੧੧. ਭਦ੍ਰਕਸੁਤ੍ਤਂ

੩੬੩. ਏਕਂ ਸਮਯਂ ਭਗਵਾ ਮਲ੍ਲੇਸੁ ਵਿਹਰਤਿ ਉਰੁਵੇਲਕਪ੍ਪਂ ਨਾਮ ਮਲ੍ਲਾਨਂ ਨਿਗਮੋ. ਅਥ ਖੋ ਭਦ੍ਰਕੋ ਗਾਮਣਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਭਦ੍ਰਕੋ ਗਾਮਣਿ ਭਗਵਨ੍ਤਂ ਏਤਦਵੋਚ – ‘‘ਸਾਧੁ ਮੇ, ਭਨ੍ਤੇ, ਭਗਵਾ ਦੁਕ੍ਖਸ੍ਸ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਦੇਸੇਤੂ’’ਤਿ. ‘‘ਅਹਞ੍ਚੇ [ਅਹਞ੍ਚ (ਸ੍ਯਾ. ਕਂ. ਕ.)] ਤੇ, ਗਾਮਣਿ, ਅਤੀਤਮਦ੍ਧਾਨਂ ਆਰਬ੍ਭ ਦੁਕ੍ਖਸ੍ਸ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਦੇਸੇਯ੍ਯਂ – ‘ਏਵਂ ਅਹੋਸਿ ਅਤੀਤਮਦ੍ਧਾਨ’ਨ੍ਤਿ, ਤਤ੍ਰ ਤੇ ਸਿਯਾ ਕਙ੍ਖਾ, ਸਿਯਾ ਵਿਮਤਿ. ਅਹਂ ਚੇ [ਅਹਞ੍ਚ (ਸ੍ਯਾ. ਕਂ. ਕ.)] ਤੇ, ਗਾਮਣਿ, ਅਨਾਗਤਮਦ੍ਧਾਨਂ ਆਰਬ੍ਭ ਦੁਕ੍ਖਸ੍ਸ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਦੇਸੇਯ੍ਯਂ – ‘ਏਵਂ ਭਵਿਸ੍ਸਤਿ ਅਨਾਗਤਮਦ੍ਧਾਨ’ਨ੍ਤਿ, ਤਤ੍ਰਾਪਿ ਤੇ ਸਿਯਾ ਕਙ੍ਖਾ, ਸਿਯਾ ਵਿਮਤਿ. ਅਪਿ ਚਾਹਂ, ਗਾਮਣਿ, ਇਧੇਵ ਨਿਸਿਨ੍ਨੋ ਏਤ੍ਥੇਵ ਤੇ ਨਿਸਿਨ੍ਨਸ੍ਸ ਦੁਕ੍ਖਸ੍ਸ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਦੇਸੇਸ੍ਸਾਮਿ. ਤਂ ਸੁਣਾਹਿ, ਸਾਧੁਕਂ ਮਨਸਿ ਕਰੋਹਿ; ਭਾਸਿਸ੍ਸਾਮੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਭਦ੍ਰਕੋ ਗਾਮਣਿ ਭਗਵਤੋ ਪਚ੍ਚਸ੍ਸੋਸਿ. ਭਗਵਾ ਏਤਦਵੋਚ –

‘‘ਤਂ ਕਿਂ ਮਞ੍ਞਸਿ, ਗਾਮਣਿ, ਅਤ੍ਥਿ ਤੇ ਉਰੁਵੇਲਕਪ੍ਪੇ ਮਨੁਸ੍ਸਾ ਯੇਸਂ ਤੇ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਉਪ੍ਪਜ੍ਜੇਯ੍ਯੁਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ? ‘‘ਅਤ੍ਥਿ ਮੇ, ਭਨ੍ਤੇ, ਉਰੁਵੇਲਕਪ੍ਪੇ ਮਨੁਸ੍ਸਾ ਯੇਸਂ ਮੇ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਉਪ੍ਪਜ੍ਜੇਯ੍ਯੁਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ. ‘‘ਅਤ੍ਥਿ ਪਨ ਤੇ, ਗਾਮਣਿ, ਉਰੁਵੇਲਕਪ੍ਪੇ ਮਨੁਸ੍ਸਾ ਯੇਸਂ ਤੇ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਨੁਪ੍ਪਜ੍ਜੇਯ੍ਯੁਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ? ‘‘ਅਤ੍ਥਿ ਮੇ, ਭਨ੍ਤੇ, ਉਰੁਵੇਲਕਪ੍ਪੇ ਮਨੁਸ੍ਸਾ ਯੇਸਂ ਮੇ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਨੁਪ੍ਪਜ੍ਜੇਯ੍ਯੁਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ. ‘‘ਕੋ ਨੁ ਖੋ, ਗਾਮਣਿ, ਹੇਤੁ, ਕੋ ਪਚ੍ਚਯੋ ਯੇਨ ਤੇ ਏਕਚ੍ਚਾਨਂ ਉਰੁਵੇਲਕਪ੍ਪਿਯਾਨਂ ਮਨੁਸ੍ਸਾਨਂ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਉਪ੍ਪਜ੍ਜੇਯ੍ਯੁਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ? ‘‘ਯੇਸਂ ਮੇ, ਭਨ੍ਤੇ, ਉਰੁਵੇਲਕਪ੍ਪਿਯਾਨਂ ਮਨੁਸ੍ਸਾਨਂ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਉਪ੍ਪਜ੍ਜੇਯ੍ਯੁਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ, ਅਤ੍ਥਿ ਮੇ ਤੇਸੁ ਛਨ੍ਦਰਾਗੋ. ਯੇਸਂ ਪਨ, ਭਨ੍ਤੇ, ਉਰੁਵੇਲਕਪ੍ਪਿਯਾਨਂ ਮਨੁਸ੍ਸਾਨਂ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਨੁਪ੍ਪਜ੍ਜੇਯ੍ਯੁਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ, ਨਤ੍ਥਿ ਮੇ ਤੇਸੁ ਛਨ੍ਦਰਾਗੋ’’ਤਿ. ‘‘ਇਮਿਨਾ ਤ੍ਵਂ, ਗਾਮਣਿ, ਧਮ੍ਮੇਨ ਦਿਟ੍ਠੇਨ ਵਿਦਿਤੇਨ ਅਕਾਲਿਕੇਨ ਪਤ੍ਤੇਨ ਪਰਿਯੋਗਾਲ਼੍ਹੇਨ ਅਤੀਤਾਨਾਗਤੇ ਨਯਂ ਨੇਹਿ – ‘ਯਂ ਖੋ ਕਿਞ੍ਚਿ ਅਤੀਤਮਦ੍ਧਾਨਂ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਿ [ਉਪ੍ਪਜ੍ਜਤਿ (ਸਬ੍ਬਤ੍ਥ)] ਸਬ੍ਬਂ ਤਂ ਛਨ੍ਦਮੂਲਕਂ ਛਨ੍ਦਨਿਦਾਨਂ. ਛਨ੍ਦੋ ਹਿ ਮੂਲਂ ਦੁਕ੍ਖਸ੍ਸ. ਯਮ੍ਪਿ ਹਿ ਕਿਞ੍ਚਿ ਅਨਾਗਤਮਦ੍ਧਾਨਂ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਿਸ੍ਸਤਿ, ਸਬ੍ਬਂ ਤਂ ਛਨ੍ਦਮੂਲਕਂ ਛਨ੍ਦਨਿਦਾਨਂ. ਛਨ੍ਦੋ ਹਿ ਮੂਲਂ ਦੁਕ੍ਖਸ੍ਸਾ’’’ਤਿ. ‘‘ਅਚ੍ਛਰਿਯਂ, ਭਨ੍ਤੇ, ਅਬ੍ਭੁਤਂ, ਭਨ੍ਤੇ! ਯਾਵ ਸੁਭਾਸਿਤਂ ਚਿਦਂ [ਸੁਭਾਸਿਤਮਿਦਂ (ਸੀ. ਪੀ.)], ਭਨ੍ਤੇ, ਭਗਵਤਾ [ਯਙ੍ਕਿਞ੍ਚਿ ਅਤੀਤਮਦ੍ਧਾਨਂ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਤਿ, ਸਬ੍ਬਨ੍ਤਂ ਛਨ੍ਦਮੂਲਕਂ ਛਨ੍ਦਨਿਦਾਨਂ, ਛਨ੍ਦੋ ਹਿ ਮੂਲਂ ਦੁਕ੍ਖਸ੍ਸਾਤਿ, ਯਙ੍ਕਿਞ੍ਚਿ ਅਨਾਗਤਮਦ੍ਧਾਨਂ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਿਸ੍ਸਤਿ ਸਬ੍ਬਨ੍ਤਂ ਛਨ੍ਦਮੂਲਕਂ ਛਨ੍ਦਨਿਦਾਨਂ, ਛਨ੍ਦੋ ਹਿ ਮੂਲਂ ਦੁਕ੍ਖਸ੍ਸਾ’’ਤਿ (ਸ੍ਯਾ. ਕਂ.)] – ‘ਯਂ ਕਿਞ੍ਚਿ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਤਿ, ਸਬ੍ਬਂ ਤਂ ਛਨ੍ਦਮੂਲਕਂ ਛਨ੍ਦਨਿਦਾਨਂ. ਛਨ੍ਦੋ ਹਿ ਮੂਲਂ ਦੁਕ੍ਖਸ੍ਸਾ’ਤਿ. [‘‘ਯਙ੍ਕਿਞ੍ਚਿ ਅਤੀਤਮਦ੍ਧਾਨਂ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਤਿ, ਸਬ੍ਬਨ੍ਤਂ ਛਨ੍ਦਮੂਲਕਂ ਛਨ੍ਦਨਿਦਾਨਂ, ਛਨ੍ਦੋ ਹਿ ਮੂਲਂ ਦੂਕ੍ਖਸ੍ਸਾਤਿ, ਯਙ੍ਕਿਞ੍ਚਿ ਅਨਾਗਤਮਦ੍ਧਾਨਂ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਿਸ੍ਸਤਿ, ਸਬ੍ਬਨ੍ਤਂ ਛਨ੍ਦਮੂਲਕਂ ਛਨ੍ਦਨਿਦਾਨਂ, ਛਨ੍ਦੋ ਹਿ ਮੂਲਂ ਦੁਕ੍ਖਸ੍ਸਾ’’ਤਿ (ਸ੍ਯਾ. ਕਂ)] ਅਤ੍ਥਿ ਮੇ, ਭਨ੍ਤੇ, ਚਿਰਵਾਸੀ ਨਾਮ ਕੁਮਾਰੋ ਬਹਿ ਆਵਸਥੇ [ਆਵੇਸਨੇ (?)] ਪਟਿਵਸਤਿ. ਸੋ ਖ੍ਵਾਹਂ, ਭਨ੍ਤੇ, ਕਾਲਸ੍ਸੇਵ ਵੁਟ੍ਠਾਯ ਪੁਰਿਸਂ ਉਯ੍ਯੋਜੇਮਿ [ਉਯ੍ਯੋਜੇਸਿਂ (ਕ.)] – ‘ਗਚ੍ਛ, ਭਣੇ, ਚਿਰਵਾਸਿਂ ਕੁਮਾਰਂ ਜਾਨਾਹੀ’ਤਿ. ਯਾਵਕੀਵਞ੍ਚ, ਭਨ੍ਤੇ, ਸੋ ਪੁਰਿਸੋ ਨਾਗਚ੍ਛਤਿ, ਤਸ੍ਸ ਮੇ ਹੋਤੇਵ ਅਞ੍ਞਥਤ੍ਤਂ – ‘ਮਾ ਹੇਵ ਚਿਰਵਾਸਿਸ੍ਸ ਕੁਮਾਰਸ੍ਸ ਕਿਞ੍ਚਿ ਆਬਾਧਯਿਤ੍ਥਾ’’’ਤਿ [ਆਬਾਧਯੇਥਾਤਿ (ਸ੍ਯਾ. ਕਂ. ਪੀ. ਕ.)].

‘‘ਤਂ ਕਿਂ ਮਞ੍ਞਸਿ, ਗਾਮਣਿ, ਚਿਰਵਾਸਿਸ੍ਸ ਕੁਮਾਰਸ੍ਸ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਉਪ੍ਪਜ੍ਜੇਯ੍ਯੁਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ? ‘‘ਚਿਰਵਾਸਿਸ੍ਸ ਮੇ, ਭਨ੍ਤੇ, ਕੁਮਾਰਸ੍ਸ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਜੀਵਿਤਸ੍ਸਪਿ ਸਿਯਾ ਅਞ੍ਞਥਤ੍ਤਂ, ਕਿਂ ਪਨ ਮੇ ਨੁਪ੍ਪਜ੍ਜਿਸ੍ਸਨ੍ਤਿ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ. ‘‘ਇਮਿਨਾਪਿ ਖੋ ਏਤਂ, ਗਾਮਣਿ, ਪਰਿਯਾਯੇਨ ਵੇਦਿਤਬ੍ਬਂ – ‘ਯਂ ਕਿਞ੍ਚਿ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਤਿ, ਸਬ੍ਬਂ ਤਂ ਛਨ੍ਦਮੂਲਕਂ ਛਨ੍ਦਨਿਦਾਨਂ. ਛਨ੍ਦੋ ਹਿ ਮੂਲਂ ਦੁਕ੍ਖਸ੍ਸਾ’’’ਤਿ.

‘‘ਤਂ ਕਿਂ ਮਞ੍ਞਸਿ, ਗਾਮਣਿ, ਯਦਾ ਤੇ ਚਿਰਵਾਸਿਮਾਤਾ [ਚਿਰਵਾਸਿਸ੍ਸ ਮਾਤਾ (ਸੀ. ਪੀ.)] ਅਦਿਟ੍ਠਾ ਅਹੋਸਿ, ਅਸ੍ਸੁਤਾ ਅਹੋਸਿ, ਤੇ ਚਿਰਵਾਸਿਮਾਤੁਯਾ ਛਨ੍ਦੋ ਵਾ ਰਾਗੋ ਵਾ ਪੇਮਂ ਵਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’. ‘‘ਦਸ੍ਸਨਂ ਵਾ ਤੇ, ਗਾਮਣਿ, ਆਗਮ੍ਮ ਸਵਨਂ ਵਾ ਏਵਂ ਤੇ ਅਹੋਸਿ – ‘ਚਿਰਵਾਸਿਮਾਤੁਯਾ ਛਨ੍ਦੋ ਵਾ ਰਾਗੋ ਵਾ ਪੇਮਂ ਵਾ’’’ਤਿ? ‘‘ਏਵਂ, ਭਨ੍ਤੇ’’.

‘‘ਤਂ ਕਿਂ ਮਞ੍ਞਸਿ, ਗਾਮਣਿ, ਚਿਰਵਾਸਿਮਾਤੁਯਾ ਤੇ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਉਪ੍ਪਜ੍ਜੇਯ੍ਯੁਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ? ‘‘ਚਿਰਵਾਸਿਮਾਤੁਯਾ ਮੇ, ਭਨ੍ਤੇ, ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਜੀਵਿਤਸ੍ਸਪਿ ਸਿਯਾ ਅਞ੍ਞਥਤ੍ਤਂ, ਕਿਂ ਪਨ ਮੇ ਨੁਪ੍ਪਜ੍ਜਿਸ੍ਸਨ੍ਤਿ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ! ‘‘ਇਮਿਨਾਪਿ ਖੋ ਏਤਂ, ਗਾਮਣਿ, ਪਰਿਯਾਯੇਨ ਵੇਦਿਤਬ੍ਬਂ – ‘ਯਂ ਕਿਞ੍ਚਿ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਤਿ, ਸਬ੍ਬਂ ਤਂ ਛਨ੍ਦਮੂਲਕਂ ਛਨ੍ਦਨਿਦਾਨਂ. ਛਨ੍ਦੋ ਹਿ ਮੂਲਂ ਦੁਕ੍ਖਸ੍ਸਾ’’’ਤਿ. ਏਕਾਦਸਮਂ.