੨. ਉਦਯਸੁਤ੍ਤਂ

੧੯੮. ਸਾਵਤ੍ਥਿਨਿਦਾਨਂ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਉਦਯਸ੍ਸ ਬ੍ਰਾਹ੍ਮਣਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ. ਅਥ ਖੋ ਉਦਯੋ ਬ੍ਰਾਹ੍ਮਣੋ ਭਗਵਤੋ ਪਤ੍ਤਂ ਓਦਨੇਨ ਪੂਰੇਸਿ. ਦੁਤਿਯਮ੍ਪਿ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਉਦਯਸ੍ਸ ਬ੍ਰਾਹ੍ਮਣਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ…ਪੇ… ਤਤਿਯਮ੍ਪਿ ਖੋ ਉਦਯੋ ਬ੍ਰਾਹ੍ਮਣੋ ਭਗਵਤੋ ਪਤ੍ਤਂ ਓਦਨੇਨ ਪੂਰੇਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਪਕਟ੍ਠਕੋਯਂ ਸਮਣੋ ਗੋਤਮੋ ਪੁਨਪ੍ਪੁਨਂ ਆਗਚ੍ਛਤੀ’’ਤਿ.

‘‘ਪੁਨਪ੍ਪੁਨਞ੍ਚੇਵ ਵਪਨ੍ਤਿ ਬੀਜਂ, ਪੁਨਪ੍ਪੁਨਂ ਵਸ੍ਸਤਿ ਦੇਵਰਾਜਾ;

ਪੁਨਪ੍ਪੁਨਂ ਖੇਤ੍ਤਂ ਕਸਨ੍ਤਿ ਕਸ੍ਸਕਾ, ਪੁਨਪ੍ਪੁਨਂ ਧਞ੍ਞਮੁਪੇਤਿ ਰਟ੍ਠਂ.

‘‘ਪੁਨਪ੍ਪੁਨਂ ਯਾਚਕਾ ਯਾਚਯਨ੍ਤਿ, ਪੁਨਪ੍ਪੁਨਂ ਦਾਨਪਤੀ ਦਦਨ੍ਤਿ;

ਪੁਨਪ੍ਪੁਨਂ ਦਾਨਪਤੀ ਦਦਿਤ੍ਵਾ, ਪੁਨਪ੍ਪੁਨਂ ਸਗ੍ਗਮੁਪੇਨ੍ਤਿ ਠਾਨਂ.

‘‘ਪੁਨਪ੍ਪੁਨਂ ਖੀਰਨਿਕਾ ਦੁਹਨ੍ਤਿ, ਪੁਨਪ੍ਪੁਨਂ ਵਚ੍ਛੋ ਉਪੇਤਿ ਮਾਤਰਂ;

ਪੁਨਪ੍ਪੁਨਂ ਕਿਲਮਤਿ ਫਨ੍ਦਤਿ ਚ, ਪੁਨਪ੍ਪੁਨਂ ਗਬ੍ਭਮੁਪੇਤਿ ਮਨ੍ਦੋ.

‘‘ਪੁਨਪ੍ਪੁਨਂ ਜਾਯਤਿ ਮੀਯਤਿ ਚ, ਪੁਨਪ੍ਪੁਨਂ ਸਿਵਥਿਕਂ [ਸੀਵਥਿਕਂ (ਸੀ. ਸ੍ਯਾ. ਕਂ. ਪੀ.)] ਹਰਨ੍ਤਿ;

ਮਗ੍ਗਞ੍ਚ ਲਦ੍ਧਾ ਅਪੁਨਬ੍ਭਵਾਯ, ਨ ਪੁਨਪ੍ਪੁਨਂ ਜਾਯਤਿ ਭੂਰਿਪਞ੍ਞੋ’’ਤਿ [ਪੁਨਪ੍ਪੁਨਂ ਜਾਯਤਿ ਭੂਰਿਪਞ੍ਞੋਤਿ (ਸ੍ਯਾ. ਕਂ. ਕ.)].

ਏਵਂ ਵੁਤ੍ਤੇ, ਉਦਯੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ… ਉਪਾਸਕਂ ਮਂ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ.