੧. ਕਾਯਗਤਾਸਤਿਸੁਤ੍ਤਂ

੩੬੬. ਸਾਵਤ੍ਥਿਨਿਦਾਨਂ. ‘‘ਅਸਙ੍ਖਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਸਙ੍ਖਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਸਙ੍ਖਤਂ? ਯੋ, ਭਿਕ੍ਖਵੇ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ – ਇਦਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਂ. ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਕਾਯਗਤਾਸਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ’’.

‘‘ਇਤਿ ਖੋ, ਭਿਕ੍ਖਵੇ, ਦੇਸਿਤਂ ਵੋ ਮਯਾ ਅਸਙ੍ਖਤਂ, ਦੇਸਿਤੋ ਅਸਙ੍ਖਤਗਾਮਿਮਗ੍ਗੋ. ਯਂ, ਭਿਕ੍ਖਵੇ, ਸਤ੍ਥਾਰਾ ਕਰਣੀਯਂ ਸਾਵਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ, ਕਤਂ ਵੋ ਤਂ ਮਯਾ. ਏਤਾਨਿ, ਭਿਕ੍ਖਵੇ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ. ਝਾਯਥ [ਨਿਜ੍ਝਾਯਥ (ਕ.)], ਭਿਕ੍ਖਵੇ, ਮਾ ਪਮਾਦਤ੍ਥ; ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ. ਅਯਂ ਵੋ ਅਮ੍ਹਾਕਂ ਅਨੁਸਾਸਨੀ’’ਤਿ. ਪਠਮਂ.