ਯਦਾ ਪਨ.

੧੦੮੨. ਤਦੇਵਾਰਮ੍ਮਣਂ ਕਤ੍ਵਾ, ਨਾਮਰੂਪਂ ਚੁਤਿਕ੍ਖਣੇ;

ਮਨੋਦ੍ਵਾਰੇ ਮਨਕ੍ਕਾਰੋ, ਉਪ੍ਪਜ੍ਜਤਿ ਤਦਾ ਪਨ.

੧੦੮੩. ਆਵਜ੍ਜਨੇ ਨਿਰੁਦ੍ਧਸ੍ਮਿਂ, ਤਦੇਵਾਰਮ੍ਮਣਂ ਪਨ;

ਕਤ੍ਵਾ ਜਵਨਚਿਤ੍ਤਾਨਿ, ਹੋਨ੍ਤਿ ਚਤ੍ਤਾਰਿ ਪਞ੍ਚ ਵਾ;

ਪੁਬ੍ਬੇ ਵੁਤ੍ਤਨਯੇਨੇਵ, ਸੇਸਂ ਞੇਯ੍ਯਂ ਵਿਭਾਵਿਨਾ.

੧੦੮੪. ਪਰਿਕਮ੍ਮਾਦਿਨਾਮਾਨਿ, ਪੁਰਿਮਾਨਿ ਭਵਨ੍ਤਿ ਤੁ;

ਪਚ੍ਛਿਮਂ ਅਪ੍ਪਨਾਚਿਤ੍ਤਂ, ਰੂਪਾਵਚਰਿਕਂ ਭਵੇ.

੧੦੮੫. ਤੇਨ ਚਿਤ੍ਤੇਨ ਯਂ ਞਾਣਂ, ਸਂਯੁਤ੍ਤਂ ਤੇਨ ਯਾ ਪਨ;

ਸਂਯੁਤ੍ਤਾ ਸਤਿ ਸਾ ਪੁਬ੍ਬੇ-ਨਿਵਾਸਾਨੁਸ੍ਸਤੀਰਿਤਾ.

ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ.

੧੦੮੬. ਰੂਪਂ ਪਸ੍ਸਿਤੁਕਾਮੇਨ, ਭਿਕ੍ਖੁਨਾ ਦਿਬ੍ਬਚਕ੍ਖੁਨਾ;

ਕਸਿਣਾਰਮ੍ਮਣਂ ਝਾਨਂ, ਅਭਿਞ੍ਞਾਪਾਦਕਂ ਪਨ.

੧੦੮੭. ਅਭਿਨੀਹਾਰਕ੍ਖਮਂ ਕਤ੍ਵਾ, ਤੇਜੋਕਸਿਣਮੇਵ ਵਾ;

ਓਦਾਤਕਸਿਣਂ ਵਾਪਿ, ਆਲੋਕਕਸਿਣਮ੍ਪਿ ਵਾ.

੧੦੮੮. ਇਮੇਸੁ ਕਤਪੁਞ੍ਞੇਹਿ, ਕਸਿਣੇਸੁ ਚ ਤੀਸੁਪਿ;

ਆਲੋਕਕਸਿਣਂ ਏਤ੍ਥ, ਸੇਟ੍ਠਨ੍ਤਿ ਪਰਿਦੀਪਿਤਂ.

੧੦੮੯. ਤਸ੍ਮਾ ਤਮਿਤਰਂ ਵਾਪਿ, ਉਪ੍ਪਾਦੇਤ੍ਵਾ ਯਥਾਕ੍ਕਮਂ;

ਉਪਚਾਰਭੂਮਿਯਂਯੇਵ, ਠਤ੍ਵਾ ਤਂ ਪਨ ਪਣ੍ਡਿਤੋ.

੧੦੯੦. ਵਡ੍ਢੇਤ੍ਵਾਨ ਠਪੇਤਬ੍ਬਂ, ਨ ਉਪ੍ਪਾਦੇਯ੍ਯ ਅਪ੍ਪਨਂ;

ਉਪ੍ਪਾਦੇਤਿ ਸਚੇ ਹੋਤਿ, ਪਾਦਕਜ੍ਝਾਨਨਿਸ੍ਸਿਤਂ.

੧੦੯੧. ਝਾਨਸ੍ਸ ਵਡ੍ਢਿਤਸ੍ਸਨ੍ਤੋ-ਗਤਂ ਰੂਪਂ ਤੁ ਯੋਗਿਨਾ;

ਪਸ੍ਸਿਤਬ੍ਬਂ ਭਵੇ ਰੂਪਂ, ਪਸ੍ਸਤੋ ਪਨ ਤਸ੍ਸ ਤਂ.

੧੦੯੨. ਪਰਿਕਮ੍ਮਸ੍ਸ ਵਾਰੋ ਹਿ, ਅਤਿਕ੍ਕਮਤਿ ਤਾਵਦੇ;

ਆਲੋਕੋਪਿ ਤਤੋ ਤਸ੍ਸ, ਖਿਪ੍ਪਮਨ੍ਤਰਧਾਯਤਿ.

੧੦੯੩. ਤਸ੍ਮਿਂ ਅਨ੍ਤਰਹਿਤੇ ਰੂਪ-ਗਤਮ੍ਪਿ ਚ ਨ ਦਿਸ੍ਸਤਿ;

ਤੇਨਾਥ ਪਾਦਕਜ੍ਝਾਨਂ, ਪਵਿਸਿਤ੍ਵਾ ਤਤੋ ਪੁਨ.

੧੦੯੪. ਵੁਟ੍ਠਾਯ ਪਨ ਆਲੋਕੋ, ਫਰਿਤਬ੍ਬੋਵ ਭਿਕ੍ਖੁਨਾ;

ਏਵਂ ਅਨੁਕ੍ਕਮੇਨੇਵ, ਆਲੋਕੋ ਥਾਮਵਾ ਸਿਯਾ.

੧੦੯੫. ‘‘ਆਲੋਕੋ ਏਤ੍ਥ ਹੋਤੂ’’ਤਿ,

ਯਤ੍ਤਕਂ ਠਾਨਮੇਵ ਸੋ;

ਪਰਿਚ੍ਛਿਨ੍ਦਤਿ ਤਤ੍ਥੇਵ,

ਆਲੋਕੋ ਪਨ ਤਿਟ੍ਠਤਿ.

੧੦੯੬. ਦਿਵਸਮ੍ਪਿ ਨਿਸੀਦਿਤ੍ਵਾ, ਪਸ੍ਸਤੋ ਹੋਤਿ ਦਸ੍ਸਨਂ;

ਤਿਣੁਕ੍ਕਾਯ ਗਤੋ ਮਗ੍ਗਂ, ਪੁਰਿਸੇਤ੍ਥ ਨਿਦਸ੍ਸਨਂ.

੧੦੯੭. ਉਪ੍ਪਾਦਨਕ੍ਕਮੋਪਿਸ੍ਸ, ਤਤ੍ਰਾਯਂ ਦਿਬ੍ਬਚਕ੍ਖੁਨੋ;

ਵੁਤ੍ਤਪ੍ਪਕਾਰਰੂਪਂ ਤਂ, ਕਤ੍ਵਾ ਆਰਮ੍ਮਣਂ ਪਨ.

੧੦੯੮. ਮਨੋਦ੍ਵਾਰੇ ਮਨਕ੍ਕਾਰੇ, ਜਾਤੇ ਯਾਨਿ ਤਦੇਵ ਚ;

ਰੂਪਂ ਆਰਮ੍ਮਣਂ ਕਤ੍ਵਾ, ਜਾਯਨ੍ਤਿ ਜਵਨਾਨਿ ਹਿ.

੧੦੯੯. ਕਾਮਾਵਚਰਚਿਤ੍ਤਾਨਿ, ਤਾਨਿ ਚਤ੍ਤਾਰਿ ਪਞ੍ਚ ਵਾ;

ਹੇਟ੍ਠਾ ਵੁਤ੍ਤਨਯੇਨੇਵ, ਸੇਸਂ ਞੇਯ੍ਯਂ ਵਿਭਾਵਿਨਾ.

੧੧੦੦. ਅਤ੍ਥਸਾਧਕਚਿਤ੍ਤਂ ਤਂ, ਚਤੁਤ੍ਥਜ੍ਝਾਨਿਕਂ ਮਤਂ;

ਤਂਚਿਤ੍ਤਸਂਯੁਤਂ ਞਾਣਂ, ਦਿਬ੍ਬਚਕ੍ਖੁਨ੍ਤਿ ਵੁਚ੍ਚਤਿ.

੧੧੦੧. ਅਨਾਗਤਂਸਞਾਣਸ੍ਸ, ਯਥਾਕਮ੍ਮੁਪਗਸ੍ਸ ਚ;

ਪਰਿਕਮ੍ਮਂ ਵਿਸੁਂ ਨਤ੍ਥਿ, ਇਜ੍ਝਨ੍ਤਿ ਦਿਬ੍ਬਚਕ੍ਖੁਨਾ.

੧੧੦੨. ਚੁਤੂਪਪਾਤਞਾਣਮ੍ਪਿ, ਦਿਬ੍ਬਚਕ੍ਖੁਨ੍ਤਿ ਵਾ ਪਨ;

ਅਤ੍ਥਤੋ ਏਕਮੇਵੇਦਂ, ਬ੍ਯਞ੍ਜਨੇ ਪਨ ਨਾਨਤਾ.

ਦਿਬ੍ਬਚਕ੍ਖੁਞਾਣਂ.

੧੧੦੩. ਯੋਧ ਸੁਣਾਤਿ ਕਰੋਤਿ ਚ ਚਿਤ੍ਤੇ,

ਗਨ੍ਥਮਿਮਂ ਪਰਮਂ ਪਨ ਭਿਕ੍ਖੁ;

ਸੋ ਅਭਿਧਮ੍ਮਮਹਣ੍ਣਵਪਾਰਂ,

ਯਾਤਿ ਅਨੇਨ ਤਰੇਨ ਤਰਿਤ੍ਵਾ.

ਇਤਿ ਅਭਿਧਮ੍ਮਾਵਤਾਰੇ ਅਭਿਞ੍ਞਾਨਿਦ੍ਦੇਸੋ ਨਾਮ

ਸੋਲ਼ਸਮੋ ਪਰਿਚ੍ਛੇਦੋ.