੫੫. ਸਾਤਚ੍ਚਮੂਲਕਸਪ੍ਪਾਯਕਾਰੀਸੁਤ੍ਤਂ

੭੧੬. ਸਾਵਤ੍ਥਿਨਿਦਾਨਂ. ‘‘ਚਤਾਰੋਮੇ, ਭਿਕ੍ਖਵੇ, ਝਾਯੀ. ਕਤਮੇ ਚਤ੍ਤਾਰੋ? ਇਧ, ਭਿਕ੍ਖਵੇ, ਏਕਚ੍ਚੋ ਝਾਯੀ ਸਮਾਧਿਸ੍ਮਿਂ ਸਾਤਚ੍ਚਕਾਰੀ ਹੋਤਿ, ਨ ਸਮਾਧਿਸ੍ਮਿਂ ਸਪ੍ਪਾਯਕਾਰੀ. ਇਧ ਪਨ, ਭਿਕ੍ਖਵੇ, ਏਕਚ੍ਚੋ ਝਾਯੀ ਸਮਾਧਿਸ੍ਮਿਂ ਸਪ੍ਪਾਯਕਾਰੀ ਹੋਤਿ, ਨ ਸਮਾਧਿਸ੍ਮਿਂ ਸਾਤਚ੍ਚਕਾਰੀ. ਇਧ ਪਨ, ਭਿਕ੍ਖਵੇ, ਏਕਚ੍ਚੋ ਝਾਯੀ ਨੇਵ ਸਮਾਧਿਸ੍ਮਿਂ ਸਾਤਚ੍ਚਕਾਰੀ ਹੋਤਿ, ਨ ਚ ਸਮਾਧਿਸ੍ਮਿਂ ਸਪ੍ਪਾਯਕਾਰੀ. ਇਧ ਪਨ, ਭਿਕ੍ਖਵੇ, ਏਕਚ੍ਚੋ ਝਾਯੀ ਸਮਾਧਿਸ੍ਮਿਂ ਸਾਤਚ੍ਚਕਾਰੀ ਚ ਹੋਤਿ, ਸਮਾਧਿਸ੍ਮਿਂ ਸਪ੍ਪਾਯਕਾਰੀ ਚ. ਤਤ੍ਰ, ਭਿਕ੍ਖਵੇ, ਯ੍ਵਾਯਂ ਝਾਯੀ ਸਮਾਧਿਸ੍ਮਿਂ ਸਾਤਚ੍ਚਕਾਰੀ ਚ ਹੋਤਿ ਸਮਾਧਿਸ੍ਮਿਂ ਸਪ੍ਪਾਯਕਾਰੀ ਚ ਅਯਂ ਇਮੇਸਂ ਚਤੁਨ੍ਨਂ ਝਾਯੀਨਂ ਅਗ੍ਗੋ ਚ ਸੇਟ੍ਠੋ ਚ ਮੋਕ੍ਖੋ ਚ ਉਤ੍ਤਮੋ ਚ ਪਵਰੋ ਚ. ਸੇਯ੍ਯਥਾਪਿ, ਭਿਕ੍ਖਵੇ, ਗਵਾ ਖੀਰਂ, ਖੀਰਮ੍ਹਾ ਦਧਿ, ਦਧਿਮ੍ਹਾ ਨਵਨੀਤਂ, ਨਵਨੀਤਮ੍ਹਾ ਸਪ੍ਪਿ, ਸਪ੍ਪਿਮ੍ਹਾ ਸਪ੍ਪਿਮਣ੍ਡੋ ਤਤ੍ਰ ਅਗ੍ਗਮਕ੍ਖਾਯਤਿ; ਏਵਮੇਵ ਖੋ, ਭਿਕ੍ਖਵੇ, ਯ੍ਵਾਯਂ ਝਾਯੀ ਸਮਾਧਿਸ੍ਮਿਂ ਸਾਤਚ੍ਚਕਾਰੀ ਚ ਹੋਤਿ, ਸਮਾਧਿਸ੍ਮਿਂ ਸਪ੍ਪਾਯਕਾਰੀ ਅਯਂ ਇਮੇਸਂ ਚਤੁਨ੍ਨਂ ਝਾਯੀਨਂ ਅਗ੍ਗੋ ਚ ਸੇਟ੍ਠੋ ਚ ਮੋਕ੍ਖੋ ਚ ਉਤ੍ਤਮੋ ਚ ਪਵਰੋ ਚਾ’’ਤਿ. ਇਦਮਵੋਚ ਭਗਵਾ. ਅਤ੍ਤਮਨਾ ਤੇ ਭਿਕ੍ਖੂ ਭਗਵਤੋ ਭਾਸਿਤਂ ਅਭਿਨਨ੍ਦੁਨ੍ਤਿ. ਪਞ੍ਚਪਞ੍ਞਾਸਮਂ. (ਯਥਾ ਪਞ੍ਚਪਞ੍ਞਾਸਂ ਵੇਯ੍ਯਾਕਰਣਾਨਿ ਹੋਨ੍ਤਿ ਤਥਾ ਵਿਤ੍ਥਾਰੇਤਬ੍ਬਾਨਿ.)

ਝਾਨਸਂਯੁਤ੍ਤਂ [ਸਮਾਧਿਸਂਯੁਤ੍ਤਂ (ਸ੍ਯਾ. ਕਂ.)] ਸਮਤ੍ਤਂ.