੩. ਅਸ੍ਸੁਸੁਤ੍ਤਂ

੧੨੬. ਸਾਵਤ੍ਥਿਯਂ ਵਿਹਰਤਿ…ਪੇ… ‘‘ਅਨਮਤਗ੍ਗੋਯਂ, ਭਿਕ੍ਖਵੇ, ਸਂਸਾਰੋ. ਪੁਬ੍ਬਾ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂ ਤਣ੍ਹਾਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤਂ. ਤਂ ਕਿਂ ਮਞ੍ਞਥ, ਭਿਕ੍ਖਵੇ, ਕਤਮਂ ਨੁ ਖੋ ਬਹੁਤਰਂ, ਯਂ ਵਾ ਵੋ ਇਮਿਨਾ ਦੀਘੇਨ ਅਦ੍ਧੁਨਾ ਸਨ੍ਧਾਵਤਂ ਸਂਸਰਤਂ ਅਮਨਾਪਸਮ੍ਪਯੋਗਾ ਮਨਾਪਵਿਪ੍ਪਯੋਗਾ ਕਨ੍ਦਨ੍ਤਾਨਂ ਰੋਦਨ੍ਤਾਨਂ [ਰੁਦਨ੍ਤਾਨਂ (ਸੀ.)] ਅਸ੍ਸੁ ਪਸ੍ਸਨ੍ਨਂ [ਪਸ੍ਸਨ੍ਦਂ (ਕ. ਸੀ.), ਪਸਨ੍ਦਂ (ਸ੍ਯਾ. ਕਂ.), ਪਸਨ੍ਨਂ (ਪੀ. ਕ.)] ਪਗ੍ਘਰਿਤਂ, ਯਂ ਵਾ ਚਤੂਸੁ ਮਹਾਸਮੁਦ੍ਦੇਸੁ ਉਦਕ’’ਨ੍ਤਿ? ‘‘ਯਥਾ ਖੋ ਮਯਂ, ਭਨ੍ਤੇ, ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮ, ਏਤਦੇਵ, ਭਨ੍ਤੇ, ਬਹੁਤਰਂ ਯਂ ਨੋ ਇਮਿਨਾ ਦੀਘੇਨ ਅਦ੍ਧੁਨਾ ਸਨ੍ਧਾਵਤਂ ਸਂਸਰਤਂ ਅਮਨਾਪਸਮ੍ਪਯੋਗਾ ਮਨਾਪਵਿਪ੍ਪਯੋਗਾ ਕਨ੍ਦਨ੍ਤਾਨਂ ਰੋਦਨ੍ਤਾਨਂ ਅਸ੍ਸੁ ਪਸ੍ਸਨ੍ਨਂ ਪਗ੍ਘਰਿਤਂ, ਨ ਤ੍ਵੇਵ ਚਤੂਸੁ ਮਹਾਸਮੁਦ੍ਦੇਸੁ ਉਦਕ’’ਨ੍ਤਿ.

‘‘ਸਾਧੁ ਸਾਧੁ, ਭਿਕ੍ਖਵੇ, ਸਾਧੁ ਖੋ ਮੇ ਤੁਮ੍ਹੇ, ਭਿਕ੍ਖਵੇ, ਏਵਂ ਧਮ੍ਮਂ ਦੇਸਿਤਂ ਆਜਾਨਾਥ. ਏਤਦੇਵ, ਭਿਕ੍ਖਵੇ, ਬਹੁਤਰਂ ਯਂ ਵੋ ਇਮਿਨਾ ਦੀਘੇਨ ਅਦ੍ਧੁਨਾ ਸਨ੍ਧਾਵਤਂ ਸਂਸਰਤਂ ਅਮਨਾਪਸਮ੍ਪਯੋਗਾ ਮਨਾਪਵਿਪ੍ਪਯੋਗਾ ਕਨ੍ਦਨ੍ਤਾਨਂ ਰੋਦਨ੍ਤਾਨਂ ਅਸ੍ਸੁ ਪਸ੍ਸਨ੍ਨਂ ਪਗ੍ਘਰਿਤਂ, ਨ ਤ੍ਵੇਵ ਚਤੂਸੁ ਮਹਾਸਮੁਦ੍ਦੇਸੁ ਉਦਕਂ. ਦੀਘਰਤ੍ਤਂ ਵੋ, ਭਿਕ੍ਖਵੇ, ਮਾਤੁਮਰਣਂ ਪਚ੍ਚਨੁਭੂਤਂ; ਤੇਸਂ ਵਾ ਮਾਤੁਮਰਣਂ ਪਚ੍ਚਨੁਭੋਨ੍ਤਾਨਂ ਅਮਨਾਪਸਮ੍ਪਯੋਗਾ ਮਨਾਪਵਿਪ੍ਪਯੋਗਾ ਕਨ੍ਦਨ੍ਤਾਨਂ ਰੋਦਨ੍ਤਾਨਂ ਅਸ੍ਸੁ ਪਸ੍ਸਨ੍ਨਂ ਪਗ੍ਘਰਿਤਂ, ਨ ਤ੍ਵੇਵ ਚਤੂਸੁ ਮਹਾਸਮੁਦ੍ਦੇਸੁ ਉਦਕਂ. ਦੀਘਰਤ੍ਤਂ ਵੋ, ਭਿਕ੍ਖਵੇ, ਪਿਤੁਮਰਣਂ ਪਚ੍ਚਨੁਭੂਤਂ …ਪੇ… ਭਾਤੁਮਰਣਂ ਪਚ੍ਚਨੁਭੂਤਂ… ਭਗਿਨਿਮਰਣਂ ਪਚ੍ਚਨੁਭੂਤਂ… ਪੁਤ੍ਤਮਰਣਂ ਪਚ੍ਚਨੁਭੂਤਂ… ਧੀਤੁਮਰਣਂ ਪਚ੍ਚਨੁਭੂਤਂ… ਞਾਤਿਬ੍ਯਸਨਂ ਪਚ੍ਚਨੁਭੂਤਂ… ਭੋਗਬ੍ਯਸਨਂ ਪਚ੍ਚਨੁਭੂਤਂ. ਦੀਘਰਤ੍ਤਂ ਵੋ, ਭਿਕ੍ਖਵੇ, ਰੋਗਬ੍ਯਸਨਂ ਪਚ੍ਚਨੁਭੂਤਂ, ਤੇਸਂ ਵੋ ਰੋਗਬ੍ਯਸਨਂ ਪਚ੍ਚਨੁਭੋਨ੍ਤਾਨਂ ਅਮਨਾਪਸਮ੍ਪਯੋਗਾ ਮਨਾਪਵਿਪ੍ਪਯੋਗਾ ਕਨ੍ਦਨ੍ਤਾਨਂ ਰੋਦਨ੍ਤਾਨਂ ਅਸ੍ਸੁ ਪਸ੍ਸਨ੍ਨਂ ਪਗ੍ਘਰਿਤਂ, ਨ ਤ੍ਵੇਵ ਚਤੂਸੁ ਮਹਾਸਮੁਦ੍ਦੇਸੁ ਉਦਕਂ. ਤਂ ਕਿਸ੍ਸ ਹੇਤੁ? ਅਨਮਤਗ੍ਗੋਯਂ, ਭਿਕ੍ਖਵੇ, ਸਂਸਾਰੋ …ਪੇ… ਯਾਵਞ੍ਚਿਦਂ, ਭਿਕ੍ਖਵੇ, ਅਲਮੇਵ ਸਬ੍ਬਸਙ੍ਖਾਰੇਸੁ ਨਿਬ੍ਬਿਨ੍ਦਿਤੁਂ, ਅਲਂ ਵਿਰਜ੍ਜਿਤੁਂ, ਅਲਂ ਵਿਮੁਚ੍ਚਿਤੁ’’ਨ੍ਤਿ. ਤਤਿਯਂ.