੬. ਅਭਯਸੁਤ੍ਤਂ

੨੩੭. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਗਿਜ੍ਝਕੂਟੇ ਪਬ੍ਬਤੇ. ਅਥ ਖੋ ਅਭਯੋ ਰਾਜਕੁਮਾਰੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਅਭਯੋ ਰਾਜਕੁਮਾਰੋ ਭਗਵਨ੍ਤਂ ਏਤਦਵੋਚ – ‘‘ਪੂਰਣੋ, ਭਨ੍ਤੇ, ਕਸ੍ਸਪੋ ਏਵਮਾਹ – ‘ਨਤ੍ਥਿ ਹੇਤੁ, ਨਤ੍ਥਿ ਪਚ੍ਚਯੋ ਅਞ੍ਞਾਣਾਯ ਅਦਸ੍ਸਨਾਯ. ਅਹੇਤੁ, ਅਪ੍ਪਚ੍ਚਯੋ [ਅਪ੍ਪਚ੍ਚਯਾ (ਸੀ.), ਅਪ੍ਪਚ੍ਚਯਂ (?)] ਅਞ੍ਞਾਣਂ ਅਦਸ੍ਸਨਂ ਹੋਤਿ. ਨਤ੍ਥਿ ਹੇਤੁ, ਨਤ੍ਥਿ ਪਚ੍ਚਯੋ ਞਾਣਾਯ ਦਸ੍ਸਨਾਯ. ਅਹੇਤੁ, ਅਪ੍ਪਚ੍ਚਯੋ ਞਾਣਂ ਦਸ੍ਸਨਂ ਹੋਤੀ’ਤਿ. ਇਧ ਭਗਵਾ ਕਿਮਾਹਾ’’ਤਿ? ‘‘ਅਤ੍ਥਿ, ਰਾਜਕੁਮਾਰ, ਹੇਤੁ, ਅਤ੍ਥਿ ਪਚ੍ਚਯੋ ਅਞ੍ਞਾਣਾਯ ਅਦਸ੍ਸਨਾਯ. ਸਹੇਤੁ, ਸਪ੍ਪਚ੍ਚਯੋ [ਸਪ੍ਪਚ੍ਚਯਾ (ਸੀ.), ਸਪ੍ਪਚ੍ਚਯਂ (?)] ਅਞ੍ਞਾਣਂ ਅਦਸ੍ਸਨਂ ਹੋਤਿ. ਅਤ੍ਥਿ, ਰਾਜਕੁਮਾਰ, ਹੇਤੁ, ਅਤ੍ਥਿ ਪਚ੍ਚਯੋ ਞਾਣਾਯ ਦਸ੍ਸਨਾਯ. ਸਹੇਤੁ, ਸਪ੍ਪਚ੍ਚਯੋ ਞਾਣਂ ਦਸ੍ਸਨਂ ਹੋਤੀ’’ਤਿ.

‘‘ਕਤਮੋ ਪਨ, ਭਨ੍ਤੇ, ਹੇਤੁ, ਕਤਮੋ ਪਚ੍ਚਯੋ ਅਞ੍ਞਾਣਾਯ ਅਦਸ੍ਸਨਾਯ? ਕਥਂ ਸਹੇਤੁ, ਸਪ੍ਪਚ੍ਚਯੋ ਅਞ੍ਞਾਣਂ ਅਦਸ੍ਸਨਂ ਹੋਤੀ’’ਤਿ? ‘‘ਯਸ੍ਮਿਂ ਖੋ, ਰਾਜਕੁਮਾਰ, ਸਮਯੇ ਕਾਮਰਾਗਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ ਕਾਮਰਾਗਪਰੇਤੇਨ, ਉਪ੍ਪਨ੍ਨਸ੍ਸ ਚ ਕਾਮਰਾਗਸ੍ਸ ਨਿਸ੍ਸਰਣਂ ਯਥਾਭੂਤਂ ਨ ਜਾਨਾਤਿ ਨ ਪਸ੍ਸਤਿ – ਅਯਮ੍ਪਿ ਖੋ, ਰਾਜਕੁਮਾਰ, ਹੇਤੁ, ਅਯਂ ਪਚ੍ਚਯੋ ਅਞ੍ਞਾਣਾਯ ਅਦਸ੍ਸਨਾਯ. ਏਵਮ੍ਪਿ ਸਹੇਤੁ ਸਪ੍ਪਚ੍ਚਯੋ ਅਞ੍ਞਾਣਂ ਅਦਸ੍ਸਨਂ ਹੋਤਿ.

‘‘ਪੁਨ ਚਪਰਂ, ਰਾਜਕੁਮਾਰ, ਯਸ੍ਮਿਂ ਸਮਯੇ ਬ੍ਯਾਪਾਦਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ ਬ੍ਯਾਪਾਦਪਰੇਤੇਨ…ਪੇ… ਥਿਨਮਿਦ੍ਧਪਰਿਯੁਟ੍ਠਿਤੇਨ… ਉਦ੍ਧਚ੍ਚਕੁਕ੍ਕੁਚ੍ਚਪਰਿਯੁਟ੍ਠਿਤੇਨ… ਵਿਚਿਕਿਚ੍ਛਾਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ ਵਿਚਿਕਿਚ੍ਛਾਪਰੇਤੇਨ, ਉਪ੍ਪਨ੍ਨਾਯ ਚ ਵਿਚਿਕਿਚ੍ਛਾਯ ਨਿਸ੍ਸਰਣਂ ਯਥਾਭੂਤਂ ਨ ਜਾਨਾਤਿ ਨ ਪਸ੍ਸਤਿ – ਅਯਮ੍ਪਿ ਖੋ, ਰਾਜਕੁਮਾਰ, ਹੇਤੁ, ਅਯਂ ਪਚ੍ਚਯੋ ਅਞ੍ਞਾਣਾਯ ਅਦਸ੍ਸਨਾਯ. ਏਵਮ੍ਪਿ ਸਹੇਤੁ ਸਪ੍ਪਚ੍ਚਯੋ ਅਞ੍ਞਾਣਂ ਅਦਸ੍ਸਨਂ ਹੋਤੀ’’ਤਿ.

‘‘ਕੋ ਨਾਮਾਯਂ, ਭਨ੍ਤੇ, ਧਮ੍ਮਪਰਿਯਾਯੋ’’ਤਿ? ‘‘ਨੀਵਰਣਾ ਨਾਮੇਤੇ, ਰਾਜਕੁਮਾਰਾ’’ਤਿ. ‘‘ਤਗ੍ਘ, ਭਗਵਾ, ਨੀਵਰਣਾ; ਤਗ੍ਘ, ਸੁਗਤ, ਨੀਵਰਣਾ! ਏਕਮੇਕੇਨਪਿ ਖੋ, ਭਨ੍ਤੇ, ਨੀਵਰਣੇਨ ਅਭਿਭੂਤੋ ਯਥਾਭੂਤਂ ਨ ਜਾਨੇਯ੍ਯ ਨ ਪਸ੍ਸੇਯ੍ਯ, ਕੋ ਪਨ ਵਾਦੋ ਪਞ੍ਚਹਿ ਨੀਵਰਣੇਹਿ?

‘‘ਕਤਮੋ ਪਨ, ਭਨ੍ਤੇ, ਹੇਤੁ, ਕਤਮੋ ਪਚ੍ਚਯੋ ਞਾਣਾਯ ਦਸ੍ਸਨਾਯ? ਕਥਂ ਸਹੇਤੁ, ਸਪ੍ਪਚ੍ਚਯੋ ਞਾਣਂ ਦਸ੍ਸਨਂ ਹੋਤੀ’’ਤਿ? ‘‘ਇਧ, ਰਾਜਕੁਮਾਰ, ਭਿਕ੍ਖੁ ਸਤਿਸਮ੍ਬੋਜ੍ਝਙ੍ਗਂ ਭਾਵੇਤਿ ਵਿਵੇਕਨਿਸ੍ਸਿਤਂ ਵਿਰਾਗਨਿਸ੍ਸਿਤਂ ਨਿਰੋਧਨਿਸ੍ਸਿਤਂ ਵੋਸ੍ਸਗ੍ਗਪਰਿਣਾਮਿਂ. ਸੋ ਸਤਿਸਮ੍ਬੋਜ੍ਝਙ੍ਗਂ ਭਾਵਿਤੇਨ ਚਿਤ੍ਤੇਨ ਯਥਾਭੂਤਂ ਜਾਨਾਤਿ ਪਸ੍ਸਤਿ – ਅਯਮ੍ਪਿ ਖੋ, ਰਾਜਕੁਮਾਰ, ਹੇਤੁ, ਅਯਂ ਪਚ੍ਚਯੋ ਞਾਣਾਯ ਦਸ੍ਸਨਾਯ. ਏਵਮ੍ਪਿ ਸਹੇਤੁ, ਸਪ੍ਪਚ੍ਚਯੋ ਞਾਣਂ ਦਸ੍ਸਨਂ ਹੋਤਿ.

‘‘ਪੁਨ ਚਪਰਂ, ਰਾਜਕੁਮਾਰ, ਭਿਕ੍ਖੁ…ਪੇ… ਉਪੇਕ੍ਖਾਸਮ੍ਬੋਜ੍ਝਙ੍ਗਂ ਭਾਵੇਤਿ ਵਿਵੇਕਨਿਸ੍ਸਿਤਂ ਵਿਰਾਗਨਿਸ੍ਸਿਤਂ ਨਿਰੋਧਨਿਸ੍ਸਿਤਂ ਵੋਸ੍ਸਗ੍ਗਪਰਿਣਾਮਿਂ. ਸੋ ਉਪੇਕ੍ਖਾਸਮ੍ਬੋਜ੍ਝਙ੍ਗਂ ਭਾਵਿਤੇਨ ਚਿਤ੍ਤੇਨ ਯਥਾਭੂਤਂ ਜਾਨਾਤਿ ਪਸ੍ਸਤਿ – ਅਯਮ੍ਪਿ ਖੋ, ਰਾਜਕੁਮਾਰ, ਹੇਤੁ, ਅਯਂ ਪਚ੍ਚਯੋ ਞਾਣਾਯ ਦਸ੍ਸਨਾਯ. ਏਵਂ ਸਹੇਤੁ, ਸਪ੍ਪਚ੍ਚਯੋ ਞਾਣਂ ਦਸ੍ਸਨਂ ਹੋਤੀ’’ਤਿ.

‘‘ਕੋ ਨਾਮਾਯਂ, ਭਨ੍ਤੇ, ਧਮ੍ਮਪਰਿਯਾਯੋ’’ਤਿ? ‘‘ਬੋਜ੍ਝਙ੍ਗਾ ਨਾਮੇਤੇ, ਰਾਜਕੁਮਾਰਾ’’ਤਿ. ‘‘ਤਗ੍ਘ, ਭਗਵਾ, ਬੋਜ੍ਝਙ੍ਗਾ; ਤਗ੍ਘ, ਸੁਗਤ, ਬੋਜ੍ਝਙ੍ਗਾ! ਏਕਮੇਕੇਨਪਿ ਖੋ, ਭਨ੍ਤੇ, ਬੋਜ੍ਝਙ੍ਗੇਨ ਸਮਨ੍ਨਾਗਤੋ ਯਥਾਭੂਤਂ ਜਾਨੇਯ੍ਯ ਪਸ੍ਸੇਯ੍ਯ, ਕੋ ਪਨ ਵਾਦੋ ਸਤ੍ਤਹਿ ਬੋਜ੍ਝਙ੍ਗੇਹਿ? ਯੋਪਿ ਮੇ, ਭਨ੍ਤੇ, ਗਿਜ੍ਝਕੂਟਂ ਪਬ੍ਬਤਂ ਆਰੋਹਨ੍ਤਸ੍ਸ ਕਾਯਕਿਲਮਥੋ ਚਿਤ੍ਤਕਿਲਮਥੋ, ਸੋਪਿ ਮੇ ਪਟਿਪ੍ਪਸ੍ਸਦ੍ਧੋ, ਧਮ੍ਮੋ ਚ ਮੇ ਅਭਿਸਮਿਤੋ’’ਤਿ. ਛਟ੍ਠਂ.

ਸਾਕਚ੍ਛਵਗ੍ਗੋ ਛਟ੍ਠੋ.

ਤਸ੍ਸੁਦ੍ਦਾਨਂ –

ਆਹਾਰਾ ਪਰਿਯਾਯਮਗ੍ਗਿ, ਮੇਤ੍ਤਂ ਸਙ੍ਗਾਰਵੇਨ ਚ;

ਅਭਯੋ ਪੁਚ੍ਛਿਤੋ ਪਞ੍ਹਂ, ਗਿਜ੍ਝਕੂਟਮ੍ਹਿ ਪਬ੍ਬਤੇਤਿ.