੩. ਆਵੇਣਿਕਦੁਕ੍ਖਸੁਤ੍ਤਂ

੨੮੨. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਮਾਤੁਗਾਮਸ੍ਸ ਆਵੇਣਿਕਾਨਿ ਦੁਕ੍ਖਾਨਿ, ਯਾਨਿ ਮਾਤੁਗਾਮੋ ਪਚ੍ਚਨੁਭੋਤਿ, ਅਞ੍ਞਤ੍ਰੇਵ ਪੁਰਿਸੇਹਿ. ਕਤਮਾਨਿ ਪਞ੍ਚ? ਇਧ, ਭਿਕ੍ਖਵੇ, ਮਾਤੁਗਾਮੋ ਦਹਰੋਵ ਸਮਾਨੋ ਪਤਿਕੁਲਂ ਗਚ੍ਛਤਿ, ਞਾਤਕੇਹਿ ਵਿਨਾ ਹੋਤਿ. ਇਦਂ, ਭਿਕ੍ਖਵੇ, ਮਾਤੁਗਾਮਸ੍ਸ ਪਠਮਂ ਆਵੇਣਿਕਂ ਦੁਕ੍ਖਂ, ਯਂ ਮਾਤੁਗਾਮੋ ਪਚ੍ਚਨੁਭੋਤਿ, ਅਞ੍ਞਤ੍ਰੇਵ ਪੁਰਿਸੇਹਿ. ਪੁਨ ਚਪਰਂ, ਭਿਕ੍ਖਵੇ, ਮਾਤੁਗਾਮੋ ਉਤੁਨੀ ਹੋਤਿ. ਇਦਂ, ਭਿਕ੍ਖਵੇ, ਮਾਤੁਗਾਮਸ੍ਸ ਦੁਤਿਯਂ ਆਵੇਣਿਕਂ ਦੁਕ੍ਖਂ, ਯਂ ਮਾਤੁਗਾਮੋ ਪਚ੍ਚਨੁਭੋਤਿ, ਅਞ੍ਞਤ੍ਰੇਵ ਪੁਰਿਸੇਹਿ. ਪੁਨ ਚਪਰਂ, ਭਿਕ੍ਖਵੇ, ਮਾਤੁਗਾਮੋ ਗਬ੍ਭਿਨੀ ਹੋਤਿ. ਇਦਂ, ਭਿਕ੍ਖਵੇ, ਮਾਤੁਗਾਮਸ੍ਸ ਤਤਿਯਂ ਆਵੇਣਿਕਂ ਦੁਕ੍ਖਂ, ਯਂ ਮਾਤੁਗਾਮੋ ਪਚ੍ਚਨੁਭੋਤਿ, ਅਞ੍ਞਤ੍ਰੇਵ ਪੁਰਿਸੇਹਿ. ਪੁਨ ਚਪਰਂ, ਭਿਕ੍ਖਵੇ, ਮਾਤੁਗਾਮੋ ਵਿਜਾਯਤਿ. ਇਦਂ, ਭਿਕ੍ਖਵੇ, ਮਾਤੁਗਾਮਸ੍ਸ ਚਤੁਤ੍ਥਂ ਆਵੇਣਿਕਂ ਦੁਕ੍ਖਂ, ਯਂ ਮਾਤੁਗਾਮੋ ਪਚ੍ਚਨੁਭੋਤਿ, ਅਞ੍ਞਤ੍ਰੇਵ ਪੁਰਿਸੇਹਿ. ਪੁਨ ਚਪਰਂ, ਭਿਕ੍ਖਵੇ, ਮਾਤੁਗਾਮੋ ਪੁਰਿਸਸ੍ਸ ਪਾਰਿਚਰਿਯਂ ਉਪੇਤਿ. ਇਦਂ ਖੋ, ਭਿਕ੍ਖਵੇ, ਮਾਤੁਗਾਮਸ੍ਸ ਪਞ੍ਚਮਂ ਆਵੇਣਿਕਂ ਦੁਕ੍ਖਂ, ਯਂ ਮਾਤੁਗਾਮੋ ਪਚ੍ਚਨੁਭੋਤਿ, ਅਞ੍ਞਤ੍ਰੇਵ ਪੁਰਿਸੇਹਿ. ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਮਾਤੁਗਾਮਸ੍ਸ ਆਵੇਣਿਕਾਨਿ ਦੁਕ੍ਖਾਨਿ, ਯਾਨਿ ਮਾਤੁਗਾਮੋ ਪਚ੍ਚਨੁਭੋਤਿ, ਅਞ੍ਞਤ੍ਰੇਵ ਪੁਰਿਸੇਹੀ’’ਤਿ. ਤਤਿਯਂ.