੧੧. ਏਕਾਦਸਮੋ ਪਰਿਚ੍ਛੇਦੋ

ਨਿਬ੍ਬਾਨਨਿਦ੍ਦੇਸੋ

੭੬੮. ਰੂਪਾਨਨ੍ਤਰਮੁਦ੍ਦਿਟ੍ਠਂ, ਨਿਬ੍ਬਾਨਂ ਯਂ ਪਨਾਦਿਤੋ;

ਤਸ੍ਸਿਦਾਨਿ ਅਨੁਪ੍ਪਤ੍ਤੋ, ਵਿਭਾਵਨਨਯਕ੍ਕਮੋ.

੭੬੯. ਤਸ੍ਮਾਹਂ ਤਸ੍ਸ ਦਸ੍ਸੇਤੁਂ, ਦੁਕ੍ਕਰਸ੍ਸ ਯਥਾਬਲਂ;

ਦੁਬ੍ਬੋਧਸ੍ਸ ਪਵਕ੍ਖਾਮਿ, ਵਿਭਾਵਨਮਿਤੋ ਪਰਂ.

ਤਤ੍ਥ ਨਿਬ੍ਬਾਨਨ੍ਤਿ ਭਵਾਭਵਂ ਵਿਨਨਤੋ ਵਾਨਂ ਵੁਚ੍ਚਤਿ ਤਣ੍ਹਾ, ਵਾਨਤੋ ਨਿਕ੍ਖਨ੍ਤਤ੍ਤਾ ਨਿਬ੍ਬਾਨਨ੍ਤਿ ਚ ਪਵੁਚ੍ਚਤਿ ਅਮਤਂ ਅਸਙ੍ਖਤਂ ਪਰਮਂ ਸੁਖਂ. ਵੁਤ੍ਤਂ ਹੇਤਂ ‘‘ਯੋ ਸੋ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋ ਨਿਬ੍ਬਾਨ’’ਨ੍ਤਿ.

੭੭੦. ਯਸ੍ਸ ਚਾਧਿਗਮਾ ਸਬ੍ਬ-ਕਿਲੇਸਾਨਂ ਖਯੋ ਭਵੇ;

ਨਿਬ੍ਬਾਨਮਿਤਿ ਨਿਦ੍ਦਿਟ੍ਠਂ, ਨਿਬ੍ਬਾਨਕੁਸਲੇਨ ਤਂ.

ਏਤਂ ਚ ਨਿਬ੍ਬਾਨਂ ਨਾਮ ਤਯਿਦਂ ਸਨ੍ਤਿਲਕ੍ਖਣਂ, ਅਚ੍ਚੁਤਿਰਸਂ, ਅਸ੍ਸਾਸਕਰਣਰਸਂ ਵਾ, ਅਨਿਮਿਤ੍ਤਪਚ੍ਚੁਪਟ੍ਠਾਨਂ, ਨਿਸ੍ਸਰਣਪਚ੍ਚੁਪਟ੍ਠਾਨਂ ਵਾਤਿ ਵੇਦਿਤਬ੍ਬਂ.

ਏਤ੍ਥਾਹ – ਨ ਪਰਮਤ੍ਥਤੋ ਨਿਬ੍ਬਾਨਂ ਨਾਮ ਏਕੋ ਸਭਾਵੋ ਅਤ੍ਥਿ, ਤਿਤ੍ਥਿਯਾਨਂ ਅਤ੍ਤਾ ਵਿਯ, ਸਸਵਿਸਾਣਂ ਵਿਯ ਚ ਅਨੁਪਲਬ੍ਭਨੀਯਤੋਤਿ? ਨ, ਪਞ੍ਞਾਚਕ੍ਖੁਨਾ ਉਪਪਰਿਕ੍ਖਿਯਮਾਨਾਨਂ ਹਿਤਗਵੇਸੀਨਂ ਯਥਾਨੁਰੂਪਾਯ ਪਟਿਪਤ੍ਤਿਯਾ ਉਪਲਬ੍ਭਨੀਯਤੋ. ਯਂ ਹਿ ਪੁਥੁਜ੍ਜਨਾ ਨੋਪਲਬ੍ਭਨ੍ਤਿ, ਤਂ ‘‘ਨਤ੍ਥੀ’’ਤਿ ਨ ਵਤ੍ਤਬ੍ਬਂ. ਅਥਾਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ‘‘ਕਤਮਂ ਨੁ ਖੋ, ਆਵੁਸੋ, ਨਿਬ੍ਬਾਨ’’ਨ੍ਤਿ ਨਿਬ੍ਬਾਨਂ ਪੁਟ੍ਠੇਨ ‘‘ਯੋ ਖੋ, ਆਵੁਸੋ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ’’ਤਿ ਰਾਗਾਦੀਨਂ ਖਯੋਵ ਦਸ੍ਸਿਤੋ, ਤਸ੍ਮਾ ਰਾਗਾਦੀਨਂ ਖਯਮਤ੍ਤਮੇਵ ਨਿਬ੍ਬਾਨਨ੍ਤਿ ਚੇ? ਤਂ ਨ. ਕਸ੍ਮਾ? ਅਰਹਤ੍ਤਸ੍ਸਾਪਿ ਰਾਗਾਦੀਨਂ ਖਯਮਤ੍ਤਪਸਙ੍ਗਦੋਸਾਪਤ੍ਤਿਤੋ. ਕਥਂ? ਨਿਬ੍ਬਾਨਂ ਪੁਚ੍ਛਾਨਨ੍ਤਰਮੇਵ ‘‘ਕਤਮਂ ਨੁ ਖੋ, ਆਵੁਸੋ, ਅਰਹਤ੍ਤ’’ਨ੍ਤਿ ਪੁਟ੍ਠੇਨ ‘‘ਯੋ ਖੋ, ਆਵੁਸੋ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ’’ਤਿ ਰਾਗਾਦੀਨਂ ਖਯੋਵ ਵੁਤ੍ਤੋ, ਤਸ੍ਮਾ ਤਵ ਮਤੇਨ ਅਰਹਤ੍ਤਫਲਸ੍ਸਾਪਿ ਰਾਗਾਦੀਨਂ ਖਯਮਤ੍ਤਤਾ ਭਵੇਯ੍ਯ, ਨ ਚੇਤਂ ਯੁਤ੍ਤਂ ਅਨੁਤ੍ਤਰਸ੍ਸ ਲੋਕੁਤ੍ਤਰਫਲਚਿਤ੍ਤਸ੍ਸ ਰਾਗਾਨਂ ਖਯਮਤ੍ਤਤਾਪਜ੍ਜਨਂ, ਤਸ੍ਮਾ ਮਾ ਏਵਂ ਬ੍ਯਞ੍ਜਨਚ੍ਛਾਯਾਯ ਵਦੇਸਿ, ਉਭਿਨ੍ਨਂ ਪਨ ਸੁਤ੍ਤਾਨਂ ਅਤ੍ਥੋ ਉਪਪਰਿਕ੍ਖਿਤਬ੍ਬੋ.

ਯਸ੍ਸ ਪਨ ਧਮ੍ਮਸ੍ਸਾਧਿਗਮੇਨ ਰਾਗਾਦੀਨਂ ਖਯੋ ਹੋਤਿ, ਸੋ ਧਮ੍ਮੋ ਰਾਗਾਦੀਨਂ ਖਯਸ੍ਸ ਉਪਨਿਸ੍ਸਯਤ੍ਤਾ ਅਕ੍ਖਯੋਪਿ ਸਮਾਨੋ ‘‘ਰਾਗਾਦੀਨਂ ਖਯੋ ਨਿਬ੍ਬਾਨ’’ਨ੍ਤਿ ਖਯੋਪਚਾਰੇਨ ਵੁਤ੍ਤੋ, ‘‘ਤਿਪੁਸਂ ਜਰੋ ਗੁਲ਼ੋ ਸੇਮ੍ਹੋ’’ਤਿਆਦੀਸੁ ਵਿਯ ਫਲੂਪਚਾਰੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਰਹਤ੍ਤਂ ਪਨ ਖਯਨ੍ਤੇ ਉਪ੍ਪਨ੍ਨਤ੍ਤਾ ‘‘ਖਯੋ’’ਤਿ ਵੁਤ੍ਤਂ. ਯਦਿ ਰਾਗਾਦੀਨਂ ਖਯਮਤ੍ਤਂ ਨਿਬ੍ਬਾਨਂ ਭਵੇਯ੍ਯ, ਸਬ੍ਬੇ ਬਾਲਪੁਥੁਜ੍ਜਨਾਪਿ ਸਮਧਿਗਤਨਿਬ੍ਬਾਨਾ ਸਚ੍ਛਿਕਤਨਿਰੋਧਾ ਭਵੇਯ੍ਯੁਂ. ਕਿਞ੍ਚ ਭਿਯ੍ਯੋ – ਨਿਬ੍ਬਾਨਸ੍ਸ ਬਹੁਤ੍ਤਾਦਿਦੋਸਾਪਤ੍ਤਿਤੋ ਚ. ਏਵਞ੍ਹਿ ਸਤਿ ਰਾਗਾਦਿਕ੍ਖਯਾਨਂ ਬਹੁਭਾਵਤੋ ਨਿਬ੍ਬਾਨਸ੍ਸਾਪਿ ਬਹੁਭਾਵੋ ਭਵੇਯ੍ਯ, ਸਙ੍ਖਤਲਕ੍ਖਣਞ੍ਚ ਨਿਬ੍ਬਾਨਂ ਭਵੇਯ੍ਯ, ਸਙ੍ਖਤਲਕ੍ਖਣਤ੍ਤਾ ਸਙ੍ਖਤਪਰਿਯਾਪਨ੍ਨਞ੍ਚ, ਸਙ੍ਖਤਪਰਿਯਾਪਨ੍ਨਤ੍ਤਾ ਅਨਿਚ੍ਚਂ ਦੁਕ੍ਖਂ ਨਿਬ੍ਬਾਨਂ ਭਵੇਯ੍ਯਾਤਿ.

ਕਿਞ੍ਚ ਭਿਯ੍ਯੋ – ਯਦਿ ਖਯੋ ਨਿਬ੍ਬਾਨਂ ਭਵੇਯ੍ਯ, ਗੋਤ੍ਰਭੁਵੋਦਾਨਮਗ੍ਗਫਲਚਿਤ੍ਤਾਨਂ ਕਿਂ ਨੁ ਆਰਮ੍ਮਣਂ ਵਦੇਸਿ, ਵਦ ਭਦ੍ਰਮੁਖਾਤਿ? ਰਾਗਾਦੀਨਂ ਖਯਮੇਵ ਵਦਾਮੀਤਿ. ਕਿਂ ਪਨ ਰਾਗਾਦਯੋ ਗੋਤ੍ਰਭੁਆਦੀਨਂ ਖਣੇ ਖੀਯਨ੍ਤਿ, ਉਦਾਹੁ ਖੀਯਿਸ੍ਸਨ੍ਤਿ, ਅਥ ਖੀਣਾਤਿ? ਕਿਂ ਪਨੇਤ੍ਥ ‘‘ਖੀਣੇਸ੍ਵੇਵ ਖਯਂ ਵਦਾਮੀ’’ਤਿ. ਸੁਟ੍ਠੁ ਉਪਧਾਰੇਤ੍ਵਾ ਵਦ ਭਦ੍ਰਮੁਖਾਤਿ, ਯਦਿ ਖੀਣੇਸ੍ਵੇਵ ਖਯਂ ਵਦੇਸਿ, ਨ ਗੋਤ੍ਰਭੁਚਿਤ੍ਤਾਦੀਨਂ ਨਿਬ੍ਬਾਨਾਰਮ੍ਮਣਤਾ ਸਿਜ੍ਝਤੀਤਿ. ਕਿਂ ਕਾਰਣਂ? ਗੋਤ੍ਰਭੁਕ੍ਖਣੇ ਰਾਗਾਦਯੋ ਖੀਯਿਸ੍ਸਨ੍ਤਿ, ਤਥਾ ਵੋਦਾਨਕ੍ਖਣੇ, ਮਗ੍ਗਕ੍ਖਣੇ ਪਨ ਖੀਯਨ੍ਤਿ, ਨ ਖੀਣਾ, ਫਲਕ੍ਖਣੇ ਖੀਣਾ. ਏਵਂ ਸਨ੍ਤੇ ਭਵਤੋ ਮਤੇਨ ਫਲਮੇਵ ਖਯਾਰਮ੍ਮਣਂ, ਨ ਇਤਰੇ, ਇਤਰੇਸਂ ਪਨ ਕਿਮਾਰਮ੍ਮਣਂ ਵਦੇਸੀਤਿ? ਅਦ੍ਧਾ ਸੋ ਆਰਮ੍ਮਣਂ ਅਪਸ੍ਸਨ੍ਤੋ ਨਿਰੁਤ੍ਤਰੋ ਭਵਿਸ੍ਸਤਿ. ਅਪਿਚ ਕਿਲੇਸਕ੍ਖਯੋ ਨਾਮ ਸਪ੍ਪੁਰਿਸੇਹਿ ਕਰੀਯਤਿ, ਯਥਾਨੁਰੂਪਾਯ ਪਟਿਪਤ੍ਤਿਯਾ ਉਪ੍ਪਾਦੀਯਤੀਤਿ ਅਤ੍ਥੋ. ਨਿਬ੍ਬਾਨਂ ਪਨ ਨ ਕੇਨਚਿ ਕਰੀਯਤਿ ਨ ਉਪ੍ਪਾਦੀਯਤਿ, ਤਸ੍ਮਾ ਨਿਬ੍ਬਾਨਮਮਤਮਸਙ੍ਖਤਂ. ਤਮਕਤਂ ਜਾਨਾਤੀਤਿ ਅਰਿਯਸਾਵਕੋ ‘‘ਅਕਤਞ੍ਞੂ’’ਤਿ ਪਵੁਚ੍ਚਤਿ. ਵੁਤ੍ਤਞ੍ਚੇਤਂ –

੭੭੧. ‘‘ਅਸਦ੍ਧੋ ਅਕਤਞ੍ਞੂ ਚ,

ਸਨ੍ਧਿਚ੍ਛੇਦੋ ਚ ਯੋ ਨਰੋ;

ਹਤਾਵਕਾਸੋ ਵਨ੍ਤਾਸੋ,

ਸ ਵੇ ਉਤ੍ਤਮਪੋਰਿਸੋ’’ਤਿ.

ਅਪਿਚ ‘‘ਨਿਸ੍ਸਰਣ’’ਨ੍ਤਿ ਭਗਵਤਾ ਵੁਤ੍ਤਤ੍ਤਾ ਚ. ‘‘ਨਿਸ੍ਸਰਣ’’ਨ੍ਤਿ ਹਿ ਨਿਬ੍ਬਾਨਸ੍ਸੇਤਂ ਨਾਮਂ. ਯਥਾਹ ‘‘ਤਯੋ ਖੋਮੇ, ਭਿਕ੍ਖਵੇ, ਧਮ੍ਮਾ ਦੁਪ੍ਪਟਿਵਿਜ੍ਝਾ. ਕਤਮੇ ਤਯੋ ਧਮ੍ਮਾ ਦੁਪ੍ਪਟਿਵਿਜ੍ਝਾ? ਤਿਸ੍ਸੋ ਨਿਸ੍ਸਰਣਧਾਤੁਯੋ. ਕਾਮਾਨਮੇਤਂ ਨਿਸ੍ਸਰਣਂ, ਯਦਿਦਂ ਨੇਕ੍ਖਮ੍ਮਂ. ਰੂਪਾਨਮੇਤਂ ਨਿਸ੍ਸਰਣਂ, ਯਦਿਦਂ ਅਰੂਪਂ. ਯਂ ਖੋ ਪਨ ਕਿਞ੍ਚਿ ਭੂਤਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ, ਨਿਰੋਧੋ ਤਸ੍ਸ ਨਿਸ੍ਸਰਣ’’ਨ੍ਤਿ ਹਿ ਵੁਤ੍ਤਂ. ਏਵਂ ਵੁਤ੍ਤਸ੍ਸ ਤਸ੍ਸ ਨਿਬ੍ਬਾਨਸ੍ਸ ਅਭਾਵਪਤ੍ਤਿਦੋਸਤੋ ਪਠਮਜ੍ਝਾਨਾਕਾਸਾਨਞ੍ਚਾਯਤਨਾਨਮ੍ਪਿ ਅਭਾਵੋ ਭਵੇਯ੍ਯ, ਤਸ੍ਮਾ ਅਯੁਤ੍ਤਂ ਅਕ੍ਖਯਸ੍ਸ ਨਿਬ੍ਬਾਨਸ੍ਸ ਖਯਦੋਸਾਪਜ੍ਜਨਨ੍ਤਿ, ਨ ਤੁ ਖਯੋ ਨਿਬ੍ਬਾਨਂ.

‘‘ਅਤ੍ਥਿ ਨਿਸ੍ਸਰਣਂ ਲੋਕੇ, ਪਞ੍ਞਾਯ ਮੇ ਸੁਫੁਸਿਤ’’ਨ੍ਤਿ ਚ ‘‘ਅਤ੍ਥਿ, ਭਿਕ੍ਖਵੇ, ਅਜਾਤਂ ਅਭੂਤਂ ਅਕਤਂ ਅਸਙ੍ਖਤ’’ਨ੍ਤਿ ਚ ਧਮ੍ਮਸਾਮਿਨਾ ਤਥਾਗਤੇਨ ਸਮ੍ਮਾਸਮ੍ਬੁਦ੍ਧੇਨ ਅਨੇਕੇਸੁ ਸੁਤ੍ਤਨ੍ਤੇਸੁ ਪਰਮਤ੍ਥਵਸੇਨ ਵੁਤ੍ਤਤ੍ਤਾ ‘‘ਅਤ੍ਥਿ ਨਿਬ੍ਬਾਨਂ ਨਾਮ ਏਕੋ ਧਮ੍ਮੋ’’ਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ. ਅਪਿਚ ਪਰਿਤ੍ਤਤ੍ਤਿਕੇ ‘‘ਕਤਮੇ ਧਮ੍ਮਾ ਅਪ੍ਪਮਾਣਾ’’ਤਿ ਪਦਮੁਦ੍ਧਰਿਤ੍ਵਾ – ‘‘ਚਤ੍ਤਾਰੋ ਮਗ੍ਗਾ ਅਪਰਿਯਾਪਨ੍ਨਾ ਚਤ੍ਤਾਰਿ ਚ ਸਾਮਞ੍ਞਫਲਾਨਿ ਨਿਬ੍ਬਾਨਞ੍ਚ, ਇਮੇ ਧਮ੍ਮਾ ਅਪ੍ਪਮਾਣਾ’’ਤਿ ਵੁਤ੍ਤਤ੍ਤਾ ਰਾਗਾਦੀਨਂ ਖਯਸ੍ਸ ਅਪ੍ਪਮਾਣਤ੍ਤਂ ਕਥਂ ਯੁਜ੍ਜਤਿ, ਤਸ੍ਮਾ ਪਰਮਤ੍ਥਤੋ ਅਤ੍ਥਿਯੇਵ ਨਿਬ੍ਬਾਨਂ ਨਾਮ ਏਕੋ ਸਭਾਵੋਤਿ. ਤਂ ਪਨ ਪਕਤਿਵਾਦੀਨਂ ਪਕਤਿ ਵਿਯ, ਤਿਤ੍ਥਿਯਾਨਂ ਅਤ੍ਤਾ ਵਿਯ ਚ ਸਸਵਿਸਾਣਂ ਵਿਯ ਚ ਨਾਵਿਜ੍ਜਮਾਨਂ.

ਅਥ ਪਞ੍ਞਤ੍ਤਿਮਤ੍ਤਂ ਨਿਬ੍ਬਾਨਨ੍ਤਿ ਚੇ, ਤਮ੍ਪਿ ਅਯੁਤ੍ਤਂ. ਕਸ੍ਮਾ? ਨਿਬ੍ਬਾਨਾਰਮ੍ਮਣਾਨਂ ਚਿਤ੍ਤਚੇਤਸਿਕਾਨਂ ਨਵਤ੍ਤਬ੍ਬਾਰਮ੍ਮਣਤ੍ਤਾ. ਕਥਂ? ਪਰਿਤ੍ਤਾਰਮ੍ਮਣਤ੍ਤਿਕੇ ਚ ਪਨ ‘‘ਕਤਮੇ ਧਮ੍ਮਾ ਅਪ੍ਪਮਾਣਾਰਮ੍ਮਣਾ’’ਤਿ ਪਦਮੁਦ੍ਧਰਿਤ੍ਵਾ ‘‘ਚਤ੍ਤਾਰੋ ਮਗ੍ਗਾ ਅਪਰਿਯਾਪਨ੍ਨਾ ਚਤ੍ਤਾਰਿ ਚ ਸਾਮਞ੍ਞਫਲਾਨਿ, ਇਮੇ ਧਮ੍ਮਾ ਅਪ੍ਪਮਾਣਾਰਮ੍ਮਣਾ’’ਤਿ ਹਿ ਵੁਤ੍ਤਂ. ਯਦਿ ਪਨੇਤੇਸਂ ਪਞ੍ਞਤ੍ਤਿਆਰਮ੍ਮਣਂ ਸਿਯਾ, ਅਪ੍ਪਮਾਣਾਰਮ੍ਮਣਤਾ ਨ ਯੁਜ੍ਜੇਯ੍ਯ, ਨਵਤ੍ਤਬ੍ਬਾਰਮ੍ਮਣਪਕ੍ਖਂ ਭਜੇਯ੍ਯੁਂ. ‘‘ਨਵਤ੍ਤਬ੍ਬਾਰਮ੍ਮਣਾ ਪਨ ਰੂਪਾਵਚਰਤ੍ਤਿਕਚਤੁਕ੍ਕਜ੍ਝਾਨਾ ਕੁਸਲਤੋ ਚ ਵਿਪਾਕਤੋ ਚ ਕਿਰਿਯਤੋ ਚ, ਚਤੁਤ੍ਥਸ੍ਸ ਝਾਨਸ੍ਸ ਵਿਪਾਕੋ, ਆਕਾਸਾਨਞ੍ਚਾਯਤਨਂ ਆਕਿਞ੍ਚਞ੍ਞਾਯਤਨਂ ਕੁਸਲਤੋ ਚ ਵਿਪਾਕਤੋ ਚ ਕਿਰਿਯਤੋ ਚ, ਇਮੇ ਧਮ੍ਮਾ ਨਵਤ੍ਤਬ੍ਬਾਰਮ੍ਮਣਾ’’ਤਿ ਹਿ ਵੁਤ੍ਤਂ, ਤਸ੍ਮਾ ਨ ਪਞ੍ਞਤ੍ਤਿਮਤ੍ਤਂ ਨਿਬ੍ਬਾਨਂ. ਯਸ੍ਮਾ ਚ ਪਣ੍ਣਤ੍ਤਿਭਾਵੋ ਨਿਬ੍ਬਾਨਸ੍ਸ ਨ ਯੁਜ੍ਜਤਿ, ਤਸ੍ਮਾ ਮਗ੍ਗਫਲਾਨਂ ਆਰਮ੍ਮਣਪਚ੍ਚਯਭੂਤਂ ਉਪ੍ਪਾਦਾਦੀਨਮਭਾਵਤੋ ਨਿਚ੍ਚਂ, ਰੂਪਸਭਾਵਾਭਾਵਤੋ ਅਰੂਪਂ, ਪਪਞ੍ਚਾਭਾਵਤੋ ਨਿਪ੍ਪਪਞ੍ਚਂ ਨਿਬ੍ਬਾਨਂ ਨਾਮ ਅਤ੍ਥੀਤਿ ਉਪਗਨ੍ਤਬ੍ਬਨ੍ਤਿ.

੭੭੨. ਅਚ੍ਚਨ੍ਤਮਨਨ੍ਤਂ ਸਨ੍ਤਂ, ਅਮਤਂ ਅਪਲੋਕਿਤਂ;

ਪਣੀਤਂ ਸਰਣਂ ਖੇਮਂ, ਤਾਣਂ ਲੇਣਂ ਪਰਾਯਣਂ.

੭੭੩. ਸਿਵਞ੍ਚ ਨਿਪੁਣਂ ਸਚ੍ਚਂ, ਦੁਕ੍ਖਕ੍ਖਯਮਨਾਸਵਂ;

ਸੁਦੁਦ੍ਦਸਂ ਪਰਂ ਪਾਰਂ, ਨਿਬ੍ਬਾਨਮਨਿਦਸ੍ਸਨਂ.

੭੭੪. ਤਣ੍ਹਾਕ੍ਖਯਂ ਧੁਵਂ ਦੀਪਂ, ਅਬ੍ਯਾਪਜ੍ਝਮਨੀਤਿਕਂ;

ਅਨਾਲਯਮਰੂਪਞ੍ਚ, ਪਦਮਚ੍ਚੁਤਮਕ੍ਖਰਂ.

੭੭੫. ਵਿਰਾਗਞ੍ਚ ਨਿਰੋਧਞ੍ਚ, ਵਿਮੁਤ੍ਤਿ ਮੋਕ੍ਖਮੇਵ ਚ;

ਇਮੇਹਿ ਪਨ ਨਾਮੇਹਿ, ਨਿਬ੍ਬਾਨਂ ਤੁ ਕਥੀਯਤਿ.

੭੭੬. ਏਵਞ੍ਚ ਪਨ ਵਿਞ੍ਞਾਯ, ਨਿਬ੍ਬਾਨਮ੍ਪਿ ਚ ਅਚ੍ਚੁਤਂ;

ਤਸ੍ਸ ਚਾਧਿਗਮੂਪਾਯੋ, ਕਤ੍ਤਬ੍ਬੋ ਵਿਞ੍ਞੁਨਾ ਸਦਾ.

੭੭੭. ਸਦ੍ਧਾਬੁਦ੍ਧਿਕਰਂ ਤਥਾਗਤਮਤੇ ਸਮ੍ਮੋਹਵਿਦ੍ਧਂਸਨਂ,

ਪਞ੍ਞਾਸਮ੍ਭਵਸਮ੍ਪਸਾਦਨਕਰਂ ਜਾਨਾਤਿ ਯੋ ਚੇ ਇਮਂ;

ਅਤ੍ਥਬ੍ਯਞ੍ਜਨਸਾਲਿਨਂ ਸੁਮਧੁਰਂ ਸਾਰਞ੍ਞੁਵਿਮ੍ਹਾਪਨਂ,

ਗਮ੍ਭੀਰੇ ਨਿਪੁਣਾਭਿਧਮ੍ਮਪਿਟਕੇ ਸੋ ਯਾਭਿਨਿਟ੍ਠਂ ਪਦਂ.

ਇਤਿ ਅਭਿਧਮ੍ਮਾਵਤਾਰੇ ਨਿਬ੍ਬਾਨਨਿਦ੍ਦੇਸੋ ਨਾਮ

ਏਕਾਦਸਮੋ ਪਰਿਚ੍ਛੇਦੋ.