੧੪. ਚੁਦ੍ਦਸਮੋ ਪਰਿਚ੍ਛੇਦੋ
ਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸਵਣ੍ਣਨਾ
੭੮੯-੯੩. ਹਿਤਾਨਯਨ੍ਤਿ ਹਿਤਾਵਹਂ. ਮਾਨਸਞ੍ਚ ਸੁਗਤਨ੍ਤਿ ਸੁਟ੍ਠੁ ਪਵਤ੍ਤਮਾਨਸਞ੍ਚ. ਮਧੁਰਾ ਅਤ੍ਥਵਣ੍ਣਨਾ ਏਤਸ੍ਸਾਤਿ ਮਧੁਰਤ੍ਥਵਣ੍ਣਨਂ. ਉਤ੍ਤਰਂ ਤੁ ਮਨੁਸ੍ਸਾਨਂ, ਧਮ੍ਮਤੋ ਞਾਣਦਸ੍ਸਨਨ੍ਤਿ ਮਨੁਸ੍ਸਾਨਂ ਲੋਕਿਯਧਮ੍ਮਤੋ ਉਤ੍ਤਰਿਭੂਤਞਾਣਦਸ੍ਸਨਲੋਕੁਤ੍ਤਰਂ. ਸਙ੍ਕਸ੍ਸਰਸਮਾਚਾਰੇਤਿ ਸਙ੍ਕਾਯ ਕਙ੍ਖਾਯ ਸਰਿਤਬ੍ਬਸਮਾਚਾਰੇ. ਅਚ੍ਛਿਦ੍ਦਂ ਅਕ੍ਖਣ੍ਡਂ ਅਕਮ੍ਮਾਸਂ. ਅਤ੍ਥਕਾਮੇਨਾਤਿ ਅਤ੍ਤਨੋ ਹਿਤਕਾਮੇਨ.
੭੯੭. ਦੁਵਿਧਲਕ੍ਖਣਂ ਚਾਰਿਤ੍ਤਵਾਰਿਤ੍ਤਲਕ੍ਖਣਂ.
੮੦੫. ਤੇਸਂ ਚਰਿਤਾਨਂ ਵੋਮਿਸ੍ਸਕਨਯਾ.
੮੦੭. ਸਵਣ੍ਣਕਸਿਣਾਤਿ ਨੀਲਪੀਤਓਦਾਤਲੋਹਿਤਵਣ੍ਣਕਸਿਣਾ.
੮੦੮. ਤਂ ਏਕਕਂ ਆਨਾਪਾਨਂ ਅਸ੍ਸਾਸਪਸ੍ਸਾਸੋ.
੮੦੯-੧੦. ਮਰਣੂਪਸਮਾਯੁਤ੍ਤਾ ਸਤੀਤਿ ਮਰਣਾਨੁਸ੍ਸਤਿ ਉਪਸਮਾਨੁਸ੍ਸਤਿ. ਆਹਾਰਨਿਸ੍ਸਿਤਸਞ੍ਞਾਤਿ ਆਹਾਰੇ ਪਟਿਕੂਲਸਞ੍ਞਾ. ਧਾਤੁਵਵਤ੍ਥਾਨਨ੍ਤਿ ਚਤੁਧਾਤੁਵਵਤ੍ਥਾਨਂ.
੮੧੧-੨. ਅਨੁਕੂਲਾ ਇਮੇ ਸਬ੍ਬ-ਚਰਿਤਾਨਨ੍ਤਿ ਵਣ੍ਣਿਤਾਤਿ ਯਂ ਕਮ੍ਮਟ੍ਠਾਨਂ ਸਦ੍ਧਾਚਰਿਤਸ੍ਸ ਅਨੁਕੂਲਂ, ਤਮੇਵ ਪਞ੍ਞਾਚਰਿਤਸ੍ਸ ਅਨੁਕੂਲਨ੍ਤਿ ਅਧਿਪ੍ਪਾਯੋ. ਇਦਂ ਸਬ੍ਬਂ ਪਨ ਵਚਨਂ ਏਕਨ੍ਤਵਿਪਚ੍ਚਨੀਕਭਾਵਤੋ ਏਕਨ੍ਤਪਟਿਪਕ੍ਖਭਾਵਤੋ ਅਤਿਸਪ੍ਪਾਯਤੋ ਵੁਤ੍ਤਂ, ਇਤਿ ਵਿਭਾਵਿਨਾ ਞੇਯ੍ਯਂ.
੮੩੫. ਵਿਪਸ੍ਸਨਾਭਵਸਮ੍ਪਤ੍ਤਿ-ਸੁਖਾਨਂ ਪਚ੍ਚਯਾ ਸਿਯੁਂ ਵਿਪਸ੍ਸਨਾਸਮ੍ਪਤ੍ਤਿਸੁਖਾਨਂ ਭਵਸਮ੍ਪਤ੍ਤਿਸੁਖਾਨਂ ਪਚ੍ਚਯਾ ਸਿਯੁਂ.
੮੩੮. ਸਮ੍ਮਟ੍ਠਾਨਂ ਮਨੋਭੁਨੋਤਿ ਮਨੋਭੁਹਦਯੋ ਤਸ੍ਸ ਹਦਯਸ੍ਸ ਸਮ੍ਮਟ੍ਠਾਨਂ.
੮੪੪. ਪਤ੍ਤੁਕਾਮੇਨ ਧੀਮਤਾ ਕਸਿਣਂ ਕਤ੍ਤਬ੍ਬਂ.
੮੪੫. ਸਂਹਾਰਿਮਨ੍ਤਿ ਇਤੋ ਚਿਤੋ ਚ ਹਰਿਤਬ੍ਬਕਸਿਣਂ. ਤਤ੍ਰਟ੍ਠਕਨ੍ਤਿ ਤਸ੍ਮਿਂ ਠਾਨੇ ਠਿਤਂ ਇਤੋ ਚਿਤੋ ਚ ਅਨਾਹਰਿਤਬ੍ਬਂ ਕਸਿਣਂ.
੮੪੯. ਵਿਵਟ੍ਟਂ ਪਨ ਮਿਚ੍ਛਤਾਤਿ ਨਿਬ੍ਬਾਨਂ ਇਚ੍ਛਨ੍ਤੇਨ ਵਿਦਤ੍ਥਿਚਤੁਰਙ੍ਗੁਲਂ ਵਟ੍ਟਂ ਕਾਤੁਂ ਤਂ ਕਸਿਣਂ ਵਟ੍ਟਤਿ.
੮੫੧-੨. ਹਤ੍ਥਪਾਸਪ੍ਪਮਾਣਸ੍ਮਿਂ, ਤਮ੍ਹਾ ਕਸਿਣਮਣ੍ਡਲਾਤਿ ਤਤੋ ਕਸਿਣਮਣ੍ਡਲਤੋ ਹਤ੍ਥਪਾਸਪ੍ਪਮਾਣਸ੍ਮਿਂ ਪਦੇਸੇ ਵਿਦਤ੍ਥਿਚਤੁਰਙ੍ਗੁਲੇ ਉਚ੍ਚੇ. ਪਰਿਮੁਖਂ ਸਤਿਨ੍ਤਿ ਕਮ੍ਮਟ੍ਠਾਨਾਭਿਮੁਖਂ ਸਤਿਂ.
੮੫੩-੪. ਨੇਕ੍ਖਮ੍ਮਨ੍ਤਿ ਝਾਨਂ. ਖੇਮਤੋ ਦਟ੍ਠੁਂ ਦਿਸ੍ਵਾ ਅਹਂ ਇਮਾਯ ਪਟਿਪਤ੍ਤਿਯਾ ਅਦ੍ਧਾ ਏਕਨ੍ਤੇਨ ਪਵਿਵੇਕਸੁਖਸ੍ਸ ਨਿਬ੍ਬਾਨਸੁਖਸ੍ਸ ਭਾਗੀ ਅਸ੍ਸਂ ਭਵੇਯ੍ਯਂ.
੮੫੬. ਸੋ ਕਸਿਣਸ੍ਸ ਵਣ੍ਣੋ ਤੇਨ ਯੋਗਿਨਾ ਨ ਪੇਕ੍ਖਿਤਬ੍ਬੋ, ਕਸਿਣਸ੍ਸ ਲਕ੍ਖਣਂ ਨ ਪੇਕ੍ਖਿਤਬ੍ਬਂ ਉਸ੍ਸਦਸ੍ਸ ਵਸੇਨ ਵਣ੍ਣਂ ਅਮੁਞ੍ਚਿਤ੍ਵਾ.
੮੬੦. ਏਵਂ ਇਮਿਨਾ ਵੁਤ੍ਤਪ੍ਪਕਾਰੇਨ ਏਕਗ੍ਗਚੇਤਸੋ ਏਕਗ੍ਗਚਿਤ੍ਤਸ੍ਸ ਯੋਗਿਨੋ ਨਿਮੀਲੇਤ੍ਵਾ ਆਵਜ੍ਜਨ੍ਤਸ੍ਸ ਯਥਾ ਯੇਨ ਪਕਾਰੇਨ ਕਮ੍ਮਟ੍ਠਾਨਂ ਹੋਤਿ ਉਮ੍ਮੀਲਿਤੇ ਕਾਲੇਪਿ, ਤਥਾ ਤੇਨ ਪਕਾਰੇਨ ਤਂ ਕਮ੍ਮਟ੍ਠਾਨਂ ਆਪਾਥਂ ਯਾਤਿ ਚੇ ਯਦਿ ਆਗਚ੍ਛਤਿ, ਉਗ੍ਗਹਮੇਵ ਉਗ੍ਗਹਨਿਮਿਤ੍ਤਂ.
੮੬੪. ਪਾਦਾਨਂ ਧੋਵਨੇ ਪਪਞ੍ਚਪਰਿਹਾਰਤ੍ਥਂ. ਏਕਤਲਿਕਾਤਿ ਏਕਤਲਮਤ੍ਤਾ.
੮੬੫. ਤਂ ਸਂਹਾਰਿਮਂ ਕਸਿਣਮਾਦਾਯ.
੮੬੬. ਸਮਨ੍ਨਾਹਰਿਤਬ੍ਬਨ੍ਤਿ ਕਮ੍ਮਟ੍ਠਾਨਂ ਸੁਮਨੇਨ ਆਹਰਿਤਬ੍ਬਂ, ਮਨਸਿਕਾਤਬ੍ਬਨ੍ਤਿ ਅਤ੍ਥੋ. ਤਕ੍ਕਾਹਟਨ੍ਤਿ ਵਿਤਕ੍ਕੇਨ ਆਹਟਂ ਫੁਸਿਤਂ ਕਰੇ ਕਰੇਯ੍ਯ.
੮੬੮. ਤਨ੍ਤਿ ਤਂ ਨਿਮਿਤ੍ਤਂ.
੮੭੧-੪. ਇਮਸ੍ਸਾਤਿ ਪਟਿਭਾਗਨਿਮਿਤ੍ਤਸ੍ਸ. ਪੁਰਿਮਸ੍ਸਾਤਿ ਉਗ੍ਗਹਨਿਮਿਤ੍ਤਸ੍ਸ. ਕੋ ਪਨ ਅਯਂ ਵਿਸੇਸੋ? ਥਵਿਕਾ ਨੀਹਰਿਤਂ ਆਦਾਸਮਣ੍ਡਲਂ ਮਜ੍ਜਿਤਂ ਵਿਯ. ਤੋਯਦੇ ਕਾਲ਼ਮੇਘੇ ਸੇਤਬਲਾਕਾ ਵਿਯ. ਤਦਾ ਤਂ ਉਗ੍ਗਹਨਿਮਿਤ੍ਤਂ ਪਦਾਲੇਤ੍ਵਾਵ ਨਿਗ੍ਗਤਂ ਪਟਿਭਾਗਨਿਮਿਤ੍ਤਂ. ਤਤੋ ਉਗ੍ਗਹਨਿਮਿਤ੍ਤਤੋ. ਤਨ੍ਤਿ ਤਂ ਪਟਿਭਾਗਨਿਮਿਤ੍ਤਂ. ਸਣ੍ਠਾਨਵਨ੍ਤਞ੍ਚ ਵਣ੍ਣਵਨ੍ਤਞ੍ਚ ਨ ਚ ਉਪਟ੍ਠਾਕਾਰਮਤ੍ਤਂ. ਪਞ੍ਞਜਨ੍ਤਿ ਪਞ੍ਞਾਯ ਜਾਤਂ.
੮੭੭-੮. ਉਪਚਾਰਕ੍ਖਣੇ ਤਸ੍ਸਾਤਿ ਤਸ੍ਸ ਸਮਾਧਿਨੋ ਉਪਚਾਰਕ੍ਖਣੇ. ਨੀਵਰਣਪ੍ਪਹਾਨੇਨ ਸਮਾਧਿਨੋ ਪਟਿਲਾਭਕ੍ਖਣੇ ਪਨ ਅਙ੍ਗਾਨਂ ਵਿਤਕ੍ਕਾਦੀਨਂ ਪਾਤੁਭਾਵੇਨ ਇਤਿ ਦ੍ਵੀਹਿ ਆਕਾਰੇਹਿ.
੮੭੯. ਦ੍ਵਿਨ੍ਨਂ ਸਮਾਧੀਨਨ੍ਤਿ ਉਪਚਾਰਪ੍ਪਨਾਸਮਾਧੀਨਂ.
੮੮੨. ਚਕ੍ਕਵਤ੍ਤਿਯਗਬ੍ਭੋਵ ਰਤਨਂ ਵਿਯ ਅਸ੍ਸ ਅਨੇਨ ਸੁਦੁਲ੍ਲਭਂ.
੮੮੪. ਅਯਨ੍ਤਿ ਪਟਿਸਨ੍ਧਿਸਨ੍ਥਾਰੋ.
੮੯੧-੨. ਸਮਤਂ ਵੀਰਿਯਸ੍ਸੇਵਾਤਿ ਵੀਰਿਯਸਮਭਾਵਂ. ਲਯਂ ਲੀਨਭਾਵਂ ਈਸਕਮ੍ਪਿ ਯਨ੍ਤਂ ਗਚ੍ਛਨ੍ਤਂ ਮਾਨਸਂ ਆਵਜ੍ਜਨਚਿਤ੍ਤਂ.
੮੯੫-੯. ਭਵਙ੍ਗਂ ਪਨ ਪਚ੍ਛਿਜ੍ਜ ਉਚ੍ਛਿਨ੍ਦਿਤ੍ਵਾ ਤਦੇਵ ਪਥਵੀਕਸਿਣਂ ਆਰਮ੍ਮਣਂ ਕਤ੍ਵਾ ਯੋਗਿਨੋ ਮਨੋਦ੍ਵਾਰਮ੍ਹਿ ਜਾਯਤਿ. ਤਤੋਤਿ ਆਵਜ੍ਜਨਤੋ ਤਤ੍ਰੇਵਾਰਮ੍ਮਣੇ ਤਸ੍ਮਿਂ ਪਥਵੀਕਸਿਣਸਙ੍ਖਾਤੇ ਆਰਮ੍ਮਣੇ ਤਸ੍ਸ ਯੋਗਿਨੋ ਜਵਨਾਨਿ ਚਤ੍ਤਾਰਿ ਵਾ ਪਞ੍ਚ ਵਾ ਜਾਯਨ੍ਤੇ. ਅਵਸਾਨੇ ਏਕਂ ਜਵਨਮਾਨਸਂ ਰੂਪਾਵਚਰਿਕਂ ਹੋਤਿ, ਤਸ੍ਮਿਂ ਰੂਪਾਵਚਰਿਕੇ ਵਿਤਕ੍ਕਾਦਯੋ ਅਙ੍ਗਾ. ਅਞ੍ਞੇਹਿ ਅਞ੍ਞੇਸਂ ਚਿਤ੍ਤਾਨਂ ਅਞ੍ਞੇਹਿ ਵਿਤਕ੍ਕਾਦੀਹਿ ਬਲਵਤਰਾ ਹੋਨ੍ਤਿ. ਤਾਨਿ ਅਪ੍ਪਨਾਭਾਵਂ ਅਪ੍ਪਤ੍ਤਾਨਿ ਅਪ੍ਪਨਾਚੇਤਸੋ ਪਰਿਕਮ੍ਮੋਪਚਾਰਤੋ ਪਰਿਕਮ੍ਮਭਾਵਤੋ ਪਰਿਕਮ੍ਮਾਨੀਤਿ ਵੁਚ੍ਚਨ੍ਤੇ, ਉਪਚਾਰਭਾਵਤੋ ਉਪਚਾਰਾਨੀਤਿ ਚ ਵੁਚ੍ਚਨ੍ਤੇ. ਤਾਨਿ ਜਵਨਾਨਿ ਅਪ੍ਪਨਾਯਾਨੁਲੋਮਤ੍ਤਾ ਅਨੁਲੋਮਾਨਿ ਏਵ ਚ ਵੁਚ੍ਚਨ੍ਤਿ. ਏਤ੍ਥ ਅਨੁਲੋਮਕੇਸੁ ਯਂ ਸਬ੍ਬਨ੍ਤਿਮਂ ਜਵਨਂ, ਤਂ ਗੋਤ੍ਰਭੂਤਿ ਪਵੁਚ੍ਚਤਿ.
੯੦੧. ਗੋਤ੍ਰਭੁ ਦਿਟ੍ਠਨ੍ਤਿ ਗੋਤ੍ਰਭੁ ਨਾਮ ਉਦ੍ਦਿਟ੍ਠਂ.
੯੦੪-੫. ਪੁਰਿਮੇਹਿ ਜਵਨੇਹਿ ਯਂ ਆਸੇਵਨਂ, ਤਂ ਬਲਵਪਚ੍ਚਯਂ ਲਦ੍ਧਾ ਲਭਿਤ੍ਵਾ ਛਟ੍ਠਂ ਜਵਨਂ, ਸਤ੍ਤਮਂ ਵਾ ਜਵਨਂ ਅਪ੍ਪੇਤਿ. ਇਤਿ ਵਚਨਂ ਪਵੁਚ੍ਚਤਿ, ਏਤ੍ਥ ਵਾਦੇ ਗੋਦਤ੍ਤੋ ਨਾਮ ਆਭਿਧਮ੍ਮਿਕੋ ਆਚਰਿਯੋ ਆਹ. ਛਿਨ੍ਨਤਟੇ ਮੁਖਂ ਯਸ੍ਸ ਛਿਨ੍ਨਤਟਮੁਖੋ.
੯੦੮. ਪਚ੍ਚਵੇਕ੍ਖਣਾ ਹੇਤੁ ਯਸ੍ਸ ਆਵਜ੍ਜਨਸ੍ਸਾਤਿ ਪਚ੍ਚਵੇਕ੍ਖਣਹੇਤੁਕਂ.
੯੧੧-੨. ਕਾਮਚ੍ਛਨ੍ਦਸ੍ਸ ਨਾਨਾਵਿਸਯੇ ਪਲੁਦ੍ਧਸ੍ਸ. ਚੇਤਸੋ ਏਕਸ੍ਮਿਂ ਵਿਸਯੇ ਸਮਾਧਾਨੇਨ ਸਮਾਧਿ.
੯੧੫. ਸਯਞ੍ਚ ਅਤਿਸਨ੍ਤਤੋ ਸੁਖਂ ਅਵੂਪਸਨ੍ਤਸਭਾਵਸ੍ਸ ਉਦ੍ਧਚ੍ਚਕੁਕ੍ਕੁਚ੍ਚਦ੍ਵਯਸ੍ਸ ਪਟਿਪਕ੍ਖਤੋ ਵੁਤ੍ਤਂ.
੯੧੭. ਪਞ੍ਚਙ੍ਗਵਿਪ੍ਪਯੁਤ੍ਤਨ੍ਤਿ ਪਞ੍ਚਨੀਵਰਣਵਿਪ੍ਪਯੁਤ੍ਤਂ. ਪਞ੍ਚਙ੍ਗਸਂਯੁਤਨ੍ਤਿ ਵਿਤਕ੍ਕਾਦੀਹਿ ਯੁਤ੍ਤਂ.
੯੨੦-੧. ਵੇਪੁਲ੍ਲਨ੍ਤਿ ਕਮ੍ਮਟ੍ਠਾਨਸ੍ਸ ਵਿਪੁਲਭਾਵਂ. ਤਞ੍ਚ ਪਟਿਭਾਗਨਿਮਿਤ੍ਤਂ ਉਪਚਾਰਂ ਵਿਚਾਰੇਤ੍ਵਾ ਵਡ੍ਢੇਤੁਂ ਵਟ੍ਟਤਿ.
੯੨੮-੩੧. ਪਮਾਦਯੋਗਿਨੋਤਿ ਪਮਾਦਵਸੇਨ ਯੋਗਿਸਮ੍ਪਨ੍ਨਸ੍ਸ ਕਾਮਸਹਗਤਾ ਸਞ੍ਞਾਮਨਕ੍ਕਾਰਾ ਮਨਸਿਕਾਰਾ ਚੇ ਚਰਨ੍ਤਿ, ਤਸ੍ਸ ਯੋਗਿਨੋ ਤਂ ਝਾਨਂ ਹਾਨਭਾਗਿਯਂ ਹੋਤਿ. ਸਤਿ ਸਨ੍ਤਿਟ੍ਠਤੇ ਤਸ੍ਮਿਂ, ਸਨ੍ਤਾ ਤਦਨੁਧਮ੍ਮਤਾ ਤਸ੍ਮਿਂ ਪਠਮਜ੍ਝਾਨੇ ਤਦਨੁਧਮ੍ਮਤਾ ਤਸ੍ਸ ਪਠਮਜ੍ਝਾਨਸ੍ਸ ਅਨੁਰੂਪਾ ਸਤਿ ਨਿਕਨ੍ਤਿ ਸਨ੍ਤਾ ਸਂਵਿਜ੍ਜਮਾਨਾ ਸਨ੍ਤਿਟ੍ਠਤੇ ਸਨ੍ਤਿਟ੍ਠਤਿ, ਤਂ ਝਾਨਂ ਮਨ੍ਦਸ੍ਸ ਯੋਗਿਨੋ ਠਿਤਿਭਾਗਿਯਂ ਹੋਤਿ, ਠਿਤਿਂ ਭਜਤਿ. ਵਿਸੇਸਭਾਗਿਯਂ ਹੋਤਿ, ਵਿਸੇਸਂ ਦੁਤਿਯਾਦਿਭਾਵਨਂ ਪਾਪੁਣਾਤੀਤਿ ਅਤ੍ਥੋ. ਨਿਬ੍ਬਿਦਾਸਂਯੁਤਾ ਸਞ੍ਞਾ, ਮਨਕ੍ਕਾਰਾਤਿ ਨਿਬ੍ਬਿਦਾਵਿਪਸ੍ਸਨਾਸਂਯੁਤ੍ਤਾ ਸਞ੍ਞਾਮਨਕ੍ਕਾਰਾ. ਨਿਬ੍ਬੇਧਭਾਗਿਯਨ੍ਤਿ ਲੋਕੁਤ੍ਤਰਭਾਗਿਯਂ, ਲੋਕੁਤ੍ਤਰਮਗ੍ਗਭਾਗਿਯਨ੍ਤਿ ਅਤ੍ਥੋ.
੯੩੩. ਅਯਂ ਸਮਾਪਤ੍ਤਿ ਆਸਨ੍ਨਾਕੁਸਲਾਰਯੋ ਆਸਨ੍ਨਾਕੁਸਲਾਰਿਕਾ ਯਸ੍ਮਾ ਤਕ੍ਕਚਾਰਾਨਂ ਥੂਲਤ੍ਤਾ ਚ, ਤਸ੍ਮਾ ਕਾਰਣਾ ਅਯਂ ਸਮਾਪਤ੍ਤਿ ਅਙ੍ਗਦੁਬ੍ਬਲਾ.
੯੩੫. ਨਿਕਨ੍ਤਿਨ੍ਤਿ ਤਣ੍ਹਂ. ਪਰਿਯਾਦਾਯਾਤਿ ਸੋਸਾਪੇਤ੍ਵਾ.
੯੩੬. ਵਿਧਿਨਾਤਿ ਪੁਬ੍ਬੇ ਵੁਤ੍ਤਵਿਧਿਨਾ. ਸਤਸ੍ਸਾਤਿ ਸਤਿਸਮ੍ਪਨ੍ਨਸ੍ਸ.
੯੩੮. ਨਿਮਿਤ੍ਤਂ ਤੁ ਤਦੇਵ ਚਾਤਿ ਤਮੇਵ ਪਠਮਨਿਮਿਤ੍ਤਂ ‘‘ਪਥਵੀ ਪਥਵੀ’’ਇਤਿ ਏਵਂ ਮਨਸਾ ਕਰੋਨ੍ਤਸ੍ਸ.
੯੪੩. ਸਮ੍ਪਸਾਦਨਨ੍ਤਿ ਸਦ੍ਧਾ. ਮਜ੍ਝਤ੍ਤਨ੍ਤਿ ਤਤ੍ਰਮਜ੍ਝਤ੍ਤਤਾ.
੯੪੪. ਦੁਵਙ੍ਗਹੀਨਨ੍ਤਿ ਵਿਤਕ੍ਕਵਿਚਾਰਹੀਨਂ.
੯੪੮. ਪੀਤਿ ਨਾਮ ਚੇਤਸੋ ਚਿਤ੍ਤਸ੍ਸ ਉਪ੍ਪਿਲਾਪਨਂ ਉਪ੍ਪਿਲਾਪਿਤਤ੍ਤਂ ਯਤੋ ਯਸ੍ਮਾ ਕਾਰਣਾ.
੯੬੧-੨. ਆਸਨ੍ਨਪੀਤਿਦੋਸਾਤਿ ਪੀਤਿਯੇਵ ਦੋਸਾ. ਏਤ੍ਥ ਏਤਸ੍ਮਿਂ ਤਤਿਯਜ੍ਝਾਨੇ ਯਦੇਵ ਯਂ ਏਵ ਸੁਖਂ ਇਤਿ ਏਵਂ ਸੁਖਂ ਚੇਤਸੋ ਆਭੋਗੋ ਮਨਸਿਕਾਰੋ. ਏਵਂ ਇਮਿਨਾ ਪਕਾਰੇਨ ਸੁਖਸ੍ਸ ਥੂਲਤ੍ਤਾ ਅਯਂ ਸਮਾਪਤ੍ਤਿ ਅਙ੍ਗਦੁਬ੍ਬਲਾ ਹੋਤਿ.
੯੭੪-੫. ਸੁਖਂ ਉਪੇਕ੍ਖਾਯ ਆਸੇਵਨਂ ਪਨ ਨ ਹੋਤਿ ਯਸ੍ਮਾ ਉਪੇਕ੍ਖਾਯ ਆਸੇਵਨਂ ਪਨ ਨ ਹੋਤਿ, ਯਸ੍ਮਾ ਉਪੇਕ੍ਖਾਸਹਗਤਾਨਿ ਜਵਨਾਨਿ ਜਵਨ੍ਤਿ, ਤਸ੍ਮਾ ਚਤੁਤ੍ਥਜ੍ਝਾਨਂ ਉਪੇਕ੍ਖਾਸਹਗਤਂ ਸਮੁਦੀਰਿਤਂ.
੯੭੬. ਦੁਤਿਯਜ੍ਝਾਨਂ ਦ੍ਵਿਧਾ ਦ੍ਵੀਹਿ ਕੋਟ੍ਠਾਸੇਹਿ ਠਿਤਂ.
੯੭੯. ਅਯਂ ਅਭਿਧਮ੍ਮਾਵਤਾਰੋ ਸੁਮਧੁਰਵਰਤਰਵਚਨੋ ਕਂ ਨੁ ਜਨਂ ਨੇਵ ਰਞ੍ਜਯਤਿ, ਅਤਿਨਿਸਿਤਵਿਸਦੋ ਬੁਦ੍ਧਿਪ੍ਪਚਾਰੋ ਯਸ੍ਸ ਸੋ ਅਤਿਨਿਸਿਤਵਿਸਦਬੁਦ੍ਧਿਪ੍ਪਚਾਰੋ, ਸੋ ਤੇਨ ਜਨੇਨ ਵੇਦਨੀਯੋ ਜਾਨਿਤਬ੍ਬੋ.
ਇਤਿ ਅਭਿਧਮ੍ਮਾਵਤਾਰਟੀਕਾਯ
ਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਚੁਦ੍ਦਸਮੋ ਪਰਿਚ੍ਛੇਦੋ.