੩. ਕਸ੍ਸਪਗੋਤ੍ਤਸੁਤ੍ਤਂ

੨੨੩. ਏਕਂ ਸਮਯਂ ਆਯਸ੍ਮਾ ਕਸ੍ਸਪਗੋਤ੍ਤੋ ਕੋਸਲੇਸੁ ਵਿਹਰਤਿ ਅਞ੍ਞਤਰਸ੍ਮਿਂ ਵਨਸਣ੍ਡੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਕਸ੍ਸਪਗੋਤ੍ਤੋ ਦਿਵਾਵਿਹਾਰਗਤੋ ਅਞ੍ਞਤਰਂ ਛੇਤਂ ਓਵਦਤਿ. ਅਥ ਖੋ ਯਾ ਤਸ੍ਮਿਂ ਵਨਸਣ੍ਡੇ ਅਧਿਵਤ੍ਥਾ ਦੇਵਤਾ ਆਯਸ੍ਮਨ੍ਤਂ ਕਸ੍ਸਪਗੋਤ੍ਤਂ ਸਂਵੇਜੇਤੁਕਾਮਾ ਯੇਨਾਯਸ੍ਮਾ ਕਸ੍ਸਪਗੋਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਕਸ੍ਸਪਗੋਤ੍ਤਂ ਗਾਥਾਹਿ ਅਜ੍ਝਭਾਸਿ –

‘‘ਗਿਰਿਦੁਗ੍ਗਚਰਂ ਛੇਤਂ, ਅਪ੍ਪਪਞ੍ਞਂ ਅਚੇਤਸਂ;

ਅਕਾਲੇ ਓਵਦਂ ਭਿਕ੍ਖੁ, ਮਨ੍ਦੋਵ ਪਟਿਭਾਤਿ ਮਂ.

‘‘ਸੁਣਾਤਿ ਨ ਵਿਜਾਨਾਤਿ, ਆਲੋਕੇਤਿ ਨ ਪਸ੍ਸਤਿ;

ਧਮ੍ਮਸ੍ਮਿਂ ਭਞ੍ਞਮਾਨਸ੍ਮਿਂ, ਅਤ੍ਥਂ ਬਾਲੋ ਨ ਬੁਜ੍ਝਤਿ.

‘‘ਸਚੇਪਿ ਦਸ ਪਜ੍ਜੋਤੇ, ਧਾਰਯਿਸ੍ਸਸਿ ਕਸ੍ਸਪ;

ਨੇਵ ਦਕ੍ਖਤਿ ਰੂਪਾਨਿ, ਚਕ੍ਖੁ ਹਿਸ੍ਸ ਨ ਵਿਜ੍ਜਤੀ’’ਤਿ.

ਅਥ ਖੋ ਆਯਸ੍ਮਾ ਕਸ੍ਸਪਗੋਤ੍ਤੋ ਤਾਯ ਦੇਵਤਾਯ ਸਂਵੇਜਿਤੋ ਸਂਵੇਗਮਾਪਾਦੀਤਿ.