੬. ਚਤੁਤ੍ਥਸਾਰਿਪੁਤ੍ਤਕੋਟ੍ਠਿਕਸੁਤ੍ਤਂ

੪੧੫. ਏਕਂ ਸਮਯਂ ਆਯਸ੍ਮਾ ਚ ਸਾਰਿਪੁਤ੍ਤੋ, ਆਯਸ੍ਮਾ ਚ ਮਹਾਕੋਟ੍ਠਿਕੋ ਬਾਰਾਣਸਿਯਂ ਵਿਹਰਨ੍ਤਿ ਇਸਿਪਤਨੇ ਮਿਗਦਾਯੇ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨਾਯਸ੍ਮਾ ਮਹਾਕੋਟ੍ਠਿਕੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਤਾ ਮਹਾਕੋਟ੍ਠਿਕੇਨ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸਾਰਿਪੁਤ੍ਤੋ ਆਯਸ੍ਮਨ੍ਤਂ ਮਹਾਕੋਟ੍ਠਿਕਂ ਏਤਦਵੋਚ – ‘‘‘ਕਿਂ ਨੁ ਖੋ, ਆਵੁਸੋ ਕੋਟ੍ਠਿਕ, ਹੋਤਿ ਤਥਾਗਤੋ ਪਰਂ ਮਰਣਾ’ਤਿ…ਪੇ… ‘ਕਿਂ ਪਨਾਵੁਸੋ, ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਇਤਿ ਪੁਟ੍ਠੋ ਸਮਾਨੋ – ‘ਏਤਮ੍ਪਿ ਖੋ, ਆਵੁਸੋ, ਅਬ੍ਯਾਕਤਂ ਭਗਵਤਾ – ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਦੇਸਿ’’. ‘‘ਕੋ ਨੁ ਖੋ, ਆਵੁਸੋ, ਹੇਤੁ, ਕੋ ਪਚ੍ਚਯੋ, ਯੇਨੇਤਂ ਅਬ੍ਯਾਕਤਂ ਭਗਵਤਾ’’ਤਿ?

‘‘ਰੂਪਾਰਾਮਸ੍ਸ ਖੋ, ਆਵੁਸੋ, ਰੂਪਰਤਸ੍ਸ ਰੂਪਸਮ੍ਮੁਦਿਤਸ੍ਸ ਰੂਪਨਿਰੋਧਂ ਅਜਾਨਤੋ ਅਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ; ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ; ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ; ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ. ਵੇਦਨਾਰਾਮਸ੍ਸ ਖੋ, ਆਵੁਸੋ, ਵੇਦਨਾਰਤਸ੍ਸ ਵੇਦਨਾਸਮ੍ਮੁਦਿਤਸ੍ਸ, ਵੇਦਨਾਨਿਰੋਧਂ ਅਜਾਨਤੋ ਅਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ…ਪੇ… ਸਞ੍ਞਾਰਾਮਸ੍ਸ ਖੋ, ਆਵੁਸੋ…ਪੇ… ਸਙ੍ਖਾਰਾਰਾਮਸ੍ਸ ਖੋ ਆਵੁਸੋ…ਪੇ… ਵਿਞ੍ਞਾਣਾਰਾਮਸ੍ਸ ਖੋ, ਆਵੁਸੋ, ਵਿਞ੍ਞਾਣਰਤਸ੍ਸ ਵਿਞ੍ਞਾਣਸਮ੍ਮੁਦਿਤਸ੍ਸ ਵਿਞ੍ਞਾਣਨਿਰੋਧਂ ਅਜਾਨਤੋ ਅਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ’’.

‘‘ਨ ਰੂਪਾਰਾਮਸ੍ਸ ਖੋ, ਆਵੁਸੋ, ਨ ਰੂਪਰਤਸ੍ਸ ਨ ਰੂਪਸਮ੍ਮੁਦਿਤਸ੍ਸ, ਰੂਪਨਿਰੋਧਂ ਜਾਨਤੋ ਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ. ਨ ਵੇਦਨਾਰਾਮਸ੍ਸ ਖੋ, ਆਵੁਸੋ…ਪੇ… ਨ ਸਞ੍ਞਾਰਾਮਸ੍ਸ ਖੋ, ਆਵੁਸੋ…ਪੇ… ਨ ਸਙ੍ਖਾਰਾਰਾਮਸ੍ਸ ਖੋ, ਆਵੁਸੋ…ਪੇ… ਨ ਵਿਞ੍ਞਾਣਾਰਾਮਸ੍ਸ ਖੋ, ਆਵੁਸੋ, ਨ ਵਿਞ੍ਞਾਣਰਤਸ੍ਸ ਨ ਵਿਞ੍ਞਾਣਸਮ੍ਮੁਦਿਤਸ੍ਸ, ਵਿਞ੍ਞਾਣਨਿਰੋਧਂ ਜਾਨਤੋ ਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ. ਅਯਂ ਖੋ, ਆਵੁਸੋ, ਹੇਤੁ, ਅਯਂ ਪਚ੍ਚਯੋ, ਯੇਨੇਤਂ ਅਬ੍ਯਾਕਤਂ ਭਗਵਤਾ’’ਤਿ.

‘‘ਸਿਯਾ ਪਨਾਵੁਸੋ, ਅਞ੍ਞੋਪਿ ਪਰਿਯਾਯੋ, ਯੇਨੇਤਂ ਅਬ੍ਯਾਕਤਂ ਭਗਵਤਾ’’ਤਿ? ‘‘ਸਿਯਾ, ਆਵੁਸੋ. ਭਵਾਰਾਮਸ੍ਸ ਖੋ, ਆਵੁਸੋ, ਭਵਰਤਸ੍ਸ ਭਵਸਮ੍ਮੁਦਿਤਸ੍ਸ, ਭਵਨਿਰੋਧਂ ਅਜਾਨਤੋ ਅਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ. ਨ ਭਵਾਰਾਮਸ੍ਸ ਖੋ, ਆਵੁਸੋ, ਨ ਭਵਰਤਸ੍ਸ ਨ ਭਵਸਮ੍ਮੁਦਿਤਸ੍ਸ, ਭਵਨਿਰੋਧਂ ਜਾਨਤੋ ਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ. ਅਯਮ੍ਪਿ ਖੋ, ਆਵੁਸੋ, ਪਰਿਯਾਯੋ, ਯੇਨੇਤਂ ਅਬ੍ਯਾਕਤਂ ਭਗਵਤਾ’’ਤਿ.

‘‘ਸਿਯਾ ਪਨਾਵੁਸੋ, ਅਞ੍ਞੋਪਿ ਪਰਿਯਾਯੋ, ਯੇਨੇਤਂ ਅਬ੍ਯਾਕਤਂ ਭਗਵਤਾ’’ਤਿ? ‘‘ਸਿਯਾ, ਆਵੁਸੋ. ਉਪਾਦਾਨਾਰਾਮਸ੍ਸ ਖੋ, ਆਵੁਸੋ, ਉਪਾਦਾਨਰਤਸ੍ਸ ਉਪਾਦਾਨਸਮ੍ਮੁਦਿਤਸ੍ਸ, ਉਪਾਦਾਨਨਿਰੋਧਂ ਅਜਾਨਤੋ ਅਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ. ਨ ਉਪਾਦਾਨਾਰਾਮਸ੍ਸ ਖੋ, ਆਵੁਸੋ, ਨ ਉਪਾਦਾਨਰਤਸ੍ਸ ਨ ਉਪਾਦਾਨਸਮ੍ਮੁਦਿਤਸ੍ਸ, ਉਪਾਦਾਨਨਿਰੋਧਂ ਜਾਨਤੋ ਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ…ਪੇ… ‘ਨੇਵ, ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ. ਅਯਮ੍ਪਿ ਖੋ ਆਵੁਸੋ, ਪਰਿਯਾਯੋ, ਯੇਨੇਤਂ ਅਬ੍ਯਾਕਤਂ ਭਗਵਤਾ’’ਤਿ.

‘‘ਸਿਯਾ ਪਨਾਵੁਸੋ, ਅਞ੍ਞੋਪਿ ਪਰਿਯਾਯੋ, ਯੇਨੇਤਂ ਅਬ੍ਯਾਕਤਂ ਭਗਵਤਾ’’ਤਿ? ‘‘ਸਿਯਾ, ਆਵੁਸੋ. ਤਣ੍ਹਾਰਾਮਸ੍ਸ ਖੋ, ਆਵੁਸੋ, ਤਣ੍ਹਾਰਤਸ੍ਸ ਤਣ੍ਹਾਸਮ੍ਮੁਦਿਤਸ੍ਸ, ਤਣ੍ਹਾਨਿਰੋਧਂ ਅਜਾਨਤੋ ਅਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਹੋਤਿ. ਨ ਤਣ੍ਹਾਰਾਮਸ੍ਸ ਖੋ, ਆਵੁਸੋ, ਨ ਤਣ੍ਹਾਰਤਸ੍ਸ ਨ ਤਣ੍ਹਾਸਮ੍ਮੁਦਿਤਸ੍ਸ, ਤਣ੍ਹਾਨਿਰੋਧਂ ਜਾਨਤੋ ਪਸ੍ਸਤੋ ਯਥਾਭੂਤਂ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ…ਪੇ. … ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿਸ੍ਸ ਨ ਹੋਤਿ. ਅਯਮ੍ਪਿ ਖੋ, ਆਵੁਸੋ, ਪਰਿਯਾਯੋ, ਯੇਨੇਤਂ ਅਬ੍ਯਾਕਤਂ ਭਗਵਤਾ’’ਤਿ.

‘‘ਸਿਯਾ ਪਨਾਵੁਸੋ, ਅਞ੍ਞੋਪਿ ਪਰਿਯਾਯੋ, ਯੇਨੇਤਂ ਅਬ੍ਯਾਕਤਂ ਭਗਵਤਾ’’ਤਿ? ‘‘ਏਤ੍ਥ ਦਾਨਿ, ਆਵੁਸੋ ਸਾਰਿਪੁਤ੍ਤ, ਇਤੋ ਉਤ੍ਤਰਿ ਕਿਂ ਇਚ੍ਛਸਿ? ਤਣ੍ਹਾਸਙ੍ਖਯਵਿਮੁਤ੍ਤਸ੍ਸ, ਆਵੁਸੋ ਸਾਰਿਪੁਤ੍ਤ, ਭਿਕ੍ਖੁਨੋ ਵਟ੍ਟਂ [ਵਤ੍ਤਂ (ਸ੍ਯਾ. ਕਂ. ਕ.) ਵਦ੍ਧਂ (ਪੀ.)] ਨਤ੍ਥਿ ਪਞ੍ਞਾਪਨਾਯਾ’’ਤਿ. ਛਟ੍ਠਂ.