੪. ਪਾਤਾਲਸੁਤ੍ਤਂ

੨੫੨. ‘‘ਅਸ੍ਸੁਤਵਾ, ਭਿਕ੍ਖਵੇ, ਪੁਥੁਜ੍ਜਨੋ ਯਂ ਵਾਚਂ ਭਾਸਤਿ – ‘ਅਤ੍ਥਿ ਮਹਾਸਮੁਦ੍ਦੇ ਪਾਤਾਲੋ’ਤਿ. ਤਂ ਖੋ ਪਨੇਤਂ, ਭਿਕ੍ਖਵੇ, ਅਸ੍ਸੁਤਵਾ ਪੁਥੁਜ੍ਜਨੋ ਅਸਨ੍ਤਂ ਅਵਿਜ੍ਜਮਾਨਂ ਏਵਂ ਵਾਚਂ ਭਾਸਤਿ – ‘ਅਤ੍ਥਿ ਮਹਾਸਮੁਦ੍ਦੇ ਪਾਤਾਲੋ’ਤਿ. ਸਾਰੀਰਿਕਾਨਂ ਖੋ ਏਤਂ, ਭਿਕ੍ਖਵੇ, ਦੁਕ੍ਖਾਨਂ ਵੇਦਨਾਨਂ ਅਧਿਵਚਨਂ ਯਦਿਦਂ ‘ਪਾਤਾਲੋ’ਤਿ. ਅਸ੍ਸੁਤਵਾ, ਭਿਕ੍ਖਵੇ, ਪੁਥੁਜ੍ਜਨੋ ਸਾਰੀਰਿਕਾਯ ਦੁਕ੍ਖਾਯ ਵੇਦਨਾਯ ਫੁਟ੍ਠੋ ਸਮਾਨੋ ਸੋਚਤਿ ਕਿਲਮਤਿ ਪਰਿਦੇਵਤਿ ਉਰਤ੍ਤਾਲ਼ਿਂ ਕਨ੍ਦਤਿ ਸਮ੍ਮੋਹਂ ਆਪਜ੍ਜਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ‘ਅਸ੍ਸੁਤਵਾ ਪੁਥੁਜ੍ਜਨੋ ਪਾਤਾਲੇ ਨ ਪਚ੍ਚੁਟ੍ਠਾਸਿ, ਗਾਧਞ੍ਚ ਨਾਜ੍ਝਗਾ’. ਸੁਤਵਾ ਚ ਖੋ, ਭਿਕ੍ਖਵੇ, ਅਰਿਯਸਾਵਕੋ ਸਾਰੀਰਿਕਾਯ ਦੁਕ੍ਖਾਯ ਵੇਦਨਾਯ ਫੁਟ੍ਠੋ ਸਮਾਨੋ ਨੇਵ ਸੋਚਤਿ, ਨ ਕਿਲਮਤਿ, ਨ ਪਰਿਦੇਵਤਿ, ਨ ਉਰਤ੍ਤਾਲ਼ਿਂ ਕਨ੍ਦਤਿ, ਨ ਸਮ੍ਮੋਹਂ ਆਪਜ੍ਜਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ‘ਸੁਤਵਾ ਅਰਿਯਸਾਵਕੋ ਪਾਤਾਲੇ ਪਚ੍ਚੁਟ੍ਠਾਸਿ, ਗਾਧਞ੍ਚ ਅਜ੍ਝਗਾ’’’ਤਿ.

‘‘ਯੋ ਏਤਾ ਨਾਧਿਵਾਸੇਤਿ, ਉਪ੍ਪਨ੍ਨਾ ਵੇਦਨਾ ਦੁਖਾ;

ਸਾਰੀਰਿਕਾ ਪਾਣਹਰਾ, ਯਾਹਿ ਫੁਟ੍ਠੋ ਪਵੇਧਤਿ.

‘‘ਅਕ੍ਕਨ੍ਦਤਿ ਪਰੋਦਤਿ, ਦੁਬ੍ਬਲੋ ਅਪ੍ਪਥਾਮਕੋ;

ਨ ਸੋ ਪਾਤਾਲੇ ਪਚ੍ਚੁਟ੍ਠਾਸਿ, ਅਥੋ ਗਾਧਮ੍ਪਿ ਨਾਜ੍ਝਗਾ.

‘‘ਯੋ ਚੇਤਾ ਅਧਿਵਾਸੇਤਿ, ਉਪ੍ਪਨ੍ਨਾ ਵੇਦਨਾ ਦੁਖਾ;

ਸਾਰੀਰਿਕਾ ਪਾਣਹਰਾ, ਯਾਹਿ ਫੁਟ੍ਠੋ ਨ ਵੇਧਤਿ;

ਸ ਵੇ ਪਾਤਾਲੇ ਪਚ੍ਚੁਟ੍ਠਾਸਿ, ਅਥੋ ਗਾਧਮ੍ਪਿ ਅਜ੍ਝਗਾ’’ਤਿ. ਚਤੁਤ੍ਥਂ;