੬. ਅਸਿਬਨ੍ਧਕਪੁਤ੍ਤਸੁਤ੍ਤਂ

੩੫੮. ਏਕਂ ਸਮਯਂ ਭਗਵਾ ਨਾਲ਼ਨ੍ਦਾਯਂ ਵਿਹਰਤਿ ਪਾਵਾਰਿਕਮ੍ਬਵਨੇ. ਅਥ ਖੋ ਅਸਿਬਨ੍ਧਕਪੁਤ੍ਤੋ ਗਾਮਣਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਅਸਿਬਨ੍ਧਕਪੁਤ੍ਤੋ ਗਾਮਣਿ ਭਗਵਨ੍ਤਂ ਏਤਦਵੋਚ – ‘‘ਬ੍ਰਾਹ੍ਮਣਾ, ਭਨ੍ਤੇ, ਪਚ੍ਛਾ ਭੂਮਕਾ ਕਾਮਣ੍ਡਲੁਕਾ ਸੇਵਾਲਮਾਲਿਕਾ ਉਦਕੋਰੋਹਕਾ ਅਗ੍ਗਿਪਰਿਚਾਰਕਾ. ਤੇ ਮਤਂ ਕਾਲਙ੍ਕਤਂ ਉਯ੍ਯਾਪੇਨ੍ਤਿ ਨਾਮ ਸਞ੍ਞਾਪੇਨ੍ਤਿ ਨਾਮ ਸਗ੍ਗਂ ਨਾਮ ਓਕ੍ਕਾਮੇਨ੍ਤਿ. ਭਗਵਾ ਪਨ, ਭਨ੍ਤੇ, ਅਰਹਂ ਸਮ੍ਮਾਸਮ੍ਬੁਦ੍ਧੋ ਪਹੋਤਿ ਤਥਾ ਕਾਤੁਂ ਯਥਾ ਸਬ੍ਬੋ ਲੋਕੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯਾ’’ਤਿ? ‘‘ਤੇਨ ਹਿ, ਗਾਮਣਿ, ਤਞ੍ਞੇਵੇਤ੍ਥ ਪਟਿਪੁਚ੍ਛਿਸ੍ਸਾਮਿ. ਯਥਾ ਤੇ ਖਮੇਯ੍ਯ ਤਥਾ ਨਂ ਬ੍ਯਾਕਰੇਯ੍ਯਾਸੀ’’ਤਿ.

‘‘ਤਂ ਕਿਂ ਮਞ੍ਞਸਿ, ਗਾਮਣਿ, ਇਧਸ੍ਸ ਪੁਰਿਸੋ ਪਾਣਾਤਿਪਾਤੀ ਅਦਿਨ੍ਨਾਦਾਯੀ ਕਾਮੇਸੁਮਿਚ੍ਛਾਚਾਰੀ ਮੁਸਾਵਾਦੀ ਪਿਸੁਣਵਾਚੋ ਫਰੁਸਵਾਚੋ ਸਮ੍ਫਪ੍ਪਲਾਪੀ ਅਭਿਜ੍ਝਾਲੁ ਬ੍ਯਾਪਨ੍ਨਚਿਤ੍ਤੋ ਮਿਚ੍ਛਾਦਿਟ੍ਠਿਕੋ. ਤਮੇਨਂ ਮਹਾ ਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ – ‘ਅਯਂ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤੂ’ਤਿ. ਤਂ ਕਿਂ ਮਞ੍ਞਸਿ, ਗਾਮਣਿ, ਅਪਿ ਨੁ ਸੋ ਪੁਰਿਸੋ ਮਹਤੋ ਜਨਕਾਯਸ੍ਸ ਆਯਾਚਨਹੇਤੁ ਵਾ ਥੋਮਨਹੇਤੁ ਵਾ ਪਞ੍ਜਲਿਕਾ ਅਨੁਪਰਿਸਕ੍ਕਨਹੇਤੁ ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’.

‘‘ਸੇਯ੍ਯਥਾਪਿ, ਗਾਮਣਿ, ਪੁਰਿਸੋ ਮਹਤਿਂ ਪੁਥੁਸਿਲਂ ਗਮ੍ਭੀਰੇ ਉਦਕਰਹਦੇ ਪਕ੍ਖਿਪੇਯ੍ਯ. ਤਮੇਨਂ ਮਹਾ ਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ – ‘ਉਮ੍ਮੁਜ੍ਜ, ਭੋ ਪੁਥੁਸਿਲੇ, ਉਪ੍ਲਵ, ਭੋ ਪੁਥੁਸਿਲੇ, ਥਲਮੁਪ੍ਲਵ, ਭੋ ਪੁਥੁਸਿਲੇ’ਤਿ. ਤਂ ਕਿਂ ਮਞ੍ਞਸਿ, ਗਾਮਣਿ, ਅਪਿ ਨੁ ਸਾ ਪੁਥੁਸਿਲਾ ਮਹਤੋ ਜਨਕਾਯਸ੍ਸ ਆਯਾਚਨਹੇਤੁ ਵਾ ਥੋਮਨਹੇਤੁ ਵਾ ਪਞ੍ਜਲਿਕਾ ਅਨੁਪਰਿਸਕ੍ਕਨਹੇਤੁ ਵਾ ਉਮ੍ਮੁਜ੍ਜੇਯ੍ਯ ਵਾ ਉਪ੍ਲਵੇਯ੍ਯ ਵਾ ਥਲਂ ਵਾ ਉਪ੍ਲਵੇਯ੍ਯਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’. ‘‘ਏਵਮੇਵ ਖੋ, ਗਾਮਣਿ, ਯੋ ਸੋ ਪੁਰਿਸੋ ਪਾਣਾਤਿਪਾਤੀ ਅਦਿਨ੍ਨਾਦਾਯੀ ਕਾਮੇਸੁਮਿਚ੍ਛਾਚਾਰੀ ਮੁਸਾਵਾਦੀ ਪਿਸੁਣਵਾਚੋ ਫਰੁਸਵਾਚੋ ਸਮ੍ਫਪ੍ਪਲਾਪੀ ਅਭਿਜ੍ਝਾਲੁ ਬ੍ਯਾਪਨ੍ਨਚਿਤ੍ਤੋ ਮਿਚ੍ਛਾਦਿਟ੍ਠਿਕੋ. ਕਿਞ੍ਚਾਪਿ ਤਂ ਮਹਾ ਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ – ‘ਅਯਂ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤੂ’’’ਤਿ, ਅਥ ਖੋ ਸੋ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯ.

‘‘ਤਂ ਕਿਂ ਮਞ੍ਞਸਿ, ਗਾਮਣਿ, ਇਧਸ੍ਸ [ਇਧ (ਕ.), ਇਧ ਚਸ੍ਸ (?)] ਪੁਰਿਸੋ ਪਾਣਾਤਿਪਾਤਾ ਪਟਿਵਿਰਤੋ ਅਦਿਨ੍ਨਾਦਾਨਾ ਪਟਿਵਿਰਤੋ ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ ਮੁਸਾਵਾਦਾ ਪਟਿਵਿਰਤੋ ਪਿਸੁਣਾਯ ਵਾਚਾਯ ਪਟਿਵਿਰਤੋ ਫਰੁਸਾਯ ਵਾਚਾਯ ਪਟਿਵਿਰਤੋ ਸਮ੍ਫਪ੍ਪਲਾਪਾ ਪਟਿਵਿਰਤੋ ਅਨਭਿਜ੍ਝਾਲੁ ਅਬ੍ਯਾਪਨ੍ਨਚਿਤ੍ਤੋ ਸਮ੍ਮਾਦਿਟ੍ਠਿਕੋ. ਤਮੇਨਂ ਮਹਾ ਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ – ‘ਅਯਂ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤੂ’ਤਿ. ਤਂ ਕਿਂ ਮਞ੍ਞਸਿ, ਗਾਮਣਿ, ਅਪਿ ਨੁ ਸੋ ਪੁਰਿਸੋ ਮਹਤੋ ਜਨਕਾਯਸ੍ਸ ਆਯਾਚਨਹੇਤੁ ਵਾ ਥੋਮਨਹੇਤੁ ਵਾ ਪਞ੍ਜਲਿਕਾ ਅਨੁਪਰਿਸਕ੍ਕਨਹੇਤੁ ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’.

‘‘ਸੇਯ੍ਯਥਾਪਿ, ਗਾਮਣਿ, ਪੁਰਿਸੋ ਸਪ੍ਪਿਕੁਮ੍ਭਂ ਵਾ ਤੇਲਕੁਮ੍ਭਂ ਵਾ ਗਮ੍ਭੀਰੇ ਉਦਕਰਹਦੇ ਓਗਾਹੇਤ੍ਵਾ ਭਿਨ੍ਦੇਯ੍ਯ. ਤਤ੍ਰ ਯਾਸ੍ਸ ਸਕ੍ਖਰਾ ਵਾ ਕਠਲਾ ਵਾ ਸਾ ਅਧੋਗਾਮੀ [ਅਧੋਗਾਮਿਨੀ (?)] ਅਸ੍ਸ; ਯਞ੍ਚ ਖ੍ਵਸ੍ਸ ਤਤ੍ਰ ਸਪ੍ਪਿ ਵਾ ਤੇਲਂ ਵਾ ਤਂ ਉਦ੍ਧਂ ਗਾਮਿ ਅਸ੍ਸ. ਤਮੇਨਂ ਮਹਾ ਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ – ‘ਓਸੀਦ, ਭੋ ਸਪ੍ਪਿਤੇਲ, ਸਂਸੀਦ, ਭੋ ਸਪ੍ਪਿਤੇਲ, ਅਧੋ ਗਚ੍ਛ, ਭੋ ਸਪ੍ਪਿਤੇਲਾ’ਤਿ. ਤਂ ਕਿਂ ਮਞ੍ਞਸਿ, ਗਾਮਣਿ, ਅਪਿ ਨੁ ਤਂ ਸਪ੍ਪਿਤੇਲਂ ਮਹਤੋ ਜਨਕਾਯਸ੍ਸ ਆਯਾਚਨਹੇਤੁ ਵਾ ਥੋਮਨਹੇਤੁ ਵਾ ਪਞ੍ਜਲਿਕਾ ਅਨੁਪਰਿਸਕ੍ਕਨਹੇਤੁ ਵਾ ਓਸੀਦੇਯ੍ਯ ਵਾ ਸਂਸੀਦੇਯ੍ਯ ਵਾ ਅਧੋ ਵਾ ਗਚ੍ਛੇਯ੍ਯਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’. ‘‘ਏਵਮੇਵ ਖੋ, ਗਾਮਣਿ, ਯੋ ਸੋ ਪੁਰਿਸੋ ਪਾਣਾਤਿਪਾਤਾ ਪਟਿਵਿਰਤੋ, ਅਦਿਨ੍ਨਾਦਾਨਾ ਪਟਿਵਿਰਤੋ, ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ, ਮੁਸਾਵਾਦਾ ਪਟਿਵਿਰਤੋ, ਪਿਸੁਣਾਯ ਵਾਚਾਯ ਪਟਿਵਿਰਤੋ, ਫਰੁਸਾਯ ਵਾਚਾਯ ਪਟਿਵਿਰਤੋ, ਸਮ੍ਫਪ੍ਪਲਾਪਾ ਪਟਿਵਿਰਤੋ, ਅਨਭਿਜ੍ਝਾਲੁ, ਅਬ੍ਯਾਪਨ੍ਨਚਿਤ੍ਤੋ, ਸਮ੍ਮਾਦਿਟ੍ਠਿਕੋ, ਕਿਞ੍ਚਾਪਿ ਤਂ ਮਹਾ ਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ – ‘ਅਯਂ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤੂ’ਤਿ, ਅਥ ਖੋ ਸੋ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯਾ’’ਤਿ. ਏਵਂ ਵੁਤ੍ਤੇ, ਅਸਿਬਨ੍ਧਕਪੁਤ੍ਤੋ ਗਾਮਣਿ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭਨ੍ਤੇ…ਪੇ… ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ. ਛਟ੍ਠਂ.