੧੨. ਵਚ੍ਛਗੋਤ੍ਤਸਂਯੁਤ੍ਤਂ

੧. ਰੂਪਅਞ੍ਞਾਣਸੁਤ੍ਤਂ

੬੦੭. ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭੋ ਗੋਤਮ, ਹੇਤੁ, ਕੋ ਪਚ੍ਚਯੋ, ਯਾਨਿਮਾਨਿ [ਯੇਨਿਮਾਨਿ (?)] ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ, ਅਨ੍ਤਵਾ ਲੋਕੋਤਿ ਵਾ, ਅਨਨ੍ਤਵਾ ਲੋਕੋਤਿ ਵਾ, ਤਂ ਜੀਵਂ ਤਂ ਸਰੀਰਨ੍ਤਿ ਵਾ, ਅਞ੍ਞਂ ਜੀਵਂ ਅਞ੍ਞਂ ਸਰੀਰਨ੍ਤਿ ਵਾ, ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ, ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ, ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ, ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ? ‘‘ਰੂਪੇ ਖੋ, ਵਚ੍ਛ, ਅਞ੍ਞਾਣਾ, ਰੂਪਸਮੁਦਯੇ ਅਞ੍ਞਾਣਾ, ਰੂਪਨਿਰੋਧੇ ਅਞ੍ਞਾਣਾ, ਰੂਪਨਿਰੋਧਗਾਮਿਨਿਯਾ ਪਟਿਪਦਾਯ ਅਞ੍ਞਾਣਾ; ਏਵਮਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾਤਿ. ਅਯਂ ਖੋ, ਵਚ੍ਛ, ਹੇਤੁ, ਅਯਂ ਪਚ੍ਚਯੋ, ਯਾਨਿਮਾਨਿ [ਯੇਨ (ਸੀ.), ਯੇਨਿਮਾਨਿ (?)] ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ. ਪਠਮਂ.

੨. ਵੇਦਨਾਅਞ੍ਞਾਣਸੁਤ੍ਤਂ

੬੦੮. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭੋ ਗੋਤਮ, ਹੇਤੁ, ਕੋ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ? ‘‘ਵੇਦਨਾਯ ਖੋ, ਵਚ੍ਛ, ਅਞ੍ਞਾਣਾ, ਵੇਦਨਾਸਮੁਦਯੇ ਅਞ੍ਞਾਣਾ, ਵੇਦਨਾਨਿਰੋਧੇ ਅਞ੍ਞਾਣਾ, ਵੇਦਨਾਨਿਰੋਧਗਾਮਿਨਿਯਾ ਪਟਿਪਦਾਯ ਅਞ੍ਞਾਣਾ; ਏਵਮਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾਤਿ. ਅਯਂ ਖੋ, ਵਚ੍ਛ, ਹੇਤੁ, ਅਯਂ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ. ਦੁਤਿਯਂ.

੩. ਸਞ੍ਞਾਅਞ੍ਞਾਣਸੁਤ੍ਤਂ

੬੦੯. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭੋ ਗੋਤਮ, ਹੇਤੁ, ਕੋ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ? ‘‘ਸਞ੍ਞਾਯ ਖੋ, ਵਚ੍ਛ, ਅਞ੍ਞਾਣਾ, ਸਞ੍ਞਾਸਮੁਦਯੇ ਅਞ੍ਞਾਣਾ, ਸਞ੍ਞਾਨਿਰੋਧੇ ਅਞ੍ਞਾਣਾ, ਸਞ੍ਞਾਨਿਰੋਧਗਾਮਿਨਿਯਾ ਪਟਿਪਦਾਯ ਅਞ੍ਞਾਣਾ; ਏਵਮਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾਤਿ. ਅਯਂ ਖੋ, ਵਚ੍ਛ, ਹੇਤੁ, ਅਯਂ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ. ਤਤਿਯਂ.

੪. ਸਙ੍ਖਾਰਅਞ੍ਞਾਣਸੁਤ੍ਤਂ

੬੧੦. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭੋ ਗੋਤਮ, ਹੇਤੁ, ਕੋ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ? ‘‘ਸਙ੍ਖਾਰੇਸੁ ਖੋ, ਵਚ੍ਛ, ਅਞ੍ਞਾਣਾ, ਸਙ੍ਖਾਰਸਮੁਦਯੇ ਅਞ੍ਞਾਣਾ, ਸਙ੍ਖਾਰਨਿਰੋਧੇ ਅਞ੍ਞਾਣਾ, ਸਙ੍ਖਾਰਨਿਰੋਧਗਾਮਿਨਿਯਾ ਪਟਿਪਦਾਯ ਅਞ੍ਞਾਣਾ; ਏਵਮਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾਤਿ. ਅਯਂ ਖੋ, ਵਚ੍ਛ, ਹੇਤੁ, ਅਯਂ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ. ਚਤੁਤ੍ਥਂ.

੫. ਵਿਞ੍ਞਾਣਅਞ੍ਞਾਣਸੁਤ੍ਤਂ

੬੧੧. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭੋ ਗੋਤਮ, ਹੇਤੁ, ਕੋ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ …ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ? ‘‘ਵਿਞ੍ਞਾਣੇ ਖੋ, ਵਚ੍ਛ, ਅਞ੍ਞਾਣਾ, ਵਿਞ੍ਞਾਣਸਮੁਦਯੇ ਅਞ੍ਞਾਣਾ, ਵਿਞ੍ਞਾਣਨਿਰੋਧੇ ਅਞ੍ਞਾਣਾ, ਵਿਞ੍ਞਾਣਨਿਰੋਧਗਾਮਿਨਿਯਾ ਪਟਿਪਦਾਯ ਅਞ੍ਞਾਣਾ; ਏਵਮਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾਤਿ. ਅਯਂ ਖੋ, ਵਚ੍ਛ, ਹੇਤੁ, ਅਯਂ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ. ਪਞ੍ਚਮਂ.

੬-੧੦. ਰੂਪਅਦਸ੍ਸਨਾਦਿਸੁਤ੍ਤਪਞ੍ਚਕਂ

੬੧੨-੬੧੬. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭੋ ਗੋਤਮ, ਹੇਤੁ, ਕੋ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ? ਰੂਪੇ ਖੋ, ਵਚ੍ਛ, ਅਦਸ੍ਸਨਾ…ਪੇ… ਰੂਪਨਿਰੋਧਗਾਮਿਨਿਯਾ ਪਟਿਪਦਾਯ ਅਦਸ੍ਸਨਾ…ਪੇ… ਵੇਦਨਾਯ … ਸਞ੍ਞਾਯ … ਸਙ੍ਖਾਰੇਸੁ ਖੋ, ਵਚ੍ਛ, ਅਦਸ੍ਸਨਾ…ਪੇ… ਵਿਞ੍ਞਾਣੇ ਖੋ, ਵਚ੍ਛ, ਅਦਸ੍ਸਨਾ…ਪੇ… ਵਿਞ੍ਞਾਣਨਿਰੋਧਗਾਮਿਨਿਯਾ ਪਟਿਪਦਾਯ ਅਦਸ੍ਸਨਾ…ਪੇ…. ਦਸਮਂ.

੧੧-੧੫. ਰੂਪਅਨਭਿਸਮਯਾਦਿਸੁਤ੍ਤਪਞ੍ਚਕਂ

੬੧੭-੬੨੧. ਸਾਵਤ੍ਥਿਨਿਦਾਨਂ. ਰੂਪੇ ਖੋ, ਵਚ੍ਛ, ਅਨਭਿਸਮਯਾ…ਪੇ… ਰੂਪਨਿਰੋਧਗਾਮਿਨਿਯਾ ਪਟਿਪਦਾਯ ਅਨਭਿਸਮਯਾ…ਪੇ….

ਸਾਵਤ੍ਥਿਨਿਦਾਨਂ. ਵੇਦਨਾਯ ਖੋ, ਵਚ੍ਛ, ਅਨਭਿਸਮਯਾ…ਪੇ….

ਸਾਵਤ੍ਥਿਨਿਦਾਨਂ. ਸਞ੍ਞਾਯ ਖੋ, ਵਚ੍ਛ, ਅਨਭਿਸਮਯਾ…ਪੇ….

ਸਾਵਤ੍ਥਿਨਿਦਾਨਂ. ਸਙ੍ਖਾਰੇਸੁ ਖੋ, ਵਚ੍ਛ, ਅਨਭਿਸਮਯਾ…ਪੇ….

ਸਾਵਤ੍ਥਿਨਿਦਾਨਂ. ਵਿਞ੍ਞਾਣੇ ਖੋ, ਵਚ੍ਛ, ਅਨਭਿਸਮਯਾ…ਪੇ…. ਪਨ੍ਨਰਸਮਂ.

੧੬-੨੦. ਰੂਪਅਨਨੁਬੋਧਾਦਿਸੁਤ੍ਤਪਞ੍ਚਕਂ

੬੨੨-੬੨੬. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ – ਕੋ ਨੁ ਖੋ, ਭੋ ਗੋਤਮ, ਹੇਤੁ, ਕੋ ਪਚ੍ਚਯੋ…ਪੇ… ਰੂਪੇ ਖੋ, ਵਚ੍ਛ, ਅਨਨੁਬੋਧਾ…ਪੇ… ਰੂਪਨਿਰੋਧਗਾਮਿਨਿਯਾ ਪਟਿਪਦਾਯ ਅਨਨੁਬੋਧਾ…ਪੇ….

ਸਾਵਤ੍ਥਿਨਿਦਾਨਂ. ਵੇਦਨਾਯ ਖੋ, ਵਚ੍ਛ…ਪੇ….

ਸਾਵਤ੍ਥਿਨਿਦਾਨਂ. ਸਞ੍ਞਾਯ ਖੋ, ਵਚ੍ਛ…ਪੇ….

ਸਾਵਤ੍ਥਿਨਿਦਾਨਂ. ਸਙ੍ਖਾਰੇਸੁ ਖੋ, ਵਚ੍ਛ…ਪੇ….

ਸਾਵਤ੍ਥਿਨਿਦਾਨਂ. ਵਿਞ੍ਞਾਣੇ ਖੋ, ਵਚ੍ਛ ਅਨਨੁਬੋਧਾ…ਪੇ… ਵਿਞ੍ਞਾਣਨਿਰੋਧਗਾਮਿਨਿਯਾ ਪਟਿਪਦਾਯ ਅਨਨੁਬੋਧਾ. ਵੀਸਤਿਮਂ.

੨੧-੨੫. ਰੂਪਅਪ੍ਪਟਿਵੇਧਾਦਿਸੁਤ੍ਤਪਞ੍ਚਕਂ

੬੨੭-੬੩੧. ਸਾਵਤ੍ਥਿਨਿਦਾਨਂ. ਕੋ ਨੁ ਖੋ, ਭੋ ਗੋਤਮ, ਹੇਤੁ, ਕੋ ਪਚ੍ਚਯੋ…ਪੇ…. ਰੂਪੇ ਖੋ, ਵਚ੍ਛ, ਅਪ੍ਪਟਿਵੇਧਾ…ਪੇ… ਵਿਞ੍ਞਾਣੇ ਖੋ, ਵਚ੍ਛ, ਅਪ੍ਪਟਿਵੇਧਾ…ਪੇ…. ਪਞ੍ਚਵੀਸਤਿਮਂ.

੨੬-੩੦. ਰੂਪਅਸਲ੍ਲਕ੍ਖਣਾਦਿਸੁਤ੍ਤਪਞ੍ਚਕਂ

੬੩੨-੬੩੬. ਸਾਵਤ੍ਥਿਨਿਦਾਨਂ. ਰੂਪੇ ਖੋ, ਵਚ੍ਛ, ਅਸਲ੍ਲਕ੍ਖਣਾ…ਪੇ… ਵਿਞ੍ਞਾਣੇ ਖੋ, ਵਚ੍ਛ, ਅਸਲ੍ਲਕ੍ਖਣਾ…ਪੇ…. ਤਿਂਸਤਿਮਂ.

੩੧-੩੫. ਰੂਪਅਨੁਪਲਕ੍ਖਣਾਦਿਸੁਤ੍ਤਪਞ੍ਚਕਂ

੬੩੭-੬੪੧. ਸਾਵਤ੍ਥਿਨਿਦਾਨਂ. ਰੂਪੇ ਖੋ, ਵਚ੍ਛ, ਅਨੁਪਲਕ੍ਖਣਾ…ਪੇ… ਵਿਞ੍ਞਾਣੇ ਖੋ, ਵਚ੍ਛ, ਅਨੁਪਲਕ੍ਖਣਾ…ਪੇ…. ਪਞ੍ਚਤਿਂਸਤਿਮਂ.

੩੬-੪੦. ਰੂਪਅਪ੍ਪਚ੍ਚੁਪਲਕ੍ਖਣਾਦਿਸੁਤ੍ਤਪਞ੍ਚਕਂ

੬੪੨-੬੪੬. ਸਾਵਤ੍ਥਿਨਿਦਾਨਂ. ਰੂਪੇ ਖੋ, ਵਚ੍ਛ, ਅਪ੍ਪਚ੍ਚੁਪਲਕ੍ਖਣਾ…ਪੇ… ਵਿਞ੍ਞਾਣੇ ਖੋ, ਵਚ੍ਛ, ਅਪ੍ਪਚ੍ਚੁਪਲਕ੍ਖਣਾ…ਪੇ…. ਚਤ੍ਤਾਲੀਸਮਂ.

੪੧-੪੫. ਰੂਪਅਸਮਪੇਕ੍ਖਣਾਦਿਸੁਤ੍ਤਪਞ੍ਚਕਂ

੬੪੭-੬੫੧. ਸਾਵਤ੍ਥਿਨਿਦਾਨਂ. ਰੂਪੇ ਖੋ, ਵਚ੍ਛ, ਅਸਮਪੇਕ੍ਖਣਾ…ਪੇ… ਵਿਞ੍ਞਾਣੇ ਖੋ, ਵਚ੍ਛ, ਅਸਮਪੇਕ੍ਖਣਾ…ਪੇ…. ਪਞ੍ਚਚਤ੍ਤਾਲੀਸਮਂ.

੪੬-੫੦. ਰੂਪਅਪ੍ਪਚ੍ਚੁਪੇਕ੍ਖਣਾਦਿਸੁਤ੍ਤਪਞ੍ਚਕਂ

੬੫੨-੬੫੬. ਸਾਵਤ੍ਥਿਨਿਦਾਨਂ. ਰੂਪੇ ਖੋ, ਵਚ੍ਛ, ਅਪ੍ਪਚ੍ਚੁਪੇਕ੍ਖਣਾ…ਪੇ… ਵਿਞ੍ਞਾਣੇ ਖੋ, ਵਚ੍ਛ, ਅਪ੍ਪਚ੍ਚੁਪੇਕ੍ਖਣਾ…ਪੇ…. ਪਞ੍ਞਾਸਮਂ.

੫੧-੫੪. ਰੂਪਅਪ੍ਪਚ੍ਚਕ੍ਖਕਮ੍ਮਾਦਿਸੁਤ੍ਤਚਤੁਕ੍ਕਂ

੬੫੭-੬੬੦. ਸਾਵਤ੍ਥਿਨਿਦਾਨਂ. ਅਥ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭੋ ਗੋਤਮ, ਹੇਤੁ, ਕੋ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ? ਰੂਪੇ ਖੋ, ਵਚ੍ਛ, ਅਪ੍ਪਚ੍ਚਕ੍ਖਕਮ੍ਮਾ, ਰੂਪਸਮੁਦਯੇ ਅਪ੍ਪਚ੍ਚਕ੍ਖਕਮ੍ਮਾ, ਰੂਪਨਿਰੋਧੇ ਅਪ੍ਪਚ੍ਚਕ੍ਖਕਮ੍ਮਾ, ਰੂਪਨਿਰੋਧਗਾਮਿਨਿਯਾ ਪਟਿਪਦਾਯ ਅਪ੍ਪਚ੍ਚਕ੍ਖਕਮ੍ਮਾ…ਪੇ….

ਸਾਵਤ੍ਥਿਨਿਦਾਨਂ. ਵੇਦਨਾਯ ਖੋ, ਵਚ੍ਛ, ਅਪ੍ਪਚ੍ਚਕ੍ਖਕਮ੍ਮਾ…ਪੇ… ਵੇਦਨਾਨਿਰੋਧਗਾਮਿਨਿਯਾ ਪਟਿਪਦਾਯ ਅਪ੍ਪਚ੍ਚਕ੍ਖਕਮ੍ਮਾ…ਪੇ….

ਸਾਵਤ੍ਥਿਨਿਦਾਨਂ. ਸਞ੍ਞਾਯ ਖੋ, ਵਚ੍ਛ, ਅਪ੍ਪਚ੍ਚਕ੍ਖਕਮ੍ਮਾ…ਪੇ… ਸਞ੍ਞਾਨਿਰੋਧਗਾਮਿਨਿਯਾ ਪਟਿਪਦਾਯ ਅਪ੍ਪਚ੍ਚਕ੍ਖਕਮ੍ਮਾ…ਪੇ….

ਸਾਵਤ੍ਥਿਨਿਦਾਨਂ. ਸਙ੍ਖਾਰੇਸੁ ਖੋ, ਵਚ੍ਛ, ਅਪ੍ਪਚ੍ਚਕ੍ਖਕਮ੍ਮਾ…ਪੇ… ਸਙ੍ਖਾਰਨਿਰੋਧਗਾਮਿਨਿਯਾ ਪਟਿਪਦਾਯ ਅਪ੍ਪਚ੍ਚਕ੍ਖਕਮ੍ਮਾ…ਪੇ…. ਚਤੁਪਞ੍ਞਾਸਮਂ.

੫੫. ਵਿਞ੍ਞਾਣਅਪ੍ਪਚ੍ਚਕ੍ਖਕਮ੍ਮਸੁਤ੍ਤਂ

੬੬੧. ਸਾਵਤ੍ਥਿਨਿਦਾਨਂ. ‘‘ਵਿਞ੍ਞਾਣੇ ਖੋ, ਵਚ੍ਛ, ਅਪ੍ਪਚ੍ਚਕ੍ਖਕਮ੍ਮਾ, ਵਿਞ੍ਞਾਣਸਮੁਦਯੇ ਅਪ੍ਪਚ੍ਚਕ੍ਖਕਮ੍ਮਾ, ਵਿਞ੍ਞਾਣਨਿਰੋਧੇ ਅਪ੍ਪਚ੍ਚਕ੍ਖਕਮ੍ਮਾ, ਵਿਞ੍ਞਾਣਨਿਰੋਧਗਾਮਿਨਿਯਾ ਪਟਿਪਦਾਯ ਅਪ੍ਪਚ੍ਚਕ੍ਖਕਮ੍ਮਾ; ਏਵਮਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾਤਿ. ਅਯਂ ਖੋ, ਵਚ੍ਛ, ਹੇਤੁ, ਅਯਂ ਪਚ੍ਚਯੋ, ਯਾਨਿਮਾਨਿ ਅਨੇਕਵਿਹਿਤਾਨਿ ਦਿਟ੍ਠਿਗਤਾਨਿ ਲੋਕੇ ਉਪ੍ਪਜ੍ਜਨ੍ਤਿ – ਸਸ੍ਸਤੋ ਲੋਕੋਤਿ ਵਾ, ਅਸਸ੍ਸਤੋ ਲੋਕੋਤਿ ਵਾ, ਅਨ੍ਤਵਾ ਲੋਕੋਤਿ ਵਾ, ਅਨਨ੍ਤਵਾ ਲੋਕੋਤਿ ਵਾ, ਤਂ ਜੀਵਂ ਤਂ ਸਰੀਰਨ੍ਤਿ ਵਾ, ਅਞ੍ਞਂ ਜੀਵਂ ਅਞ੍ਞਂ ਸਰੀਰਨ੍ਤਿ ਵਾ, ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ, ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ, ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ, ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’’ਤਿ. ਪਞ੍ਚਪਞ੍ਞਾਸਮਂ.

ਵਚ੍ਛਗੋਤ੍ਤਸਂਯੁਤ੍ਤਂ ਸਮਤ੍ਤਂ.