੭. ਨਾਗਦਤ੍ਤਸੁਤ੍ਤਂ

੨੨੭. ਏਕਂ ਸਮਯਂ ਆਯਸ੍ਮਾ ਨਾਗਦਤ੍ਤੋ ਕੋਸਲੇਸੁ ਵਿਹਰਤਿ ਅਞ੍ਞਤਰਸ੍ਮਿਂ ਵਨਸਣ੍ਡੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਨਾਗਦਤ੍ਤੋ ਅਤਿਕਾਲੇਨ ਗਾਮਂ ਪਵਿਸਤਿ, ਅਤਿਦਿਵਾ ਪਟਿਕ੍ਕਮਤਿ. ਅਥ ਖੋ ਯਾ ਤਸ੍ਮਿਂ ਵਨਸਣ੍ਡੇ ਅਧਿਵਤ੍ਥਾ ਦੇਵਤਾ ਆਯਸ੍ਮਤੋ ਨਾਗਦਤ੍ਤਸ੍ਸ ਅਨੁਕਮ੍ਪਿਕਾ ਅਤ੍ਥਕਾਮਾ ਆਯਸ੍ਮਨ੍ਤਂ ਨਾਗਦਤ੍ਤਂ ਸਂਵੇਜੇਤੁਕਾਮਾ ਯੇਨਾਯਸ੍ਮਾ ਨਾਗਦਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਨਾਗਦਤ੍ਤਂ ਗਾਥਾਹਿ ਅਜ੍ਝਭਾਸਿ –

‘‘ਕਾਲੇ ਪਵਿਸ ਨਾਗਦਤ੍ਤ, ਦਿਵਾ ਚ ਆਗਨ੍ਤ੍ਵਾ ਅਤਿਵੇਲਚਾਰੀ;

ਸਂਸਟ੍ਠੋ ਗਹਟ੍ਠੇਹਿ, ਸਮਾਨਸੁਖਦੁਕ੍ਖੋ.

‘‘ਭਾਯਾਮਿ ਨਾਗਦਤ੍ਤਂ ਸੁਪ੍ਪਗਬ੍ਭਂ, ਕੁਲੇਸੁ ਵਿਨਿਬਦ੍ਧਂ;

ਮਾ ਹੇਵ ਮਚ੍ਚੁਰਞ੍ਞੋ ਬਲਵਤੋ, ਅਨ੍ਤਕਸ੍ਸ ਵਸਂ ਉਪੇਸੀ’’ਤਿ [ਵਸਮੇਯ੍ਯਾਤਿ (ਸੀ. ਪੀ.), ਵਸਮੇਸੀਤਿ (ਸ੍ਯਾ. ਕਂ.)].

ਅਥ ਖੋ ਆਯਸ੍ਮਾ ਨਾਗਦਤ੍ਤੋ ਤਾਯ ਦੇਵਤਾਯ ਸਂਵੇਜਿਤੋ ਸਂਵੇਗਮਾਪਾਦੀਤਿ.